1. Na un ten hii dee salufuwan tuu o dë a liba ala?

 SÖMËNI jaa a fesi dee dinima u Jehovah bi ta hakisi deseei taa: ’Na un ten Jehovah o tei dee salufuwan dee dë a goonliba aki tja go a liba ala?’ U bi ta pakisei taa wantu u dee salufuwan bi o fika a goonliba aki, nöö de bi o libi a di Paladëisi u wan pisiten baka di feti u Amagedon. A di Waktitoren u 15 u baimatu-liba u di jaa 2013, u bi lei taa hii dee salufuwan dee dë a goonliba aki tuu, o go a liba ala ufö di feti u Amagedon bigi.​—Mat. 24:31.

2. Andi sö fuu sa ta hakisi deseei, söseei andi woo luku a di woto aki?

² So fuu sa ta hakisi deseei taa: Andi o pasa ku dee „woto sikafu” dee o hoi deseei a Jehovah a di pisiten u di „gaan fuka”? (Joh. 10:16; Mat. 24:21) So u dee „woto sikafu” sa ta booko de hedi taa de o dë de wanwan, söseei taa sëmbë an o dë u heepi de te dee salufuwan tuu go a liba ala. Boo luku tu woto a Bëibel di sa mbei de ta pakisei sö. Boiti di dë, woo luku faandi mbei an dë fanöudu u de ta booko de hedi.

ANDI NA O PASA KU DEE WOTO SIKAPU?

3-4. Andi so fuu sa ta pakisei, nöö faandi mbei de sa ta pakisei sö?

³ So fuu sa ta pakisei taa dee woto sikapu sa tapa u dini Jehovah, te dee salufu baaa u di Tii Kulupu an dë u tii u möön. A kan taa so woto u Bëibel sa mbei de ta pakisei sö. Boo buta pakisei a tu u de. Di fosuwan ta taki soni u di Gaan Mindima de kai Jojada. A bi dë wan sëmbë di bi ta hoi hënseei a Gadu, hën ku ën mujëë Josabati bi tjubi wan njönku womi mii de kai Joasi, nöö de bi heepi ën faa ko toon wan bunu könu di ta hoi hënseei a Gadu. Joasi bi ta dini Jehovah, söseei a bi ta du  bunu soni di Jojada bi dë a libi. Ma baka di Jojada dëdë, hën Joasi bigi ta du hogi. A bi ta haika wanlö hogihati hedima, hën a bia baka da Jehovah.​—2 Klon. 24:2, 15-19.

⁴ Di u tu woto da di u dee Keesitu sëmbë dee bi ta libi a di pisiten baka di dee apösutu dëdë. Johanisi da di lasiti wan di bi dëdë. Di a bi dë a libi, a bi ta heepi sömëni Keesitu sëmbë u de hoi deseei a Jehovah (3 Joh. 4). Leti kumafa dee woto apösutu bi wooko taanga, sö nöö Johanisi seei bi wooko taanga u tjubi dee kemeente da dee poipoi lei di dee sëmbë dee bi bia baka da di tuutuu lei bi ta paaja (1 Joh. 2:18). Ma baka di Johanisi dëdë, hën sömëni u dee baaa ku dee sisa ko tei dee lei u dee sëmbë dee bi bia baka da di biibi. Wantu jaa baka di dë, hën hii dee kemeente tuu bi ko fuu ku sëmbë di bi bia baka da di biibi.

5. Andi wa musu pakisei taa o pasa ku dee woto sikapu, te u luku dee tu woto dee u bi taki soni u de?

⁵ A dë sö taa dee tu woto dee u luku aki ta lei taa di seei soni hën o pasa ku dee woto sikapu u Keesitu, te de tei dee salufuwan tja go a liba ala u? A di ten dë, dee dinima u Jehovah dee dë a goonliba aki o bia baka dëën kumafa Joasi bi du ö? Nasö de o bia baka da di tuutuu lei kumafa so u dee fesiten Keesitu sëmbë bi du ö? Wë nöiti de o du sö! U sa dë seiki taa te de tei dee salufuwan tja go a liba ala, nöö dee woto sikapu o dini Jehovah go dou, söseei Jehovah o heepi de go dou. Faandi mbei u sa dë seiki u di soni aki?

DEE SËMBË U JEHOVAH O TA DINI ËN GO DOU KUMAFA A KË

6. Soni fuun pisiten woo taki?

⁶ Faandi mbei u sa dë seiki taa dee sëmbë u Jehovah o ta dini ën go dou kumafa a kë, a di pisiten u di gaan fuka? Wë u di di Bëibel ta taki soni u di ten di u ta libi aki. Di ten di u ta libi aki tooka gaanfa seei ku di u dee Isaëli sëmbë, söseei a tooka gaanfa ku di ten baka di dee apösutu dëdë. Boo taki soni u dee pisiten aki möön bunu: Di ten u dee Isaëli sëmbë, di ten baka di dee apösutu dëdë, ku di ten fuu aki, „ka Gadu o seeka hii soni ko bunu baka”.​—Tjab. 3:21.

7. Faandi mbei dee Isaëli sëmbë dee bi ta hoi deseei a Jehovah an bi lasi hati, di de bi si taa dee könu ku dee woto Isaëli sëmbë bi ta libi a wan hogihati fasi?

⁷ A di ten u dee Isaëli sëmbë. Ufö Mosesi dëdë a bi piki dee Isaëli sëmbë taa: „Mi sabi bumbuu taa baka te mi dëdë, nöö woon du soni di an bunu, söseei wan o haika dee soni dee mi bi taki da unu möön” (Deto. 31:29). Mosesi bi taki tu taa ee de hopo fia ku Gadu, nöö Gadu o mbei de go a katibo (Deto. 28:35, 36). Dee soni dee a bi taki bi pasa tuutuu ö? Wë aai. Höndöhöndö jaa longi sömëni könu bi du soni di an bi bunu a Jehovah wojo, hën di föluku u Gadu bi waka a de baka. Di soni dë bi mbei taa Jehovah bi sitaafu dee hogihati sëmbë, söseei an bi kë u Isaëli sëmbë tii kuma könu möön (Eze. 21:25-27). Dee Isaëli sëmbë dee bi ta hoi deseei a Jehovah bi feni taanga seei, di de bi si taa dee soni dee Gadu bi taki bi pasa tuutuu.​—Jes. 55:10, 11.

8. A musu bigi da u taa dee kemeente dee bi dë a di pisiten baka di dee apösutu bi dëdë, bia baka da di biibi ö? Booko ën a piki möni.

⁸ Di pisiten baka di dee apösutu dëdë. A musu bigi da u taa dee kemeente dee bi dë a di pisiten baka di dee apösutu bi dëdë, bia baka da di tuutuu lei ö? Wë nönö, na seei. Biga Jesosi bi taki a fesi taa sëmbë bi o bia baka da di biibi (Mat. 7:21-23; 13:24-30, 36-43). Apösutu Paulosu, ku Petuisi, ku Johanisi bi sabi taa dee soni dee Jesosi bi taki bi bigi ta pasa tuutuu a di ten u de (2 Tes. 2:3, 7; 2 Pet. 2:1; 1 Joh. 2:18). Baka di di lasiti apösutu dëdë, hën dee kemeente ko fuu ku sëmbë di bia baka da di tuutuu lei. Dee Keesitu sëmbë  dee bi bia baka da di biibi bi ko dë sëmbë di dë a di Gaan Babilon. Di Gaan Babilon da hii dee poipoi keiki u goonliba tuu. Di soni di Jesosi bi taki bi ko pasa tuutuu.

9. Unfa di ten di u ta libi aki tooka ku di ten u dee Isaëli sëmbë, söseei ku di ten di gaansë u dee Keesitu sëmbë bi bia baka da di tuutuu lei baka di dee apösutu dëdë?

⁹ Di ten „ka Gadu o seeka hii soni ko bunu baka”. Di ten di u ta libi aki tooka ku di ten u dee Isaëli sëmbë, söseei a tooka ku di ten di gaansë u dee fesiten Keesitu sëmbë bi bia baka da di biibi baka di dee apösutu dëdë. Unfa de ta kai di ten di u ta libi aki? Wë u guwenti u taki taa u ta libi a „dee lasiti daka” u di hogi goonliba aki (2 Tim. 3:1). Ma di Bëibel ta lei u tu taa wan möön fanöudu pisiten, söseei wan möön langa pisiten bi bigi a di pisiten di dee lasiti daka bigi. Di pisiten di u ta taki fëën aki, o go dou te a di pisiten ka di Mësiasi Könuköndë o puu zöndu kaba a mundu, söseei ka o mbei hii di goonliba ko toon wan paladëisi. Di pisiten di u ta libi aki di Bëibel ta kai di ten „ka Gadu o seeka hii soni ko bunu baka”. (Tjab. 3:21). A bigi a di jaa 1914. Andi a mbei ko bunu baka a di ten dë? Wë, Jesosi bi toon Könu a liba ala. A söwan fasi Jehovah bi toona buta wan bakamii u Dafiti u tii dëën baka. Wë, na di soni dë nöö Jehovah bi du. A bi toona seti soni u de sa ta dini ën a wan soifi fasi baka! (Jes. 2:2-4; Eze. 11:17-20) Di tuutuu biibi o toona poi baka u?

10. (a) Andi di Bëibel bi taki u di tuutuu biibi a di ten aki? (Jesaaja 54:17) (b) Faandi mbei dee tjabukama woto aki ta da u taanga?

¹⁰ Lesi Jesaaja 54:17. Pakisei di tjabukama woto aki: „Na wan feti lai di de tei u ko feti ku i o sa mbei de wini i”! Di soni aki ta pasa tuutuu a di ten fuu aki. Dee soni dee sikifi a Jesaaja 54:13, 14 seei ta taki soni u di ten aki tu. A ta taki taa: „Jehovah o da hii dee mii fii lei, söseei soni o waka bunu da de. Hii juu joo ta du soni a wan leti fasi. . . . Ja o fëëë na wan hojo soni, söseei na wan soni o sa mbei i panta, u di na wan soni o dë di o sa mbei i fëëë.” Saatan seei di „abi taki a di goonliba aki” na abi di makiti u tapa di wooko di dee dinima u Gadu ta du (2 Kol. 4:4). Gadu seti soni u de sa ta dini ën a wan soifi fasi baka, nöö nöiti möön sëmbë o poi ën. A o dë sö u nöömö. Na wan feti lai di de tei u ko feti ku u o sa mbei de wini u!

ANDI O PASA?

11. Faandi mbei u dë seiki taa dee woto sikapu an o dë de wanwan, te de tei dee salufuwan tja go a liba ala?

¹¹ Andi o pasa te de tei dee salufuwan tja go a liba ala? Hoi a pakisei taa Jesosi da di  Sikapuma fuu. Hën da di hedima u di kemeente u Keesitu sëmbë. Jesosi bi taki gbelingbelin taa: „Wan kodo fesima nöö un abi, hën da Keesitu” (Mat. 23:10). Hii juu Jesosi di Könu fuu o ta heepi u. U di Jesosi hën o ta tii, mbei an o dë u dee bakama fëën dee o dë a goonliba aki fëëë. Tuu ta wa sabi finifini unfa Keesitu o tii dee bakama fëën te hii dee salufuwan tuu go a liba ala. Boo buta pakisei a wantu woto u sëmbë u Bëibel di sa da u taanga.

12. Unfa Jehovah bi ta heepi di föluku fëën (a) baka di Mosesi dëdë? (b) baka di a bi da Elia wan woto wooko faa du? (Luku di peentje tu.)

¹² Mosesi bi dëdë ufö dee Isaëli sëmbë go a di paamusi köndë. Ma andi bi pasa ku di föluku u Gadu baka ten? Jehovah an bi ta heepi de möön u? Wë nönö, Jehovah bi ta sölugu de go dou solanga de bi ta hoi deseei nëën. Bifö Mosesi dëdë, Jehovah bi piki ën faa buta Josua faa tii dee Isaëli sëmbë, nöö Mosesi bi puu sömëni jaa ta lei Josua soni (Ëki. 33:11; Deto. 34:9). Boiti di dë, sömëni woto womi bi dë di bi abi öndöfeni, nöö de bi ta tei fesi tu. So u de bi abi taki a dusudusu sëmbë, nasö höndöhöndö sëmbë liba. Nöö wotowan bi abi taki a feifiteni, nasö a teni sëmbë liba (Deto. 1:15). De bi ta luku di föluku u Gadu bunu. Te u luku di woto u Elia, nöö u ta si di seei soni. Sömëni jaa longi a wooko taanga u heepi dee Isaëli sëmbë u de dini Jehovah. Ma baka wan pisiten, hën Jehovah mbei a go du wan woto wooko dëën a Juda (2 Kön. 2:1; 2 Klon. 21:12). Di soni dë bi kë taki taa Jehovah bi disa dee sëmbë u di teni-lö könuköndë u Isaëli dee bi ta hoi deseei nëën u? Wë nönö, Elia bi lei Elisa soni sömëni jaa longi. Boiti di dë, dee womi mii u dee tjabukama seei bi kisi lei u heepi dee sëmbë u Jehovah tu (2 Kön. 2:7). Fuu taki ën, nöö sömëni womi di bi ta hoi deseei a Jehovah bi dë kabakaba u tii di föluku fëën. Jehovah bi ta du andi a bi abi a pakisei go dou, söseei a bi ta heepi dee dinima fëën dee bi ta hoi deseei nëën go dou.

13. Andi Jehovah paamusi u te u luku Hebelejën 13:5b? (Luku di peentje tu.)

¹³ Te u toona buta pakisei a dee woto dee u taki son u de, nöö andi i si kuma o pasa te de tei dee lasiti salufuwan tja go a liba ala? Wë an dë fuu pena booko u hedi ku di soni dë. Di Bëibel ta heepi u fuu dë seiki taa: nöiti Jehovah o disa dee dinima fëën dee o dë a goonliba aki. (Lesi Hebelejën 13:5b.) Leti kumafa Elia ku Mosesi bi du, sö nöö dee salufuwan dee ta tei fesi a di ten aki sabi taa a dë fanöudu u deseei lei wotowan soni tu. Sömëni jaa kaa dee baaa u di Tii Kulupu ta lei baaa di dë  a dee woto sikapu dendu u de ko sabi fa de musu du soni u heepi di föluku u Gadu. De buta sömëni siköö u lei dee gaanwomi, dee keling-gaanwomi, dee baaa u dee Bëikantoo Komite, dee baaa dee ta tei fesi a Bëtëli, söseei ku sömëni woto siköö jeti. Boiti di dë, sömëni baaa ta ko heepi dee baaa u di Tii Kulupu a dee tookatooka komite u de, nöö di Tii Kulupu seei hën ta lei dee baaa dë soni. Dee heepima aki abi sömëni faantiwöutu a di ölganisaasi, nöö de dë kabakaba kaa, u heepi dee woto sikapu u Keesitu go dou.

14. Andi da di mama u di woto?

¹⁴ Boo taki u di mama u di woto seei. Te de tei dee lasiti salufuwan tja go a liba ala a dee kaba pisiten u di gaan fuka, nöö di tii di Jesosi Keesitu o ta tii, o heepi dee dinima u Gadu u de hoi deseei a di tuutuu biibi go dou. U sabi taa a di ten dë dee nasiönnasiön sëmbë di di Bëibel ta kai Gögi u Magögi, o ko feti ku di föluku u Gadu (Eze. 38:18-20). Ma de an o wini dee dinima u Gadu kwetikweti, söseei di soni dë an o mbei de bia baka da Jehovah. Jehovah o dë kabakaba u heepi de! Johanisi bi si „wanlö gaan hia sëmbë” a wan wojolimbo sunjan. Dee sëmbë dë da dee woto sikapu u Keesitu. Johanisi bi jei taa dee „gaan hia sëmbë” dë, da dee sëmbë dee ’pasa di gaan fuka’ libilibi (Ako. 7:9, 14). Awa, u dë seiki taa Jehovah o tjubi dee sëmbë fëën dee o fika a goonliba aki!

15-16. Te u luku Akoalimbo 17:14, nöö andi dee salufuwan o du a di feti u Amagedon, nöö faandi mbei di soni di de o du ta da u taanga?

¹⁵ Andi dee salufuwan o du baka te de go a liba ala? Wë, di Bëibel ta piki u limbolimbo taa dee tiima u di goonliba aki „o hopo go feti ku di Sikafu Mii”. De o lasi di feti, biga u ta lesi a Bëibel taa: „Di Sikafu Mii o wini de.” Ma ambë o heepi ën? Wë u ta lesi go dou taa dee hia sëmbë dee o dë nëën së, da dee sëmbë „dee a bi pii tei buta ko sëmbë fëën apaiti”, söseei di „ta waka nëën baka ku di wan kodo hati”. (Lesi Akoalimbo 17:14.) Wë ambë da dee sëmbë dë? Dee sëmbë dë da dee salufuwan! Te de tei dee lasiti salufuwan tja go a liba ala a kaba pisi u di gaan fuka, nöö wan u dee fosu  wooko di de o du, da di go di de o manda de go a feti. Wan gaan bunu wooko wë de feni dë e! Wantu u dee salufuwan bi dë fetima ufö de ko toon Jehovah Kotoigi. Wotowan bi dë sodati, ma baka di de ko toon Keesitu sëmbë, hën de lei u libi fiifii ku wotowan (Gal. 5:22; 2 Tes. 3:16). De an bi ta nama ku na wan feti soni u di goonliba aki möön. Ma te de o go a liba ala, nöö de ku Keesitu ku dee woto ëngëli o go feti makandi a di lasiti feti, ka de o feti ku dee felantima u Gadu.

¹⁶ Buta pakisei a di soni aki! So u dee salufuwan dee dë a goonliba aki ko gaandi kaa, söseei de an abi kaakiti sö möön. Ma te de o weki ko a libi baka u go libi a liba ala, nöö de o ko dë wan makiti jeje di an o sa dëdë nöiti möön, söseei de o dë a di së u di Makiti Könu de kai Jesosi Keesitu u feti di feti. Baka di feti u Amagedon, dee salufuwan o wooko makandi ku Jesosi u heepi libisëmbë u de ko dë söndö föutu. U di dee salufuwan o dë a liba ala, mbei de o sa heepi dee baaa ku dee sisa u de a goonliba aki möön bunu, möön leki di de bi dë a goonliba aki kuma zöndu libisëmbë.

17. Unfa u du sabi taa soni an o du dee dinima u Gadu a di pisiten u di feti u Amagedon?

¹⁷ I da wan u dee woto sikapu ö? Ee i da wan de, nöö andi i musu du te di möön fanöudu feti de kai Amagedon o bigi? I musu buta futoou a Jehovah, nöö i du andi a o ta lei i fii du. Andi di soni dë kë taki? Wë di Bëibel ta taki wan soni di ta da u kötöhati. A ta taki taa: „Dee sëmbë u mi, un go a unu dendu wosu, nöö un tapa dee döö. Un tjubi unuseei wan kölö pisiten, u te di hatiboonu u mi ko saka” (Jes. 26:20). Hii dee dinima u Gadu dee dë a liba ala ku goonliba aki tuu, o feni tjubi a di pisiten dë. Leti kuma apösutu Paulosu, useei dë seiki taa: „Na wan soni u di ten u dë aki, na wan soni u bakaten tu, na wan makiti sa paati u puu a di lobi u Gadu aki” (Lom. 8:38, 39). Hii juu i musu ta hoi di soni aki a pakisei: Jehovah lobi i, nöö nöiti seei a o disa i wanwan möönsö!