1. ¿Chu kabú simama sinéami echi ungidos echoná ripá rewegachi?

 MA CHABÉ, echi Jeobá puéblowala nárika nokayé: “¿Chu kabú nima japalí ma ke bilé ungido ripima jenaʼí Wichimóbachi?”. Chabé ko ti mayeli japi jaré echi ungidos a bijí jenaʼí mochima japalí simírisa echi Armagedón alí teeli pirélima jenaʼí Wichimóbachi japalí we baʼóachi nisa. Nalí echoná oselí La Atalaya 15 inárachi julio 2013, ati bineli japi sinéami echi ungidos japi a bijí pirélima jenaʼí Wichimóbachi, simama echoná ripá rewegachi kecho chotásiachi echi Armagedón (Mat. 24:31).

2. ¿Piri nárika nokibóoré alí piri binepo jenaʼí binelíwami?

² Nalí, ati nárika nokibóoré: “Ma gran tribulación kaachi, ¿piri ikimea echi jaréala ‘isena boʼwáʼ japi a bijí nóchilima Jeobá jenaʼí Wichimóbachi?” (Mat. 24:21; Juan 10:16). A keʼré japi jaré ko majaa nílima japi awénili ripima japalí echi ungidos ma ke pirélisa jenaʼí Wichimóbachi. Ma inepo okuá historias Bíbliachi uchúwami japi jitra echi riká nátiliré. Ayénachó binepo japi nirú wiká namuti japi jitra ke majásaré.

JAPI KE IKIMEA

3, 4. ¿Piri nárika nokiméeré jaré, alí chúsiá?

³ Jaré ko nárika nokiméeré achi echi jaréala isena boʼwá riwema nijewia Jeobá japalí echi Japi Aʼlá Niseri ma ke pirélisa jenaʼí Wichimóbachi alí ma ke anesa japi nokimea. Ma inepo okuá historias japi jitra echi riká nátiliré. Echi bachá historia ko ju echi sumo sacerdote Jehoiadá jitra, japi we aʼlá nijéwami nili Onorúami. Echi alí echi upila, Jehosabeat, iʼwírili bilé towí Jehoás riwéami jiti we aʼlá silíami  nima. Japalí Jehoiadá a bijí biteili, Jehoás ko ke riweli nijewia Jeobá. Nalí japalí ma mukuli Jehoiadá, Jehoás ko chotásili isiá chati namuti. Echi ko kipuli echi busuréliami japi aneli jarecho kúruwi chati alí riweli Jeobá (2 Crón. 24:2, 15-19).

⁴ Echi okuá historia ko ju echi cristianos jitra japi pireili echalí okuá siglo. Echi apóstol Juan, japi jubá mukuli jaréala apóstoles yúa, we aʼlá iʼwírili wiká cristianos nijewia Jeobá (3 Juan 4). Japi riká jaréala Jesús najátowala we aʼlá nijéwami, Juan ayénachó iʼwérili isili jiti ke nirúlima ikaleka binériami (1 Juan 2:18). Nalí pe aminana japalí Juan mukuli, sapú wiká muwésili ikaleka binériami echoná congregación cristiana japi riká bilé nayulí japi sapú nachú.

5. ¿Piri ta ke natásaré jepuná okuá historias jitra?

⁵ ¿Achi echi riká cho ikimea echi jaréala isena boʼwá japalí echi ungidos ma simasa echoná ripá rewegachi? ¿Achi nokiméeré japi riká Jehoás alí riwema Jeobá? ¿Achi ikiméeré japi riká echi cristianos echalí okuá siglo piréami alí bichíwima echi ikaleka binériami alí nokimea japi riká echi? ¡Ke tasi! Tákoré echi ungidos ma ke mochisa jenaʼí Wichimóbachi, ati we aʼlá machí japi echi jaréala isena boʼwá ke riwema nijewia Jeobá alí sinibí olama japi newalé. ¿Chúriká ti machí?

ECHI ONORÚAMI PUÉBLOWALA KE RIWEMA NIJEWIA JEOBÁ JAPI RIKÁ ECHI NAKÍ

6. ¿Piri bikiá namuti binepo?

⁶ ¿Chúsiá ti aʼlá machí japi echi Onorúami puéblowala ke riwema nijewia Jeobá japi riká echi nakí, tákoré ikimea namuti we jilírami? Jiti echoná Biblia aní japi jipi rawemti ke ju japi riká japalí pireili echi israelitas alí japalí pireili echi cristianos echalí okuá siglo. Jiti la, we aʼlá binepo jepuná bikiá namuti: 1) japalí echi israelitas pireili, 2) japalí ma suwili echi apóstoles alí 3) echi rawemti japalí “Riosi aʼlárama ne suwaba namuti”, japi ju jipi rawé (Hech. 3:21).

7. ¿Chúsiá ke siwesa riweili echi israelitas nijéwami japalí echi isélikami alí echi pueblo ke nijéwili Jeobá?

⁷ Japalí echi israelitas pireili. Kecho bijí mukuyá, Moisés ko jéaneli echi israelitas: “[Ani] we aʼlá machí japi emi ko chati namuti nokimea japalí ni ma mukusaa, alí timí riwema simíaya echoná buwérili japi ni emi nuleki japi timí simama” (Deut. 31:29). Ayénachó aneli japi ke nijéwisaká, echi sayérala biléana tomea (Deut. 28:35, 36). ¿Achi ikili japi Moisés aneli? Ayena. Wiká bamíali wiká isélikami ke nijéwili Jeobá alí echi pueblo echi riká cho nokali. Jiti la Jeobá ko castigo iyali echi ke nijéwami alí ma ke riweli japi nirúlima isélikami israelitas (Ezeq. 21:25-27). Nalí echi israelitas japi nijéwami nili we kanílili inea japi a ikili japi anili Jeobá (Is. 55:10, 11).

8. ¿Chúsiá ti machí japi echi cristianos okuá siglo piréami riwema riweili nijewia Jeobá?

⁸ Japalí ma suwili echi apóstoles. Echoná congregación echalí okuá siglo wiká riweli nijewia Jeobá. Nalí tamujé ko aʼlá machí japi echi riká ikimea riweili. ¿Chúsiá? Jiti Jesús ma echi riká anili (Mat. 7:21-23; 13:24-30, 36-43). Ma echalí bachá siglo, echi apóstoles Pablo, Pedro alí Juan anijoli japi ma chotásili echi ikaleka binériami japi riká Jesús anili japi ikimea riweili (2 Tes. 2:3, 7; 2 Ped. 2:1; 1 Juan 2:18). Aminá ko japalí ma mukuli echi upáwala apóstol, echi cristianos ikaleka  binériami ayénachó moʼili echi Walúala Babilonia yúa, japi ju suwaba echi religiones japi ke bichíwali bineri. Checho ikili japi riká anili echi profecías.

9. ¿Piri namuti ke chopi iyiri ju jipi rawemti alí japalí pireili echi israelitas alí echi cristianos okuá siglo piréami?

⁹ Echi rawemti japalí “Riosi aʼlárama ne suwaba namuti”. Jipi rawemti we sinúrika ju, ke japi riká japalí pireili echi israelitas alí echi cristianos okuá siglo piréami, japalí aminabi wiká muwésili echi ikaleka binériami echoná congregación cristiana. ¿Chúriká riwáliwa jipi rawemti japi ta piré? Ati riwá “waminánomí rawé” japalí ma suwábitami nima echi chati namuti (2 Tim. 3:1). Nalí echi Biblia ayénachó aní japi echalí chotásili bilecho rawemti japi wabé wilí rojorama alí japi wabé natéami ju. Riwáliwa japalí “Riosi aʼlárama ne suwaba namuti” (Hech. 3:21). Echi ko chotásili bamíali 1914 alí sunima japalí echi pagótami ma sébali aʼlá nokáami nisa, alí japalí echi Onorúami Gobiérnowala ma we baʼóachi niwasa jenaʼí Wichimóbachi. Nalí, ¿piri namuti aʼlárali Jeobá bamíali 1914? Jesús, bilé echi silíami David téemala, chotásili nulayá echoná ripá rewegachi alí Jeobá ma ku olali bilé gobierno japi echi jitra nulama. Nalí ke echi bi nili. Miná ko, Jeobá iʼwírili jiti echi puéblowala checho ku nijéwima japi riká echi nakí (Is. 2:2-4; Ezeq. 11:17-20). We be nalí, ¿achi checho ku chotásima echi ikaleka binériami?

10. a) ¿Piri namuti aní echi Biblia japi ikimea jipi rawé echi Jeobá puéblowala? (Isaías 54:17). b) ¿Chúsiá tamó iʼwérili iyá japi aní Isaías?

¹⁰ (Leeri Isaías 54:17). Natabo jepuná profecía jitra: “Ke bilé arma japi niwáliwa mi cha olamia omérima echi riká isiá”. Japi riká aní echi versículo ma ikísimi jipi rawé. Ayénachó ma ikísimi japi riká aní jepuná raʼíchali: “Sinéami mujé kúchuwala binéritami nima Jeobá jitra, alí emi kúchuwala ko we kilí pirélima. Mujé ko ne wachíniga niraa bitélima. [...] Ke bilé namuti mi majama alí ke nirúlima bilé namuti japi jitra mi we majaa nílima, jiti echi ko ke mulíwima mi yúa” (Is. 54:13, 14). Alí ke cho “echi riablo walula nuláami” omeri chewia japi echi Jeobá puéblowala riwema bineria echi pagótami japi aní echi Biblia (2 Cor. 4:4). Jipi ko echi Jeobá puéblowala nijewi japi riká echi nakí. ¡Ma ke siné nirúlima ikaleka binériami!  Ke bilé arma japi niwáliwa tamujé cha olamia omérima echi riká isiá.

JAPI A IKIMEA

11. ¿Chúsiá ti we aʼlá machí japi echi wikabé pagótami ke awénili ripima japalí echi ungidos ma simasa echoná ripá rewegachi?

¹¹ ¿Piri ju japi a ikimea japalí echi ungidos ma simasa echoná ripá rewegachi? Newalabo japi Jesús ju japi tamó niseri alí japi echi ju japi nulá echoná congregación. Jiti la binoy jéanili: “Echi Cristo anilíwami bilepi ju ʼyemi níwala Binériami [o nuláami]” (Mat. 23:10). Jesús, japi tamujé Silíamiwala ju, ke siné riwema tamó tibúa. Jiti la, echi cristianos japi pirélima jenaʼí Wichimóbachi, ke majásaré jiti echi ju japi nulá. A bichíwali ju japi ta ke aʼlá machí piri isima Jesús echi Jeobá puéblowala jitra. Nalí echoná Biblia nirú jaré ejemplos japi tamó iʼwiri jiti kilí nílipo. Ma inepo.

12. a) ¿Chúriká tibuli Jeobá echi puéblowala japalí ma mukuli Moisés? b) ¿Chúriká isili japalí Elías biléana simili echi nóchilimia? (Ayénachó iné echi dibujos).

¹² Moisés mukuli japalí echi israelitas kecho bijí moʼiyé echoná kawí japi Jeobá anili japi iyama riweili. ¿Piri ikili pe aminana echi Onorúami puéblowala? Jiti Moisés mukuli, ¿achi awénili ripili alí ma ke bilé iʼwírili? Ke tasi, jiti Jeobá echi yúa asali japalí nijéwami nili. Japi riká, Jeobá ko aneli echi puéblowala japi wilama echi Josué jiti iʼwírima, jiti echi ko nili bilé rijoi japi Moisés binérili wiká bamíali (Éx. 33:11; Deut. 34:9). Ayénachó niruili jarecho rijoi we aʼlá machíami japi nuléami nili 1,000 pagótami, 100, 50 alí ayénachó 10 pagótami (Deut. 1:15). Echi jitra ta machí japi Jeobá we aʼlá tibuli echi puéblowala. Bilecho rijoi ko ju Elías. Wiká bamíali, echi ko iʼwírili echi israelitas jiti nijéwima Jeobá. Alí pe aminana, Jeobá ko júali echomí Judá japi wilili echoná sur (2 Rey. 2:1; 2 Crón. 21:12). Jiti la, ¿achi awénili ripili echi 10 tribus echomí norte Israel piréami? Ke, jiti Elías ma wiká bamíali bineria asali echi Eliseo. Ayénachó echalí ma niruili “echi profetas kúchuwala” japi ayénachó binéritami nili echoná jaréana escuelas (2 Rey. 2:7). Japi riká ti ma bineli, sinibí niruili wiká rijoi we nijéwami japi iʼwírili echi Onorúami puéblowala. Jiti la, Jeobá ko sinibí isili japi riká nakili alí tibuli echi japi nijéwami ju.

13. ¿Piri tamó ané Hebreos 13:5b? (Ayénachó iné echi imágenes).

 ¹³ Nátika echi ejemplos jitra, ¿piri mi mayé japi ikimea echi Jeobá nijéwami japi ripima jenaʼí Wichimóbachi japalí echi ungidos ma simasa ripá rewegachi? Ke we natabo echi jitra, jiti echi Biblia aní japi Jeobá ke siné awénili riwema (leeri Hebreos 13:5b). Japi riká nokali Moisés alí Elías, echi kuabi cristianos ungidos japi jipi nulé echi Jeobá puéblowala, ayénachó machí japi we natéami ju bineria jarecho. Ma chabé jonsa, echi Japi Aʼlá Niseri bineri echi rijoi japi ju echi jaréala isena boʼwá jiti machimea chúriká nokimea echi nóchali. Japi riká, niwáliwa escuelas binérimia echi ancianos, superintendentes de circuito, Comités de Sucursal, superintendentes de Betel alí jarecho si. Ayénachó, echi Japi Aʼlá Niseri aboi bineri jaré hermanos jiti nochama japi riká kuʼíriami echoná comités japi echi olá. Alí jepuná kuʼíriami ma we aʼlá noká echi nóchali. Jiti la ti we aʼlá machí japi echi ko ma aʼlárika machí chúriká nokimea tibúa echi auché jaréala isena boʼwá Cristo níwala.

14. ¿Piri namuti we natéami ta biné?

¹⁴ Echi namuti we natéami japi ta biné jena binelíwami ko ju: japalí echi ungidos ma simasa echoná ripá rewegachi ma suníachi echi gran tribulación, echi Onorúami puéblowala ke riwema nijewia Jeobá jenaʼí Wichimóbachi; jiti Jesús nulema, echi ko ke siwema. A bichíwali ju japi echalí sayéritami nipo wiká naciones jitra japi echi Biblia ané Gog de Magog, nalí ke wilí nima alí ke niyúrima (Ezeq. 38:18-20). Echi ko ke isima japi echi Onorúami puéblowala riwema nóchilia Jeobá, jiti echi ko niyúbima. Echoná bilé visión echi apóstol Juan ko ineli “wabé wikabé pagótami” japi ju echi isena boʼwá Cristo níwala, ayénachó aneri japi jepuná “wabé wikabé pagótami” buyaa sírili echoná gran tribulación jonsa. Jiti la ti machí japi niyúbitami nima (Apoc. 7:9, 14).

15, 16. Japi riká aní Apocalipsis 17:14, ¿piri nokimea echi ungidos Armagedón kaachi, alí chúsiá machiyá jepuná tamó iʼwérili iyá?

 ¹⁵ Nalí a nirú bilecho náriwami japi ta nárika nokibóoré: ¿Piri nokimea echi ungidos japalí ma sinéami simasa ripá rewegachi? Echi Biblia aʼlá ruyé japi echi gobiernos jenaʼí Wichimóbachi nirúami “nakoma echi Méchuli sayéraga”, nalí “echi Méchuli galá omérama [o niyúrima]”. ¿Alí jépuká nima japi iʼwírima niyuria? Echoná versículo aní echi japi “bayérami níili”, “chapirúami níili” alí “galá bichíyami”, echi ko ju sinéami echi cristianos ungidos japi ma jawásitami nima (leeri Apocalipsis 17:14). Jepuná ko aniwáami ju japalí sinéami echi ungidos ma ripá rewegachi mochisa, echi bachá nóchali japi nokimea ko ju, nakóaya. ¡Jepuná ko ju bilé nóchali we natéami! Jaré ungidos we kanílili nakóaya japalí kecho testigos nili alí jaré ko sontarsi nili. Nalí miná ko bineli Jeobá jitra alí riweli nakóaya alí chotásili kilí niraa pirea (Gál. 5:22; 2 Tes. 3:16). We be nalí, japalí ma ripá rewegachi mochisa, iʼwírima Jesús alí echi ángeles nakóaya japalí ma nisa echi Armagedón.

¹⁶ Natabo jepuná: jaré echi ungidos japi piré jenaʼí Wichimóbachi ma we ochérami ju alí ma ke me jiwérami. Nalí, japalí ma pirélisa echoná ripá rewegachi, echi ko ángeles najitima japi ke suwimea alí we jiwérami nima, alí echi silíami Jesucristo yúa napawika nakoma. Miná ko japalí ma simírisa echi Armagedón, echi ko iʼwírima echi pagótami sébali aʼlá nokáami niya. Echi ko wabé aʼlá iʼwírima echi hermanos echoná ripá rewegachi mochika, ke ko japi riká japalí pireili jenaʼí Wichimóbachi japi riká pagótami.

17. ¿Chúriká ti machí japi sinéami japi Jeobá nijéwami ju ke namú ikimea Armagedón kaachi?

¹⁷ ¿Ami ju echi jaréala isena boʼwá? Echi riká nísaká, ¿piri mi isísaré Armagedón kaachi? Ami we bichíwisaré Jeobá alí mi nijéwisaré japi echi mi nulé. Bilé echi ko nímiré japi aní Isaías 26:20: “Bakí pachá echoná cuartos alí irré echi yewi. Ichípika asá teeli bi japalí cheka ma ni ke iyoa nílisa”. We ti kilí nili machiyá japi sinéami japi Jeobá nijewi, japi piré echoná ripá rewegachi alí japi piré jenaʼí Wichimóbachi, ke namú ikimea echalí. Japi riká echi apóstol Pablo, ati we aʼlá machí japi ke bilé gobierno, ke cho echi namuti japi jipi ikí o japi ikimea pe aminana, isima japi Jeobá tamó riwema (Rom. 8:38, 39, TNM). Kiti siné wikawá: Jeobá ko we mi galé alí ke siné mi bineli riwema.