1. Bainhira mak Kristu nia alin hotu sei saʼe ba lalehan?

 BA TINAN barak Jeová nia povu hanoin: ‘Bainhira mak Kristu nia alin hotu iha rai sei saʼe ba lalehan?’ Uluk ita hanoin katak, depois funu Armagedon liu tiha Kristu nia alin balu sei nafatin moris iha mundu Paraízu ba tempu balu. Maibé iha Livru Haklaken 15 Jullu 2013, ita aprende katak Kristu nia alin hotu neʼebé iha rai sei saʼe ba lalehan antes funu Armagedon hahú.—Mt 24:31.

2. Karik ema sei husu pergunta saida, no iha lisaun neʼe ita sei koʼalia kona-ba saida?

² Karik ema balu husu: Durante “terus boot”, saida mak sei akontese ba Kristu nia “bibi-malae seluk” neʼebé serbí Jeová ho laran-metin iha rai? (João 10:16; Mt 24:21) Ema balu hanoin barak katak sei la iha tan ema ida atu dirije sira kuandu Kristu nia alin hotu saʼe ona ba lalehan. Mai ita haree istória rua husi Bíblia neʼebé bele halo ema hanoin hanesan neʼe. Tuirmai ita sei koʼalia kona-ba tanbasá ita la presiza hanoin barak.

SAIDA MAK SEI LA AKONTESE?

3-4. Ema balu karik hanoin barak kona-ba saida no tanbasá?

³ Ema balu karik hanoin barak katak bibi-malae seluk sei husik hela lia-loos bainhira la iha tan Grupu Administradór atu dirije sira. Karik sira sente hanesan neʼe tanba istória balu iha Bíblia. Mai ita haree ezemplu rua. Primeiru kona-ba Amlulik Boot Jeoada. Nia mak mane neʼebé hamtaʼuk Maromak. Nia no ninia feen Jeosabeat proteje labarik-mane ida naran Jeoas no ajuda labarik neʼe atu sai liurai neʼebé diʼak no laran-metin. Kuandu Jeoada sei moris, Jeoas halo buat neʼebé diʼak. Maibé depois Jeoada mate, lakleur deʼit Jeoas nia hahalok troka.  Nia rona ba ulun-naʼin sira neʼebé aat no fila kotuk ba Jeová.—2 Krón 24:​2, 15-19.

⁴ Ezemplu tuirmai mak kona-ba ema Kristaun neʼebé moris kuandu apóstolu sira hotu mate. Apóstolu João mak apóstolu ikus neʼebé sei moris no nia fó influénsia diʼak ba ema Kristaun barak, no ajuda sira atu nafatin laran-metin ba Jeová. (3 João 4) Hanesan Jesus nia apóstolu sira seluk neʼebé laran-metin, João luta makaʼas atu proteje kongregasaun husi hanorin falsu. (1 João 2:18; 2 Tes 2:7) Maibé depois apóstolu João mate, ema Kristaun barak sai apóstata. Tuirmai, sira habelar sira-nia hanorin falsu iha kongregasaun laran.

5. Ita labele hanoin sala kona-ba saida husi istória rua neʼebé ita foin aprende?

⁵ Ema balu hanoin istória rua neʼe hatudu katak kuandu Kristu nia alin hotu saʼe ona ba lalehan, ema Kristaun neʼebé laran-metin iha rai sei husik tiha lia-loos hanesan Jeoas, ka sai apóstata hanesan ema Kristaun iha tempu uluk. Maibé neʼe mak hanoin neʼebé loos ka lae? Resposta mak lae duni! Ita bele fiar katak bainhira Kristu nia alin hotu saʼe ona ba lalehan, bibi-malae seluk sei kontinua adora Jeová, no Jeová sei tau matan ba sira. Tanbasá ita bele fiar ida-neʼe?

JEOVÁ NIA POVU SEI KONTINUA HALAʼO ADORASAUN LOOS

6. Ita sei aprende liután kona-ba períodu tolu saida?

⁶ Tanbasá ita bele fiar katak Jeová nia povu sei kontinua halaʼo adorasaun loos durante tempu susar iha futuru? Tanba buat neʼebé ita aprende ona husi Bíblia kona-ba ita-nia tempu. Ita-nia tempu la hanesan duni ho ema Izraél antigu nia tempu no mós tempu neʼebé apóstolu sira hotu mate. Entaun mai ita aprende liután kona-ba períodu tolu neʼe: (1) Ema Izraél antigu nia tempu, (2) tempu depois apóstolu sira hotu mate, no (3) ita-nia tempu, katak “tempu neʼebé halo foun buat hotu”.—Após 3:21.

7. Tanbasá ema Izraél neʼebé laran-metin la presiza lakon esperansa kuandu liurai no povu hatudu hahalok aat?

⁷ Ema Izraél antigu nia tempu. Lakleur antes Moisés mate, nia hatete ba ema Izraél: “Haʼu hatene didiʼak katak bainhira haʼu mate tiha, imi sei halo duni hahalok aat no sees husi dalan neʼebé haʼu fó sai ba imi.” (Deut 31:29) Moisés mós fó avizu katak se ema Izraél kontra, sira sei sai dadur. (Deut 28:​35, 36) Liafuan sira-neʼe sai loos ka lae? Sin. Durante tinan atus ba atus, liurai barak hatudu hahalok aat no halo povu kontra Maromak. Tan neʼe, Jeová fó-kastigu ba povu neʼebé kontra no la fó tan direitu ba ema Izraél atu sai liurai iha rai. (Eze 21:​25-27) Maibé ema Izraél neʼebé laran-metin sai aten-brani bainhira haree Maromak nia liafuan sira sai loos.—Isa 55:​10, 11.

8. Tanbasá ita la hakfodak katak kuandu apóstolu hotu mate kongregasaun sai nakonu ho hanorin falsu?

⁸ Tempu depois apóstolu sira hotu mate. Ita la hakfodak katak kongregasaun Kristaun iha tempu neʼebá sai nakonu ho hanorin falsu. Jesus fó-hatene nanis katak sei mosu kontradór barak. (Mt 7:​21-23; 13:​24-30, 36-43) Apóstolu Paulo, Pedro, no João fó sai katak Jesus nia profesia komesa sai loos ona iha sira-nia tempu. (2 Tes 2:​3, 7; 2 Ped  2:1; 1 João 2:18) Bainhira apóstolu hotu mate, kongregasaun Kristaun sai nakonu ho hanorin falsu. Ema Kristaun falsu sai parte ba Babilónia Boot, katak relijiaun falsu hotu iha mundu tomak. Jesus nia profesia kontinua sai loos.

9. Oinsá ita-nia tempu la hanesan duni ho Izraél antigu nia tempu no tempu neʼebé apóstolu hotu mate?

⁹ “Tempu neʼebé halo foun buat hotu.” Ita-nia tempu la hanesan duni ho Izraél antigu nia tempu no tempu neʼebé hanorin falsu tama ba kongregasaun Kristaun. Ita-nia tempu bolu nuʼudar saida? Baibain ita bolu nuʼudar “loron ikus sira” husi sistema aat neʼe. (2 Tim 3:1) Maibé Bíblia mós temi kona-ba períodu neʼebé importante no naruk liu, no bolu neʼe nuʼudar “tempu neʼebé halo foun buat hotu”. (Após 3:21) Períodu neʼe mós hahú iha tinan 1914 no sei kontinua toʼo tempu neʼebé Kristu nia Ukun ba Tinan Rihun Ida halo ema hotu sai perfeitu no halo mundu sai paraízu. Saida mak akontese kuandu períodu neʼe hahú? Jesus komesa sai nuʼudar Liurai iha lalehan. Entaun dala ida tan Jeová iha ukun-naʼin ida neʼebé reprezenta Nia, no neʼe mai husi Liurai David nia liña jerasaun. Laʼós neʼe deʼit, Jeová mós ajuda ninia atan sira iha rai atu halaʼo fali adorasaun neʼebé loos! (Isa 2:​2-4; Eze 11:​17-20) Adorasaun neʼe sei lakon ka lae?

10. (a) Bíblia fó-hatene nanis saida kona-ba adorasaun loos iha ita-nia tempu? (Isaias 54:17) (b) Tanbasá profesia sira-neʼe fó kmaan mai ita?

¹⁰ Lee Isaias 54:17. Hanoin toʼok kona-ba profesia neʼe: “Armas naran deʼit neʼebé ema halo hodi kontra ó sei la hetan susesu”! Liafuan sira-neʼe sai loos duni ohin loron. Ita mós hetan kmaan liuhusi liafuan sira tuirmai neʼebé aplika ba ita-nia tempu: “Jeová sei hanorin ó-nia oan sira hotu, no ó-nia oan sira-nia dame sei sai barak. Haʼu sei hametin ó ho haʼu-nia hahalok loos. . . . Ó sei la taʼuk buat ida no la iha buat ida mak halo ó nakdedar, tanba buat sira-neʼe sei la besik ó.” (Isa 54:​13, 14) Satanás “maromak mundu neʼe nian” la iha kbiit atu hapara serbisu haklaken neʼebé Jeová nia povu sira halo. (2 Kor 4:4) Ita halaʼo fali ona adorasaun neʼebé loos no neʼe sei kontinua ba nafatin. La iha armas ida mak bele hapara ita!

 SAIDA MAK SEI AKONTESE?

11. Tanbasá ita fiar metin katak Kristu sei kontinua dirije ema-lubun boot kuandu Kristu nia alin hotu saʼe ona ba lalehan?

¹¹ Saida mak sei akontese kuandu Kristu nia alin hotu saʼe ona ba lalehan? Hanoin-hetan, Jesus mak ita-nia Bibi-Atan. Nia mak Ulun ba kongregasaun. Jesus hatete ho klaru: “Imi-nia Ulun-Naʼin ida deʼit, neʼe mak Kristu.” (Mt 23:10) Jesus neʼebé ukun ona iha lalehan sei halaʼo ninia knaar ho didiʼak. Tanba Kristu mak dirije, ninia dixípulu neʼebé iha mundu la presiza taʼuk ba buat ida. Klaru katak ita la hatene informasaun hotu kona-ba oinsá Kristu sei dirije ninia povu iha tempu neʼebá. Entaun, mai ita hanoin kona-ba Bíblia nia ezemplu balu neʼebé bele hametin ita.

12. Oinsá mak Jeová tau matan ba ninia atan sira (a) kuandu Moisés mate? (b) kuandu Elias hetan tiha knaar seluk? (Haree mós dezeñu.)

¹² Moisés mate antes ema Izraél tama ba Rai neʼebé Maromak Promete. Saida mak akontese ba Maromak nia povu? Kuandu Moisés mate tiha, Jeová para atu ajuda ninia povu ka lae? Lae. Durante sira hatudu laran-metin ba Jeová, nia nafatin ajuda sira. Antes Moisés mate, Jeová haruka Moisés atu hili Josué dirije povu Izraél. Moisés treinu ona Josué ba tinan barak. (Éx 33:11; Deut 34:9) No mós iha ona mane barak neʼebé iha abilidade atu dirije povu, xefe ba ema naʼin-1.000, xefe ba ema naʼin-100, xefe ba ema naʼin-50, no naʼin-10. (Deut 1:15) Maromak tau matan ba ninia povu ho didiʼak. Nuneʼe mós iha Elias nia tempu. Durante tinan barak, nia ajuda povu Izraél atu halaʼo adorasaun neʼebé loos. Maibé tuirmai Jeová fó knaar ba nia atu serbí iha Judá. (2 Reis 2:1; 2 Krón 21:12) Neʼe katak Jeová la tau matan tan ba Izraél nia suku sanulu ka lae? Lae. Elias treinu ona Eliseu ba tinan barak. No mós iha “profeta sira-nia oan-mane sira” neʼebé simu ona treinu. (2 Reis 2:​3, nota) Tan neʼe iha mane fiar-naʼin barak neʼebé bele dirije Maromak nia povu. Jeová kontinua kumpre ninia hakarak no nia tau matan ba ninia atan sira neʼebé laran-metin.

13. Saida mak Jeová promete iha Ebreu 13:5b? (Haree mós foto.)

¹³ Entaun bazeia ba ezemplu sira-neʼe,  saida mak ita hanoin sei akontese bainhira Kristu nia alin hotu saʼe ba lalehan? Ita la presiza siʼik kona-ba neʼe. Bíblia fó sai kona-ba lia-loos simples ida: Jeová sei nunka fila kotuk ba ninia povu iha rai. (Lee Ebreu 13:5b.) Hanesan Moisés no Elias, ohin loron grupu kiʼik husi Kristu nia alin sira neʼebé mak dirije iha rai komprende katak importante atu treinu ema seluk. Durante tinan barak ona, Grupu Administradór treinu irmaun sira husi bibi-malae seluk atu dirije. Porezemplu, sira arranja eskola atu treinu katuas sira, katuas área, membru ba Komisaun ba Sukursál, irmaun sira neʼebé tau matan Betel, no mós ema seluk. Grupu Administradór rasik fó treinu ba ajuda-naʼin sira husi komisaun oioin ba Grupu Administradór. Agora daudaun ajuda-naʼin sira-neʼe kaer responsabilidade oioin iha Jeová nia organizasaun. Sira simu treinu ho didiʼak atu kontinua tau matan ba Kristu nia bibi-malae sira.

14. Saida mak pontu importante husi lisaun neʼe?

¹⁴ Pontu importante husi lisaun neʼe mak: Bainhira Kristu nia alin sira hotu saʼe ona ba lalehan iha terus boot nia parte ikus, Maromak nia povu iha rai sei kontinua halaʼo adorasaun neʼebé loos. Iha tempu neʼebá, grupu nasaun sira neʼebé Bíblia bolu nuʼudar Gog husi rai-Magog sei ataka Maromak nia povu. (Eze 38:​18-20) Maibé ataka neʼe sei la susesu, neʼe sei la hapara Maromak nia povu atu adora Maromak. Nia sei salva ninia povu! Iha apóstolu João nia vizaun, nia haree “ema-lubun boot” husi Kristu nia bibi-malae seluk. João haree “ema-lubun boot” neʼe “liu terus boot”. (Apok 7:​9, 14) Sin, Jeová sei salva sira!

15-16. Tuir Apokalipse 17:​14, saida mak Kristu nia alin sira sei halo durante funu Armagedon, no oinsá mak ida-neʼe hametin ita?

¹⁵ Maibé karik ema balu hanoin: ‘Oinsá ho Kristu nia alin sira? Saida mak sira sei halo depois sira saʼe tiha ba lalehan?’ Bíblia hatán ba pergunta neʼe hodi fó  sai katak governu sira iha mundu sei “halo funu hasoru Bibi-Oan”. Klaru katak sira sei lakon. Bíblia hatete: “Bibi-Oan sei manán sira.” No sé mak sei ajuda nia? Versíkulu neʼe hatete katak sira neʼebé “Maromak bolu”, “hili ona” no “laran-metin ona”. (Lee Apokalipse 17:14.) Sira mak sé? Sira mak Kristu nia alin sira neʼebé saʼe ona ba lalehan! Entaun bainhira Kristu nia alin restu iha rai saʼe ba lalehan iha terus boot nia parte ikus, sira-nia knaar primeiru mak atu halo funu. Neʼe mak knaar neʼebé kmanek tebes! Uluk antes sai Testemuña ba Jeová, Kristu nia alin balu toman atu baku malu ho ema seluk. Sira balu mak parte ba militár iha mundu neʼe. Maibé, tuirmai sira sai ema Kristaun neʼebé loos no aprende dalan dame nian. (Gal 5:22; 2 Tes 3:16) Sira la apoia tan funu. Maski nuneʼe, bainhira sira saʼe ona ba lalehan, sira sei serbí hamutuk ho Kristu no ninia anju sira atu halo funu ikus hasoru Maromak nia inimigu.

¹⁶ Hanoin toʼok kona-ba neʼe. Bainhira iha rai, Jesus nia alin balu mak idade no mós fraku. Maibé kuandu sira saʼe ona ba lalehan, sira sei sai kriatura espíritu neʼebé iha forsa boot no labele mate, no hetan knaar atu halo funu hamutuk ho Liurai Jesus Kristu. Bainhira funu Armagedon remata, sira sei ajuda ema atu sai perfeitu. Ita bele fiar duni katak sira sei halo buat barak liután husi lalehan atu ajuda sira-nia irmaun-irmán doben sira iha rai.

17. Oinsá mak ita hatene katak Maromak nia atan sira sei seguru durante funu Armagedon?

¹⁷ Ita mak parte ba bibi-malae seluk ka lae? Se nuneʼe, saida mak Ita presiza halo bainhira funu Armagedon hahú? Ita presiza tau fiar ba Jeová no halo tuir ninia matadalan. Karik neʼe inklui saida deʼit? Bíblia hatete: “Tama ba imi-nia kuartu laran, no taka odamatan sira. Subar imi-nia an ba tempu uitoan toʼo Maromak nia hirus liu tiha ona.” (Isa 26:20) Maromak nia atan sira iha lalehan no mós iha rai sei seguru durante tempu neʼe. Hanesan apóstolu Paulo, ita fiar metin katak “governu sira, buat neʼebé iha agora ka buat neʼebé atu mai . . . sei labele haketak ita husi Maromak nia domin”. (Rom 8:​38, 39) Hanoin-hetan nafatin katak Jeová hadomi Ita no nia sei nunka husik hela Ita!