1. Etena kakɔna kayodɛ akitami tshɛ otsha l’olongo?

 ƐNƆNYI efula wambeta, ekambi wa Jehowa wakayambolaka ɔnɛ: ‘Etena kakɔna kayɛmbama atshikadi w’Akristo w’akitami w’ekomelo otsha l’olongo?’ Ntondotondo, takafɔnyaka dia ondo akitami amɔtshi wayotetemala ntshikala lo paradiso lanɛ la nkɛtɛ l’etena kɛmɔtshi l’ɔkɔngɔ wa ta di’Aramangɛdɔna. Koko lo sawo dimɔtshi dia lo Tshoto y’Etangelo ya Ngɔndɔ k’esambele 15, 2013, takeke dia akitami tshɛ weke lanɛ la nkɛtɛ wayodɛ otsha l’olongo la ntondo ka ta dia Aramangɛdɔna ntatɛ.—Mat. 24:31.

2. Dimbola diakɔna diakoka monyiyama ndo kakɔna kayotɔsɛdingola lo sawo nɛ?

² Koko, amɔtshi l’atei aso mbeyaka ndjambola ɔnɛ: Kakɔna kayokomɛ “ɛkɔkɔ ekina” w’Akristo wanɛ wakambɛ Jehowa la kɔlamelo tshɛ lanɛ la nkɛtɛ l’etena ka “mfɔnu ka woke”? (Jni. 10:16; Mat. 24:21) Tena dimɔtshi “ɛkɔkɔ ekina” mbeyaka mboka wɔma lo ndjaoka oko anto wambowokalɛ etena kayodɛ anangɛwɔ ndo akadiyɛwɔ w’akitami wa ngandji otsha l’olongo. Tɔsɛdingole ɛkɔndɔ ehende wa lo Bible wakoka mbakonya dia vɔ nkanyiya lo yoho shɔ. Oma laasɔ, tayɔkɛtshanya ɛkɔkɔ wɛnya lande na kele ndooko ohomba ndjakiyanya.

KAKƆNA KAHATOKOMƐ ƐKƆKƆ EKINA?

3-4. Kakɔna ondo kakoka anto amɔtshi ndjambola ndo lande na?

³ Amɔtshi mbeyaka ndjambola dia kana ɛkɔkɔ ekina wayotakɔ mboka k’akambo wa mɛtɛ etena kayonga ndooko ɔnangɛso l’okitami wa l’Olui-walɔmbɔla lahomba mbasha ɛlɔmbwɛlɔ. Ondo ɛkɔndɔ ɛmɔtshi wa lo Bible koka mbowaotsha wɔma. Tɔsɛdingole bɛnyɛlɔ dihende. Ka ntondo ele kaki Jɛhɔyada, Ɔlɔmbɛdi  a laadiko. Nde aki okambi wa kɔlamelo waki Nzambi. Nde la Jɛhɔshabeatɛ ya wadɛnde, wakakokɛ yana ya hiami lokombo lande Jɛhɔashi ndo wakookimanyiya dia nde nkoma nkumekanga k’ɔlɔlɔ ndo ka kɔlamelo. Etena tshɛ kaki Jɛhɔyada laki aya opalanga la lɔsɛnɔ, Jɛhɔashi aki la kɔlamelo. Koko l’ɔkɔngɔ wa nyɔi ka Jɛhɔyada, aha la ntshimbatshimba, Jɛhɔashi akayotatɛka nsala kɛnɛ kele kɔlɔ. Nde akayohokamɛka ewandji wa kɔlɔ ndo akayotshikaka kambɛ Jehowa.—2 Ɛk. 24:​2, 15-19.

⁴ Ɛnyɛlɔ kekina ele k’Akristo wakasɛnaka lo ntambe ka hende. Joani mbaki ɔpɔstɔlɔ w’ekomelo wakayovɔka, nde aki la shɛngiya ya dimɛna efula le Akristo efula, akaakimanyiya dia vɔ mbikikɛ l’olimu wakawakambɛka Jehowa. (3 Jni. 4) Oko wakasale apɔstɔlɔ akina waki Yeso, Joani akahombe nkamba olimu wa wolo efula dia ndɔshana la wetshelo w’ɛtɔlɔki wakadiangana. (1 Jni. 2:18; enda nɔtɛ ya wekelo ya lo 2 Tɛs. 2:7.) Laasɔ, l’ɔkɔngɔ wa nyɔi ka Joani, wetshelo w’ɛtɔlɔki wakadiangana oko dja l’okonda. L’ɛnɔnyi wakayele, wetshelo w’ɛtɔlɔki ɛsɔ wakayetshaka anto tokanyi ta kɔlɔ efula ndo takayɔtshiyaka lɔkɛwɔ la kɔlɔ lo tshumanelo tshɛ.

5. Kakɔna kahatahombe mbuta oma l’ɛkɔndɔ ehende ɛsɔ?

⁵ Onde ɛkɔndɔ ehende wa l’Afundelo ɛsɔ mɛnyaka dia dui dia ngasɔ diayokomɛ Akristo wele ɛkɔkɔ ekina etena kayodɛ akitami otsha l’olongo? L’etena kɛsɔ, onde Akristo wa kɔlamelo wele la nkɛtɛ wayotakɔ wetshelo awɔ, oko wakasale Jɛhɔashi ko kana wayoyela wetshelo w’ɛtɔlɔki, oko wakasale Akristo efula wa lo ntambe ka hende T.D.? Okadimwelo ele ɔnɛ ndooko kaanga yema! Sho koka ndjashikikɛ dia etena kayomɔ akitami oma lanɛ la nkɛtɛ, ɛkɔkɔ ekina wayotetemala kambɛ Jehowa lo yoho ya dimɛna ndo nde ayotetemala mbakokɛ. Lande na kakokaso monga l’eshikikelo kɛsɔ?

EKAMBI WA JEHOWA WAYOTETEMALA MBƆTƐMƆLA LO YOHO YALANGANDE

6. Tena sato diakɔna diayangaso la nsɛdingola lo tshe na pe?

⁶ Lande na kakokaso monga l’eshikikelo ɔnɛ ɔtɛmwɛlɔ wa pudipudi hawotolanyema, kaanga lo tena dia wolo efula diele la ntondo kaso? Ele l’ɔtɛ wa kɛnɛ kekaso oma lo Bible lo dikambo dia etena kasɛnaso kɛnɛ. Etena kɛnɛ tshikitana efula la nshi y’Isariyɛlɛ w’edjedja ndo la etena ka l’ɔkɔngɔ wa nyɔi k’apɔstɔlɔ. Ɔnkɔnɛ, nyɛsɔ tɔsɛdingole la yambalo tshɛ tena sato sɔ: 1) Nshi ya Isariyɛlɛ w’edjedja, 2) etena ka l’ɔkɔngɔ wa nyɔi k’apɔstɔlɔ, ndo 3) nshi yaso nyɛ, “nshi yayɔlɔngɔsɔma akambo tshɛ.”—Ets. 3:21.

7. Lo nshi y’Isariyɛlɛ w’edjedja, lande na kele ase Isariyɛlɛ wa kɔlamelo koshisha elongamelo etena kakasɔnɛ nkumi ya dikanga ndo anto akina dia nsala kɔlɔ?

⁷ Nshi y’Isariyɛlɛ w’edjedja. Yema tshitshɛ la ntondo ka nyɔi kande, Mɔsɛ akatɛ ase Isariyɛlɛ ɔnɛ: “Dimi mbeyaka dimɛna dia l’ɔkɔngɔ wa nyɔi kami, ndooko onyake nyayoyosala akambo wa kɔlɔ ndo nyayoyotakɔ mboka kakamanyodjangɛ.” (Eoh. 31:29) Mɔsɛ akatahɛmɔdi ase Isariyɛlɛ nto dia naka vɔ ntɔmbɔkɔ, kete wayɔtɔlama lo lɔhɔmbɔ. (Eoh. 28:​35, 36) Onde ɛtɛkɛta ɛsɔ wakakotshama? Eelo. L’ɔkɔngɔ wa ntambe efula, nkumi ya dikanga efula wakayɔsɔnaka mboka ya kɔlɔ ndo wakayokonyaka ekambi wa Nzambi dia vɔ ntakɔ mboka. L’ɔtɛ wa dui sɔ, Jehowa akasha ase Isariyɛlɛ wa kɔlɔ asɔ dilanya ndo nde kombetawɔ nto dia nkumi ya dikanga y’Isariyɛlɛ mbowaolɛ nto. (Ɛzk. 21:​25-27) Koko ase Isariyɛlɛ wa kɔlamelo wakakondja dihonga etena kakawɛnyi dia ɛtɛkɛta waki Nzambi wambokotshama.—Isa. 55:​10, 11.

8. Onde sho koka mamba lo menda woho wakɔtɔ awui wa kɔlɔ lo etshumanelo k’Akristo ka lo ntambe ka hende? Lembetshiya.

 ⁸ Etena ka l’ɔkɔngɔ wa nyɔi k’apɔstɔlɔ. Onde sho koka nkashimɔ woho wakayɔtɔka awui wa kɔlɔ l’etshumanelo k’Akristo ka lo ntambe ka hende? Ndooko. Yeso akatatshi dia wetshelo w’ɛtɔlɔki wayokokanɛ. (Mat. 7:​21-23; 13:​24-30, 36-43) Ɔpɔstɔlɔ Pɔɔlɔ, Petero ndo Joani, vɔ tshɛ wakashikikɛ dia prɔfɛsiya ka Yeso kamboshilaka ntatɛ kotshama lo ntambe ka ntondo T.D. (2 Tɛs. 2:​3, 7; 2 Pe. 2:1; 1 Jni. 2:18) Lo ntambe ka hende T.D., awui wa kɔlɔ wakayɔtɔka l’etshumanelo k’Akristo. Akristo w’ɛtɔlɔki wakayotombaka ndo wakayeyamaka oko etenyi ka Babilɔna ka woke, mbuta ate tshunda dia l’andja w’otondo di’ɛtɛmwɛlɔ wa kashi. Ndo nto, kɛnɛ kakatatshi Yeso kakakotshama.

9. Ngande wotshikitanyi etena kasɛnaso kɛnɛ la etena k’ase Isariyɛlɛ w’edjedja ndo la etena k’etshumanelo k’Akristo ka lo ntambe ka hende?

⁹ “Nshi yayɔlɔngɔsɔma akambo tshɛ.” Nshi yaso nyɛ ntshikitana la nshi y’ase Isariyɛlɛ w’edjedja, etena kakaleke diangana wetshelo w’ɛtɔlɔki lo ntambe ka hende T.D. Ko ngande welɛwɔ etena kasɛnaso kɛnɛ? Mbala efula sho mbokielɛka ɔnɛ “nshi y’ekomelo” ka dikongɛ nɛ di’akambo dia kɔlɔ. (2 Tim. 3:1) Koko Bible mɛnyaka dia etena k’edja efula ndo k’otale kamboshilaka ntatɛ l’etena kakɔ kaamɛ kɛsɔ. Tɔ kayotetemala polo lam’ayokonya Diolelo dia Mɛsiya onto tshɛ kokele ndo nkadimola nkɛtɛ paradiso. Etena kɛsɔ mbelamɛka ɔnɛ “nshi yayɔlɔngɔsɔma akambo tshɛ.” (Ets. 3:21) Etena kɛsɔ kakatatɛ lo 1914. Ko laasɔ, kakɔna kakalɔngɔsɔma? Wakahenya Yeso lo kiti ka lowandji oko Nkumekanga l’olongo. Laasɔ mbala kɛnɛ nto Jehowa aya ndo la ɔnɔmbɔdi lele Onyimpala Ande, mbuta ate okitɔ wa Davidɛ nkumekanga ka kɔlamelo. Koko, aha lowandji lɔsɔ loto mbakalɔngɔsɔla Jehowa. Yema tshitshɛ oma laasɔ, ɔtɛmwɛlɔ wa pudipudi wakatatɛ kaloyama lo pondjo! (Isa. 2:​2-4; Ɛzk. 11:​17-20) Onde awui wa kɔlɔ wayonyomɔtɔ nto lɔkɔ?

10. a) Kakɔna kakatatshi Bible lo dikambo dia ɔtɛmwɛlɔ wa pudipudi wa lo nshi yaso nyɛ? (Isaya 54:17) b) Lande na kele prɔfɛsiya shɔ tokeketshaka?

¹⁰ Adia Isaya 54:17. Ohokana yimba la prɔfɛsiya kɛnɛ: “Ndooko ehomɔ ka ta kambowotshula dia kɔlɔsha kayolowana”! Ɛtɛkɛta wakasambiyama ɛsɔ wekɔ lo nkotshama ɛlɔ kɛnɛ. Ɛtɛkɛta w’esambelo wayela ɛnɛ mendanaka ndo la nshi yaso nyɛ: “Anayɛ tshɛ wayetshama oma le Jehowa, ndo wɔladi wa anayɛ wayonga efula. Wɛ ayoshikikɛma nge lo losembwe. . . . Wɛ hatoka ndooko ɛngɔ wɔma ndo ndooko  ɛngɔ kayokosha sase, nɛ dia tɔ hatoya suke la yɛ.” (Isa. 54:​13, 14) Kaanga “nzambi ka dikongɛ nɛ di’akambo,” mbuta ate Satana ndamɛ bu la wolo wa nshimba olimu wakamba ekambi wa Jehowa dia mbetsha anto akina awui wendana la Jehowa. (2 Kɔr. 4:4) Ɔtɛmwɛlɔ wa pudipudi wambokaloyama, ndo awui wa kɔlɔ hawotɔtɔ nto lɔkɔ. Vɔ wayotshikalaka pondjo pondjo. Ndooko ehomɔ kakasalema dia tɔlɔsha kayotondoya!

KAKƆNA KAYOTOMBA?

11. Kakɔna katoshikikɛ dia leemba la woke l’anto hawotonga oko anto wele ekalema etena kayodɛ akitami otsha l’olongo?

¹¹ Kakɔna kayotomba etena kayotshɔ akitami l’olongo? Ohɔ dia Yeso mbele Olami aso w’ɛkɔkɔ. Nde mbele owandji w’etshumanelo k’Akristo. Yeso akate hwe ɔnɛ: “Nyekɔ la Ɔnɔmbɔdi 1, Kristo.” (Mat. 23:10) Yeso, loolɛ l’olongo, ayotetemalaka nkokɛ ambeki ande wa mɛtɛ. Lam’ele Kristo mbele l’ɔkɛndɛ wa mbaalɔmbɔla, ambeki ande wele lanɛ la nkɛtɛ keema l’ohomba wa mboka ɛngɔ kekina tshɛ wɔma. Eelo, hateye kiambokambo tshɛ yendana la woho wayɔlɔmbɔla Kristo ekambi ande l’etena kɛsɔ. Nyɛsɔ tɔsɛdingole bɛnyɛlɔ dimɔtshi dia lo Bible diakoka toshikikɛ dui sɔ.

12. Ngande wakakokɛ Jehowa ekambi ande a) l’ɔkɔngɔ wa Mɔsɛ mvɔ? b) l’ɔkɔngɔ wa Elidja nongola ɔkɛndɛ okina? (Enda ndo osato.)

¹² La ntondo k’ase Isariyɛlɛ mbɔtɔ lo Nkɛtɛ ya daka, Mɔsɛ akavu. Kakɔna kakakomɛ ekambi waki Nzambi? Onde Jehowa akatshike nkimanyiya ekambi ande l’ɔkɔngɔ wa pami ka kɔlamelo kɛsɔ mvɔ? Ndooko. Edja tshɛ kakiwɔ la kɔlamelo, Jehowa akaakimanyiyaka. La ntondo ka Mɔsɛ mvɔ, Jehowa akawotɛ dia nde mbisha Jashua ɔkɛndɛ wa nɔmbɔla anto. Mɔsɛ akalowanya Jashua l’edja k’ɛnɔnyi efula. (Eto. 33:11; Eoh. 34:9) Ndo nto, apami akina waki l’akoka wakikɔ dia nɔmbɔla, mbuta ate ewandji w’anto nunu nunu, ewandji w’anto nkama nkama, ewandji w’anto akumi atanu akumi atanu ndo ewandji wa dikumi dikumi. (Eoh. 1:15) Ekambi waki Nzambi wakakokamɛ dimɛna. Sho tanaka ɛnyɛlɔ ka woho akɔ waamɛ le Elidja. Nde akakambe olimu wa wolo efula l’edja k’ɛnɔnyi efula dia nkimanyiya ase Isariyɛlɛ dia vɔ ntɛmɔla Jehowa. Koko etena kakakoke ka Jehowa mbɔsɛkɔla otsha l’ɔkɛndɛ okina wotshikitanyi, lo sidɛ ka Juda. (2 Nku. 2:1; 2 Ɛk. 21:12) Onde anto wa kɔlamelo wa lo waolelo dikumi w’ase Isariyɛlɛ wakatshikala ekalema? Ndooko. Elidja akawaetsha l’edja k’ɛnɔnyi efula. Aki  nto “ana w’amvutshi” wanɛ wakalongola elowanyelo. (2 Nku. 2:7) Apami wa kɔlamelo efula wakikɔ dia nkimanyiya dia nɔmbɔla ekambi wa Nzambi. Jehowa akatetemala nkotsha sangwelo diande, ndo nde akakokɛ atɛmɔdi ande wa kɔlamelo.

13. Eshikikelo kakɔna katanaso lo Hɛbɛru 13:5b? (Enda ndo osato.)

¹³ La bɛnyɛlɔ sɔ lo yimba, kakɔna kafɔnyayɛ kayosalema etena kayodɛ akitami w’ekomelo otsha l’olongo? Sho keema l’ohomba wa ndjaoka dimbola sɔ. Bible mbisholaka lo yoho ya wɔdu, lo toshikikɛ mɛtɛ ɔnɛ: Jehowa hakalɛki pondjo ekambi ande wa la nkɛtɛ. (Adia Hɛbɛru 13:5b.) L’ɛnyɛlɔ ka Mɔsɛ nde la Elidja, djui ya tshitshɛ y’Akristo w’akitami walɔmbɔla nshi nyɛ shihodiaka ohomba wa ndowanya anto akina. L’edja k’ɛnɔnyi efula, anangɛso wa lo Olui-walɔmbɔla wambolowanya apami wele l’atei w’ɛkɔkɔ ekina dia nɔmbɔla. Ɛnyɛlɔ, vɔ wakakongɛ kalasa efula dia ndowanya dikumanyi, emendji w’eteta, ase Kɔmite ya filialɛ, emendji wa lo Bɛtɛlɛ ndo anto akina. Olui-walɔmbɔla wekɔ lo ndowanya akimanyedi lo Kɔmite yotshikitanyi y’Olui-walɔmbɔla. Akimanyedi asɔ wekɔ lo nkotsha ɔkɛndɛ awɔ wa wotsho ɔsɔ la kɔlamelo tshɛ. Vɔ wamboyalɔngɔsɔla dimɛna dia ntetemala nkamba olimu wa nkokɛ ɛkɔkɔ wa Kristo.

14. Dui diakɔna di’ohomba diele lo ɔkɛtshanyelo aso ɔnɛ?

¹⁴ Dui di’ohomba dia l’ɔkɛtshanyelo aso diɔ nɛ: Etena kayodɛ atshikadi w’ekomelo w’akitami otsha l’olongo l’ekomelo ka mfɔnu ka woke, ekambi waki Jehowa wa lanɛ la nkɛtɛ wayotetemala mbɔtɛmɔla la kɔlamelo tshɛ. Diɛsɛ l’ɛlɔmbwɛlɔ ka Yeso Kristo, ekambi waki Jehowa hawotshikaki pondjo ntɛmɔla Jehowa la kɔlamalo tshɛ. Sho mbeyaka dia l’etena kɛsɔ, osanga wa wedja welɛ Bible ɔnɛ Ngɔngɔ ka lo wodja wa Mangɔngɔ wayɔlɔsha ekambi waki Nzambi. (Ɛzk. 38:​18-20) Koko ɔlɔshɛlɔ wa lo tshanda mɔtshi ɔsɔ wayɔtɔ l’ashi; vɔ hawotoshimba ekambi waki Nzambi dia ntɛmɔla Jehowa. Nde mɛtɛ ayowashimbɛ! L’ɛnɛlɔ kɛmɔtshi, ɔpɔstɔlɔ Joani akɛnyi “olui a woke” w’ɛkɔkɔ ekina w’Akristo. Wakatɛ Joani dia “olui a woke w’anto” ɔsɔ ndja oma lo “mfɔnu  ka woke.” (Ɛny. 7:​9, 14) Eelo, vɔ wayotetemala monga l’ekokelo!

15-16. Lo ndjela Ɛnyɛlɔ 17:​14, kakɔna kayosala Akristo w’akitami lo ta di’Aramangɛdɔna ndo lande na kele ekɔ dui diakeketsha?

¹⁵ Koko, amɔtshi mbeyaka ndjambola ɔnɛ: ‘Kakɔna kayokomɛ akitami? Kakɔna kayowosala l’ɔkɔngɔ wa vɔ mbidɛ l’olongo?’ Bible mbishaka ekadimwelo mbala kakɔ ɔtɔi lo dimbola sɔ. Tɔ mbisholaka dia ewandji wa pɔlitikɛ wa l’andja ɔnɛ wayɔlɔsha “Ɔna Ɔkɔkɔ.” Koko vɔ hawototondoya. Sho mbadiaka ɔnɛ: “Ɔna Ɔkɔkɔ ayowalɛndja.” Ko ayowokimanyiya? Divɛsa mbishaka ekadimwelo. Wanɛ “wakelamɛ,” “wakasɔnama,” ndo “wele la kɔlamelo.” (Adia Ɛnyɛlɔ 17:14.) Waa na asɔ? Akitami wakolɔ! Laasɔ etena kayɔsama okitami w’ekomelo oma lanɛ la nkɛtɛ otsha l’olongo suke l’ekomelo ka mfɔnu ka woke, ɔkɛndɛ awɔ wa ntondo ele wa ndɔ ta. Ande ɔkɛndɛ wa diambo lee! Akristo amɔtshi w’akitami wakalɔka ata la ntondo ka vɔ nkoma Ɛmɛnyi wa Jehowa. Amɔtshi waki ndo asɔlayi lo andja ɔnɛ. Koko l’ɔkɔngɔ diko vɔ wamboyokoma Akristo mɛtɛ ndo wambeka woho wa mbidjasɛ l’anto lo wɔladi. (Ngal. 5:22; 2 Tɛs. 3:16) Vɔ wakatshike sukɛ ata. Koko, l’ɔkɔngɔ wa vɔ mbolɔ otsha l’olongo, vɔ wayotokamba kaamɛ la Kristo ndo l’andjelo ande w’ekila, vɔ wayɔlɔsha kaamɛ la Kristo atunyi waki Nzambi lo ta di’ekomelo.

¹⁶ Ohokanyiya dui sɔ! Lanɛ la nkɛtɛ, Akristo amɔtshi w’akitami waya epalanga, ndo wambɔlɛmba. Koko etena kayowolɔ otsha l’olongo, vɔ wayonga la wolo w’efula ndo ditongami dia lo nyuma diahavu, wayonga l’ɔkɛndɛ wa ndɔsha kaamɛ la Nkumekanga kawɔ kele ɔndɔshi wa ta, mbuta ate Yeso Kristo. L’ɔkɔngɔ wa ta dia Aramangɛdɔna, vɔ wayokamba la Yeso dia nkimanyiya anto dia vɔ nkoma kokele. Aha la taamu, vɔ wayonga suke dia nkimanyiya anangɛwɔ l’akadiyɛwɔ wa ngandji wele lanɛ la nkɛtɛ oma l’olongo lo yoho y’efula oleki woho wotowokoka mbakimanyiya etena kakiwɔ weke anto wele keema kokele!

17. Ngande weyaso dia ekambi waki Nzambi tshɛ wayokokamɛ lo ta di’Aramangɛdɔna?

¹⁷ Onde wɛ ekɔ l’atei w’ɛkɔkɔ ekina? Naka ngasɔ, kakɔna kayonga ohomba wɛ nsala etena kayotatɛ ta di’Aramangɛdɔna? Lo tshena pe kosale dui nɛ: Ndjaɛkɛ le Jehowa, ndo ndjela ɛlɔmbwɛlɔ kande. Kakɔna ondo kendana la dui sɔ? Bible tokeketshaka ɔnɛ: “Nyɔtɔ lo mvudu ya l’etei, ndo nyodihe nkuke yanyu. Nyoyashɛ lo tshanda ya tshitshɛ edja ndo nkɛlɛ kambeta.” (Isa. 26:20) Ekambi wa kɔlamelo tshɛ waki Nzambi, l’olongo ndo wa la nkɛtɛ wayoshimbamɛ l’etena kɛsɔ. L’ɛnyɛlɔ ka ɔpɔstɔlɔ Pɔɔlɔ, tekɔ l’eshikikelo dia oyadi “mandji kana akambo wa kakianɛ kana akambo wokoya . . . [w]ayokoka tokakitola oma lo ngandji ka Nzambi.” (Rɔmɔ 8:​38, 39) Ohɔka mbala la mbala ɔnɛ: Jehowa kokaka ngandji ndo nde hakokalɛki pondjo!