1. Ava vatodzidwego va na hongola lini ndzadzini?

 MYAGA hwane, vathu va Jehovha va di gu dzi wudzisa gu khavo: ‘Makristo ma todzidwego ma na hongola lini ndzadzini?’ Ethu hi di gu pimisa gu khethu Makristo ma todzidwego ma di hadzi gu simama mafuni ni gu vbanya paradhesini khu tepo nyo khaguri hwane nya gu ba yi vbindride Arimagedhoni. Ganiolu, omu nya Mukhedziseyi nya 15 nya Julho nya 2013, hi hevbude gu khethu na yi si pheyi nyimbi nya Arimagedhoni, vatshavbo nya 144 000 va na ba va hongode ndzadzini. — Mat. 24:31.

2. Giwudziso muni hi nga dzi girago, nigu ginani hi na bhulago khigyo avba nya ndrima yeyi?

² Ambari ulolo, vathu nyo khaguri va nga dzi wudzisa gu khavo: Ginani gi na giregeyago “dzimbe dzinvuta” dza Kristo dzi na simamago gu thumeya Jehovha khu gutumbega ndrani nya “tshanisa nya yikhongolo”? (Joh. 10:16; Mat. 24:21) Vambe nya dzimbe dzinvuta, adzina saye va nga garadzega khu gu khavo kha va na ngati gilo nyo gire mwendro gu khavo a mwalo muthu a na va phasago ni gu va thangeya hwane nya gu ba ava vatodzidwego va hongode ndzadzini. Hongoleni hi wona matimo mavili nya Bhibhiliya ma nga va girago va pimisa khu ndziya yoyo. Khu gulandreya, hi na wona sighelo si na hi phasago gu mba garadzega.

GINANI GI NA GU MBA GIREGA?

3-4. Siwudziso muni vambe va nga dzi girago, nigu khu ginani?

³ Vambe adzina va nga garadzega khu gu khavo dzimbe dzinvuta dzi na diga gu thumeya Jehovha khu gu ba Huwo nya Guthangeye yi ri mwalo gasi gu hi thangeya. Adzina va nga dzipwa kharato khu kotani nya matimo nyo khaguri nya Bhibhiliya. Hongoleni hi wona siyeyedzo sivili. Giyeyedzo nyo pheye khya Muphasi nya Khongolo nya Mhamba Joyadha. Uye a diri githumi nyo tumbege gya Nungungulu. Uye ni mwangadzi waye Jeyosabhati va di vhikeya Jowasi ni gu mu phasa gu khala Pfhumu nya yadi ni gu tumbega.  Na ngo gu vbanya Joyadha, Jowasi a di gu thumeya Jehovha khu gu tumbega ni gu gira silo nya sadi. Ganiolu, hwane nya gu ba Joyadha a fude Jowasi a di pheya gu gira silo nyo vivbe. Uye engisede wusingalagadzi nya dzipfhumu nya mba dzadi a bwe a ema gu thumeya Jehovha.— 2 Dzik. 24:2, 15-19.

⁴ Gimbe giyeyedzo, khya Makristo ma vbanyidego hwane nya gu ba vapostoli va fude. Mupostoli Johane khuye a nga hegiseya khuye gufa. Uye phaside Makristo nya mangi gu simama na ma tumbegide ga Jehovha. (3 Johane 4) Gufana ni esi vambe vapostoli va giridego, Johane giride satshavbo a nga si kodza gasi gu vhikeya mabandla ga satshavbo sihevbudzo nya malipha. (1 Joh. 2:18; 2 Tes. 2:7) Hwane nya gu ba Johane a fude, nya vangi mabandlani va di landrisa sihevbudzo sa vawugeyi. Ga myaga yi nga landreya, vawugeyi vava va di hevbudza sihevbudzo nya malipha va bwe va dzumeleya mavbanyelo nya mba yadi mabandlani.

5. Guya khu siyeyedzo sesi sa sivili ginani hi gu mba yela gu pimisa gu khethu gi na girega?

⁵ Siyeyedzo sesi sa sivili, ina sa gu yeyedza gu khiso si na girega sasimweso ni dzimbe dzinvuta dza Kristo hwane nya gu ba ava vatodzidwego va hongode ndzadzini? Ga tepo yoyo, ina Makristo nyo tumbege omu mafuni ma na pheya gu gira silo nyo vivbe gu fana ni Jowasi mwendro gu khala vawugeyi nga edzi Makristo nya mangi ma giridego hwane nya gu ba vapostoli vatshavbo va fude? Ne vbadugwana! Hi nga tiyisega gu khethu tepo ava vatodzidwego va na hongolago ndzadzini, dzimbe dzinvuta dzi na simama gu khozeya Jehovha khu ndziya nya yadi, nigu uye a na simama gu dzi khathaleya gwadi. Khu ginani hi tiyisegago khu isoso?

VATHU VA JEHOVHA VA NA SIMAMA GU MU KHOZEYA KHU NDZIYA A YI VBWETAGO

6. Khu dzevbini dzitepo dziraru hi na bhulago khidzo?

⁶ Khu ginani hi tiyisegago gu khethu wukhozeyi nya guage kha wu na nga fuva, ambari tepo hi na tshanganago ni sigaradzo? Kholu Bhibhiliya ya gu tshamuseya gu khiyo tepo hi vbanyago ga iyo muhuno yi hambanide ngudzu ni dzitepo dza Vaisrayeli ni edzi dza Makristo ma vbanyidego hwane nya gu ba vapostoli vatshavbo va fude. Khu kharato, hongoleni hi pwisisa gwadi esi si giregidego ga dzitepo dzedzi dza dziraru: 1) Dziteponi dza Israyeli wa gale, 2) hwane nya gu ba vapostoli vatshavbo va fude, ni 3) dziteponi dzathu, a gu “tepo nya gu wusedze silo satshavbo.”— Mith. 3:21.

7. Khu ginani Vaisrayeli nyo khaguri nyo tumbege va nga mba vbeledwa khu gutumba tepo dzipfhumu ni vambe vathu va nga hatha gu gira silo nyo vivbe?

⁷ Dziteponi dza Israyeli wa gale. Na gu tshade vbadugwana gasi Mosi afa, a di embeya Vaisrayeli gu khuye: “Nyi ngu dziti gukheni, avbo nyi na gu bani nyi fude, mu na tshala mu gira silo nya gunyenyeze, mu ndreyani ndzilani nyi mi leletedego.” (Dhet. 31:29) Mosi a di gengedza gambe Vaisrayeli gu khuye va gu mba engisa va na yiswa wugumbini. (Dhet. 28:35, 36) Ina malito yaya ma tadzisegide? Ina. Khu myaga nya yingi, dzipfhumu nya dzingi dzi giride silo nyo vivbe mahoni ga Jehovha dzi bwe dzi kutsedzela vathu gu landrisa wukhozeyi nya malipha. Khu kotani nya isoso, Jehovha a di tsayisa va na Israyeli a bwe a si dzumeleyi dzipfhumu dza Israyeli dzi simama gu fuma. (Ezek. 21:25-27) Tepo Vaisrayeli nyo khaguri nyo tumbege va nga wona gu khavo esi a nga ba a ganede Jehovha si tadzisegide, isoso si di va ninga gutiya-hwambo gasi gu simama gu mu thumeya khu gu tumbega. — Isa. 55:10, 11.

8. Ina hi yede gu hlamala khu gu ba Makristo nya mabandla ya lizana myaga nya wuvili ma khade vawugeyi? Tshamuseya.

⁸ Hwane nya gu ba vapostoli va fude. Ina hi yede gu hlamala khu gu ba Makristo nya mabandla ya lizana myaga nya wuvili ma khade vawugeyi? Ahihi. Kholu Jesu a di ganede gu khuye va na manega vawugeyi. (Mat. 7:21-23; 13:24-30, 36-43) Mupostoli Pawulo, Pedro ni Johane va  ganede gu khavo siprofeto sa Jesu si phede gu tadzisega matshigoni yawe, ga lizana myaga nyo pheye. (2 Tes. 2:3, 7; 2 Ped. 2:1; 1 Joh. 2:18) Nya mba hweya, hwane nya gu ba vapostoli vatshavbo va fude, Makristo nya vawugeyi ma di gira gipandre nya Bhabhiloni nya Khongolo, a gu wukhozeyi nya malipha wa mafuni gwatshavbo. Khu kharato, esi Jesu a nga ba a profetide si di tadzisega.

9. Tepo hi vbanyago ga iyo muhuno yi hambanide kharini ni dzitepo dza Vaisrayeli ni edzi dza Makristo ma vbanyidego hwane nya gu ba vapostoli vatshavbo va fude?

⁹ “Tepo nya gu wusedze silo satshavbo.” Tepo hi vbanyago ga iyo muhuno yi hambanide ngudzu ni dzitepo dza Vaisrayeli ni edzi dza Makristo ma vbanyidego hwane nya gu ba vapostoli vatshavbo va fude. Tepo yathu ya gu ranwa kharini? Ha gu oloveya gu yi rana gu khethu “matshigoni nya guhegise” nya mafu yaya nyo vivbe. (2 Thim. 3:1) Ganiolu, Bhibhiliya ya gu yeyedza gu khiyo tepo gu nga pheya matshigu nyo hegise, yi di pheya gambe tepo nya lisima ngudzu yi nga hadzi dzega tepo nyo laphe. Tepo yoyo yi na simama kala Mufumo wa Mesiya wu phasa vathu gu khala vathu nyo vbeleye ni gu vbindrugedza mafu ma khala paradhesi. Tepo yoyo yo ranwa gupwani “tepo nya gu wusedze silo satshavbo.” (Mith. 3:21) Iyo yi phede khu mwaga nya 1914. Ginani gi nga wusedzwa? Jesu a di pheya gu fuma ndzadzini. Khu ndziya yoyo, Jehovha a di hatha pfhumu yi nga hadzi gu mu emeya, a gu gitugulwana gya Pfhumu Dhavhidhe. Ganiolu, Jehovha kha wusedza isoso basi. Khu gu gimbiya nya tepo, wukhozeyi nya guage wu di pheya gu wusedzwa. (Isa. 2:2-4; Ezek. 11:17-20) Ina wukhozeyi nya guage wu na fuva gambe?

10. a) Ginani Bhibhiliya yi profetidego maningano khu wukhozeyi nya guage wa matshigoni yathu? (Isaya 54:17) b) Khu ginani siprofeto sesi si hi thaveleyago?

¹⁰ Leri Isaya 54:17. Dundrugeya khu giprofeto gegi: “Matshari yatshavbo ma giridwego gasi gu gu sasela, kha ma na [nga] gu gira gilo”! Malito yaya ma ngu tadzisega muhuno. Malito ma landreyago ma ngu hi thaveleya muhuno. Ayo ma ri khayo: “Sanana sago satshavbo, si na khala vapizane va Pfhumu Nungungulu; sanana sago si na mana gurula nya gukhongolo ngudzu. U na tiyiswa khu gululama, . . . khu na thava gilo, ambari gu thusedzedwa kha gu na hidzimela vbafuvbi gwago.” (Isa. 54:13, 14) Ambari “nungungulu nya litigo leli” Sathane, kha si kodzi gu emisa thumo owu vathu va Jehovha va wu girago gasi gu hevbudza vathu maningano khu Jehovha. (2 Kor. 4:4) Wukhozeyi nya guage wu wusedzidwe, nigu gima kha wu na nga tshundzisedwa khu wukhozeyi nya malipha. Uwo wu na simama kala gupindruga. Ma mwalo matshari ma na si kodzago gu fuvisa vathu va Jehovha.

 GINANI GI NA GIREGAGO?

11. Ginani gi hi tiyisegisago gu khethu valandreyi va Kristo kha va na nga dzipwa na va digidwe tepo ava vatodzidwego va na hongolago ndzadzini?

¹¹ Ginani gi na giregago hwane nya gu ba ava vatodzidwego va hongode ndzadzini? Dundruga gu khuwe, Jesu Muhavisi wathu. Uye khuye hungo nya mabandla nya Wukristo. Jesu a di khuye: “Kholu Muthangeyi wanu moyo basi, a gu Kristo.” (Mat. 23:10) Jesu, oyu a fumago ndzadzini a na khathaleya valandreyi vaye nya lisine. Khu kotani nya olu hi thangedwago khu Jehovha ni Gyanana gyaye Jesu, valandreyi nya Makristo kha va yeli gu thava gilo. Khu lisine, kha hi dziti edzi Kristo a na thangeyago khidzo vathu vaye ga tepo yoyo. Khu kharato, hongoleni hi wona siyeyedzo nya Bhibhiliya si nga hi phasago.

12. Jehovha khathalede kharini vathu vaye a) hwane nya gu ba Mosi a fude? b) ni hwane nya gu ba Eliya a ningidwe thumo nya wuphya? (Wona fotu.)

¹² Mosi a difa, Vaisrayeli na va nga si beyi tigoni nya gitumbiso. Ginani gi nga giregeya vathu va Nungungulu? Ina Jehovha emide gu phasedzeya vathu vaye hwane nya gu ba Mosi a fude. Ahihi. Va gu simama na va tumbegide, Jehovha a di hadzi gu va khathaleya. Mosi na ngo vbanya, a embedwe khu Jehovha gu hatha Josuwa gasi gu thangeya vathu vaye. Mosi trenaride Josuwa khu myaga nya yingi. (Ekiso. 33:11; Dhet. 34:9) Gu diga isoso, gu diri ni vama nya vangi va nga ba vari ni makodzelo nya gu thangeye — vathangeyi nya 1000, vathangeyi nya 100, vathangeyi nya 50 ni vathangeyi nya 10. (Dhet. 1:15) Vathu va Jehovha va di gu khathaledwa gwadi. Gimbe giyeyedzo nya gyadi khu Eliya. Khu myaga nya yingi uye phaside Vaisrayeli gu khozeya Jehovha. Khu gu gimbiya nya tepo, Jehovha a di mu hatha gasi guya thuma sul ga Judha. (2 Dzipf. 2:1; 2 Dzik. 21:12) Ina Vaisrayeli nyo tumbege nya 10 mahundzo va dzipwide na va digidwe? Ahihi. Eliya trenaride Elisewu khu myaga nya yingi. Nigu gambe si di romo “sanana sa vaprofeti,” si nga ba si trenaridwe ni gu sasamedzwa khu mitsawa. (2 Dzipf. 2:7) Satshavbo sesi, sa gu yeyedza gu khiso gu diri ni vama nya vangi va nga ba vari ni makodzelo nya gu thangeye vathu va Nungungulu. Jehovha a di simama gu tadzisa makungo yaye a bwe a khathaleya vakhozeyi vaye nyo tumbege.

13. Ginani Jehovha a hi tumbisago omu ga Vahebheru 13:5b? (Wona fotu.)

¹³ Hwane nya gu ba hi wonide satshavbo siyeyedzo sesi, ginani u pimisago gu khuwe gi na girega tepo khiyo Mukristo nyo hegise a todzidwego a na hongolago ndzadzini? Kha hi yeli gu pimisa ngudzu khu isoso. Omu nya Bhibhiliya hi ngu mana lisine nyo vbevbuge li hi tiyisago. Ilo lari khilo: Jehovha gima kha na nga diga vathu vaye. (Leri Vehebheru 13:5b.) Gu fana ni Mosi ni Eliya, muhuno gu na ni tsawa nya wudugwana  nya Makristo matodzidwego wu thangeyago vathu va Nungungulu, a gu Huwo nya Guthangeye. Avo va gu trenari vama nya dzimbe dzinvuta gasi gu va phasa gu khathaleya vathu va Nungungulu. Khu giyeyedzo, hengeledzano yi ngu dongiseya dzixikola nya dzingi gasi gu trenari madhota, vawoneleyi nya sirkwitu, sivbango nya kometi ya Bheteli, vawoneleyi nya Dzibheteli ni vambe vathu. Huwo nya Guthangeye yi ngu trenari vaphasedzeyi nyo hambane-hambane nya kometi nya Huwo nya Guthangeye. Vaphasedzeyi vovo nyo tumbege, va na ni mithumo nya yingi hengeledzanoni nigu va dzi dongisede gu simama gu khathaleya dzinvuta dza Kristo.

14. Silo muni nya lisima hi si hevbudego avba nya ndrima yeyi?

¹⁴ Kala olu, ndrima yeyi yi tshamusede gu khiyo: Tepo Mukristo nyo hegise a todzidwego a na hongolago ndzadzini, tshanisa nya yikhongolo na yi romo vbafuvbi, vathu va Jehovha va na simama gu mu thumeya khu gutumbega. Khu kotani nya olu hi thangedwago khu Jesu Kristo, ethu gima kha hi na nga diga gu khozeya Jehovha. Hi ngu dziti gu khethu, ga tepo yoyo hi na wugedwa khu tsawa nya mayigo owu Bhibhiliya yi wu ranago gu khiyo i Goge wa Magoge. (Ezek. 38:18-20) Ganiolu, gu wugedwa gogo gu na ba guri ga gitepwana nigu kha wu na nga himbedzeya vathu va Jehovha gu mu khozeya. Uye khu lisine, a na hi vbulugisa! Ga giwoniso nyo khaguri, Johane a di wona “vathu nya vangi ngudzu” nya dzimbe dzinvuta dza Kristo. Johane a di embedwa gu pwani “vathu [vava] nya vangi ngudzu” va di gu duga khavba nya “tshanisa nya yikhongolo.” (Gutu. 7:9, 14) Khu kharato, ethu kha hi kanakani gu khethu Jehovha a na hi vbulugisa!

15-16. Guya khu Gutuledwa 17:14, ginani egi Makristo matodzidwego ma na girago ndrani nya nyimbi nya Arimagedhoni nigu khu ginani isoso si hi tiyisago?

¹⁵ Ambari ulolo, vathu nyo khaguri va nga dzi wudzisa gu khavo: ‘Ginani gi na giregeyago ava vatodzidwego? Ginani va na girago tepo va na vbohago ndzadzini?’ Bhibhiliya yi ngu hlamula siwudziso sesi. Iyo yo tshamuseya gu khiyo vafumeli nya litigo leli va na “dwana ni Ginvutana.” Khu lisine, avo va na padwa. Bhibhiliya yari khiyo: “Gi na va pala.” Ganiolu, gi na phaswa khu mani? Livhesi li ngu hlamula gu khilo, khava “va ranidwego, va hathidwego va bwe va tumbega.” (Leri Gutuledwa 17:14.) Khu vamani vathu  vovo? Khava vatodzidwego va na wuswago khu gufani. Khu kharato, tepo Mukristo nyo hegise a todzidwego a na hongolago ndzadzini, tshanisa nya yikhongolo na yi romo vbafuvbi, thumo nyo pheye va na ningwago gu dwana. Khu lisine, wu na ba wuri thumo nya wukhongolo ngudzu. Makristo nyo khaguri matodzidwego na ma nga si khali Dzifakazi dza Jehovha, ma di gu oloveya gu dwana ni vambe. Mambe ma diri masotshwa, ganiolu khu gu gimbiya nya tepo ma hevbulede gu vbanya khu gurula ni vambe tepo ma nga hevbula lisine. (Gal. 5:22; 2 Tes. 3:16) Ayo ma di ema gu seketeya dzinyimbi. Ambari ulolo, hwane nya gu ba ma hongode ndzadzini ayo ma na ya patana ni Jesu ni dzingilozi, gasi gu dwana nyimbi nyo hegise ni valala va Nungungulu.

¹⁶ Dundrugeya khesi! Muhuno, Makristo nyo khaguri matodzidwego ma gumbide ngudzu nigu ma mwalo tshivba. Ganiolu, tepo ma na wuswago gasi gu ya vbanya ndzadzini, ayo ma na khala sivangwa nya liphuvbo, nya mbafa, si gu na ni tshivba gasi gu dwana gumogo ni Jesu Kristo Pfhumu nya Dzinyimbi. Hwane nya gu ba yi vbede nyimbi nya Arimagedhoni, ayo ma na thuma ni Jesu gasi gu phasa vathu gu khala vathu nyo vbeleye. Nya mba kanakana, tepo ma na ba ma romo ndzadzini, ayo ma na gireya nya singi vandriyawe guvbindra tepo yile va nga ba va romo mafuni kha nga vathu nya mba vbeleya.

17. Ha gu dziti kharini gu khethu sithumi sa Jehovha nyo tumbege si na ba si vhikelegide ndrani nya nyimbi nya Arimagedhoni?

¹⁷ Ina wa gu gira gipandre nya dzimbe dzinvuta? Abari gu ina, ginani u yedego gu gira tepo nyimbi nya Arimagedhoni yi na pheyago? Si vbevbugide: Tumba Jehovha u bwe u landrisa sileletelo saye. Isoso sa gu pata ginani? Bhibhiliya yi tshamusede omu ga Isaya 26:20 gu khiyo: “Indrani, belani dzinyumbani gwanu mu dzi segela malimba, mu sihala umo gikhatinyana kala li bose likhulo laye.” Mwendro, satshavbo sithumi sa Jehovha sa ndzadzini ni mafuni, si na ba si vhikelegide ndrani nya nyimbi nya Arimagedhoni. Gu fana ni mupostoli Pawulo, hi ngu tiyisega gu khethu: “Gani mifumo, gani silo si gomogo, gani silo si ngo gutago . . . gimwalo gi na si kodzago gu hi hambanisa ni lihaladzo eli Nungungulu a hi yeyedzidego.” (Rom. 8:38, 39) Tepo yatshavbo dundruga gu khuwe Jehovha a ngu gu haladza ngudzu ni gu gima kha na nga gu diga!