1. Ino ndilili bananike boonse nobanooli kujulu?

 MYAKA minji yainda, bantu ba Jehova bakali kulibuzya kuti, ‘Ino ndilili Munakristo munanike wamamanino nayootolwa kujulu?’ Twakali kuyeeya kuti ambweni bananike bamwi bakali kuyookkala kwaciindi cili mbocibede munyika ya Paradaiso yaakwiinda nkondo ya Amagedoni. Pele mu Ngazi Yamulindizi ya July 15, 2013, twakaiya kuti kaitanatalika nkondo ya Amagedoni, bananike boonse ibacinooli anyika bayootolwa kujulu.—Mt. 24:31.

2. Mubuzyo nzi ngobakonzya kulibuzya bamwi? Ncinzi ncotutiilange-lange mucibalo eeci?

² Nokuba boobo, bamwi balakonzya kulibuzya kuti: Ncinzi ciyoocitikila ‘bambelele zimbi’ zya Kristo balo ibanoobelekela Jehova cakusyomeka anyika ‘lyamapenzi mapati’? (Joh. 10:16; Mt. 24:21) Bamwi balakonzya kuyeeya kuti bayoolekelezyegwa ciindi bananike baakutolwa kujulu. Amuleke tulange-lange zibalo zyamu Bbaibbele zyobilo izikonzya kubapa kuyeeya boobo. Mpoonya tulabandika kaambo ncotuteelede kulibilika.

NCINZI CITAKACITIKI?

3-4. Ncinzi bamwi ncobakonzya kuyeeya? Nkaambo nzi?

³ Bamwi balakonzya kuyeeya kuti bambelele zimbi bayoocileka kumubelekela Jehova ciindi nobatanoociliko bananike bamu Kabunga Keendelezya kuti kababasololela. Ambweni balakonzya kuyeeya boobu akaambo kamakani aamu Bbaibbele amwi. Atulange-lange zikozyanyo zyobilo. Cakusaanguna cijatikizya Mupaizi Mupati Jehoyada. Wakali mubelesi wa Leza uusyomeka. Walo amukaintu wakwe Jehosabati, bakamukwabilila Jehoasi naakacili mwana akumugwasya kuba mwami uuli kabotu  alimwi uusyomeka. Ciindi naakacili kupona Jehoyada, Jehoasi wakali kucita zintu zili kabotu. Pele naakafwa, Jehoasi wakatalika kucita zintu zibyaabi. Wakatalika kumvwida basilutwe babyaabi akuleka kubelekela Jehova.—2Mak. 24:​2, 15-19.

⁴ Cikozyanyo cabili, nca Banakristo bamumwaanda wamyaka wabili. Johane iwakali mwaapostolo wamamanino kufwa, wakabagwasya kapati Banakristo banji ikuzumanana kumubelekela Jehova. (3Joh. 4) Mbubwenya mbuli baapostolo bamwi ba Jesu basyomeka, Johane wakabeleka canguzu kukwabilila mbungano kuli basiluleyo. (1Joh. 2:18; 2Tes. 2:7) Nokuba boobo, ciindi Johane naakafwa, basiluleyo bakamwaika mbuli mulilo wamusyokwe. Mumyaka misyoonto buyo yakatobela, basiluleyo aaba bakali kuyiisya njiisyo zinji zyakubeja alimwi akuzumizya bukkale bubyaabi mumbungano zyoonse.

5. Ncinzi ncotuteelede kuyeeya twabala zibalo eezyi zyobilo zyamu Bbaibbele?

⁵ Sena zibalo eezyi zyobilo zyamu Bbaibbele, zitondezya kuti cintu cikozyenye aceeci ciyoobacitikila bambelele zimbi ciindi bananike baakutolwa kujulu? Aciindi eeco, sena Banakristo basyomeka ibanooli anyika bayooleka kutobela zintu nzyobakayiisyigwa mbuli mbwaakacita Jehoasi, naa bayooba basiluleyo mbuli mbobakacita Banakristo banji bamumwaanda wamyaka wabili C.E.? Bwiinguzi mbwakuti peepe. Tulakonzya kuba masimpe kuti ciindi bananike baakutolwa kujulu, bambelele zimbi bayoozumanana kumukomba Jehova munzila iiluzi alimwi akuti awalo uyoozumanana kubalanganya. Nkaambo nzi ncotwaambila boobu?

BUKOMBI BUSALALA TABUKASOFWAAZYIGWI

6. Nziindi nzi zyotatwe nzyotuyanda kulanga-langa?

⁶ Ncinzi citupa kusyoma kuti bukombi busalala tabukasofwaazyigwi, nomuba muziindi zikatazya nzyotulangila kumbele? Nkaambo Bbaibbele lyaamba kuti ciindi ncotupona, ciliindene kapati aciindi ncobakali kupona bana Israyeli alimwi aciindi nobakamana kufwa baapostolo. Lino atuzilange-lange ziindi eezyi zyotatwe cakulomya: (1) Ciindi cabana Israyeli bansiku, (2) ciindi nobakamana kufwa baapostolo, alimwi (3) ciindi cesu, nkokuti “ziindi zyakubukulusya zintu zyoonse.”—Mil. 3:21.

7. Mu Israyeli yansiku, nkaambo nzi bana Israyeli basyomeka ncobatakeelede kutyompwa ciindi bami alimwi abamwi nobakatalika kucita zintu zibyaabi?

⁷ Ciindi cabana Israyeli bansiku. Kalaafwaafwi kufwa, Musa wakaambila bana Israyeli kuti: “Ndilizyi kabotu kuti ndaakufwa, ncobeni muyoobisya akuleya kuzwa munzila njondakamulailila.” (Dt. 31:29) Alimwi Musa wakabacenjezya bana Israyeli kuti bakali kuyootolwa mubuzike ikuti naa bazanga. (Dt. 28:​35, 36) Sena eeci cakacitika ncobeni? Inzya. Kwamyaka minji, bami banji bakali kucita zintu zibyaabi akupa bantu ba Leza kubisya. Akaambo kaceeci, Jehova wakabasubula bana Israyeli babyaabi alimwi kunyina naakazumizya bami bana Israyeli kuzumanana kubeendelezya. (Ezk. 21:​25-27) Aboobo, ciindi bana Israyeli basyomeka nobakabona kuti ncaakaamba Leza cacitika, eeci cakabapa kuzumanana kumubelekela cakusyomeka.—Is. 55:​10, 11.

8. Sena ceelede kutugambya kuti mbungano ya Bunakristo yamumwaanda wamyaka wabili yakasofwaazyigwa? Amupandulule.

⁸ Ciindi nobakamana kufwa baapostolo. Sena ceelede kutugambya kuti mbungano ya Bunakristo yamumwaanda wamyaka wabili yakasofwaazyigwa? Peepe. Jesu wakaambila limwi kuti kwakali kuyooba basiluleyo banji. (Mt. 7:​21-23; 13:​24-30, 36-43) Mwaapostolo Paulo, Petro a Johane bakazuminizya kuti businsimi bwa Jesu bwakalitalikide kale kuzuzikizyigwa mumwaanda wamyaka wakusaanguna C.E.  (2Tes. 2:​3, 7; 2Pet. 2:1; 1Joh. 2:18) Aboobo mbwaakafwida buyo mwaapostolo wamamanino, Banakristo basiluleyo bakaba cibeela ca Babuloni Mupati, ibulelo bwanyika yoonse bwabukombi bwakubeja. Eeci acalo cakazuzikizya businsimi bwa Jesu.

9. Ino ciindi ncotupona ciindene buti aciindi ncobakali kupona bana Israyeli bansiku alimwi aciindi cambungano ya Bunakristo yamumwaanda wamyaka wabili?

⁹ “Ziindi zyakubukulusya zintu zyoonse.” Ciindi ncotupona ciliindene kapati aciindi ncobakali kupona bana Israyeli bansiku alimwi aciindi nokwakaba basiluleyo banji mumwaanda wamyaka wabili C.E. Ino ciindi ncotupona caambwa kuti nzi? Kanji-kanji tucaamba kuti ‘mazuba aamamanino’ aabweende bwazintu oobu bubyaabi. (2Tim. 3:1) Pele Bbaibbele litondezya kuti ciindi cilamfwu alimwi ciyandika kapati cakatalika aciindi nciconya eeci. Ciyoozumanana kusikila Bwami Bwabu Mesiya bukape bantu kulondoka akucinca nyika kuba paradaiso. Ciindi eeci caambwa kuti “ziindi zyakubukulusya zintu zyoonse.” (Mil. 3:21) Alimwi cakatalika mu 1914. Ncinzi cakabukulusyigwa aciindi eeco? Jesu wakabikkwa kuba Mwami kujulu. Aboobo, Jehova alimwi wakaba amweendelezi iwakali kumwiiminina, simulyazina wa Mwami Davida. Nokuba boobo, eeci tacili ncecintu cilikke Jehova ncaakabukulusya. Nokwakainda buyo ciindi cisyoonto, bukombi busalala bwakatalika kubukulusyigwa. (Is. 2:​2-4; Ezk. 11:​17-20) Pele sena kuli nobuyoosofwaazyigwa alimwi?

10. (a) Ncinzi Bbaibbele ncolyakasinsima kujatikizya bukombi busalala mumazuba eesu? (Isaya 54:17) (b) Nkaambo nzi businsimi oobu ncobukulwaizya?

¹⁰ Amubale Isaya 54:17. Amuyeeye buyo kujatikizya businsimi oobu: “Kunyina cilwanyo cipangilwa kulwana nduwe iciyoozwidilila.” Aaya majwi aakasololelwa amuuya ali mukuzuzikizyigwa mazuba aano. Lino majwi aawumbulizya aaya aatobela, alabeleka akuciindi cino ncotupona: “Bana bako boonse bayooyiisyigwa a Jehova, alimwi luumuno lwabana bako luyoovwula kapati. Uyookkazikizyigwa mubululami. . . . Tokayoowi cintu cili coonse alimwi takukabi cintu cikupa kuyoowa, nkaambo tacikakusweni afwaafwi pe.” (Is. 54:​13, 14) Naba Saatani, “leza wabweende bwazintu obuno” takonzyi kuulesya mulimo wakuyiisya ngobacita bantu ba Jehova. (2Kor. 4:4) Bukombi bwakasimpe bwakabukulusyigwa alimwi kunyina nobuyoosofwaazyigwa kabili pe. Amana buya, bunooliko lyoonse mane kukabe kutamani. Kunyina cilwanyo cakapangilwa kulwana ndiswe iciyoozwidilila.

 NCINZI CIYOOCITIKA?

11. Ncinzi citupa kusyoma kuti bankamu mpati tabakalekelezyegwi ciindi bananike baakuunka kujulu?

¹¹ Ncinzi ciyoocitika ciindi bananike baakutolwa kujulu? Kamuyeeya kuti, Jesu ngo Mweembezi wesu alimwi ngosilutwe wambungano ya Bunakristo. Cakusalazya, Jesu lwakwe wakaamba kuti: “Mujisi buyo Musololi omwe, Kristo.” (Mt. 23:10) Mwami wesu uulela kunyina nayakwaalilwa kucita mulimo wakwe. Akaambo kakuti Kristo nguubasololela basikumutobela bali waano anyika, tabeelede kuyoowa cili coonse. Masimpe kuti, tatuzyi bwini Kristo mbwayoobasololela bantu bakwe kuciindi eeco. Aboobo atulange-lange zikozyanyo zyamu Bbaibbele zikonzya kutukulwaizya.

12. Ino Jehova wakabalanganya buti bantu bakwe (a) ciindi Musa naakafwa? (b) ciindi Elija naakapegwa mulimo uumbi? (Amubone acifwanikiso.)

¹² Musa wakafwa bana Israyeli kabatananjila mu Nyika Yakasyomezyedwe. Ncinzi cakacitika kubantu ba Leza? Sena Jehova wakaleka kubagwasya bantu bakwe ciindi naakafwa mwaalumi ooyu uusyomeka? Peepe. Jehova wakazumanana kubagwasya kufwumbwa buyo leelyo nobakali kusyomeka kulinguwe. Katanafwa Musa, Jehova wakamwaambila kusala Joshua kusololela bantu bakwe. Amana buya Musa wakali kumuyiisya Joshua kwamyaka minji. (Kul. 33:11; Dt. 34:9) Kunze lyaboobo, kwakali bamaalumi bamwi ibeelela ibakali kukonzya kusololela bantu kabali basilutwe babantu bali zyuulu, bali myaanda, bali makumi aali musanu alimwi abali makumi. (Dt. 1:15) Bantu ba Leza bakali kulanganizyigwa kabotu. Cikozyanyo cimbi ncamusinsimi Elija. Wakabeleka canguzu kwamyaka minji kusololela bana Israyeli mukukomba Jehova. Pele cakasika ciindi Jehova naakamulonzya akumupa mulimo uumbi ku Juda. (2Bam. 2:1; 2Mak. 21:12) Sena bantu bamubwami bwamisyobo iili kkumi ya Israyeli bakalekelezyegwa? Peepe. Elija wakamuyiisya Elisha kwamyaka minji. Kunze lyaboobo, kwakali “bana babasinsimi” ibakayiisyidwe abalo. (2Bam. 2:7) Aboobo, kwakali bamaalumi banji basyomeka ibakali kukonzya kusololela bantu ba Leza. Jehova wakazumanana kwaazuzikizya makanze aakwe alimwi akubalanganya bakombi bakwe basyomeka.

13. Ncisyomezyo nzi ncotujana kulugwalo lwa Bahebrayo 13:5b? (Amubone acifwanikiso.)

¹³ Kweelana azibalo nzyotwalanga-langa, ino muyeeya kuti ncinzi ciyoocitika ciindi munanike wamamanino akuunka kujulu? Tatweelede kulibilika pe. Bbaibbele litusyomezya makani aamasimpe aakuti: Jehova kunyina  nayoobalekelezya bantu bakwe ibanooli waano anyika. (Amubale Bahebrayo 13:5b.) Mbubwenya mbuli Musa a Elija, kabunga kasyoonto kabananike ikasololela mazuba aano kalamvwisya mbociyandika kapati kuyiisya bamwi. Kwamyaka minji, bakwesu bamu Kabunga Keendelezya bali kuyiisya bakwesu bamwi bambelele zimbi mulimo wakusololela. Mucikozyanyo, babamba zikolo zinji zyakuyiisya baalu, balangizi beendeenda, bamu Kkomiti Yamutabi, balangizi baa Beteli, abamisyinali alimwi abamwi. Bamu Kabunga Keendelezya cacigaminina balabayiisya milimo basikubagwasyilizya mumakkomiti aayindene-indene aa Kabunga Keendelezya. Lino basikubagwasyilizya aaba bajisi mikuli minji kapati njobazuzikizya cakusyomeka. Amana buya, balilibambilide kuzumanana kuunyamuna mukuli wakulanganya mbelele zya Kristo bananike baakuunka kujulu.

14. Ncinzi ncotwiiya kujatikizya makani aaya?

¹⁴ Nceeci ncotwiiya kujatikizya makani aaya: Ciindi munanike wamamanino aakutolwa kujulu kumamanino aamapenzi mapati, bantu ba Jehova bayoozumanana kumukomba Leza cakusyomeka. Akaambo kakuti Jesu Kristo nguusololela, bakombi ba Leza bayoozumanana kumukomba. Tulizyi kuti aciindi eeco, nkamu yazisi iitegwa Gogo waku Magogo iyoobalwana bantu ba Leza. (Ezk. 38:​18-20) Nokuba boobo, kulwanwa ooko takukazwidilili pe; kunyina nokuyoolesya bantu ba Leza kukomba Jehova, nkaambo uyoobakwabilila. Mucilengaano, mwaapostolo Johane wakabona “nkamu mpati” yambelele zimbi zya Kristo. Johane wakaambilwa kuti “nkamu mpati” yabantu eeyo yakazwa “mumapenzi mapati.” (Ciy. 7:​9, 14) Aboobo tuli masimpe kuti Jehova uyoobafwutula.

15-16. Kweelana a Ciyubunuzyo 17:​14, ino bananike ba Kristo banoocita nzi lyankondo ya Amagedoni? Nkaambo nzi eeci ncocikulwaizya?

¹⁵ Nokuba boobo, bamwi balakonzya kulibuzya kuti: ‘Ncinzi bananike ncobayoocita bakuunka kujulu?’ Bbaibbele lilawiingula mubuzyo ooyu. Litondezya kuti mfwulumende zyamunyika ‘ziyoolwana a Mwanaambelele.’ Masimpe ziyoozundwa nkaambo tubala kuti: “Mwanaambelele uyoobazunda.” Ino mbaani  ibayoomugwasyilizya Mwanaambelele? Kapango kaamba kuti “ibakaitwa,” “ibakasalwa” alimwi “ibasyomeka.” (Amubale Ciyubunuzyo 17:14.) Ino aaba mbaani? Mbananike ibakabusyigwa. Aboobo ciindi munanike wamamanino aakutolwa kujulu kumamanino aamapenzi mapati, mulimo wabo wakusaanguna unooli wakulwana. Eelo kaka ooyo unooli mulimo uulibedelede! Banakristo bananike bamwi bakali basinkondo kabatanaba Bakamboni ba Jehova. Bamwi bakali kubeleka mulimo wabusikalumamba. Kumane mukuya kwaciindi, bakaba Banakristo bakasimpe akwiiya kuba basiluumuno. (Gal. 5:22; 2Tes. 3:16) Bakacileka kugwasyilizya nkondo munzila iili yoonse. Nokuba boobo, baakutolwa kujulu, bayoobeleka a Kristo abangelo basalala munkondo yamamanino yakulwana basinkondonyina Leza.

¹⁶ Amuciyeeyele buyo eeci. Aano anyika, bananike bamwi balicembeede naa andiza buya balaciswa-ciswa. Pele baakubusyigwa kubuumi bwakujulu, bayooba zilenge zyamuuya zilaanguzu akusangana Jesu Kristo, Mwami Sikalumamba wabo munkondo. Yaakumana nkondo ya Amagedoni, bayoobeleka a Jesu kugwasya bantu kuti balondoke. Tacidoonekwi buya kuti aaba bananike ibanooli kujulu, bayoocikonzya kubagwasya kapati banabokwabo ibanooli anyika kwiinda mbobakali kukonzya kucita kabacili bantu batalondokede anyika.

17. Ino tuzyi buti kuti babelesi ba Jehova boonse banookwabilidwe lyankondo ya Amagedoni?

¹⁷ Sena muli bambelele zimbi? Ikuti kacili boobu, ncinzi ncomuyooyandika kucita yaakutalika nkondo ya Amagedoni? Muyooyandika kusyoma Jehova akutobela busolozi bwakwe. Ino eeci cibikkilizya nzi? Bbaibbele litwaambila kuti: “Amunjile mumaanda aanu aamukati, Mulijalile. Amuyube kwakaindi kaniini buyo. Kusikila mane bukali bwiinde.” (Is. 26:20) Boonse babelesi ba Leza basyomeka kujulu aanyika banookwabilidwe kuciindi eeco. Mbubwenya mbuli mwaapostolo Paulo, tulisinizyide kuti, “mfwulumende, naa zintu ziliko lino, naa zilangilwa kumbele . . . tazikonzyi pe kutwaandaanya kuluyando lwa Leza.” (Rom. 8:​38, 39) Lyoonse kamuyeeya kuti: Jehova ulamuyanda kapati alimwi kunyina nayoomulekelezya pe.