1. Xana vahlawuriwa hinkwavo va ta ya rini etilweni?

 EMALEMBENI lama hundzeke, vanhu va Yehovha a va tivutisa leswi, ‘Vakreste vo hetelela lava hlawuriweke lava saleke laha misaveni va ta ya rini etilweni?’ A hi ehleketa leswaku endzhaku ka nyimpi ya Armagedoni, van’wana va va hlawuriwa va ta tshama laha misaveni ku ringana nkarhi wo karhi. Kambe eka Xihondzo xo Rindza xa July 15, 2013 hi dyondze leswaku vahlawuriwa hinkwavo lava va nga ta va va sale laha misaveni va ta ya etilweni loko ku nga si sungula nyimpi ya Armagedoni.—Mat. 24:31.

2. Ku nga ha va ni xivutiso xihi naswona hi ta bula hi yini eka nhlokomhaka leyi?

² Hambiswiritano, ku nga ha va ni xivutiso lexi nge: Ku ta endleka yini hi lava “tinyimpfu tin’wana” ta Kreste laha misaveni lava nga ta va va tirhela Yehovha hi ku tshembeka hi nkarhi wa “nhlomulo lowukulu”? (Yoh. 10:16; Mat. 24:21) Van’wana va tinyimpfu tin’wana va nga ha vilerisiwa hi leswaku loko vahlawuriwa va tekiwile va ya etilweni, a va nge swi tivi leswi va faneleke va swi endla. A hi buleni hi swikombiso swimbirhi swa le Matsalweni leswi nga ha va endlaka va vilela. Endzhaku ka sweswo hi ta bula hi leswi endlaka hi nga vi na xivangelo xo vilela.

I YINI LESWI NGA TAKA SWI NGA ENDLEKI?

3-4. Van’wana va nga ha vilerisiwa hi yini naswona hikwalahokayini?

³ Van’wana va nga ha vilerisiwa hi leswaku lava tinyimpfu tin’wana va nga ha tshika ku tirhela Yehovha loko vamakwerhu va Huvo leyi Fumaka va nga ha ri kona leswaku va ta va kongomisa. Kumbexana, va nga ha titwa tano hikwalaho ka timhaka tin’wana ta le Matsalweni. A hi kambisiseni swikombiso swimbirhi. Xo  sungula xi katsa Muprista Lonkulu Yoyada. A a ri nandza wo tshembeka wa Xikwembu. Yena ni nsati wakwe Yehoxabati, va sirhelele Yehowaxi loyi a ha ri xifanyetana ni ku n’wi pfuna leswaku a va hosi leyinene ni leyi tshembekaka. Loko Yoyada loyi a a dyuharile a ha hanya, Yehowaxi u ye emahlweni a gandzela Yehovha ni ku endla leswinene. Kambe endzhaku ka loko Yoyada a file, Yehowaxi u sungule ku endla swilo swo biha. U yingise tihosana to homboloka ivi a tshika ku gandzela Yehovha.—2 Tikr. 24:​2, 15-19.

⁴ Xikombiso xin’wana i xa Vakreste lava saleke va hanya endzhaku ka ku fa ka vaapostola. Muapostola Yohane loyi a yeke emahlweni a hanya endzhaku ka loko vaapostola hinkwavo va file, u pfune Vakreste vo tala leswaku va tshama va tshembekile. (3 Yoh. 4) Ku fana ni vaapostola lavan’wana vo tshembeka va Yesu, Yohane u tirhe hi matimba leswaku a sirhelela mavandlha eka vagwinehi lava a va dyondzisa tidyondzo ta mavunwa. (1 Yoh. 2:18; 2 Tes. 2:7) Hambiswiritano, endzhaku ka loko a file, vo tala evandlheni va ve vagwinehi. Eka malembe lama landzeleke, vagwinehi volavo va dyondzise tidyondzo to tala ta mavunwa ni ku pfumelela vanhu evandlheni va tikhoma ku biha.

5. I yini leswi hi nga fanelangiki hi gimeta ha swona eka swikombiso swimbirhi swa le Bibeleni?

⁵ Xana swikombiso leswimbirhi swa le Matsalweni swi kombisa leswaku ku ta endleka leswi fanaka eka tinyimpfu tin’wana ta Kreste loko vahlawuriwa va yisiwa etilweni? Hi nkarhi wolowo, xana Vakreste vo tshembeka va ta sungula ku endla swilo swo biha hilaha Yehowaxi a endleke hakona kumbe va ta va vagwinehi hilaha Vakreste vo tala va le ndzhaku ka ku fa ka vaapostola va endleke hakona? A swi nge vi tano! Hi nga tiyiseka leswaku loko vahlawuriwa va tekiwa va ya etilweni, lava tinyimpfu tin’wana va ta khathaleriwa ni ku ya emahlweni va gandzela Yehovha hi ndlela leyinene. Hikwalahokayini hi tiyiseka?

VUGANDZERI LEBYI TENGEKE A BYI NGE THYAKISIWI

6. Hi yihi mikarhi yinharhu leyi hi nga ta yi kambisisa hi vuenti?

⁶ I yini lexi endlaka hi tiyiseka leswaku sweswi ni le nkarhini wo tika lowu taka, vugandzeri lebyi tengeke a byi nge thyakisiwi? Hikwalaho ka leswi hi swi dyondzeke eBibeleni mayelana ni nkarhi lowu hi hanyaka eka wona sweswi. Nkarhi lowu Vaisrayele va khale va hanyeke ha wona ni wa le ndzhaku ka ku fa ka vaapostola yi hambane swinene ni nkarhi lowu hi hanyaka eka wona sweswi. Kutani a hi kambisiseni mikarhi leyinharhu leyi landzelaka hi vuenti: (1) Nkarhi wa Israyele wa khale, (2) nkarhi wa le ndzhaku ka ku fa ka vaapostola ni (3) nkarhi wa hina, ku nga “nkarhi wa ku pfuxeta swilo hinkwaswo.”—Mit. 3:21.

7. Hikwalahokayini Vaisrayele vo tshembeka a va nga fanelanga va heleriwa hi ntshembo loko tihosi swin’we ni vanhu vo tala va endla swilo swo homboloka?

⁷ Nkarhi wa Israyele wa khale. Loko Muxe a ri ekusuhi ni ku fa, u byele Vaisrayele a ku: “Hikuva ndzi swi tiva kahle leswaku endzhaku ka rifu ra mina mi ta hundzukela evubihini, mi hambuka endleleni leyi ndzi mi leriseke yona.” (Det. 31:29) Muxe u tlhele a lemukisa Vaisrayele leswaku loko vo xandzuka, va ta yisiwa evuhlongeni. (Det. 28:​35, 36) Xana sweswo swi endlekile? Ina. Ku ringana malembe ya madzana, tihosi to tala ti dyohele Yehovha ni ku hambukisa vanhu vakwe. Hikwalaho, Yehovha u xupule Vaisrayele vo homboloka naswona a nga ti pfumelelanga tihosi ti ya emahlweni ti fuma vanhu vakwe. (Ezek. 21:​25-27) Kambe loko Vaisrayele vo tshembeka va vona leswi Xikwembu xi swi vuleke swi endleka, va ve ni xivindzi xo ya emahlweni va xi tirhela.—Esa. 55:​10, 11.

8. Xana swi fanele swi hi hlamarisa leswi vandlha ra le ndzhaku ka ku fa ka vaapostola ri thyakisiweke? Hlamusela.

⁸ Nkarhi wa le ndzhaku ka ku fa ka vaapostola. Xana hi fanele hi hlamala hi ku onhiwa ka  vandlha ra Vukreste leri saleke ri va kona loko vaapostola va file? Nikatsongo. Yesu u vule ka ha ri emahlweni leswaku a ku ta va ni vagwinehi vo tala. (Mat. 7:​21-23; 13:​24-30, 36-43) Muapostola Pawulo, Petro na Yohane va tiyisekise leswaku vuprofeta bya Yesu a byi ta sungula ku endleka hi nkarhi wa vona. (2 Tes. 2:​3, 7; 2 Pet. 2:1; 1 Yoh. 2:18) Loko muapostola wo hetelela a fa, Vakreste lava hundzukeke vagwinehi va ve xiphemu xa Babilona Lonkulu, ku nga mfumo wa misava wa vukhongeri bya mavunwa. Nakambe leswi Yesu a swi vuleke swi endlekile.

9. Xana nkarhi wa Israyele wa khale ni wa vandlha leri veke kona endzhaku ka ku fa ka vaapostola wu hambane njhani ni nkarhi lowu hi hanyaka eka wona sweswi?

⁹ “Nkarhi wa ku pfuxeta swilo hinkwaswo.” Nkarhi wa Vaisrayele va khale ni wa vagwinehi lava veke kona endzhaku ka loko vaapostola va file, wu hambana hi ku helela ni nkarhi wa hina sweswi. Xana nkarhi lowu hi hanyaka eka wona sweswi wu vitaniwa yini? Wu vitaniwa ‘masiku yo hetelela’ ya misava leyi yo homboloka. (2 Tim. 3:1) Kambe Bibele yi vula leswaku nkarhi wa nkoka swinene ni wo leha yi sungule xikan’we. Yi ta ya emahlweni ku fikela loko Mfumo wa Mesiya wu endla leswaku vanhu va nga ha vi na xidyoho ni ku endla misava yi va paradeyisi. Nkarhi lowu wu vitaniwa “nkarhi wa ku pfuxeta swilo hinkwaswo.” (Mit. 3:21) Wu sungule hi 1914. I yini leswi pfuxetiweke hi nkarhi wolowo? Yesu u vekiwe ku va Hosi etilweni. Kutani Yehovha u tlhele a va ni mufumi loyi a N’wi yimelaka, ku nga mudyandzhaka wa Hosi yo tshembeka Davhida. Kambe Yehovha a nga pfuxetanga vuhosi byebyo ntsena. Endzhaku ka sweswo, vugandzeri lebyi tengeke byi pfuxetiwile! (Esa. 2:​2-4; Ezek. 11:​17-20) Xana byi ta tlhela byi thyakisiwa?

10. (a) I yini leswi Bibele yi swi profeteke mayelana ni vugandzeri lebyi tengeke enkarhini wa hina? (Esaya 54:17) (b) Hikwalahokayini vuprofeta lebyi byi hi tiyisekisa?

¹⁰ Hlaya Esaya 54:17. Ehleketa hi vuprofeta lebyi: “A ku na tlhari leri nga ta ku hlasela ri ku hlula”! Marito wolawo lama huhuteriweke ma le ku endlekeni namuntlha. Marito lawa, lama chavelelaka ma tirha ni le nkarhini wa hina: “Vana va wena hinkwavo va ta dyondzisiwa hi Yehovha, ku rhula ka vana va wena ku ta va kukulu. U ta simekiwa u tiya hi ku lulama. . . . A wu nge he chavi nchumu naswona a ku na lexi nga ta ku chavisa, hikuva a xi nge tshineli eka wena.” (Esa. 54:​13, 14) Hambi ku ri Sathana hi yexe loyi a nga “xikwembu xa misava leyi,” a nge swi koti ku tshikisa malandza ya Yehovha ku chumayela. (2 Kor. 4:4) Vugandzeri lebyi tengeke byi pfuxetiwile naswona a byi nge pfuki byi thyakisiwile. Byi ta tshama hilaha ku nga heriki. A ku na tlhari leri nga ta hi hlasela ri hi hlula!

 KU TA ENDLEKA YINI?

11. I yini lexi hi tiyisekisaka leswaku ntshungu lowukulu a wu nge pfumali murhangeri endzhaku ka loko vahlawuriwa va ye etilweni?

¹¹ Ku ta endleka yini loko vahlawuriwa va tekiwa va ya etilweni? Tsundzuka, Yesu i Murisi wa hina. Hi yena nhloko ya vandlha ra Vukreste. U te: “Mi ni Murhangeri un’we, ku nga Kreste.” (Mat. 23:10) Mikarhi hinkwayo Hosi ya hina leyi nga eku fumeni yi ta khathalela valandzeri va yona va ntiyiso. Leswi Kreste a nga mukongomisi, valandzeri vakwe lava nga laha misaveni a va na xivangelo xo chava nchumu. I ntiyiso leswaku a hi na vuxokoxoko hinkwabyo bya ndlela leyi Kreste a nga ta kongomisa vanhu vakwe hi nkarhi wolowo. Kutani a hi kambisiseni swin’wana swa swikombiso swa le Bibeleni leswi nga hi tiyisekisaka.

12. Yehovha u va khathalele njhani vanhu vakwe (a) endzhaku ka loko Muxe a file? (b) endzhaku ka loko Eliya a kume xiavelo xin’wana? (Nakambe vona xifaniso.)

¹² Loko Vaisrayele va nga si nghena eTikweni Ra Xitshembiso, Muxe u file. Xana ku endleke yini hi vanhu va Xikwembu? Xana Yehovha u tshike ku pfuna vanhu vakwe endzhaku ka loko wanuna loyi wo tshembeka a file? Doo! Loko ntsena va tshama va tshembekile, Yehovha a a va khathalela. Loko Muxe a nga si fa, Yehovha u n’wi lerise ku letela Yoxuwa leswaku a rhangela vanhu Vakwe. Muxe u letele Yoxuwa ku ringana malembe yo tala. (Eks. 33:11; Det. 34:9) Ku engetela kwalaho, a ku ri ni vavanuna van’wana vo tala lava a va lunghekele ku rhangela, lava katsaka tindhuna ta vanhu va magidi, va madzana, va makumentlhanu ni va khume. (Det. 1:15) Vanhu va Xikwembu a va khathaleriwa kahle. Hi kuma xikombiso lexi fanaka eka Eliya. U tirhe hi matimba ku ringana malembe yo tala ku pfuna Vaisrayele leswaku va gandzela Yehovha. Kambe ku fike nkarhi lowu Yehovha a nga n’wi nyika xiavelo xin’wana edzongeni wa Yuda. (2 Tih. 2:1; 2 Tikr. 21:12) Xana leswi a swi vula leswaku vanhu vo tshembeka va tinyimba ta khume ta mfumo wa Israyele a va tshikiwile? Doo! Eliya a a ri eku leteleni ka Elixa malembe yo tala. Nakambe a ku ri ni ‘vana va vaprofeta,’ lava a va ri eku leteriweni. (2 Tih. 2:7) Ku engetela kwalaho, a ku ri ni vavanuna vo tala lava a va pfuneta ku rhangela vanhu va Xikwembu. Yehovha u ye emahlweni a hetisisa xikongomelo xakwe naswona u khathalele vagandzeri vakwe vo tshembeka.

13. Hi xihi xitiyisekiso lexi hi xi kumaka eka Vaheveru 13:5b? (Nakambe vona xifaniso.)

¹³ Loko wa ha ehleketa hi swikombiso leswi, xana u ehleketa leswaku ku ta endleka yini loko vahlawuriwa vo hetelela va tekiwa va ya etilweni? A hi fanelanga hi vilela. Bibele yi hi tiyisekisa  leswi: Yehovha a nge pfuki a va tshikile vanhu vakwe laha misaveni. (Hlaya Vaheveru 13:5b.) Ntlawa lowutsongo wa Vakreste lava hlawuriweke lava rhangelaka namuntlha, wu twisisa nkoka wa ku letela van’wana, hilaha Muxe na Eliya va endleke hakona. Se swi endla malembe yo tala vamakwerhu va Huvo leyi Fumaka va ri karhi va letela vavanuna eka lava va tinyimpfu tin’wana leswaku va rhangela. Hi xikombiso, va hlele swikolo swo tala swo letela vakulu, valanguteri va miganga, Swirho Swa Komiti Ya Rhavi, valanguteri va le Bethele ni van’wana. Huvo leyi Fumaka yi le ku leteleni ka vapfuni hi ku kongoma eka tikomiti to hambanahambana ta Huvo leyi Fumaka. Sweswi hi vulavulaka, vapfuni lava va le ku endleni ka vutihlamuleri byo tala enhlanganweni wa Yehovha hi ku tshembeka. Va lunghekele ku ya emahlweni ni ku endla ntirho wo khathalela tinyimpfu ta Kreste.

14. Hi tihi tinhla ta nkoka eka dyondzo leyi?

¹⁴ Hi leti tinhla ta nkoka eka dyondzo ya hina: Loko nhlomulo lowukulu wu ri ekusuhi ni ku hela, vahlawuriwa vo hetelela lava saleke laha misaveni va ta tekiwa va ya etilweni, kutani vanhu va Yehovha lava nga ta sala laha misaveni va ta ya emahlweni va n’wi gandzela hi ku tshembeka. Ha yi tlangela swinene ndlela leyi Yesu a rhangelaka hayona hikuva vanhu va Yehovha a va nge tshiki ku n’wi gandzela hi ku tshembeka. Hi nkarhi wolowo, ha swi tiva leswaku ntlawa lowu Bibele yi wu vitanaka Gogo Wa Magogo wu ta hlasela vanhu va Xikwembu. (Ezek. 38:​18-20) Kambe nhlaselo wolowo wu ta ba ehansi; a wu nge swi koti ku tshikisa vanhu va Xikwembu leswaku va xi gandzela. Hakunene xi ta va ponisa! Exivon’weni, muapostola Yohane u vone “ntshungu lowukulu” wa lava tinyimpfu tin’wana ta Kreste. Yohane u byeriwe leswaku “ntshungu lowukulu” wu huma “enhlomulweni lowukulu.” (Nhlav. 7:​9, 14) Hikwalaho, ha tiyiseka hi ku helela leswaku Yehovha u ta va ponisa!

15-16. Hi ku ya hi Nhlavutelo 17:​14, i yini leswi vahlawuriwa va Kreste va nga ta swi endla hi nkarhi wa nyimpi ya Armagedoni naswona hikwalahokayini sweswo swi hi khutaza?

¹⁵ Hambiswiritano, van’wana va nga ha tivutisa leswi: ‘Xana vahlawuriwa va ta endla yini endzhaku ka loko va ye etilweni?’ Bibele yi hlamula  xivutiso lexi hi ku kongoma. Yi hlamusela leswaku mifumo ya misava leyi yi ta “lwa ni Xinyimpfana.” Kambe a yi nge hluli. Bibele yi ri: “Xinyimpfana xi ta [yi] hlula.” Xi ta pfuniwa hi vamani? Bibele ya hlamula. Hi lava “hlawuriweke” ni lava “tshembekaka.” (Hlaya Nhlavutelo 17:14.) I vamani volavo? I vahlawuriwa lava pfuxiweke! Kutani loko vahlawuriwa vo hetelela lava saleke laha misaveni va tekiwa va ya etilweni loko nhlomulo lowukulu wu ri ekusuhi ni ku hela, xiavelo xa vona xo sungula ku ta va ku lwa. Mawaku xiavelo xexo! Loko van’wana va Vakreste lava hlawuriweke va nga si va Timbhoni ta Yehovha a va ri na madzolonga. Van’wana a va ri masocha. Kambe hi ku famba ka nkarhi va ve Vakreste va ntiyiso ivi va dyondza ku hanya hi ku rhula ni vanhu van’wana. (Gal. 5:22; 2 Tes. 3:16) Va tshike ku seketela tinyimpi. Hambiswiritano, endzhaku ka loko va pfuxeriwe etilweni, va ta lwa ni valala va Xikwembu enyimpini yo hetelela va ri na Kreste swin’we ni tintsumi ta yena to kwetsima.

¹⁶ Ehleketa hi mhaka leyi! Van’wana va Vakreste lava hlawuriweke lava nga kona laha misaveni va dyuharile naswona a va ha ri na matimba. Kambe loko va pfuxeriwa ku ya hanya etilweni, va ta va swivumbiwa swa moya leswi nga ni matimba naswona va ta va ni xiavelo xa ku ya lwa nyimpi va ri etlhelo ka Hosi ya vona leyi nga Nhenha, Yesu Kreste. Endzhaku ka loko nyimpi ya Armagedoni yi herile, va ta tirha swin’we na Yesu Kreste leswaku va endla vanhu va nga ha vi na xidyoho. Handle ko kanakana, loko va ri etilweni va ta kota ku pfuna vamakwavo va vona va laha misaveni hi ndlela leyikulu, ku tlula loko va ha ri vanhu lava nga ni xidyoho!

17. Hi swi tiva njhani leswaku malandza hinkwawo ya Xikwembu ma ta va ma sirhelelekile hi nkarhi wa nyimpi ya Armagedoni?

¹⁷ Xana u un’wana wa lava tinyimpfu tin’wana? Loko swi ri tano, xana swi ta lava leswaku u endla yini loko nyimpi yo hetelela ya Armagedoni yi sungula? Swa olova swinene: Tshemba Yehovha u tlhela u landzelela nkongomiso wakwe. Xana sweswo swi katsa yini? Bibele yi hi khutaza leswi: “Nghenani emakamareni ya n’wina, mi pfala tinyangwa ta n’wina. Tumbelani swa nkarhinyana kukondza vukarhi bya Xikwembu byi hundza.” (Esa. 26:20) Hi nkarhi wolowo, malandza yo tshembeka ya Xikwembu etilweni ni laha misaveni ma ta va ma sirhelelekile. Ku fana na muapostola Pawulo, ha tiyiseka leswaku “mifumo kumbe swilo leswi nga laha sweswi kumbe swilo leswa ha taka . . . a swi nge swi koti ku hi hambanisa ni rirhandzu ra Xikwembu.” (Rhom. 8:​38, 39) Tshama u ri karhi u tsundzuka leswi: Yehovha wa ku rhandza naswona a nge pfuki a ku tshikile!