1. Vatotiwa hinkwavu va ta ya tilweni hi nkama muni?

 KA MALEMBE lawa ma nga hundza, vanhu va Yehovha a va tivutisa leswi: ‘Vatotiwa lava va nga ta va va salile lani misaveni va ta ya tilweni hi nkama muni?’ Phela a khale a hi pimisa swaku vatotiwa a va ta tama va li lani misaveni va tlhela va hanya ka Paradesi hi nkamanyana wawutsongo na Armajedoni se yi hundzile. Kambe ka Murindzi wa 15 ka Julho wa 2013 hi djondze swaku na nyimpi ya Armajedoni yi nge se sungula, vatotiwa hinkwavu va 144.000 va ta va se va li matilweni. — Mat. 24:31.

2. Hi xini xivutiso lexi hi nga ha tiyendlaka xona, naswona hi ta djondza hi yini ka nhlokomhaka leyi?

² Kambe hi nga ha tivutisa leswi: Ku ta yendleka yini hi vamakwerhu va “tinyempfu tin’wani” lava va nga ta tama va tirhela Yehovha hi ku tshembeka lani misaveni hi nkama wa “nhlomulu wawukulu”? (Yoh. 10:16; Mat. 24:21) Phela van’wani va tinyempfu tin’wani swi nga yendleka va karhateka hi swaku a va nga ta xi tiva xa ku xi yendla, kumbe a ku nga ta va ni munhu lweyi a nga ta va kongomisa loko se vamakwerhu hinkwavu va xinuna ni va xisati lava va nga totiwa va ta va se va li matilweni. Swi nga yendleka vamakwerhu lava va titwisa xileswo hi mhaka ya swikombiso swimbirhi leswi Bibele li vulavulaka hi swona. A hi kambisiseni swikombiso swoleswo, hi tlhela hi vona swaku hi mhaka muni hi nga fanelanga hi karhateka.

I MPSINI SWA KU A SWI NGA TA YENDLEKA?

3-4. I mpsini leswi van’wani va nga ha pimisaka swona, naswona hi mhaka muni?

³ Swi nga yendleka van’wani va pimisa swaku lava tinyempfu tin’wani va ta nyima ku tirhela Yehovha hi mhaka ya leswi va ta kalaka va nga ha kongomisiwi hi vamakwerhu lava nga totiwa va Ntlawa Lowu Rhangelaka. Swi nga yendleka va pimisa leswo hi mhaka swin’wani leswi Bibele li swi vulaka. A hi voneni swikombiso swimbirhi. Xa ku sungula i xa Muprista Yoyada. Yena a a tirhela Xikwembu hi ku tshembeka. Yena ni nsati wa yena Yehoxabeti va vhikele xidjahatani  xin’wani lexi vitaniwaka Yehowaxi swaku xi nga dlayiwi. Va xi pfunile swaku xi va hosi yayinene xi tlhela xi tshembeka ka Yehovha. Loko Yoyada a nge se fa, Yehowaxi a a tirhela Yehovha hi ku tshembeka naswona a a yendla swilo swaswinene. Kambe nkama lowu Yoyada a nga fa, Yehowaxi a sungule ku yendla swilo swa ku biha hileswi a nga yingisa switsundzuxu swa varhangeli va Vayuda va ku kala va nga mu yingisi Yehovha, a gama a nyima ku tirhela Yehovha. — 2 Tik. 24:2, 15-19.

⁴ Xikombiso xin’wani i xa Vakreste lava va nga hanya ndzhaku ka vapostolo. Mupostolo Yohani ku ve yena wa wugamu ku fa ka vapostolo, kambe na wa ha hanya a pfune Vakreste va vanyingi leswaku va tshama na va tshembekile ka Yehovha. (3 Yo. 4) Ku fana ni vapostolo van’wani, Yohani a yendle hinkwaswu leswi a nga swi kota swaku a vhikela mabandla ya Wukreste ka vanhu lava a va zama ku peta tidjondzo ta mavunhwa amabandleni. (1 Yo. 2:18; 2 Tes. 2:7) Kambe loko Yohani se a file, vanhu va vanyingi amabandleni va sungule ku landzela tidjondzo ta mavunhwa va tlhela va ti djondzisa amabandleni, leswi nga yendla swaku hi ku famba ka nkama ku yendliwa swilo swa ku biha amabandleni.

5. Hi ku ya hi swikombiso leswi swimbirhi swa Bibele, i mpsini swaku a swi nga ta yendleka?

⁵ Indjhe leswi swi nga yendleka ka swikombiso swimbirhi leswi hi nga bula hi swona, swi ta yendleka ni ka vanhu va Yehovha lani misaveni loko vatotiwa va ta va se va li matilweni? Ku nga va swaku Vakreste va ku tshembeka lani misaveni va ta sungula ku yendla swilo swa ku biha ku fana na Yehowaxi, kumbe va ta sungula ku djondzisa tidjondzo ta mavunhwa ku fana ni leswi nga yendliwa hi Vakreste va vanyingi loko vapostolo se va file? Leswo a swi nga ta yendleka! Phela hi nga tiyiseka swaku loko vatotiwa hinkwavu va ta va se va li matilweni, vamakwerhu va tinyempfu tin’wani va ta tama va tirhela Yehovha hi ku tshembeka, naswona Yehovha a ta va hlayisa. Hi mhaka muni hi nga tiyisekaka hi swona leswo?

VANHU VA YEHOVHA VA TA TAMA VA MU TIRHELA

6. Hi yini minkama yinharhu leyi hi nga ta djondza hi yona?

⁶ Hi mhaka muni hi kholwa swaku vanhu va Yehovha va ta tama va mu tirhela hambiloko va kumana ni swikarhatu ka nkama lowu taka? Ha kholwa hikusa Bibele li vula leswaku hi hanya ka nkama wa ku hambana ni wa Vayisrayele ni ka nkama lowu vapostolo se a va file. Leswaku hi swi twisisa kahle a hi voneni leswi nga yendleka ka: 1) Nkama wa Vayisrayele, 2) ka nkama lowu vapostolo se a va file ni 3) ka nkama wa hina, ku nga “nkama wa ku pfuxetiwa ka swilo hinkwaswu.” — Min. 3:21.

7. Hi mhaka muni Vayisrayele va lave ku tlhela va tirhela Yehovha?

⁷ Ka nkama wa Vayisrayele. Na Moxe a nge se fa a byele Vayisrayele a ku: “Ni swi tiva kahle swaku loko se ni file mi ta sungula ku yendla swa ku biha, mi djika ka ndlela leyi ni nga mi byela swaku mi famba hi yona.” (Det. 31:29) Phela Moxe a tlhele a basopisa Vayisrayele swaku loko a vo tshuka va tshika ku tirhela Yehovha a va ta tekiwa va ya yendliwa swikarawa ka tiko lin’wani. (Det. 28:35, 36) Ku nga va swaku leswi Moxe a nga swi vula swi yendlekile? Ina swi yendlekile, hikusa ku ringana malembe ya manyingi, tihosi ta tinyingi leti a ti fuma Israyele a ti nga mu yingisi Yehovha naswona ti yendle swaku vanhu va Yehovha va gandzela swikwembu swa mavunhwa. Hi mhaka leyo, Yehovha a va tshikile vanhu va yena lava a va nga mu yingisi a tlhela a nga ha pfumeli swaku ni hosi ni yin’we ya Muyisrayele yi fuma aIsrayele. (Eze. 21:25-27) Kambe nkama Vayisrayele van’wani va nga vona swaku leswi Yehovha a nga swi vula swi yendlekile, va lave ku tlhela va tirhela Yehovha hi ku tshembeka. — Esa. 55:10, 11.

8. Hi mhaka muni hi nga fanelanga hi hlamala hileswi Vakreste va nga sungula ku djondzisa tidjondzo ta mavunhwa hi nkama lowu vapostolo se a va file?

⁸ Ka nkama lowu vapostolo se a va file. A swi fanelanga swi hi hlamalisa ku tiva swaku Vakreste  lava a va hanya ka nkama wolowo va tshike Yehovha va ya djondzisa tidjondzo ta mavunhwa. Hi mhaka muni? Hikusa Yesu Kreste se a a profetile swaku leswo a swi ta yendleka. (Mat. 7:21-23; 13:24-30, 36-43) Phela mupostolo Pawulo, Pedru na mupostolo Yohani na vona va hlaye swaku phela leswi Yesu a nga swi profeta se a swi hetiseka hi nkama lowu vona a va hanya hi wona. (2 Tes. 2:3, 7; 2 Pe. 2:1; 1 Yo. 2:18) Funtshi ndzhakunyana ka loko mupostolo wa wugamu Yohani se a file, Vakreste lava a va landzelela tidjondzo ta mavunhwa va pele ka Babilona Wamukulu, ku nga wukhongeli hinkwalu la mavunhwa. Phela leswo swi kombisa swaku leswi Yesu a a swi profetile swi hetisekile.

9. Hi mhaka muni nkama lowu hi hanyaka ka wona wu hambanile ni nkama wa Vayisrayele ni nkama lowu vapostolo se a va file?

⁹ “Nkama wa ku pfuxetiwa ka swilo hinkwaswu.” Nkama lowu hi hanyaka ka wona wa hambana ni nkama wa Vayisrayele ni nkama lowu Vakreste va nga sungula ku djondzisa tidjondzo ta mavunhwa. 2 Timotiya 3:1 yi vula leswaku nkama lowu hi hanyaka ka wona wu vitaniwa “masiku ya wugamu”. Kambe Bibele li tlhela li kombisa swaku hi nkama lowu “masiku ya wugamu” ma nga sungula hi wona, ku tlhele ku sungula nkama wun’wani lowu a wu ta va kona hi nkama wa ku leha, naswona nkama lowu wu ta tama wu va kona anze Yesu hi ku tirhisa Mfumu wa yena a susa xidjoho misaveni a tlhela a yendla leswaku misava yi va paradesi. Nkama wolowo wu vitaniwa “nkama wa ku pfuxetiwa ka swilo hinkwaswu.” (Min. 3:21) Nkama wolowo wu sungule hi 1914. I mpsini swi nga yendliwa kumbe ku pfuxetiwa hi nkama wolowo? Yehovha a pfuxete Mfumu wa yena hileswi a nga veka Yesu Kreste swaku a fuma amatilweni hileswi Yesu a a li ntukulu wa Hosi Davhida. Kambe Yehovha a nga pfuxetanga Mfumu wa yena ntsena, hi ku famba ka nkama a tlhele a pfuxeta a wugandzeli la ntiyiso. (Esa. 2:2-4; Eze. 11:17-20) Kambe ku nga va swaku vanhu a va ta tlhela va tshika ku gandzela Yehovha hi ndlela yayinene?

10. a) Hi ku ya hi Esaya 54:17, i mpsini leswi Bibele li nga swi profeta hi wugandzeli la ntiyiso ka nkama wa hina? b) Hi mhaka muni wuprofeta lelo li hi tsakisa?

¹⁰ Lerha Esaya 54:17. Pimisa hi wuprofeta leli nga ka ndzimana leyi. Lona li li: “A ku na tlharhi leli nga ta ku hlasela leli nga ta ku hlula”! Phela marito lawa ma hetiseka ninamuntlha. Funtshi a hi wuprofeta leli ntsena li hetisekaka, ni leli nga ka Esaya 54:13, 14 na lona la hetiseka, hikusa lona li vula leswi: “Vana va wena hinkwavu va ta djondzisiwa hi Yehovha, ku rhula ka vana va wena ku ta va kukulu. Wena u ta vekiwa u tiya hi ku lulama. . . . A wu nga ta chava nchumu naswona a ku na lexi xi nga ta ku chavisa, hikusa a xi nge tshineli ka wena.” Phela marito lawa ma hi tiyisa hintamu hikusa ma swi kombisa kahle swaku hambi hi Sathana lweyi a nga “xikwembu xa misava leyi,” a nge swi koti ku nyimisa ntirho lowu hi wu yendlaka  wa ku djondzisa vanhu hi Yehovha. (2 Ko. 4:4) A wugandzeli la ntiyiso leli se li nga pfuxetiwa, a li nge he te tshuka li chimisiwa hi wugandzeli la mavunhwa. Lona li ta tama li va kona hi masiku ni masiku! Se ha tiyiseka swaku a ku na tlharhi leli nga ta swi kota ku helisa vanhu va Yehovha.

I MPSINI LESWI NGA TA YENDLEKA?

11. I yini xi hi tiyisekisaka swaku a xitshungu xaxikulu a xi nga ta tshikiwa loko vatotiwa va ta va se va li matilweni?

¹¹ I mpsini leswi nga ta yendleka loko se vatotiwa hinkwavu va ye matilweni? Khumbuka swaku Yesu i Murisi wa hina ni swaku Yesu i nhloko ya bandla. Handle ka leswo, Yesu a vule leswi: “Murhangeli wa n’wina i mun’we ntsena, ku nga Kreste.” (Mat. 23:10) Phela Hosi ya hina Kreste se a le ku fumeni naswona a ta wu hetisisa kahle ntirho wa yena. Se leswi ku nga yena a fumaka, a ku na nchumu lexi faneleke xi hi chavisa lexi nga ta yendleka lani misaveni. I ntiyiso swaku a hi swi tivi hi ku helela leswi Yesu a nga ta va kongomisisa xiswona vanhu va yena loko vatotiwa hinkwavu se va ta va matilweni. Kambe a hi voneni swikombiso swin’wani swa Bibele, leswi swi nga ta hi pfuna ku kala hi nga chavi loko nkama wolowo wu fika.

12. a) Yehovha a va hlayisise ku yini vanhu va yena loko Moxe se a file? b) Yehovha a va hlayisise ku yini vanhu va yena nkama lowu Eliya a nga nyikiwa ntirho wun’wani? (Vona mufoto.)

¹² Na Vayisrayele va nge se nghena ka Tiko la Xitshembiso, Moxe a file. Se i mpsini leswi nga yendleka hi Vayisrayele? Ku nga va leswaku leswi Moxe se a a file va karhatekile va nga xi tivi xa ku xi yendla? Nada. Minkama hinkwayu loko Vayisrayele va yingisa, Yehovha a a va hlayisa. Naswona na Moxe a nge se fa, Yehovha a a mu byelile leswaku a a fanele a djondzisa Yoxuwa swaku Yoxuwa a rhangela vanhu va Yehovha. Moxe a swi yendlile leswo hikusa a mu djondzisile Yoxuwa ku ringana malembe ya manyingi. (Eks. 33:11; Det. 34:9) Handle ka leswo, a ku ni vavanuna van’wani lava a va djondzisiwile swaku va rhangela vanhu va Xikwembu, ku nga tindota ta mintlawa ya 1.000, ya 100, ya 50 hambi hi tindota ta mintlawa ya 10. (Det. 1:15) Phela Yehovha a a va hlayisa vanhu va yena. Xikombiso xin’wani i xa muprofeta Eliya. Ku ringana malembe ya manyingi Eliya a pfune Vayisrayele swaku va tama va gandzela Yehovha hi ndlela yayinene. Kambe ku ve ni nkama lowu Yehovha a nga nyika Eliya ntirho wun’wani wa ku ya tirha ka ndhawu yin’wani aYuda. (2 Tih. 2:1; 2 Tik. 21:12) Ku nga va swaku hi nkama wolowo, Vayisrayele va ku tshembeka lava a va lumba 10 wa tinxaka va titwe va tshikiwile? A swi yendlekanga leswo. Hikusa muprofeta Eliya a a djondzise Elixa ku ringana malembe ya manyingi swaku a rhangela vanhu va Yehovha. Handle ka leswo, a ku ni “vana va vaprofeta” lava swi nga yendlekaka a va li mintlawa, lava na vona a va djondzisiwile swaku va rhangela. (2 Tih. 2:7) Phela a ku ni vavanuna va vanyingi va ku tshembeka lava a va  ta rhangela vanhu va Yehovha. Hi ku yendla hinkwaswu leswo, Yehovha a tame a hetisisa xikongomelo xa yena a tlhela a hlayisa vanhu va yena.

13. I mpsini leswi Yehovha a hi tshembisaka swona ka Vaheberu 13:5b? (Vona mufoto.)

¹³ Leswi se u nga vona swikombiso leswi ka maparagrafu lawa ma nga hundza, u pimisa swaku ku ta yendleka yini loko vatotiwa hinkwavu se va li tilweni? A swi lavi u pimisa hintamu. Bibele li hi byela hi ntiyiso wa ku tsakisa hintamu wa leswaku Yehovha a nge te tshuka a tshika vanhu va yena lani misaveni. (Lerha Vaheberu 13:5b.) Namuntlha ku ni ntlawa wa vavanuna lava va nga totiwa lava va rhangelaka vanhu va Yehovha, ku nga Ntlawa Lowu Rhangelaka. Ku fana na Moxe na Eliya, vona va djondzisa vamakwerhu va xinuna lava nga ni ntshembo wa ku hanya kola misaveni swaku va va pfuna ku hlayisa vanhu va Xikwembu. Hi xikombiso, Ntlawa Lowu Rhangelaka wu lunghiselela swikola leswaku wu djondzisa madoda, vadjikelezi, vamakwerhu va ma Comissão ya Betele, vamakwerhu lava rhangelaka madepartamentu ya Betele ni vamakwerhu van’wani va xinuna. Naswona vamakwerhu lava va Ntlawa Lowu Rhangelaka va tlhela va trenara vapfunisi va vona. Vapfunisi lava va ni mintirho ya yinyingi leyi va yi yendlaka, kambe ntirho lowu va wu yendlaka swoswi wu va pfuna leswaku va lunghekela ku hlayisa vanhu va Yehovha ka nkama lowu taka.

14. Ku fikela swoswi, i mpsini leswi se hi nga djondza hi swona ka nhlokomhaka leyi?

¹⁴ Ka nhlokomhaka leyi, se hi djondze swaku hambiloko vatotiwa hinkwavu va ta va se va li tilweni, na nhlomulu wawukulu wu li kusuhi ni ku hela, hina vanhu va Yehovha hi ta tama hi mu tirhela hi ku tshembeka. Leswi Yesu a nga ta tama a hi kongomisa, a hi nga ta tshika ku gandzela Yehovha. I ntiyiso swaku hi nkama wolowo hi ta dumeliwa hi ntlawa wa matiko, lowu vitaniwaka Goge na Magoge. (Eze. 38:18-20) Kambe ku dumeliwa koloko ku ta teka nkamanyana wawutsongo funtshi a ku nga ta swi kota ku hi tshikisa hina vanhu va Yehovha ku tama hi mu tirhela hikusa Yehovha a ta hi ponisa. Phela ha tiyiseka hi leswo hikusa mupostolo Yohani a vone “xitshungu xaxikulu” xa tinyempfu tin’wani ta Kreste, lexi xi nga pona ka “nhlomulu wawukulu.” (Nhl. 7:9, 14) Se swi yo baa swaku Yehovha a ta hi ponisa!

15-16. Hi ku ya hi Nhlawutelo 17:14, i mpsini leswi Vakreste va ku totiwa va nga ta swi yendla hi nkama wa Armajedoni, naswona hi mhaka muni leswo swi hi tiyisa?

¹⁵ Hambileswo, van’wani va nga ha tivutisa leswi:  ‘I mpsini leswi nga ta yendleka hi vatotiwa? I mpsini leswi va nga ta swi yendla loko va li matilweni?’ Bibele li hlamula swivutiso leswo hi ku kongoma. Bibele li vula swaku a mimfumu ya misava yi “ta lwa ni Xinyempfani.” Kambe a hi kanakani swaku mimfumu yoleyo yi ta hluliwa. Bibele li li a ‘Xinyempfani xi ta hlula.’ Kambe i mani lweyi a nga ta pfuna Yesu ka nyimpi yoleyo? Bibele li vula leswi: Hi “lava nga vitaniwa, lava nga langiwa naswona va nga tshembeka.” (Lerha Nhlawutelo 17:14.) I vamani volavo? I Vakreste va ku totiwa. Se loko mutotiwa wa wugamu lweyi a nga ta va a salile lani misaveni a ya matilweni na nhlomulu wawukulu wu li kusuhi ni ku hela, nchumu wa ku sungula lowu vatotiwa va nga ta wu yendla ku ta va ku lwa. Phela ntirho lowo a hi matlangwani, wu ta va wukulu! Van’wani va Vakreste lava nga totiwa, na va nge se va Timboni ta Yehovha a va tolovela ku lwa ni vanhu van’wani funtshi van’wani a va li masonchwa. Kambe nkama va nga va Vakreste va djondze ku hanyisana hi ku rhula ni vanhu van’wani. (Gal. 5:22; 2 Tes. 3:16) Va tshike ku seketela tinyimpi. Kambe loko va ta ya matilweni va ta va na Yesu va tlhela va va ni tintsumi naswona va ta lwa nyimpi ya wugamu, leyi va nga ta yi lwa ni valala va Xikwembu.

¹⁶ Pimisa hi leswi! Namuntlha, van’wani ka vatotiwa lava va nga lani misaveni se va gugile naswona a va ha na matimba. Kambe loko se va ta pfuxiwa va ya hanya matilweni, va ta va ni matimba, a va nga ha ta fa naswona va ta va ni Hosi ya vona Yesu Kreste leyi na yona yi nga ni matimba swaku va lwa nyimpi. Loko nyimpi ya Armajedoni yi ta va se yi gamile, vatotiwa va ta tirhisana na Yesu leswaku va pfuna vanhu swaku va hetiseka hi kutsongokutsongo. A hi kanakani swaku loko vatotiwa va ta va matilweni, va ta swi kota ku pfuna vamakwerhu va vona va xisati ni va xinuna lava va va rhandzaka hintamu, lava va nga ta va lani misaveni. Phela va ta va pfuna swinene ku tlula leswi a va va pfunisa xiswona nkama lowu a va li lani misaveni na va nga hetisekanga.

17. Hi swi tivisa ku yini swaku vanhu va Yehovha va ta titwa va vhikelelekile hi nkama wa nyimpi ya Armajedoni?

¹⁷ Ku nga va swaku u lumba tinyempfu tin’wani? Loko ku li leswo u nga yendla yini loko nyimpi yayikulu ya ku a yi se tshama yi voniwa ku nga Armajedoni yi sungula? Swa vevuka. Yendla leswi: Tshemba Yehovha naswona landzela nkongomiso wa yena. Leswo swi vula yini? Ka Esaya 26:20 Bibele li li: “Nghenani ka makwartu ya n’wina, mi pfala swipfalu swa n’wina. Tumbelani swa nkamanyana anze ku kwata ka Xikwembu ku hundza.” Hi mavulelo man’wani, hinkwavu lava tirhelaka Yehovha hi ku tshembeka lava nga matilweni ni lava nga misaveni va ta titwa va vhikelelekile ka nkama wa Armajedoni. Hilani mupostolo Pawulo a nga vula hi kona, hinkwerhu ha tiyiseka leswaku “mimfumu kumbe swilo leswi nga kona swoswi kumbe swilo leswi taka . . . a swi nge swi koti ku hi hambanisa ni lirhandzu leli Xikwembu xi nga na lona hi hina.” (Rom. 8:38, 39) Minkama hinkwayu khumbuka leswi: Yehovha wa ku rhandza naswona a nga ta tshuka a ku tshika!