1. Kasi mphawuli apo ŵakuphakazgika wose ŵazamuŵa kuti ŵali kuchanya?

 VYAKA vyakumasinda uku, ŵanthu ŵa Yehova ŵakajifumbanga kuti, ‘Kasi mphawuli apo Mkhristu wakuphakazgika waumaliro wazamulutira kuchanya?’ Tikaghanaghananga kuti ŵakuphakazgika ŵanyake panji ŵazamukhala dankha kwakanyengo mu Paradiso pamanyuma pa nkhondo ya Aramagedoni. Kweni mu Gongwe la Mulinda la Julayi 15, 2013, tikasambira kuti ŵakuphakazgika awo ŵachali pa charu chapasi ŵazamuluta kuchanya pambere nkhondo ya Aramagedoni yindambe.—Mat. 24:31.

2. Kasi ŵanyake ŵangafumba fumbo wuli, ndipo tidumbiskanenge vichi mu nkhani iyi?

² Ndipouli, ŵanyake ŵangafumba kuti: Kasi ntchivichi chizamuchitikira “mberere zinyake” za Khristu izo zizamuŵa kuti zikuteŵetera Yehova mwakugomezgeka panyengo ya “suzgo yikuru”? (Yoh. 10:16; Mat. 24:21) Ŵanyake mazuŵa ghano ŵangafipa mtima kuti pazamuŵavya wakuti wangaŵawovwira na wakuŵapa ulongozgi para Ŵakhristu ŵakuphakazgika wose ŵaluta kuchanya. Tiyeni tidumbiskane nkhani ziŵiri za mu Baibolo izo zingaŵapangiska kuti ŵaghanaghanenge nthena. Pamanyuma tidumbiskanenge vifukwa ivyo tikwenera yayi kufipira mtima.

KASI NTCHIVICHI ICHO CHIZAMUŴACHITIKIRA YAYI ŴAMBERERE ZINYAKE?

3-4. Kasi ŵanyake ŵangafipa mtima na vichi, ndipo chifukwa wuli?

³ Ŵanyake ŵangafipa mtima kuti ŵamberere zinyake ŵazamuleka kuteŵetera Yehova para ŵabali ŵakuphakazgika ŵa mu Wupu Wakulongozga wose ŵaluta kuchanya. Panji ŵangamba kughanaghana nthena chifukwa cha nkhani zinyake za mu Baibolo. Tiyeni tiwonepo ziŵiri. Yakwamba njakukhwaskana na Wasembe Mukuru Yehoyada. Wakaŵa muteŵeti wakugomezgeka wa Chiuta. Iyo na muwoli wake, Yehoshabeti, ŵakavikilira Yehowashi na kumovwira  kuŵa themba liwemi na lakugomezgeka. Nakuti apo Yehoyada wakaŵa wachali wamoyo, Yehowashi wakachitanga makora. Kweni Yehoyada wakati wafwa, Yehowashi wakamba kuchita vinthu viheni. Wakapulikira ŵakaronga ŵaheni na kuleka kuteŵetera Yehova.—2 Mid. 24:​2, 15-19.

⁴ Nkhani yinyake njakukhwaskana na Ŵakhristu ŵakwambilira awo ŵakakhalanga mu nyengo yakuti ŵapositole wose ŵafwa. Mpositole waumaliro kufwa wakaŵa Yohane. Apo wakaŵa wachali wamoyo, wakawovwira Ŵakhristu ŵanandi kulutilira kugomezgeka kwa Yehova. (3 Yoh. 4) Nga umo ŵapositole ŵanyake ŵa Yesu ŵakachitira, Yohane nayo wakalimbikira chomene kuvikilira mipingo ku ŵanthu ŵakugaluka awo ŵakasambizganga vinthu vyautesi. (1 Yoh. 2:18; 2 Tes. 2:7) Ndipouli, Yohane wati wafwa, ŵanandi mu mpingo ŵakagaluka. Mu vyaka vichoko waka, mpingo Wachikhristu ukanangikirathu na visambizgo vyautesi.

5. Kasi tileke kudumura vichi kufuma pa nkhani ziŵiri izi?

⁵ Kasi nkhani ziŵiri za mu Malemba izi zikulongora kuti ivi ndivyo vizamuchitikira ŵamberere zinyake para ŵakuphakazgika wose ŵaluta kuchanya? Kasi panyengo iyo Ŵakhristu ŵakugomezgeka ŵazamwamba kuchita viheni nga umo wakachitira Yehowashi, panji ŵazamugaluka nga umo ŵakachitira Ŵakhristu ŵanandi ŵapositole ŵakati ŵafwa? Zgoro ndakuti yayi! Tili na chigomezgo chose kuti para ŵakuphakazgika wose ŵaluta kuchanya, ŵamberere zinyake ŵazamupwelelereka makora mwauzimu ndipo ŵazamulutilira kuteŵetera Yehova. Chifukwa wuli tikugomezga nthena?

KUSOPA KWAUNENESKO KUZAMUTIMBANIZGIKA YAYI

6. Kasi ni nyengo wuli zitatu izo tidumbiskanenge mwakudumura?

⁶ Chifukwa wuli tili na chigomezgo chose kuti kusopa kwaunenesko kuzamutimbanizgika yayi, nanga ni mu nyengo zakusuzga izo zikwiza munthazi? Tili na chigomezgo ichi chifukwa cha ivyo tili kusambira mu Baibolo vyakukhwaskana na nyengo iyo tilimo. Nyengo iyi yikupambana chomene na nyengo ya Ŵaisrayeli kweniso nyengo yakuti ŵapositole wose ŵati ŵafwa. Ipo sono tiyeni tiwone mwakupwelelera nyengo zitatu izi: (1) Nyengo ya Ŵaisrayeli, (2) nyengo yakuti ŵapositole wose ŵafwa, kweniso (3) nyengo yithu, iyo ni ‘nyengo yakuwezgerapo vinthu vyose.’—Mil. 3:21.

7. Mu nyengo ya Ŵaisrayeli, chifukwa wuli ŵanthu ŵakugomezgeka ŵakagongowa yayi apo Ŵaisrayeli ŵanyawo na mathemba ŵakachitanga vinthu viheni?

⁷ Nyengo ya Ŵaisrayeli. Kwati kwakhala pachoko waka kuti wafwe, Mozesi wakaphalira Ŵaisrayeli kuti: “Nkhumanya makora kuti para nafwa muchitenge viheni na kupatukako ku nthowa iyo namuphalirani.” (Doto. 31:29) Mozesi wakachenjezgaso Ŵaisrayeli kuti para ŵagaluka, ŵazamutolekera ku wuzga. (Doto. 28:​35, 36) Kasi mazgu agha ghakafiskika? Enya. Kwa vyaka vinandi, mathemba ghanandi ghakachitanga viheni na kupangiska ŵanthu kuleka kuteŵetera Chiuta. Pa chifukwa ichi Yehova wakalanga ŵanthu ŵaheni ŵa Israyeli ndipo wakazomerezgaso yayi mathemba gha Israyeli kuti ghalutilire kuwusa. (Ezek. 21:​25-27) Kweni Ŵaisrayeli ŵakugomezgeka ŵakachita chikanga kulutilira kuteŵetera Chiuta mwakugomezgeka ŵati ŵawona kuti mazgu gha Chiuta ghafiskika.—Yes. 55:​10, 11.

8. Kasi tikwenera kuzizwa kuti ŵapositole ŵati ŵafwa mpingo ukatimbanizgika? Longosorani.

⁸ Nyengo yakuti ŵapositole wose ŵati ŵafwa. Kasi tikwenera kuzizwa kuti mpingo Wachikhristu ukatimbanizgika ŵapositole wose ŵati ŵafwa? Yayi. Yesu wakayowoyerathu kuti uchigaluka uzamuŵa palipose. (Mat. 7:​21-23; 13:​24-30, 36-43) Mpositole Paulosi, Petrosi, na Yohane, wose ŵakasimikizga kuti mu nyengo yawo uchimi wa Yesu ukaŵa kuti wamba kale  kufiskika. (2 Tes. 2:​3, 7; 2 Pet. 2:1; 1 Yoh. 2:18) Ŵapositole wose ŵati ŵafwa, mpingo Wachikhristu ukatimbanizgika chomene. Ŵakhristu ŵakugaluka ŵakawuka mu mpingo ndipo ŵakaŵa chigaŵa cha Babuloni Mukuru, nyinawo wa chisopa chautesi. Apa napo uchimi wa Yesu ukafiskika.

9. Kasi nyengo yithu yino yikupambana wuli na nyengo ya Ŵaisrayeli, kweniso nyengo iyo Ŵakhristu ŵakugaluka ŵakanjira mu mpingo ŵapositole ŵati ŵafwa?

⁹ “Nyengo yakuwezgerapo vinthu vyose.” Nyengo yithu yikupambana chomene na nyengo ya Ŵaisrayeli kweniso nyengo iyo Ŵakhristu ŵakugaluka ŵakanjira mu mpingo ŵapositole wose ŵati ŵafwa. Kasi tikukhala mu nyengo wuli? Kanandi tikuti tikukhala mu nyengo iyo yikuchemeka kuti “mazuŵa ghaumaliro” gha charu chiheni ichi. (2 Tim. 3:1) Kweni Baibolo likulongora kuti nyengo yapadera nayo yikamba apo mazuŵa ghaumaliro ghakambira. Ndipo nyengo iyi yilutilirenge m’paka apo Ufumu wa Mesiya uzamovwira ŵanthu kuŵa ŵakufikapo na kuzgora charu chapasi kuŵa Paradiso. Nyengo iyi yikuchemeka ‘nyengo yakuwezgerapo vinthu vyose.’ (Mil. 3:21) Nyengo iyi yikamba mu 1914. Kasi ntchivichi chikawezgekerapo panyengo iyo? Yesu wakimikika kuŵa Themba kuchanya. Ntheura apa Yehova wakaŵaso na muwusi uyo wakumwimira, uyo wakanjira m’malo mwa Davide, themba lakugomezgeka. Ndipouli, ni ufumu pera yayi uwo Yehova wakawezgerapo. Nyengo yichoko waka yikati yajumphapo, Yehova wakamba kuwezgerapo kusopa kutuŵa. (Yes. 2:​2-4; Ezek. 11:​17-20) Kasi kusopa kutuŵa kuzamufipiskikaso?

10. (a) Kasi Baibolo likayowoyerathu vichi vyakukhwaskana na kusopa kutuŵa mu nyengo yithu yino? (Yesaya 54:17) (b) Chifukwa wuli mauchimi agha ngakukhozga?

¹⁰ Ŵazgani Yesaya 54:17. Ghanaghanirani za uchimi uwu wakuti: “Palije chilwero icho chapangikira iwe icho chitondenge”! Mazgu agha ghakufiskika mazuŵa ghano. Kweniso mazgu ghakupembuzga ghakulondezgapo agha nagho ghakufiskika mazuŵa ghano, ghakuti: “Ŵana ŵako wose ŵazamusambizgika na Yehova, ndipo mtende wa ŵana ŵako uzamuŵa ukuru. Uzamukhozgeka chomene mu urunji. . . . Pakuti uzamuwopa kalikose yayi, pazamuŵavya chakukutenthemeska, chizamuŵapo yayi pafupi nawe.” (Yes. 54:​13, 14) Nanga ni “chiuta wa nyengo iyi,” uyo ni Satana, wangatondeska yayi mulimo wakusambizga ŵanji uwo ŵanthu ŵa Yehova ŵakuchita mazuŵa ghano. (2 Kor. 4:4) Kusopa kutuŵa kwawezgekerapo, ndipo kuzamufipiskikaso yayi. Kuŵengepo muyirayira. Palije chilwero icho chapangikira ise icho chitondenge.

 KASI NTCHIVICHI CHIZAMUCHITIKA?

11. Kasi ntchivichi chikutikhorweska kuti mzinda ukuru uzamujowoleka yayi para ŵakuphakazgika wose ŵaluta kuchanya?

¹¹ Kasi ntchivichi chizamuchitika para ŵakuphakazgika wose ŵaluta kuchanya? Kumbukani kuti Yesu ndiyo ni Muliska withu. Ndiyo ni mutu wa mpingo Wachikhristu. Yesu wakayowoya mwakupulikikwa makora kuti: “Mulongozgi winu njumoza, Khristu.” (Mat. 23:10) Fumu yithu iyo yikuwusa kuchanya, nyengo zose yipwelelerenge ŵalondezgi ŵake. Pakuti Khristu ndiyo wakulongozga, ŵalondezgi ŵake ŵakwenera kopa chilichose yayi. Kweni unenesko ngwakuti tikumanya vyose yayi pa umo Khristu wazamulongozgera ŵanthu ŵake pa nyengo iyo. Ntheura tiyeni tiwone viyelezgero vinyake mu Baibolo ivyo vingatovwira kuŵa na chigomezgo chose kuti wazamutilongozga makora.

12. Kasi Yehova wakapwelelera wuli ŵanthu ŵake (a) Mozesi wati wafwa? (b) Eliya wati wapika uteŵeti unyake? (Wonaniso chithuzi.)

¹² Pambere Ŵaisrayeli ŵandanjire mu Charu cha Layizgano, Mozesi wakafwa. Kasi ntchivichi chikachitikira ŵanthu ŵa Chiuta? Kasi Yehova wakaleka kovwira ŵanthu ŵake pamanyuma pakuti munthu wakugomezgeka uyu wafwa? Yayi. Yehova wakaŵawovwiranga nyengo yiliyose, chikuru iwo ŵalutilira kugomezgeka. Pambere Mozesi wandafwe, Yehova wakamuphalira kuti wimike Joshuwa kuti walongozgenge ŵanthu ŵake. Mozesi wakaŵa kuti wamusambizga Joshuwa kwa vyaka vinandi. (Eks. 33:11; Doto. 34:9) Kweniso pakaŵa ŵanalume ŵanandi ŵakwenelera awo ŵangalongozga, nga ŵalongozgi pa gulu lililose la ŵanthu 1,000, la ŵanthu 100, la ŵanthu 50, kweniso nanga nda ŵanthu 10. (Doto. 1:15) Ŵanthu ŵa Chiuta ŵakapwelerekanga makora. Tikusangaso chiyelezgero chinyake mu nyengo ya Eliya. Kwa vyaka vinandi wakalimbikira chomene kovwira Ŵaisrayeli kusopa Yehova. Kweni pamanyuma Yehova wakati wakateŵetere ku Yuda. (2 Mathe. 2:1; 2 Mid. 21:12) Kasi ŵanthu ŵakugomezgeka ŵa mu ufumu wa mafuko 10 gha Israyeli ŵakajowoleka? Yayi. Eliya wakaŵa kuti wamusambizga Elisha kwa vyaka vinandi. Pakaŵaso “ŵana ŵa zintchimi,” awo nawo ŵakasambizgika makora. (2 Mathe. 2:7) Ntheura, ŵanalume ŵanandi ŵakugomezgeka ŵakaŵapo ŵakuti ŵangalongozga ŵanthu ŵa Chiuta. Yehova wakalutilira kufiska khumbo lake, ndipo wakaŵapweleleranga ŵasopi ŵake ŵakugomezgeka.

13. Kasi Yehova wakutilayizga vichi pa lemba la Ŵahebere 13:5b? (Wonaniso chithuzi.)

¹³ Apo tili na viyelezgero ivi mu maghanoghano ghithu, kasi mukughanaghana kuti ntchivichi chizamuchitika para ŵakuphakazgika wose  ŵaluta kuchanya? Tikwenera kufipa mtima yayi. Baibolo likuyowoya fundo yakupulikikwa makora kweniso yakukhozga yakuti: Yehova waŵalekengepo yayi ŵanthu ŵake pa charu chapasi. (Ŵazgani Ŵahebere 13:5b.) Nga ni Mozesi na Eliya, gulu lichoko waka la Ŵakhristu ŵakuphakazgika ilo likulongozga mazuŵa ghano likumanya kuzirwa kwa kusambizga ŵanji. Kwa vyaka vinandi ŵabali ŵa mu Wupu Wakulongozga ŵakusambizga ŵanalume kufuma pakati pa mberere zinyake kuti ŵalongozgenge. Mwachiyelezgero, ŵali kunozga masukulu ghanandi kuti ŵasambizge ŵalara, ŵalaŵiliri ŵakwendakwenda, ŵabali ŵa mu Komiti ya Munthavi, ŵalaŵiliri ŵa pa Beteli, na ŵanyake. Wupu Wakulongozga ukusambizga ŵabali awo ŵakovwira mu makomiti ghakupambanapambana gha Wupu Wakulongozga. Ŵabali aŵa pasono ŵakuchita milimo yinandi mwakugomezgeka mu gulu la Yehova. Mbakunozgeka makora kulutilira kuchita mulimo wakupwelelera mberere za Khristu.

14. Kasi fundo yikuru njakuti wuli mu nkhani iyi?

¹⁴ Fundo yikuru ya nkhani yithu ni iyi: Para ŵakuphakazgika ŵaumaliro ŵaluta kuchanya kuumaliro kwa suzgo yikuru, kusopa kutuŵa kuzamulutilira pano pa charu chapasi. Tikuwonga chomene Yesu Khristu chifukwa wazamovwira ŵanthu ŵa Chiuta kulutilira kusopa Yehova mwakugomezgeka. Tikumanya kuti panyengo iyo tizamuwukilika na Gogi wa Magogi, uko nkhukolerana kwa mitundu. (Ezek. 38:​18-20) Nangauli ŵazamuwukilika, kweni ŵanthu ŵa Chiuta ŵazamuleka yayi kusopa Yehova. Yehova wazamuŵathaska nadi! Mu mboniwoni, mpositole Yohane wakawona “mzinda ukuru” wa mberere zinyake za Khristu. Yohane wakaphalirika kuti “mzinda ukuru” uwu ndiwo wafuma mu “suzgo yikuru.” (Chivu. 7:​9, 14) Ntheura tikumanya kuti Yehova wazamuŵaponoska!

15-16. Kuyana na Chivumbuzi 17:​14, kasi ŵakuphakazgika ŵa Khristu ŵazamuchitanga vichi panyengo ya Aramagedoni, ndipo chifukwa wuli ntchakukhozga?

¹⁵ Kweni ‘kasi ŵakuphakazgika ŵamuchita vichi para ŵaluta kuchanya?’ Baibolo likuzgora mwakudunjika fumbo ili. Likuyowoya kuti maboma gha charu ichi ‘ghazamurwa nkhondo na Mwana wa mberere.’ Kweni ghazamuthereska yayi. Tikuŵazga kuti: “Mwana wa mberere wazamuŵathereska.” Kasi mbanjani ŵazamumovwira? Vesi ili likuzgora kuti wose awo  “mbakuchemeka,” “ŵakusoleka,” na “ŵakugomezgeka.” (Ŵazgani Chivumbuzi 17:14.) Kasi ŵanthu aŵa ni mba? Mbakuphakazgika awo ŵali kuwuskikira kuchanya. Ntheura para ŵakuphakazgika ŵaumaliro ŵaluta kuchanya para suzgo yikuru yili kuumaliro, mulimo wawo wakwamba nkhurwa nkhondo. Uwu ni mulimo ukuru chomene! Ŵakhristu ŵakuphakazgika ŵanyake ŵakaŵa ŵambembe pambere ŵandaŵe Ŵakaboni ŵa Yehova. Ndipo ŵanyake ŵakaŵa ŵasilikari. Kweni pamanyuma ŵakazgoka Ŵakhristu ŵaunenesko ndipo ŵakasambira umo ŵangakhalira mwamtende na ŵanji. (Gal. 5:22; 2 Tes. 3:16) Ŵakaleka kuchitako nkhondo. Ndipouli, para ŵawuskikira kuchanya, ŵamurwa nkhondo pamoza na Khristu na ŵangelo ŵake pa kuparanya ŵalwani ŵa Chiuta.

¹⁶ Ghanaghanirani fundo iyi. Pa charu chapasi, Ŵakhristu ŵanyake ŵakuphakazgika mbachekuru kweniso ŵalije nkhongono. Kweni para ŵawuskikira waka kuchanya ŵazamuŵa ŵankhongono kweniso ŵazamuŵa na umoyo wambura kufwa. Ndipo ŵazamurwa nkhondo pamoza na Yesu Khristu Themba lawo Lankhongono. Para nkhondo ya Aramagedoni yajumpha, ŵazamovwirana na Yesu pakovwira ŵanthu kuti ŵaŵe ŵakufikapo. Tikukayika yayi kuti para ŵazakaluta kuchanya, ŵazamovwira chomene ŵabali na ŵadumbu ŵawo ŵakutemweka awo ŵali pa charu chapasi kuluska umo ŵakachitiranga apo ŵakaŵa ŵambura kufikapo.

17. Kasi tikumanya wuli kuti ŵateŵeti ŵa Chiuta wose ŵazamuŵa ŵakuvikilirika panyengo ya nkhondo ya Aramagedoni?

¹⁷ Kasi ndimwe yumoza wa ŵamberere zinyake? Para ni nthena, kasi mukwenera kuzakachita vichi para nkhondo ya Aramagedoni yazakamba? Mukwenera kuzakagomezga chomene Yehova na kupulikira ulongozgi wake. Kasi ivi vingazakasazgapo vichi? Baibolo likuti: “Njirani mu vipinda vinu vyamukati, ndipo jalani vijaro pamanyuma pinu. Bisamani kwa kanyengo kachoko, m’paka ukali ujumphe.” (Yes. 26:20) Ŵateŵeti wose ŵakugomezgeka ŵa Chiuta, awo ŵali pa charu chapasi kweniso awo ŵazamuŵa kuchanya, ŵazamuŵa ŵakuvikilirika panyengo iyo. Nga ni mpositole Paulosi, nase tili ŵakukhorwa kuti nanga ni “maboma, vinthu ivyo viliko sono, vinthu ivyo vikwiza . . . vitipaturenge yayi ku chitemwa cha Chiuta.” (Rom. 8:​38, 39) Nyengo zose kumbukani kuti: Yehova wakumutemwani ndipo wazamumulekanipo yayi!