1. Ko te taimi fea ka ‵nofo atu ei a tino fakaekegina katoa i te lagi?

 I TAUSAGA ko ‵teka, ne ‵nofo sāle a tino o Ieova o mafau‵fau me ‘Ko te taimi fea ka olo aka ei ki te lagi a toe tino fakaoti i Kelisiano fakaekegina?’ Muamua la, ne mafau‵fau sāle tatou me kāti ka isi ne tino fakaekegina ka ‵nofo i te lalolagi Palataiso mō se vaitaimi mai tua o te taua o Amaketo. Kae ko iloa aka ne tatou i te lōmiga o Te Faleleoleo Maluga i a Iulai 15, 2013, me i te kau fakaekegina kolā koi ‵nofo i te lalolagi ka olo aka ki te lagi mai mua o kamata te taua o Amaketo.—Mata. 24:31.

2. Se a te fesili e mafai o sae aka, kae ne a mea ka sau‵tala tatou ki ei i te mataupu tenei?

² Kae kāti ka fesili aka a nisi tino penei: Ne a mea ka ‵tupu ki “nisi mamoe” a Keliso kolā e tavini atu mo te fakamaoni ki a Ieova i te lalolagi i te taimi o te “fakalavelave lasi”? (Ioa. 10:16; Mata. 24:21) E mafai o manava‵se a nisi tino i aso nei me ka se iloa ne latou olotou mea ka fai io me ka tuku tiaki latou māfai ko olo aka olotou taina mo tuagane fakaekegina katoa ki te lagi. Ke sau‵tala nei tatou ki tala e lua mai te Tusi Tapu kolā e fai ei ke mafau‵fau latou penei. Ka oti ko sau‵tala ei ki pogai e se ‵tau ei mo tatou o manava‵se.

NE A MEA KOLĀ KA SE ‵TUPU?

3-4. Ne a mea e mafai o manava‵se ki ei a nisi tino, kae kaia?

³ Kāti ka manava‵se a nisi tino me e mafai loa o tiaki ne nisi mamoe a te munatonu māfai ko seai ne taina fakaekegina mai te Potukau Pule e ‵toe mai ke takitaki latou. E mafai o maua ne latou te mafaufauga tenā ona ko nisi tala ne fai‵tau ki ei i te Tusi Tapu. Ke mafau‵fau ki fakaakoakoga e lua. Te tala muamua ko te tala o te Faitaulaga Sili ko Ieoiata. A ia se tavini  fakamaoni a te Atua. Ne puipui ne lāua mo tena avaga, ko Ieosepa, a te tamaliki tagata foliki ko Ioasa kae akoako a ia ke fai mo tupu ‵lei kae fakamaoni. Ne ‵lei eiloa a Ioasa i te taimi ne ola i ei a Ieoiata. Kae i te mateatuga a Ieoiata, ne kamata o fai ne Ioasa a mea ma‵sei. Ne fakalogo a ia ki pelenise amio ma‵sei kae fulitua atu ki a Ieova.—2 Nofo. 24:​2, 15-19.

⁴ Te lua o fakaakoakoga ko te tala o te kau Kelisiano i te lua o senitenali. A Ioane ko te ‵toe apositolo fakaoti eiloa ke mate atu. I te taimi koi ola ei, ne fesoasoani atu a ia ki Kelisiano e tokouke ke tumau i te fakamaoni ki a Ieova. (3 Ioa. 4) E pelā mo nisi apositolo fakamaoni a Iesu, ne ‵teke malosi atu a Ioane ki akoakoga aposetasi kolā ne salalau valevale. (1 Ioa. 2:18; onoono ki manatu mō sukesukega i te 2 Tesa. 2:7.) Kae i te mateatuga a Ioane, ne salalau valevale a akoakoga aposetasi e pelā me se afi ‵ka. I se fia tausaga mai tua ifo, ne ‵fonu eiloa te fakapotopotoga Kelisiano i akoakoga aposetasi.

5. Ne a mea e se ‵tau o fakaiku aka ne tatou mai tala e lua konei?

⁵ E mata, e fakaasi mai i tala konā e lua mai te Tusi Tapu me kafai ko olo aka te kau fakaekegina ki te lagi, kae ka fai ne nisi mamoe a Keliso a mea ma‵sei e pelā mo Ioasa, io me liu aposetate e pelā mo mea ne fai ne tino e tokouke mai tua o te ‵mateatuga a te kau apositolo? A te tali ki ei ko te ikai! E mautinoa i a tatou me kafai ko tiaki ne te kau fakaekegina a te lalolagi, ka tumau eiloa a nisi mamoe i te tapuaki atu ki a Ieova i te auala tonu kae ka tausi faka‵lei ne ia latou i te feitu faka-te-agaga. Kaia e tali‵tonu ei tatou ki te mea tenā?

KA TUMAU EILOA A TE TAPUAKIGA ‵MA

6. Ne a taimi e tolu ka sau‵tala tatou ki ei?

⁶ Kaia e mafai ei o tali‵tonu tatou me ka tumau eiloa te tapuakiga ‵ma, faitalia a fakalavelave faiga‵ta i aso mai mua? Ona ko mea ne tauloto ne tatou i te Tusi Tapu e uiga ki te taimi ko ola tatou i ei. E ‵kese ‵ki te taimi tenei mo taimi o tino Isalaelu i aso mua pelā foki mo taimi o Kelisiano i te lua senitenali. Ke iloilo faka‵lei ne tatou a taimi e tolu konei: (1) Taimi o tino Isalaelu mua, (2) taimi mai tua o te ‵mateatuga a te kau apositolo, mo te (3)  ‵tou taimi, ko “te taimi e toe faka‵fou ei a mea katoa.”—Galu. 3:21.

7. Kaia ne seki loto vāi‵vai ei a tino Isalaelu fakamaoni i aso mua i te taimi ne fai ei ne tino o te fenua mo tupu a mea ma‵sei?

⁷ Taimi o tino Isalaelu mua. Mai mua malie o mate a ia, ne fai atu a Mose ki tino Isalaelu: “E iloa ‵lei ne au me mai tua o toku mate, ka fai eiloa ne koutou a mea ma‵sei kae ‵fuli kea‵tea mai te auala ne fakatonu atu ne au ki a koutou.” (Teu. 31:29) Ne fakailoa atu foki a Mose me kafai e ‵teke a tino Isalaelu, ka ave fakapagota a latou. (Teu. 28:​35, 36) E mata, ne taunu a pati konā? Ao. I senitenali ki tua ifo, ne fai ne tupu e tokouke a mea ma‵sei kae takitaki kea‵tea ne latou a tino o te Atua. Ne fai ne te mea tenei ke ‵tuli kea‵tea ne Ieova a tino Isalaelu amio ma‵sei kae fakaseai te gafa o tupu i te lalolagi. (Eseki. 21:​25-27) Kae ne loto ma‵losi a tino Isalaelu fakamaoni i te laveaga ne latou me ko taunu a pati a te Atua.—Isa. 55:​10, 11.

8. E mata, e ‵tau mo tatou o ‵poi i te ‵saeakaga o akoakoga ‵se i te fakapotopotoga Kelisiano i te lua senitenali? Fakamatala mai.

⁸ Taimi mai tua o te ‵mateatuga a te kau apositolo. E mata, e ‵tau mo tatou o ‵poi i te ‵saeakaga o akoakoga ‵se i te fakapotopotoga Kelisiano i te lua senitenali? Ikai. Ko leva ne ‵valo mai ne Iesu me ka ‵sae aka a akoakoga aposetasi e uke. (Mata. 7:​21-23; 13:​24-30, 36-43) Ne fakamaoni mai ne apositolo ko Paulo, Petelu, mo Ioane me ko oti ne kamata o  fakataunu te valoaga a Iesu tenā i te senitenali muamua T.A. (2 Tesa. 2:​3, 7; 2 Pe. 2:1; 1 Ioa. 2:18) I te lua senitenali T.A., ne ‵fonu te fakapotopotoga Kelisiano i akoakoga ‵se. Mai tua malie loa o te mateatuga o te apositolo fakaoti, ne fai a Kelisiano aposetate mo vaega tāua o Papelonia te Sili, telā ko te emupaea o lotu ‵se i te lalolagi kātoa. Tenā ne toe fakataunu foki i ei a valoaga fakaosofia.

9. E ‵kese pefea te vaitaimi ko ola tatou i ei mo taimi o te kau Isalaelu mua pelā foki mo taimi o te fakapotopotoga Kelisiano i te lua senitenali?

⁹ “Te taimi e toe faka‵fou ei a mea katoa.” E ‵kese a ‵tou taimi mo taimi o tino Isalaelu i aso mua mo te taimi ne salalau valevale ei a akoakoga aposetasi i te lua senitenali T.A. Se a te vaitaimi ko ‵nofo nei tatou i ei? Muamua la, kāti ka taku ne tatou me ko “aso fakaoti” o te olaga masei tenei. (2 Timo. 3:1) Kae e fakaasi mai i te Tusi Tapu me isi se vaitaimi telā e leva atu ne kamata i te taimi foki tenā. Ka tumau te vaitaimi tenā ke oko ki te taimi ka fai ei ne te Malo o te Mesia ke ‵lei katoatoa a tino kae ‵fuli te lalolagi ke liu palataiso. E taku a te vaitaimi tenei ki “te taimi e toe faka‵fou ei a mea katoa.” (Galu. 3:21) Ne kamata te vaitaimi tenei i te 1914. Ne a mea ne faka‵fou aka i te taimi tenā? Ne fakasopo aka a Iesu ke fai mo Tupu i te lagi. Tenā ne toe maua ei ne Ieova se pule ke fai mo ana sui, telā ne vau mai te kaigā tupu o te tupu fakamaoni ko Tavita. Kae e se tenā fua te mea ne toe fakafou aka ne Ieova. Mai tua malie ifo, ne kamata foki o toe fakafou a te tapuakiga ‵ma! (Isa. 2:​2-4; Eseki. 11:​17-20) E mata, ka toe fakalailai aka te tapuakiga ‵ma?

10. (a) Ne a pati ne ‵valo mai i te Tusi Tapu e uiga ki te tapuakiga ‵ma i ‵tou taimi? (Isaia 54:17) (e) Kaia e fakamalosi loto ei a valoaga penā?

¹⁰ Faitau te Isaia 54:17. Ke mafaufau e uiga ki te valoaga tenā: “E seai se meatau ne faite ke ‵teke atu ki a koe ka manuia”! Ko taunu eiloa a pati fakaosofia konā i aso nei. A pati fakamafanafana konei e fakasino foki ki ‵tou taimi: “Au tama katoa ka akoako ne Ieova, kae ka lasi ‵ki te filemu o au tama. A koe ka faka‵mautakitaki i te amiotonu. . . . A koe ka se mataku ki se mea kae ka seai se pogai e mataku ei koe, me ka se fakapilipili mai eiloa ki a koe.” (Isa. 54:​13, 14) Ke oko ki a Satani, “te atua o te olaga masani tenei,” e se mafai o taofi ne ia a te galuega a tino o Ieova tenei e fai ki te akoakoga o tino. (2 Koli. 4:4) Ko oti ne toe fakafoki mai te tapuakiga ‵ma, kae ka se mafai o toe fakalailai. Ka tumau eiloa ke oko ki te se-gata-mai. E seai se meatau ne faite ke ‵teke mai ki a tatou ka manuia!

 NE A MEA KA ‵TUPU?

11. Kaia e tali‵tonu ei tatou me ka se tuku tiaki a te vaitino e tokouke māfai ko olo atu a te kau fakaekegina ki te lagi?

¹¹ Ne a mea ka ‵tupu māfai ko olo a te kau fakaekegina katoa ki te lagi? Ke masaua, a Iesu ko te ‵tou Tausi Mamoe. Ko ia te ulu o te fakapotopotoga Kelisiano. Ne fai ‵tonu mai a Iesu: “E tokotasi fua te otou Takitaki, ko Keliso.” (Mata. 23:10) A te ‵tou Tupu telā ko pule mai ka saga tonu eiloa o fai tena tiute. E se ‵tau eiloa o ma‵taku a soko o Keliso i te lalolagi nei, me ka takitaki eiloa latou ne ia. E tonu, e se iloa ne tatou a fakamatalaga likiliki katoa ki te auala ka takitaki ne Keliso ana tino i te taimi tenā. Tela la, ke sau‵tala nei tatou ki nāi fakaakoakoga i te Tusi Tapu kolā e mafai o fakamalosi i ei tatou.

12. Ne tausi atu pefea a Ieova ki ana tino (a) mai tua o te mateatuga a Mose? (e) mai tua o te mauaga ne Elia se suā galuega? (Onoono foki ki te ata.)

¹² Mai mua o ulu a tino Isalaelu ki loto i te Fenua o te Folafolaga, kae ko mate a Mose. Ne a mea ne ‵tupu ki tino o te Atua? E mata, ne tuku tiaki fua latou i te mateatuga o te tagata fakamaoni tenā? Ikai. Ne tausi ne Ieova latou māfai ne fakamaoni latou. A koi tuai o mate a Mose, ne fakatonu atu a Ieova ki a ia ke ‵tofi a Iosua ke takitaki ana tino. Ne akoako ne Mose a Iosua i loto i se fia sefulu tausaga. (Eso. 33:11; Teu. 34:9) E se gata i ei, e tokouke a nisi tāgata ata‵mai ne fai ne latou te takitakiga—takitaki o taki tokoafe, takitaki o taki tokoselau, takitaki o taki tokolimasefulu, ke oko ki takitaki o taki tokosefulu. (Teu. 1:15) Ne tausi faka‵lei eiloa a tino o te Atua. E tai penā foki loa mo te tala o Elia. Ne takitaki ne ia a tino Isalaelu i loto i se fia sefulu tausaga. Kae ne oko mai taimi ne ave ei ne Ieova a ia ki se isi koga, ki te feitu ki saute o Iuta, ke tavini i ei. (2 Tupu 2:1; 2 Nofo. 21:12) E mata, ne tuku tiaki a tino fakamaoni o matakāiga e sefulu o te malo o Isalaelu? Ikai. Ne akoako ne Elia a Elisaia i tausaga e uke. E isi foki ne “tama tāgata . . . a pelofeta,” kolā e mautinoa me ne ‵vae ki potukau ke akoakogina. (2 Tupu 2:7) Tela la, e tokouke a tāgata fakamaoni ne toka o fesoasoani ke takitaki a tino o te Atua. Ne tumau eiloa a Ieova i te fakataunuga o tena fuafuaga, kae tausi atu ki ana tino tapuaki fakamaoni.

13. Se a te manatu fakatuagagina e maua i te Epelu 13:5e? (Onoono foki ki te ata.)

¹³ Kafai e mafau‵fau ki fakaakoakoga konā, se a tau faka‵tau, ne a mea ka ‵tupu māfai ko olo aka a toe tino fakaoti o te kau fakaekegina ki te lagi? E se ‵tau o mafaufau ‵mafa tatou  ki ei. E fakaasi mai i te Tusi Tapu se munatonu faigofie kae fakatuagagina: Ka se tuku tiaki lele eiloa ne Ieova ana tino i te lalolagi. (Faitau te Epelu 13:5e.) E pelā mo Mose mo Elia, e iloa ‵lei ne te tamā potukau o Kelisiano fakaekegina kolā e fai ne latou te takitakiga i aso nei, a te tāua ke akoako a nisi tino. I loto i se fia sefulu tausaga ko ‵teka, ne akoako faeloa ne te Potukau Pule a tāgata mai nisi mamoe ke fai ne latou te takitakiga. E pelā mo te fakatokaga ne latou o akoga e uke ke akoako ei a toeaina, ovasia faima‵laga, komiti o Ofisa Lagolago, ovasia o te Peteli, mo nisi akoga aka. Ne akoako foki ne te Potukau Pule a taina fesoasoani i komiti kese‵kese a te Potukau Pule. Ko ‵saga atu nei mo te fakamaoni a taina fesoasoani konei o fai a tiute tāua e uke i te fakapotopotoga kātoa. Ko toka ‵lei latou o faka‵soko a te galuega ki te tausiga o mamoe a Keliso.

14. Se a te manatu tāua o te sau‵talaga tenei?

¹⁴ Tenei la te manatu tāua o ‵tou sau‵talaga: Kafai ko olo aka a toe tino fakaoti o te kau fakaekegina ki te lagi i te fakaotiotiga o te fakalavelave lasi, ka tumau eiloa te tapuakiga ‵ma i lalo i te lalolagi nei. Fakafetai ki te takitakiga a Iesu Keliso, me ka se gata eiloa te tapuaki atu o tino o te Atua mo te fakamaoni ki a ia. E tonu, i te taimi tenā, ka taua mai ki a tatou a Koka mai Makoka, se potukau kaitāua o atufenua ‵kaufakatasi. (Eseki. 38:​18-20) Kae ka se manuia a te taua tenā; ka se mafai o taofi aka ne latou a tino o te Atua mai te tapuaki atu ki a Ieova. Ka faka‵sao eiloa ne ia latou! Ne lavea ne te apositolo ko Ioane i se fakaasiga a te “vaitino e tokouke” o nisi mamoe a Keliso. Ne fakailoa atu ki a Ioane me i te “vaitino e tokouke” tenei ka ‵sao atu “i te fakalavelave lasi.” (Faka. 7:​9, 14) Ao, ka tausi faka‵lei eiloa latou!

15-16. E ‵tusa mo te Fakaasiga 17:​14, ne a mea ka fai ne soko fakaekegina o Keliso i te taua o Amaketo, kae kaia e fakamalosi loto ei te mea tenā?

¹⁵ Kae kāti koi mafau‵fau loa nisi tino penei: ‘Kae pefea a te kau fakaekegina? Ne a olotou mea ka fai māfai ko tiaki ne latou te lalolagi?’ E manino ‵lei te tali a te Tusi Tapu. E fakaasi mai me i malo fakapolitiki o te lalolagi nei ka  “taua mo te Tamā Mamoe.” Kae mautinoa me ka takavale latou. E fai‵tau tatou penei: “Ka fakatakavale ne te Tamā Mamoe a latou.” Kae ko oi ka fesoasoani atu ki a ia? Tenei te tali i te fuaiupu, ko latou kolā ne “kalagagina,” “filifilia,” kae “fakamaoni.” (Faitau te Fakaasiga 17:14.) Ko oi la latou konei? Ko tino fakaekegina kolā ne faka‵tu aka mai te mate! Tela la, kafai ko olo aka a toe tino fakaekegina mai te lalolagi ki te lagi i te fakaotiotiga o te fakalavelave lasi, a te galuega muamua a latou e tasi ko te taua atu. Se galuega fakaofoofogia eiloa! Nisi Kelisiano fakaekegina ne taua atu sāle ki nisi tino mai mua o fai pelā me ne Molimau a Ieova. Ne ‵kau atu a nisi o latou ki kautau o te lalolagi nei. Fakamuli, ne fai latou mo Kelisiano ‵tonu kae tauloto ki te auala o te filemu. (Kala. 5:22; 2 Tesa. 3:16) Tenā ne seki toe ‵kau atu eiloa latou ki taua. Kae kafai ko faka‵tu aka ki te lagi, ka tavini atu latou fakatasi mo Keliso mo agelu tapu o taua atu i te taua fakaoti eiloa ki fili o te Atua.

¹⁶ Mafaufau aka la! A nisi Kelisiano fakaekegina i te lalolagi nei ko ma‵tua ‵ki kae vāi‵vai olotou foitino. Kae i te taimi eiloa e faka‵tu aka latou ki te lagi, ka ma‵losi kae ‵mafi latou kae fai pelā me ne tino faka-te-agaga kolā ka se toe mafai o ‵mate, kae ka taua fakatasi atu latou mo te lotou Tupu-Mafi ko Iesu Keliso. Kafai ko oti atu te taua o Amaketo, ka ga‵lue fakatasi latou mo Iesu i te faiga o tino ke gasolo o ‵lei katoatoa. E mautinoa, me ka sili atu i te ‵lei o galuega ka fai ne latou mai te lagi mō olotou taina mo tuagane pele i te lalolagi i lō mea ne mafai ne latou o fai e pelā me ne tino sē ‵lei katoatoa!

17. E iloa pefea ne tatou me ka puipui faka‵lei a tavini katoa a te Atua i te taua o Amaketo?

¹⁷ E mata, a koe se tokotasi o nisi mamoe? Ne a la mea e ‵tau o fai ne koe māfai ko kamata te taua o Amaketo? Ko te mea faigofie tenei: Talitonu ki a Ieova, kae fakalogo ki ana fakatonuga. Ne a mea e aofia i ei? E fai mai te Tusi Tapu penei: “Ulu ki otou potu tafa ki loto, kae ‵pono otou mataloa mai i otou tua. ‵Muni mō se taimi toetoe ke oko ki te taimi ko seke ei te kaitaua o te Atua.” (Isa. 26:20) A tavini fakamaoni katoa a te Atua i te lagi mo te lalolagi, ka puipui faka‵lei i te taimi tenā. E pelā mo te apositolo ko Paulo, e tali‵tonu tatou me e seai se “malo io me ko mea i te taimi nei io me ko mea ka oko mai . . . ka mafai o ‵vae ne ia tatou kea‵tea mai te alofa o te Atua.” (Loma 8:​38, 39) Ke masaua faeloa te mea tenei: A Ieova e alofa ki a koe, kae ka se tuku tiaki eiloa ne ia koe!