1. Akadzodzwa ese acange ari kudenga rini?

 MU MAKORE manganani adarika, anhu a Djehovha aidzibvunzisa kuti: ‘Akristu akadzodzwa ekupedzesera acaenda rini kudenga?’ Kareko, isusu tairangarira kuti Akristu akadzodzwa aizogara pa nyika uye orarama mu Paraizo ke nguwa doko mumasure me Amagedhoni. Asi mu Murindiri wa 15 ya Julho wa 2013, isusu takafunda kuti hondo ye Amagedhoni isati yatanga Akristu ese akadzodzwa anokwana kuita 144 000 acazonga ari kudenga.—Mat. 24:31.

2. Mibvunzo dzipi dzekuti pamweni dzingamuka, uye ticaonei mu fundo ino?

² Asi anganani edu tingadzibvunzisa kuti: Zvinyi zvicaitika no “mabira amweni” a Kristu anonga eciseenzera Djehovha akatendeka pa nyika pa nguwa ye “kutambudzika kukuru”? (Juau 10:16; Mat. 24:21) Anganani e mabira amweni, pamweni anganetseka nge kurangarira kuti aazozvizii zvekuita kana kuti aazogari no munhu ucaabetsera uye ucaatungamirira mumasure mekuti hama no hanzvadzi dzakadzodzwa dzaenda kudenga. Pamweni awona anorangarira kudaro, nge ndaa ye zviitiko zviiri zviri mu Bhaibheri. Ngationei zviitiko izvona, uye toona kuti ngei tisikadikani kunetseka nge zvazvo.

ZVINYI ZVISIKAZOITIKI?

3-4. Amweni pamweni angadzibvunzisei, uye ngei?

³ Anhu anganani pamweni anganetseka nge kurangarira kuti mabira amweni angasiya kuseenzera Djehovha kana akatama kugara no hama dzakadzodzwa dze Dare Rinotungamirira dzeciatungamirira. Pamweni awona anorangarira kudaro nge ndaa ye zviitiko zvinganani zviri mu Bhaibheri. Ngatione miezaniso miiri. Wekutanga unocokuita no Mupristi Mukuru Djeoyadha. Iyena wainga ari museenzi wakatendeka wa Mwari. Iyena no mukadzi wake Djeoshebha akacengetedza mudjaha waizwi Djeoashi  uye akamubetsera kuti agare mambo wakanaka uye wakatendeka. Djeoyadha paainga aciri mupenyu, Djeoashi wakaseenzera Djehovha akatendeka uye wakaita zviro zvakanaka. Asi mumasure mekuti Djeoyadha wafa, Djeoashi wakatanga kuita zviro zvakashata. Iyena wakazwa mazano akashata e acinda uye wakasiya kuseenzera Djehovha.—2 Mak. 24:2, 15-19.

⁴ Muezaniso umweni nge we Akristu akararama mumasure me aphostori. Muphostori Juau ndiyena wakapedzesera kufa pa aphostori ese. Paainga aciri mupenyu, iyena wakabetsera Akristu akawanda kuti arumbwe akatendeka kuna Djehovha. (3 Juau 4) Kuitawo hingana zvakaizwa no aphostori amweni a Djesu, Juau wakaita zviri zvese kuti adziirire ungano pakupauka pakunamata kainga kecibararika. (1 Juau 2:18; onai masoko e pasi e kufunda pana 2 Ate. 2:7.) Kupauka pakunamata kakabararika hinga rupsva riri kuitika mumakwasha. Mumakore akazoteera, anhu aya akapauka pakunamata ainga ecifundisa zviro zvakawanda zve kunyepa ecitendera zviro zvakashata mu ungano dzese.

5. Cinyi catisikadikani kurangarira kuti cicazoitika maererano no zviitiko zviiri izvi zviri mu Bhaibheri?

⁵ Zviitiko zviiri izvi zviri mu Bhaibheri zvinopangidza kuti zviro zvimwezvo zvicaitikawo no mabira amweni a Kristu kana akadzodzwa akaenda kudenga? Kodi Akristu akatendeka pa nyika acatanga kuita zviro zvakashata hinga Djeoashi, kana kuti acapauka pakunamata hinga zvakaizwa no akawanda mumasure mekuti aphostori afa? Zviri pamhene kuti haiwa! Isusu tingagara no rugondo rekuti kana akadzodzwa akaenda kudenga, e mabira amweni acarumbwa ecinamata Djehovha ngo mushobo wakanaka uye iyena acarumbwa eciacengeta. Ngei tingagara no rugondo irona?

KUNAMATA KAKACENA KUCARUMBWA KURIYO NOKUSIKAPERI

6. I nguwa dzipi nhatu dzaticaona?

⁶ Ngei tingagara no rugondo rekuti kunamata kakacena akuzoperi kunyazi no matambudziko aticazobatana nawo? Ngekuti Bhaibheri rinopanganidza kuti isusu tirikurarama mu nguwa yakasiyana maningi no ye Aisraeri uye mu nguwa yakazooteera mumasure mekuti aphostori afa. Hino ngatinyase kuzwisisa zvakaitika mu nguwa nhatu idzi: (1) Nguwa ye Aisraeri e kare, (2) nguwa yakazoteera mumasure mekuti aphostori afa, uye (3) nguwa yedu, kana kuti “nguwa icahwirinzwa zviro zvese.”—Zvii. 3:21.

7. Ngei Aisraeri akatendeka aizozwa mupfaro kuti aseenzere Djehovha?

⁷ Nguwa ye Aisraeri e kare. Nguwa doko asati afa, Mozesi wakabvunza Aisraeri kuti: “Ndinonyasa kuziya kuti kana ndikafa, zvezvirokwazvo imwimwi mucaita zviro zvakashata uye mucasiya gwanza iri randakamuziisai.” (Dhe. 31:29) Mozesi wakaziisawo kuti kana Aisraeri akatama kuzwira aizotorhwa kuenda kuutaphwa. (Dhe. 28:35, 36) Kodi masoko aya akadzadzikadi kamare? Honde. Nokuhamba ke mazana e makore, madzimambo akawanda akasanangura kutama kuzwira Djehovha uye akaita kuti anhu abatanidzwewo pakunamata kekunyepa. Nge ndaa yazvo, Djehovha akaramba anhu ake asikazwiri uye aazi kutendera kuti mambo upi hake we Ciisraeri atonge anhu ake. (Ezek. 21:25-27) Asi Aisraeri anganani paakaona kudzadzika kakaita masoko a Djehovha akapfara maningi kuti aseenzere Djehovha akatendeka.—Isa. 55:10, 11.

8. Kodi tinodikana kushamisika ngekuti mumasure mekufa ke aphostori Akristu akapauka pakunamata? Panganidzai.

⁸ Nguwa yakazoteera mumasure mekuti aphostori afa. Kodi tinodikana kushamisika  nge ndaa yekuti ungano ye Cikristu ye muzana re makore re cipiri yakapauka pakunamata? Haiwa. Ngekuti Djesu akaphorofita kuti izvona zvaizoitika. (Mat. 7:21-23; 13:24-30, 36-43) Muphostori Pauro, Pedru uye Juau akareketa kuti uphorofiti wa Djesu wainga waakutanga kudzadzika mu nguwa yawo mu zana re makore e kutanga K.A. (2 Ate. 2:3, 7; 2 Ped. 2:1; 1 Juau 2:18) Pa nguwa doko, mumasure mekuti muphostori we kupedzesera wafa, Akristu akapauka pakunamata akagara dii re Bhabhironi Guru, iyo inoimirira magereja ese e kunyepa. Uye pa nguwa iyonazve, zvakarekethwa na Djesu zvakadzadzika.

9. Ngei nguwa yedu yakasiyana no nguwa ye Aisraeri e kare uye no nguwa ye ungano ye Cikristu ye muzana re makore re cipiri?

⁹ “Nguwa icahwirinzwa zviro zvese.” Nguwa yedu yakasiyana no nguwa ye Aisraeri o kare uye no nguwa yekuti Akristu e pakutanga akapauka pakunamata. Nguwa yedu ii inodaidzwa kudini? Isusu tinosodaidza nguwa ii kuti “mazuwa e kupedzesera” e nyika yakashata. (2 Ti. 3:1) Asi Bhaibheri rinopangidza kuti pa nguwa imweyo yakatanga mazuwa e kupedzesera, yakatangawo nguwa inokosha maningi uye yaizogara ke nguwa yakareba. Nguwa iyona icarumbwa iriyo dakara Umambo wa Mesiya waita kuti anhu agare akakwana uye wacinja nyika kuti igare paraizo. Nguwa ii inodainzwa kuti “nguwa icahwirinzwa zviro zvese.” (Zvii. 3:21) Nguwa ii yakatanga mu gore ra 1914. Asi cinyi cakahwirinzwa? Djesu akatanga kutonga kudenga. Ngo mushobo uu, Djehovha akagadzazve Mambo kuti aimiriri mubarirhwana wa Mambo Dhavhidhi. Asi umambo uu andiwopi wega wakahwirinzwa na Djehovha. Mumasure mekacinguwa, kunamata kakacena kakatangawo kuhwirinzwa! (Isa. 2:2-4; Ezek. 11:17-20) Asi kunamata kakacena kucasvipiswazve here?

10. (a) Bhaibheri rinobhuyei ngezve kunamata kakacena ke mazuwa edu ano? (Isaya 54:17) (b) Ngei uphorofiti uu unotipfadza?

¹⁰ Erengai Isaya 54:17. Rangarirai ngezve uphorofita uu: “Akuna pfuti yakagadzirirhwa kukurhwisa icabudirira”! Masoko aya akafemerhwa arikudzadzika nyamasi uno. Kusiya izvona, masoko ari pana Isaya 54:13, 14 arikudzadzikawo nyamasi uno uye anotinyaradza maningi. Iyona inoti: “Ana ako ese acafundiswa na Djehovha, uye runyararo re ana ako ricagara rakakura maningi. Iwewe ucanyasa kubambiswa mu unatsi. . . . Apana caucathya uye apana cicakuitisa kuti uvhunduke, ngekuti apana cinothyisa cicakhwedera kauri.” Kunyazi Sathani “mwari we nyika ino,” aakwanisi kuimisa basa ririkuizwa pakufundisa  anhu ngezva Djehovha. (2 Ako. 4:4) Kunamata kakacena kakahwirinzwa uye akuzosvipiswizve nge magereja e kunyepa. Kunamata ikona kucarumbwa kuriyo nokusikaperi. Apana pfuti icakwanisa kuparadza anhu a Djehovha!

ZVINYI ZVICAITIKA?

11. Cinyi cinotipasa rugondo rekuti anhu akawanda aazosiiwi ari oga Akristu akadzodzwa paacaenda kudenga?

¹¹ Cinyi cicaitika kana akadzodzwa akaenda kudenga? Edzurirai kuti Djesu ndi Muushi wedu. Iyena ndi musoro we ungano ye Cikristu. Djesu akapangidza izvona pamhene paakati: “Mutungamiriri wenyu umwe basi, Kristu.” (Mat. 23:10) Mambo wedu waakutonga uye aazomboshaishi pakudzadzisa basa rake. Isusu atidikani kuthya ciro cipi haco pa nyika pano, ngekuti Kristu wene ndiyena ari kuonerera zvese. Zviri pamhene kuti isusu atizvizii kuti acatungamirira kudini anhu ake kana nguwa ii ikaguma. Hino ngationei miezaniso minganani dze Bhaibheri dzingatinyaradza.

12. Djehovha akacengeta kudini anhu ake (a) mumasure mekuti Mozesi afa? (b) mumasure mekuti Eriya apaswa basa ripsva? (Onaiwo mufanikiso.)

¹² Aisraeri asati apinda mu Nyika Yakapikirhwa, Mozesi wakafa. Hino cinyi cakaitika nawo? Pasina rubetso ra Mozesi, awona akagara asikazii zvekuita here? Haiwa. Pese paaizorumbwa akagondeka kuna Djehovha, iyena aizoacengeta. Mozesi asati afa, Djehovha akamubvunza kuti waidikana kugadza Djoshuwa kuti agare mutungamiriri we anhu. Mozesi wakarowedza Djoshuwa ke makore akawanda. (Eki. 33:11; Dhe. 34:9) Kusiya izvona, anarume amweni akawanda ainga akagadzirira kutungamirira anhu—atungamiri e 1000, atungamiriri e 100, atungamiriri e 50 uye kutobatanidzawo atungamiriri e 10. (Dhe. 1:15) Anhu a Mwari ainga ecinyasa kucengethwa zvakanaka. Muezaniso umweni wakanaka watinawo nge wa Eriya. Ke makore akawanda, iyena wakabetsera anhu e Israeri kuti arumbwe ecibatanidzwa pakunamata kakacena. Asi pano nguwa yekuti Djehovha akapasa basa ripsva Eriya katemaidumba ke Djudha. (2 Mad. 2:1; 2 Mak. 21:12) Kodi Aisraeri akatendeka e umambo 10 akasiiwa ari ega here? Haiwa. Eriya wakarowedza Erizeu ke makore akawanda. Uye kainga kucitori no “ana e aphorofita” ekuti pamweni ainga akarongwa hinga cikwata uye ainga akatorowedzwawo. (2 Mad. 2:7) Kana kuti kainga kucitori no anarume akawanda akatendeka uye ainga akagadzirira kuti atungamirire anhu a Djehovha. Djehovha akarumbwa ecidzadzisa cinangwa cake uye ecicengeta zvakanaka aseenzi ake.

13. Djehovha anotigondesei pana Ahebheru 13:5b? (Onaiwo foto.)

 ¹³ Mumasure mekuona miezaniso idzi, munorangarira kuti cinyi cicaitika mumasure mekuti akadzodzwa e kupedzesera atorhwa kuenda kudenga? Atitodikani kurangarira zvakawanda. Mu Bhaibheri tinogumira cokwadi ciri nyore uye cinotinyaradza: Djehovha aazombosii anhu ake ari oga pa nyika pano. (Erengai Ahebheru 13:5b.) Nyamasi uno kuno cikwata cidoko ce Akristu akadzodzwa ciri kutungamirira anhu a Mwari, Dare Rinotungamirira. Kuita hingana Mozesi na Eriya, awona ari kurowedza anarume e mabira amweni kuti abetsere pakucengeta anhu a Mwari. Ngo muezaniso, Dare Rinotungamirira rinoronga zvikora zvakawanda kuti rinorowedza akuru, aonereri e nharaunda, nhengo dze Dare re Firiyari, aonereri e zvikwata mu Bheteri uye hama dzimweni. Awona anobatikanawo pakurowedza abetseri o matare e Dare Rinotungamirira. Abetseri aya aano mabasa akawanda dakara zvino uye akagadzirira kuti azorumbwe eciita basa rekucengeta mabira a Kristu.

14. Zvinyi zvazonyasa kudjeka mu fundo ino?

¹⁴ Dakara zvino, mu fundo ino taona kuti pano ciro ciri pamhene: Kana akadzodzwa e kupedzesera akaenda kudenga dambudziko guru raakuda kupera, kunamata kakacena kucarumbwa kuripo pa nyika. Nge ndaa ye kutungamirirhwa na Djesu Kristu, isusu atizosii kunamata Djehovha. Zviri pamhene kuti pa nguwa iyona ticarhwiswa na Gogi we Magogi, mubatanidzwa wenyika dzakasiyana-siyana. (Ezek. 38:18-20) Asi kurhwiswa uku akuzotori nguwa yakareba uye akuzobudiriri; akuzoitisi kuti aseenzi a Djehovha asiye kumunamata. Apana mubvunzo kuti Djehovha acatiponesa! Mu ciono cake, muphostori Juau wakaona “anhu akawanda maningi” e mabira amweni a Kristu. Uye Juau wakaziya kuti “anhu akawanda maningi” aya ainga ari aya e kuti aibuda “mukutambudzika kukuru.” (Zvak. 7:9, 14) Apana mubvunzo kuti Djehovha acatiponesa!

15-16. Maererano na Zvakapangidzwa 17:14, akadzodzwa acaitei pa nguwa ye hondo ye Amagedhoni, uye ngei izvona zvinotibambisa?

¹⁵ Kunyazi zvakadaro, amweni angarangarira  kuti: ‘Asi cinyi cicaitika no akadzodzwa? Awona acaitei mumasure mekuti aakudenga?’ Bhaibheri rinonyasa kudaira mibvunzo idzi. Irona rinopanganidza kuti atongi e nyika ino “acarhwisana no Bira.” Asi zviri pamhene kuti awona acaruza. Bhaibheri rinobhuya kuti: “Bira ricaakunda.” Asi ndiani acabetsera Djesu? Bhaibheri rinodairawo kuti “anodainzwa,” “akasanangurhwa,” uye “akatendeka.” (Erengai Zvakapangidzwa 17:14.) Awona ndiani? Ndi akadzodzwa akamustwa! Umwe wekupedzesera we akadzodzwa pa nyika kana akaenda kudenga mumapeto e dambudziko guru, rimwe re mabasa ekutanga aacatambira ngerekurhwisa. Iri rinonga riri basa rakakura! Akadzodzwa amweni paainga asati agara Apupuri a Djehovha ainga akadjaira kurhwisana no amweni. Amweni awo akatoseenza ku hondo. Asi awona paakagara Akristu, akatanga kuziya gwanza re runyararo. (Aga. 5:22; 2 Ate. 3:16) Awona akasiya kutsigira hondo. Asi mumasure mekuti atorhwa kuenda kudenga, awona acange ari pamwepo na Djesu uye no ngirozi dzake cena uye acarhwisana pa hondo yekupedzesera no azondi a Mwari.

¹⁶ Rangarirai zvinoteera. Nyamasi uno pa nyika, akadzodzwa anganani acembera maningi uye aacinazve simba. Kana akamutswa kuti ararame kudenga, awona acagara zvisikwa zvekumwiya zvisikafi uye zvino simba uye acarhwa pamwepo na Mambo Murhwi, Djesu Kristu. Mumasure mekupera ke hondo ye Amagedhoni, awona acaseenza pamwepo na Djesu, kuti abetsere anhu kuti agare akakwana. Apana mubvunzo kuti paanonga aakudenga, awona acakwanisa kuitira zvakawanda hama no hanzvadzi dzawo dziri pa nyika kudarika zviya zvaakaita paainga aciri panyika hinga anhu asikazi kukwana!

17. Tinoziya kudini kuti aseenzi ese a Djehovha acange akacengeteka pa nguwa ye hondo ye Amagedhoni?

¹⁷ Imwimwi munobatanidzwa pa mabira amweni here? Hino imwimwi munodikana kuitei kana Amagedhoni hondo yakakura isati yakambooniwa no anhu ikatanga kuitika? Zvamunodikana kuita azviremi: Gondai Djehovha uye teererai nhungamiriro dzake. Izvona zvinobatanidzei? Bhaibheri rinobhuya kuti: “Pindai mu makwartu enyu uye fungai misuwo. Findarai ke nguwa doko dakara shungu dzapera.” (Isa. 26:20) Kana kuti, aseenzi ese akatendeka a Djehovha ari kudenga pamwepo no ari pa nyika acange akacengeteka pa nguwa ye Amagedhoni. Hinga zvakatarhwa no muphostori Pauro, isusu tino rugondo rekuti apana “utongi, zviro zviriyo zvino, zviro zvicauya . . . zvicakwanisa kutiparadzanisa mu rudo ra Mwari.” (Aro. 8:38, 39) Garai meciedzurira kuti: Djehovha anomudai maningi, uye aazombomusii muri mwega!