1. Шупту чагдырган христианнарны кажан дээрже чыыр?

 ИЕГОВАНЫҢ бараалгакчылары: «Чагдырган христианнарның сөөлгүзү кажан дээрже үнер?» деп боданып турган. Мурнунда чылдарда оларның чамдыызы Армагеддон дайыны төнерге, кезек үеде черге чурттаар бис деп бодап турган. 2013 чылдың июль 15-тиң «Таңныыл суургазында» черде шупту чагдырган христианнарны дээрже Армагеддон мурнунда апаар дээн (Мф. 24:31).

2. Кандыг айтырыг тыптып болур база бо статьяга чүнү сайгарар бис?

² Иеговага шынчы бараалгап чоруур «өске хойлар-биле» коргунчуг хилинчек үезинде чүү болур? (Ин. 10:16; Мф. 24:21). Амгы үеде чамдык улус чагдырган ынак акы-угбалары дээрже үне бээрге, чүгле боттарывыс артар бис деп коргуп, дүвүреп болур. Ындыг бодалдарже чыгап болур ийи библейжи төөгүнү көрээлиңер. Ооң соонда чүге дүвүрээр чылдагаан чогун сайгарар бис.

ЧҮҮ БОЛБАЗЫЛ?

3, 4. Чамдык улус кандыг дүвүрелдиг база чүге?

³ Удуртукчу чөвүлелде акыларывыс чер кырында чок боорга, өске хойлар алыс шындан чоруй баар эвеспе деп, чамдык улус дүвүреп турар. Ол коргуушкуннарның артында библейжи төөгүлер бар чадавас. Ийи чижекти көрээлиңер. Дээди бараалгакчы Иодайны сактып кээли. Ол шылгараңгай бараалгакчы өөнүң ишти Иосавет-биле Иоас деп бичии оолду камгалааш, Бурганга шынчы бараалгаар  эки хаан апаарынга дузалаан. Иодай дириг чорда, ол хаан Иеговага чүдүп чораан. А кажан чок апаарга, Иоас багай алдынып, каржы нояннарның аайынче кирип, Иеговадан хая көрнү берген (2 Чыл. 24:2, 15—19).

⁴ Ийиги вектиң христианнарының дугайында база чугаалажып көрээли. Элчиннерниң эң сөөлгүзү Иоанн дириг чорааш, христианнарга эки салдарны чедирип, Иеговага туруштуг бараалгаарынга дузалажып турган (3 Ин. 4). Иоанн элчин өске элчиннер-биле кады ойталакчыларның күштүг салдары-биле удур чаныш-сыныш чок демисежип келген (2 Фес. 2:7; 1 Ин. 2:18). Ынчалза-даа Иоанның өлүмүнүң соонда ойталакчы өөредиглер өрт ышкаш өөскүй берген. Чүгле он-он чылдар эрткенде, чыыш ёзулуг христиан өөредиглерден, негелделерден дыка ырак апарган.

5. Сайгарган библейжи төөгүлерден кандыг түңнелдер үндүрүп болур?

⁵ Чагдырган христианнар дээрже үне бээрге, өске хойлар ол ийи библейжи төөгүде улуска дөмейлежи бээр бе? Шынчы христианнар Иоас ышкаш каржы херектер кылып эгелээр бе? Азы бистиң эраның ийиги векте христианнар дег ойталакчылар апаар бе? Канчап-даа чок! Чагдырган христианнар черден чоруй баарга, өске хойлар Иеговага чүткүлдүг бараалгап, ооң ынакшылынга артар деп чигзинмес бис. Кайыын ындыг бүзүрелдиг бис?

АРЫГ ЧҮДҮЛГЕ КОГАРАВАС

6. Кандыг үш хуусааны кысказы-биле сайгарар бис?

⁶ Дыка берге үелер кээр-даа болза, арыг чүдүлге канчап-даа когаравас деп чүге бүзүреп болур бис? Бистиң үевиске хамаарышкан медеглел быжыг бүзүрелди берип турар. Амгы үе бурунгу Израиль биле бистиң эраның ийиги вектен дыка улуг ылгалдыг. Ынчангаш ол үш үени кысказы-биле сайгарыптаалы: 1) бурунгу Израиль, 2) элчиннерниң өлүмүнүң соонда үе, 3) «бүгү чүвени катап тургузар үе» (Аж.-ч. 3:21).

7. Бүгү чон биле хааннар безин шын орукту кааптарга, шынчы израильчилер Бурганга чүге улаштыр бараалгап чораан?

⁷ Бурунгу Израильдиң үези. Чуртталгазының төнчүзүнде Моисей израильчилерге мынча дээн: «Өлү бээримге, бүрүнү-биле самыырап, мээң айтып-чагаан оруумдан чайлай бээриңерни билир мен» (Ы. х. к. 31:29). Израильчилер Бурганга удурланыр болза, оларны хоругдалче апаар деп база Моисей сагындырган (Ы. х. к. 28:35, 36). Ооң сөстери күүсеттинген бе? Ийе. Чүс-чүс чылдар дургузунда дыка хөй хааннар шын эвес орукту шилип ап, Бурганның чонун төөреткен. Ооң хайында Иегова чонундан ойталааш, черде хааннарның ук-салгалын үзүп каан (Иез. 21:25—27). А Иеговага шынчы улус ооң Сөзү күүсеттинип турарын көргеш, улаштыр дидими-биле бараалгап чорааннар (Иса. 55:10, 11).

8. Ийиги вектиң христианнарының алыс шындан хая көрнү бергени бисти чүге кайгатпас? Тайылбырлаптыңар.

⁸ Элчиннерниң өлүмүнүң соонда үе. Ийиги вектиң христиан чыыжы алыс шындан ырай бергени биске кайгамчык бе? Чок. Улуг ойталаашкын болурун Иисус өттүр сөглеп каан (Мф. 7:21—23; 13:24—30, 36—43). Павел, Пётр болгаш Иоанн элчиннер Иисустуң медеглели бирги векте-ле күүсеттинип эгелээнин бадыткаан (2 Фес. 2:3, 7; 2 Пет. 2:1; 1 Ин. 2:18). Ийиги векте христиан чыыштың мөзү-шынары кудулай берген. Ынчалдыр делегей чергелиг меге шажынның Өндүр улуг Вавилоннуң  чугула кезээ апарган, ойталакчы христиан чүдүлге тыптып келген. Ол библейжи медеглел база күүсеттинген.

9. Бистиң үевис бурунгу Израиль биле бистиң эраның ийиги вектен чүзү-биле ылгалып турар?

⁹ «Бүгү чүвени катап тургузар үе». Бистиң үевис бурунгу Израильден болгаш өндүр улуг ойталаашкын сайзыраан бистиң эраның ийиги вектен ылгалдыг. Амгы үени канчаар адаар? Угаанга бир дугаарында кирер чүүл — бо делегейниң «сөөлгү хүннери» (2 Тим. 3:1). Ол үеден эгелээш, улуг уткалыг чугула болуушкуннарлыг үе уламчылап турарын Библия көргүскен. Мессиан Чагырга кижи төрелгеттенин тергиин чорукка чедиргеш, черни дываажаң кылдыр хуулдуруптарга ол үе доостур. Шак ол «бүгү чүвени катап тургузар үе» 1914 чылда эгелээн (Аж.-ч. 3:21). Ынчан чүү катап тургустунган? Иисус дээрде Чагырганың дүжүлгезинге олурупкан. 1914 чылда Иегованың төлээзи болур шынчы хаан Давидтиң салгалындан чагырыкчы тыптып келген. Ол Чагырганың хааннаашкынындан аңгыда, арыг чүдүлгени Иегова катап тургузуп эгелээн! (Иса. 2:2—4; Иез. 11:17—20). Арыг чүдүлге база катап дүжүп каар бе?

10. а) Бистиң үевисте арыг чүдүлгеге хамаарыштыр Библияда чүнү өттүр сөглээн? (Исайя 54:17). б) Ол ышкаш медеглелдер биске чүге бүзүрелди берип турар?

¹⁰ Номчуптуңар: Исайя 54:17. Бөгүн күүсеттинип турар: «Сенче углаан кандыг-даа ок-чепсек тиилелгеге чедирбес» деп медеглелди боданып көрүңерем! Дараазында сөстер база күүсеттинген: «Сээң бүгү чурттакчыларың [Иеговадан]... өөредиг алыр, оларны өндүр улуг-чаагай чорук манап турар. Сен чөптүг-шынныг чорукка үндезилеттинер сен... коргар чүвең чок боор. Коргуушкун көрбес сен — ол сенче чагдавас» (Иса. 54:13, 14). «Бо делегейниң „бурганы“» Эрлик безин Иегованың чонунуң чорудуп турар өөредилге ажылын соксадып шыдавас (2 Кор. 4:4). Арыг шын чүдүлге катап тургустунган, моон соңгаар аңаа кым-даа хора чедирип шыдавас. Ол чер кырынга мөңгеде артар. Аңаа удурланыр кандыг-даа күш чок!

КЕЛИР ҮЕДЕ ЧҮҮ БОЛУР?

11. Чагдырган христианнар дээрже үне бээрге-даа, мөөң чонда коргар чылдагаан чок деп чүге чигзинмес бис?

¹¹ Чагдырган христианнар дээрже үне бээрге, чүү болур? Бистиң Кадарчывыс — Иисус деп утпаңар. Ол христиан чыыштың  Баштыңы. Ол боду: «Силерде чаңгыс Башкарыкчы — Христос бар» — дээн (Мф. 23:10). Бистиң ам чагырып турар Хаанывыс бодунуң алыс шын эдерикчилери дээш кезээде сагыш човаар. Бисти Иегованың бодунуң Оглу башкарып турар болганда, чүден-даа корткан херээвис чок. Ол үеде Иисус эдерикчилеринге айтыышкыннарны кандыг арга-биле бээрин тодаргай билбес бис. Ынчангаш бисти сорук киирер библейжи чижектерни көрээлиңер.

12. Иегова бодунуң чону дээш канчаар сагыш човап чораан: а) Моисейниң өлүмүнүң соонда? б) Илия чаа даалга алган соонда? (Чурукту база көрүңер.)

¹² Израильчилер Аазаттынган черже кирериниң мурнунда Моисей чок апарган. Ооң соонда Бурганның чону-биле чүү болган? Деткимче чок арткан бе? Чок. Олар шынчы чорда Иегова чону дээш сагыш човап турган. Моисейниң өлүрүнүң мурнунда Иегова аңаа чоннуң баштыңчызы кылдыр Нуннуң оглу Иисусту шилип каарын айыткан. Он-он чылдар мурнунда-ла Моисей Иисусту өөредип эгелээн (Хост. 33:11; Ы. х. к. 34:9). Бурганның чону дээш хөлчок сагыш човаар муң, чүс, бежен болгаш он кижини башкарар, шылгараңгай эр улус база турган (Ы. х. к. 1:15). Ол ышкаш байдал Илия медээчиниң үезинде болган. Хөй чылдар дургузунда ол израильчилерге Иеговага мөгееринге дузалажып келген. Ынчалза-даа үези кээрге, Бурган аңаа Иудеяга өске даалга берген (4 Хаан. 2:1; 2 Чыл. 21:12). Израильдиң он аймаанда Бурганның шынчы бараалгакчылары удуртулга чок арткан бе? Чок. Чүге дизе Илия каш чыл дургузунда Элисейни болгаш Бурганның өске медээчилерин база өөредип турган (4 Хаан. 2:7). Бурганның чонун удуртур бүзүрелдиг эр улус хөй турганы чугаажок. Оон алырга, Иегова бодунуң күзел-бодалын боттандырарын, бараалгакчылары дээш сагыш човаарын соксатпаан.

13. Еврейлерге 13:5б-де кандыг бүзүредиг бар? (Чурукту база көрүңер.)

¹³ Бо чижектерни көргеш, сөөлгү чагдырган акывыс дээрже үне бээрге, чүү болур деп түңнедиңер? Даап бодаан херээ чок. Чүге дизе Иегова бодунуң чонун кажан-даа кагбас деп күштүг алыс шынны Библияда ажыткан. (Номчуптуңар: Еврейлерге 13:5б.) Моисей биле Илия ышкаш бисти удуртуп чоруур чагдырган христианнарның биче бөлүү өске акы-угбаларны өөредириниң чугулазын билип  турар. Он-он чылдар дургузунда Удуртукчу чөвүлелде акылар өске хойлардан эр улусту удуртулга ажылынга өөредип турар. Чижээ, хуралдың удуртукчуларын, кожуун хайгааракчыларын, салбыр комитеттериниң кежигүннерин, Вефилде харыысалгалыг акыларны өөредир школаларны олар организастаан. Удуртукчу чөвүлел комитеттерде дузалакчыларын хууда өөредир. Ол дузалакчылар амдан эгелеп, улуг харыысалганы чүктеп, аңгы-аңгы даалгаларны күүседип турар. Чагдырган христианнар дээрже үне бээрге, Иисустуң хойларын башкарарынга оларны дыка эки белеткеп каан.

14. Сайгарылгавыстың кол бодалы кандыг?

¹⁴ Сайгарылгавыстың кол бодалынга келдивис. Коргунчуг хилинчектиң төнериниң бетинде сөөлгү арткан чагдырган акывыс дээрже үне бээрге, чер кырынга арыг чүдүлге канчап-даа барбас. Хаанывыс Иисустуң ачызында бис Иеговага улаштыр бараалгаар бис. Ийе, Библияда Магогтан Гог деп адаан чоннар каттыжыышкыны бисче халдай бээр (Иез. 38:18—20). Ол халдаашкын чедиишкин чок, кыска болур. Бис Иеговага бараалгалывысты оожумнатпас бис. Ол бисти албан камгалаар! Иоанн элчин көстүүшкүнге коргунчуг хилинчекти көрүп эрткен «мөөң чонну» Христостуң өске хойларын көрген (Ажыд. 7:9, 14). Ийе, Иегова бисти чугаажок камгалаар!

15, 16. Ажыдыышкын 17:14-тен алырга, чагдырган христианнар Армагеддон үезинде чүнү кылыр, ону билири биске чүге өөрүнчүг?

¹⁵ Ынчалза-даа бир кижи: «А чагдырган христианнар канчаар? Черни каггаш, дээрге чүнү кылырлар?» — деп айтырып болур. Бо делегейниң чазактары «Хураган-биле чаалажыр» деп Библияда дорту-биле харыылаан. Олар Хураганга күш четпезин база аңаа кым дузалажырын мынчаар бижээн: «Ол Ооң шилээш, кый деп алганы, Аңаа шынчы улус-биле кады оларны базып каар». (Номчуптуңар: Ажыдыышкын 17:14.) Ол дээрде чагдырган христианнар-дыр!  Оон алырга, коргунчуг хилинчек төнериниң бетинде сөөлгү чагдырган акывысты дээрже аппаарга, оларның бир дугаар кайгамчык даалгазы — дайынга тулчуру! Чагдырган христианнарның аразында тайбыңзырак эвес, дайынга киржип чораан улус база бар. Олар алыс шын христианнар апаргаш, өске улус-биле тайбың чурттап өөренип алгаш, шупту чепсээн үндүр октапкан (Гал. 5:22; 2 Фес. 3:16). Иисус баштаан дээрниң төлээлери-биле Бурганның дайзыннарын узуткаар сөөлгү дайынга олар киржир.

¹⁶ Бодап көрүңер даан, чамдык чагдырган христианнар назылап кошкай берген. А дээрде чуртталгага дирлип келгеш, олар өлүм чок күштүг көзүлбес мага-боттуг апаар. Ынчан Хааны Иисус Христос-биле кады эгин кожа тулчуушкунга киржир. Армагеддон дайыны дооступ каарга, Иисус-биле кады кижилерге тергиин чорукту чедип алырынга дузалажыр. Тергиин эвес кижилер чораан үезинге бодаарга, чагдырган христианнар чер кырында ынак акы-угбаларынга оон-даа хөйнү кылып шыдаар апаар!

17. Армагеддон үезинде Бурганның шупту бараалгакчыларынга айыыл чок болур деп кайыын билир бис?

¹⁷ Армагеддон деп түңнел дайын эгелээрге, өске хойлар силер чүнү кылыр силер? Ында коргунчуг чүве чок: Иеговага ынанып, ооң айтыышкыннарын сагыңар. Ынаар чүү кирип турарыл? Библияда бисти оожургадып аргалаан сөстер бар: «Бажыңыңче кирип, эжииң хаап ал! Бурганның килеңи чавырылгыжеге чедир, түр када чаштына бер» (Иса. 26:20). Ол үеде Бурганның дээрде-даа, черде-даа шынчы бараалгакчыларынга айыыл чок болур. Павел элчин ышкаш, «делегейниң ээлери-даа... амгы болгаш келир үелер-даа... Бурганның... ынакшылындан бисти чара кирип шыдавас» деп чигзинмес бис (Рим. 8:38, 39). Үргүлчү сактып чоруңар: Иегова силерге ынак, ол кажан-даа силерни кагбас!