1. Ку вань зырӟем христианъёс инме басьтэмын луозы?

 АЗЬВЫЛ Иеговалэн ужась-тыршисьёсызлэн таӵе юанзы кылдэ вал: «Ку берпуметӥез зырӟем христиан мурт инме басьтэмын луоз?» Куке но ми малпаськомы вал, куд-ог зырӟем христианъёс Армагеддон пыр потозы но собере кӧня ке дыр ӵоже музъем вылын улозы на, дыр, шуыса. Но 2013-тӥ арын 15-тӥ пӧсьтолэзь понна поттэм «Возьмаськон башняысь» ми тодӥмы, вань зырӟем христианъёс, кудъёсыз музъем вылын уло на, Армагеддон кутскытозь инме басьтэмын луозы шуыса (Матф. 24:31).

2. Кыӵе юан кылдыны быгатэ но мае ми эскеромы та статьяын?

² Но табере таӵе юан кылдыны быгатэ: мар луоз «мукет ыжъёсын», кудъёсыз «бадӟым куректон» дыръя музъем вылын Иеговалы оскымон ужалозы-тыршозы? (Иоанн 10:16; Матф. 24:21). Куд-огъёсыз сюлмасько, куке вань зырӟем христианъёс инме басьтэмын луозы, соослы нокин уз юртты но кивалтэт уз сёты шуыса. Ойдолэ эскеромы Библиысь кык учыръёсты, кудъёсыз сэрен таӵе кышкан кылдыны быгатэ. Собере ми тодомы, малы со сярысь сюлмаськоно ӧвӧл.

МАР УЗ ЛУЫ?

3, 4. Мар сярысь сюлмасько куд-огъёсыз но малы?

³ Куд-огъёсыз сюлмасько, Кивалтӥсь кенешысь зырӟем агайёс музъем вылын уз луэ ни ке, мукет ыжъёс зэмлыкез уз кельтэ-а меда шуыса. Таӵе малпан кылдыны быгатэ, Библиысь куд-ог учыръёсты лыдӟыса. Кылсярысь, тодамы ваёмы Иодай быдӟым священникез. Со Инмарлы оскымон ужаз-тыршиз. Со но Иосавеф кышноез Иоас нимо  пичи пияшез утизы но солы умой эксэй луыны юрттӥзы. Иодай улон аръёсы та эксэй Иеговалы йыбыртъяз. Нош куке та быдӟым священник кулӥз, Иоас юрӟым ужъёс лэсьтыны кутскиз. Со Иудеяысь лек кивалтӥсьёслэсь кылзӥськиз но Иеговалэсь палэнскиз (2 Пар. 24:2, 15—19).

⁴ Озьы ик вераськомы кыкетӥ даурысь христианъёс сярысь. Куке Иоанн, берпуметӥез апостол, улэп на вал, со христианъёслы юрттэ вал зэмлык бордын улыны но Иеговалы оскымон ужаны-тыршыны (3 Иоанн 4). Мукет апостолъёсын ӵош Иоанн тырше вал кенешез утьыны зэмос йыбырттонлэсь палэнскемъёслэсь (1 Иоанн 2:18; 2 Фес. 2:7). Но Иоанн кулэм бере тросэз христианъёс зэмос йыбырттонлэсь палэнскизы. Кӧня ке дасо аръёс куспын кенешын туж вӧлмизы зэмос йыбырттонлэсь палэнскемъёслэн дышетонъёссы но ужъёссы.

5. Кыӵе йылпумъян лэсьтоно ӧвӧл, кылем абзацъёсын эскериськись кык учыръёсты лыдӟыса?

⁵ Возьмато-а та кык учыръёс, куке зырӟем христианъёс инме басьтэмын луозы, мукет ыжъёс но та выллем учыре сюрозы шуыса? Иоас сямен, кутскозы-а оскымон христианъёс лек ужъёс лэсьтыны? Кыкетӥ даурысь тросэз христианъёс сямен, соос но зэмос йыбыртонлэсь палэнскозы-а? Уз. Ми оскыны быгатӥськомы, куке зырӟем христианъёс инме басьтэмын луозы, мукет ыжъёс азьланяз но Иеговалы оскымон ужалозы-тыршозы но Инмар соос сярысь сюлмаськоз шуыса. Малы ми талы оскыны быгатӥськомы?

ЧЫЛКЫТ ЙЫБЫРТТОН УЗ БЫРЫ

6. Кыӵе куинь вакытъёсты ми вакчияк эскеромы?

⁶ Азьланяз милемыз туж секыт дыръёс возьмало ке но, малы ми оскиськомы, чылкыт йыбырттон уз быры шуыса? Милесьтым осконмес юнматэ со, мар гожтэмын Библиын асьме нуналъёс сярысь. Со туж пӧртэм солэсь, мар вераське вашкала Израиль сярысь но асьме вакытысь кыкетӥ даур сярысь. Соин ик ойдолэ вакчияк эскеромы, мар вераське Библиын: 1) вакыт сярысь, куке музъем вылын вашкала Израиль вал, 2) апостолъёс кулэм бере вакыт сярысь но 3) асьме нуналъёс сярысь, кудъёсыз нимасько «дырен, куке тупатэмын луоз ваньмыз» (Ап. уж. 3:21, ВД).

7. Мар юрттӥз израиль калыкысь оскымон адямиослы азьланяз но Инмарлы ужаны-тыршыны, быдэс калык но эксэйёс шонер сюрес вылысь кожизы ке но?

⁷ Вакыт, куке музъем вылын вашкала Израиль вал. Кулон азяз Моисей израиль калыклы шуиз: «Мон тодӥсько уго, кулӥ ке, тӥ сӧриськоды, сӥзьыса сётэм сюрес вылысьтым кожоды» (К. Зак. 31:29). Озьы ик Моисей израиль калыклы вераз, соос Инмарлэсь ӧз ке кылзӥське, соосты пленэ нуозы шуыса (К. Зак. 28:35, 36). Быдэсмизы-а солэн кылъёсыз? Быдэсмизы. Дауръёс ӵоже тросэз эксэйёс шонертэм сюрес вылтӥ мынӥзы но Инмарлэсь калыксэ ас сьӧразы нуизы. Соин ик Иегова аслэсьтыз калыксэ палэнтӥз но соослы эксэйёс ӧз пуктылы ни (Иез. 21:25—27). Но израиль калыкысь оскымон адямиос адӟизы, Инмарлэн кылъёсыз быдэсмо шуыса (Ис. 55:10, 11). Та соослы юрттӥз азьланяз но, номырлэсь кышкатэк, Иеговалы ужаны-тыршыны.

8. Паймытэ-а милемыз, кыкетӥ даурын христиан кенеш зэмлыклэсь палэнскиз шуыса? Валэктэ.

⁸ Апостолъёс кулэм бере вакыт. Паймытэ-а милемыз, кыкетӥ даурын христиан кенеш зэмлыклэсь палэнскиз шуыса? Уг. Малы ке шуоно Иисус азьло ик вераз, тросэз христианъёс зэмос йыбырттонлэсь палэнскозы шуыса (Матф. 7:21—23; 13:24—30, 36—43). Павел, Пётр но Иоанн апостолъёс  веразы, Иисуслэн азьпалзэ ивортонэз нырысетӥ даурын ик быдэсмыны кутскиз шуыса (2 Фес. 2:3, 7; 2 Пётр 2:1; 1 Иоанн 2:18). Нош кыкетӥ даурын тросэз христианъёс зэмос йыбырттонлэсь палэнскизы ини. Соослэн дышетонъёссы пыризы Быдӟым Вавилон пӧлы — зэмос луисьтэм религилэн дунневыл империез пӧлы. Библиысь таиз но азьпалзэ ивортон быдэсмиз.

9. Маин пӧртэм асьме нуналъёсмы вакытлэсь, куке музъем вылын вашкала Израиль вал, но асьме вакытысь кыкетӥ даурлэсь?

⁹ «Дыр, куке тупатэмын луоз ваньмыз». Асьме нуналъёсмы туж пӧртэмесь вакытлэсь, куке музъем вылын вашкала Израиль вал, но асьме вакытысь кыкетӥ даурлэсь, куке зэмос йыбырттонлэсь палэнскемъёс туж трос луизы. Кызьы нимаське асьме дырмы? Нырысь ик «берпум аръёс» тодэ лыкто, вылды (2 Тим. 3:1). Но кызьы возьматэ Библия, «берпум аръёсын» ӵош кутскиз мукетыз вакыт, кудӥз эшшо но бадӟым воштӥськонъёс вае но кемагес кыстӥське. Со вакыт йылпумъяськоз, куке Мессиялэн Эксэйлыкезлэн кивалтэмез улсын адямиос тырбыдэсэсь луозы но музъем райлы пӧрмоз. Та вакыт нимаське «дырен, куке тупатэмын луоз ваньмыз» (Ап. уж. 3:21, ВД). Со кутскиз 1914-тӥ арын. Мар соку тупатэмын вал? Иегова инмысь Эксэйлыкын Иисусэз Эксэе пуктӥз, кудӥз Давид эксэйлэн выжыысьтыз потӥз. Эксэез пуктэм сяна, Иегова чылкыт йыбырттонэз но тупатыны кутскиз на (Ис. 2:2—4; Иез. 11:17—20). Чылкыт йыбырттон нош ик быроз-а?

10. а) Мар вераське Библиын асьме нуналъёсысь чылкыт йыбырттон сярысь? (Исаия 54:17). б) Малы сыӵе азьпалзэ ивортонъёс азьланезлы осконмес юнмато?

¹⁰ Лыдӟе Исаиялэсь 54:17. Малпалэ гинэ та азьпалзэ ивортон сярысь: «Тыныд пумит лэсьтэм одӥг арберилэн но азинлыкез уз луы»! Со асьме нуналъёсы быдэсме. Со сяна, туннэ быдэсмо таӵе кылъёс: «Вань нылпиостэ Кузё-Инмар дышетоз, нылпиосыдлэн туж бадӟым каньыллыксы луоз. Тон шонерлыко улыса юнматскод... тыныд номырлэсь кышканы кулэ ӧвӧл, шимес макелэсь но, со тынад матад уз лыкты» (Ис. 54:13, 14). Шайтан но, «та даурлэн „инмарез“», уг быгаты дугдытыны дышетон ужез, кудзэ Иеговалэн ужась-тыршисьёсыз нуо (2 Кор. 4:4). Чылкыт йыбырттон тупатэмын. Со ноку но уз быры. Со луоз котьку, пырак дауръёс ӵоже. Милемлы пумит лэсьтэм одӥг ож тӥрлыклэн но азинлыкез уз луы!

 МАР ЛУОЗ?

11. Малы ми оскиськомы, зырӟем христианъёслэн инме ӝутскемзы бере милемлы номырлэсь кышкано уз луы шуыса?

¹¹ Мар луоз, куке зырӟем христианъёс инме ӝутскозы? Эн вунэтэ: Иисус — милям Возьмасьмы. Со христиан кенешлэн йырыз. Со ачиз шуиз: «Тӥляд уго одӥг Валэктӥсьты — Христос» (Матф. 23:10). Эксэймы зэмос дышетскисьёсыз сярысь котьку но сюлмаськоз. Милемын Христос кивалтэ бере, милемлы номырлэсь кышкано ӧвӧл. Ми пыр-поч ум тодӥське, кызьы Христос дышетскисьёсызлы кивалтэт сётоз, куке зырӟем христианъёс инме ӝутскозы. Но ми быгатӥськомы эскерыны Библиысь куд-ог учыръёсты, кудъёсыз милемыз буйгатозы.

12. Кызьы Иегова сюлмаськиз аслаз калыкез сярысь: а) Моисей кулэм бере? б) Илия мукет интые ужаны-тыршыны кошкем бере? (Озьы ик учке суредъёсты.)

¹² Моисей кулӥз израиль калык Сӥзем музъеме пыремлэсь азьло. Мар луиз калыкен солэн кулэмез бере? Иегова соослы юрттэмысь дугдӥз-а? Ӧз. Куке калык солы оскымон луыны тыршиз, Инмар соос сярысь сюлмаськиз. Моисей кулон азьынгес Инмар сое куриз ачиз интые Иисус Навинэз пуктыны. Солэсь азьвыл Моисей Иисус Навинэз дасо аръёс ӵоже дышетӥз (Пот. 33:11; К. Зак. 34:9). Со сяна, калык пӧлын вал мукет но «визьмо, улонэз адӟем воргоронъёс»: «сюрс муртэн, сю муртэн, витьтон муртэн, дас муртэн» кивалтӥсьёс (К. Зак. 1:15). Адӟиське, Инмар аслаз калыкез сярысь туж умой сюлмаськиз. Та выллем югдур вал Илия пророк улон нуналъёсы но. Трос аръёс ӵоже со юрттӥз израиль калыклы Иеговалы ужаны-тыршыны. Но берлогес Инмар Илияез Израильысь Иудеяе ужаны-тыршыны ыстӥз (4 Экс. 2:1; 2 Пар. 21:12). Израильын улӥсь Инмарлэн оскымон ужась-тыршисьёсыз кивалтэттэк кылизы-а? Ӧз. Кӧня ке аръёс ӵоже Илия Елисеез дышетӥз. Озьы ик вал «пророк пиос», кудъёсыз дышетэмын вал (4 Экс. 2:7). Озьыен, вал трос оскымон пиосмуртъёс, кудъёсыз Инмарлэн калыкезлы кивалтэт сётыны быгатӥзы. Адӟиське, Иегова оскымон ужась-тыршисьёсыз сярысь сюлмаськемысь ӧз дугды.

13. Мар карыны кылзэ сётэ Иегова, Еврейёслы 13:5 лыдэ басьтыса? (Озьы ик учке суредъёсты.)

¹³ Та учыръёсты лыдэ басьтыса, малпаське: мар луоз, куке зырӟем христианъёс пӧлысь берпуметӥез инме басьтэмын луоз? Библия валэктэ, Иегова аслэсьтыз калыксэ  ноку уз кельты шуыса. (Лыдӟе Еврейёслы 13:5.) Моисей но Илия сямен, Кивалтӥсь кенешысь зырӟем агайёс, кудъёсыз милемлы кивалтэт сёто, туж тыршо мукетъёссэ дышетыны. Дасо аръёс ӵоже Кивалтӥсь кенешысь агайёс мукет ыжъёс пӧлысь пиосмуртъёсты дышето Инмарлэн калыкез сярысь сюлмаськыны. Кылсярысь, соос радъязы пӧртэм школаосты, кудъёсаз дышетско тӧроос, ёросэз чакласьёс, филиалъёслэн комитетъёсысьтызы агайёс, Вефильысь агайёс, миссионеръёс но мукетъёсыз. Кивалтӥсь кенешысь агайёс асьсэос дышето агайёсты, кудъёсыз Кивалтӥсь кенешлэн комитетъёсызлы юрттӥсько. Со юрттӥсьёс али ик ини организациын туж бадӟым ужъёсты быдэсъяло. Соос туж умой дышетэмын Христослэн ыжъёсыз сярысь сюлмаськыны, куке вань зырӟем христианъёс инме басьтэмын луозы.

14. Кыӵе валтӥсь малпанэз та статьялэн?

¹⁴ Тани статьямылэн валтӥсь малпанэз. Куке бадӟым куректонлэн пумыз азьын зырӟем христианъёс пӧлысь берпуметӥез инме басьтэмын луоз, музъем вылысь чылкыт йыбырттон уз быры. Иисус Христослэн кивалтэмез улсын ми азьланяз но Иеговалы ужаломы-тыршомы. Соку ми вылэ урдскоз калыкъёслэн огазеяськонзы — Магог музъемысь Гог. Но со кема уз кыстӥськы но милемлы номыр уродзэ лэсьтыны уз быгаты (Иез. 38:18—20). Ми Иеговалы ужамысь-тыршемысь ум дугдэ. Со милемыз одно ик утёз! Апостол Иоанн адӟиз Христослэсь «туж-туж трос» мукет ыжъёссэ. Солы верамын вал, «та адямиос туж бадӟым курадӟон-куректон пыр потэмын» шуыса (Усьт. 7:9, 14). Озьыен, Иегова милемыз одно ик утёз!

15, 16. Мар карозы зырӟем христианъёс Армагеддон дыръя но малы со милемыз буйгатэ? (Усьтӥськон 17:14).

¹⁵ Но кинлэн ке но таӵе юанэз кылдоз, вылды: «Мар карозы зырӟем христианъёс инме ӝутскемзы бере?» Библия талы валамон валэктон сётэ. Со вера, та дуннеысь кивалтӥсьёс «Ыжпиен ожмаськыны кутскозы» шуыса. Но соос уз ворме. Библиын  гожтэмын: «Ыжпи соосты вормоз». Нош кин солы юрттоз? Со кылбурын ик гожтэмын, Ыжпиен ӵош «Солэн ӧтемъёсыз, быръемъёсыз, оскымон муртъёсыз» луозы шуыса. (Лыдӟе Усьтӥськонэз 17:14.) Кинъёс со? Улӟытэм зырӟем христианъёс. Татысь адӟиське, одӥгез уж, кудӥз инме ӝутскемзы бере соослы нырысь ик сётэмын луоз,— со ожмаськон. Та туж паймымон, малы ке шуоно куд-ог зырӟем христианъёс зэмлыкез тодэмзылэсь азьло адямиосын тупаса ӧз улэ. Куд-огъёсыз ожмаськизы но. Но собере соос зэмос христианъёс луизы но адямиосын тупаса улыны дышетскизы (Гал. 5:22; 2 Фес. 3:16). Соос ожмаськонъёсы ӧз пыриськылэ ни. Нош инмын зырӟем христианъёс Иисусэн но солэн святой кылчинъёсыныз ӵош Инмарлэн тушмонъёсыныз ожмаськозы. Со берпуметӥез ожмаськон луоз.

¹⁶ Малпалэ гинэ! Куд-ог зырӟем христианъёс арлыдоесь но лябесь ини. Нош инме ӝутскемзы бере соос кужмоесь, ноку кулӥсьтэм духъёс луозы. Иисус Христос Эксэен ӵош соос Армагеддон ожын ожмаськозы. Та ож йылпумъяськем бере соос Христосэн ӵош адямиослы юрттозы тырбыдэсэсь луыны. Ӵошатоно ке со дырен, куке соос тырбыдэстэм адямиос вал, инмысен зырӟем христианъёс музъем вылысь яратоно вын-агайёссы но сузэр-апайёссы понна тросгес лэсьтыны быгатозы!

17. Кытысь ми тодӥськомы, Армагеддон дыръя Инмарлэн вань оскымон ужась-тыршисьёсызлы нокин но номыр уродзэ лэсьтыны уз быгаты шуыса?

¹⁷ Нош мар кароно луоз мукет ыжъёслы, куке Армагеддон ож кутскоз? Соослы Иеговалы оскиськоно но солэн курон-косонъёсызлэсь кылзӥськоно луоз. Мар со пӧлы пыре? Библиын таӵе буйгатӥсь кылъёс вань: «Калыке, мын, шутэтскон интыосад пыр но ас бӧрсяд ӧсъёстэ ворса, огдырлы, вожпоттон дыр ортчытозьлы, ватӥськы» (Ис. 26:20). Соку Инмарлэн инмысь но музъем вылысь вань оскымон ужась-тыршисьёсызлы нокин но номыр уродзэ лэсьтыны уз быгаты. Апостол Павел сямен, ми оскиськомы, «Кужымъёс но, туннэ нунал но, вуоноез но... асьмемыз Инмарлэн яратонэзлэсь люкыны уз быгатэ» шуыса (Рим. 8:38, 39). Эн вунэтэ: Иегова тӥледыз яратэ но ноку уз кельты!