1. Майланғанлар асманға қачан чиқиду?

 УЗУН жиллар илгири Худа хизмәтчилирини «Майланғанларниң һәммиси қачан асманға елип кетилиду?»— дегән соал қизиқтурған. Биз илгири Армагедон урушидин кейин бәзи майланған қериндашлар, бәлким, бир мәзгил йәр йүзи җәннәттә яшайду дәп ойлидуқ. Лекин «Күзитиш мунари» 2013-жил, 15-июль санида Армагедон уруши башлиништин бурун техи йәр йүзидә яшаватқан майланғанларниң һәммиси асманға, елип кетилидиғанлиғини билдуқ (Мәт. 24:31).

2. Қандақ соал пәйда болиду вә бу мақалидә қандақ соалларни муһакимә қилимиз?

² Лекин бу йәнә шундақ бир соални оттуриға чиқарған: дәһшәтлик чоң балаю апәттә Йәһваға садиқ хизмәт қиливатқан Мәсиһниң «башқа қойлириға» немә болиду? (Йоһ. 10:16; Мәт. 24:21) Майланған етиқатдашлар асманға чиқип кәткәндә, башқа қойлар немә қиларини билмәй, өзлири ташливетилгәндәк һис қиламду? Бәлким, бүгүнки күндә уларниң арисидики бәзилири шундақ һис қилип әнсирәйду. Бундақ әнсирәшкә Муқәддәс китаптики икки вақиә сәвәп болған болуши мүмкин. Авал шу вәқиәләрни көрүп бақайли вә кейин немә үчүн әнсирәшниң һаҗити йоқлиғиниң сәвәплирини көрүп чиқимиз.

НЕМИЛӘР ЙҮЗ БӘРМӘЙДУ?

3, 4. Бәзиләр немидин әнсирәйду вә немә үчүн?

³ Бәзи қериндашлар, бәлким, Рәһбәрлик кеңәштики майланған етиқатчилар болмиса, башқа қойлар һәқиқәт йолидин чәтнәп кетәрму дәп әнсирәйду. Уларниң бундақ әнсирәп қелишниң сәвәви уларға Муқәддәс китаптики бәзи вақиәләр тәсир қилған болуши мүмкин. Һазир икки мисални көрүп чиқайли. Биринчиси, баш роһаний Йәһоядаһниң вақиәси. У Худаға садиқ хизмәт қилған еди. Йәһоядаһ билән униң аяли Йәһошеба  Йәһоаш исимлиқ кичик балини қоғдап, униң яхши вә садиқ падиша болушиға ярдәм бәргән. Йәһоядаһ һаят чағда, Йәһоаш Йәһва Худаға ибадәт қилип, яхши ишларни қилған. Лекин Йәһоядаһ өлгәндин кейин Йәһоаш яман ишларни қилишни башлиған. У рәзил әмәлдарлириниң сөзигә кирип, Йәһва Худадин үз өргән (Тар. 2-яз. 24:2, 15—19).

⁴ Йәнә бир мисал — иккинчи әсирдики Мәсиһ әгәшкүчилириниң әһвали. Әң узун яшиған әлчи Йоһан техи һаят чағда, у нурғун етиқатчиларниң Йәһваға садақәтмәнлик билән хизмәт қилишни давамлаштурушиға ярдәм бәргән (Йоһ. 3-х. 4). Әйса Мәсиһниң башқа садиқ әлчилири билән бирликтә Йоһан җамаәтни сахта тәлиматларни тарқатқан кишиләрдин қоғдашқа тиришқан (Йоһ. 1-х. 2:18; Сал. 2-х. 2:7). Амма әлчи Йоһан өлгәндин кейин, һәқиқәттин үз өргәнләрниң тәсири ялқунлап көйүватқан оттәк тез тарқилип кәткән. Жиллар өтүп, Мәсиһ әгәшкүчилири җамаити пүтүнләй һәқиқәт йолидин чәтнәп кәткән.

5. Икки вақиәдин қандақ хуласә чиқармаслиғимиз керәк?

⁵ Бу икки вақиә майланғанларниң һәммиси асманға көтирилгәндин кейин, Мәсиһниң башқа қойлири арисидиму шуниңға охшаш вәзийәт болидиғанлиғини билдүрәмду? Уларму Йәһоашқа охшаш тоғра йолдин чәтнәп кетәмду яки иккинчи әсирдә яшиған Мәсиһ әгәшкүчилиригә охшаш һәқиқәттин үз өрәмду? Әлвәттә ундақ болмайду! Шуниңға ишинәләймизки, майланғанларниң һәммиси асманға көтирилгәндә, Йәһва Худа Өз хизмәтчилиригә давамлиқ ғәмхорлуқ қилиду вә улар Йәһваға тоғра усулда ибадәт қилиду. Немә үчүн буниңға ишәнчимиз камил?

ПАК ИБАДӘТ БУЛҒАНМАЙДУ

6. Қандақ үч заман һәққидә қисқичә қарап чиқимиз?

⁶ Немә үчүн алдимиздики қийинчилиқларға қаримастин, пак ибадәт һәргиз булғанмайдиғанлиғиға ишинимиз? Чүнки биз Муқәддәс китаптин өзүмиз яшаватқан бу заман тоғрилиқ немә йезилғанлиғини үгинип келиватимиз. Униңдин башқа, һазирқи күнлиримиз қедимий исраиллар яшиған заман яки иккинчи әсирдики Мәсиһ әгәшкүчилири яшиған замандин көп пәриқлиқ. Ундақта, бирликтә бу үч заманниң әһвалини тәпсилийирәк көрүп бақайли: 1) қедимий исраиллар яшиған заман, 2) әлчиләрниң өлүп кәткәндин кейинки заман вә 3) биз яшаватқан заман, йәни һәммә нәрсә түзитилип, әслигә қайтидиған заман (Әлч. 3:21).

7. Қедимий Исраилдики падишалар яман йолға чүшкәндә, садиқ исраилларниң үмүтини үзмәслиги немә үчүн муһим болған?

⁷ Қедимий исраиллар яшиған заман. Муса пәйғәмбәр өлүп кетиштин бурун Исраил хәлқигә мундақ дегән: «Чүнки мән билимәнки, өлүмимдин кейин силәр бузулуп, мән силәргә вәсийәт қилған йолдин чиқип кетисиләр» (Қ. шәр. 31:29). Муса йәнә уларни агаһландуруп, әгәр улар Худаға асийлиқ қилса, әсирликкә елип кетилидиғанлиғини ейтқан (Қ. шәр. 28:35, 36). Һәқиқәтән шундақ болдиму? Һә-ә. Әсирләрниң өтүши билән исраилларниң көплигән падишалири Йәһва Худаниң көзидә рәзил болған ишларни қилип, хәлиқму уларға әгишип сахта ибадәт қилған. Нәтиҗидә, Йәһва Худа рәзил кишиләрни җазалиған вә Исраил хәлқи арисидин падиша чиқишни тохтатқан (Әзәк. 21:25—27). Амма садиқ исраиллар Худаниң сөзлириниң әмәлгә ашқанлиғини көргәндә, техиму җасарәткә толуп, давамлиқ Йәһваға хизмәт қилған (Йәшая 55:10, 11).

8. Иккинчи әсирдики Мәсиһ әгәшкүчилириниң һәқиқәттин чәтнәп кәткәнлиги немә үчүн һәйран қаларлиқ әмәс? Чүшәндүрүң.

⁸ Әлчиләр өлүп кәткәндин кейинки заман. Иккинчи әсирдики Мәсиһ әгәшкүчилириниң һәқиқәт йолидин чәтнәп кәткәнлиги һәйран қаларлиқ әмәс. Чүнки Әйса Мәсиһ һәқиқәттин үз өридиғанларниң пәйда болидиғанлиғини алдин-ала ейтқан (Мәт. 7:21—23; 13:24—30, 36—43). Әлчи Паул, Петрус вә Йоһан һәммиси Әйсаниң бәшаритиниң милади биринчи  әсирдә әмәлгә ешишқа башлиғанлиғини ейтқан (Сал. 2-х. 2:3, 7; Пет. 2-х. 2:1; Йоһ. 1-х. 2:18). Милади иккинчи әсирдә болса, Әйсаниң әгәшкүчилири арисида ялған тәлиматлар тарқилип, улар һәқиқәттин чәтнәп кәткән. Аста-аста сахта Мәсиһ әгәшкүчилириниң сани көпийип, улар сахта дин империяси дәп аталған Бүйүк Бабилниң асасий тәркиви қисмиға айланған. Шундақ қилип, Әйсаниң бәшарити әмәлгә ашқан.

9. Бизниң заманимиз, қедимий Исраил замани вә биринчи әсирдики Мәсиһ әгәшкүчилириниң замани арисида қандақ пәриқләр бар?

⁹ Һәммә нәрсә түзитилип, әслигә қайтидиған заман. Бизниң заманимиз қедимий исраиллар яшиған замандин вә милади иккинчи әсирдики һәқиқәттин үз өргәнләрниң сахта тәлиматлири кәң тарқалған замандин пәриқлиниду. Бизниң күнлиримиз немә дәп аталған? Бәлким, дәрһал әқлимизгә «ахирқи заман» дегән җавап келиду (Тим. 2-х. 3:1). Бирақ Муқәддәс китап ахирқи заман башланғанда, техиму муһим вә узун бир дәвир башланғанлиғини көрситиду. Бу дәвир давамлишип, Мәсиһниң миңжиллиқ падишалиғи инсанийәтни мукәммәлликкә йәткүзүп, йәр йүзини җәннәткә айландурғанда ахирлишиду. Бу дәвир һәммә нәрсә түзитилип, әслигә қайтидиған заман, дәп атилиду (Әлч. 3:21). У 1914-жили башланди. Шу чағда немиләр әслигә қайтурулған? Әйса асмандики Падишалиқниң Падишаси болған. Шуниң билән, Йәһваға вәкиллик қилидиған вә садақәтмән падиша Давутниң мирасхори болған һөкүмран қайтидин падишалиқ тәхтидә олтарған. Лекин Йәһва Худа пәқәт падишалиқнила әмәс, бәлки көп өтмәй пак ибадәтниму әслигә кәлтүргән (Йәшая 2:2—4; Әзәк. 11:17—20). Буниңдин кейин пак ибадәт қайта булғинамду?

10. а) Заманимиздики пак ибадәт тоғрилиқ Муқәддәс китапта қандақ пәйғәмбәрлик сөзлири йезилған? (Йәшая 54:17) ә) Немә үчүн бу сөзләр кишиниң көңлигә тәсәлли бериду?

¹⁰ Йәшая 54:17ни оқуң. Бүгүнки күндә Муқәддәс роһниң илһами билән йезилған мону пәйғәмбәрлик сөзләр әмәлгә ашмақта: «Саңа қарши, зиян кәлтүрүш үчүн ясалған һәрқандақ қурал аҗиз болиду». Адәмниң көңлигә тәсәлли беридиған төвәндики сөзләрму һазир әмәлгә ешиватиду: «Балилириңниң һәммиси Йәһваниң шагиртлири болиду һәм улардики течлиқ бүйүктур! Сән Һәққанийлиқ билән тәстиқлинисән. . . чүнки сени қорқутидиған һечнәрсә болмайду һәм дәһшәт саңа йеқинлашмайду» (Йәшая 54:13, 14). Һәтта бу «дуния қурулуминиң худаси» Шәйтанму Йәһваниң хәлқи қиливатқан тәлим бериш ишни тохтиталмайду (Кор. 2-х. 4:4). Пак ибадәт әслигә кәлтүрүливатиду вә әнди һәргиз булғанмайду. У мәңгү мәвҗут болиду. Униңға қарши чиқидиған һечқандақ қурал ғәлибә қилалмайду.

 НЕМИЛӘР ЙҮЗ БЕРИДУ?

11. Майланғанлар асманға көтирилгәндә, зор бир топ халайиқниң ташлинип қалмайдиғанлиғини қәйәрдин билимиз?

¹¹ Майланғанлар асманға көтирилгәндин кейин, башқа қойларға немә болиду? Унтумаңки, бизниң Падичимиз — Әйса Мәсиһ. У җамаәтниң беши. Әйсаниң өзи мундақ дегән: «Силәрдә бирла Даһи бар — Мәсиһ» (Мәт. 23:10). Асманда һөкүмранлиқ қиливатқан Падишайимиз өзиниң һәқиқий әгәшкүчилиригә дайим ғәмхорлуқ қилиду. Әйса Мәсиһ өзи бизни башқурғачқа, қорқушимизға һечқандақ сәвәп йоқ. Әлвәттә, биз Мәсиһниң шу вақитта йәр йүзидики хизмәтчилиригә йол-йоруқни қандақ беридиғанлиғи һәққидә һәммә тәпсилатларни билмәймиз. Лекин Муқәддәс китаптики бәзи үзүндиләр бизниң униңға болған ишәнчимизни күчәйтиду.

12. а) Муса пәйғәмбәр вапат болғандин кейин Йәһва Өз хәлқигә қандақ ғәмхорлуқ қилған? ә) Елиша пәйғәмбәр башқа вәзипини тапшурувалғанда, Йәһва Өз хәлқигә қандақ ғәмхорлуқ қилған? (Рәсимгиму қараң.)

¹² Исраил хәлқи Вәдә қилинған зиминға кириштин авал Муса пәйғәмбәр өлүп кәткән. Шу чағда Худаниң хәлқигә немә болған? Бу садиқ кишиниң өлүмидин кейин Исраил хәлқи Худаниң ярдимисиз қалдиму? Яқ! Улар Йәһваға садиқ хизмәт қилған вақитта, У уларға ғәмхорлуқ қилған. Муса өлүштин илгири Йәһва Худа Өз хәлқини йетәкләш ишини Йәшуаға тапшурушни буйриған. Муса аллиқачан Йәшуани көп жиллардин буян үгәткән еди (Чиқ. 33:11; Қ. шәр. 34:9). Буниңдин башқа, миңбеши, йүзбеши, әлликбеши вә һәтта онбеши дегәндәк қабилийәтлик әр кишиләр бар еди (Қ. шәр. 1:15). Билимизки, Йәһва Өз хәлқигә яхши ғәмхорлуқ қилған. Илияс пәйғәмбәрниң заманидиму дәл шундақ болған. У узун жиллар Исраил хәлқиниң Йәһваға тоғра усулда ибадәт қилишиға ярдәм бәргән. Бирақ кейинирәк Йәһва Худа униңға башқа бир вәзипини берип, уни Йәһудаға әвәткән (Пад. 2-яз. 2:1; Тар. 2-яз. 21:12). Шу чағда, он қәбилилик Исраил падишалиғидики садиқ кишиләрни Худа йол-йоруқсиз қалдурғанму? Яқ! Илияс хелә жиллардин буян Елиша пәйғәмбәрни үгитип тәрбийилигән еди. Буниңдин башқа, пәйғәмбәрләрниң оғуллириму бар болуп, уларму тәлим алған (Пад. 2-яз. 2:7). Демәк, Худаниң хәлқигә йетәкчилик қилидиған садиқ әрләр көп болған. Йәһва Өз ирадисини әмәлгә ашурушни давамлаштуруп, садиқ хизмәтчилиригә ғәмхорлуқ қилған.

13. Ибранийларға 13:5тә Йәһваниң қандақ вәдиси йезилған? (Рәсимгиму қараң.)

¹³ Бу икки вәзийәтни ядимизда тутсақ, майланған Мәсиһ әгәшкүчилири асманға көтирилгәндин кейин немә иш йүз бериду, дәп әнсирәшниң сәвәви йоқ. Чүнки Муқәддәс китапта ениқ ейтилғандәк, Йәһва йәр йүзидики  хизмәтчилирини һәргиз ташлап кәтмәйду (Ибранийларға 13:5ни оқуң). Бүгүнки күндә майланған кичик бир топ бурадәрләр бизгә йетәкчилик қиливатиду. Муса вә Илияс пәйғәмбәрләргә охшаш, улар башқиларни үгитишкә бәк әһмийәт бериду. Рәһбәрлик кеңәштики бурадәрләр көп жиллардин бери, башқа қойлар арисидики бурадәрләргә Худа хәлқигә ғәмхорлуқ қилишни үгитип кәлмәктә. Мәсилән, улар ақсақаллар, районға җавапкар ақсақаллар, филиал комитетиниң әзалири вә Бәйтәлдики җавапкар ақсақаллар үчүн һәрхил мәктәпләрни уюштурмақта. Буниңдин башқа, Рәһбәрлик кеңәшниң әзалири һәрхил комитетларда хизмәт қилидиған ярдәмчиләрни шәхсән өзлири үгитип тәрбийиләп келиватиду. Мошу ярдәмчиләр һазирниң өзидә тәшкилаттики нурғун еғир вәзипиләрни садақәтмәнлик билән орунлаватиду. Улар майланғанлар асманға елип кетилгәндин кейин Мәсиһниң қойлириға яхши ғәмхорлуқ қилишқа пухта тәйярланған.

14. Бу муһакиминиң асасий муһим нуқтиси немә?

¹⁴ Демәк, муһакимимизниң әң муһим нуқтиси: дәһшәтлик чоң балаю апәтниң ахирлишишиға аз қалғанда, майланғанларниң қалған әзалиридин әң ахирқиси асманға елип кетилгәндин кейин, йәр йүзидә пак ибадәт йоқ болуп кәтмәйду. Әйса Мәсиһниң рәһбәрлиги астида биз Яратқучи Йәһваға садақәтмәнлик билән хизмәт қиливеримиз. Шу чағда Муқәддәс китапта Магогтин болған Гог дәп аталған дөләтләр иттипақи Худа хәлқигә һуҗум қилиду (Әзәк. 38:18—20). Шундақ болсиму, уларниң һуҗуми бәк қисқа болиду вә ғәлибә қилалмайду. Улар бизниң Йәһваға ибадәт қилишимизға һечқандақ тосалғу болалмайду. Йәһва Худа чоқум Өз хәлқини қутқузиду. Әлчи Йоһан вәһийдә Мәсиһниң башқа қойлири болған «зор бир топ халайиқни» көргән. Пәриштә әлчи Йоһанға бу кишиләр дәһшәтлик чоң балаю апәттин чиққанлиғини ейтқан (Вәһ. 7:9, 14). Демәк, шәк-шүбһисизки Йәһва Худа бизни қутқузуп қалиду!

15, 16. Вәһий 17:14тә майланғанлар Армагедон урушида немә қилиду вә немә үчүн бу бизни илһамландуриду?

¹⁵ Амма бәзиләр шундақ сорайду: «Майланғанлар асманға чиққандин кейин немә қилиду?» Муқәддәс китапта бу соалниң ениқ җавави бар. Муқәддәс китапта бу дуниядики сәйяси һөкүмәтләр «Қозиға қарши җәң қилиду» дәп  йезилған. Әлвәттә, улар мәғлуп болуп, «Қоза ғәлибә қазиниду». Қозиға кимләр ярдәм бериду? Вәһий китавида йезилғандәк, «чақирилғанлар», «талланғанлар» һәм «садиқлар» униңға ярдәм бериду (Вәһий 17:14ни оқуң). Улар кимләр? Улар муқәддәс роһ билән майланған етиқатчилар болуп, дәһшәтлик чоң балаю апәт ахирлишишиға аз қалғанда, уларниң һәммиси асманда җәм болиду. Уларниң туңҗа болуп қилидиған вәзиписи җәңгә қатнишиш. Бу һәқиқәтән әҗайип бир вәзипә! Майланғанларниң бәзилири Йәһва гувачиси болуштин авал күч ишлитип, башқилар билән җедәл-маҗира қилип мәсилини һәл қилған. Йәнә бәзилири һәтта бу дунияда һәрбий хизмәт қилип әскәр болушқан. Лекин кейинчә һәқиқәтни билип, улар течлиқпәрвәр кишиләргә айланған (Гал. 5:22; Сал. 2-х. 3:16). Улар қурал-ярақлирини ташлап, җәңләрни қоллашни тохтатқан. Амма асманға чиққандин кейин, улар Мәсиһ Әйса вә униң муқәддәс пәриштилири билән бирликтә Худаниң дүшмәнлиригә қарши ахирқи җәңгә атлиниду.

¹⁶ Ойлап беқиң, һазир йәрдә яшаватқан бәзи майланған етиқатдашлар яшинип, һалсизлинип қалди. Бирақ улар асманда яшаш үчүн тирилгәндә, күчлүк өлмәйдиған роһий мәвҗудатларға айлиниду. Улар ғәлибә қазанғучи Падиша Әйса Мәсиһ билән мүрини-мүригә тирәп, җәң қилиш үчүн атлиниду. Армагедон урушидин кейин, улар Мәсиһ билән биллә инсанийәтни мукәммәлликкә йетәкләйду. Шәк-шүбһисизки, майланғанлар намукәммәл кишиләр сүпитидә йәр йүзидә болған вақтиға селиштурғанда, улар әнди асманда болғанда, йәр йүзидики әзиз қериндашлири үчүн техиму көп ишларни қилалайду!

17. Армагедон урушида Худаниң һәммә хизмәтчилири қутқузулидиғанлиғини қәйәрдин билимиз?

¹⁷ Сизму башқа қойлар топиға кирәмсиз? Ундақта, Армагедон уруши башланған чағда сиз немә қилишиңиз керәк? Йәһва Худаға тайинип, Униң көрсәтмилиригә бойсунушиңиз керәк. Бу көрсәтмә, бәлким, Муқәддәс китаптики мону буйруқни өз ичигә алиду: «Хәлқим, ичкири бөлмилириңгә кирип, кәйниңдин ишиклириңни япқин. Мениң ғәзивим өтүп кәткичә, бир мәзгил мөкүнүвалғин» (Йәшая 26:20). Шу чағда, Худаниң асмандики вә йәрдики һәммә садиқ хизмәтчилири интайин бехәтәр болиду. Әлчи Паулға охшаш, бизму шуниңға камил ишинимизки, «йә һөкүмәтләр, йә һазирқилар, йә кәлгүсидикиләр. . . Худайимизниң меһир-муһәббитидин айриветәлмәйду» (Рим. 8:38, 39). Шуни әсла унтумаңки, Яратқучи сизни яхши көриду вә сизни һәргиз ташлимайду!