1. Ọke vọ yen Inenikristi ra jẹreyọ ri chekọ vwẹ otọrakpọ na che vwo kpo odjuvwu?

 VWẸ ikpe buebun re wanre, ihwo ri Jihova ki roro, ‘Ọke vọ yen a cha vwọ reyọ Inenikristi ri chekọ ra jẹreyọ na kpo odjuvwu?’ Avwanre rori jovwo nẹ, ọkiọvo evo usun rẹ ihwo ra jẹreyọ na cha dia Iparadaisi vwẹ otọrakpọ na ọmọke siẹrẹ ofovwin rẹ Amagidọn da wan nu. Ẹkẹvuọvo vwẹ Uwevwin Orhẹrẹ ri July 15, 2013, avwanre yonori nẹ Inenikristi ra jẹreyọ na eje ri chekọ vwẹ otọrakpọ na che kpo odjuvwu nu tavwen ofovwin rẹ Amagidọn ke tonphiyọ.​​—Mt 24:31.

2. Onọ vọ yen a sa nọ, kẹ die yen a cha fuẹrẹn vwẹ uyono nana?

² Ẹkẹvuọvo, a sa nọ: Die yen cha phia kẹ “igodẹ efa” ri Kristi re fuevun ga Jihova vwẹ otọrakpọ na vwẹ uvwre rẹ ọke rẹ “ukpokpogho rode” na? (Jọ 10:16; Mt 24:21) Oshọ se mu ihwo evo nonẹna nẹ a cha kpairoro vrẹ ayen siẹrẹ iniọvo eya vẹ eshare ra jẹreyọ na de kpo odjuvwu nu. E jẹ a fuẹrẹn ikuegbe ri Baibol ivẹ re sa nẹrhẹ ayen vwo iroro ọtiọyen. A je cha ta ota kpahen oboresorọ udu vwo jẹ ayen ebro.

DIE YEN CHE JẸ PHIA?

3-4. Die yen ihwo evo se roro, kẹ diesorọ?

³ Evo se roro sẹ igodẹ efa na che she nẹ ukoko na siẹrẹ Ẹko Rọvwẹrote ra vwẹ ẹwẹn ọfuanfon jẹreyọ na rha herọ rọ cha vwẹ odjekẹ phia-a. Ọ sa dianẹ ikuegbe ri Baibol evo yen  nẹrhẹ ayen roro ọtiọyen. E jẹ a ta ota kpahen idje ivẹ. Udje rẹsosuọ shekpahen Orherẹn Rode Jehoiada. Ọyen odibo rẹ Ọghẹnẹ rọ fuevun. Ọ vẹ aye rọyen Jehoshabeat sẹro ri Joash ọke rọ vwọ hẹ ọmọboba je vwẹ ukẹcha kẹ vwọ dia omamọ rẹ ovie rọ fuevun. Joash fuevun kẹ Jihova ọke ri Jehoiada vwọ hẹ akpọ. Ẹkẹvuọvo Jehoiada vwo ghwu nu, Joash da ton umwemwu eruo phiyọ. Ọ kerhọ kẹ emọ rẹ ivie ri ru umwemwu o de chuko ku Jihova.​​—2Ik 24:​2, 15-​19.

⁴ Udje rivẹ yen Inenikristi re diarọ vwẹ ọke rẹ iyinkọn na vwo ghwu nu. Ọyinkọn Jọn rọ dia ọyinkọn rọ koba, vwẹ ukẹcha kẹ Inenikristi buebun vwo chirakon vwẹ ẹga rẹ ayen vwọ kẹ Jihova. (3Jọ 4) Jọn vẹ iyinkọn ri Jesu efa re fuevun je họnre vwọso iyono rẹ efian rẹ ihwo yono vwẹ ọke yena. (1Jọ 2:18) Ẹkẹvuọvo Jọn vwo ghwu nu, iyono rẹ efian da rhe hrabọ nene asan eje kerẹ erhanre rọ ro ogo. Vwẹ ikpe re vwọ kpahọn, Inenikristi de rhi vwobọ vwẹ iruemu ra ghẹmrẹ.

5. Iroro vọ yen a kẹnoma kẹ kpahen ikuegbe ri Baibol ivẹ yena?

⁵ Ikuegbe ri Baibol ivẹ nana djerephia nẹ obo re họhọ ọyena je cha phia kẹ igodẹ efa ri Kristi na ọke rẹ ihwo ra jẹreyọ na de kpo odjuvwu nu? Vwẹ ọke yena, Inenikristi re fuevun vwẹ otọrakpọ na cha kpairoro vrẹ uyono re yono ayen kirobo ri Joash ruru, yẹrẹ vwọso uyota na kirobo rẹ Inenikristi buebun ruru vwẹ uvwre rẹ ọke rẹ iyinkọn na vwo ghwu nu? Ẹjo kakaka. O se mu avwanre ẹro nẹ Inenikristi ra jẹreyọ na de kpo odjuvwu nu, igodẹ efa na cha vwẹ ẹga kẹ Jihova vwẹ idjerhe ro fori, ọ je cha vwẹrote ayen. Die yen sa nẹrhẹ o mu avwanre ẹro?

E CHE GBE ẸGA RẸ UYOTA KU-U

6. Uvwre rẹ ọke erha vọ yen a cha ta ota kpahen kprẹn?

⁶ Die yen sa nẹrhẹ o mu avwanre ẹro nẹ e che gbe ẹga rẹ uyota ku-u, tobọ vwẹ ọke rẹ ekuakua cha vwọ gan vwẹ obaro na? Fikirẹ obo ri Baibol na yono avwanre kpahen ọke rẹ avwanre de yerẹn nonẹna. Ofẹnẹ rode hẹ uvwre rẹ ọke rẹ avwanre de yerẹn nonẹna vẹ ọ rẹ Izrẹl awanre kugbe ọke rẹ iyinkọn na vwo ghwu nu. Ọtiọyena, e jẹ a nabọ frẹkotọ roro kpahen uvwre rẹ ọke erha nana: (1) Ọke rẹ Izrẹl awanre, (2) ọke rẹ iyinkọn na vwo ghwu nu, kugbe (3) ọke rẹ avwanre de yerẹn na rọ dia “ọke rẹ Ọghẹnẹ  . .  che vwo ru erọnvwọn eje phiyọ ọkpokpọ.”​​—Iru 3:21.

7. Vwẹ Izrẹl awanre, diesorọ ihwo re fuevun vwo fiudugberi vwẹ ọke rẹ ẹgborho na kugbe ivie rayen vwo ru obo re brare?

⁷ Ọke rẹ Izrẹl awanre. Tavwen ri Mosis ki ghwu, ọ vuẹ ihwo rẹ Izrẹl nẹ: “Kidie me riẹnre nẹ mi de ghwu nu omuẹro nẹ ovwan che miovwo oma gangan, ovwan da rhẹriẹ nẹ idjerhe re me vuẹ ovwan na.” (Urh 31:29) Mosis ji si ihwo rẹ Izrẹl orhọ nẹ ayen de gbe vwọso, e che mu ayen kpo eviẹn. (Urh 28:​35, 36) Eta nana rugba? E. Vwẹ ikpe buebun, ivie buebun ru obo re chọre ji sun ihwo rẹ Ọghẹnẹ ghwru. Fikirẹ ọnana Jihova de gboja kẹ ihwo umwemwu ọ rha rhọnvwe nẹ ivie rẹ ihworakpọ sun ihwo rọyen ọfa-a. (Izi 21:​25-​27) Ẹkẹvuọvo, ihwo rẹ Izrẹl re fuevun de rhi fiudugberi ọke rẹ ayen vwọ mrẹ nẹ oborẹ Ọghẹnẹ tare rugba.​​—Aiz 55:​10, 11.

8. Ofori nẹ o gbe avwanre unu nẹ e gbe ukoko rẹ Inenikristi ku ọke rẹ iyinkọn na vwo ghwu nu? Djekpahọn.

⁸ Ọke rẹ iyinkọn na vwo ghwu nu. O gbe avwanre unu nẹ e gbe ukoko rẹ Inenikristi ku ọke rẹ iyinkọn na vwo ghwu nu? Ẹjo kakaka. Jesu mraro rọyen phiyotọ jovwo nẹ iyono rẹ efian cha vọn asan eje. (Mt 7:​21-​23; 13:​24-​30, 36-​43) Ọyinkọn Pọl, Pita kugbe Jọn je mrẹvughe nẹ aroẹmrẹ ri Jesu na ton orugba phiyọ vwẹ ọke rayen. (2Tẹ 2:​3, 7; 2Pi 2:1; 1Jọ 2:18) Ọke rẹ iyinkọn na vwo ghwu nu, e de  rhi gbe ukoko rẹ Inenikristi ku. Inenikristi ri yono uyono rẹ efian da rhe vwomaphia ra rien phiyọ Babilọn Rode rọ dia okugbe rẹ ẹga rẹ efian. Vwẹ obọ ọfa, aroẹmrẹ ri Jesu de rugba.

9. Mavọ yen ọke rẹ avwanre de yerẹn na vwọ fẹnẹ ọ rẹ ihwo rẹ Izrẹl awanre kugbe ukoko rẹ Inenikristi vwẹ ọke rẹ iyinkọn na vwo ghwu nu?

⁹ “Ọke rẹ Ọghẹnẹ  . .  che vwo ru erọnvwọn eje phiyọ ọkpokpọ.” Ọke rẹ avwanre de yerẹn enẹna fẹnẹ ọ rẹ Izrẹl awanre kugbe ọke rẹ iyono efian vwọ vwomaphia ọke rẹ iyinkọn na vwo ghwu nu. Die yen e se ọke rẹ avwanre de yerẹn na? Ẹsosuọ e se se “ẹdẹ re koba” rẹ eyeren rẹ umwemwu nana. (2Ti 3:1) Ẹkẹvuọvo, Baibol na djerephia nẹ ọke rọ rho vrẹ ọnana ro ji che krotọ je tonphiyọ vwẹ ọke vuọvo na. Ọ cha dia re te ọke rẹ Usuon ri Mesaya na che vwo ru ihworakpọ phiyọ ihwo re gbare ji ru otọrakpọ na hirhephiyọ iparadaisi. E se ọke nana “ọke rẹ Ọghẹnẹ  . .  che vwo ru erọnvwọn eje phiyọ ọkpokpọ.” (Iru 3:21) Ọ tonphiyọ vwẹ ukpe ri 1914. Die yen phiare vwẹ ọke yena? A vwẹ Jesu vwo mu Ovie vwẹ odjuvwu. Ọtiọyena Jihova rhoma vwẹ ohwo ro che mudia kẹ vwo mu, rọ dia ọriuku rẹ Ovie Devid rọ fuevun. Ẹkẹvuọvo, ọ dia uvie na ọvo yen Jihova rhoma vwo mu-u. Ọyena ghwa vwọ wan nu, Jihova da cha idibo rọyen rehẹ otọrakpọ na uko, rere ayen vwọ rhoma ga vwẹ idjerhe ro shephiyọ! (Aiz 2:​2-4; Izi 11:​17-​20) A cha rhoma gbe ẹga yena ku?

10. (a) Die yen Baibol na mraro rọyen kpahen ẹga rẹ uyota vwẹ ọke rẹ avwanre na? (Aizaya 54:17) (b) Diesorọ aroẹmrẹ tiọyena vwọ vọn vẹ imuẹro?

¹⁰ Se Aizaya 54:17. Roro kpahen aroẹmrẹ nana: “Orọnvwọn re duvwu vwọ so owẹ se yovwi-i”! Eta nana ruẹgba nonẹna. Eta rẹ uchebro nana ji shekpahen ọke rẹ avwanre de yerẹn nonẹna: “Emọ wẹ ejobi kẹ Ọrovwohwo ri yono ayen, erhuvwu rọ emọ wẹ ke cha rho gangan. Vwẹ evunrẹ ọvwata owọ wẹ de muotọ. . . . Kidie wọ gbe djoshọ-ọ vwo nẹ abọ rẹ uguegue; kidie o gbi si kẹre owẹ-ẹ.” (Aiz 54:​13, 14) Eshu rọ dia “ọghẹnẹ rẹ eyeren nana” tobọ vwo ẹgba rọ vwọ dobọ rẹ iruo rẹ uyono rẹ ihwo ri Jihova ruẹ vwẹ akpọ na nonẹna ji-i. (2Kọ 4:4) Ẹga rẹ uyota vwẹ owọ muotọ re, e rhe che se gbe ku ọfa-a. Ọ cha dia bẹdi bẹdẹ. O vwo orọnvwọn vuọvo re duvwun vwọso avwanre ro se yovwi-in!

DIE YEN CHA PHIA?

11. Diesorọ o vwo mu avwanre ẹro nẹ ọke rẹ ihwo ra jẹreyọ na de kpo odjuvwu nu a cha kpairoro vrẹ otu gbidigbidi na-a?

¹¹ Die yen cha phia vwẹ ọke ra da reyọ Inenikristi ra jẹreyọ na kpo odjuvwu nu? Karophiyọ  nẹ Jesu yen Osuigodẹ rẹ avwanre. Ọyen hẹ ọgbuyovwin rẹ ukoko rẹ Inenikristi. Jesu tarọ phephẹn nẹ: “Osun ọvuọvo yen ovwan vwori, Kristi na.” (Mt 23:10) Ovie rẹ avwanre ro suẹn re na che ruiruo rọyen gba. Kidie nẹ Kristi yen suẹn, o rhe vwo emu vuọvo rọ cha nẹrhẹ oshọ mu Inenikristi rehẹ otọrakpọ na-a. Vwọrẹ uyota, avwanre riẹn erọnvwọn eje kpahen obo ri Kristi che sun ihwo rọyen wan vwẹ ọke yena-a. Ọtiọyena, e jẹ a ta ota kpahen idje ri Baibol evo re sa kẹ avwanre imuẹro.

12. Idjerhe vọ yen Jihova vwọ vwẹrote ihwo rọyen (a) ọke ri Mosis vwo ghwu nu? (b) ọke ra vwọ vwẹ iruo ọfa kẹ Ilaija? (Ni uhoho na.)

¹² Mosis ghwu nu tavwen ihwo rẹ Izrẹl ke ro Otọ rẹ Ive na. Die kọyen phia kẹ ihwo rẹ Ọghẹnẹ? Kidie nẹ Mosis rha herọ-ọ, Jihova kọ kpairoro vrẹ ihwo rọyen? Ẹjo. Vwẹ ọke rẹ ayen vwọ fuevun ga Jihova ọ vwẹrote ayen. Tavwen ri Mosis ki ghwu, Jihova vuẹrẹ nẹ o yono Joshua rere o sun ihwo rọyen. Ikpe buebun yen Mosis yono Joshua. (Ey 33:11; Urh 34:9) Vwọba, o ji vwo eshare buebun ri muwan re vwẹrote ihwo rẹ Ọghẹnẹ​—isun rẹ uriorin, ujori, ujuvẹ gbe ihwe, je tobọ te isun rẹ ihwe. (Urh 1:15) A nabọ vwẹrote ihwo rẹ Ọghẹnẹ. Ilaija ji phi oka rẹ udje rọ họhọ ọnana phiyotọ. Ọ wianre gangan vwọ vwẹ ukẹcha kẹ ihwo rẹ Izrẹl vwọ vwẹ ẹga rọ fonro vwọ kẹ Jihova vwẹ ikpe buebun. Ẹkẹvuọvo ọke vwọ yanran na, Jihova da rhoma vwẹ owian ọfa vwọ kẹ vwẹ obọrhen ọnre ri Juda. (2Iv 2:1; 2Ik 21:12) A kpairoro vrẹ uvwiẹ ihwe rẹ ihwo rẹ Izrẹl re fuevun? Ẹjo. Ilaija ghwọrọ ikpe buebun vwo yono Ilaesha. O muẹro nẹ o ji vwo “emọ rẹ emraro na,” re yonori. (2Iv 2:7) Ọtiọyena, o vwo eshare buebun ri muwan re vwẹ ukẹcha phia ayen vwo sun ihwo rẹ Ọghẹnẹ. Ọkieje yen Jihova vwo ru ọhọre rọyen gba, ọ je vwẹrote ihwo re fuevun ga.

13. Eta rẹ imuẹro vọ yehẹ Hibru 13:5b? (Ni uhoho na.)

¹³ Womarẹ idje nana ra ta ota kpahen re na, die yen wo rori nẹ ọ cha phia siẹrẹ a da reyọ Inenikristi ri chekọ ra jẹreyọ na kpo odjuvwu nu? Ofori nẹ udu bru avwanre-e. Baibol na ta ota kpahen uyota ọvo, ro mu avwanre ẹro nẹ: Jihova cha kpairoro vrẹ ihwo rọyen rehẹ otọrakpọ na-a. (Se Hibru 13:5b.) Kerẹ Mosis kugbe Ilaija, ẹmẹko rẹ Inenikristi ra jẹreyọ re vwẹrote nonẹna vwo ẹruọ rẹ obo rọ ghanre te re vwo yono ihwo efa. Vwẹ ikpe buebun rhire na, iniọvo rehẹ Ẹko Rọvwẹrote na yono iniọvo eshare rehẹ usun rẹ igodẹ efa na ayen sa vwọ vwẹrote ihwo rẹ Ọghẹnẹ. Kerẹ udje, ayen vwẹ isikuru vwo mu re de yono  ekpako, iniruo okinriariẹ, iniọvo rehẹ Umẹ Rọvwẹrote Oghọn Ukoko, iniruo rẹ Oghọn Ukoko kugbe efa. Ẹko Rọvwẹrote na yono ihwo re vwẹ ukẹcha phia vwọ kẹ umẹ sansan rehẹ Ẹko Rọvwẹrote na. Iniọvo nana re vwẹ ukẹcha phia na, fuevun ruiruo sansan ra vwọ kẹ ayen enẹna. Ayen nabọ muegbe rẹ ayen vwo ruiruo rẹ ẹroevwote rẹ igodẹ ri Kristi ọkieje.

14. Ọrhọ yen ẹkpo kiriguo rẹ avwanre ta ota kpahan vwẹ uyono nana?

¹⁴ Ẹkpo rẹ ota kiriguo rẹ avwanre ta ota kpahan na kẹ ọna: Ọke ra da reyọ ihwo ra jẹreyọ ri chekọ vwẹ otọrakpọ na kpo odjuvwu vwẹ ọke rẹ ukpokpogho rode na da joma toba re, ihwo rẹ Ọghẹnẹ rehẹ otọrakpọ na je cha rha ga ọkieje. A kpẹvwẹ Jihova vwọ kẹ usuon rẹ ọmọ rọyen Jesu Kristi, kidie womarẹ ọnana ihwo rẹ Ọghẹnẹ rha cha dobọ rẹ ẹga rẹ ayen vwọ kẹ ji-i. Uyota nẹ vwẹ ọke yena avwanre che hirharoku ẹvwọsuọ ri Gọg ri Magọg, rọ dia okugbe rẹ ẹgborho na eje. (Izi 38:​18-​20) Ẹkẹvuọvo, ẹvwọsuọ yena rọ cha vwomaphia na cha dia vwẹ ọmọke; ọ cha dobọ rẹ ihwo rẹ Ọghẹnẹ ji rẹ ayen vwo jẹ Jihova ẹga-a. Aphro herọ-ọ nẹ Jihova che sivwin ihwo rọyen! Vwẹ emramrẹ, ọyinkọn Jọn mrẹ “igodẹ efa” ri Kristi na. A vuẹ Jọn nẹ “otu gbidigbidi” na “nẹ evunrẹ ukpokpogho rode na rhe.” (Ẹvw 7:​9, 14) O muẹro dẹn nẹ a cha sẹro rayen!

15-16. Vwo nene obo rehẹ Ẹvwọphia 17:​14, die yen Inenikristi ra jẹreyọ na che ru vwẹ uvwre rẹ ọke rẹ ofovwin rẹ Amagidọn, kẹ diesorọ ọ vwọ dia obo re vọnre vẹ uduephiophiyawọ?

¹⁵ Dedena, ihwo evo se roro: ‘Kẹ ihwo ra jẹreyọ na vwo? Die yen ayen che ru siẹrẹ ayen de vrẹn nẹ otọrakpọ na nu?’ Baibol na kpahenphiyọ onọ yena phiọgun. O djerephia nẹ isun rẹ akpọ na “che nene Omogodẹ na họnre.” Vwọrẹ uyota, ayen che se phikparobọ-ọ. Ọ je tanẹ: “Omogodẹ na che phi ayen kparobọ.” Kẹ ono yen cha vwẹ ukẹcha kẹ? Ẹkpo ri Baibol na je kpahenphiyọ. Eyen ihwo re “seri,” ra “jẹreyọ,” re je “fuevun.” (Se Ẹvwọphia 17:14.) Amono yen ihwo nana? E yehẹ Inenikristi ra jẹreyọ ra rhọvwọn nushi! Ọtiọyena, a da reyọ ihwo ra jẹreyọ ri chekọ vwẹ otọrakpọ na kpo odjuvwu nu vwẹ  ọke ukpokpogho rode na de kuẹphiyọ re, ọvo usun rẹ iruo rẹsosuọ rẹ ayen che ru yen ayen cha vwọ họnre. Ọnana owian ọghanghanre! Evo usun rẹ Inenikristi ra jẹreyọ na egbofovwin jovwo tavwen ayen ke rhe dia Iseri ri Jihova. Evo tobọ ruiruo rẹ isodje jovwo. Ẹkẹvuọvo ọke vwọ yanran na, ayen da rhe dia Inenikristi rẹ uyota ji yono idjerhe rẹ ufuoma. (Ga 5:22; 2Tẹ 3:16) Ayen gbobọnyẹ kemu kemu ro churobọ si ofovwin. Ẹkẹvuọvo, ayen de kpo odjuvwu nu, ayen vẹ Kristi kugbe emekashe rọyen che kuomakugbe họnre ohọnre rọ koba vwọso ivwighrẹn rẹ Ọghẹnẹ.

¹⁶ Je roro kpahọn vwẹ idjerhe ọtiọna! Inenikristi evo ra jẹreyọ ọke rẹ ayen vwọ hẹ otọrakpọ na kpakore ayen ji vwo ẹgba-a. Ẹkẹvuọvo, ọke ra da rhọnvwọn ayen kpo odjuvwu nu, kẹ ayen che hirhephiyọ emama ri vwo ẹwẹn ri jeghwo ri ji vwo ẹgba ri che kuomagbe Ovie rayen rọ dia Jesu Kristi vwo phi ofovwin. Ofovwin rẹ Amagidọn de vwoba nu, ayen cha vwomaba Jesu Kristi vwọ vwẹ ukẹcha kẹ ihworakpọ vwọ dia ihwo re gbare. Aphro herọ-ọ nẹ, ọke rẹ ayen dahẹ obodjuvwu ayen che dje ẹguọnọ ji ru obo ri yovwirin kẹ iniọvo rayen rehẹ otọrakpọ na vwọ vrẹ ọke rẹ ayen vwọ hẹ otọrakpọ na kerẹ ihwo re gbare-e!

17. Mavọ yen avwanre ru riẹn nẹ emu vuọvo che te idibo rẹ Ọghẹnẹ oma vwẹ ọke rẹ ofovwin rẹ Amagidọn na-a?

¹⁷ Wẹwẹ ọvo usun rẹ igodẹ efa na? Ọ da dia ọtiọyen, die yen ofori nẹ wo ru ọke rẹ ofovwin rẹ Amagidọn da tonphiyọ nu? Ọna yen obo ru wo che ru: Vwẹroso Jihova, wo nene odjekẹ rọyen. Die yen ọyena se churobọ si? Baibol na bru avwanre uche nẹ: “Ro ivun wẹn, re wo bi ẹchẹ gbe oma; Si oma wẹn nu emerha bẹsiẹ rẹ ophu rọye vwo fue.” (Aiz 26:20) Emu vuọvo che te idibo rẹ Ọghẹnẹ re fuevun rehẹ odjuvwu kugbe otọrakpọ na oma vwẹ ọke yena-a. Kerẹ Pọl, o mu avwanre ẹro nẹ “isuon yẹrẹ erọnvwọn re herọ enẹna yẹrẹ erọnvwọn re cha . . . sa hẹriẹ avwanre vwo nẹ ẹguọnọ rẹ” Ọghẹnẹ-ẹ. (Ro 8:​38, 39) Karophiyọ ọkieje nẹ: Jihova vwo ẹguọnọ wẹn, o vwo ọke vuọvo rọ cha vwọ kpairoro vrẹ wẹ-ẹ!