1. Vhakriste vha vhaḓodzwa vha ḓo ya lini ṱaḓulu?

 MIṄWAHANI yo fhiraho, vhathu vha Mudzimu vho vha vha tshi ḓivhudzisa uri: ‘Vhaḓodzwa vha u fhedzisela vha re kha ḽifhasi vha ḓo ya lini ṱaḓulu?’ Ro vha ri tshi humbula uri vhaṅwe vhaḓodzwa vha ḓo sala kha ḽifhasi ḽa Pharadiso lwa tshifhinganyana nga murahu ha nndwa ya Haramagedo. Fhedzi kha thero ya Tshiingamo tsha 15 July 2013, ro guda uri vhaḓodzwa vhoṱhe vhane vha kha ḓi vha kha ḽifhasi vha ḓo ya ṱaḓulu musi nndwa ya Haramagedo i sa athu thoma.​—Mat. 24:31.

2. Ndi mbudziso ifhio ine ya nga takuwa nahone ndi mini zwine ra ḓo zwi haseledza kha ino thero?

² Naho zwo ralo, hu nga takuwa mbudziso ya uri: Hu ḓo itea mini kha vha “dziṅwe nngu” vhane vha ḓo vha vha tshi khou shumela Yehova nga u fhulufhedzea nga tshifhinga tsha “maṱungu mahulu”? (Yoh. 10:16; Mat. 24:21) Vhaṅwe vha nga vhilaela uri vha ḓo pfa vho laṱwa musi vhahavho vha vhaḓodzwa vha tshi ya ṱaḓulu. Kha ri haseledze tsumbo mbili dzi bvaho Maṅwaloni dzine dza nga ita uri vha humbule nga u ralo. Nga murahu ri ḓo haseledza uri ndi ngani ri sa tei u vhilaela.

ZWINE ZWA SA ḒO ITEA

3-4. Vhaṅwe vha nga ḓivhudzisa uri mini nahone ndi ngani?

³ Vhaṅwe vha nga ḓivhudzisa arali vha dziṅwe nngu vha tshi ḓo ṱutshela ngoho musi vhahashu vha vhaḓodzwa vha Tshigwada Tshi Langaho vha si tsheeho u itela u vha ranga phanḓa. Khamusi maṅwe mafhungo a re Bivhilini ndi one ane a nga ita uri vha ḓipfe nga yeneyi nḓila. Kha ri haseledze nga ha tsumbo mbili. Tsumbo ya u thoma ndi ya mafhungo a kwamaho Tshifhe Muhulu Yehoyada. O vha e mushumeli wa Yehova a fhulufhedzeaho. Ene  na mufumakadzi wawe Yehoshabathi vho tsireledza Yehoashi we a vha a tshi kha ḓi vha muṱuku nahone vha mu thusa uri a vhe khosi yavhuḓi ine ya fhulufhedzea. Musi Yehoyada a tshi kha ḓi tshila, Yehoashi o vha mushumeli wa Yehova wavhuḓi. Fhedzi nga murahu ha musi Yehoyada o no lovha, Yehoashi o litsha u shumela Yehova. O thetshelesa vhakololo vhavhi nahone a ṱutshela Yehova.​—2 Koron. 24:2, 15-19.

⁴ Iṅwe tsumbo ndi ya Vhakriste vhe vha tshila nga murahu ha tshifhinga tsha vhaapostola. Muapostola Yohane o vha ene muapostola wa u fhedza nahone o vha na ṱhuṱhuwedzo yavhuḓi kha Vhakriste vhanzhi, a tshi vha thusa u konḓelela musi vha tshi khou bvela phanḓa na u shumela Yehova. (3 Yoh. 4) Ho vha na tshifhinga tshe Yohane na vhaṅwe vhaapostola vha Yesu vha fhulufhedzeaho vha vha vha tshi khou lwisana na vhugunei he ha vha vhu tshi khou phaḓalala. (1 Yoh. 2:18; 2 Vhathes. 2:7) Musi Yohane o no lovha, vhugunei ho phaḓalala sa mulilo wa ḓaka. Hu sa athu fhela na miṅwaha i re mingana, tshivhidzo tsha Vhukriste tsho tshikafhadzwa nga vhugunei.

5. Ndi mini zwine a ro ngo tea u zwi humbula nga nṱhani ha zwenezwi zwiitea zwivhili zwi bvaho Maṅwaloni?

⁵ Naa dzenedzi tsumbo mbili dzi bvaho Maṅwaloni dzi sumbedza uri zwithu zwi fanaho na zwenezwo zwi nga itea kha Vhakriste vha dziṅwe nngu musi vhaḓodzwa vha tshi ya ṱaḓulu? Nga tshenetsho tshifhinga, naa Vhakriste vha fhulufhedzeaho vhane vha ḓo vha vho sala kha ḽifhasi vha ḓo litsha u shumisa zwe vha zwi guda u fana na Yehoashi kana naa vha ḓo shanduka vha vha vhagunei u fana na Vhakriste vhe vha tshila musi vhaapostola vho no lovha? Na luthihi. Ri nga vha na vhungoho ha uri musi vhaḓodzwa vho no ṱuwa vha ya ṱaḓulu, vha dziṅwe nngu vha ḓo bvela phanḓa na u shumela Yehova nga nḓila yo teaho nahone Yehova u ḓo vha ṱhogomela. Ndi ngani ri na vhungoho ha zwenezwo?

VHURABELI HO KUNAHO VHU NGA SI TSHIKAFHADZWE

6. Ndi zwifhinga zwifhio zwiraru zwine ra ḓo haseledza nga hazwo?

⁶ Ndi ngani ri tshi nga vha na vhungoho ha uri vhurabeli ho kunaho a vhu nga ḓo tshikafhadzwa, na nga zwifhinga zwi konḓaho zwine ra ḓo sedzana nazwo? Ndi nga nṱhani ha zwe ra zwi guda Bivhilini nga ha tshifhinga tshine ra khou tshila khatsho. Tshenetshi tshifhinga tsho fhambana na tshifhinga tsha Vhaisiraele vha kale na tshifhinga tsha Vhakriste vhe vha tshila nga murahu ha musi vhaapostola vho no lovha. Kha ri haseledze nga ha zwenezwi zwifhinga zwiraru: Tshifhinga tsha Vhaisiraele vha kale, tshifhinga tsha nga murahu ha musi vhaapostola vho no lovha na “tshifhinga tshine Mudzimu a ḓo vusulusa ngatsho zwithu zwoṱhe.”​—Mish. 3:21.

7. Tshifhingani tsha Vhaisiraele, ndi ngani vhathu vha fhulufhedzeaho vha songo kulea nungo musi mahosi na lushaka vha tshi litsha u shumela Mudzimu?

⁷ Tshifhinga tsha Vhaisiraele vha kale. Musi Mushe a sa athu lovha o vhudza Vhaisiraele uri: “Ndi a zwi ḓivha zwavhuḓi uri musi ndo no fa ni ḓo ita zwithu zwivhi na pambuwa kha nḓila ye nda ni laya yone.” (Dot. 31:29) Mushe o vha sevha uri arali vha shandukela Yehova, lushaka lwavho lwo vha lu tshi ḓo iswa vhuthubwani. (Dot. 28:35, 36) Naa zwe a zwi amba zwo itea? Ee, zwo itea. Lwa miṅwaha ya maḓana khosi nnzhi dzo ita zwi sa takadzi Yehova na u ita uri vhathu vha litshe u mu shumela. Nga nṱhani ha zwenezwo, Yehova o ṱarafa vhathu vha Isiraele na u ita uri mahosi a Isiraele a si tsha vhusa. (Hesek. 21:25-27) Fhedzi Vhaisiraele vha fhulufhedzeaho vho vha na tshivhindi musi vha tshi vhona hu tshi khou itea zwe Ipfi ḽa Mudzimu ḽa amba.​—Yes. 55:10, 11.

8. Naa zwi tea u ri mangadza uri tshivhidzo tsha Vhukriste tsho tshikafhadzwa musi vhaapostola vho no lovha? Ṱalutshedzani.

⁸ Tshifhinga tsha nga murahu ha musi vhaapostola vho no lovha. Naa zwi a mangadza uri  tshivhidzo tsha Vhukriste tsho tshikafhadzwa nga vhugunei musi vhaapostola vho no lovha? Na luthihi. Yesu o vha o dzula o amba uri ho vha hu tshi ḓo vha na vhugunei. (Mat. 7:21-23; 13:24-30, 36-43) Paulo, Petro na Yohane vho khwaṱhisedza uri zwe Yesu a amba zwo vha zwi tshi khou itea tshifhingani tshavho. (2 Vhathes. 2:3, 7; 2 Pet. 2:1; 1 Yoh. 2:18) Musi vhaapostola vho no lovha, tshivhidzo tsha Vhukriste tsho tshikafhadzwa. Vhakriste vha vhagunei vho vha tshipiḓa tsha Babele Ḽihulu ḽine ḽa vha vhurabeli ha mazwifhi ha shango ḽoṱhe. Zwe Yesu a amba zwo vha zwi tshi khou itea.

9. Tshifhinga tshine ra khou tshila khatsho tsho fhambana hani na tshifhinga tsha Vhaisiraele vha kale na tshifhinga tsha musi vhaapostola vho no lovha?

⁹ “Tshifhinga tshine Mudzimu a ḓo vusulusa ngatsho zwithu zwoṱhe.” Tshifhinga tshine ra khou tshila khatsho tsho fhambana na tshifhinga tsha Vhaisiraele vha kale na tshifhinga tsha vhugunei he ha vha hone musi vhaapostola vho no lovha. Tshifhinga tshine ra khou tshila khatsho tshi vhidzwa u pfi mini? Kanzhi ri tshi vhidza uri ndi ‘maḓuvha a vhufhelo’ ha ano maitele mavhi a zwithu. (2 Tim. 3:1) Fhedzi Bivhili i sumbedza uri hu na tshiṅwe tshifhinga tshilapfu tsha ndeme tsho thomaho khathihi na maḓuvha a vhufhelo. Tshenetsho tshifhinga tshi ḓo bvela phanḓa u vhuya u swika Muvhuso wa Messia u tshi ita uri vhathu vha si tsha vha na tshivhi na u shandula ḽifhasi ḽa vha pharadiso. Tshenetshi tshifhinga tshi vhidzwa uri ndi “tshifhinga tshine Mudzimu a ḓo vusulusa ngatsho zwithu zwoṱhe.” (Mish. 3:21) Tsho thoma nga 1914. Ho vha hu tshi khou vusuluswa mini? Yesu o vhewa sa Khosi ngei ṱaḓulu. Yehova o dovha a vha na khosi ine ya mu imela, ane a vha muḽaifa wa khosi i fhulufhedzeaho Davida. Honoho vhuhosi a si hone vhu hoṱhe he Yehova a vhu vusulusa. Yehova o thusa vhagwadameli vhawe vha kha ḽifhasi uri vha dovhe vha mu gwadamele nga nḓila ine a ṱoḓa vha tshi mu gwadamela ngayo. (Yes. 2:2-4; Hesek. 11:17-20) Naa vhurabeli ho kunaho vhu ḓo dovha ha tshikafhadzwa?

10. (a) Ndi mini zwe Bivhili ya amba nga ha vhurabeli ho kunaho tshifhingani tshashu? (Yesaya 54:17) (b) Ndi ngani honoho vhuporofita vhu tshi ri khwaṱhisa?

¹⁰ Vhalani Yesaya 54:17. Humbulani nga ha honoho vhuporofita: “Zwiṱhavhane zwoṱhe zwo itelwaho u lwa na iwe a zwi nga u huvhadzi.” Zwine enea maipfi a amba zwi khou itea ṋamusi. Maipfi a tevhelaho a khuthadzaho a a shuma na tshifhingani tshashu: “Vharwa vhau vhoṱhe vha ḓo funzwa nga Yehova, mulalo wa vharwa vhau u ḓo vha muhulu. U ḓo khwaṱhiswa nga zwivhuya. . . . A u nga ofhi tshithu, zwi ofhisaho zwi ḓo vha kule na iwe.” (Yes. 54:13, 14) Saṱhane “mudzimu wa ḽino shango” ha na maanḓa  a u thivhela mushumo wa u gudisa une vhathu vha Yehova vha khou u ita. (2 Vhakor. 4:4) Vhurabeli ho kunaho ho vusuluswa nahone a vhu nga ḓo dovha ha tshikafhadzwa. Vhu ḓo dzula vhu hone lini na lini. Zwoṱhe zwo itelwaho u lwa na riṋe a zwi nga ri huvhadzi.

HU ḒO ITEA MINI?

11. Ndi mini zwine zwa ri khwaṱhisedza uri vhatevheli vha Yesu vhane vha ḓo vha vho sala kha ḽifhasi a vha nga ḓo laṱwa musi vhaḓodzwa vha tshi ya ṱaḓulu?

¹¹ Hu ḓo itea mini musi vhaḓodzwa vho no ya ṱaḓulu? Humbulani uri Yesu ndi ene Mulisa washu. Ndi ene ṱhoho ya tshivhidzo tsha Vhukriste. Yesu o amba uri: “Murangaphanḓa waṋu ndi muthihi, ndi Kristo.” (Mat. 23:10) Yesu ane a khou vhusa e ṱaḓulu a nga si balelwe u ita mushumo wawe wa u ṱhogomela vhatevheli vhawe vha ngoho. Vhatevheli vha Yesu vha re kha ḽifhasi a vho ngo tea u ofha ngauri Murwa wa Mudzimu ndi ene ane a khou vha ranga phanḓa. Ngoho ndi ya uri a ri ḓivhi zwidodombedzwa zwoṱhe nga vhuḓalo zwa uri Kristo u ḓo ranga hani phanḓa vhathu vhawe nga tshenetsho tshifhinga. Ngauralo, kha ri haseledze dziṅwe tsumbo dzi re Bivhilini dzine dza ḓo ri khwaṱhisedza.

12. Yehova o ṱhogomela hani vhathu vhawe (a) musi Mushe a tshi lovha? (b) musi Elia a tshi ṋewa mushumo muswa? (Sedzani tshifanyiso.)

¹² Mushe o lovha musi Vhaisiraele vha sa athu dzhena shangoni ḽo fhulufhedziswaho. Musi onoyo munna a fhulufhedzeaho o no lovha, ho itea mini kha vhathu vha Mudzimu? Naa vho sala vho hanganea? Na luthihi. Musi vha tshi dzula vha tshi fhulufhedzea, Yehova o bvela phanḓa na u vha ṱhogomela. Musi Mushe a sa athu lovha Yehova o mu vhudza uri a vhee Yoshua uri a range phanḓa vhathu. Mushe o pfumbudza Yoshua lwa miṅwaha minzhi. (Ek. 33:11; Dot. 34:9) Zwiṅwe hafhu, ho vha hu tshi dovha ha vha na vhaṅwe vhanna vhe vha vha vhe na vhukoni vha tshi ranga phanḓa vha zwigidi, vha maḓana na vha fumi. (Dot. 1:15) Vhathu vha Mudzimu vho vha vha tshi khou ṱhogomelwa. Ri wana tsumbo i fanaho na yeneyo kha mafhungo a Elia. O shuma nga maanḓa lwa miṅwaha minzhi u itela u thusa Vhaisiraele uri vha gwadamele Yehova. Fhedzi ho swika tshifhinga tshe Yehova a mu ṋea muṅwe mushumo thungo ya tshipembe ha Yuda. (2 Dzikh. 2:1; 2 Koron. 21:12) Naa vhathu vha fhulufhedzeaho vha tshaka dza fumi dza Isiraele vho sala vho hanganea? Hai. Elia o vha a tshi khou pfumbudza Elisha lwa miṅwaha minzhi. Ho vha hu tshi dovha ha vha na “vharwa vha vhaporofita” vhe na vhone vha pfumbudzwa. (2 Dzikh. 2:7) Ngauralo, ho vha hu na vhanna vhanzhi vhe vha vha vha tshi nga ranga phanḓa vhathu vha Mudzimu. Yehova o bvela phanḓa na  u ita zwine a zwi funa na u ṱhogomela vhatevheli vhawe vha fhulufhedzeaho.

13. Vhahevheru 13:5b i ri khwaṱhisedza mini? (Sedzani tshifanyiso.)

¹³ Ni na dzenedzi tsumbo muhumbuloni, ni humbula uri hu ḓo itea mini musi vhaḓodzwa vha u fhedzisela vha tshi ya ṱaḓulu? A ro ngo tea u vhilaela. Bivhili i dzumbulula ngoho ine ya ri khwaṱhisedza ya uri Yehova ha nga ḓo vhuya a laṱa vhathu vhawe vha kha ḽifhasi. (Vhalani Vhahevheru 13:5b.) U fana na Mushe na Elia, tshigwada tshiṱuku tsha Vhakriste vha vhaḓodzwa vhane vha khou ranga phanḓa ṋamusi vha a pfesesa ndeme ya u pfumbudza vhaṅwe. Vhahashu vha Tshigwada Tshi Langaho vho no fhedza miṅwaha minzhi vha tshi khou pfumbudza vhahashu vha dziṅwe nngu u itela u ranga phanḓa. Sa tsumbo, vho thoma zwikolo zwa u gudisa vhahulwane vha tshivhidzo, vhalavhelesi vhane vha dalela zwivhidzo, miraḓo ya Komiti Ya Davhi, vhalavhelesi vhane vha vha Bethele, vharumiwa na vhaṅwe. Miraḓo ya Tshigwada Tshi Langaho vho gudisa vhathusi vha komiti dzo fhambanaho dza Tshigwada Tshi Langaho nga tsha vhukoma. Vhenevho vhathusi vha khou hwala vhuḓifhinduleli vhuhulwane ndanguloni nga u fhulufhedzea. Vho dzula vho lugela u bvela phanḓa na u ita mushumo wa u ṱhogomela nngu dza Kristo.

14. Ndi ifhio mbuno khulwane ya enea mafhungo?

¹⁴ Mbuno khulwane ya haya mafhungo ndi uri: Musi vhaḓodzwa vha u fhedzisela vha tshi ya ṱaḓulu maṱungu mahulu a tsini na u fhela, vhurabeli ho kunaho vhu ḓo bvela phanḓa fhano kha ḽifhasi. Nga fhasi ha vhurangaphanḓa ha Yesu Kristo, vhashumeli vha Mudzimu a vha nga ḓo xelelwa nga tshithu. Ri a zwi ḓivha uri nga tshenetsho tshifhinga, tshigwada tsha dzitshaka tshine Bivhili ya tshi vhidza Gogo kha ḽa Magogo tshi ḓo ṱhasela vhathu vha Mudzimu. (Hesek. 38:18-20) Honoho u ṱhaselwa ha tshifhinganyana a hu nga shumi, a zwi nga thivheli vhathu vha Mudzimu u bvela phanḓa na u mu gwadamela. Yehova u ḓo vha tshidza. Kha bono muapostola Yohane o vhona “gogo ḽihulu,” ḽine ḽa vha Vhakriste vha dziṅwe nngu. O vhudzwa uri ḽeneḽi “gogo ḽihulu” ndi vho bvaho “maṱunguni mahulu.” (Nzumb. 7:9, 14) Nga zwenezwo, ri na vhungoho ha uri Yehova u ḓo vha tsireledza.

15-16. U ya nga Nzumbululo 17:14 ndi mini zwine Vhakriste vho ḓodzwaho vha ḓo zwi ita nga tshifhinga tsha nndwa ya Haramagedo nahone ndi ngani zwi tshi ṱuṱuwedza?

 ¹⁵ Vhaṅwe vha nga ḓivhudzisa uri: ‘Vhaḓodzwa vha ḓo vha vha tshi khou ita mini musi vha tshi swika ṱaḓulu?’ Bivhili i a ri ṋea Phindulo yaṋu yo livhaho ya yeneyi mbudziso. I bvisela khagala uri mivhuso ya ḽino shango i “ḓo lwa na Ngwana.” Zwi tou pfala uri yeneyo mivhuso i ḓo kundwa. Ri vhala uri: ‘Ngwana i ḓo kunda.’ Ndi nnyi ane a ḓo thusa Ngwana? Luṅwalo lu a fhindula, lu ri ndi “vho vhidzwaho, vho nangwaho na vha fhulufhedzeaho.” (Vhalani Nzumbululo 17:14.) Ndi vhonnyi vhenevha? Ndi vhaḓodzwa vho vuswaho. Musi vhaḓodzwa vha u fhedzisela vho no iswa ṱaḓulu maṱungu mahulu a tsini na u fhela, muṅwe wa mishumo yavho ya u thoma u ḓo vha u lwa. Ndi mushumo wavhuḓi lungafhani wonoyo. Vhaṅwe vha Vhakriste vho ḓodzwaho vho vha vhe maswole musi vha sa athu vha Vhakriste. Vhaṅwe vho vha vha tshi shuma kha mmbi dza ḽino shango. Fhedzi nga murahu vho vha Vhakriste vha ngoho vha guda u tshila nga mulalo na vhaṅwe. (Vhagal. 5:22; 2 Vhathes. 3:16) Vho litsha u tikedza dzinndwa. Naho zwo ralo, musi vho no vha ṱaḓulu vha ḓo shuma na Kristo na vharuṅwa u lwa nndwa ya u fhedza na maswina a Mudzimu.

¹⁶ Humbulani nga hazwo. Vhaṅwe Vhakriste vha vhaḓodzwa vha re hone kha ḽifhasi vho no vha vhalala, a vha tshe na nungo. Fhedzi musi vha tshi vuswa uri vha ye u tshila ṱaḓulu vha ḓo vha vhe zwivhumbiwa zwa muya zwi re na maanḓa, vha ḓo ṋewa mushumo wa uri vha ye u tikedza Muhali na Khosi yavho Yesu Kristo nndwani. Nga murahu ha nndwa ya Haramagedo vha ḓo shuma na Yesu u thusa vhathu uri vha si tsha vha na tshivhi. A zwi timatimisi uri musi vhe ṱaḓulu vha ḓo itela vhahavho vha funwaho vha re kha ḽifhasi zwithu zwinzhi zwavhuḓi, zwi fhiraho zwe vha vha vha tshi kona u zwi ita musi vha tshi kha ḓi vha kha ḽifhasi.

17. Ndi mini zwine zwa ita uri ri vhe na vhungoho ha uri vhashumeli vha Yehova vha ḓo vha vho tsireledzea nga tshifhinga tsha nndwa ya Haramagedo?

¹⁷ Naa ni muṅwe wa vha dziṅwe nngu? Arali zwo ralo, ndi mini zwine na ḓo tea u zwi ita musi nndwa ya Haramagedo i tshi thoma? Phindulo yaṋu yo leluwaho kheyi: Ndi u fhulufhela Yehova na u tevhela vhulivhisi hawe. Zwenezwo zwi nga katela mini? Bivhili i a ri khuthadza nga u amba uri: “Ni dzhene kamarani dzaṋu dza nga ngomu-ngomu, ni vale miṋango. Ni dzumbame lwa tshifhinganyana u swika mbiti dzi tshi dzika.” (Yes. 26:20) Vhashumeli vha Yehova vhoṱhe vha re ṱaḓulu na kha ḽifhasi vha ḓo vha vho tsireledzea nga tshenetsho tshifhinga. U fana na muapostola Paulo ri na vhungoho ha uri ‘mivhuso, zwithu zwa zwino na zwa tshifhinga tshi ḓaho zwi nga si ite uri Mudzimu a si ri fune.’ (Vharoma 8:38, 39) Ni dzule ni tshi humbula uri Yehova u a ni funa na uri a nga si vhuye a ni laṱa.