1. Makristau ootheene oothanliwa, anrowa silini wiirimu?

 IYAAKHA sivinre, arumeyi a Yehova yaaniikoha so: ‘Ankhi makristau ale oothanliwa nlelo ari valaponi, anrowa silini wiirimu?’ Khalai, nuupuwela wiira nuumala ekhotto ya Armagedoni, makristau ootheene oothanliwa yaarowa okhalaka mparayiisu valaponi mwa okathi vakhaani. Masi, Erevista ya Owehaweha ya 15 a Julho 2013, nihiixutta wiira ehinatthi opacerya ekhotto ya Armagedoni, makristau ootheene 144.000, anrowa wiiraka ari ene wiirimu. — Math. 24:31.

2. Nikoho xeeni woonasa wene nikhanle ookhumelela, ni exeeni ninrowa ahu othokorerya mwaha ola?

² Masi akina a hiyo, pooti wiikoha so: Exeeni enrowa wiiraneya ni “ipwittipwitthi sikina” sa Kristu, sinrowa omurumeelaka Yehova moororomeleya valaponi-va, okathi wa “maxakha maalupale”? (Yoh. 10:16; Math. 24:21) Ipwittipwitthi sikina, woonasa wene pooti oxankiheyaka mwaha woohisuwela etthu yoopaka, aahiiso ohikhalana mutthu onrowa waakhaliheryaka nuumala anna ni arokora ootheene oothanliwa orowa wiirimu. Awo pooti wuupuwelaka siiso, mwaha wa soowiiraneya piili siniromoliwa mbiibiliyani. Mwaha ola, nnoothokorerya soowiiraneya iyo ni nnimwiixutta etthu enrowa onikhaliherya ohixankiheya.

EXEENI EHINROWA WIIRANEYA?

3-4. Etthu xeeni atthu akina akhanle aya oowuupuwelaka, ni mwaha wa xeeni?

³ Atthu akina pooti wuupuwelaka wiira, ale a ipwittipwitthi sikina anoohiya omurumeela Yehova, okathi ahinrowa aya okhala anna oothanliwa a Nikhuuru Noolamulela wiira yaavaheke malakiheryo. Woonasa wene, awo pooti wuupuwelaka siiso, mwaha wa soowiiraneya sikina siniromoliwa mbiibiliyani. Nrowe nithokorerye matakiheryo manli. Ntakiheryo noopacerya, niiraneyale ni Namukuttho Yehoyada. Yena aari murumeyi oororomeleya a Muluku.  Owo ni amwaarawe Yehoxabathi, yaahimukhapelela mmiravo mmosa iitthaniwa Yowasi, ni yaahimukhaliherya okhala mwene ooloka ni oororomeleya. Okathi Yehoyada aari awe mukumi, Yowasi aanimurumeela Yehova moororomeleya ni aanipaka itthu sooloka. Masi nuumala Yehoyada okhwa, Yowasi aahipacerya opaka itthu soohiloka. Owo aahitthara miruku sa makhulupale ootakhala ni aahihiya omurumeela Yehova. — 2 Wah. 24:2, 15-19.

⁴ Ntakiheryo nikina, ti na makristau yaakhala nuumala arummwa okhwa. Murummwa Yohani, taakisenrye okhwa. Okathi aari awe mukumi, owo aahaakhaliherya makristau manceene ohihiya ororomeleya wa Yehova. (3 Yoh. 4) Ntoko arummwa akina a Yesu yaapanke aya, Yohani aahipaka sootheene aawerya awe, wiira akhapelele miloko voohimya sa itthu soowoothiwa sahaareere wuulaana. (1 Yoh. 2:18; 2 aTes. 2:7) Masi nuumala murummwa Yohani okhwa, yaahikhumelela anamavirikanya anceene mmulokoni. Iyaakha saattharelana, anamavirikanya awo, yaaniixuttiha itthu sinceene soowoothiwa, nave yaaneemererya mweettelo woohiloka mmulokoni.

5. Moovarihana ni soowiiraneya iya piili siniromoliwa mbiibiliyani, exeeni nihinreerela ahu wuupuwelelaka?

⁵ Soowiiraneya iya piili siniromoliwa mbiibiliyani, niireke siniphavela ohimya wiira enrowa wiiraneya etthu emosa-ru ni ipwittipwitthi sa Kristu, nuumala makristau ootheene oothanliwa orowa wiirimu? Niireke makristau oororomeleya ari valaponi anoopaceryaka opaka itthu soohiloka, ntoko Yowasi? Aahiiso niireke anrowa okhala anamavirikanya, ntoko atthu anceene yaapanke aya nuumala arummwa okhwa? Khahiyo ti yeeyo! Nihaana okupali wiira okathi makristau ootheene oothanliwa anrowa aya wiiraka ari ene wiirimu, ipwittipwitthi sikina khasinrowa ohiya omurumeela Yehova mwa enamuna yooloka, nave yena khonrowa ohiya waakhapelela. Xeeni ninreerela ahu okupali eyo?

ARUMEYI A YEHOVA KHANROWA OHIYA OMUKOKHORELA NTOKO ONIPHAVELA AWE

6. Okathi xeeni miraru ninrowa ahu wiiwexexe?

⁶ Xeeni ninreerela ahu okupali wiira arumeyi a Yehova, khanrowa ohiya omukokhorela mwa enamuna yooloka, hata okathi wooxankiha onrowa oniphwanya muhoolo? Ntoko niixuntte ahu mbiibiliyani, mwaha woowi okathi ninkhala ahu ti woovirikana ni okathi wa aisarayeli a khalai ni ti woovirikana ni okathi nuumala arummwa okhwa. Vano nrowe niiwexexe oratteene okathi miraru: (1) Okathi wa aisarayeli a khalai, (2) okathi nuumala arummwa okhwa ni (3) “okathi itthu sotheene sinrowa aya okhalihiwa isya”. — Mit. 3:21.

7. Xeeni aisarayeli akina oororomeleya yahaahiyale aya omurumeela Yehova?

⁷ Okathi wa aisarayeli a khalai. Okathi vakhaani ohinatthi okhwa, Moise aahaaleela aisarayeli ohimyaka so: “Tthiri miyo kosuwela wira, kakhwa vale, nyuwo munrowa ohononeya, muhiyaka ephiro yorumalyakani”. (Otum. 31:29) Nave Moise aahaalopola aisarayeli, wiira yaamukuxiwa aroihiwaka elapo ahinsuwela aya, vakhala wiira yaamuhiya weettela iphiro sa Yehova. (Otum. 28:35, 36) Niireke moolumo awo ahiiraneya? Aayo. Mwa iyaakha sinceene, mamwene manceene yaahithanla ohiya omwiiwelela Yehova ni owiiriha arumeyi awe, waakokhorelaka amuluku eethiru. Mwaha waivaavo, Yehova aahaakhootta atthu ale oohiiwelela, nave khaamweemerenrye hata mwene mmosa waalamulela atthu awe. (Ezek. 21:25-27) Masi aisarayeli akina, nuumala oweha masu ale a Yehova yiiraneyaka, awo yaahilakela ohihiya omurumeela Yehova moororomeleya. — Yes. 55:10, 11.

8. Niireke nihaana otikinihiwa ni miloko iye sa makristau saakhanle anamavirikanya, nuumala arummwa okhwa? Mutthokiherye.

⁸ Okathi nuumala arummwa okhwa. Niireke nihaana otikinihiwa ni miloko iye sa makristau saakhanle anamavirikanya, nuumala arummwa okhwa? Nnaari. Okhala wiira Yesu aahihimya  wiira itthu iyo saamwiiraneya. (Math. 7:21-23; 13:24-30, 36-43) Murummwa Paulo, Pedru ni Yohani yaahihimya wiira iprofesia sa Yesu, saahipacerya wiiraneya okathi ole yaakhala aya. (2 aTes. 2:3, 7; 2 Ped. 2:1; 1 Yoh. 2:18) Okathi vakhaani nuumala murummwa ookiserya okhwa, miloko sa ekristau saahikhumelela anamavirikanya, nave atthu akina yaahipacerya wiirela mpantta Babilonia Muulupale, eyo piiyo, itiini sootheene soowootha. Nave-tho, yaahiiraneya etthu ekina Yesu aahimmya awe.

9. Xeeni okathi ahu orya aya woovirikana ni okathi wa aisarayeli a khalai ni okathi nuumala arummwa okhwa?

⁹ “Okathi itthu sotheene sinrowa aya okhalihiwa isya”. Okathi ahu, ti woovirikana vanceene ni okathi wa aisarayeli a khalai, ni okathi wa makristau yaapakeyale anamavirikanya nuumala arummwa okhwa. Vano okathi ahu oniitthaniwa sai? Hiyo, ninniitthana okathi owo okhala “mahiku ookiserya” a olumwenku ola wootakhala. (2 Tim. 3:1) Biibiliya onnooniherya wiira okathi yoowo, yaarowa aya opacerya mahiku ookiserya, nave wampacerya okathi orina efaita yuulupale ni wanviriha mahiku manceene. Okathi owo onrowa ovikanihaka mpakha Omwene wa Mesiya okhaliha itthu sootheene isya, waakhaliha apinaatamu oohittheka ni wiiriha elapo okhala eparayiisu. Nave onnisuweliwa okhala “okathi itthu sotheene sinrowa aya okhalihiwa isya”. (Mit. 3:21) Okathi owo opacenrye mwaakha wa 1914. Masi exeeni elokiheriwe? Okhala wiira, Yesu oopacerya Olamulela wiirimu. Eyo enooniherya wiira Yehova, oomuthanla mwene musya, yoowo onikhuma nloko na Mwene Davidi. Masi Yehova khahiyo olokihenrye omwene yoowo paahi. Nuuvira okathi vakhaani, waahipacerya olokiheriwa okokhorela weekeekhai! (Yes. 2:2-4; Ezek. 11:17-20) Niireke okokhorela weekeekhai onootthikela-tho ohononiwa?

10. a) Biibiliya onihimya exeeni sa okokhorela weekeekhai mahiku ala? (Yesaya 54:17) b) Xeeni eprofesia eri Yesaya 54:13, 14, eri aya yoomaaliha?

¹⁰ Mmusome Yesaya 54:17. Nkuupuwelelani eprofesia ela eni: “Iyuma sothene sipakeliwe wolupatthani khasirina-tho muteko”! Moolumo ala anniiraneya olelo-va.Nave, moolumo ari Yesaya 54:13, 14, olelo-va anninlipiha ni onimaaliha ahimyaka so: “Atthu anyu othene anrowa okhala awixutti aka: animwetta ni murettele mulupale. Munrowa olipihiwa n’ihakhi n’ixariya: owanawana wothene onimomalelani, khivo-tho enrowa owopopihani. . . . Khivo-tho enkelanyu wova”. Hata Satana, “muluku a olumwenku ola”, khonrowa owerya omala-maliha muteko onivariwa wa owiixuttiha atthu voohimya sa Yehova. (2 aKor. 4:4) Okokhorela weekeekhai woolokiheriwa ni khonrowa-tho ohononiwa ni itiini soowootha. Okokhorela iwo weekeekhai onrowa  okhalaka wa mahiku ootheene. Khuuvo kapwitthi onrowa owerya waamalamaliha atthu a Yehova!

EXEENI ENROWA WIIRANEYA?

11. Exeeni ennikupaliha wiira awiixutti a Yesu khanrowa onyanyaliwa nuumala makristau oothanliwa orowa wiirimu?

¹¹ Exeeni enrowa wiiraneya nuumala makristau oothanliwa orowa wiirimu? Muhiliyale wiira Yesu tori Makampusi ahu. Owo muhooleli a miloko sa ekristau. Yesu aahooniherya eyo okathi aahimmye awe so: “Muhooleli anyu ori mmosa, Kristu”. (Math. 23:10) Mwene ahu owo oopacerya olamulela wiirimu, nave khula okathi khonrowa ohiya waakhapelela awiixutti awe. Okhala wiira ninlamuleliwa ni Kristu, awiixutti awe ootheene valaponi-va khiivo etthu anrowa aya woovaka. Ekeekhai wiira khaninsuwela saana moota Yesu onrowa awe oweettihaka atthu awe, waphiya okathi owo. Vano nrowe nithokorerye matakiheryo vakhaani a mbiibiliyani anrowa onimaaliha.

12. Yehova aakhapelenle sai arumeyi awe nuumala a) Moise okhwa? b) onvaha Eliya yoothanleliwa esya? (Nwehe eteseenyo.)

¹² Moise aakhwiiye ahinatthi aisarayeli okela elapo yooleiheriwa. Vano exeeni yaawiiranenle? Niireke awo yaahixanka mwaha woowi khiyaakhaliheriwa ni Moise? Nnaari. Vakhala wiira khiyaarowa ohiyaka okhala oororomeleya wa Yehova, owo aamwaakhapelelaka. Ohinatthi Moise okhwa, Yehova aahihimya wiira ammuthanla Yoxuwa wiira okhale mwene aisarayeli. Nto Moise aahimwiixuttiha Yoxuwa mwa iyaakha sinceene. (Okhum. 33:11; Otum. 34:9) Ohiya-vo, alopwana anceene yaahiilokiherya wiira aweettiheke aisarayeli, awo yaarowa okhala ahooleli a atthu 1.000, a atthu 100, a atthu 50 ni ahooleli a atthu 10. (Otum. 1:15) Mareheryo awo, annooniherya wiira atthu a Muluku yaanikhapeleliwa saana. Ntakiheryo nikina nirina ahu, ti na Eliya. Mwa iyaakha sinceene, owo aanaakhaliherya aisarayeli ohihiya okokhorela weekeekhai. Masi nuuvira okathi, Yehova aahinvaha yoothanleliwa ekina Eliya, wiira arumeeleke mpantta mukina wa oYuda. (2 Mam. 2:1; 2 Wah. 21:12) Niireke aisarayeli oororomeleya a maloko 10 yaaniixoona okhala onyanyaliwa? Nnaari. Okhala wiira Eliya aahimwiixuttiha Eliseyo mwa iyaakha sinceene. Nave yaahikhala “anamwane a maprofeta” yaawo yaatthokihiwe mwa ikrupu soovirikana ni yiixuttihiwe. (2 Mam. 2:7) Eyo enooniherya wiira, yaahikhala alopwana anceene oororomeleya ni yaari oolikana ene, wiira yaahooleleke arumeyi a Yehova. Yena khaahiyale omaleliha etthu aaphavela awe ni aanaakhapelela saana arumeyi awe.

13. Exeeni Yehova onnileiherya awe eri aHeeberi 13:5? (Nwehe efootu.)

¹³ Nuumala othokorerya matakiheryo ala, exeeni munuupuwela anyu ni etthu enrowa  wiiraneya nuumala ole ookiserya wa ale oothanliwa, orowa wiirimu? Nto khivaniprisari oxankiheya vanceene. Mbiibiliyani, aakhala moolumo oolipiha annikhaliherya okhala oomaaleleya. Yaawo ani: Yehova khonikhala-khala aanyanyalaka arumeyi awe. (Mmusome aHeeberi 13:5.) Olelo-va, yookhala ekurupu yaamukhaani yoothanliwa anaahoolela arumeyi a Muluku, eyo piiyo, Nikhuuru Noolamulela. Ntoko Moise ni Eliya, makristau awo a ekurupu yaamukhaani, anniwiixuttiha alopwana a ipwittipwitthi sikina wiira yaakhaliheryeke ni waakhapelela arumeyi a Muluku. Mwa ntakiheryo, anna awo a Nikhuuru Noolamulela, annilokiherya eskola wiira awiixuttiheke axitokweene a mmulokoni ni a esirkwiitu, anna a eKomisau ya eFiliyaali, anna anihoolela oBeteli ni anna akina. Nave awo, anniivahererya wiira ewiixuttihe anamakhaliherya a ikomisau sa Nikhuuru Noolamulela. Anamakhaliherya awo, aakhalana miritti sinceene nenna-va ni ari oolikana ene ovara muteko wa okhapelela ipwittipwitthi sa Kristu.

14. Yoosoma ela exeeni niixuntte ahu?

¹⁴ Mpakha-va, yoosoma ela yooniixuttiha wiira nuumala makristau ootheene oothanliwa orowa wiirimu, yaattamelaka maxakha maalupale, arumeyi a Yehova khanrowa ohiya omurumeela yena moororomeleya. Nikhaliheriwaka ni muhooleli ahu Yesu Kristu, khaninrowa ohiya omukokhorela Yehova. Ekeekhai wiira okathi owo, nnoorowa otupheliwa ni Gogi ni Magogi, eyo piiyo, wiiraana wa maloko. (Ezek. 38:18-20) Masi otupheliwa iwo onrowa okhala mwa okathi vakhaani, nave khonrowa okhumela saana. Khonrowa owiiriha arumeyi a Yehova ohiya omurumeela. Moohaanyiherya, Yehova onoorowa onoopola! Murummwa Yohani, aahoonihiwa atthu a “muttitthi muulupale” a ipwittipwitthi sikina sa Kristu. Nuumala-vo, Yohani aahisuwela wiira “muttitthi muulupale” ti yoowo waakhumme mmaxakhani maalupale. (Wiis. 7:9, 14) Tthiri moohaanyiherya Yehova onoorowa onoopola!

15-16. Moovarihana ni Wiisuupulula 17:14, exeeni makristau oothanliwa anrowa aya opakaka okathi wa ekhotto ya Armagedoni? Nto xeeni osuwela eyo ennilipiha aya?

¹⁵ Hata vari siiso, atthu akina pooti wiikoha so: ‘Exeeni enrowa owiiraneela ale oothanliwa? Exeeni anrowa aya opakaka nuumala ophiya wiirimu?’ Biibiliya onnaakhula oratteene makoho ala. Owo onnitthokiherya wiira makhulupale a olumwenku  ola, “anrowa owana ni Mwaapwittipwitthi”. Ekeekhai wiira awo anooxinttiwa, maana Biibiliya onihimya wiira Mwaapwittipwitthi owo, “onrowa waaxintta”. Masi tani anrowa omukhaliherya Yesu? Biibiliya onnaakhula nikoho nna. Owo onihimya so: “Ale yiihaniwe ni athanliwe ni oororomeleya”. (Mmusome Wiisuupulula 17:14.) Masi anihimmwa tani? Anihimmwa makristau oothanliwa akhwiiye ni ahihimuxiwe! Akhala wiira ole ookiserya wa ale oothanliwa onoorowa wiirimu, waattamela wanikisa wa maxakha maalupale, muteko woopacerya anrowa aya waakhela, ori omukhaliherya Yesu owana ekhotto wiira aaxintte awanani awe. Tthiri ola onrowa okhala muteko muulupale athanleliwa aya! Woonasa wene, anna akina oothanliwa ahinatthi okhala Anamoona a Yehova, yaahilimalela owana ekhotto ni atthu akina. Pooti wiira akina, yaaniirela mpantta ekurupu ya atoropa. Masi nuuvira okathi awo yaahikhala makristau eekeekhai, ni yaahiixutta okhala atthu a murettele. (aGal. 5:22; 2 aTes. 3:16) Awo aahiya okhaliherya ikhotto. Masi nuumala orowa wiirimu, awo anrowa okhala vamosa ni Yesu ni malaikha, awanaka ekhotto yookiserya wiira yaaxintte awanani a Muluku.

¹⁶ Nkuupuwelani ela! Olelo-va makristau oothanliwa ari valaponi, toowuuluvala ni kharina ikuru sinceene. Masi okathi anrowa aya ohihimuxiwa wiira yakhaleke wiirimu, awo anrowa okhala soopattuxiwa sa omunepani, sihinikhwa ni sirina owerya. Nave awo anrowa owana Ekhotto amukhaliheryaka Mwene Muulupale, Yesu Kristu. Nuumala ekhotto ya Armagedoni, awo anrowa ovaraka hoothe ni Yesu yaakhaliheryaka apinaatamu ootheene okhala oohittheka. Moohaanyiherya, okathi anrowa aya okhalaka wiirimu, anoowerya waapakela itthu sinceene anna ni arokora seiyo yahaawerya aya opaka ari ene valaponi ntoko atthu oottheka!

17. Ninsuwela sai wiira arumeyi ootheene anrowa okhala oovareleleya okathi wa ekhotto ya Armagedoni?

¹⁷ Niireke nyuwo muniirela mpantta ipwittipwitthi sikina? Nto exeeni nyuwo mukhanle anyu oopaka yapacerya ekhotto ya Armagedoni? Etthu mukhanle anyu oopaka tiila: Mmuroromeleke Yehova ni mutthareke malakiheryo awe. Eyo enihela muhina exeeni? Biibiliya onitthokiherya so: “Nyuwo atthu a nloko naka, mutthikele owannyu: mwiwaleleke mpa mwinyu, mulipihe masele. Mwipitheke okathi vakhani, mpakha ovira oviruwa w’Apwiya”. (Yes. 26:20) Eyo enitaphulela wiira arumeyi ootheene oororomeleya a Yehova, ekhale wiirimu aahiiso valaponi-va, anrowa okhala oovareleleya okathi wa ekhotto ya Armagedoni. Ntoko murummwa Paulo olempe awe, ninnikupali wiira khiivo etthu nnakhala ‘ikuvernu, aahiiso itthu sikhanle vano wala itthu sinrowa okhumelela muhoolo . . . sinrowa owerya onivalaanya ni ophenta wa Muluku’. (aRom. 8:38, 39) Nto muhiliyale ela: Yehova onnoophentani vanceene nave khonikhala-khala oonyanyalakani!