1. Tiyettidaageeti ubbay saluwa baanay awudee?

 DARO layttaappe kase, Yihoowa asati, ‘Tiyettida Kiristtaanetuppe wurssettaageeti saluwa baanay awudee?’ yaagidi oychchidosona. Tiyettidaageetuppe amaridaageeti Armmageedoona olaappe simmin, amarida wodiyawu Gannate saˈan deˈennan aggokkona giidi kase qoppida. Shin saˈan deˈiya tiyettidaageeti ubbay Armmageedoona olay doommanaappe kase saluwa baanaagaa Isiine 15, 2013, Wochchiyo Keelan tamaarida.—Mat. 24:31.

2. Nuuni ay oychchana danddayiyoo, qassi ha huuphe yohuwan ay beˈanee?

² Gidikkonne, nuuppe amaridaageeti hagaadan oychchana danddayoos: Saˈan Yihoowawu ammanettidi haggaaziya Kiristtoosa ‘hara dorssati’ ‘gita waayiya’ wode waananee? (Yoh. 10:16; Mat. 24:21) Tiyettida ishanttinne michchontti saluwa bi simmin hara dorssatuppe amaridaageeti waananaakko erenna gishshawu hirggana danddayoosona. Eti hegaadan hirgganaadan oottana danddayiya Geeshsha Maxaafan odettida naaˈˈu taariketa ane pilggoos. Yaatidi nuuni hirggana koshshennay aybissakko xannaˈana.

HANENNABAY AYBEE?

3-4. Amaridaageeti woygi qoppana danddayiyonaa, qassi aybissi?

³ Oosuwa Kaalettiya Citay hara dorssatuyyo kaaletuwa immiyogaa aggiyo wode, eti Yihoowawu haggaaziyogaa agganeeshsha giidi amaridaageeti qoppana danddayoosona. Amarida Geeshsha Maxaafaa taariketuppe denddidaagan eti hegaadan qoppana danddayoosona. Ane naaˈˈu taariketa beˈoos. Koyruwan Gita Kahiniya Yoodaahebaa beˈana. I Xoossawu ammanetti oottida asa. Inne A machchiya Yihoshebaaˈa, Yoˈaasha  geetettiya naˈay hayqqennaadan ashshidosona; qassi I loˈˈonne ammanettida kawo gidanaadan maaddidosona. Yoodaahee deˈuwan deˈido wode ubban, Yoˈaashi suurebaa oottiis. Shin Yoodaahe hayqqi simmin Yoˈaashi iitabaa oottiyogaa sohuwara doommiis. Iita halaqati yootiyobaa I siyidi Yihoowawu haggaaziyogaa aggiis.—2 Odi. 24:2, 15-19.

⁴ Kaallidi, kiitettidaageeti hayqqi simmin deˈida Kiristtaanetubaa beˈana. Kiitettidaageetuppe wurssettan hayqqidaagee Yohaannisa. I ba deˈido laytta ubban daro Kiristtaaneti Yihoowawu ammanettidi haggaazanaadan maaddiis. (3 Yoh. 4) Yesuusi kiittido haratuugaadan, Yohaannisikka kaddidaageetu timirttiyappe galchchaa naaganawu loytti baaxetiis. (1 Yoh. 2:18; 2 Tas. 2:7) Shin Yohaannisi hayqqi simmin, galchchan deˈiya daroti kaddidaageeta gididosona. Amarida layttaa giddon, kaddidaageeti ubba galchchatun worddo timirtteta tamaarissidosonanne iita kanddoy deˈanaadan oottidosona.

5. Ha naaˈˈu taariketuppe denddidaagan nuuni ay kuuyana koshshennee?

⁵ He Geeshsha Maxaafaa taariketi tiyettidaageeti saluwa bi simmin, Kiristtoosa hara dorssati Yoˈaashaagaadan iitabaa oottana danddayiyogaa woy kiitettidaageeti hayqqi simmin deˈida darotuugaadan kaddiyageeta gidana danddayiyogaa bessiyonaa? Chii! Tiyettidaageeti saluwa bi simmin hara dorssati Yihoowawu suure ogiyan goynniyogaa aggennaagaanne I etassi koshshiyabaa kunttiyogaa aggennaagaa nuuni ammanettana danddayoos. Aybissi?

YIHOOWA ASAY I KOYIYO OGIYAN UBBATOO AWU GOYNNANA

6. Nuuni qanttan pilggana heezzu wodeti awugeetee?

⁶ Sinttappe yaana waayissiya wodiyankka Yihoowa asay I koyiyo ogiyan ubbatoo awu goynnanaagaa nuuni ammanettana danddayiyoy aybissee? Nuuni deˈiyo wodee Israaˈeelati deˈido wodiyappenne kiitettidaageeti hayqqi simmin deˈiya wodiyappe keehi dummatiyogaa Geeshsha Maxaafay yootiyo gishshataassa. Yaatiyo gishshawu ha heezzu wodeta ane loytti pilggoos: (1) Beni Israaˈeelati deˈido wodiya, (2) kiitettidaageeti hayqqi simmin deˈiya wodiya, qassi (3) nu wodiya, ‘ubbabay ooraxxiyo wodiya.’—Oos. 3:21.

7. Kawotinne hara asati iitabaa oottido wode ammanettida Israaˈeelati hidootaa qanxxibeennay aybissee?

⁷ Beni Israaˈeelati deˈido wodiya. Muusee hayqqanaappe guuttaa kasetidi Israaˈeelatussi hagaadan giis: “Ta haiqqidoogaappe guyyiyan, intte mule iita asa gidanaagaanne taani inttena tamaarissido azazuwaappe wora simmanaagaa taani erais.” (Zaa. 31:29) Israaˈeelati makkalikko omooddettanaagaakka Muusee yootiis. (Zaa. 28:35, 36) I giidobay polettidee? Ee, polettiis. Unddenna layttawu daro kawoti Yihoowa sinttan iitabaa oottidosonanne asay worddo xoossatuyyo goynnanaadan oottidosona. Hegaa gaasuwan Yihooway Israaˈeelan deˈiya iita asaa qaxxayiis; qassi hegaappe simmin Israaˈeela kawoti eta haarennaadan diggiis. (Hiz. 21:25-27) Shin ammanettida Israaˈeelati Xoossay yootidobay polettidoogaa beˈido wode xala gididosona.—Isi. 55:10, 11.

8. Kiitettidaageeti hayqqi simmin, Kiristtaaneti Yihooway koyiyogaadan awu goynnibeennaagan nuuni maalaalettana koshshii? Qonccissa.

⁸ Kiitettidaageeti hayqqi simmin deˈiya wodiya. Kiitettidaageeti hayqqi simmin, Kiristtaaneti Yihooway koyiyogaadan awu goynnibeennaagan nuuni maalaalettana koshshii? Koshshenna. Kaddiyageeti denddanaagaa Yesuusi kasetidi yootiis. (Mat. 7:21-23; 13:24-30, 36-43) Kiitettida Phawuloosi, Pheexiroosinne Yohaannisi Yesuusi yootido hiraagay  eta wodiyan polettiiddi deˈiyogaa eridosona. (2 Tas. 2:3, 7; 2 PHe. 2:1; 1 Yoh. 2:18) Kiitettidaageeti hayqqi simmin, Kiristtaaneti Yihooway koyiyogaadan awu goynniyogaa aggidosona. Kaddida Kiristtaanetu haymaanootee doommiis; qassi hegee worddo haymaanoote ubbaa xaaxa waaxa qonccissiya Gita Baabilooni shaaho gidiis. Ee, Yesuusi yootido hiraagay polettiis.

9. Nuuni deˈiyo wodee, beni Israaˈeelati deˈido wodiyappenne kiitettidaageeti hayqqi simmin kaddidaageeti denddido wodiyappe waani dummatii?

⁹ ‘Ubbabay ooraxxiyo wodiya.’ Nuuni deˈiyo wodee, beni Israaˈeelati deˈido wodiyappenne kiitettidaageeti hayqqi simmin kaddidaageeti denddido wodiyappe dummatees. Nuuni deˈiyo wodee ayba wode geetettidee? Nuuni deˈiyo wodee ha iita alamiya ‘wurssetta gallassaa’ geetettiis. (2 Xim. 3:1) Gidikkonne, Geeshsha Maxaafay yootiyogadan, he wurssetta gallassan gitabay haniyonne adussa wodee doommiis. Hegee, Masiya Kawotettay asay wottiyobi baynnaagaa gidanaadaaninne saˈay gannate gidanaadan oottana gakkanaashin takkees. He wodee, ‘ubbabay ooraxxiyo wodiya’ geetettiis. (Oos. 3:21) He wodee, 1914n doommiis. Yaatin ooraxxidabay aybee? Yesuusi saluwan kawo gidiis. Yaatiyo gishshawu, Yihooway A kalˈˈatidi haariya, ammanettida Kawuwa Daawita zare gidida uraa zaarettidi sunttiis. Shin Yihooway ooraxissidoy kawotetta xalaala gidenna. Hegaappe simmin daro takkennan, geeshsha goynoy zaarettidi eqqiis! (Isi. 2:2-4; Hiz. 11:17-20) Yihoowa asay I koyiyogaadan awu goynniyogaa zaarettidi agganee?

10. (a) Ha wodiyan deˈiya geeshsha goynuwa xeelliyagan Geeshsha Maxaafan kasetidi odettidabay aybee? (Isiyaasa 54:17) (b) Ha hiraagati nuna minttettiyoy aybissee?

¹⁰ Isiyaasa 54:17 nabbaba. Ane ha hiraagaa qoppa: “Nena qohanau oottido ai miishshinne nena qohidi kantti kiyenna”! He hiraagay ha wodiyan polettiiddi deˈees. Kaallidi deˈiya minttettiya qofaykka ha wodiyan polettiiddi deˈees: “Ne attuma naata ubbaa GODAI tamaarissana; ne naatu sarotettaikka darana. Neeni xillotettan minnada eqqana. . . . Neeni aibaassikka yayyakka; dagamaikka neekko shiiqenna.” (Isi. 54:13, 14) ‘Ha alamiya xoossay’ Seexaanaykka Yihoowa asay harata Yihoowabaa tamaarissiyo oosuwa diggana danddayenna. (2 Qor. 4:4) Geeshsha goynoy zaarettidi eqqiis; qassi Yihoowa asay I koyiyogaadan awu goynniyogaa zaarettidi aggenna. Geeshsha goynoy merinawu deˈana. Nuna qohanawu oottido ay miishshinne nuna qohidi kantti kiyenna!

 HANANABAY AYBEE?

11. Tiyettidaageeti saluwa biyo wode, zawi baynna asaa kaalettiyabi xayennaagaa nuuni ammanettiyoy aybissee?

¹¹ Tiyettidaageeti saluwa bi simmin aybi hananee? Yesuusi nu Henttanchcha gidiyogaa hassaya. I Kiristtaane galchchawu huuphe. Yesuusi hagaadan giis: “Inttena Kaalettiyagee issuwa, Kiristtoosa.” (Mat. 23:10) Saluwan haariiddi deˈiya Yesuusi, tumuppe A kaalliyageetussi koshshiyabaa kunttana. Kiristtoosi eta kaalettiyo gishshawu, saˈan A kaalliyageeti aybanne yayyana koshshenna. Kiristtoosi he wode ba asaa waati kaalettanaakko nuuni ubbabaa erennaagee qoncce. Hegaa gishshawu, nuuni aynne yayyennaadan oottana danddayiya Geeshsha Maxaafaa taariketa ane pilggoos.

12. (a) Muusee hayqqi simmin Yihooway ba asaa waati kaalettidee? (b) Eelaasi hara aawatettaa ekki simmin Yihooway ba asaa waati kaalettidee? (Misiliyakka xeella.)

¹² Israaˈeelati Hidootaa Biittaa gelanaappe kase Muusee hayqqiis. Xoossaa asay he wode waanidee? He ammanettida bitanee hayqqi simmin Yihooway ba asaa maaddiyogaa aggidee? Aggibeenna. Eti ammanettidi deˈido wode ubban, Yihooway etawu koshshiyabaa kunttiis. Yihooway ba asaa kaalettanaadan Yaasa dooridoogaa Muusee hayqqanaappe kase yootiis. Muusee Yaasa daro layttawu loohissiis. (Kes. 33:11; Zaa. 34:9) Hegaa bollikka, aawatettay deˈiyo hara gooba asati deˈoosona; hegeetikka, shaalaqata, mato halaqata, hamssaalaqatanne assiraalaqata. (Zaa. 1:15) Xoossaa asawu aybikka paccibeenna. Eelaasa hanotaykka hegaa mala. Israaˈeelati Yihoowawu goynnanaadan maaddanawu I daro layttawu minnidi oottiis. Shin guyyeppe Yihooway I Yihudan haggaazanaadan sunttiis. (2 Kaw. 2:1; 2 Odi. 21:12) Israaˈeela tammu zerettaa kawotettan deˈiya asaa Yihooway aggidee? Chii, aggibeenna. Eelaasi daro layttawu Elssaaˈa loohissiis. ‘Xoossay erissidobaa yootiyageetu citaykka’ loohiis. (2 Kaw. 2:3) Hegaa gishshawu, Xoossaa asaa kaalettiyogan maaddiya ammanettida daroti deˈoosona. Yihooway ba halchchuwa poliyogaa aggibeenna; qassi ammanettidi awu goynniyageetussi koshshiyabaa kunttiis.

13. Ibraawe 13:5b yootiyogaadan, Yihooway woygidi qaalaa gelidee? (Misiliyakka xeella.)

¹³ He taariketuppe akeekiyogaadan, tiyettidaageetuppe wurssettaageeti saluwa bi simmin aybi hanana gaada qoppay? Nuuni hirggana koshshenna. Geeshsha Maxaafay akeekanawu metenna ammanttiya tumaa yootees: Yihooway saˈan deˈiya ba asaa mule  aggenna. (Ibraawe 13:5b nabbaba.) Muuseegaadaaninne Eelaasaagaadan, ayyaanan tiyettida aawatettay deˈiyo amarida ishantti ha wodiyan harata loohissiyogee keehi koshshiyogaa akeekidosona. Oosuwa Kaalettiya Citaa yara gidida ishantti, aawatettaa polanaadan hara dorssa gidida ishantta daro layttawu loohissiiddi takkidosona. Leemisuwawu, eti cimata, yuuyidi xomoosiyageeta, Macara Biiruwa Konttiya yarata, Beeteelen oosuwa xomoosiyageetanne harata loohissanawu daro timirtte keettati deˈanaadan oottidosona. Oosuwa Kaalettiya Citaa yarati, Oosuwa Kaalettiya Citaa dumma dumma kontteta maaddiyageeta loohissoosona. Maaddiyageeta gidida ha ammanettida ishantti, dirijjitiyan daro aawatettaa poliiddi deˈoosona. Kiristtoosa dorssata ubbatoo heemmanawu eti loytti loohidosona.

14. Ha huuphe yohuwa waanna qofay aybee?

¹⁴ Ha huuphe yohuwa waanna qofay hagaa: Gita waayiya wurssetta heeran, tiyettidaageetuppe wurssettaageeti saluwa biyo wode, saˈan deˈiya Yihoowa asay ubbatoo awu ammanettidi goynnana. Yesuus Kiristtoosi kaalettiyo gishshawu, nuuni Yihoowawu ammanettidi goynniyogaa aggokko. Geeshsha Maxaafay Maagooga Googa giidi xeesiyo issippe denddiya kawotettati he wode Xoossaa asaa qohanawu denddanaagaa nuuni eroos. (Hiz. 38:18-20) Shin hegee eta darin qohenna; qassi eti Yihoowawu haggaaziyogaa agganaadan oottenna. I eta ashshana. Kiitettida Yohaannisi, ‘zawi baynna asa’ gidida Kiristtoosa hara dorssata ajjuutan beˈiis. Kiitettida Yohaannisi, ha ‘zawi baynna asati’ gita “waayiyaa waayidi yiidaageeta” gidiyogaa yootiis. (Ajj. 7:9, 14) Ee, eti attana!

15-16. Ajjuutaa 17:14y yootiyogaadan, tiyettidaageeti Armmageedoona olaa wode ay oottanee, qassi hegee minttettiyaba gidiyoy aybissee?

¹⁵ Shin tiyettidaageeti saluwa biidi ay oottanee? Geeshsha Maxaafay he oyshaa zaaruwa geeshshidi yootees. Ha alamiya kawotettati ‘dorssaara olettanaagaa’ Geeshsha Maxaafay yootees. Ha alamiya kawotettati xoonettanaagee qoncce. Xiqisee hagaadan gees: ‘Dorssay eta xoonana.’ Qassi A maaddanaageeti  oonee? Geeshsha Maxaafay hegaabaa yootees. ‘I xeegidoogeeti,’ ‘dooridoogeetinne’ “ammanettidaageeti” A maaddana. (Ajjuutaa 17:14 nabbaba.) Eti oonee? Hayquwappe denddida tiyettidaageeta! Hegaa gishshawu, gita waayiya wurssettaa heeran, tiyettidaageetuppe wurssettaageeti saluwa biyo wode eti koyruwan oottanabatuppe issoy olettiyogaa. Hegee maalaalissiya ooso! Tiyettida Kiristtaanetuppe amaridaageeti Yihoowa Markka gidanaappe kase haratuura olettidosona. Ubba, amaridaageeti wotaaddara gididi oottidosona. Shin guyyeppe tumu Kiristtaane gididi, haratuura sarotettan waani deˈanaakko tamaaridosona. (Gal. 5:22; 2 Tas. 3:16) Eti olan hashetiyogaa aggidosona. Shin, eti saluwa biidi, Kiristtoosaaranne A geeshsha kiitanchchatuura hashetidi Xoossaa morkketuura wurssetta olaa olettana.

¹⁶ Ane hagaa qoppa! Tiyettida Kiristtaanetuppe amaridaageeti saˈan deˈiyo wode, cimidaageeta; ubba qassi, wolqqay wuridoogeeta. Eti hayquwappe denddidi saluwa biyo wode, wolqqaamanne hayqqenna ayyaana mereta gidoosona; qassi Olanchcha Kawuwa Yesuus Kiristtoosaara hashetidi olettanaadan sunttettoosona. Eti Armmageedoona olaa oletti simmidi, asay wottiyobi baynnaagaa gidanaadan Yesuusaara issippe oottana. Eti nagaranchcha gididi deˈido wodiyagaappe aaruwan, saluwan deˈiyo wode, ha saˈan deˈiya siiqiyo bantta ishanttanne michchontta loytti maaddanaagee qoncce!

17. Xoossaa ashkkarati ubbay Armmageedoona olaa wode attanaagaa aybin eriyoo?

¹⁷ Neeni hara dorssatu yaree? Yaatikko, keehi wolqqaama gidida Armmageedoona olay doommiyo wode neeni waatana koshshii? Yihoowan ammanettada, A kaaletuwa kaalla. Harabaa ay oottana danddayay? Geeshsha Maxaafay hagaadan gees: “Intte soo gelidi, kariyaa intte bolli gorddite. GODAA hanqqoi aadhdhana gakkanaassi, guutta wodiyaa inttena qosite.” (Isi. 26:20) Saluwaninne saˈan deˈiya ammanettida Xoossaa ashkkarati he wode attana. “Haariyaageeta gidin, ha77i de7iyaagaa gidin, sinttappe yaanaagaa gidin, . . . Xoossaa siiquwaappe nuna shaakkanau danddayennaagaa” kiitettida Phawuloosaagaadan nuunikka ammanettoos. (Roo. 8:38, 39) Hagaa ubbatoo hassaya: Yihooway nena siiqees; qassi nena mule aggenna!