1. Which time God go take the last anointed Christian go heaven?

 MANY years ago, Jehovah people don ask theirself say, ‘Which time God go take the last anointed Christians go heaven?’ We be think before say some anointed Christians go stay for this earth for some time after Armageddon. But for our July 15, 2013 Watchtower, we learn say all anointed Christians wey remain for this earth, go go heaven before Armageddon start.—Matt. 24:31.

2. Which question some of us fit de ask, and wetin we go talk about for this article?

² But some of us fit still ask say: Wetin go happen to the “other sheep” wey go still de worship Jehovah well for this earth when the “serious trouble” (great tribulation) go don start? (John 10:16; Matt. 24:21) Some of them fit de worry say when all the anointed brothers and sisters don go heaven, nobody go dey to direct the work for Jehovah organization again. Make we talk about two story for Bible wey fit make them de worry. After, we go talk about why the other sheep no need to worry at all.

WETIN NO GO HAPPEN TO THE OTHER SHEEP

3-4. Wetin some fit worry about, and why?

³ Some servants of Jehovah fit de worry if the other sheep go stop to worship Jehovah when all the Governing Body members wey de direct the work, don go heaven. Them fit de feel like that when them remember some story for Bible. Make we talk about two example. The first one happen the time wey Jehoiada be high priest. Jehoiada really worship  Jehovah well. E and im wife wey im name na Jehoshabeath, protect one boy wey im name na Jehoash and help-am become good king wey love Jehovah. When Jehoiada dey alive, Jehoash worship Jehovah well. But after Jehoiada die, Jehoash start to do bad. E start to follow wicked people advice and leave Jehovah.—2 Chron. 24:2, 15-19.

⁴ The second example na wetin happen to Christians after the apostles don die. The last apostle wey die na apostle John. And when e dey alive, e help many Christians fit continue to worship Jehovah well. (3 John 4) Just like other apostles, John do im best to stop lie-lie teaching make e no enter congregation. (1 John 2:18; check the study note for 2 Thess. 2:7, for English.) But after apostle John die, many people for congregation start to follow lie-lie teaching. Before you know, lie-lie teaching don full the congregation and people for congregation come de do wetin Jehovah hate.

5. Wetin we no suppose think say go happen to the other sheep?

⁵ You think say this two story de show say after God don bring anointed Christians back to life and take them go heaven, the other sheep go stop to worship Jehovah, like wetin happen to Jehoash and the Christians after the last apostle die? The answer na no! We dey sure say after God don take anointed Christians go heaven, the other sheep go continue to worship Jehovah well and e go continue to care for them. Why we dey sure of this one?

JEHOVAH PEOPLE GO CONTINUE TO WORSHIP-AM FOR THE CORRECT WAY

6. Wetin we go talk about?

⁶ Why we dey sure say other sheep go continue to worship Jehovah for the correct way, even for the time of “serious trouble”? Na because we learn from Bible say the time wey we dey now, different well-well from the time of Israel people and the time after the apostles don die. So make we talk about: (1) The time of Israel people, (2) the time after the apostles don die, and (3) this our time wey be, “the time wey everything go dey new.”—Acts 3:21.

7. For the time of Israel people, wetin give people wey de worship Jehovah well strong mind when their king choose to worship other gods?

⁷ The time of Israel people. Small time before Moses die, e tell Israel people say: “I know say after I die, una go surely do wetin no good, una no go do the things wey I tell una.” (Deut. 31:29) E still warn them say if them turn against Jehovah, E go allow their enemy carry them as slaves. (Deut. 28:​35, 36) Wetin Moses talk happen? Yes. For hundreds of years, many kings for Israel choose to worship other gods and the people follow them to do the bad things wey them de do. Because of this one, Jehovah punish them and e no allow anybody to be king for Israel again. (Ezek. 21:​25-27) But when other Israel people see say wetin Jehovah talk de happen, e give them strong mind to continue to worship Jehovah well.—Isa. 55:​10, 11.

8. E suppose surprise us say lie-lie teaching full congregation after all the apostles don die? Explain.

⁸ The time after the apostles don die. E suppose surprise us say lie-lie teaching full congregation after all the apostles don die? No! Because Jesus don talk before say lie-lie teaching go enter congregation. (Matt. 7:​21-23; 13:​24-30, 36-43) And when apostle Paul, Peter, and John dey this earth, them talk say wetin Jesus talk don already de happen for their time. (2 Thess. 2:3, 7;  2 Pet. 2:1; 1 John 2:18) Small time after the last apostle die, lie-lie teaching come full the congregation. And the Christian congregation that time become the main part of Babylon the great, wey be all lie-lie religion for the whole world. Wetin Jesus talk really happen.

9. How our time take different from the time of Israel people and the time after the last apostle die?

⁹ “The Time Wey Everything Go Dey New.” Our time different well-well from the time of Israel people and the time wey lie-lie teaching take over Christian congregation, after the last apostle don die. Wetin we de call this our time? We de call-am the “last days” of Satan world. (2 Tim. 3:1) Bible show say when the last days start, another time wey long and dey important pass, start the same time. And that time go continue go reach the end of the One Thousand Years, when the whole earth don become Paradise and everybody don dey perfect. Bible call this time “the time wey everything go dey new.” (Acts 3:21) And e start for 1914. Which new thing happen that time? Na that year Jesus become King for heaven. Jehovah make Jesus wey come from the family of King David, to be king to represent Jehovah again. But no be only this one be the new thing wey Jehovah do. Small time after this one, Jehovah help im people start to worship-am for the correct way again. (Isa. 2:​2-4; Ezek. 11:​17-20) Lie-lie teaching go spoil-am again?

10. (a) Wetin Bible talk about the correct way wey we de worship Jehovah for this our time? (Isaiah 54:17) (b) Why wetin Isaiah 54:17 talk suppose make our mind come down?

¹⁰ Read Isaiah 54:17. Think about wetin that verse talk. E say: “No matter the weapon wey them make to attack you, no one go work.” Wetin that verse talk, de happen today. Other verse for that chapter still talk other things wey de happen for this our time. E say: “Jehovah go teach all your children, and them go really enjoy peace. Them go make you dey strong for wetin dey right. . . . You no go fear anything and nothing go shake you, Because that kind thing no go near you. (Isa. 54:​13, 14) Even Satan wey be “the god of this world,” no get power to stop the preaching and teaching work wey Jehovah people de do. (2 Cor. 4:4) Jehovah people don de worship-am again for the correct way, and nothing go ever stop-am, e go continue forever. No matter wetin them do to spoil-am, e no go ever work!

 WETIN GO HAPPEN?

11. Why we dey sure say the great crowd go continue to worship Jehovah well after anointed Christians don go heaven?

¹¹ Wetin go happen after the last anointed Christian don go heaven? Remember say na Jesus be our Shepherd. Na im be the head of the congregation, na im make e talk say: “Na one Leader una get, wey be Christ.” (Matt. 23:10) Jesus wey be our King go always care for im people. As e be say na Jesus be our leader, the other sheep no need to fear anything. The truth be say, we no know everything about how Jesus go take lead them that time. But make we see some example for Bible wey make us dey sure say we no need to fear.

12. How Jehovah care for im people (a) after Moses die? (b) after Jehovah give Elijah work for another place? (Still check the picture.)

¹² Moses die before Israel people enter Promise Land. So, wetin happen to Israel people after Moses die? Jehovah stop to help them? No. As far say them continue to worship Jehovah for the correct way, e care for them. Before Moses die, Jehovah tell-am say make e give Joshua the work to lead Israel people. Moses don de train Joshua for many years. (Ex. 33:11; Deut. 34:9) Another thing be say many men dey, wey them don train to lead different-different group, for the land of Israel. Them be chiefs of thousands, hundreds, fifties, and even tens. (Deut. 1:15) God make sure say people dey to care for im people. Elijah na another better example for this matter. For many years, e do im best to make sure say Israel people worship Jehovah for the correct way. But e get the time wey Jehovah give-am another work, for the south side of Judah. (2 Ki. 2:1; 2 Chron. 21:12) E mean say nobody come dey to care for Jehovah people wey dey the ten-tribe kingdom? No. Elijah don de train Elisha for plenty years, and other people still dey wey Bible call “sons of the prophets,” wey them de train. (2 Ki. 2:7) So plenty men dey to care for God people. Wetin Jehovah want for im people continue to happen and e continue to care for them.

13. Wetin Hebrews 13:5b help us understand?

¹³ From this two example wey we don talk about, wetin you think say go happen after the last anointed Christian don go heaven? We no need to worry. Bible give us one simple answer say, Jehovah no go ever abandon  im people wey dey this earth. This one fit make our mind come down. (Read Hebrews 13:5b.) Like Moses and Elijah, Governing Body know say to train people really dey important. For plenty years now, Governing Body don de train some brothers wey no be anointed Christians, to fit de direct the work. For example, them don arrange many schools to train elders, circuit overseers, Branch Committee members, overseers for Bethel, and other brothers. Governing Body de train brothers wey de help them for the different-different committee of the Governing Body. This brothers de handle important work for Jehovah organization. Them don train them well to fit continue to care for Jehovah people.

14. Wetin be the main thing wey we de talk about for this article?

¹⁴ The main thing wey we de talk about for this article be say: After Jehovah bring the last anointed Christian back to life and take-am go heaven near the end of great tribulation, the other sheep go continue to worship Jehovah for the correct way. We really happy say na Jesus Christ be our leader, so Jehovah worship no go ever stop. We know say that time, some nations go join together attack God people. Bible call this group of nation, Gog of Magog. (Ezek. 38:​18-20) The attack go short and e go fail, because them no go fit stop God people to worship Jehovah. Jehovah go save im people! For one vision, apostle John see “plenty-plenty people” wey be part of the other sheep. The angel tell John say this “plenty-plenty people” survive “the serious trouble,” wey be the great tribulation. (Rev. 7:9, 14) So we dey sure with all our heart say Jehovah go save them!

15-16. With wetin dey Revelation 17:​14, wetin anointed Christians go do for Armageddon, and why this one suppose make us happy?

¹⁵ Some people fit still de ask say: ‘Wetin anointed Christians go do when them reach heaven?’ The answer dey Bible. Bible show say government for this world “go fight with the Lamb.” But them go fail. E talk say:  “[The Lamb] go win them.” Which people go join the Lamb fight im enemy them? The verse still talk say na the people “wey them don call and choose and wey dey faithful.” (Read Revelation 17:14.) Who them be? Na the anointed Christians, when them don go heaven. So, when the last of the anointed Christian don go heaven, near the end of the serious trouble, one of their first work go be to join fight Armageddon. This one na really serious work! Before some of the anointed Christians become Jehovah servant, them de like to fight and cause trouble. Some of them na soldiers before them begin serve Jehovah. But after them don become Jehovah Witness, them come dey gentle and love peace. (Gal. 5:22; 2 Thess. 3:16) Them stop to support war. But after them don go heaven, them go join Jesus and the angels, to fight and remove all Jehovah enemy for Armageddon.

¹⁶ Think about-am, when them dey this earth, some anointed Christians don old and them no strong. But once them don reach heaven, them go become spirit wey no fit ever die and them go get power. And them go join Jesus wey be warrior and their King to fight the final war. After Armageddon, them go join Jesus to make God servants for earth, dey perfect. We know say that time, them go fit help their brothers and sisters for this earth pass when them dey this earth, and them no dey perfect.

17. How we take know say all servants of Jehovah go save for Armageddon?

¹⁷ You be part of the other sheep? Wetin you go do when Armageddon start? The simple answer na: Trust Jehovah and obey im organization. Wetin this one mean? Bible tell us say: “Make una enter una inner room and close door. Make una hide unaself small until God vex finish.” (Isa. 26:20) All servant of Jehovah for heaven and earth go save that time. We dey sure like apostle Paul say “governments, or things wey dey here now, or things wey de come, . . . no go fit separate us from the love wey God get for us.” (Rom. 8:​38, 39) Always remember say Jehovah love you well-well, and e no go ever abandon you!