1. მუჟამ მოხვადუ დედამიწას დოსქილადირ ცხებულეფიშ ზეცაშა ჸუნაფა?

 ᲬᲐᲜᲔᲤᲘᲨ წოხოლე ბრელ ქრისტიანს ოინტერესუდ, მუჟამ მოხვადუდ დედამიწას დოსქილადირ ცხებულეფიშ ზეცაშა ჸუნაფა. ართ პერიოდის ფიფქრენდით, ნამდა არმაგედონიშ უკულ ნამთინე ცხებულ ჭიჭე ხანს ჩქინწკუმა ართო იცხოვრენდ სამოთხეს. მარა, მუჭოთ 2013 წანაშ 15 კვირკვეშ „გინაჯინალ კოშკშე“ გებგით, დედამიწას დოსქილადირ არძა ცხებულ ქრისტიან არმაგედონიშ დოჭყაფაშახ იჸუაფ ზეცაშა ჸუნაფილ (მათ. 24:31).

2. მუ კითხვაქ შილებე გურჩქინდას ნამთინეს დო მუს გუარჩიენთ თე სტატიას?

² ათეშენ ნამთინეს თეცალ კითხვა ურჩქინდუ: მუ ოხვარ „დიდ გაჭირებაშ“ დროს ცხებულეფიშ უმშო დოსქილადირ ქრისტეშ „შხვა შხურს“? (იოან. 10:16; მათ. 24:21). შილებე თინეფ ფიქრენდან, ნამდა, მუჟამსით ცხებულეფს ზეცაშა მიდეჸუნანა, დედამიწას ღორონთიშ ართგურ მსახურეფ მოხვარაშ დო ხემძღვანელობაშ უმშო ქუდოსქიდუნა. თე სტატიას გუარჩიენთ ჟირ ბიბლიურ მონაკვეთის, ნამდგაშ გურშენ შილებე თაშ ფიქრენდან. უკულ თის ხოლო ქობძირუნთ, მუშენ ვამღუნა შიშიშ მუთუნნერ მიზეზ.

ᲛᲣ ᲕᲐ ᲛᲝᲮᲕᲐᲓᲣ?

3, 4. მუშა შილებე ნამთინეს ოშქურუდას დო მუშენ?

³ ნამთინეს შილებე თიშა ოშქურუდას, ხემძღვანელ საბჭოშ უმშო დოსქილადირ შხვა შხურ ხომ ვემიოტენს იეჰოვაშ მსახურებას. მორთჷ, გუარჩუათ ჟირ ბიბლიურ შემთხვევა, ნამუთ შილებე თინეფს თაშ ოფიქრებაფუანდას. პირველ რე მღვდელმთავარ იეჰოიადაშ შემთხვევა, ნამუთ ღორონთიშ ართგურ მსახურ რდჷ. თიქ დო მუშ მეუღლე იეჰოშაბათიქ ჭიჭენობას  ღურას გინატეს იეჰოაშ დო თეშ მორდეს, ნამდა ღორონთიშ ართგურ მეფექ ქიჸუკო. ონდო იეჰოიადა ცოცხალ რდჷ, მეფე იეჰოაშ ღორონთიშ მოსაწონო იქციებუდ. მარა, მუჟამსით თიქ დოღურ, მეფექ უბადო მთავრეფიშ რჩქილა ქიდიჭყჷ დო საბოლათ, ოჭიშ ქურთინუ იეჰოვას (2 მატ. 24:2, 15—19).

⁴ დეფიფქრათ მაჟია შემთხვევაშე ხოლო. მოციქულეფ დიო ხოლო ცოცხალ რდესჷ, მუჟამსით კრებეფშა ჭიე-ჭიეთ განდგომილებაქ ქიდიჭყჷ მიშულა. თინეფ ირნერო ოცადუდეს, დოთხილუესკო და დო ჯიმალეფ არასწორ აზროვნებაშე (1 იოან. 2:18; 2 თეს. 2:7). მოციქულეფშე არძაშ უმოს ბოლოს იოანექ ღურჷ. ონდო თინა ცოცხალ ქორდჷ, ირფელს ორთუდ, ნამდა ქრისტიანეფს ღორონთიშ ართგურო დოსქილადას ქიმეხვარუკო (3 იოან. 4). მარა იოანეშ ღურაშ უკულ, ახ. წ. მაჟია საუკუნეს, განდგომილებაქ დაჩხირცალო ქიდიჭყჷ გავრცელება დო მალას მთელ ქრისტიანულ კრებას მადვჷ.

5. მუ დასკვნაშ გიშაღალა იჸუაფუდ არასწორ ჟიშე მოჸუნაფილ ჟირ შემთხვევაშე?

⁵ ნიშნენსო თე ჟირ შემთხვევა, ნამდა ცხებულეფიშ ზეცაშა ჸუნაფაშ უკულ შხვა შხურ იეჰოაშცალო ოჭიშის ქურთინუანს ღორონთის ვარდა მაჟია საუკუნეშ ქრისტიანეფცალო განდგომილებაშ შარას ქიგიოდირთუ? ვარ, თენა მუთუნით ვა მოხვადუ! ცხებულეფიშ ზეცაშა ულაშ უკულ ღორონთიშ ხალხ ვართ ხემძღვანელობაშ უმშო დოსქიდუ დო ვართ ჭეშმარიტებაშ შარას ეიოჩირთუ. მუშენ ვორეთ თეშა დარწმუნებულ?

ᲬᲛᲘᲜᲓᲐ ᲗᲐᲧᲕᲐᲜᲘᲨᲛᲪᲔᲛᲚᲝᲑᲐ ᲘᲠᲘᲐᲗᲝ ᲦᲝᲠᲝᲜᲗᲘᲨ ᲛᲝᲡᲐᲬᲝᲜᲝ ᲒᲔᲒᲠᲫᲔᲚᲔᲑ

6. ნამ სუმ პერიოდის გუარჩიენთ?

⁶ მუშენ ვორეთ თეცალ დარწმუნებულ, ნამდა წმინდა თაყვანიშმცემლობაშა მუთუნს ვაცილებე თი რთულ პერიოდიშ უმკუჯინუო, ნამუთ წიმი მელუნა? მუშენდა, მუჭოთ ბიბლიაშე ბგებულენთ, ჩქინ დრო მანგარ განსხვავებულ რე ჯვეშ ისრაელიშ დო მაჟია საუკუნეშ ქრისტიანეფიშ პერიოდშე. მორთით, უმოს დეტალურო გუარჩუათ თე სუმხოლო პერიოდ: 1) ჯვეშ ისრაელიშ, 2) მოციქულეფიშ ღურაშ უკულიან დო 3) ჩქინ დრო, ნამდგას ბიბლია მიშინუანს, მუჭოთ „ირფელიშ აღდგენაშ დროს“ (საქ. 3:21).

7. მუშენ ვა უღუდეს ჯვეშ დროს მახორუ ართგურ ისრაელეფს გურიშ გოტახუაშ მიზეზ, მუჟამსით ხალხ დო მეფეეფ ოჭიშის ურთინუანდეს იეჰოვას?

⁷ ჯვეშ ისრაელიშ დრო. ღურაშახ ჭიჭე ხანიშ წოხოლე მოსექ ისრაელეფს უწუ: „ჯგირო მიჩქჷ, ნამდა ჩქიმ ღურაშ უკულ უბადოთ მიქციებუთ დო გეგნურთანთ თი შარაშე, ნამდგას გილულა გიზოჯით“ (კან. 31:29). თეწკუმა ართო, მოსექ ისრაელეფ გაფრთხილ, ნამდა ღორონთის ვა დემორჩილებდეს-და, დესაჯებუდეს დო გეგნახორუანდეს (კან. 28:35, 36). თე სიტყვეფქ შისრულ. საუკუნეეფიშ დინახალე ბრელ მეფექ ოჭიშ ქურთინუ იეჰოვას დო ხალხ ხოლო ეიოჩილითუ წმინდა თაყვანიშმცემლობაშ შარას. ათეშენ იეჰოვაქ ვარია ქოთქუ თე უბადო ხალხშე დო ისრაელ მეფეეფს ხოლო მიდუღ მართველობაშ უფლება (ეზეკ. 21:25—27). მარა თი ისრაელეფს, მით იეჰოვაშ ართგურეფ რდესჷ, ვა უღუდეს გურიშ გოტახუაშ მიზეზ. თინეფს ხოლო უმოს გაბედულება ქიმეჩ თიშ ძირაფაქ, მუნერ კილ-კილშა შისრულ იეჰოვაშ სიტყვაქ (ეს. 55:10, 11).

8. მუშენ ვა რე გასაკვირ, ნამდა ჭეშმარიტ ქრისტიანობას განდგომილებაქ მუნულუ?

⁸ მოციქულეფიშ ღურაშ უკულიან პერიოდ. გასაკვირ რენო, ნამდა მაჟია საუკუნეშ ქრისტიანულ კრებას განდგომილებაქ მადვჷ? შუროთ ვარ, მუშენდა იესოს რაგადებულ აფუდ, ნამდა დიდ განდგომილებაშ დრო ქუდოდირთუდ (მათ. 7:21—23; 13:24—30, 36—43). მოციქულეფქ, პავლექ, პეტრექ დო იოანექ ხოლო თქუეს, ნამდა იესოშ წინასწარმეტყველებაშ შესრულება უკვე პირველ საუკუნეს ხოლო დოჭყაფილ რდჷ (2 თეს. 2:3, 7; 2 პეტ. 2:1—3,  17—19; 1 იოან. 2:18). ბოლო მოციქულიშ ღურაშე მალას ქრისტიანობას განდგომილებაქ მუნულუ დო თიქ ტყურა რელიგიაშ მსოფლიო იმპერიაშ, „დიდ ბაბილონიშ“, ნაწილო გინირთჷ. თეშნერო, იესოშ წინასწარმეტყველებაქ შისრულ.

9. მუჭო რე განსხვავებულ ჩქინ დრო ჯვეშ ისრაელ დო მაჟია საუკუნეშ ქრისტიანეფიშ პერიოდშე?

⁹ „ირფელიშ აღდგენაშ დრო“. ჩქინ დრო მანგარ განსხვავებულ რე ჯვეშ ისრაელიშ დო დიდ განდგომილებაშ პერიოდშე, ნამდგაქ მაჟია საუკუნეს დოდირთჷ. მუ დროს ფცხოვრენთ ჩქი? ხშირას თის მიფშინუანთ, მუჭოთ თე ქვეყნიერებაშ „ბოლო დღალეფს“ (2 ტიმ. 3:1). მარა ბიბლიაშე ბგებულენთ, ნამდა 1914 წანას „ბოლო დღალეფწკუმა“ ართო დიჭყჷ შხვა პერიოდიქ ხოლო, ნამუთ უმოს ხანს გეგრძელებ დო უმოს დიდებულ იჸუაფ. თე დრო თეიშახ გეგრძელებ, ონდო მესიანურ სამეფო სრულყოფილებას ვა დურთინუანს კაცობრიობას დო დედამიწას სამოთხეთ ვეგნაშქვანს. ბიბლია თე პერიოდის მიშინუანს, მუჭოთ „ირფელიშ აღდგენაშ დროს“ (საქ. 3:21). მუშ აღდგენაქ მოხვად თე პერიოდიშ დოჭყაფაშე მოჸუნაფილ? იესოქ გემეფ ზეცას, მუდგათ დავითიშ გამნარყიქ კინ ქიდიჭყჷ მართველობა, მუჭოთ იეჰოვაშ წარმომადგენელქ. თე მოვლენაშე მალას წმინდა თაყვანიშმცემლობაშ აღდგენაქ ხოლო ქიდიჭყჷ (ეს. 2:2—4; ეზეკ. 11:17—20). დღას მუთუნს ქაცილებენო ანწ წმინდა თაყვანიშმცემლობაშა?

10. ა) მუს წინასწარმეტყველენს ბიბლია წმინდა თაყვანიშმცემლობაშ გურშენ? (ეს. 54:17). ბ) მუშენ რე თეცალ წინასწარმეტყველებეფ გურიშ ემაკინალ?

¹⁰ წეკითხით ესაიაშ 54:17. დეფიქრით თე წინასწარმეტყველებაშე, ნამუთ ამდღა ისრულებ: „სქან წინააღმდეგ კეთებულ ნამთინ იარაღ ვეჸუაფ წარმატებულ“! ჩქინ დროს ისრულებ თე გურიშ ემაკინალ სიტყვეფ ხოლო: „სქან ქომოლსქუალეფს იეჰოვა ქუდაგურუანს დო მშვიდობა ვა მაკორდუნა. მანგარო ქიგედირთუქ სიმართლეს . . . მუთუნშა ვა გაშქურინე დო მუთუნ ვადგოშქურინუანს, მუშენდა საფრთხე ვემგკანჭუ“ (ეს. 54:13, 14). ამდღა იეჰოვაშ ხალხ მთელ მსოფლიოს ოგურუანს ადამიანეფს ღორონთიშ გურშენ დო თე საქმეშა „ქვეყნიერებაშ ღორონთის“, სატანას ხოლო ვაცილებე (2 კორ. 4:4). ჩქინ წინააღმდეგ კეთებულ ნამთინ იარაღის ვაღვენუ წარმატება. წმინდა თაყვანიშმცემლობა აღდგენილ რე, თიშა ანწ დღას მუთუნს ვაცილებე დო მარადიულო იჸუაფ!

ᲛᲣ ᲛᲝᲮᲕᲐᲓᲣ?

11. მუ მარწმუნენა, ნამდა ცხებულეფიშ ზეცაშა ულაშ უკულ ანაყუ ხალხ უმინჯურო ვა დოსქიდუ?

¹¹ მუ მოხვადუ, მუჟამსით ცხებულეფ ზეცაშა იჸუაფუნა ჸუნაფილ? ოკო ვაგმოჭყორდან, ნამდა ჩქინ ჭყიშ დო ქრისტიანულ კრებაშ  დუდ იესო რე. თიქ გასაგებო თქუ: „ართ რჸუნა წინამძღოლ — ქრისტე“ (მათ. 23:10). ჩქინ მეფე, იესო, დღას ვედიტენს უმინჯურო მუშ მიმაჸუნალეფს. თაშ ნამდა, მუჟამსით ქრისტე რე ხემძღვანელ, მუშა ოკო აშქურინან დედამიწას დოსქილადირ თიშ მიმაჸუნალეფს?! მართალ რე, დეტალურო ვა მიჩქუნა, მუჭო უხემძღვანელენს იესო თიმ დროს მუშ ხალხის, მარა გუარჩუათ მუსხირენ ბიბლიურ მაგალით, ნამუთ მარწმუნენა, ნამდა ღორონთიშ ხალხ ხემძღვანელობაშ უმშო ვა დოსქიდუ.

12. მუჭო ზრუნენდჷ იეჰოვა მუშ ხალხშე ა) მოსეშ ღურაშ უკულ? ბ) მუჟამსით ელიაქ შხვა დავალება მიღჷ? (ქოძირით სურათ).

¹² ისრაელ ერიშ დუნაპირებ ქიანაშა მინულაშახ ჭიჭე ხანით ადრე მოსექ დოღურ. თე ართგურ კოჩიშ ხემძღვანელობაშ უმშო უმინჯურო წუმოსქიდუო ღორონთიშ ხალხიქ? ვარ. ონდო ღორონთიშ ართგურეფ ქორდეს, იეჰოვა ზრუნენდჷ თინეფშე. მოსეს ღურაშახ იეჰოვაქ დავალ, ხალხიშ ხემძღვანელო იესო ნავეშ სქუა დანიშნუკო, ნამდგას მოსე ვითობით წანაშ დინახალე ამზადენდჷ (გამ. 33:11; კან. 34:9). თეწკუმა ართო, ხალხის ხემძღვანელენდჷ შხვა ბრძენ დო გამოცდილ ქომოლკათა ხოლო, მით „ანთასიშდუდეფო, ოშიშდუდეფო, ჟარნეჩდოვითიშდუდეფო დო ვითიშდუდეფო“ მსახურენდეს (კან. 1:15). თაშ ნამდა, ღორონთიშ ხალხის მზრუნველობა დო ყურადღება ვარკუდ. თეშნერო მოხვად ელიაშ შემთხვევას ხოლო. თინა ვითობით წანას ხემძღვანელენდჷ ისრაელს წმინდა თაყვანიშმცემლობას. მარა უკულ იეჰოვაქ თის შხვა დავალება ქიმეჩ დო იუდაშ სამეფოშა გეგნიჸუნ (2 მეფ. 2:1; 2 მატ. 21:12, 13). უმინჯურო დოსქიდუო ისრაელიშ ვითტომიან სამეფოს მახორუ ღორონთიშ ართგურ ხალხიქ? ვარ, მუშენდა ელია წანეფიშ დინახალე ამზადენდჷ ელისეს მუშ საქმეშ გუმაგრძელებერო. თეწკუმა ართო, თექ რდესჷ „წინასწარმეტყველეფიშ ქომოლსქუალეფ“ ხოლო, მით, მუჭოთ იძირენ, მუდგარენ მომზადებას მიკიშეს მუნეფიშ დავალებაშ შეიოსრულებერო (2 მეფ. 2:7). თაშ ნამდა, მუჟამსით თეზმა ართგურ ქომოლკოჩ რდჷ, ღორონთიშ ხალხ ხემძღვანელობაშ უმშო ვა დოსქიდუდ. თეშნერო იეჰოვა აგრძელენდჷ მუშ განზრახვაშ შესრულებას დო ზრუნენდჷ ართგურ თაყვანიშმცემელეფშე.

13. მუშა მარწმუნენა იეჰოვა ებრაელეფიშ 13:5ბ-ს? (ქოძირით სურათ).

¹³ თე მაგალითეფიშ გარჩიებაშ უკულ, მუჭო ფიქრენთ, მუ მოხვადუ, მუჟამსით დედამიწას დოსქილადირ ცხებულეფ ზეცაშა იჸუაფუნა ჸუნაფილ? ონერვიანებელ მუთუნ ვა რე, მუშენდა ბიბლია მარწმუნენა, ნამდა იეჰოვა მუთუნით ვემიოტენს დედამიწას დოსქილადირ  მუშ მსახურეფს (წეკითხით ებრაელეფიშ 13:5ბ). მოსე დო ელიაცალო, ცხებულეფიშ ჭიჭე ჯგუფის ხოლო, ნამუთ ამდღა ხემძღვანელენს ღორონთიშ ხალხის, ჯგირო არჩქილე, მუსხით მნიშვნელოვან რე შხვეფიშ მომზადება. ვითობით წანა რე, მუთ ხემძღვანელ საბჭო ამზადენს შხვა შხურიშ წარმომადგენელ ჯიმალეფს ხემძღვანელობაშო. მაგალთო, თინეფიშ ორგანიზებათ იტარებ ბრელნერ სკოლა, ნამდა მამზადან უხუცესეფ, გილმალ ზედამხედველეფ, ფილიალიშ კომიტეტიშ წევრეფ, ჯიმალეფ, მით ბეთელეფს მსახურენა ზედამხედველეფო, მისიონერეფ დო შხვეფ. თეს გეძინელ, ხემძღვანელ საბჭოშ წევრეფ პირადო ამზადენა ხემძღვანელ საბჭოშ შხვადოშხვა კომიტეტიშ დამხმარეეფს. თინეფ უკვე ამდღარშე ასრულენა ქიანაშ სერიოზულ პასუხიშმგებლობას ორგანიზაციას დო მზათ რენა, ცხებულეფიშ ზეცაშა ულაშ უკულ გაგრძელან ქრისტეშ შხურშე ზრუნვა.

14. მუ დასკვნაშ გიშაღალა შემლებუნა ჟიშე მოჩამილ გარჩიებაშე?

¹⁴ მუ დასკვნაშ გიშაღალა შემლებუნა ჟიშე მოჩამილ გარჩიებაშე? მუჟამსით, სოდგარენ დიდ გაჭირებაშ ბოლოშო, ცხებულეფ ზეცაშა იჸუაფუნა ჸუნაფილ, დედამიწას დოსქილადირ ქრისტეშ მიმაჸუნალეფ ართგურო გაგრძელენა წმინდა თაყვანიშმცემლობაშ მეჸუნას. მართალ რე, თე დროს „გოგ“, ერეფიშ კოალიცია, ღორონთიშ ხალხის ქიგიანთხუ, მარა თე თავდასხმა ბრელ ხანს ვეგეგრძელებ დო ვა გაჩერებე იეჰოვაშ თაყვანიშცემა. თინა აუცილებერო ირსხენს მუშ ხალხის (ეზეკ. 38:18—20). მოციქულ იოანექ ხილუას ძირჷ „ანაყუ ხალხ“, მიდგაქ „დიდ გაჭირება მიკორთეს“ (გამოცხ. 7:9, 14). თავრეშე არგამათ იძირე, ნამდა იეჰოვა დოთხილანს თინეფს!

15, 16. მუჭოთ გამოცხადებაშ 17:14-შე ბგებულენთ, მუს გაკეთენა ცხებულეფ არმაგედონიშ დროს დო მუშენ რე თენა გურიშ ემაკინალ?

¹⁵ ნამთინეს შილებე ცხებულეფიშ ამბე ოინტერესუდას. მუს ქიმინუნა თინეფ, მუჟამსით ზეცაშა მიდულა? ბიბლია პირდაპირ ირზენს თეშ პასუხის. თინა მოგებაფუანა, ნამდა მთავრობეფ „კირიბიშ“ წინააღმდეგ ობრძოლებშა გიშელენა. მუშო ოკო რაგად, „კირიბ გიორჯგინანს თინეფს“. მი მეხვარებ თის თე ბრძოლას? ბიბლიას ბკითხულენთ: „მოწოდებულეფ, გიშაგორილეფ დო ართგურეფ“ (წეკითხით  გამოცხადებაშ 17:14). მი იგულისხმებ თე სიტყვეფს? ზეციერ ცხოვრებაშო გათელებურ ცხებულეფ! ზეცაშა ულაშ უკულ თინეფიშ პირველ დავალება იჸუაფ ბრძოლა. ართ წუთის დეფიქრით: ნამთინე ცხებულ ქრისტიან ჭეშმარიტებაშ გაგებაშახ მაჩხუპერ რდჷ; ნამთინე გვალო ჯარს მსახურენდჷ. მარა, მუჟამსით ჭეშმარიტ ქრისტიანეფო გინირთეს, იარაღ გეგნაჸათეს დო მშვიდობიან ცხოვრება ქიდიჭყეს (გალ. 5:22; 2 თეს. 3:16). მარა ზეცაშა ულაშ უკულ თინეფ ქრისტეწკუმა დო ანგელოზეფწკუმა ართო ღორონთიშ ნტერეფიშ წინააღმდეგ საბოლა ომს, არმაგედონს, მიღენა მონაწილებას.

¹⁶ ბრელ ცხებულ, ნამუთ ამდღა დედამიწას ცხოვრენს, მანგარ ხანშამიშულირ რე; ნამთინე გვალო მოტახილ რე. მარა, მუჟამსით ზეცას გეთელებუნა, იჸუაფუნა ძალიერ, უკვდავ სულიერ ქმნილებეფ დო მიღენა დავალებას, ნამდა ჩქინ მეფე, იესო ქრისტეწკუმა ართო იბრძოლან. არმაგედონიშ უკულ თინეფ ქრისტეწკუმა ართო უხემძღვანელენა კაცობრიობაშ გასრულყოფილებაშ საქმეს. არგამა რე, თინეფს შეიალებენა ბრელით უმოს გაკეთან დედამიწას მახორუ საჸოროფო და დო ჯიმალეფშო, ვინემ დღას აკეთებედეს, მუჭოთ არასრულყოფილ ადამიანეფს!

17. სოვრეშე მიჩქუნა, ნამდა ღორონთიშ მსახურეფ თხილერ იჸუაფუნა არმაგედონიშ დროს?

¹⁷ შხვა შხურიშ წარმომადგენელ ქორექ-და, მუ ოკო აკეთე, მუჟამსით არმაგედონიშ ომ ქიდიჭყაფუ? ბრელ მუთუნ ვარ; მიენდ იეჰოვას დო მიაჸუნ თიშ ხემძღვანელობას. მუ მიშურს თეშა? ბიბლია ელამჩანა: „მინილით თქვან-თქვან ოთახეფშა დო ქინიკილეთ კარეფ! ჭიჭე ხანს დიტყობით, ონდო რისხუა ვეგნიშას“ (ეს. 26:20). ღორონთიშ არძა ართგურ მსახურ, ზეცას დოვარ დედამიწას, თხილერ იჸი. მოციქულ პავლეცალო ჩქი ხოლო დარწმუნებულ ვორეთ, ნამდა „ვართ ხელისუფლებეფს, ვართ თის, მუთ ასე რე დო მუთ ანწ იჸუაფ, . . . ვეშიალებე განკმოჸოთან ღორონთიშ ჸოროფას“ (რომ. 8:38, 39). ირიათო რშუდან, იეჰოვას უჸორთ დო თინა დღას ვემგოტენა!