1. Ombian̈a ma irô voahosotro jiaby mbala tavela ambony tany eto, ho lôso an-dan̈itry an̈y?

 EFA tan̈atin’ny taon̈o maro vahoakan’i Jehovah nieritreritry karaha ty: ‘Ombian̈a ma irô voahosotro mbala tavela ambony tany eto ho lôso an-dan̈itry an̈y jiaby?’ Atsika taloha nieritreritry fa, mbala hisy voahosotro ho tavela ambony tany eto amy Paradisa, koa fa vita ady Aramagedona. Kanefa, nianarantsika tamy Tilikambo Fiambesan̈a 15 Zie 2013 fa lan̈iany voahosotro mbala tavela ambony tany eto, ho lôso an-dan̈itry an̈y, alohan’ny hanombohan’ny Aramagedona.​—Mat. 24:31.

2. Ino fan̈ontanian̈a mety hipetraka, baka iô ino raha hidinihintsika amy lahatsoratra ty?

² Fa karaha ty ndraiky fan̈ontanian̈a mipetraka: Izikoa fa an̈atin’ny fahorian̈a be an̈y, han̈ano karakôry irô ôndrikôndrikin’i Kristy, manompo Jehovah sady tsy mivadiky aminany, ambony tany eto aby io? (Jaona 10:16; Mat. 24:21) Olo mety mieritreritry fa karaha hialan̈a, na harian̈a foeky irô, izikoa fa lôso an-dan̈itry irô voahosotro aby io. Alô baka atsika handiniky tantara aroe amy Baiboly, mety nahavy irô hieritreritry karaha zen̈y. Hidinihintsika amy zay baka iô nan̈ino atsika tsy tôkony havozo, ndray tsy iô irô voahosotro aby io.

INO RAHA TSY HO HISY?

3-4. Ino raha mety ho avy an̈atin’ny jerin’olo sasany, aviô nan̈ino?

³ Misy olo mety hieritreritry fa hiala amy fahamarin̈ana aby ôndrikôndriky hafa jiaby, izikoa fa tsy iô eky irô rahalahy voahosotro an̈isan’ny Filan-kevi-pitantan̈ana. Mety ho hisy tantara baka amy Baiboly mahavy irô havozo karaha zen̈y. Atsika handiniky ohatra aroe amy zen̈y. Raha nisy tamy faha Joiada mpisôron̈o hidinihintsika voanalohany. Joiada io an̈isan’ny mpanompon’i Jehovah tsy nivadiky. Irô roen’i Josebata vadiny niaro tsaiky hely araiky, Joasy an̈arany, aviô nan̈ampy izy hanjary mpanjaka tsara ndreky tsy nivadiky. Tamy Joiada mbala velon̈o,  nan̈ano ny tsara fo Joasy, fa Joiada koa fa naty, niova Joasy. Nan̈araka volan̈an’ny andriana ratsy fan̈ahy aby io izy, ke niala tamy Jehovah.​—2 Tan. 24:2, 15-19.

⁴ Ohatra faharoe, raha nandalo tamindrô Israely aby io, tamy taonjato faharoe. Apostoly Jaona faran’ny ela velon̈o tamin’ny apostoly jiaby. Izy tamy zen̈y ten̈a nankahery Kristianin̈y maro, nan̈ampy irô hiaritry tamy fanompoan̈a Jehovah. (3 Jaona 4) Mira raha nataondrô apostolin’i Jesosy aby io raha nataony. Nifen̈y izy niaro fiangonan̈a tamy fivadiham-pinoan̈a niparitaka tamy zen̈y. (1 Jaona 2:18; 2 Tes. 2:7) Fa apostoly Jaona koa fa naty, niparitaka nira môtro nahazo hiaka in̈y fivadiham-pinoan̈a. Ke taon̈o maro tafaran’izin̈y, nanjary tsy hay foeky azôvy nan̈araka fivavahan̈a marin̈y.

5. Atsika koa fa baka nandiniky tantara aroe in̈y, ino raha tsy tôkony hataontsika an̈atin’ny jerintsika?

⁵ Tantara aroe nidinihintsika tiô in̈y ma mivolan̈a fa, ho mira raha nandalo taloha in̈y koa raha handalo, lera irô irô voahosotro aby io lôso an-dan̈itry? Aviô irô Kristianin̈y tsy mivadiky aby ambony tany eto amy zen̈y ma tsy han̈araka fampiofan̈ana irô, karaha nataon’i Joasy in̈y, ndreky hivadi-pinoan̈a karaha irô Kristianin̈y maro tamy taonjato faharoe in̈y koa? Valiny: Irô tsy han̈ano karaha zen̈y foeky! Matokisa fa irô voahosotro aby io koa fa lôso jiaby, mbala ho voakarakara tsara fo irô ôndrikôndriky hafa jiaby, ary mbala hifen̈y hanompo Jehovah fo koa. Nan̈ino ma atsika matoky zen̈y?

TSY HO RAVAN̈A FIVAVAHAN̈A MARIN̈Y

6. Ino aby irô vanim-potoan̈a telo handeha hidinihintsika?

⁶ Nan̈ino ma atsika matoky fa, tsy ho ravan̈a fivavahan̈a marin̈y, ndray maro sarotro raha mbala handalovantsika amin’ny amaray? Fôtony haintsika raha momba vanim-potoan̈a iain̈antsika iziôty. Izio tsy mira amy vanim-potoan̈a tamy faha Israely taloha tan̈y, ndreky tamy nin’ny Kristianin̈y tamy taonjato faharoe foeky. Ke alô hidinihintsika marikitry, irô vanim-potoan̈a telo aby ty: 1) Tamy faha Israely taloha tan̈y, 2) tafaran’ny nifatesandrô apostoly aby io, aviô 3) fotoan̈a misy atsika iziôty, ‘fotoan̈a han̈areman̈a raha jiaby.’​—Asa. 3:21.

7. Tamy faha Israelita taloha tan̈y, nan̈ino irô olo tsy nivadiky tamy Jehovah aby io nanjary nahazo angôvo, nata firenena io ndreky mpanjakandrô nan̈ano ny ratsy?

⁷ Tamy faha Israely taloha tan̈y. Ho Mosesy tamindrô Israelita aby io, tsy ela talohan’ny nifatesany: “Haiko tsarabe fa zaho koa maty, anarô tsy maintsy han̈ano raha ratsy, ke hiala amy lalan̈a nirahiko narehanarô.” (Deot. 31:29) Mosesy koa efa nampitandrin̈y fa irô koa mivadiky amy Jehovah, halefa sesitany firenena io. (Deot. 28:35, 36) Tanteraka ankitin̈y ma zen̈y? Ia. Anjatony taon̈o tafaran’izin̈y, maro mpanjaka tsy nan̈araka volan̈an’i Jehovah, ke nan̈araka raha nataondrô koa vahoakan’ny Zan̈ahary ke nanompo sampy. Zen̈y nahavy Jehovah nan̈asazy vahoaka io, aviô tsisy mpanjaka nikeny hisolo ten̈a izy eky tamy firenena io. (Ezek. 21:25-27) Fa Israelita sasany tsy nivadiky aby io ndraiky nanjary nahazo angôvo, izikoa fa nahita fa tanteraka volan̈an’i Jehovah.​—Isaia 55:10, 11.

8. Hazavà nan̈ino atsika tsy tôkony ho gaga izikoa nisy mpivadi-pinoan̈a tamy fiangonan̈a kristianin̈y, tamy taonjato faharoe.

⁸ Vanim-potoan̈a tafaran’ny nifatesandrô apostoly aby io. Nan̈ino ma tsy tôkony hahagaga atsika izikoa nisy mpivadi-pinoan̈a tamy fiangonan̈a tamy taonjato faharoe tan̈y io? Fôtony Jesosy efa nan̈ambara tsialohaloha fa, hahazo vahan̈a mare mpivadi-pinoan̈a aby io. (Mat. 7:21-23; 13:24-30, 36-43) Iry apostoly Paoly, Petera ndreky Jaona samy nankamafy koa fa efa nanomboko tanteraka faminanian̈a nambaran’i Jesosy io, tamy taonjato voanalohany. (2 Tes. 2:3, 7; 2 Pet. 2:1; 1 Jaona 2:18) Tamy taonjato faharoe amy zay, efa feno mpivadi-pinoan̈a tamy fiangonan̈a kristianin̈y. Tafaran’ny nifatesan’ny  apostoly farany, irô mpivadi-pinoan̈a niaboko irô ho Kristianin̈y aby io, nanjary an̈isan’ny Babylony Be na fivavahan̈a diso eran-tany. Tanteraka ankitin̈y raha nivolan̈in’i Jesosy in̈y.

9. Ino tsy mampitovy fotoan̈a iain̈antsika iziôty amy vanim-potoan̈an’ny Israely taloha tan̈y ndreky tamy taonjato faharoe?

⁹ “Fotoan̈a han̈areman̈a raha jiaby.” Fotoan̈a misy atsika iziôty tsy mira tamy vanim-potoan̈an’ny Israely taloha tan̈y, ndreky fotoan̈a nisian’ny fivadiham-pinoan̈a tamy taonjato faharoe io. Ino ma ikahian̈a fotoan̈a misy atsika iziôty? Efa mahazatra atsika fa “andra farany” ikahian̈a izio. (2 Tim. 3:1) Fa ambaran’ny Baiboly mazava koa fa nisy vanim-potoan̈a niavaka nanomboko tamin’ny andra farany io. Hitohy fo izio, mandra-pahavitan’ny Fanjakan̈an’i Mesia han̈ampody olo amy fahalavorarian̈a, ndreky hahavitan’izio han̈ova tany ty hanjary paradisa. An̈aran’ny vanim-potoan̈a io, ‘fotoan̈a fan̈areman̈a raha jiaby.’ (Asa. 3:21) Izio nanomboko tamy taon̈o 1914. Ino ma raha aremin̈y io? Jesosy nanjary mpanjakan’ny Fanjakan̈an’ny Zan̈ahary tan-dan̈itry tan̈y. Safe nanjary nisy mpitondra nisolo ten̈a Zan̈ahary ndraiky koa tamy taranakan’i Davida mpanjaka. Fa kanefa tsy zen̈y zaraiky fo raha naremin’i Jehovah. Tsy ela tafaran’izin̈y, nampody ndraiky koa fivavahan̈a madio. (Isaia 2:2-4; Ezek. 11:17-20) Fa mbala hidaon̈ana ho ravan̈a ndraiky koa ma fivavahan̈a madio io?

10. a) Ino ma faminanian̈a nambaran’ny Baiboly momba fivavahan̈a madio amin’ny andrantsika iziôty? b) Nan̈ino ma man̈amia toky atsika faminanian̈a aby io?

¹⁰ Vakia Isaia 54:17. Diniha baka faminanian̈a ty: “Tsisy hahômby zay raha fiadiavan̈a amboarin̈y hamangoan̈a anao”! Efa manomboko tanteraka volan̈a aby io iziôty. Fa misy volan̈a maro mankahery koa ty tanteraka amin’ny andra iziôty: ‘Iry zanakanao jiaby ampianarin’i Jehovah aby, ke ho be fiadan̈anan’ny zanakanao. Anao hiôrin̈y tsarabe amy fahamarin̈ana. ... Tsisy raha tôkony havozoanao, aviô tsisy raha tôkony hampangôrohôro anao, fôtony raha zen̈y tsy harikitry anao.’ (Isaia 54:13, 14) Nata Satana “zan̈aharin’ny donia ty” mbala tsy mahavita mampijanon̈o asa fampianaran̈a ataon’ny vahoakan’i Jehovah fo. (2 Kor. 4:4) Tafimpody ndraiky fivavahan̈a marin̈y, aviô izio tsy ho ravan̈a foeky. Izio haharitry mandrakizay. Tsisy hahômby zay raha fiadivan̈a hamangoan̈a atsika!

INO RAHA HANDALO?

11. Nan̈ino atsika matoky fa irô vahoaka be aby io mbala ho voakarakara tsara fo, izikoa efa lôso an-dan̈itry voahosotro jiaby?

¹¹ Izikoa fa lôso an-dan̈itry an̈y irô voahosotro jiaby mbala tavela ambony tany eto, ino raha hiboaka?  Tsarova fa Jesosy mpiambin̈y atsika. Izy lohan’ny fiangonan̈a kristianin̈y. Mazava volan̈an’i Jesosy ty: ‘Araiky fo mpitariky anarô, Kristy zen̈y.’ (Mat. 23:10) Mpanjaka hitondra atsika io tsiary ndraiky tsy nahavita asanany. Izy Kristy, ke lera izy mitondra, tsisy raha tôkony hatahoran’ny mpan̈ara-dia izy. Ndray izy man̈ano zen̈y, mbala tsendriky haintsika amin’ny an-tsipiriany, karakôry hataon’i Kristy hitariky vahoakanany amy fotoan̈an’izen̈y. Zen̈y mahavy atsika iziô handiniky ohatra sasany amy Baiboly, mety hahavy atsika hahatoky tsarabe.

12. Akôry nataon’ i Jehovah nikarakara vahoakanany a) tafaran’ny nifatesan’ i Mosesy? b) Tafaran’ i Elia nahazo fanendrena vaovao? (Zahava koa sary.)

¹² Talohan’ny irô Israelita aby io hiditry tamy Tany Nampan̈antinain̈y, Mosesy naty. Ke nan̈ano karakôry vahoakan’ny Zan̈ahary aby io? Efa tsy nan̈ampy irô eky ma Jehovah, fôtony efa tsy tiô Mosesy? Mbala nan̈ampy irô fo Jehovah, izikoa irô tsy nivadiky taminany. Talohan’i Mosesy naty in̈y, Jehovah nan̈iraka izy hanendry Josoa hitariky vahoakanany. Aviô, tan̈atin’ny taon̈o maro i Mosesy nampiofan̈a Josoa. (Eks. 33:11; Deot. 34:9) Fa nisy lelahy maro mahay koa tamy zen̈y nirahin̈y nitariky vahoaka aby io. Tan̈atin’izen̈y irô mpifehy olo arivo, olo zato, olo dimampolo, ndraiky firaka amin’olo folo. (Deot. 1:15) Navoakarakara tsarabe vahoakan’i Jehovah tamy zen̈y. Misy ohatra hafa koa tamy faha Elia. Izy nitariky irô Israelita aby io tan̈atin’ny taon̈o maro hanompo Jehovah. Fa tandraraiky Elia nahazo fanendrena vaovao tamy Jehovah, ke nifindra tatsimon’i Joda tan̈y. (2 Mpanj. 2:1; 2 Tan. 21:12) Ke dikan’izen̈y ma, tsy nijiren̈a eky irô olo tsy nivadiky tamy fanjakan̈an’ny foko folon’ny Israely? Mbala navoakarakara fo irô, fôtony Elia efa nampiofan̈a Elisa tan̈atin’ny taon̈o maro. Fan̈ampin’izen̈y mbala tiô koa irô “zanakan’ny mpaminan̈y” efa nampiofanin̈y tamy lekoly. (2 Mpanj. 2:7) Ke hita baka amy zen̈y fa, mbala naro lelahy tsy nivadiky tamy Zan̈ahary, ke nahavita nitatahy tamy fitaritan̈a vahoakanany. Mbala nan̈atanteraka fikasan̈anany fo Jehovah tamy zen̈y, ke izy tsy vôly nikarakara mpanomponany tsy nivadiky aby io.

13. Ino toky amian’ny Hebreo 13:5b atsika? (Zahava koa sary.)

¹³ Anao koa fa mandiniky ohatra aroe io, fahitanao izy ma ino raha hiboaka, izikoa fa lôso an-dan̈itry irô voahosotro jiaby? Atsika tsy mila miasaloha amy zen̈y. Tsotra valiny amian’ny Baiboly, fahamarin̈ana man̈amia toky atsika ty: Jehovah tsy han̈ary olonany ambony tany eto foeky. (Vakia Hebreo 13:5b.) Karaha Mosesy ndreky Elia in̈y, irô Kristianin̈y voahosotro vitsivitsy mitariky amin’ny andra iziôty koa mahay fa, ten̈a ilain̈a mampiofan̈a olo hafa. Tan̈atin’ny  taon̈o maro zay Filan-kevi-pitantan̈ana efa nampiofan̈a lelahy an̈isan’ny ôndrikôndriky hafa, hitariky vahoakan’i Jehovah. Ohatra amy zen̈y, irô nandamin̈y lekoly maro hampiofan̈ana anti-pan̈ahy, mpiandraikitry mpitety faritany, irô an̈isan’ny Komitin’ny Sampan̈a, mpiandraikitry amy Betela, ndreky olo hafa koa. Filan-kevi-pitantan̈ana lastiô koa efa mampiofan̈a mpan̈ampy irô, amin’ny andraikitry maro ataon’ny Komity amy Filan-kevi-pitantan̈ana. Ke rango iziôty, irô mpan̈ampy amy Filan-kevi-pitantan̈ana aby io efa man̈ano tsarabe andraikitry mavesatra ampan̈anaovin̈y irô io. Ke irô efa vôn̈ono tsarabe hanohy asa fikarakaran̈a irô ôndrikôndrikin’i Kristy aby io.

14. Ino hevitry maventy baka amy raha nidinihintsika tiô in̈y?

¹⁴ Karaha ty hevitry maventy tamy raha nidinihintsika aby tiô in̈y: Izikoa fa lôso an-dan̈itry an̈y irô voahosotro jiaby, alohan’ny hifaran̈an’ny fahorian̈a be, fivavahan̈a madio io mbala ho hisy fo ambony tany eto. Irô ôndrikôndrikin’i Jehovah aby io mbala hanompo izy ndreky tsy hivadiky aminany fo, fôtony Jesosy Kristy mitariky irô. Haintsika ndraiky fa amy fotoan̈an’izen̈y, Goga baka a Magoga, na firenena maromaro mitambatra, hanafiky vahoakan’ny Zan̈ahary. (Ezek. 38:18-20) Kanefa, tsy hahadin̈y ela fan̈afihan̈a ataondrô zen̈y, sady tsy hahavita hisakana vahoakan’ny Zan̈ahary tsy hanompo Jehovah. Izy tsy maintsy hamonjy vahoakanany! Tamy fahitan̈a, apostoly Jaona nahita “vahoaka be.” Irô io ôndrikôndriky hafan’i Kristy. Jaona nivolan̈a fa “vahoaka be” io “baka amy fahorian̈a be.” (Apok. 7:9, 14) Dikan’izen̈y, irô io tsy hofoaty amy fahorian̈a be!

15-16. Eraka Apokalypsy 17:14, han̈ino ma Kristianin̈y voahosotro aby io amin’ny ady Aramagedona, aviô nan̈ino raha zen̈y mankahery atsika?

¹⁵ Fa mbala misy olo fo han̈ontany karaha ty: ‘Han̈ano akôry fo irô voahosotro aby io? Ino ma raha handeha hataondrô, irô koa fa avy an-dan̈itry an̈y?’ Ambaran’izio ao fa fanjakan̈an’olombelon̈o “hiady amy Zanakan’ny Ôndrikôndriky.” Mazava ho azy baka fa ho resy irô io! Karaha ty koran̈in’ny Baiboly: “Ho resin’ny Zanakan’ny Ôndrikôndriky io irô. Azôvy amy zay hitatahy Zanakan’ny Ôndrikôndriky io amin’ny ady io? Andininy io fo mamaly izy: Irô “voakaiky”  ndreky “voafidy” sady “tsy nivadiky.” (Vakia Apokalypsy 17:14.) Azôvy ma zen̈y? Irô voahosotro nivilômin̈y handeha an-dan̈itry an̈y aby io. Ke irô voahosotro aby mbala tavela ambony tany eto koa fa avy an-dan̈itry an̈y, alohan’ny faran’ny fahorian̈a be io, raha voanalohany an̈irahan̈a irô an̈y, handeha hiady. Raharaha koa zen̈y! Nan̈ino atsika matoky fa ho vitandrô han̈ano zen̈y? Sasany amindrô io, tamy mbala tsendriky Vavolombelon̈on’i Jehovah, efa navy mpiady. Sasany koa efa navy maramila tamy tafiky tamy donia ty. Fa irô koa fa nanjary Kristianin̈y ke nampianarin̈y hihavan̈a amin’olo, irô niova. (Gal. 5:22; 2 Tes. 3:16) Irô efa tsy niady eky. Fa kanefa, irô koa fa hivilômin̈y handeha an-dan̈itry an̈y, irô hiaraka miasa amy Jesosy Kristy ndreky irô anjelinany tsy mivadiky aby io, ke han̈ano ady farany, hiady amy fahavalon’ny Zan̈ahary.

¹⁶ Diniha baka zen̈y. Sasany amindrô Kristianin̈y voahosotro aby io tambony tany teto, efa matoe mare, aviô efa reraka mare. Fa irô koa fa hivilômin̈y hengo an-dan̈itry an̈y, irô hanjary anjely matanjaka ndreky tsy mety maty. Irô amy zay ho voatendry hiaraka hiady amy Jesosy Kristy, Mpiady sady Mpanjaka io. Fa izikoa fa vita ady Aramagedona, irô hiaraka amy Jesosy, han̈ampody olombelon̈o hanjary lavorary. Matoky tsarabe atsika fa, irô amy zen̈y hahavita tsarabe hikarakara irô rahalahindrô ndreky anabavindrô ambony tany eto, mandilatran’ny taloha!

17. Akôry hahaizantsika fa ho voaro aby lan̈iany mpanompon’ny Zan̈ahary tsy mivadiky aminany, amin’ny ady Aramagedona?

¹⁷ Izikoa anao an̈isan’ny ôndrikôndriky hafa, ino raha mila ataonao, izikoa fa avy ady Aramagedona io? Matokisa Jehovah, aviô areha toromariky amezany. Ino ma raha tafiditry amy zen̈y? Mankahery atsika raha koran̈in’ny Baiboly ty: “Midira an̈atin’ny efitrin’ny tran̈onao an̈y, vahoakanaka. Afodia amin-jay varavaran̈anao. Misitriha ao hely antsendriky anao, mandra-pitaperan’ny helokon’ny Zan̈ahary.” (Isaia 26:20) Ho voaro aby lan̈ian’ny mpanompon’ny Zan̈ahary tsy mivadiky aminany, na irô an-dan̈itry an̈y, na irô ambony tany eto amy zen̈y. Karaha apostoly Paoly, matoky atsika fa “na fanjakan̈a, na raha iziôty, na raha ho avy, ... tsy hahavita hampisaraka atsika amy fitiavan̈an’ny Zan̈ahary.” (Rom. 8:38, 39) Ke aza adin̈a foeky fa Jehovah tia anao, aviô izy tsy han̈ary anao foeky!