1. Ana Aklistu wosope ŵasagulwe chachijigalidwa chakachi kwawula kwinani?

 YAKA yejinji munyumamo, ŵakutumichila ŵa Yehofa ŵaŵele ali mkuliwusya kuti, ‘Ana Aklistu ŵasagulwe ŵakumalisya chachijigalidwa chakachi kwawula kwinani?’ Twaganisyaga kuti Aklistu ŵasagulwe ŵane chachisigala pachilambopa m’Paladaiso panyuma pa ngondo ja Alamagedo. Nambo Sanja ja Mlonda ja Julayi 15, 2013, jasasile kuti Aklistu ŵasagulwe wosope ŵachachiŵa chiŵela pachilambopa chachijigalidwa kwawula kwinani ngondo ja Alamagedo mkanijitande.—Mat. 24:31.

2. Ana ni chiwusyo chapi champaka chipagwe soni ana chitukambilane chichi munganiji?

² Nambo chiwusyo mpaka chiŵe chakuti: Ana ni chichi chachichatendechela Aklistu ŵa “ngondolo sine” ŵachachimtumichilaga Yehofa mwakulupichika pachilambopa mkati mwa “yakusawusya yekulungwa”? (Yoh. 10:16; Mat. 24:21) Ŵane masiku agano mpaka adandawuleje kuti chachisoŵa chitela chakamula panyuma pakuti Aklistu ŵasagulwe ajigalidwe kwawula kwinani. Kwende tukambilane ngani siŵili sya m’Malemba syampaka syatendekasye kuganisya yeleyi. Kaneko chitukambilane magongo gampaka gatendekasye kuti akadandawulaga ni nganiji.

YINDU YANGASIYATENDECHELA ŴA NGONDOLO SINE

3-4. Ana ŵandu ŵane mpaka adandawuleje ni chichi soni ligongo chichi?

³ Ŵandu ŵane mpaka adandawuleje kuti ŵa ngondolo sine chachileka kumtumichila Mlungu abale ŵasagulwe ŵa m’Likuga Lyakulongolela pachachijigalidwa kwawula kwinani. Mwine mpaka atande kuganichisya yeleyi ligongo lya yindu yayatendechele ŵakutumichila ŵane ŵa Mlungu kala yayikusasimanikwa m’Malemba. Kwende tukambilane yisyasyo yiŵili panganiji. Chandanda chili chakwayana ni Jwamkulungwa jwa Ŵakutaga Mbopesi, Yehoyada. Jwalakwe jwaliji jwakutumichila jwa Mlungu jwakulupichika. Jwalakwe yalumo ni ŵamkwakwe, Yehosheba ŵamkamuchisye mnyamata lina lyakwe Yowashi kuti aŵe mwenye jwambone soni jwakulupichika. Pandaŵi josope jaŵaliji chijumi Yehoyada, Yowashi ŵatendaga yambone. Nambo panyuma pakuti Yehoyada awile, Yowashi  ŵatandite kutenda yakusakala. Ŵatandite kwapikanila achakulungwakulungwa ŵakusakala mwamti ŵalesile kumtumichila Yehofa.—2 Mbi. 24:​2, 15-19.

⁴ Chisyasyo chaŵili chili cha Aklistu wosope ŵaŵatemi ni umi panyuma pakuti ŵandumetume wosope awile. Ndumetume Yohane juŵamalichisye kuŵa ni umi pa ŵandumetume wosope pachilambopa ŵaliji mkwakamuchisya Aklistu kuti aŵe ŵakupilila soni ŵakulupichika pakumtumichila Yehofa. (3 Yoh. 4) Mpela muyaŵelele ni ŵandumetume ŵakulupichika ŵane ŵa Klistu, Yohane jwaliji mkwakamuchisya Aklistuŵa kuti akajigalika ni yijiganyo yaunami yayaliji yakuwanda pandaŵijo. (1 Yoh. 2:18; 2 Ates. 2:7) Nambo panyuma pakuti Yohane awile, yijiganyo yaunami yatandite kuwanda mu mpingo wa Chiklistu. Mwamti kwa yaka yamnono, mpingo wa Chiklistu waliji uli ugumbele ni ŵandu ŵakwimuchila.

5. Ana patukuganichisya ya ngani siŵili sya m’Malembasi tuŵambaleje kuganichisya ya chichi?

⁵ Ana ngani siŵili sya m’Malembasi sikulosya kuti yakulandanayi ni yayichatendechela Aklistu ŵa ngondolo sine panyuma pakuti Aklistu ŵasagulwe ajigalidwe kwawula kwinani? Ana pandaŵiji, Aklistu ŵakulupichika pachilambopa chachileka kumtumichila Mlungu mpela muyaŵelele ni Yowashi kapena chachitanda kukulupilila yindu yaunami mpela muyaŵelele ni Aklistu ŵaŵatemi ni umi panyuma pakuti ŵandumetume wosope awile? Kusala yisyene yeleyi ngasiyitendekwa ata panandi. Tuli ŵakusimichisya kuti Aklistu ŵasagulwe pachachityokaga pachilambopa, Aklistu ŵa ngondolo sine chachiŵa ali mkutumichila Yehofa mwakulupichika, nambosoni Yehofa chachiŵa ali mkupitilisya kwasamalila jemanjaji. Ligongo chichi tukusosekwa kukulupilila yeleyi?

ŴANDU CHACHIPITILISYA KUMTUMICHILA YEHOFA MWAKUSASACHILA JWALAKWE

6. Ana chitukambilane yakutendekwa ya mundaŵi sitatu syapi?

⁶ Ligongo chichi ngatukusosekwa kukayichila yakuti ŵandu chachipitilisya kumtumichila Yehofa mwakusasachila jwalakwe atamose mundaŵi jakusawusya jatukujijembecheya kusogoloku? Yindu yatukusalijiganya m’Baibulo yakwamba ndaŵi jatukutamaji yikusatukamuchisya kuti tukakayichilaga ya yeleyi. Ndaŵi jatukutamaji jili jakulekangana mnope ni ndaŵi ja Ayisalayeli ŵakala soni ndaŵi jiŵatemi Aklistu panyuma pakuti ŵandumetume wosope awile. Sambano kwende tukambilane yakutendekwa ya mundaŵi sitatu syelesi. (1) Yakutendekwa ya mundaŵi ja Ayisalayeli ŵakala, (2) yakutendekwa ya mundaŵi ja Aklistu ŵaŵatemi ni umi panyuma pakuti ŵandumetume wosope awile, soni (3) yakutendekwa ya mundaŵi jetu jino, jajili ndaŵi “jakuwuchisyasoni yindu yosope.”—Mase. 3:21.

7. Ligongo chichi Ayisalayeli ŵakulupichika nganawujila munyuma paŵaweni achayimwene soni Ayisalayeli achimjawo ali mkutenda yakusakala?

⁷ Yakutendekwa ya mundaŵi ja Ayisalayeli ŵakala. Mose ali asigele panandi kuwa, ŵasalile Ayisalayeli kuti, “Ngumanyilila kuti patinjiwa une ŵandu wosope tachiŵa ŵakusakala, ni tachiyikana yosope yasasileyi. Nambo panyuma pakwe tachiyiwona yisawusyo yekulungwa, AMBUJE tachitumbila ligongo lyakutenda yindu yakusakala yele yakuyikana jwalakwejo.” (Det. 31:29) Nambosoni Mose ŵakalamwisye Ayisalayeli kuti naga chamjimuchile Mlungu, nikuti mtundu wosope uchijawula ku ukapolo. (Det. 28:​35, 36) Ana maloŵega gakwanilichikwe? Elo. Kwa yaka yejinji, achayimwene ŵajinji ŵa Ayisalayeli ŵatendaga yakusakala soni ŵatendekasyaga Ayisalayeli ŵajinji kuleka kumtumichila Mlungu ni kutanda kujitumichila milungu jine. Yeleyi yamtendekasisye Yehofa kwapa chilango ŵandu ŵakusakalaŵa nambosoni kumasya dongosolo ja achayimwene mu mtundu wa Ayisalayeli. (Esek. 21:​25-27) Nambo chikulupi cha Ayisalayeli ŵakulupichika chalimbile paŵayiweni kuti maloŵe ga Mlungu gakwanilichikwe.—Yes. 55:​10, 11.

8. Ana kusokonechela kwa mpingo wa Chiklistu panyuma pakuti ŵandumetume wosope awile kukwenela kutusimonjesya? Alondesye.

⁸ Yakutendekwa ya mundaŵi ja Aklistu ŵaŵatemi  ni umi pandaŵi jakuti ŵandumetume wosope awile. Ana yaŵatesile Aklistu ŵane pakutanda kulupilila yijiganyo yaunami panyuma pakuti ŵandumetume wosope awile yikwenela kutusimonjesya? Iyayi. Yesu ŵasasile mkanipaŵe kuti pachipagwa ŵandu ŵakwimuchila. (Mat. 7:​21-23; 13:​24-30, 36-43) Jwandumetume Paulo, Petulo soni Yohane ŵaŵichile umboni wakuti yajwasasile Yesuyi yaliji yili yitandite kala kutendekwa. (2 Ates. 2:​3, 7; 2 Pet. 2:1; 1 Yoh. 2:18) Mwamti panyuma pakuti ŵandumetume wosope awile, mpingo wa Chiklistu waliji uli ulesile kumtumichila Mlungu mwakulupichika. Chiklistu chaunami chatandite kuwanda, mwamti chaŵele mbali ja Babulo jwamkulungwa wawuli uchimwene wa dini jaunami. Pelepasoni yakulochesya ya m’Baibulo yakwanilichikwe.

9. Ana ndaŵi jatukutamaji jikulekangana chamtuli ni ndaŵi ja Ayisalayeli ŵakala soni ndaŵi ja Aklistu ŵaŵatemi panyuma pakuti ŵandumetume wosope awile?

⁹ ‘Ndaŵi jakuwuchisyasoni yindu yosope.’ Ndaŵi jetu jino jili jakulekangana mnope ni ndaŵi ja Ayisalayeli ŵakala soni ndaŵi jele yijiganyo yaunami yajinjile mu mpingo wa Chiklistu panyuma pakuti ŵandumetume wosope awile. Ana Baibulo jikusasala kuti tukutama mundaŵi jamtuli? Mpaka tujikolanje ndaŵi jatukutamaji kuti “masiku gakumalisya” ga ndaŵi jakusakala. (2 Tim. 3:1) Baibulo jikusasalasoni kuti jeleji jili ndaŵi jelewu. Ndaŵi jeleji chijipitilisye mpaka Uchimwene wa Umesiya uli wakamuchisye ŵandu kuŵasoni ŵamlama soni kuchenga chilambochi kuŵa paladaiso. Ndaŵi ja yakutendekwa yeleyi jikusakolanjidwa kuti ‘ndaŵi jakuwuchisyasoni yindu yosope.’ (Mase. 3:21) Ndaŵi jeleji jatandite mu 1914. Ana ni chichi chaŵawuchisye pandaŵiji? Yesu jwaŵichidwe kuŵa Mwenye kwinani. Myoyo pandaŵiji Yehofa jwakwete jwakulamulila juŵamjimilaga jwalakwe soni juŵajinjile mmalo mwa mwenye jwakulupichika Daudi. Nambope, Yehofa nganagamba kuwuchisya uchimwene pewu. Panyuma pa yeleyi, kulambila kweswela kwatandilesoni. (Yes. 2:​2-4; Esek. 11:​17-20) Ana kulambila kweswelaku kwaliji kwakuti chikumalesoni?

10. (a) Ana Baibulo jasasile yamtuli pakwamba ya kulambila kweswela mundaŵi jetu jino? (Yesaya 54:17) (b) Ligongo chichi yajasasile Baibuloyi yili yangakayikasya?

¹⁰ Aŵalanje Yesaya 54:17. Aganichisye ya maloŵe gakulochesya gakuyichisyaga, gakuti “pangali chida chepanganyidwe ni mmagongo tichichimpweteka mmwejo.” Maloŵe gelega gakukwanilichikwa masiku agano. Nambosoni maloŵe ga pa Yesaya 54:​13, 14 gakukwanilichikwa masiku agano. Maloŵega gakusati, “Ŵandu ŵenu tinjajiganya jika une AMBUJE, ŵanache ŵenu tinjapa upile ni kwapa mtendele wekulungwa. . . . Yakogoya yosope tiyichiŵa patali ngasiyiyikasoni pakuŵandichila.” Konjechesya pelepa atamose Satana jusyesyenejo jwali “mlungu jwa ndaŵi ajino” nganaŵa akombwele kwimika masengo gakwiganya gakukamula ŵandu ŵa Yehofa. (2 Akoli. 4:4) Myoyo, kulambila kweswela kwawujile mwamti ngasikumalasoni, kuchitama mpaka kalakala.  Kusala yisyene, pangali chida chelinganyidwe ni mmagongo champaka chipunde.

YINDU YAYICHITENDEKWA

11. Ana chichi chachikutusimichisya kuti ŵa mu gulu jekulungwa ngasasingalilwa pandaŵi jakuti ŵasagulwe wosope ajigalidwe kwawula kwinani?

¹¹ Ana yichitendekwa yamtuli panyuma pakuti Aklistu wosope ŵasagulwe ajigalidwe kwawula kwinani? Tukumbuchileje kuti Yesu ali mkuchinga jwetu. Jwalakwe ali mtwe wa mpingo wa Chiklistu. Mwamti jwasasile mwakupikanika chenene kuti, “Mlongola jwenu ali jumo, Klistu.” (Mat. 23:10) Myoyo, Mwenye jwetu Yesu Klistu chachipitilisya kutusamalila. Mwamti ŵakumkuya ŵa Klistu pachilambopa ngasasosekwa kogopa chilichose ligongo lyakuti Klistu akulongolela chilichose mu mpingo wa Chiklistu. Yisyene kuti ngatukumanyilila yosope yene yachachitenda Klistu pakwalongolela ŵandu ŵakwe pandaŵiji. Myoyo, kwende tukambilane yindu yine ya m’Malemba yampaka yitukamuchisye pambaliji.

12. Ana Yehofa ŵasamalile chamtuli ŵandu ŵakwe (a) panyuma pakuti Mose awile? (b) panyuma pakuti Eliya ampele utumiki wine? (Alole chiwulili.)

¹² Mose jwawile Ayisalayeli mkanaŵe kwinjila mchilambo chaŵasalile Yehofa kuti chiŵape. Ana jemanjaji yatendechele yamtuli? Ana Yehofa jwalesile kwakamuchisya ligongo lyakuti Mose jwawile? Iyayi. Ayisalayeliŵa paŵapitilisye kuŵa ŵakulupichika, Yehofa jwapitilisyesoni kwakamuchisya. Mose mkanawe, Yehofa ŵamsalile kuti amsagule mundu jwine kuti ŵalongoleleje ŵandu ŵakwe. Mose jwaŵele ali mkumkamuchisya Yoswa kwandaŵi jelewu kuti aŵajilwe udindo welewu. (Eks. 33:11; Det. 34:9) Konjechesya pelepa, papalisoni achalume ŵajinji ŵaŵatumichilaga Ayisalayeli. Mwamti mwa ŵandu ŵeleŵa pasagulidwe ŵandu ŵakuti alongoleleje magulu ga ŵandu 1,000, magulu ga ŵandu 100, magulu ga ŵandu 50 soni magulu ga ŵandu 10. (Det. 1:15) Kusala yisyene, Ayisalayeli ŵasamalilidwaga chenene. Chisyasyo chine cha m’Malemba chili cha Eliya. Kwa yaka yejinji, jwalakwe jwaŵele ali mkulongolela kulambila kweswela pasikati pa Ayisalayeli. Nambope, jayiche ndaŵi jele Yehofa ŵampele jwalakwe utumiki wine kummwela kwa chilambo cha Yuda. (2 Ayi. 2:1; 2 Mbi. 21:12) Ana yeleyi yatendekasisye kuti mbumba 10 sya uchimwene wa Isalayeli sisoŵe chitela chakamula? Iyayi. Kwa yaka yejinji Eliya jwaŵele ali mkumkamuchisya Elisa kuti akombole kwalongolela Ayisalayeliwo. Kupwatika pelepa, papalisoni “ŵanache ŵa ŵakulochesya” ŵaŵajiganyidwe chenene masengo gakwalongolela Ayisalayeli. (2 Ayi. 2:7) Myoyo, papali achalume ŵakulupichika ŵajinji ŵaŵaliji ŵakoseka kwasamalila ŵandu ŵa Mlungu. Mwamti pandaŵi jelejo chakulinga cha Yehofa nganichijima, jwalakwe jwapitilisye kwasamalila ŵakutumichila ŵakwe ŵakulupichika.

13. Ana pa Ahebeli 13:5b pana maloŵe gapi gakulimbikasya? (Alole chiwulili.)

 ¹³ Patukuganichisya yisyasyo yiŵili yeleyi, ana mpaka tusale kuti chichitendekwa chichi panyuma pakuti ŵasagulwe wosope ajigalidwe kwawula kwinani? Ngatukusosekwa kudandawula ni yeleyi. Baibulo jikusasala mwakupikanika chenene yayichitendekwa pandaŵiji. Jikusati, Yehofa ngasiŵajasa ŵandu ŵakwe pachilambopa ata panandi. (Aŵalanje Ahebeli 13:5b.) Mpela muyaŵelele ni Mose soni Eliya, kagulu ka Aklistu ŵasagulwe masiku agano kakusamanyilila kusosekwa kwakwajiganya ŵane. Mwamti kwa yaka yejinji abale ŵa mu Likuga Lyakulongolela aŵele ali mkwajiganya ŵangondolo sine masengo gakulongolela gulu ja Mlungu. Mwachisyasyo, jemanjaji atamilikasisye masukulu gejinji gakwajiganya achakulungwa ŵa mumpingo, ŵakulolela madela, ŵa mu Komiti ja Nyambi, ŵakulolela pa Beteli soni ŵandu ŵane. Likuga Lyakulongolela liŵele lili mkwajiganyasoni ŵakamuchisya ŵawo masengo ga m’makomiti ga Likuga lya Kulongolela. Ŵakamuchisyaŵa akukamula masengo gekulungwa mnope mu gulu ja Yehofaji. Mwamti jemanjaji ali ŵakoseka kupitilisya kusisamalila ngondolo sya Klistu.

14. Ana ni mfundo jekulungwa japi jajili munganiji?

¹⁴ Mfundo jekulungwa munganiji jili jakuti ŵasagulwe wosope pachachijawula kwinani chakumbesi kwa yakusausya yekulungwa, kulambila kweswela kuchipitilisya pachilambopa. Yili yakusangalasya kuti Yesu Klistu jwali mtwe wa mpingo, chachipitilisya kwasamalila ŵakutumichila ŵa Mlungu. Yisyene kuti pandaŵiji, Gogi jwa chilambo cha Magogi chachitujimuchila. (Esek. 38:​18-20) Nambo kwimuchila kwakandaŵi kweleko kuchilepela, mwamti Gogi ngasakombola kutulekasya m’weji kumtumichila Yehofa. Yehofa chachakulupusya ŵakutumichila ŵakwe. Yeleyi ni yaŵayiweni ndumetume Yohane m’mesomkulola. Jwalakwe ŵajiweni “gulu jekulungwa” ja Aklistu ŵangondolo sine. Yohane ŵasalilidwe kuti “gulu jekulungwa” jeleji jikutyochela mu “yakusawusya yekulungwa.” (Chiw. 7:​9, 14) Yeleyitu yikutusimichisya kuti Yehofa chachipitilisya kwasamalila ŵandu ŵakwe.

15-16. Mwakamulana ni Chiwunukuko 17:​14, ana ŵasagulwe chachitendaga chichi pandaŵi ja ngondo ja Alamagedo? Ligongo chichi yeleyi yili yakulimbikasya kwetuwe?

¹⁵ Nambope ŵane mpaka aliwusyeje kuti, ‘Nambi uli pakwamba ya Aklistu ŵasagulwe? Ana  jemanjaji chachitendaga chichi panyuma pakutyoka pachilambopa?’ Baibulo jikusajanga chiwusyochi. Jikusasala kuti makuga ga ngondo pachilambopa gachiputa ngondo ni “Mwanache Jwangondolo.” Nambope, jemanjaji ngasapunda pangondoji. Tukusaŵalanga kuti, “Mwanache Jwangondolo chachagomeka jemanjaji.” Nambo ana ŵani ŵachachimkamuchisya Mwanache Jwangondoloju? Ali ŵandu “ŵele Mlungu ŵaŵilasile,” “kwasagula,” soni “ŵali ŵakulupichika.” (Aŵalanje Chiwunukuko 17:14.) Ana jemanjaji ali ŵani? Ali ŵasagulwe ŵajimwiche ku chiwa ni kwawula kwinani. Myoyo pachachimalisya kwajigala ŵasagulwe wosope kwawula kwinani, utumiki wawo wandanda uchiŵa kuputa ngondo. Yeleyitu yili yakusangalasya. Ŵane mwa Aklistu ŵasagulweŵa ŵaliji ŵandewu mkanatande kumtumichila Yehofa soni ŵane ŵaliji asilikali kuchilamboku. Nambope jemanjaji ŵaŵele Aklistu soni ŵalijiganyisye kutama mwamtendele ni ŵane. (Agal. 5:22; 2 Ates. 3:16) Mwamti ŵalesile kuputa ngondo. Nambo panyuma pakujigalidwa kwawula kwinani, chachitumichila ni Klistu Yesu nambosoni malayika geswela pakuputa ngondo jakulimbana ni achimmagongo ŵa Mlungu.

¹⁶ Aganichisye ayi. Ŵane mwa Aklistu ŵasagulweŵa ali ŵakalambale soni ŵangali machili. Nambo panyuma pakujigalidwa kwawula kwinani, jemanjaji chachiŵa ŵamachili, soni yakupanganyidwa yausimu yakola umi wangakomboleka kuwa. Mwamti chachikamula masengo gakuputa ngondo yimpepe ni Yesu Klistu jwali Mwenye jwa ngondo. Panyuma pakuti ngondo ja Alamagedo jimasile, jemanjaji chachiŵa ali mkwalolela ŵandu soni kwalongolela kuti aŵe ŵamlama. Ngatukukayichila kuti jemanjaji pachachiŵa kwinani chachatendela yindu yejinji abale ni alongo ŵawo ŵachachiŵa pachilambopa, kupunda yampaka atende apano pali ŵangali umlama.

17. Ana tukusamanyilila chamtuli kuti ŵakutumichila ŵa Yehofa yindu yichajendela chenene pandaŵi ja ngondo ja Alamagedo?

¹⁷ Ana wawojo ali mu gulu ja ngondolo sine? Naga yili myoyo, ana chachisosekwa kutenda chichi pandaŵi ja ngondo ja Alamagedo? Chachisosekwa kumdalila mnope Yehofa soni kukuya malangiso gakwe. Yeleyi yichipwatika kupikanila malangiso gakuti, “Mjawule mkajinjile m’nyumba syenu, ni kuwugala matanga gakwe. Mkajuŵe mwelemo ndaŵi jamnono kwembechela kuti lutumbilo lwa AMBUJE lumale.” (Yes. 26:20) Kusala yisyene, ŵakutumichila wosope ŵakulupichika ŵa Mlungu kwinani soni pachilambopa chachiŵa pamalo gambone pandaŵiji. Mpela muyaŵelele ni ndumetume Paulo, tuli ŵakusimichisya kuti, ‘chinga maboma, chinga yindu yayipali, chinga yindu yayikwika . . . Nganiyiŵa yitulekangenye ni chinonyelo chakusatulosya Mlungu.’ (Alo. 8:​38, 39) Myoyo, kwende ndaŵi syosope tukumbuchileje kuti Yehofa akusatunonyela, mwamti jwalakwe nganaŵa atulesile ata panandi.