1. Thangu mbi bakristu boso bo batulu mafuta mu kipheve bela kuendila ku diyilu?

 MIMVU miwombo mivioka, bisadi bi Yehova beba kiyuvulanga, ‘thangu mbi bakristu batsuka bo batulu mafuta mu kipheve bela kuenda ku diyilu?’ Tube banzilanga, nanga bakristu bo batulu mafuta mu kipheve balenda keta zinga ku paladiso mu mua ndambu thangu kumanima ma mvita wu Alimangedoni. Vayi mu Nzo yi Nkengidi yi 15 Juillet 2013, tulonguka ti bakristu boso bo batulu mafuta mu kipheve bo bela ba va mbata ntoto, bela kikuendila ku diyilu tuamina mvita wu Alimangedoni wuba.​—Mat. 24:31.

2. Kiuvu mbi wulenda kiyuvula, ayi mbi tueka ntadila mu disolo diadi?

² Vayi, kiuvu kinkaka kilenda totuka: Mambu mbi mela builukulu “mamemi mankaka” ma Kristu mo mela sadila Yehova mu kuikama koso va mbata ntoto mu thangu yi “ziphasi zinneni”? (Yow. 10:16; Mat. 24:21) Bankaka mu lumbu kiaki balenda kitatikisa mu tomba zaba bue bela bela mu thangu bakhomba ziawu zi luzolo bo batulu mafuta mu kipheve bela kuenda ku diyilu. Bika tutadila masolo mmuadi ma Bibila mo malenda tukuizila mu mayindu. Ayi matu tadila bibila bio bilenda kutusadisa tubika kukitatikisa.

MAMBU MBI MELA SIE SALAMA KO?

3-4. Kiuvu mbi batu bankaka beta kiyuvula, ayi bila mbi?

³ Batu bankaka balenda kiyuvula keni mamemi mankaka mela tatukila kiedika mu thangu bakhomba bo batulu mafuta mu kipheve bo badi mu Kimvuka kintuadisi bela sie bue ba ko mu kubatuadisa. Balenda kubumuena mu bila ki masolo mankaka mo madi mu Bibila. Tutadila bifuani biodi. Kifuani kitheti kidi ki Nganga Nzambi Yinneni Yoyada. Wuba sadi ki Nzambi kikuikama. Niandi ayi nketo’andi, Yosabati, batanina ntueni mosi wubakala  wuba mu dizina di Yowasi ayi bansadisa kaba ntinu wumboti ayi wukuikama. Yowasi wube vanganga mambu mamboti mu thangu yoso yo Nganga Nzambi Yinneni Yoyada kaba mu luzingu. Vayi kumanima ma lufua lu Nganga Nzambi Yinneni Yoyada, Yowasi wufika tona vanga mambu mambimbi. Wuwila bana bapfumu bambimbi ayi wubika Yehova.​—2 Lus. 24:2, 15-19.

⁴ Kifuani kio kilandikini kidi ki bakristu ba tandu kimmuadi. Mvuala Yowani, widi mvuala nio wuluta zinga kuwombo viokila mimvuala mioso, wuba na bumutu bumboti va ntuala bakristu bawombo, ayi weba basadisanga bamonisa mvibudulu mu kisalu kiawu kuidi Yehova. (3 Yow. 4) Banga phila butudila mimvuala minkaka mikuikama mi Yesu, Yowani wutula ngolo mu tanina bimvuka mu bila ki batu bo babe longanga malongi maluvunu. (1 Yow. 2:18; tala noti mu Bibila ki ndongokolo mu 2 Tes. 2:7.) Kumanima ma lufua lu Yowani, malongi maluvunu mayiza tembakana. Kumanima ma mua mimvu, kimvuka ki Bukristu kiyiza mana thumu beba.

5. Mayindu mbi katulendi ba ko mu diambu di masolo momo?

⁵ Masolo mama mmuadi mo ma Bibila malembo monisa diambu dimosi dio diela builukulu mamemi mankaka ma Kristu mu thangu bo batulu mafuta mu kipheve bela kuenda ku diyilu? Mu thangu beni yina, bakristu bo bakuikama bo bela ba va mbata ntoto bela tatukila malongi mo ba balonga, banga Yowasi, voti bela vambuka mu malongi maluvunu, banga phila butudila bakristu bawombo mu tandu kimmuadi ki thangu’eto? Nana! Tulenda ba sikididi ti mu thangu bakristu bo batulu mafuta bela botuka va mbata ntoto, mamemi mankaka mela kipu bumboti ayi mela yonzuka mu kipheve. Bila mbi tulenda bela sikididi mu diambu diodi?

TSAMBUDULU YIVEDILA YELA SIE BEBUSU KO

6. Zithangu mbi zitatu tueka ntadila mu bukhufi?

⁶ Bila mbi tulenda bela sikididi ti tsambudulu yivedila yela sie bebusu ko, buba mu thangu yi ziphasi zio zilembo yizi mu bilumbu binkuiza? Bila tulonguka mu Bibila mambu matedi bilumbu bia tulembo zingila. Thangu yayi tulembo zingila yidi na luviakunu lunneni na thangu yi bana ba Iseli ayi thangu yi Bakristu ba tandu kimmuadi. Diawu bika tutadila mu phila yifuana thangu beni zia zitatu: 1) Thangu yi Iseli dithama, 2) thangu yo yiba kumanima ma lufua lu mimvuala, ayi 3) thangu’eto, “thangu yibue kitula bima bioso bimona.”​—Mav. 3:21.

7. Mu Iseli dithama, bila mbi bisadi bikuikama bisi vongila ko nitu mu thangu dikanda ayi mintinu miandi misobula landakana nzila yimbimbi?

⁷ Thangu yi Iseli dithama. Tuamina Mose kafua, wukamba bana ba Iseli ti: “Bila nzebi ti minu fua luela vanga mambu mambimbi ayi luela bika nzila yo ndilukembi.” (5 Mose 31:29) Mose wubue kebisa diaka bana ba Iseli ti bawu tombuka bela kuenda mu buvika. (5 Mose 28:35, 36) Ziphova beni zilungana? Ninga. Mu bitandu biwombo, mintinu miwombo misobula kuawu landakana nzila yimbimbi ayi bayiza bika kuawu dikanda di Nzambi. Diawu ditula ti Yehova kaloza dikanda diandi dio diba ntu ngolo ayi kasukisa khubukulu yi mintinu mi ntoto. (Yeh. 21:25-27) Vayi bana ba Iseli bo baba bakuikama babaka kibakala mu thangu bamona ti ziphova zi Nzambi zilungini.​—Yes. 55:10, 11.

8. Zaba ti kimvuka ki tandu kimmuadi kibebusu, difueti kutuyitukisa? Sudikisa.

⁸ Thangu yo yiba kumanima ma lufua lu mimvuala. Difueti kutuyitukisa mu zaba ti kimvuka ki Bukristu kiyiza bebusu mu tandu kimmuadi? Kadi fifioti. Bila Yesu wubikula ti batu bawombo bela loza malongi ma Pfumu. (Mat. 7:21-23; 13:24-30, 36-43) Mvuala  Polo, Piela, ayi Yowani bamonisa ti mbikudulu yi Yesu yitona lungana mu tandu kitheti ki thangu’eto. (2 Tes. 2:3, 7; 2 Pi. 2:1; 1 Yow. 2:18) Mu tandu kimmuadi ki thangu’eto, kimvuka ki Bukristu kiyiza bebusu. Bakristu bawombo bo baloza malongi ma Pfumu bayiza bima ayi bawu bayiza vanga tini kinneni ki Babiloni dinneni, yo yinsundula mabundu moso maluvunu ma nza yimvimba. Mu buela, mbikudulu yo yituadusu mu pheve santu yilungana.

9. Thangu yayi tulembo zingila, luviakunu mbi yidi ayi Iseli dithama na kimvuka ki Bukristu ki tandu kimmuadi?

⁹ “Thangu yibue kitula bima bioso bimona.” Thangu’eto luviakunu yidi na thangu yi Iseli dithama ayi thangu yo bakristu bawombo balozila malongi ma Pfumu mu tandu kimmuadi ki thangu’eto. Thangu yayi tuidi, bue beta yitedila? Tulenda kuyitedila ‘‘bilumbu bitsuka’’ bi mambu mambimbi ma nza yayi. (2 Tim. 3:1) Vayi Bibila kimonisini ti thangu beni yinneni ayi yinila yiyiza tona nzila mosi. Ayi yela tatamana ba tii Kipfumu ki Mesiya kiela kuiza vutula lungana ku batu ayi balula ntoto woso paladiso. Thangu beni bayitedidi “thangu yibue kitula bima bioso bimona.” (Mav. 3:21) Thangu beni yitona mu 1914. Mbi biyiza kituka bimona? Ninga, Yesu wuyiza tulu Ntinu ku diyilu. Buawu Yehova kantudila Pfumu yizangama nio Wukummonikisa, nio widi mu nkuna wu Ntinu wukuikama Davidi. Vayi, Yehova kasi sukila ko kaka mu vutula Kipfumu. Kumanima, tsambudulu yivedila yitona bue vutuka! (Yes. 2:2-4; Yeh. 11:17-20) Yela bue bebusu?

10. a) Mambu mbi Bibila kibikula mu diambu di tsambudulu yivedila mu thangu’eto? (Yesaya 54:17) b) Bila mbi zimbikudulu ziphila yoyi zieta tusikimisina?

¹⁰ Tanga Yesaya 54:17. Yindudila mu mbikudulu yayi: “Kadi nuanunu kimosi kivangu mu kunuanisa kiela kununga”! Ziphova beni ziozi zisonimina mu lutuadusu lu pheve santu zilembo lungana lumbu kiaki. Ziphova zi lukindusu zio zilandikini zitutadidi phe mu thangu’eto yayi, zitubidi ti: “Bana baku boso bela ba batu bo Yehova kalongidi, ayi bana baku bela ba mu ndembama yiwombo. Wela siamusu mu lunungu. . . . Wela sie mona ko tsisi ayi kuisi ko kadi diambu dio diela kutula wumona boma, bila diela sie kufikama ko.” (Yes. 54:13, 14) Buba “nzambi yi nza yayi,” Satana, kasi ko ngolo yikakidila kisalu kilonga kioki bisadi bi Nzambi balembo sadi. (2 Ko. 4:4) Tsambudulu yivedila, yivutulu ayi yela sie bue bebusu ko. Yidi mu diambu di yitatamana ba mvu ka mvu. Kadi nuanunu kimosi kivangu kiela nunga kuyibebisa!

 MAMBU MBI MELA SALAMA?

11. Mbi bikutusadisa tukikinina ti nkangu wunneni wela sie yekulu ko mu thangu bakristu bo batulu mafuta mu kipheve bela kuenda ku diyilu?

¹¹ Mambu mbi mela salama mu thangu bakristu bo batulu mafuta mu kipheve bela kuenda ku diyilu? Bambuka moyo ti, Yesu niandi Mvungi’eto. Widi Pfumu yi kimvuka ki Bukristu. Yesu wutuba bumboti mboti ti: “Pfumu yimosi kaka yidi yeno, Kristu.” (Mat. 23:10) Ntinu’eto nio wulembo yadi wela dukisa kaka kisalu kiandi mu phila yimboti. Boyidi ti Kristu niandi veka wela diatisa mambu, kuela sie ba ko kadi kima kimosi kio kiela monisa balonguki bandi va mbata ntoto tsisi. Kadiambu ko, tuisi zaba ko mambu moso matedi phila yoyi Kristu kela tuadisila balonguki bandi mu thangu beni yina. Buabu bika tutadila mua ndambu bifuanusu bi Bibila bio bilenda kutuvana sikididi.

12. Bue Yehova kakipila batu bandi a) kumanima ma lufua lu Mose? b) mu thangu Elia kabaka kiyeko kinkaka? (Tala phe foto.)

¹² Mose wukifuila tuamina bana ba Iseli bakota mu tsi yo ba bavanina tsila. Mambu mbi dikanda di Nzambi didengana? Yehova kasi bue bavana ko lusadusu kumanima ma lufua lu Mose? Nana. Thangu yoso yo babela bakuikama, Yehova wube dukisanga zitsatu ziawu. Tuamina Mose kafua, Yehova wumvana kiyeko kisobula Yosua muingi kadiatisa dikanda. Mu mimvu miwombo Mose kavanina Yosua formasio. (2 Mose 33:11; 5 Mose 34:9) Mu buela, kuba na babakala bankaka bo baba na maluaku matuadisa​—bapfumu zi mafunda, bapfumu ba zikhama, bapfumu zi makumatanu, ayi buba bapfumu zi makumi. (5 Mose 1:15) Dikanda di Nzambi dikipu mu phila yimboti. Tutadila diaka kifuani ki Elia. Wusala kisalu kingolo mu mimvu miwombo mu sadisa bana ba Iseli basambila Yehova. Vayi thangu yiyiza ba yoyi Yehova kantindila mu kiyeko kinkaka ku sudi yi Yuda. (2 Mtn. 2:1; 2 Lus. 21:12) Minkuikisi mio miba mu lutuadusu lu bipfumu kumi di makanda ma Iseli miyekulu? Nana. Elia wuvana Elisa formasio mu mimvu miwombo. Kuba diaka na “bana ba mim’bikudi,” bo bakubuku mu diambu di baka formasio. (2 Mtn. 2:7) Diawu ditula ti, kuba na babakala bawombo bakuikama bo baba bafuana mu buela mioko mu ndiatusulu yi dikanda di Nzambi. Lukanu lu Nzambi luisi sukila ko mu nzila, ayi wutatamana kipa bisadi biandi bikuikama.

13. Sikididi mbi tulenda baka mu Ebelewo 13:5b? (Tala phe foto.)

¹³ Beto tula bifuani biobi mu mayindu meto, bue wummuena, mbi biela salama mu thangu  bakristu bo batulu mafuta mu kipheve bo bakhidi va mbata ntoto bela kuenda ku diyilu? Yisi’andi mfunu ko mu kukiyuvula biuvu. Bibila kitumonisini kiedika kimosi kikambulu phasi mu sudika, ayi kio ki kutusikimisa ti: Yehova kalendi ko yekula bisadi biandi bio bidi va mbata ntoto. (Tanga Ebelewo 13:5b.) Banga Mose ayi Elia, mua dingumba di bakristu bo batulu mafuta mu kipheve beta tula zingolo lumbu kiaki mu sudika mfunu wuvana formasio kuidi batu bankaka. Mu mimvu miwombo bakhomba bo badi mu Kimvuka kintuadisi beta tatamana vana formasio kuidi babakala bo badi mu nkangu wu mamemi mankaka muingi baba mintuadisi. Mu kifuani, babongisa zinzo nkanda ziwombo zio zifueti vana formasio kuidi bakulutu, kuidi minkengi mi zunga, kuidi bakhomba badi mu zikomite zi zifiliali, kuidi mintuadisi mi zi Beteli, ayi kuidi bankaka. Kimvuka kintuadisi kieta bue vana diaka formasio kuidi minsadisi mio mieta buela Kimvuka kintuadisi mioko. Minsadisi beni milembo dukisa biyeko binneni mu kuikama koso. Badi bakubuku mu tatamana sala kisalu kikeba mamemi ma Kristu.

14. Diambu mbi dimfunu tufueti simbidila mu disolo diadi?

¹⁴ Tala diyindu dimfunu di disolo dieto: Mu thangu bakristu batsuka bo batulu mafuta mu kipheve bo bela ba va mbata ntoto bela kuenda ku diyilu kutsuka yi ziphasi zinneni, tsambudulu yivedila yela tatamana ba va mbata ntoto. Mu nzila yi lusadusu lu Yesu Kristu, bisadi bi Nzambi biela sie kambu ko kuenda kuntuala. Bukiedika, mu thangu beni yina, tuela nuanusu kuidi Ngongi yi Mangongi, yo yidi nguizani yimbimbi yi zitsi. (Yeh. 38:18-20) Vayi mua nduanusunu beni yina yela sie nunga ko; ayi yela sie kakidila ko bisadi bi Nzambi basambila Yehova. Mu kondo finda phaka wela kubavukisa! Mu kimona meso kimosi, mvuala Yowani wumona “nkangu wunneni” wu mamemi mankaka ma Kristu. Babue kamba diaka Yowani ti “nkangu wunneni” beni “mu ziphasi zinneni wubedi.” (Tso. 7:9, 14) Ninga, bela tanunu bumboti!

15-16. Mu tadila Tsongolo 17:14, Bakristu bo batulu mafuta mu kipheve mbi bela tula mu thangu wu mvita wu Alimangedoni, ayi bila mbi didi diambu dilukindusu?

¹⁵ Kadiambu ko bankaka balenda kiyuvula ti: ‘A buabu bakristu bo batulu mafuta mu kipheve?  Mbi bela tula mu thangu bela kuenda ku diyilu?’ Bibila kiveni mimvutu mu biuvu beni. Kitumonisini ti bapfumu zi politiki zi nza yayi ‘‘bela nuanisa muana dimemi.” Mu kondo finda phaka, bela sie nunga ko. Tueta tanga ti: “Muana dimemi wela kubanunga.” Nani wela sadisa muana dimemi? Bibila kiveni mvutu ti: Bobo “batedolo,” “basobulu,” ayi “bakuikama.” (Tanga Tsongolo 17:14.) Ba na bobo? Badi bakristu bo bafuluka bo batulu mafuta mu kipheve! Diawu mu thangu bakristu batsuka bo batulu mafuta mu kipheve bo bela ba va mbata ntoto bela kuenda ku diyilu kutsuka yi ziphasi zinneni, kisalu kiawu kitheti kiela ba kinuana. Kidi kiyeko kinneni! Bakristu bankaka bo batulu mafuta mu kipheve baba minnuani tuamina baba Bambangi zi Yehova. Kutu bankaka mu bawu basala kisalu ki soda mu mangumba ma bamasodi ma nza yayi. Vayi kumanima bayiza ba bakristu bakiedika ayi balonguka nzila yindembama. (Nga. 5:22; 2 Tes. 3:16) Bayiza lembo nuana mimvita. Diawu, kumanima ma kuma kuawu ku diyilu, bela sala mu kithuadi ayi Kristu na bambasi bandi basantu, mu nuanisa bambeni zi Nzambi mu mvita wutsuka.

¹⁶ Yindula theti diambu beni! Va mbata ntoto, Bakristu bankaka bo batulu mafuta mu kipheve beka biboba, voti bame mana lebakana. Vayi bo bela thumu fuluka mu kuenda ku diyilu, bela ba bivangu bi kipheve bingolo ayi bio ka bifuanga ko, bela baka kiyeko kinuana va kimosi ayi ntinu minnuani, Yesu Kristu. Kumanima ma mvita wu Alimangedoni, bela buela mioko mu thuadusulu yi batu muingi baba baduka. Mu kondo finda phaka, bela luta vangila bakhomba ziawu zi luzolo va ntoto mambu mamboti mu thangu yo bela bela ku diyilu viokila thangu yo babela va mbata ntoto banga batu bakambu duka!

17. Bue tuzabidi ti bisadi bioso bi Nzambi biela ba mu lutanunu mu mvita wu Alimangedoni?

¹⁷ Widi wumosi mu batu bo badi mu mamemi mankaka? Buabu mbi wela tula mu thangu mvita wu Alimangedoni wela tona? Diambu wela tula didi: Tudila Yehova ntima ayi landakana lutuadusu luandi. Mbi dinsundula? Mu lukindusu loso, Bibila kitubidi ti: “Yenda ngeyo dikanda di batu bama, kota mu bivinga biaku bikhati ayi kanga mielo miaku. Wukisueki mu mua thangu tii thangu yi nganzi yimvioka.” (Yes. 26:20) Bisadi bioso bikuikama bi Nzambi ku diyilu ayi va ntoto, bela ba mu lutanunu mu thangu beni yina. Banga butubila mvuala Polo, tuidi na sikididi ti buba “luyalu voti bima binkuiza kuntuala . . . bilendi kutuvambisa ko mu luzolo lu Nzambi.” (Loma 8:38, 39) Bambukanga moyo thangu ka thangu ti: Yehova weta kuzola, ayi kalendi kuyekula ko!