1. ¿Pu ór tzee guirá ungidos lainy guibá?

 MA XIDZÚ íz, lóono ni nacno xpiin Jehová gonabdiitzno locáno: «¿Pu ór guiee últimos cristianos ungidos lainy guibá?». Goyoʼ toib tiemp, ro bunyno pensary que tipnés ungidos nabany nadudyibu ló Armagedón né nabanyibu tidxó tiemp ló Gudxlio móz. Per ló Guiich ni Caniʼ july íz 2013 bisuidyno que guirá ungidos ni noʼsa ló Gudxlio, tzeeyibu guibá antes ni guidxin Armagedón (Mat. 24:31).

2. ¿Xí galrranabdiitz labúu gapno? ¿Né xí láani guisuidyno ló artículo reʼ?

² Per rioʼ stoib galrranabdiitz: ¿Xí láani sac ló «gran tribulación» né «stipnés xiil» xtuny Cristo ni cayony xchiin Jehová ló Gudxlio? (Mat. 24:21; Juan 10:16;). Sigory tipnésyibu sadzuibyibu guiaʼanyibu toibyibu o diti ganyibu xi gonyibu órni xhermanyibu ni nac ungidos ma diti tzoʼ ló Gudxlio. Guibiʼno chop historias ni labúu gony que gonyibu pensary modcu. Láaca sabiʼno que noʼ xidal razón por ni diti non guidzuibyno.

NI DITI SAC

3, 4. ¿Xí labúu guinabdiitz tipnés buñ, né xigony?

³ Tipnésyibu labúu guinabdiitz pal stipnés xiil sasianyibu galnigolú órni guirá ni noʼ lad Tidxó buñ ni nap xiroʼ Galnan ma diti tzoʼyibu ló Gudxlio par conés layibu. ¿Xigony? Guibiʼno chop historias ni labúu buny que ñonyibu pensary modcu. Primer historia rasetlaa  de sumo sacerdote Jehoiadá, toib ni galán buny xchiin Dios. Láabu né tzeelbu, Jehosabeat, bisniʼsyibu toib nidxiyen ni góc laa Jehoás, gocnéyibu nidxiyen reʼ par ñacbu toib rey tzaay ni diti nasian Jehová. Laʼga Jehoiadá bibany, rey reʼ goyoʼbu gax de Jehová. Per, órni Jehoiadá goity, Jehoás nimaca gosaló buny cós mal. Bicadiagbu xconsej príncipes ni góc buñ mal né bisiambu Jehová (2 Crón. 24:2, 15-19).

⁴ Ni rarop ejemplo rasetlani de cristianos ni bibany ló siglo segundo. Juan, último apóstol ni goity, gócbu toib galán ejemplo par xidal cristianos. Gocnébu cristianos par diti nasianyibu Jehová (3 Juan 4). Né xomodca stipnés xpiin Jesús, bunybu rutigoygaʼlni láabu par nacalóbu apostasía (1 Juan 2:18). Per, después ni goity Juan, apostasía bilatni xomod toib virus, né ló chop tzón décadas guidopyca congregación cristiana cuá virus reʼ.

5. ¿Xí láani diti gonyno pensary de chop historias reʼ?

⁵ ¿Sac ngúca né stipnés xiil xtuny Cristo órni guirá ungidos tzee lainy guibá la? ¿Sonyibu xomod Jehoás né sasianyibu Jehová la? ¿Sacyibu xomod xidal cristianos ni bibany ló siglo segundo né siabyibu ló apostasía la? ¡Yaca! Nandxichno que, ná ma diti sioʼ ungidos ló Gudxlio, stipnés xiil sonyrayibu xchiin Jehová né diti sioʼ ni sac falt layibu. ¿Ximod nanlo láani?

ADORACIÓN NAYAA DITI SAC BUIDYNI

6. ¿Xí tzón tiemp guisuidyno?

⁶ ¿Xigony napno confianz que adoración nayaa diti sac buidyni ná tudyno ló tiemp nagan? Portín la Biblia rasuidy que tiemp ni nabanyno nigoreʼ, diti toibsi midid láani né dzú ni bibany israelitas né cristianos ni bibany ló siglo segundo. Por ngú, guisuidytzayno tzón tiempcu: 1) xtzú israelitas, 2) después ni goity apóstoles né 3) «tiemp ni gac copy guirá cós», ni radudy diitz, xtzúno (Hech. 3:21).

7. ¿Xigony diti non nareʼgan israelitas ni diti bisian Jehová órni gudx Israel né reyes ni buny mandary layibu buny cós mal?

⁷ Xtzú israelitas. Tidxó tiemp antes ni ñaity Moisés, gochbu israelitas ndeʼ: «Nandxichi que órni gati, lóoto sonyto cós mal né sareʼto ló néz ni buni mandary lóoto nasaato» (Deut. 31:29). Láaca gochbu guirá biinreʼ que, pal ñac nayaʼyibu nareʼyibu de xcudxyibu (Deut. 28:35, 36). ¿Góc cumplir ni goniʼ Moisés la? Scú. Por xidalguixo íz xidal reyes góc nayaʼyibu né gudx buny ngúca. Por ngú, Jehová buny castigar buñ ni diti bisob laabu né diti bidudybu lagary ñoʼ más reyes israelitas (Ezeq. 21:25-27). Par israelitas ni diti bisian Jehová, ni bibiʼyibu guirá ndeʼ buny animarni layibu (Is. 55:10, 11).

8. ¿Xigony diti non guidziguiaʼno que congregación cristiana ni bibany ló siglo segundo biab ló apostasía?

⁸ Después ni goity apóstoles. Diti non guidziguiaʼno que congregación cristiana ni goyoʼ ló siglo segundo ñab ló apostasía. ¿Xigony? Portín Jesús maca goniʼ que nigolú sioʼ apostasía (Mat. 7:21-23; 13:24-30, 36-43). Ma ló siglo primero, apóstoles Pablo, Pedro né Juan goniʼyibu que apostasía ni bisetlaa Jesús ma gosalóni (2 Tes. 2:3, 7; 2 Ped. 2:1; 1 Juan 2:18). Diti xidzú después ni goity último  apóstol, cristianos apóstatas bidxin goyoʼyibu lad Babilonia la Grande ni nac religión falz. Góc cumplir profecíacu.

9. ¿Ximod diti toibsi midid nac dzú ni nabanyno nigoreʼ né chop tiemp ni bisuidyno ló párrafos ni ma godudy?

⁹ «Tiemp ni gac copy guirá cós». Dzú ni nabanyno nigoreʼ diti toibsi midid nacni né xtzú israelitas, né siglo segundo órni apostasía goyoʼ lainy congregación cristiana. ¿Ximod laa dzú ni nabanyno nigoreʼ? Lóono rimbuno láani xomod «dzú ni ma guidubylagaʼ» gudxliogoxreʼ (2 Tim. 3:1). Per la Biblia raslooy que ló dzúcuca gosaló toib tiemp ni más sioʼol né ni más rasac. Laani «tiemp ni gac copy guirá cós» (Hech. 3:21). Gosalóni ló íz 1914 né saloxni órni guirá buñ ma diti gap galkié né Gudxlio guidxin gac toib Gudxlio móz xan xomandary Cristo. ¿Né xí láani buny copy Jehová ló íz 1914? Jesús gosaló buny mandary lainy guibá, né Jehová gop toib ni cayony mandary xalagarybu, toib ni biané trono xtuny rey David. Per diti ngúsi. Diti xidzú después, adoración nayaa góc copyni stoib (Is. 2:2-4; Ezeq. 11:17-20). Per, ¿sac buidyni stoib la?

10. a) ¿Xí profecía rasetlaa la Biblia de adoración nayaa ni noʼ ló xtzúno? (Isaías 54:17). b) ¿Xigony rony animar ni ná Isaías lóono?

¹⁰ (Bíil Isaías 54:17). Guicaano cuidad ni ná profecía reʼ: «Nitisi guip ni guisaʼyibu par guicalóyibu looy diti sarebuʼni». Versículo reʼ cayac cumplirni ló naareʼ. Láaca cayac cumplir diitz reʼ: «Jehová sasuidy guirá xiinlo, né xiinlo sabany goxtiguie. Sasagaʼdxichlo ló justicia. […] Diti sadzuibylo xitcal nili sioʼ razón par guidzuibylo, portín diti sabigaxni ronoʼlo»(Is. 54:13, 14). Nili «dios xtuny gudxliogoxreʼ» Buñdzab, nap galnadip par guiscueʼsbu ló ni casuidy xcudx Jehová buñ (2 Cor. 4:4). Adoración nayaa ma góc copyni stoib. ¡Dipa sac buidyni stoib! Ni toib guip ni guisaʼ buñ par guicaló lóono sarebuʼ.

NI SAC

11. ¿Xigony nandxichno que xidalguixo buñ diti siaʼanyibu toibyibu órni guirá ungidos tzoʼ lainy guibá?

¹¹ ¿Xí láani sac órni guirá ungidos tzeeyibu guibá? Guisetnaladxno que Jesús nac Pastor xtunyno né nacbu guic congregación cristiana. Láacabu goniʼbu: «Nosi Cristo nac Líder xtunyto»  (Mat. 23:10). Rey xtunyno guirá ór sanbu lóono. Por ngú, cristianos ni guiaʼan ló Gudxlio diti noʼ xi portín guidzuibyibu, láabu sagonésbu lóono. Nigolú, diti nanno xipa gony Cristo por xcudx Jehová órcu. Per noʼ tipnés ejemplos ni sieed ló la Biblia ni labúu guisialdó lóono. Guibiʼno tipnésni.

12. a) ¿Ximod gon Jehová xcudx después ni goity Moisés? b) ¿Ximod bunybu láani después ni see Elías stoib lagary? (Láaca bibiʼ dibuj).

¹² Moisés goity antes ni israelitas ñoʼ ló layoo ni Jehová goniʼ guidudy layibu. ¿Xí láani góc né xcudx Dios órcu? ¿Biaʼanyibu toibyibu portín ma diti goyoʼ Moisés la? Yaca, portín Jehová goyoʼ né layibu laʼga bisobyibu. Por ejemplo, antes ni ñaity Moisés Jehová góoch láabu que ni nasanir nisló gudx Israel ñac Josué, toib buñguieeu ni Moisés ma xidzú íz casuidy (Éx. 33:11; Deut. 34:9). Láaca, goyoʼ stipnés buñguieeu ni gop más experiencia ni golonés gudxcu: ni gosanir nisló tipmil, tigayoʼ, cincuent né dada chii buñ (Deut. 1:15). Jehová gon xcudx. Láaca napno ejemplo xtuny Elías. Por xidal íz gocnébu israelitas par ñony adoraryibu Jehová. Per Jehová bixel láabu gudx Judá (2 Rey. 2:1; 2 Crón. 21:12). ¿Scásiʼ biaʼan xpiin Dios ni goyoʼ lad chii tribus xtuny gudx Israel la? Yaca, portín Elías ma xidzú íz casuidybu Eliseo. Láaca gopyibu xcalrracné «xiin profetas», ralooyni xiin profetas goyoʼyibu lainy tipnés scuel (2 Rey. 2:7). Mod ma bibiʼno, guirá ór goyoʼ buñguieeu ni diti bisian Jehová ni golonés xcudx Dios. Jehová buny cumplirbu ni ma goniʼbu né gonbu xpiimbu ni diti bisian láabu.

13. ¿Xí raiby Hebreos 13:5b lóono? (Láaca bibiʼ retrat).

¹³ Ni cayonyno pensary ló ejemplos reʼ ni sieed ló la Biblia, ¿xí ronylo pensary gac né guirá xpiin Jehová ni guiaʼan ló Gudxlio órni guirá ungidos tzeeyibu guibá? Diti fuerspa gonygoluʼno xpensaryni: la Biblia raiby lóono que Jehová dipa sasian layibu (bíil Hebreos 13:5b). Xomodca Moisés né Elías, tidxó cristianos ungidos ni rasanir lainy xcudx Jehová nigoreʼ, nanyibu que nigolú rasac guisuidyibu stipnés. Por xidal íz, Tidxó buñ ni nap xiro Galnan casuidyibu buñguieeu ni noʼ lad stipnés xiil par conésyibu xchiin Jehová. Por ejemplo, noʼ scuel par  ancianos, superintendentes de circuit, herman ni noʼ lad Comité de Sucursal, superintendentes de Betel, né stipnés. Né láaca herman ni noʼ lad Tidxó buñ ni nap xiroʼ Galnan ma casuidyibu stipnés herman par gacné ló comité ro rasaniryibu ló. Guirá herman reʼ galán cayonyibu dxiin ni napyibu. Labúu gapno confianz que labúu sanyibu xiil xtuny Cristo, después ni tzee guirá ungidos lainy guibá.

14. ¿Xí cós ni rasac bisuidyno?

¹⁴ Guirá ndeʼ rasuidyni lóono toib cós ni rasac: órni guirá ungidos tzee lainy guibá, órni ma bilox gran tribulación, xcudx Dios sony adoraryibu Jehová reʼ ló Gudxlio. Né Jesucristo xomod Líder, xpiin Dios diti sareʼgan. Nigolú, ló dzúcu toib grupo de gudxrop ni la Biblia rabeʼ laa Gog de Magog, sacaló layibu, (Ezeq. 38:18-20). Per diti saclani né diti sarebuʼni. Diti sonyibu que xcudx Dios ma diti guieen láabu. Jehová salaa layibu. Ló toib visión, apóstol Juan bibiʼ «xidalguixo buñ» de stipnés xilieen xtuny Cristo né láaca gonbu que «xidalguixo buñ» careʼ ló «gran tribulación». Riendxichni que diti sioʼ xi sacyibu (Apoc. 7:9, 14).

15, 16. Mod ná Apocalipsis 17:14, ¿xí laani sony cristianos ungidos ló Armagedón, né xigony rony animarni lóono?

¹⁵ Per pentzi noʼ stoib galrranabdiitz: ¿Né ungidos ga? ¿Xí láani sonyibu órni ma guiráyibu noʼyibu lainy guibá? La Biblia rabexatzay que guirá gobierno ni noʼ ló gudxliogoxreʼ «sacalóyibu Xiil». Per ni nac «Xiil sony gan layibu». ¿Né chú sacné láabu par gonybu gan? Versículocu náni: «Ni Dios bicaʼ rudx né golú né ni diti rasian láabu», ni radudy diitz cristianos ungidos ni ma biás lainy guibá (bíil Apocalipsis 17:14). Ndeʼ radudy diitz que órni guirá ungidos ma noʼyibu lainy guibá primer dxiin ni guicaʼyibu láani ngú, tíilyibu. ¡Toib dxiin ni nigolú radziguiaʼ buñ! Tipnés ungidos bioladxyibu godíilyibu antes ni ñacyibu Testigos. Né tipnésyibu dada goyoʼyibu  ló galsoldad. Per bidxin gocyibu cristianos, né bisianyibu guirá galrradíil cu né bisuidyibu gacyibu buñ nadaʼa (Gál. 5:22; 2 Tes. 3:16). Per, órni tzoʼyibu lainy guibá, sioʼyibu né Cristo né ángeles xtuny ló guerr ro guicalóyibu xi enemig Dios.

¹⁶ Gonyno pensary ló ndeʼ: tipnés ungidos ni noʼsa ló Gudxlio ma nacyibu buñgol né ma diti napyibu xiroʼ fuers. Per, órni guibanyibu lainy guibá, ma diti saityibu né sapyibu galnadip né sadíilyibu toibsi né Rey Jesucristo. Después ni guilox guerr xtuny Armagedón, sacnéyibu buñgudxlio par ma diti gapyibu galkié. Más sacnéyibu xhermanyibu ni ronladxyibu ni tzoʼyibu lainy guibá, que ni labúu ñacnéyibu xomod buñ galkié pal ñoʼyibu ló Gudxlio.

17. ¿Ximod nanno que diti sioʼ xi sac xpiin Dios ló Armagedón?

¹⁷ ¿Noʼlo lad stipnés xilieen la? Pal nacni scú, ¿xí non gonylo ló Armagedón? Nosi ndeʼ: gaplo confianz lóo Jehová né guisoblo guirá instrucciones ni guidudybu. Ngú raguiña guisoblo ni ná Isaías 26:20: «Goyee né goyoʼ lainy xcuartlo né bisieg xpuertni. Bicachlan por tipratsi dada órni ma godudy galnadzuitz». Nigolú rasialdóni lóono ni nanno que guirá xpiin Dios, tanli ni noʼ lainy guibá né ló Gudxlio diti sioʼ xi sacyibu. Xomodca apóstol Pablo, napno confianz que «ni gobiernos, ni cós ni casaclono nigoreʼ ni cós ni sietra» labúu «cuestzoo lóono de xcalrronladx Dios» (Rom. 8:38, 39). Dipa guialadxlo ndeʼ: Jehová nadxiʼ looy né dipa sasiambu looy.