1-2. Kisa ki sa édé nou konpwann mannyè-a Jéhova ka santi konsèné sé mansonj-lan moun ka simen konsèné’y?

 IMAGINÉ sa: On moun ou enmen an chay di kéchòy konsèné’w. Ou konnèt sa moun-lan di sé yon mansonj, mé adan moun ka kwè’y. Pli mové pasé sa, sé moun-lan koumansé wépété mansonj-lan èk lòt moun ka kwè’y osi. Konsa, koumannyè ou té kay santi? Ében si’w enmen moun, épi bon wépitasyon’w, sa té kay fè’w lapenn, èspa?​—Pwov. 22:1.

² Ében ègzanp sala ka édé’w konpwann koumannyè Jéhova santi lè Satan donmajé wépitasyon’y. Wi, Satan manti asou Jéhova bay Èv, èk i kwè Satan. Èvèk mansonj sala fè Adanm èk Èv wébèl kont Jéhova. Èk a kòz di sa, tout lézòm ka péché èk mò. (Jen. 3:1-6; Ronm 5:12) Wi sé mansonj-lan Satan koumansé an jaden Édenn ka annékòz tout sé pwòblenm-lan ki asou latè-a jòdi; tèl kon lanmò, ladjè, èk soufwans. Konsa, ès Jéhova ka santi penn a kòz di sé mansonj-lan èk sé pwòblenm-lan sé mansonj-lan annékòz? Mé wi, kouman! Mé wannman Jéhova plen djèwté. Anfen, Bib-la ka kwiyé’y ‘Bondyé-a ki ni tjè kontan’.—1 Tim. 1:11 (NWT).

3. Kisa nou sa édé fè?

³ Nou sa édé bay pwèv ki, Satan manti asou Jéhova. Èk nou ka fè sa lè nou obéyi konmand sala: ‘Glowifyé non Jéhova.’ (Sam 113:1) Konsa ki mannyè nou sa glowifyé non Jéhova? Ében nou sa fè sa, lè nou di moun bon bagay konsèné’y. Alò, ès ou kay glowifyé non Jéhova? Ében, apwézan, annou konsidiwé twa (3) bagay ki kay édé nou glowifyé non Jéhova épi tout tjè nou.

NOU KA FÈ JÉHOVA KONTAN LÈ NOU GLOWIFYÉ NON’Y

4. Lè nou glowifyé Jéhova ki mannyè sa ka fè’y santi? Ba yon ègzanp. (Gadé pòtwé-a osi.)

⁴ Nou ka fè Jéhova kontan lè nou glowifyé non’y. (Sam 119:108) Konsa ès sa vlé di, Jéhova menm kon lézòm ki vlé moun glowifyé yo paski yo bouzwen asiwans ében ankouwajman? Non. Imajiné ègzanp sala: On tifi ka kouwi jwenn papa’y èk anbwasé’y, èk i di papa’y: “Ou sé pli mèyè papa-a an tout latè-a!” Wi, papa-a ka souwi èk pa dé kontan i kontan. Mé pouki? Ében, papa-a kontan pa paski i bizwen enkouwajman ében asiwans hòd fi’y, mé i kontan, paski i enmen fi’y, èk fi’y ka moutwé’y lanmityé èk apwésiyasyon. Èk papa-a sav paski fi’y ka moutwé lanmityé èk apwésiyasyon, fi’y kay ni on chay djèwté kon’y ka pwofité. Konsa, sé pou sé menm wézon sala, Jéhova, pli bon Papa-a, ka kontan lè nou glowifyé’y.

5. Lè nou glowifyé non Jéhova, ki mansonj nou ka di ki fo?

⁵ Lè nou glowifyé non Jéhova, nou ka bay pwèv ki mansonj-lan Satan di konsèné chak di nou fo. Wi, Satan di, pyès moun pa kay wèsté fidèl pou Jéhova si yo anba tès. I di, nou tout kay doubout adowé Jéhova si nou kwè sa kay pli mèyè pou nou. (Jòb 1:9-11; 2:4) Mé chonjé Jòb wèsté fidèl pou Jéhova èk i bay pwèv ki, Satan sé an mantè. Konsa, kisa ou kay fè? Ès ou kay wèsté fidèl pou Jéhova? Ében, chak di nou sa chwazi pou fè tjè Jéhova kontan. Èk nou sa fè sa, lè nou di moun bon bagay konsèné’y èk lè nou wèsté fidèl pou li. (Pwov. 27:11) Wi, i vwéman sé yon lonnè pou fè sa.

6. Ki mannyè nou sa swiv ègzanp Wa David èk sé Livayt-la? (Néhimaya 9:5)

⁶ Moun ki enmen Jéhova vlé glowifyé non’y épi tout tjè yo. An Sam 103:1, Wa David di: “Kité mwen glowifyé Bondyé Senyè-a èk tout lam mwen! Sé pou tout sa mwen ni andidan mwen glowifyé non Senyè-a ki pa ni pyès fòt-la.” David té sav lè nou glowifyé non Jéhova nou ka glowifyé Jéhova osi. Wi, lè nou tann non Jéhova nou ka katjilé asou ki kalité moun i yé, èk osi nou ka katjilé asou sé bèl bagay-la i ka fè. David té vlé twété non papa’y kon on bagay ki sen èk glowifyé’y. I té vlé adowé Jéhova èk ‘tout lam li’, sa vlé di i té vlé adowé Jéhova épi tout tjè’y. An menm mannyè-a lè nasyon Izwayèl té ka adowé Jéhova sé Livayt-la té ka pwan douvan. Yo té di yo pa sa janmen glowifyé Jéhova an pawòl yo mannyè-a non Jéhova méwité. Mé san dout, Jéhova té ka ni djèwté lè yo té ka adowé’y, paski yo té ka adowé’y épi tout tjè yo. (Li Néhimaya 9:5.)

7. Ki mannyè nou sa glowifyé Jéhova lè nou an minis-la èk lè nou ka fè lòt bagay?

⁷ Jòdi jou nou sa fè tjè Jéhova kontan lè nou palé konsèné’y adan on mannyè ki ka moutwé nou ka apwésyé’y èk nou enmen’y. Konsa pli enpòtan bagay-la nou vlé fè lè nou ka pwéché sé sa: Nou vlé édé moun vansé pwé Jéhova èk nou vlé édé yo santi menm mannyè-a nou ka santi konsèné Jéhova. (Jémz 4:8) Wi, nou ka byen kontan pou moutwé moun bèl kawaktè Jéhova ki an Bib-la; kawaktè’y tèl kon lanmityé’y, jistis li, lasajès li, pouvwa’y èk lòt bèl kawaktè’y. Osi, nou ka glowifyé Jéhova èk fè tjè’y kontan lè nou swiv ègzanp li. (Èfés. 5:1) Bon, lè nou fè sé bagay sala adan moun pé òbzòvé nou pa kon moun an vyé latè sala, èk yo vlé konnèt pouki. (Maf. 5:14-16) Alò, lè nou jwenn épi sé moun sala, pitèt nou sa di yo pouki nou diféwan. Èvèk a kòz di sa, sa ki ni tjè sensè kay vlé vansé pwé Jéhova. Wi, lè nou glowifyé Jéhova an sé mannyè sala nou ka ba’y tjè kontan.​—1 Tim. 2:3, 4.

NOU KA FÈ JÉZI KONTAN LÈ NOU GLOWIFYÉ NON JÉHOVA

8. Pouki Jézi sé pli mèyè ègzanp-lan an mannyè-a pou glowifyé Jéhova?

⁸ Jézi sé pli mèyè ègzanp-lan an mannyè-a pou glowifyé Jéhova, paski i konnèt Jéhova pli mèyè pasé tout moun ki an syèl èk ki asou latè-a. (Maf. 11:27) Èk an plis di sa, Jézi kontan Papa’y. (Jan 14:31) Anfen swè-a avan’y mò, lè’y té ka palé bay Papa’y an lapwiyè, i mansyonnen pli enpòtan bagay-la i fè lè’y té asou latè-a. I di: “Mwen fè yo konnèt ou.” (Jan 17:26) Alò, kisa sa vlé di?

9. Ki pawabòl Jézi té sèvi pou édé moun konpwann ki kalité moun Jéhova vwéman yé?

⁹ Jézi pa té sèlman di moun, non Bondyé sé Jéhova. Anfen sé Jwif-la té ja konnèt non Bondyé. Mé Jézi moutwé yo “ki moun Bondyé yé pou vwé”. (Jan 1:17, 18) Pou ègzanp, sé lévanjil Hibrou-a ka moutwé ki, Jéhova plen mizèwikòd èk konpasyon. (Ègz. 34:5-7) Mé Jézi fè sa pli klè lè’y sèvi pawabòl-la konsèné gason-an ki té kité kay papa’y èk papa’y aksèpté’y lè’y viwé. Wi, lè nou li papa-a wè gason’y adan “on distans”, èk i kouwi jwenn li, i anbwasé’y, èk i padonnen’y épi tout tjè’y, nou ka vwéman wè Jéhova plen mizèwikòd èk konpasyon. (Louk 15:11-32) Wi, Jézi édé moun konpwann ki kalité moun Jéhova vwéman yé.

10. (a) Koumannyè nou sav Jézi té sèvi non Papa’y èk i té vlé lézòt moun sèvi’y osi? (Mak 5:19) (Gadé pòtwé-a osi.) (b) Kisa Jézi vlé nou fè jòdi?

¹⁰ Ès Jézi té vlé lézòt moun sèvi non Papa’y? Asiwé! Mé an tan Jézi adan mèt wilizyon té ka kwè si on moun sèvi non Bondyé, i té ka déwèspèkté Bondyé. Kanmenm, Jézi pa janmen kité sa anpéché’y bay non Papa’y lonnè. Bon. Ès ou ka chonjé la té ni yon nonm an péyi Gèrazin ki té ni vyé lèspwi èk Jézi djéwi’y? Mé wi. Ében apwé sa, sé moun-lan té vini si tèlman pè yo di Jézi pou kité péyi yo èk alé. Konsa Jézi kité péyi-a. (Mak 5: 16, 17) Mé wannman, Jézi té vlé moun an péyi sala konnèt non Bondyé. Konsa i di nonm-lan i té djéwi-a pou di moun pa sa Jézi té fè, mé sa Jéhova té fè ba li. (Li Mak 5:19.) a Alò, jòdi Jézi vlé nou fè menm bagay-la. Wi, i vlé nou fè moun oliwon latè-a konnèt non Papa’y! (Maf. 24:14; 28:19, 20) Èk lè nou fè moun konnèt non Bondyé, nou ka fè Wa nou Jézi, kontan.

11. Kisa Jézi té enstwi disip li pou pwédyé pou, èk kisa sa ka di nou konsèné’y? (Izikèl 36:23)

¹¹ Jézi sav divwa Jéhova sé pou fè moun konnèt i sé on Dyé ki sen. Sé pou wézon sala Jézi enstwi disip li pou pwédyé an mannyè sala: “Papa nou ki an syèl, nou ka pwédyé pou tout moun onnowéʼw kon Bondyé.” (Maf. 6:9) Èk Jézi té sav, pou onnowé non Bondyé sété pli gwo bagay-la lézòm ni pou fè. (Li Izikèl 36:23.) Bon, chonjé, pyèsonn p’òkò janmen onnowé non Jéhova kon Jézi. Mé magwé sa, lè yo awété Jézi, lèlmi’y di, Jézi té ka déwèspèkté Bondyé. Èk sa sété pli mové péché-a. Wi, sa té vwéman distwé lidé Jézi. Anfen, pitèt sa sété pli gwo wézon-an Jézi té adan an chay “lapenn” djòs avan yo awété’y.—Louk 22:41-44.

12. Ki mannyè Jézi té onnowé non Papa’y?

¹² Lè Jézi té asou latè-a, i èspéyansé tout kalté soufwans, ensit, honté, èk mansonj. Mé i tjenbé fò anba tout sé bagay sala, paski i té vlé onnowé non Papa’y. Anfen, Jézi té sav i té obéyi Jéhova an tout bagay, èk i pa té ni anyen pou santi hont pou. (Hib. 12:2) Èk i té osi sav sété Satan ki té ka ataké’y diwan tan difisil sala. (Louk 22:2-4; 23:33, 34) Wi, Satan éséyé kasé fidèlité Jézi, mé Satan pèd toubonnman! Konsa, Jézi moutwé pa fidèlité’y Satan sé yon vyé mantè. Èk Jéhova vwéman ni sèvant ki ka tjenn fidèlité yo pou li anba sitiwasyon ki byen difisil!

13. Ki mannyè ou sa fè Wa’w, Jézi kontan?

¹³ Ès ou vlé fè Wa’w, Jézi kontan? Ében kontiné glowifyé non Jéhova, èk édé moun vini konnèt bèl kawaktè’y. Anfen lè’w fè sa, ou ka swiv ègzanp Jézi. (1 Pita 2: 21) Wi, menm kon Jézi, ou ka fè tjè Jéhova kontan, èk osi ou ka bay pwèv ki, Satan vwéman sé an vyé mantè!

LÈ NOU GLOWIFYÉ NON JÉHOVA NOU KA ÉDÉ SOVÉ MOUN

14-15. Ki bèl bagay ki ka fèt lè nou enstwi moun konsèné Jéhova?

¹⁴ Lè nou glowifyé non Jéhova nou ka édé sové lavi moun. Mé an ki mannyè nou ka fè sa? Ében Bib-la di, Satan “ja vèglé lidé sé moun-an ki pa ka kwè-a.” (2 Kòr. 4:4) Wézilta di sa, sé moun sala ka kwè an chay mansonj tèl kon: La pa ni an Bondyé, Bondyé pa mélé épi nou, nou pa sa fè jan épi Bondyé, Bondyé méchan èk i kay bwilé moun an lanfè pou tout tan. Satan ka simen sé mansonj sala pou sali wépitasyon Bondyé èk pou anpéché moun vansé pwé’y. Mé lè nou pwéché Bon Nouvèl-la, nou ka ganyen a bout plan Satan. Wi, lè nou enstwi moun lavéwité-a konsèné Papa nou Jéhova, nou ka glowifyé non’y. Èk ki bèl bagay ki ka fèt a kòz di sa?

¹⁵ Ében lavéwité-a ki an Pawòl Bondyé ni an chay pouvwa. Alò, lè nou enstwi moun konsèné Jéhova èk kawaktè’y, an bagay èstòdinè ka fèt. Sé mansonj-lan ki té ka vèglé lidé sé moun-lan ka dispawèt an mizi an mizi. Èk yo ka vini konnèt ki moun Jéhova vwéman yé menm kon nou. Wi, yo ka étonnen lè yo apwann konsèné pouvwa’y. (Izay. 40:26) Lè yo apwann konsèné jistis li, sa ka fè yo konfyé’y. (Dito. 32:4) Lasajès Bondyé ka ba yo an chay nòlaj èk bon lakopwann. (Izay. 55:9; Ronm 11:33) Èk lè yo apwann Jéhova sé Dyé lanmityé-a sa ka soulajé tjè yo. (1 Jan 4:8) Wi, pli yo vansé pwé Jéhova, èspwa yo pou viv pou tout tan kon ich li ka vini pli fò. Nou vwéman ni an bèl pwivilaj pou édé lézòt moun vansé pwé Jéhova! Èk lè nou fè sa, Jéhova ka gadé nou kon moun ki ‘ka twavay ansanm épi’y’.​—1 Kòr. 3:5, 9.

16. Lè adan moun apwann non Bondyé, ki éfé i ka ni asou yo? Bay détwa ègzanp.

¹⁶ Lè nou koumansé enstwi moun Pawòl Bondyé nou pé annèk enstwi yo ki Bondyé ni an non èk non’y sé Jéhova. Mé sa sa ni an gwo éfé asou yo. Pou ègzanp, Aaliyah b té lévé adan an wilizyon ki pa té ka kwè an Bib-la. Mé i pa té satisfè épi wilizyon’y èk i pa té santi pwé Bondyé. Kanmenm, lè Aaliyah koumansé étidyé Bib-la épi Témwen Jéhova tout sa chanjé! I koumansé wè Bondyé kon jan’y. I té sipwi pou apwann yo té tiwé non Bondyé adan plizyè Bib èk yo té wiplasé’y épi tit, tèl kon Senyè. Anfen, lè’y apwann non Bondyé sa chanjé lavi’y. I di: “Pli bon jan mwen-an ni an non! I sé an gwan lonnè pou mwen konnèt sa. Sa ka ban mwen tèlman lapé”. Mi an lòt ègzanp. Steve sété an mizisyen. Magwé i té lévé adan wilizyon sé Jwif-la, i tjenn kò’y hòd tout wilizyon pou lapéti ipokwisi-a i té wè-a. Kanmenm, apwé manman’y mò i té ni tèlman lapenn, i dakò pou asid asou yon létid Bib yon Témwen Jéhova té ka fè. Lè i apwann konsèné non Bondyé, sa touché’y ofon tjè’y. Tann sa i di: “M’a té janmen konnèt non Bondyé. Pou pwenmyé fwa-a an lavi mwen, mwen té wéyalizé la vwéman ni an Bondyé! Mwen vin konnèt li kon an moun. A lè sala mwen té sav mwen té twapé on bon Jan.”

17. Pouki ou détèminé pou kontiné glowifyé non Jéhova? (Gadé pòtwé-a osi.)

¹⁷ Kon’w ka pwéché èk enstwi moun, ès ou ka di yo konsèné non Bondyé? Ès ou ka édé yo konnèt kawaktè Bondyé èk ki kalité moun i vwéman yé? Ében si’w ka fè sa, ou ka glowifyé non Bondyé. Wi, kontiné pou fè sa. Kontiné édé moun pou konnèt Moun-lan non-an ka wépwézanté. Si’w fè sa, ou ka édé sové lavi moun. Osi ou kay swiv ègzanp Wa’w, Jézi Kwi. Èk pli enpòtan toujou, ou kay fè tjè Papa’w Jéhova kontan. Alò, kontiné pou ‘glowifyé non’y pou tout létèwnité’!​—Sam 145:2.