1-2. Lapor mene ma twero konyowa me niang kit ma Jehovah winyo kwede i kom goba ma kiwaco i kome?

 GO KONG ni: Ngat mo ma imaro owaco lok mo marac adada i komi. Ingeyo ni meno lok goba; ento jo mukene gucako ye lok meno. Ma dong rac loyo, gucako nwoyo lok goba-ni, dok dano mukene mapol gucako ye. Meno biweko iwinyo nining? Ka ce iparo pi dano kacel ki nying maber ma itye kwede, ci goba man bicwero cwinyi adada.—Car. 22:1.

² Lapor man konyowa me niang kit ma Jehovah owinyo kwede i kare ma kibalo nyinge. Lamalaikane acel owaco lok goba bot dako mukwongo Kawa. Kawa oye goba meno. Pi lok goba meno, Adam ki Kawa gujemo i kom Jehovah. Macalo adwogine, gukelo bal ki to i kom dano ducu. (Acak. 3:​1-6; Rom. 5:12) Pekki ducu ma waneno i lobo i kare-ni, calo to, lweny ki deno can obino macalo adwogi me goba ma Catan okwongo wacone i poto me Eden. Tika Jehovah winyo marac pi goba magi kacel ki pekki ducu ma obino macalo adwogine? Ngene kene. Kadi bed kit meno, Jehovah cwinye pe kec dok pe tye ki akemo. Ki lok ada, en medde ki bedo “Lubanga ma layomcwiny.”—1 Tem. 1:​11, NWT.

3. Mot ango ma wan ducu watye kwede?

³ Watye ki mot me konyo me lonyo nying Jehovah. Watimo meno ka walubo cik mayot man: “Wupak nying [Jehovah]!” (Jab. 113:1) Wapako nying Jehovah ka watito ki  jo mukene lok ada madok i kome. Tika in ibitimo meno? Kong wanenu jami adek ma tugo cwinywa me pako nying Lubangawa.

WAYOMO CWINY JEHOVAH KA WAPAKO NYINGE

4. Pingo cwiny Jehovah bedo yom ka wapakke? Mi labol. (Nen bene cal.)

⁴ Wayomo cwiny Wonwa me polo ka wapako nyinge. (Jab. 119:108) Ento tika meno nyuto ni Lubanga won twer ducu rom ki dano ma gitye ki roc ma gimito ni kipakgi wek giwiny maber? Pe tye kit meno. Nen kong lapor man. Go kong ni latin anyaka mo oringo bot babane, okwako kore ci owacce ni, “In aye baba maber loyo ducu i wi lobo!” Wonne obwunyo dok cwinye obedo yom adada. Pingo? Tika omyero watam ni cwinye obedo yom pien en obedo wego ma goro ma mito cuko cwiny nyo pak ki bot nyare? Pe. Me ka meno, wageno ni en maro nyare dok cwinye yom ni nyare tye ka nyutte mar kacel ki pwoc. En ngeyo ni latinne bibedo dano ma cwinye yom ka opwonnye me nyuto mar kacel ki pwoc. Pi tyen lok marom aroma, Wonwa Jehovah bene, cwinye bedo yom ka wapakke.

5. Ka wapako Jehovah, adot mene ma wanyuto ni obedo lok goba?

⁵ Ka wapako Wonwa me polo, wakonyo me nyuto ni adot ma Catan okelo i kom wan ducu obedo lok goba. Catan omoro adot ni pe tye dano mo ma bicung matek pi nying Lubanga. En owaco ni pe tye dano mo ma bimedde ki bedo lagen bot Lubanga ka okato ki i atematema. Catan owaco ni wabiloko ngewa woko i kom Lubanga ka watamo ni wabinongo gin mo maber. (Yubu 1:​9-11; 2:4) Ento Yubu omedde ki bedo lagen bot Lubanga dok onyuto ni Catan lagoba. In kono? Wan ducu ki acel acel watwero yero me cung pi Wonwa me polo kun wayomo cwinye ka watiyo pire ki gen. (Car. 27:11) Meno pud dong obedo mot madit ya!

6. Watwero lubo lanen pa Kabaka Daudi ki Lulevi nining? (Nekemia 9:5)

⁶ Jo ma gimaro Jehovah gimito pako nyinge ki cwinygi ducu. Kabaka Daudi ocoyo ni: “Pwo Rwot [Jehovah], . . . kwona ducu myero opak nying Rwot maleng.” (Car. 103:1) Daudi oniang ni ka wapako nying Jehovah, ci rom ma nongo watye ka pako Jehovah kikome. Ka wawinyo nying man ni Jehovah, watamo i kom ngat ma en obedo, kite mamwonya ducu, kacel ki tic me  aura ma en otiyo. Daudi onongo mito tero nying Wonne calo gin maleng ki me pakone. En onongo mito timo meno ki ‘kwone ducu’—nyo, ki cwinye ducu. I yo acel-lu, Lulevi gutelo yo i miyo pak bot Jehovah. Ki mwolo, guye ni lokgi pe twero miyo pak muporo dit pa nying Jehovah. (Kwan Nekemia 9:5.) Labongo akalakala mo, mwologi kacel ki pak ma gumiyo ki cwinygi ducu, oyomo cwiny Jehovah.

7. I yo ma nining ma watwero pako kwede Jehovah i ticwa me pwony ki kwowa me nino ducu?

⁷ I kare-ni, watwero yomo cwiny Jehovah ka waloko i kome i yo ma nyuto dit pa pwocwa ki marwa pire. Ka watye i tic me pwony, yubwa ma pire tek loyo aye me konyo jo mukene me nyikke cok ki Jehovah, wek gunen Wonwa ma lamar-ri kit ma wan bene wanene kwede. (Yak. 4:8) Cwinywa yom me nyuto bot dano gin ma Baibul tito i kom Jehovah, kun wanyuto kite calo mar, ngolo kop atir, ryeko, teko, ki kite mukene mamwonya. Wapako Jehovah bene ka watute ki kerowa ducu me lubo lanenne. (Ep. 5:1) Ka watimo meno, jo mukene gitwero neno ni wapat ki dano ma i lobo man marac-ci dok gitwero penyo pingo. (Mat. 5:​14-16) Ka warwatte kwedgi i kwowa me nino ducu, watwero bedo ki kare me tittigi pingo kitwa pat. Macalo adwogine, jo ma cwinygi atir giromo cako bedo ki miti me nyikke cok ki Lubangawa. Ka wapako Jehovah i yo magi, wayomo cwinye adada.—1 Tem. 2:​3, 4.

WAYOMO CWINY YECU KA WAPAKO NYING JEHOVAH

8. I yo ma nining ma Yecu otelo yo i pako nying Jehovah?

⁸ Pe tye ngat mo i polo nyo i lobo ma ngeyo Jehovah maber loyo Yecu. (Mat. 11:27) Yecu maro Wonne, dok en otelo yo i pako nying Jehovah. (Jon 14:31) I legane bot Wonne i dyewor me agikki ma peya kineke, en otito gin ma pire tek loyo ma ecobo i ticce me pwony i lobo. En owaco ni: “Amiyo nyingi ongene.” (Jon 17:26) Yecu otimo meno nining?

9. Carolok mene ma Yecu obolo me tito i yo mayot ngat ma Wonne obedo?

⁹ Yecu pe otito ki dano keken ni Lubanga nyinge Jehovah ci otum. Lujudaya ma Yecu opwonyogi onongo dong gingeyo nying Lubanga con. Ento Yecu aye otelo yo i “tito ngat ma Won obedo.” (Jon 1:​17, 18, NWT) Me labolle, Ginacoya me leb Ibru onyuto ni Jehovah lakica dok paro pi dano. (Nia 34:​5-7) Yecu otito ada meno ka maleng i kare ma en obolo carolok i kom latin awobi murwenyo ki kit ma wonne otere kwede. Wakwano ni, i kare ma wonne oneno wode ma ongut-ti ma “onongo pud tye cen ka mabor,” oringo bote, okwako kore, dok otimme kica ki cwinye ducu. Man konyowa me neno kit ma Jehovah lakica dok paro kwede pi dano. (Luka 15:​11-32) Yecu okonyo jo mukene me niang Ngat ma Jehovah obedo.

10. (a) Wangeyo nining ni Yecu otiyo ki nying Wonne dok mito ni jo mukene gutim meno? (Marako 5:19) (Nen bene cal.) (b) Ngo ma Yecu mito ni watim i kare-ni?

¹⁰ Tika onongo Yecu mito ni jo mukene bene guti ki nying Wonne? Labongo akalakala mo. Lupwonye dini mogo me kare meno onongo nen calo gitamo ni pe nyuto woro me lwongo nying Lubanga, ento Yecu pe oweko tim me tekwarogi meno ogenge ki keto deyo i kom nying Wonne. Tam kong i kom kare ma en ocango dano mo ma tye ki cen maraco i kabedo me Geraca. Jo ma kunnu lworo omakogi matek dok gubako doggi bot Yecu ni omyero oa woko ki i lobo tugi. (Mar. 5:​16, 17) Kadi bed kit meno, Yecu onongo  mito ni nying Jehovah ongene i kabedo meno. Pi meno, en owaco bot laco ma en ocango-ni ni otit ki dano gin madit ma Jehovah, ento pe Yecu, otimo pire. (Kwan Marako 5:19.) a En mito gin acel-lu i kare-ni, ni wawek nying Wonne ongene i wi lobo ducu! (Mat. 24:14; 28:​19, 20) Ka watimo meno, wayomo cwiny Kabakawa Yecu.

11. Gin ango ma Yecu opwonyo lulub kore me lega pire, dok ma lubbe ki Ejekiel 36:​23, pingo meno pire tek? (Ejekiel 36:23)

¹¹ Yecu onongo ngeyo ni yub pa Jehovah tye me lonyo Nyinge. Meno aye tyen lok mumiyo Laditwa opwonyo lulub kore me lega ni: “Wonwa ma tye i polo, giwor nyingi maleng.” (Mat. 6:9) Yecu oniang ni man aye lok ma pire tek loyo ma cwec ducu tye ka kemme kwede. (Kwan Ejekiel 36:23.) Pe tye ngat mo i polo nyo i lobo ma otiyo matek me lonyo nying Jehovah ma loyo Yecu. Ento i kare ma kimako Yecu, lumonene gukok i kome ni oyeto Lubanga. Yecu onongo nen calo winyo ni yeto nyo balo nying Wonne maleng-ngi obedo bal madit loyo ducu. Cwinye ocwer adada ni onongo kibingolo kop i kome pi bal man. Meno aye nen calo tyen lok mumiyo Yecu “onongo tye ki kumo twatwal” i kare ma onongo kicok make.—Luka 22:​41-44.

12. Yecu olonyo nying Wonne i yo maber loyo nining?

¹² Me lonyo nying Wonne, Yecu okanyo aunauna, yet, lok goba, ki goc ma kigoye kwede ducu. En ongeyo ni ebedo lawiny bot Wonne i jami ducu; onongo pe tye ki gin mo ma omyero lewic omake iye. (Ibru 12:2) En bene oniang ni Catan tye ka lweny kwede atir i dyewor meno. (Luka 22:​2-4; 23:​33, 34) Catan nen calo otamo ni ebituro gen pa Yecu woko; ento, yub pa Catan pe ocobbe kulu! Yecu onyuto ka maleng ni Catan obedo lagoba dok ni Jehovah tye ki lutic ma gigwoko gennegi kadi bed gitye ka kato ki i atematema matek nining!

13. Itwero yomo cwiny Kabakawa nining?

¹³ Tika imito yomo cwiny Kabakawa ma dong tye ka loc-ci? Medde ki pako nying Jehovah, kun ikonyo jo mukene me pwonyo  lok i kom kite mamwonya ducu. Ka itimo kit meno, nongo itye ka lubo kor tyen Yecu. (1 Pet. 2:21) Calo Yecu, nongo itye ka yomo cwiny Jehovah kun inyuto ni Lamonene Catan obedo lagoba ma wiye tek!

WAKONYO ME LARO KWO KA WAPAKO NYING JEHOVAH

14-15. Jami mabeco mene ma timme ka wapwonyo dano lok i kom Jehovah?

¹⁴ Ka wapako nying Jehovah wakonyo me laro kwo pa dano. I yo ma nining? Tye ni, “jo ma pe giye-nu, lubanga me lobo man [Catan] dong oumo tamgi woko.” (2 Kor. 4:4) Macalo adwogine, gucako ye goba ma Catan nyayo calo magi: Lubanga pe, Lubanga tye mabor kwedwa dok pe paro pi dano, Lubanga cwinye col dok wango lutim bal i mac me kapiny. Catan nyayo goba magi ducu pien en mito balo nying Jehovah kacel ki juko dano ki nyikke cok ki Jehovah. Ento ka watito kwena, wagengo Catan ki cobo yubbe. Wapwonyo dano ki lok ada madok i kom Wonwa, kun wapako nying Lubangawa maleng-ngi. Adwogine tye nining?

¹⁵ Ada ma tye i Lok pa Lubanga tye ki teko madwong. Ka wapwonyo dano lok i kom Jehovah kacel ki kite, waneno ka gin mo maber adada timme. Goba pa Catan ma onongo oumo wanggi calo kele poto woko, dok gicako neno kit mamwonya ma Wonwa Jehovah tye kwede. Gibedo ki ur i kom tekone ma lapore pe. (Ic. 40:26) Gipwonnye me genne pien en ngolo kop atir. (Nwo. 32:4) Gipwonyo jami mapol ki i ryekone. (Ic. 55:9; Rom. 11:33) Dok cwinygi kwe me ngeyo ni Lubanga aye mar. (1 Jon 4:8) Ka giwoto ki nyiko cok ki Jehovah, gengi me kwo pi naka macalo lutinone medde ki doko matek. Pud dong watye ki deyo madit ya me konyo jo mukene me nyikke cok ki Wonwa! Ka watimo meno, Jehovah lwongowa ni ‘wan lutic kacel kwede.’—1 Kor. 3:​5, 9.

16. Pwonyo nying Lubanga gudo jo mukene nining? Mi labol mogo.

¹⁶ I acakkine, waromo mere pwonyo dano ni Lubanga nyinge Jehovah. Kadi wa ngec meno keken, twero loko kwo pa dano ma cwinye tye atir. Me labolle, anyaka mo ma  nyinge Aaliyah b odongo i paco ma danone pe gubedo Lukricitayo. Ento en onongo pe oyeng ki dinine dok pe winyo ni etye cok ki Lubanga. Meno ducu olokke i kare ma en ocako kwano Baibul ki Lucaden pa Jehovah. En ocako neno Lubanga macalo Lareme. Dok obedo bene ki ur me niang ni kikwanyo nying Lubanga woko ki i Baibul mapol dok kileyo kakare ki nying me dog tic, calo Rwot. Pwonyo nying Jehovah oloko kwone kwicikwici. En owaco ni: “Larema macok loyo tye ki nyinge!” Adwogine obedo nining? En owaco ni: “I kare-ni dong atye ki kuc madwong i cwinya. Atye ki mot me ngeyo nying Jehovah.” Laco mo ma nyinge Steve onongo obedo lawer ma oa ki i paco ma danone gitye i dini pa Lujudaya dok gin lugingi adada. En onongo pe mito bedo i dini mo keken pi tim maraco ma en oneno kitimo i nying dini. Ento i kare ma minne oto, en obedo tye i kare ma Lacaden mo tye ka kwano Baibul ki lareme. Pwonyo nying Lubanga ogudo cwinye adada. En owaco ni: “Onongo ma naka yang pe angeyo ni Lubanga tye ki nyinge kulu.” En omedo ni: “Pi tyen mukwongo, aniang ni Lubanga tye ada! Acako nenne macalo larema. Aniang ni anongo Larema maber adada.”

17. Pingo imoko tammi me medde ki pako nying Jehovah? (Nen bene cal.)

¹⁷ I ticci me tito kwena ki pwonyo dano, tika in inywako kwedgi nying Jehovah? Tika ikonyogi me neno kit pa Lubanga? Ka itimo meno, ci nongo itye ka pako nying Lubanga. Medde ki pako nying Jehovah maleng-ngi kun ikonyo dano me ngeyo Ngat ma en obedo. I yo meno, nongo itye ka laro kwo pa dano. Nongo itye ka lubo lanen pa Kabakawa, Yecu Kricito. Dok ma pire tek loyo, ibiyomo cwiny Wonwa ma lamar-ri, Jehovah. Walego ni imedde ki ‘pako nyinge nakanaka!’—Jab. 145:2.