1-2. Mɛni maa ye bua wɔ konɛ waa le bɔ nɛ Yehowa nu he ha benɛ a gbe e biɛ ɔ he guɛ ɔ?

 MOO po nɔ́ nɛ ɔ he foni nɛ o hyɛ: Ngɔɔ lɛ kaa nɔ ko nɛ o suɔ lɛ wawɛɛ ɔ de nɔ́ yaya ko ngɛ o he. O le kaa nɔ́ nɛ e de ɔ ji lakpa, se ni komɛ he ye. Nɔ́ nɛ pa puɛ sane ɔ kulaa ji kaa a bɔni lakpa munyu nɛ ɔ gbɛmi kɛ ngɛ fĩae nɛ nihi fuu hu he ye. Kɛ o maa nu he ha kɛɛ? Ke o susu nɔ́ nɛ nihi ma de ngɛ o he, kɛ o biɛ nɛ ma puɛ ɔ he ɔ, e ngɛ heii kaa e maa dɔ mo wawɛɛ.—Abɛ 22:1.

² Sane nɛ ɔ ma nyɛ maa ye bua wɔ konɛ waa le bɔ nɛ Yehowa nu he ha benɛ a gbe e biɛ ɔ he guɛ ɔ. E bɔfo ɔmɛ ngɛ hiɔwe ɔ a kpɛti nɔ kake tu lakpa munyu ngɛ Yehowa he kɛ tsɔɔ Hawa. Hawa hu he jamɛ a lakpa munyu ɔ ye. Jamɛ a lakpa munyu ɔ lɛ ha nɛ Adam kɛ Hawa tsɔ Yehowa hɛ mi atuã a nɛ. Enɛ ɔ ha nɛ yayami kɛ gbenɔ gbɛ fĩa je ɔ mi. (1 Mose 3:​1-6; Rom. 5:12) Lakpa munyu nɛ Satan tu ngɛ Yehowa he ngɛ Eden abɔɔ ɔ mi ɔ ha nɛ gbenɔ, ta, kɛ nɔ́ nami gbɛ fĩa je ɔ mi. Anɛ lakpa munyu nɛ Satan tu ngɛ Yehowa he ɔ kɛ nɔ́ nɛ je mi kɛ ba a dɔ Yehowa lo? Ee, e dɔ lɛ wawɛɛ. Se kɛ̃ ɔ, e kɛ abofu ɔ wui e mi. Ngɛ anɔkuale mi ɔ, loloolo ɔ, Yehowa ji “bua jɔmi Mawu.”—1 Tim. 1:11.

3. Mɛni wɔ tsuo wa ma nyɛ maa pee?

³ Wɔ tsuo wa ma nyɛ maa ye bua kɛ tsɔ Yehowa biɛ ɔ nɛ Satan gbe he guɛ ɔ he. Ke wa bu fami nɛ ji: ‘Nyɛ je Yehowa  biɛ ɔ yi’ ɔ tue ɔ, lɔ ɔ tsɔɔ kaa wa ngɛ Yehowa biɛ ɔ he tsɔe. (La 113:1) Ke wa de nihi anɔkuale nɛ kɔɔ Yehowa he ɔ, lɔ ɔ tsɔɔ kaa wa ngɛ e biɛ ɔ yi jee. Anɛ o ma je Yehowa biɛ ɔ yi lo? Nyɛ ha nɛ wa susu yi mi tomi etɛ komɛ a he je nɛ e sa nɛ waa je wa tsui mi kɛ je Mawu biɛ ɔ yi ɔ he.

KE WA JE YEHOWA BIƐ Ɔ YI Ɔ, E BUA JƆƆ

4. Mɛni he je nɛ ke wa je Yehowa yi ɔ, e bua jɔɔ ɔ? Ngɔɔ nɔ́ he tomi nɔ́ ko kɛ tsɔɔ mi. (Hyɛ foni ɔ hulɔ.)

⁴ Wa hiɔwe Tsɛ ɔ bua jɔɔ wawɛɛ ke wa je e biɛ ɔ yi. (La 119:108) Anɛ enɛ ɔ tsɔɔ kaa Yehowa ngɛ kaa adesahi nɛ a yi mluku nɛ a suɔ nɛ nihi nɛ a je a yi akɛnɛ a hia he wami womi he je ɔ lo? Dɛbi. Mo susu nɔ́ he tomi nɔ́ nɛ ɔ he nɛ o hyɛ. Moo ngɔ lɛ kaa jokuɛ yoyo ko ngɔ e nine kɛ fɔ e tsɛ kuɛ mi nɛ e de lɛ ke, “Papaa, tsɛ ko be nɛ e ngɛ kaa mo!” Nɔ́ nɛ jokuɛ ɔ pee ɔ ha nɛ e papaa bua jɔ wawɛɛ nɛ e muɔ. Mɛni he je? E ngɛ mi kaa tsɛ ɔ bua jɔ mohu lɛɛ, se lɔ ɔ tsɔɔ we kaa e hia yi jemi kɛ he wami womi kɛ je e biyo ɔ ngɔ. Mohu ɔ, lɔ ɔ tsɔɔ kaa e suɔ e biyo ɔ, nɛ e bua jɔ kaa e biyo ɔ hu je suɔmi kɛ hɛsa kpo kɛ tsɔɔ lɛ. Tsɛ ɔ le kaa su nɛ ɔmɛ nɛ e biyo ɔ je kpo ɔ maa ye bua lɛ nitsɛ konɛ e bua nɛ jɔ ngɛ si himi mi. Yi mi tomi komɛ kaa jã a he je nɛ Yehowa nɛ ji wa Tsɛ ɔ bua jɔɔ ke wa je e yi ɔ nɛ.

5. Ke wa je Yehowa yi ɔ, mɛni blɔ nɔ nɛ wa haa nɛ Satan peeɔ lakpatsɛ?

⁵ Ke wa je wa hiɔwe Tsɛ ɔ yi ɔ, lɔ ɔ haa nɛ e peeɔ heii kaa munyu kpa ko nɛ Satan tu kɛ si wɔ ɔ ji lakpa. Satan tsɔɔ kaa adesa ko be nɛ e kɛ anɔkuale yemi ma nyɛ ma fã Mawu biɛ ɔ he. E tsɔɔ kaa adesahi be nyɛe maa ya nɔ maa ye Mawu anɔkuale ke a kɛ kahi ngɛ kpee. Satan tsɔɔ kaa wa ma kpa Mawu sɔmɔmi ke wa susu kaa lɔ ɔ ma ha nɛ wa si himi nɛ pee kpakpa. (Hiob 1:​9-11; 2:4) Se Hiob ya nɔ nɛ e ye Mawu anɔkuale, nɛ e pee heii kaa Satan ji lakpatsɛ. Anɛ mo hu o ma nyɛ maa ya nɔ maa ye Mawu anɔkuale lo? Wa kpɛti nɔ fɛɛ nɔ ma nyɛ maa hla kaa e ma fã wa hiɔwe Tsɛ ɔ biɛ ɔ he konɛ waa kɛ anɔkuale yemi nɛ sɔmɔ lɛ nɛ e bua nɛ jɔ wawɛɛ. (Abɛ 27:11) Enɛ ɔ ji he blɔ ngua nɛ wa ná.

6. Mɛni wa ma nyɛ maa kase ngɛ Matsɛ David kɛ Levi bi ɔmɛ a nɔ hyɛmi ní ɔmɛ a mi? (Nehemia 9:5)

⁶ Nihi tsuo nɛ a suɔ Yehowa a suɔ kaa a ma je e biɛ ɔ yi kɛ a tsui tsuo. Matsɛ David ngma ke: ‘Ma je Yehowa yi! Ma je e biɛ klɔuklɔu ɔ yi kɛ ye tsui tsuo.’ (La 103:1) David le kaa ke wa je Yehowa biɛ ɔ yi ɔ, e tsɔɔ kaa wa ngɛ Yehowa yi jee. Ke wa nu Yehowa biɛ ɔ, e haa nɛ wa susuɔ bɔ nɛ e ngɛ ha tutuutu, e su kpakpa amɛ, kɛ nyakpɛ níhi nɛ e pee ɔ a he. David suɔ kaa e fã e Tsɛ ɔ biɛ klɔuklɔu ɔ he nɛ  e je e yi, nɛ e suɔ nɛ e pee jã kɛ e “tsui tsuo.” Jã nɔuu kɛ̃ nɛ Levi bi ɔmɛ nyɛɛ hɛ mi nɛ a kɛ Israel bi kpa amɛ je Yehowa yi. Akɛnɛ a baa a he si he je ɔ, a yɔse po kaa a be nyɛe ma je Yehowa biɛ klɔuklɔu ɔ yi bɔ nɛ sa lɛ. (Kane Nehemia 9:5.) Ngɛ anɔkuale mi ɔ, akɛnɛ a je a tsui mi kɛ je Yehowa biɛ ɔ yi he je ɔ, lɔ ɔ ha nɛ e bua jɔ wawɛɛ.

7. Mɛni blɔ nɔ wa ma nyɛ maa gu kɛ je Yehowa yi ngɛ wa si himi mi, loo ngɛ fiɛɛmi mi?

⁷ Mwɔnɛ ɔ, ke wa tuɔ Yehowa he munyu kɛ tsɔɔ kaa wa suɔ lɛ nɛ wa hɛ sa ní kpakpahi nɛ e peeɔ kɛ haa wɔ ɔ, lɔ ɔ haa nɛ e bua jɔɔ. Ke wa ngɛ fiɛɛe ɔ, wa suɔ nɛ waa ye bua ni kpahi konɛ a hɛ kɛ su Yehowa he, nɛ a na wa hiɔwe Tsɛ ɔ kaa bɔ nɛ wa naa lɛ ɔ. (Yak. 4:8) Baiblo ɔ tsɔɔ kaa Yehowa ngɛ suɔmi, nile, he wami, e yeɔ dami sane, nɛ e ngɛ su kpakpahi fuu hulɔ. Ke wa tu su nɛ ɔmɛ a he munyu kɛ tsɔɔ nihi ɔ, e haa nɛ wa bua jɔɔ. Jehanɛ hu ɔ, ke wa bɔ mɔde kaa wa maa kase Yehowa a, lɔ ɔ tsɔɔ kaa wa ngɛ e yi jee nɛ wa suɔ nɛ waa sa e hɛ mi. (Efe. 5:1) Ke wa pee jã a, e ma ha nɛ nihi nɛ a na kaa wa ngɛ slɔɔto ngɛ ni kpahi nɛ a ngɛ je ɔ mi ɔ a he, nɛ eko ɔ, a maa suɔ nɛ a le nɔ́ he je. (Mat. 5:​14-16) Enɛ ɔ he ɔ, ke waa kɛ mɛ ngɛ ní sɛɛe ɔ, wa ma nyɛ maa tsɔɔ mɛ nɔ́ he je nɛ wa ngɛ slɔɔto ɔ. Enɛ ɔ ma ha nɛ tsui kpakpatsɛmɛ maa hɛ kɛ su wa Mawu ɔ he. Ke wa gu blɔ nɛ ɔmɛ a nɔ kɛ je Yehowa yi ɔ, e haa nɛ e tsui nyaa.—1 Tim. 2:​3, 4.

YESU BUA JƆƆ KE WA JE YEHOWA BIƐ Ɔ YI

8. Mɛni blɔ nɔ nɛ Yesu nyɛɛ hɛ mi kɛ je Yehowa biɛ ɔ yi?

⁸ Ngɛ adebɔ níhi tsuo nɛ a ngɛ hiɔwe kɛ zugba a nɔ a kpɛti ɔ, nɔ ko nɔ ko be nɛ e le Yehowa saminya pe Yesu. (Mat. 11:27) Yesu suɔ e hiɔwe Tsɛ ɔ wawɛɛ, nɛ e nyɛɛ hɛ mi kɛ je Yehowa biɛ ɔ yi. (Yoh. 14:31) Gbɔkuɛ nɛ e nɔ jena Yesu ma gbo ɔ, e sɔle kɛ ha e Tsɛ ɔ nɛ e tu munyu kɛ kɔ ní tsumi titli nɛ e ba tsu ngɛ zugba a nɔ ɔ he. E de ke: “I ha nɛ a le o biɛ ɔ.” (Yoh. 17:26) Mɛni Yesu ngɛ tsɔɔe?

9. Mɛni nɔ́ he tomi nɔ́ nɛ Yesu kɛ tsu ní kɛ tsɔɔ wɔ bɔ nɛ e Tsɛ ɔ ngɛ ha tutuutu?

⁹ Pi nɛ Yesu tsɔɔ nihi kaa Mawu biɛ ji Yehowa kɛkɛ. E ngɛ mi kaa Yuda bi nɛ Yesu tsɔɔ mɛ ní ɔ le Mawu biɛ ɔ momo mohu lɛɛ, se Yesu nyɛɛ hɛ mi kɛ “tsɔɔ bɔ nɛ Mawu ngɛ ha.” (Yoh. 1:​17, 18) Kaa nɔ hyɛmi nɔ́ ɔ, Hebri Ngmami ɔmɛ ha nɛ wa na kaa Yehowa ji mɔbɔ nalɔ nɛ e mi mi sãã lɛ ngɛ nihi a he. (2 Mose 34:​5-7) Yesu ha nɛ munyu nɛ ɔ pee heii benɛ e ngɔ nɔ́ he tomi nɔ́ nɛ kɔɔ bi ko bɔlɔ ɔ kɛ e tsɛ ɔ he ɔ kɛ tsu ní ɔ. Benɛ tsɛ ɔ na e bi nɛ e tsake e tsui ɔ “ngɛ blɔ nɔ tsitsaa kɛ ma a,” e ma fo nɛ e kɛ lɛ ya kpe nɛ e fua lɛ, nɛ e je e tsui mi nɛ e ngɔ e yayami ɔ kɛ ke lɛ. Nɔ́ he tomi nɔ́ nɛ ɔ tsɔɔ heii kaa Yehowa ji Tsɛ nɛ e naa nɔ mɔbɔ nɛ e mi mi sãã lɛ ngɛ adesahi a he. (Luka 15:​19, 20) Yesu ye bua ni kpahi nɛ a na bɔ nɛ e Tsɛ ɔ ngɛ ha tutuutu.

10. (a) Kɛ wa plɛ kɛ le kaa Yesu ngɔ e Tsɛ ɔ biɛ nitsɛ kɛ tsu ní, nɛ e suɔ nɛ ni kpahi hu nɛ a pee jã ha kɛɛ? (Maako 5:19) (b) Mɛni nɛ Yesu suɔ nɛ waa pee mwɔnɛ ɔ? (Hyɛ foni ɔ hulɔ.)

¹⁰ Anɛ Yesu hu suɔ kaa nihi nɛ a ngɔ Tsɛ ɔ biɛ nitsɛnitsɛ kɛ tsu ní lo? Ee. Eko ɔ, jami hɛ mi nyɛɛli komɛ susu kaa e sɛ nɛ a ngɔ Mawu biɛ nitsɛ kɛ tsɛ lɛ, ejakaa e ji nɔ buimi. Se Yesu ha we nɛ susumi nɛ ɔ nɛ dɛ ngmami ɔ nɔ ɔ nɛ tsi lɛ blɔ nɛ e ko wo e Tsɛ ɔ biɛ ɔ hɛ mi nyami. Mo susu nɔ́ nɛ ya nɔ benɛ Yesu tsa nyumu ko nɛ daimoniohi ngɛ lɛ haoe ngɛ Gerasene kpokpa a nɔ ɔ he nɛ o hyɛ. Ni ɔmɛ ye gbeye wawɛɛ nɛ a kpa Yesu pɛɛ kaa e je, enɛ ɔ he ɔ, Yesu je a ma a mi. (Maak. 5:​16, 17) Se loloolo ɔ, Yesu suɔ nɛ jamɛ a ni ɔmɛ nɛ a le Yehowa biɛ ɔ.  Enɛ ɔ he ɔ, e de nyumu ɔ nɛ e tsa lɛ ɔ kaa e ya de nihi nɔ́ nɛ Yehowa pee ha lɛ ɔ, se pi nɔ́ nɛ lɛ Yesu ɔ pee ha lɛ ɔ. (Kane Maako 5:19.) a Mwɔnɛ hu ɔ, Yesu suɔ nɛ wa ha nɛ nihi nɛ a le e Tsɛ ɔ biɛ ɔ ngɛ je kɛ wɛ. (Mat. 24:14; 28:​19, 20) Ke wa pee wa blɔ fa mi nɔ́ ɔ, Yesu nɛ ji wa Matsɛ ɔ bua maa jɔ wawɛɛ.

11. Mɛni nɛ Yesu tsɔɔ e se nyɛɛli ɔmɛ kaa a sɔle ngɛ he, nɛ mɛni he je nɛ lɔ ɔ he hia a? (Ezekiel 36:23)

¹¹ Yesu le kaa Yehowa yi mi tomi ji kaa e ma tsɔ e biɛ ɔ nɛ a gbe he guɛ ɔ he kulaa. Enɛ ɔ he je nɛ wa Nyɔmtsɛ ɔ tsɔɔ e se nyɛɛli ɔmɛ kaa a sɔle ke: “Wa Tsɛ nɛ o ngɛ hiɔwe, ha nɛ o biɛ ɔ he nɛ tsɔ.” (Mat. 6:9) Yesu le kaa sane nɛ ɔ ji sane ko nɛ he hia adebɔ níhi tsuo. (Kane Ezekiel 36:23.) Nɔ ko nɔ ko be nɛ e tsɔ Yehowa biɛ ɔ he kaa bɔ nɛ Yesu pee ɔ. Se benɛ a nu Yesu ɔ, mɛni munyu nɛ e he nyɛli ɔmɛ po kɛ fɔ e nɔ? A tsɔɔ kaa e gbe Mawu biɛ ɔ he guɛ! Ngɛ anɔkuale mi ɔ, Yesu nu he kaa munyu nɛ a po kɛ fɔ e nɔ kaa e gbe e Tsɛ ɔ biɛ klɔuklɔu ɔ he guɛ ɔ ji yayami nɛ pe kulaa. E dɔ lɛ wawɛɛ kaa a maa bu lɛ fɔ nɛ a kojo lɛ ngɛ enɛ ɔ he. Eko ɔ, enɛ ɔ lɛ ha nɛ Yesu ‘hao wawɛɛ’ benɛ e piɛ bɔɔ nɛ a maa nu lɛ ɔ.—Luka 22:​41-44.

12. Mɛni ji nɔ́ nɛ pe kulaa nɛ Yesu pee kɛ tsɔ e Tsɛ ɔ biɛ ɔ he?

¹² A pee Yesu nɔ́ yeyee, a jɛ lɛ, nɛ a gbe e he guɛ wawɛɛ, se e da nya konɛ e nyɛ nɛ e tsɔ e Tsɛ ɔ biɛ ɔ he ɔ. E le kaa e buɔ e Tsɛ ɔ tue ngɛ nɔ́ fɛɛ nɔ́ mi, enɛ ɔ he ɔ, e yi gbeye kulaa. (Heb. 12:2) Jehanɛ hu ɔ, e le kaa Satan nitsɛ lɛ ngɛ lɛ tuae ngɛ haomi be nɛ ɔ mi. (Luka 22:​2-4; 23:​33, 34) E ngɛ heii kaa Satan ma e juɛmi nya si kaa e ma ha nɛ Yesu nɛ kpa Yehowa anɔkuale yemi, se e yi manye kulaa! Yesu ha nɛ e pee heii kaa Satan ji lakpatsɛ kpanaku, nɛ jehanɛ hu ɔ, Yehowa ngɛ sɔmɔli nɛ a yeɔ anɔkuale ke a kɛ kahi nɛ a mi wa ngɛ kpee po!

13. Mɛni o ma nyɛ maa pee konɛ wa Matsɛ nɛ ngɛ nɔ yee ɔ bua nɛ jɔ?

¹³ Anɛ o suɔ nɛ o ha nɛ wa Matsɛ nɛ ngɛ nɔ yee ɔ bua nɛ jɔ lo? Ke jã a, lɛɛ yaa nɔ nɛ o je Yehowa biɛ ɔ yi, nɛ o ye bua ni kpahi nɛ a ba le wa Mawu ɔ su kpakpa amɛ tsuo. Ke o pee jã a, lɔ ɔ tsɔɔ kaa o ngɛ Yesu kasee. (1 Pet. 2:21) Kaa bɔ nɛ Yesu pee ɔ, mo hu o ma nyɛ ma ha nɛ Yehowa bua maa jɔ nɛ o ma ha nɛ e he  nyɛlɔ nɛ ji Satan ɔ maa pee lakpatsɛ, nɛ e hɛ mi ma pue si!

KE WA JE YEHOWA BIƐ Ɔ YI Ɔ, E MA HE NIHI A YI WAMI

14-15. Ke wa tsɔɔ nihi Yehowa he ní ɔ, mɛni ma nyɛ maa ya nɔ?

¹⁴ Ke wa je Yehowa biɛ ɔ yi ɔ, e ma he nihi a yi wami. Ngɛ mɛni blɔ nɔ? Ngɛ anɔkuale mi ɔ, Satan “yu nihi nɛ a he we yi ɔmɛ a juɛmi.” (2 Kor. 4:4) Enɛ ɔ ha nɛ nihi babauu ba he Satan lakpa munyuhi nɛ nyɛɛ se nɛ ɔ ye: Mawu be, Mawu kɛ wa he kɛ nɛ e susuu we adesahi a he, Mawu ji yiwutsotsɛ nɛ e ma pii yayami peeli kɛ ya daa. Satan tu lakpa munyu nɛ ɔmɛ tsuo konɛ e kɛ gbe Yehowa biɛ ɔ he guɛ, konɛ nɔ ko nɔ ko nɛ ko suɔ kaa e maa hɛ kɛ su e he. Se fiɛɛmi ní tsumi ɔ nɛ wa ngɛ tsue ɔ haa nɛ Satan yi mi tomi nɛ ɔ peeɔ yaka. Wa tsɔɔ nihi anɔkualehi nɛ kɔɔ wa Tsɛ ɔ he, nɛ wa jeɔ e biɛ klɔuklɔu ɔ yi. Mɛni lɛ jeɔ jã nɛ wa peeɔ ɔ mi kɛ baa?

¹⁵ Anɔkualehi nɛ ngɛ Mawu Munyu ɔ mi ɔ ngɛ he wami wawɛɛ. Ke wa tsɔɔ nihi anɔkualehi nɛ kɔɔ Yehowa he, kɛ nɔ tutuutu nɛ e ji ɔ, wa yɔseɔ nɔ́ ko nɛ ngɛ nyakpɛ. Mɛni ji lɔ ɔ? Lɔ ɔ ji kaa nihi ba leɔ kaa Satan ji lakpatsɛ, nɛ a naa wa hiɔwe Tsɛ ɔ su kpakpa amɛ nɛ e ngɛ ɔ. Ke a ba le kaa Yehowa ji nɔ ko nɛ ngɛ he wami nɛ se be ɔ, a tsui nɔɔ a mi. (Yes. 40:26) A náa nɔ mi mami kaa Yehowa yeɔ dami sane. (5 Mose 32:4) A kaseɔ níhi babauu kɛ kɔɔ Yehowa níle nɛ se be ɔ he. (Yes. 55:9; Rom. 11:33) Jehanɛ hu ɔ, ke a ba le kaa Yehowa su titli ji suɔmi ɔ, lɔ ɔ woɔ a bua wawɛɛ. (1 Yoh. 4:8) Be mi nɛ a ngɛ hɛe kɛ ngɛ Yehowa he sue ɔ, jã nɔuu kɛ̃ nɛ hɛ kɛ nɔ fɔmi nɛ a ngɛ kaa a maa hi si kɛ ya neneene ɔ hu mi waa. E ji he blɔ ngua nɛ wa ná kaa wa maa ye bua nihi konɛ a hɛ kɛ su wa hiɔwe Tsɛ ɔ he! Ke wa pee jã a, Yehowa maa na wɔ kaa ‘wa piɛɛ e he kɛ ngɛ ní tsue.’—1 Kor. 3:​5, 9.

16. Kɛ ni komɛ nuɔ he ha kɛɛ ke a ba le Mawu biɛ ɔ? Mo ha enɛ ɔ he nɔ hyɛmi nɔ́.

¹⁶ Sisije ɔ, eko ɔ, nɔ́ nɛ wa maa tsɔɔ nihi pɛ ji kaa Mawu biɛ ji Yehowa. Se lɔ ɔ pɛ ma nyɛ ma ná tsui kpakpatsɛmɛ a nɔ he wami wawɛɛ. Kaa nɔ hyɛmi nɔ́ ɔ, mo susu yo ko nɛ a tsɛɛ lɛ ke Aaliyah b nɛ a tsɔse lɛ ngɛ jami kpa ko mi ɔ he  nɛ o hyɛ. E bua jɔɛ jami nɛ e ngɛ mi ɔ he nɛ e nuɔ he kaa e kɛ Mawu a kpɛti kɛ wawɛɛ. Se benɛ e kɛ Yehowa Odasefo ɔmɛ bɔni Baiblo ɔ kasemi ɔ, níhi tsake. E ba na Mawu kaa e Huɛ. Nɛ benɛ e ba ná le kaa a je Mawu biɛ ɔ kɛ je Baiblohi fuu a mi, nɛ a ngɔ sablai komɛ kaa Nyɔmtsɛ kɛ da nane mi ɔ, e pee lɛ nyakpɛ wawɛɛ. Yehowa biɛ nɛ e ba kase ɔ ha nɛ e si himi tsake kulaa. Aaliyah de ke: “Mamoo ye Huɛ nɛ i suɔ lɛ ɔ ngɛ biɛ!” Mɛni lɛ je mi kɛ ba? E de ke: “Amlɔ nɛ ɔ, i ngɛ tue mi jɔmi babauu, nɛ i nuɔ he kaa ye he hia.” La polɔ ko nɛ a tsɛɛ lɛ ke Steve ɔ ji Yuda no ngmingmiingmi. E sume kaa e kɛ jami ko maa bɔ, ejakaa e naa kaa a peeɔ osato. Se benɛ e mami gbo se ɔ, ligbi ko ɔ, e na kaa Yehowa Odasefo no ko kɛ nɔ ko ngɛ Baiblo ɔ kasee nɛ e ya hi si ngɛ lejɛ ɔ nɛ e bu tue. Benɛ e nu kaa a tsɛɛ Mawu ke Yehowa a, e bua jɔ wawɛɛ. Steve de ke: “I li gblee kaa Mawu ngɛ biɛ. Enɛ ɔ ji kekleekle be nɛ i ba na kaa Mawu ji nɔ ko nɛ e ngɛ nitsɛnitsɛ nɛ ma nyɛ ma hɛ kɛ su e he! I nu he kaa i ná Huɛ ko nɛ se be.”

17. Mɛni he je nɛ o fia o pɛɛ si kaa o maa ya nɔ ma je Yehowa biɛ ɔ yi ɔ? (Hyɛ foni ɔ hulɔ.)

¹⁷ Ke o ngɛ fiɛɛe nɛ o ngɛ nihi ní tsɔɔe ɔ, anɛ o tuɔ Yehowa biɛ klɔuklɔu ɔ he munyu lo? Anɛ o haa nɛ a leɔ bɔ nɛ wa Mawu ɔ ngɛ ha tutuutu lo? Ke o pee jã a, lɔ ɔ tsɔɔ kaa o ngɛ Mawu yi jee. Nyɛ ha nɛ wɔ tsuo waa ya nɔ nɛ wa je Yehowa biɛ klɔuklɔu ɔ yi kɛ gu ni kpahi nɛ wa maa ye bua mɛ nɛ a le Nɔ tutuutu nɛ e ji ɔ nɔ. Ke wa pee jã a, wa ma he ni kpahi a yi wami, nɛ lɔ ɔ maa tsɔɔ kaa o ngɛ wa Matsɛ Yesu Kristo kasee. Nɔ́ nɛ pe kulaa a, o ma ha nɛ Yehowa nɛ ji o hiɔwe Tsɛ nɛ ngɛ suɔmi ɔ bua maa jɔ. Nyɛ ha nɛ wɔ tsuo wa ‘je Yehowa biɛ ɔ yi kɛ ya neneene’!—La 145:2.