1-2. Mɩnla yɛ ɩkɔwʋwa yɛ ma yɛkɔnwʋ kezimɔ Gyehova tɩ nɣanlɩ wɔ awohwi mɔɔ belili bɛvalɩ yɩ nwʋ nɩ nwʋ a?

 TUA eyi nwʋ mfonyini kila: Fa yɩ kɛɛ, abiye mɔɔ ɛpɛ yi odwokɔ ɩhã wʋ nwʋ odwokɔ tanɩ. Wʋzawʋ ezi kɛɛ ɔzɔ odwokɔ yɩ ɩ́dɩ nɔhʋanlɛ. Naasʋ̃ abiyemmɔ bele beli. Mɔɔ ɩsɩkɛ odwokɔ yɩ kʋlaa po yɛ lɛ kɛɛ, bɔnlʋmmɔ sʋ̃ bɔwɔlɩ yɩ tʋ kɛɛ bɛpɩndɩɩ awohwi odwokɔ yɩ, na mmenii sʋ̃maa sʋ̃ beleli belili. Kɛ ɛkɛdɩ nɣanlɩ keze a? Sɛ ɔdwɩnɩ abusunwawɔlɛ mɔɔ ɛ nɩɩ mmenii mvʋlɔ wɔ nɩɩ dimaba mɔɔ ɛlɛ yɩ nɩ nwʋ a, ɔzɔ awohwi ndwokɔ yɩ kɛma ekeli ɛyɛkɛ paa. Ɩ́dɩ zɔ a?—Ɛɣɛ. 22:1.

² Ndianwʋ eyi bʋwa yɛ ma yɛnwʋ kezimɔ Gyehova dɩlɩ nɣanlɩ mmɩlɩ mɔ bogualɩ yi dima nwʋ evinli nɩ. Yɩ awɔvʋlɔ yɩ, bo nu ɔkʋ̃ lili awohwi hileli baalɛ mɔɔ ili bɔmʋnlɩ, Yifi, na yɩzayɩ sʋ̃ ileli ilili. Ɔzɔ awohwi nɩ manlɩ yɛ awʋvʋlɔ mɔɔ beli bɔmʋnlɩ nɩ yɛlɩ Gyehova zʋ azʋ̃nzɩzɩbɛ. Na mɛyɩ yɛ ɩva tanɩ nɩɩ owulo ɩɣa ɩzʋkɔlɩ adasamaa bɔ zʋ yɩ a. (Gyn. 3:​1-6; Wul. 5:12) Ɔhawʋ mɔɔ idua yɛ nwʋ munwala iyiyia dɩkɛɛ owulo, kʋnɛ nɩɩ atɩɩtɩɩ nɩ, yi munwatĩĩ zʋ̃ awohwi mɔɔ Setanɩ lili wɔ Ɛdɩnɩ Toolo yi nu nɩ. Asʋ̃ Gyehova di ɛyɛkɛ wɔ mɔɔ ɩzʋ̃ awohwililɛ yɩ nu ɩɣa nɩ nwʋ a? Nyɛ, idi ɛyɛkɛ paa. Naasʋ̃ Gyehova ɩlɛ́falɩ yɛ nwʋ ɛya ilówulalɩ yi nu. Nɔhʋanlɛ nu nɩ, ɩlanwʋ la ɩdɩ “anyɩnlɩlelɛ Nyamɩnlɩ” nɩ.—1 Tim. 1:​11, NWT.

3. Mɩnla ɔnwʋmɔ ɔhʋanɩ yɛ yɛwɔ a?

³ Yenyia ɔnwʋmɔ ɔhʋanɩ kɛɛ yɛkɔwʋwa ma Gyehova yi dima mɔɔ bogua nwʋmɔ evinli nɩ nwʋ kɛdɩ, iluwa ahyɛdɩ eyi mɔɔ yɛkɛva yɛkɛyɛ egyima nɩ zʋ: “Bɛyɩ́ Gyehova yi dima ayɛlɛ.” (Ndw. 113:1) Yɛyɩ Gyehova yi dima ayɛlɛ iluwa yɩ nwʋ odwokɔba mɔɔ yɛkɛhã yekehile mmenii mvʋlɔ nɩ zʋ. Asʋ̃ ɛkɛyɩ Gyehova yi dima ayɛlɛ a? Bɛmá yehila nninyeni aditili asã be mɔɔ ɩkɔwʋwa yɛ ma yɛzʋ̃ yɛ ahʋnlɩnɩ munwala nu yɛkɛyɩ yɛ Nyamɩnlɩ yi dima ayɛlɛ.

 YƐYƖ GYEHOVA YI DIMA AYƐLƐ A, ƖMA YƖ ANYƖ IDE

4. Mɩnla ti mɔɔ sɛ yɛyɩ Gyehova ayɛlɛ a, ɩma yɩ anyɩ de a? Ma nwʋmɔ ndianwʋ. (Kila mfonyini yi sʋ̃.)

⁴ Sɛ yɛyɩ yɛ sʋlɔ Ɛzɩlɛ nɩ yi dima ayɛlɛ a, ɩma yɩ anyɩ ide. (Ndw. 119:108) Asʋ̃ eyi kile kɛɛ, dɩyɛ munwala zʋ Tumivʋlɔ nɩ dɩ kɛɛ adasamaa mɔɔ bɛáli munli mɔɔ behyinyia abiye mɔɔ ɩkɛhamvʋ bɛ ansaana bɛ anyɩ iale nɩ a? Anhã. Bɛmá yezunzu ndianwʋ eyi nwʋ. Fa yɩ kɛɛ kuakula baalɛ be du tɔlɔnwa hɔ yɩ papa yɩ pɛ ɩhɔ ɩdɔ yɩ nwʋ, na akʋ̃ ɩkã ikile yi kɛɛ, “Mɔwʋ yɛ ɛdɩ ɛzɩlɛ baaba wɔ oyuwadɩ munwala a.” Odwokɔ yɩ ɩhã yɩ papa yɩ ahʋnlɩnɩ na ɩma ɩsɩlɩzɩlɩ. Mɩnla ti a? Asʋ̃ yɛkɛhã kɛɛ, ɛzɩlɛ nɩ yɩ anyɩnlɩlelɛ gyĩ ɛzɩzɩbɛhyɛlɛ nɩɩ ɛhamvʋlɛ mɔɔ yɩ ɣa yɩ fa ma yɩ nɩ zʋ a? Anhã. Mfomi, iluwakɛɛ ɩdɔ yɩ ɣa yɩ na yɩ anyɩ ile kɛɛ yɩ ɣa yɩ sʋ̃ dɔ yɩ na ikilee mɔɔ ɩyɛ ɩma yɩ nɩ nwʋ anyɩnlɩzɔlɛ. Izi kɛɛ, ɔlɔlɛ nɩɩ anyɩnlɩzɔlɛ mɔɔ yɩ ɣa kɛla yɩ ali nɩ kɔwʋwa yɩ ma yɩ anyɩ kele mmɩlɩ mɔ inyii nɩ. Ɔzɔ la sʋ̃ yɛ Gyehova, Ɛzɩlɛ mɔɔ ɩtɛla abiyela nɩ yɩ anyɩ de mmɩlɩ mɔ yɛyɩ yɩ ayɛlɛ nɩ a.

5. Sɛ yɛyɩ Gyehova ayɛlɛ a, mɩnla odwokɔ yɛ yɛda yɩ ali kɛɛ ɩdɩ awohwi a?

⁵ Sɛ yɛyɩ yɛ sʋlɔ Ɛzɩlɛ yɩ ayɛlɛ a, ɩbʋwa ma yɛda yɩ ali kɛɛ odwokɔ mɔɔ Setanɩ ɩva idiã amɩyɛ sʋ̃ yɛ zʋ nɩ, ɩ́dɩ nɔhʋanlɛ. Setanɩ ɩhã kɛɛ, abiyela íni kɛnɩ mɔɔ ɩkɔhʋla ɩkɛva nɔhʋanlɛlilɛ ikegyina Gyehova yɩ ɔfʋã, na sɛ botwe yɛ bekila a, yɛlɔ́kʋla yɛkɔzɔ ye munlililɛ nu. Setanɩ ɩhã kɛɛ, sɛ yɛnwʋ kɛɛ yeyiaki Gyehova yɩ ɔzʋ̃mɩnlɛ na yɛ nwʋ kɔdɔ yɛ a, sa yepinyia yɩ ɔzʋ̃mɩnlɛ yetiã ahanlɩ. (Dwb. 1:​9-11; 2:4) Naasʋ̃ nɔhʋanlɛvʋlɔ Dwoobu hileli kɛɛ, Abɔnsamɩ dɩ awohwivʋlɔ. Na wʋzawʋ sʋ̃ ɛ, sa ɔkʋla di nɔhʋanlɛ ma Nyamɩnlɩ a? Ye munwatĩĩ yɛwɔ ɔnwʋmɔ ɔhʋanɩ kɛɛ yɛkɛma yɛ sʋlɔ Ɛzɩlɛ nɩ yɩ anyɩ kele iluwa nɔhʋanlɛlilɛ mɔɔ yɛkɛva yɛkɔzʋ̃mɩ yɩ nɩ. (Ɛɣɛ. 27:11) Ɩdɩ ɔnwʋmɔ ɔhʋanɩ kezile paa kɛɛ yɛkɛyɛ zɔ.

6. Kɛ ɩkɛyɛ na yɛazumazuma Devidi nɩɩ Levimaa nɩ a? (Nehɛmaya 9:5)

⁶ Bɛzabɛ mɔɔ bɔdɔ Gyehova nɩ bɔzʋ̃ bɛ ahʋnlɩnɩ munwala nu bɛpɛ kɛɛ bɛyɩ yi dima nɩ ayɛlɛ. Bulombunli Devidi hɛlɛlɩ kɛɛ: “Má mɩyɩ Gyehova ayɛlɛ; ma mɩvá mɩ ahʋnlɩnɩ munwatĩĩ mɩyɩ yi dima nwanzanwanza nɩ ayɛlɛ.” (Ndw. 103:1) Nɩ Devidi zi kɛɛ sɛ yɛyɩ Gyehova yi dima yɩ ayɛlɛ a, nɩ ɩdɩ kɛɛ mɔɔ yɛyɩɩ Gyehova yɩzayɩ ayɛlɛ. Sɛ yɛtɩ Gyehova yi dima a, mɔɔ ɩba yɛ adwɩnɩ nu yɛ lɛ enii kʋ̃ mɔɔ ɩdɩ na ɩma yɛdwɩnɩndwɩnɩ yi subanɩ azʋlɔtʋ nɩɩ nnwʋánlɩ nninyeni mɔɔ ɩyɛ nɩ nwʋ. Nɩ Devidi pɛ kɛɛ yɩ Zɩ Gyehova yi dima nwʋ tɩ na ɩyɩ yɩ ayɛlɛ. Meti nɩ ɩpɛ kɛɛ ɩfa yɩ “ahʋnlɩnɩ munwala” ɩyɛ zɔ. Ɔzɔ la yɛ nɩ  Levimaa yɩ sʋ̃ di anyunumi ma bɛyɩ Gyehova yi dima ayɛlɛ a. Bɔzʋ̃ kãnwʋazɩ nu beleli bedianlɩ numɔ kɛɛ, ndwokɔ bela íni kɛnɩ mɔɔ ɩkɔhʋla ɩkɛla ɛhamvʋlɛ mɔɔ ɩfata Gyehova yi dima nɩ ali. (Kɩnga Nehɛmaya 9:5.) Pɩlazunɛ bela íni nwʋmɔ kɛɛ, ɔzɔ ayɛlɛyɩlɛ mɔɔ ɩzʋ̃ bɛ ahʋnlɩnɩ munwala nu nɩ manlɩ Gyehova anyɩ leli.

7. Mɩnla ɔhʋanɩ zʋ yɛ yɛkɔhʋla yɛkɛyɩ Gyehova ayɛlɛ wɔ dasɩlɛlilɛ nɩɩ yɛzayɛ yɛ ɛbɩlawɔlɛ nu a?

⁷ Nnɛ sʋ̃, sa yɛkʋla yɛyɩ Gyehova ayɛlɛ iluwa yɩ nwʋ ndwokɔ mɔɔ yɛkɛhã yɩ wɔ ɔhʋanɩ be zʋ mɔɔ ɩkɛla yɩ ali kɛɛ yɛ anyɩ sɔ yɩ na yɛdɔ yɩ. Sɛ yɛkɔ dasɩlɛlilɛ a, yɛ bʋtayɩ titili yɛ lɛ kɛɛ yɛkɔwʋwa mmenii ma bɔkɔhwɩ̃ bekeɣike Gyehova na bɛanwʋ yɛ Zɩ mɔɔ ɩwɔ ɔlɔlɛ yɩ kɛmɔ yɛnwʋ yɩ nɩ. (Gye. 4:8) Yɛ anyɩ deli nwʋmɔ kɛɛ yɛkɛma mmenii kɔnwʋ mɔɔ Bayɩbʋlʋ yɩ kã falɩ Gyehova nwʋ kɛɛ ɩdɩ ɔlɔlɛ, pɛlɩpɛlɩ, nɣɛlɛbɛvʋlɔ, ɩwɔ tumi nɩɩ subanɩ ngɩnlɩma mvʋlɔ nɩ. Yɛyɩ Gyehova ayɛlɛ na yɛma yɩ anyɩ de iluwa mmɔdɩnɩ mɔɔ yɛbɔ kɛɛ yekozumazuma yɩ nɩ zʋ. (Ɛfɩ. 5:1) Sɛ yɛyɛ zɔ a, ɩkɛma mmenii kɔnwʋ kɛɛ yɛdɩ sʋnʋnkʋ̃ wɔ mmenii mɔɔ bɔwɔ oyuwadɩ tanɩ eyi nu nɩ nwʋ, na ebiye a, bɛkɛbɛ kɛɛ bɔkɔnwʋ sianti mɔɔ yɛdɩ zɔ nɩ. (Mt. 5:​14-16) Mmɩlɩ bela mɔ yekeyiyia mmenii eyi be nɩ, sa yɛkʋla yɛbʋwa bɛ ma bɔnwʋ sianti mɔɔ yɛdɩ sʋnʋnkʋ̃ nɩ. Eyi kɛma bɛzabɛ mɔɔ bɔwɔ ahʋnlɩnɩba nɩ kɔhwɩ̃ keɣike Nyamɩnlɩ. Sɛ yɛyɩ Gyehova ayɛlɛ wɔ ahʋanɩ eyimmɔ zʋ a, yɛma yɩ anyɩ de paa.—1 Tim. 2:​3, 4.

YƐYƖ GYEHOVA YI DIMA AYƐLƐ A, ƖMA GYISƐSƖ ANYƖ DE

8. Mɩnla ɔhʋanɩ zʋ yɛ Gyisɛsɩ ɩyɛ ndianwʋba wɔ Gyehova yi dima mɔɔ yɛkɛyɩ yɩ ayɛlɛ nɩ nu a?

⁸ Abiyela íni sʋlɔ anzɛnyɩɩ azɩlɛ yɩ zʋ mɔɔ izi Gyehova bʋwɔ ɩtɛla Gyisɛsɩ. (Mt. 11:27) Gyisɛsɩ dɔ yɩ Zɩ na idi anyunumi wɔ Gyehova yi dima mɔɔ yɛkɛyɩ yɩ ayɛlɛ nɩ nu. (Dwɔ. 14:31) Ansaana ibawu nɩ, ɩwɔlɩ yɩ Zɩ mpayɩ, na ɩwɔlɩ yɩ ɔzʋ̃mɩnlɛ egyima wɔ azɩlɛ yɩ zʋ munwala dɔkɔ wɔ ɔhʋanɩ eyi zʋ kɛɛ: “Mɩla wu dima nɩ ali mihile bɛ.” (Dwɔ. 17:​26, NWT) Mɩnla yɛ nɩ Gyisɛsɩ ɩpɛɛ ikehilee a?

9. Mɩnla ɔhʋanɩ zʋ yɛ Gyisɛsɩ luwalɩ ndianwʋ zʋ manlɩ mmenii nwʋnlɩ enii kʋ̃ mɔɔ yɩ Zɩ dɩ ankasa a?

⁹ Gyisɛsɩ ɩábɔ Nyamɩnlɩ yi dima Gyehova yɩ ikile mmenii kɛkɛ iluwakɛɛ nɩ Dwuumaa mɔɔ nɩ Gyisɛsɩ ikilehilee bɛ nɩ, bezi Nyamɩnlɩ yi dima daada. Naasʋ̃ Gyisɛsɩ yɛ ɩmanlɩ bɔnwʋnlɩ “kɛ Nyamɩnlɩ isi ɩdɩ” ankasa a. (Dwɔ. 1:​17, 18) Kɛ ndianwʋ nɩ, Hibulu Ɛhɛlɛlɛ yɩ ma yɛnwʋ kɛɛ, Gyehova dɩ nwɔkɛnwʋnlɛvʋlɔ na ɩwɔ kunlumiyɩbalɛ. (Ɛkɩ. 34:​5-7) Gyisɛsɩ manlɩ odwokɔ eyi nu lalɩ kɛnɩ petee mmɩlɩ mɔ ɩmanlɩ ndianwʋ be mɔɔ ɩfalɩ ɛɣalɛ benyia be mɔɔ iminlinli nɩɩ yɩ zɩ nwʋ nɩ. Yɛkɩnga kɛɛ, ɛzɩlɛ nɩ nwʋnlɩ yɩ ɣa mɔɔ inlu yɩ nwʋ mmɩlɩ mɔ “nɩ ɩla nwʋ ɩwɔ aɣinzi wɔ ɔhʋanɩ nɩ nu nɩ,” iduli tɔlɔnwa ɩhɔ iyiyialɩ yɩ na ɩdɔlɩ yɩ nwʋ, na ɩzʋ̃ yɩ ahʋnlɩnɩ nu ɩva ɩhyɛlɩ yɩ. Eyi ma yɛnwʋ kezimɔ Gyehova yɩ nwɔkɛnwʋnlɛ nɩɩ yi kunlumiyɩbalɛ dɩ kezi nɩ. (Lk. 15:​11-32) Gyisɛsɩ manlɩ mmenii nwʋnlɩ kezimɔ yɩ Zɩ dɩ ankasa.

10. (a) Mɩnla yɛ ɩma yɛnwʋ kɛɛ Gyisɛsɩ valɩ yɩ Zɩ yi dima lili egyima, na nɩ ɩpɛ kɛɛ mmenii sʋ̃ yɛ zɔ a? (Maakɩ 5:​19, NWT) (b) Mɩnla yɛ Gyisɛsɩ pɛ kɛɛ yɛyɛ wɔ nnɛ a? (Kila mfonyini yi sʋ̃.)

¹⁰ Asʋ̃ nɩ Gyisɛsɩ pɛ kɛɛ mmenii fa yɩ Zɩ yi dima Gyehova nɩ di egyima a? Nɩ nyamɩnlɩzʋ̃mɩnlɛ nu mbanimbani mɔɔ bɔwɔ Gyisɛsɩ yɩ mmɩlɩ zʋ nɩ bede bedi kɛɛ Nyamɩnlɩ yi dima yɩ dɩ nwanzanwanza sʋ̃maa kɛɛ mmenii kɔwɔ. Naasʋ̃ Gyisɛsɩ ɩáma ɔhʋanɩ ma ɔzɔ dedi mɔɔ ígyi ɛhɛlɛlɛ yɩ zʋ nɩ isi yi ɔhʋanɩ kɛɛ ikeli yɩ Zɩ yi dima nɩ nni. Mɔwʋ kila mmɩlɩ be mɔ Gyisɛsɩ zalɩ benyia be mɔɔ azunzuma evinli wɔ yi nu adimakɛlɛ wɔ Gilasamaa bɛ azɩlɛ yɩ zʋ nɩ. Mmenii mɔɔ bɔwɔ apaa yi nu kɛnɩ nɩ  bo kunlu duli, meti bezianlɩ Gyisɛsɩ kɛɛ ɩzʋ̃ kɛnɩ ɩyɩ́ yɩ nwʋ. Meti Gyisɛsɩ ɩábʋwa ɔzɔ mansini yi nu. (Mk. 5:​16, 17) Naasʋ̃ nɩ Gyisɛsɩ pɛ kɛɛ mmenii nwʋ yɩ Zɩ yi dima wɔ kɛnɩ. Meti ɩhã ihileli benyia mɔɔ ɩzalɩ yɩ adimakɛlɛ nɩ kɛɛ, ɩhɔ́ ɩhã ihile mmenii kɛɛ Gyehova yɛ ɩza yɩ adimakɛlɛ a, na kɛ mɛyɩ Gyisɛsɩ a. (Kɩnga Maakɩ 5:​19, NWT.) a Ɔzɔ la yɛ nnɛ sʋ̃, Gyisɛsɩ pɛ kɛɛ yɛma mmenii nwʋ yɩ Zɩ yi dima wɔ oyuwadɩ dɩka bela a! (Mt. 24:14; 28:​19, 20) Sɛ yɛyɛ zɔ a, ɩma ye Bulombunli Gyisɛsɩ yɩ anyɩ ide.

11. Mɩnla yɛ Gyisɛsɩ hã hileli yɩ mɛdalilɛmaa kɛɛ bɔwɔ́ nwʋmɔ mpayɩ a, na mɩnla ti mɔɔ nwʋmɔ hyinyia a? (Izikɩyɛlɩ 36:23)

¹¹ Nɩ Gyisɛsɩ zi kɛɛ Gyehova yi tile nu pɔkɔ yɛ lɛ kɛɛ ɩkɛdɩ yi dima mɔɔ bogua nwʋmɔ evinli nɩ nwʋ. Eyi ti mɔɔ ye Niibenyia hã hileli yɩ mɛdalilɛmaa kɛɛ bɔwɔ mpayɩ kɛɛ: “Yɛ Zɩ mɔɔ ɔwɔ sʋlɔ, ma wu dima nwʋ ɩdɩ” yɩ a. (Mt. 6:​9, NWT) Nɩ Gyisɛsɩ zi kɛɛ eyi yɛ lɛ odwokɔ mɔɔ nwʋmɔ hyinyia paa mɔɔ ɩla mmenii nɩɩ awɔvʋlɔ munwala bɛ anyunu a. (Kɩnga Izikɩyɛlɩ 36:23.) Desanii anzɛnyɩɩ bɔvʋlɔ bela íni kɛnɩ mɔɔ ɩyɛ sʋ̃maa ɩva ɩdɩ Gyehova yi dima nwʋ ɩdɛla Gyisɛsɩ. Naasʋ̃ mmɩlɩ mɔ bɛhyɩlɩ Gyisɛsɩ nɩ, yɩ adamvʋlɔ yɩ valɩ ɔzʋnɩ dianlɩ yɩ zʋ kɛɛ, iwu yɩ Zɩ animitiyia kezile baaba paa. Gyisɛsɩ dɩlɩ nɣanlɩ kɛɛ, kɛ ikowu yɩ Zɩ yi dima nwanzanwanza nɩ animitiyia nɩ, ɩdɩ tanɩ mɔɔ ebiye ɩlɛ́balɩ kyɩ̃. Ilili ɛyɛkɛ kezile baaba kɛɛ bɛvalɩ tanɩ eyi nwʋ ɔzʋnɩ bedianlɩ yɩ zʋ. Ɩkɛyɛ kɛɛ eyi yɛ ɩmanlɩ Gyisɛsɩ lili “ɛyɛkɛ kezile” mmɩlɩ mɔ nɩ ɩka ɛgyɩkɩ̃ɩ̃ ma bɛba bɛkyɩ yɩ nɩ a.—Lk. 22:​41-44.

12. Gyisɛsɩ dɩlɩ yɩ Zɩ yi dima nwʋ wɔ ɔhʋanɩ mɔɔ ɩtɛla ebiyela zʋ. Kɛ ɩyɛlɩ yɩ izeli a?

¹² Mɔɔ ɩkɛyɛ na Gyisɛsɩ ɩadɩ yɩ Zɩ yi dima nwʋ nɩ, igyinanlɩ ayɛkwa, ɔwʋdʋlɛ nɩɩ awohwi bela mɔɔ bɛva bedianlɩ yɩ zʋ nɩ yi munwa. Nɩ izi kɛɛ idiye yɩ Zɩ wɔ dɩyɛ bela nu, meti ɩáma yɩ anyɩ tʋnlɩ mɔɔ nɩ bɛlɛ bɛyɛɛ yɩ nɩ nwʋ. (Hib. 12:2) Nɩ izi sʋ̃ kɛɛ wɔ ɔzɔ mmɩlɩ nɩ, nɩ Setanɩ yɛ idu yɩ anyɩ iziye yɩ nwʋ a. (Lk. 22:​2-4; 23:​33, 34) Nɩ Setanɩ izi yɩ kɛnɣa kɛɛ ɩkɛma Gyisɛsɩ kɛyɛ Gyehova zʋ azʋ̃nzɩzɩbɛ. Naasʋ̃, Setanɩ yɩ sa zili azɩ. Gyisɛsɩ lalɩ yɩ ali petee kɛɛ Setanɩ dɩ awohwivʋlɔ na Gyehova wɔ azʋ̃mɩvʋlɔ mɔɔ bedi nɔhʋanlɛ wɔ mmɩlɩ po mɔ beyiyiaa odwohilalɛ mɔɔ numɔ yɛ sɩ nɩ!

13. Kɛ ɩkɛyɛ na wʋayɩ wu Bulombunli mɔɔ idii tumi nɩ ayɛlɛ a?

 ¹³ Asʋ̃ ɛpɛ kɛɛ ɛyɩ wu Bulombunli Gyisɛsɩ ayɛlɛ a? Sɛ ɔzɔ a, mɛyɩ nɩ kɔ zʋlɔ yɩ Gyehova yi dima nɩ ayɛlɛ. Bʋwa mmenii mvʋlɔ ma bɔnwʋ enii kʋ̃ mɔɔ Nyamɩnlɩ dɩ. Sɛ ɛyɛ zɔ a, nɩ edii Gyisɛsɩ mɛda. (1 Pit. 2:21) Dɩkɛɛ Gyisɛsɩ nɩ, nɩ ɛmaa Gyehova yɩ anyɩ kele, na ɛdaa yɩ ali sʋ̃ kɛɛ Setanɩ dɩ awohwivʋlɔ kezile baaba!

SƐ YƐYƖ GYEHOVA YI DIMA AYƐLƐ A, YƐBƲWA MA MMENII NYIA NNWƲANLƖ

14-15. Sɛ yekilehile mmenii Gyehova nwʋ dɩyɛ a, mɩnla nnwʋánlɩdɩyɛ yɛ ɩzʋ̃ numɔ ɩba a?

¹⁴ Sɛ yɛyɩ Gyehova yi dima ayɛlɛ a, yɛbʋwa ma mmenii nyia nnwʋanlɩ. Mɩnla ɔhʋanɩ zʋ a? Iluwakɛɛ Setanɩ ‘izi bɛzabɛ mɔɔ bɛále odwokɔba nɩ bedi nɩ bɛ adwɩnɩ anyɩ.’ (2 Kɔl. 4:4) Eyi ti ɩma mmenii sʋ̃maa bele awohwi ndwokɔ eyi beli kɛɛ, Nyamɩnlɩ íni kɛnɩ, Nyamɩnlɩ wɔ aɣinzi aɣinzi na ɩádwɩnɩ adasamaa nwʋ, Nyamɩnlɩ yi ti nu yɛ sɩ, na ɩyɛ tanɩyɛlɛmaa ayɛkwa. Ɔzɔ awohwi ndwokɔ yɩ munwala yɩ bʋtayɩ yɛ lɛ kɛɛ, ikogua Gyehova yi dima nwʋ evinli na ama mmenii bɛányianlɩ ɛpɛ kɛɛ bɔkɔhwɩ̃ bekeɣike Nyamɩnlɩ. Naasʋ̃ sɛ yedi Gyehova nwʋ dasɩlɛ a, ɩbɔ Setanɩ yi tile nu pɔkɔ ikua. Yɛkã yɛ Zɩ nwʋ nɔhʋanlɛ odwokɔ yekile mmenii yɛfa yɛyɩ Nyamɩnlɩ yi dima ayɛlɛ. Mɩnla yɛ ɩzʋ̃ numɔ ɩba a?

¹⁵ Nɔhʋanlɛ mɔɔ ɩwɔ Nyamɩnlɩ Odwokɔ yɩ nu nɩ wɔ tumi kezile baaba. Sɛ yɛbʋwa mmenii ma bɔnwʋ Gyehova nɩɩ enii kʋ̃ mɔɔ ɩdɩ ankasa nɩ a, debe mɔɔ ɩyɛ anyɩnlɩlelɛ baaba na ɩyɛ nnwʋánlɩ zʋ̃ numɔ ba. Ɩma ngyɩkɩ̃ɩ̃ ngyɩkɩ̃ɩ̃ la, Abɔnsamɩ yɩ awohwi ndwokɔ yɩ tɩdɩ wɔ bɛ anyɩ zʋ, na ɩma bɛba bɔnwʋ Gyehova yi subanɩ ngɩnlɩma azʋlɔtʋ yɩ. Sɛ bɛba bɔnwʋ tumi kezile mɔɔ ɩwɔ nɩ a, ɩyɛ bɔ nnwʋánlɩ. (Ayɩ. 40:26) Sɛ bosuma yɩ pɛlɩpɛlɩlilɛ nwʋ dɩyɛ a, ɩma benyia yi nu anwʋlazʋ. (Dit. 32:4) Bosuma nninyeni sʋ̃maa wɔ yɩ nɣɛlɛbɛ mɔɔ numɔ dɔ nɩ nu. (Ayɩ. 55:9; Wul. 11:33) Na sɛ bɔnwʋ kɛɛ yɩzayɩ munli yɛ lɛ ɔlɔlɛ a, ɩma bɛ ahʋnlɩnɩ tɔ bo kunlu. (1 Dwɔ. 4:8) Mmɩlɩ mɔ bebikee Gyehova nɩ, ɩma anyɩnlɩlazʋ mɔɔ bɔwɔ kɛɛ bɔkɔwʋwa azɩ daabaa kɛɛ yɩ mma nɩ yɛ kezi. Kila kezimɔ ɩdɩ ɔnwʋmɔ ɔhʋanɩ kezile kɛɛ yɛkɔwʋwa mmenii ma bɔkɔhwɩ̃ bekeɣike bɛ Zɩ, Gyehova. Sɛ yɛyɛ zɔ a, Gyehova bu yɛ kɛɛ  yɩ “ɔhɔnwʋ egyimayɛlɛmaa.”—1 Kɔl. 3:​5, 9, NWT.

16. Sɛ abiyemmɔ ba nwʋ Nyamɩnlɩ yi dima yɩ a, kɛ ɩkã bɛ ise a? Ma nwʋmɔ ndianwʋ.

¹⁶ Sɛ yeyiyia abiye fʋlɔ a, ebiye a Nyamɩnlɩ yi dima Gyehova yɩ la yɛ yɛkɛva yekehilehile yi a. Naasʋ̃ ɔzɔ kɛkɛ mɔɔ yɛkɛyɛ nɩ po kɔhʋla kenyia tumi kezile wɔ abiye mɔɔ ɩwɔ ahʋnlɩnɩba nɩ zʋ. Kɛ ndianwʋ nɩ, bɛdɩdɩlɩ kɛdɛkɛ be mɔɔ bɔfʋlɛ yɩ Aaliyah b wɔ abusunwa be mɔɔ bɛ́dɩ Kilisinyiamaa nu. Naasʋ̃ nɩ yɩ anyɩ ɩáhyɛ da deli ɔzʋ̃mɩnlɛ yɩ nwʋ na nɩ ɩádɩ nɣanlɩ kɛɛ iɣike Nyamɩnlɩ. Naasʋ̃ mmɩlɩ mɔ ɩwɔlɩ yɩ tʋ kɛɛ ɩ nɩɩ Gyehova Dasɩvʋlɔmaa bosumaa dɩyɛ nɩ, dɩyɛ bela zɩnzanlɩ. Akʋ̃ ɩɣa ɩnwʋnlɩ Nyamɩnlɩ kɛɛ yɩ ɔhɔnwʋ. Na mmɩlɩ mɔ ɩɣa ɩnwʋnlɩ kɛɛ bɛyɩ Nyamɩnlɩ yi dima wɔ Bayɩbʋlʋ yi nu na bɛva abodini azʋlɔtʋ dɩkɛɛ Niibenyia bowulawula numɔ nɩ, ɩyɛlɩ yɩ nnwʋánlɩ baaba. Gyehova yi dima mɔɔ ɩɣa ɩnwʋnlɩ yɩ nɩ zɩnzanlɩ yɩ ɛbɩlawɔlɛ. Ɩvalɩ anyɩnlɩlelɛ ɩhanlɩ kɛɛ: “Ntʋlɔnkʋdɩ mʋ ɔhɔnwʋ yɩ wɔ dima!” Mɩnla yɛ ɩzʋ̃ numɔ ɩɣalɩ a? Ɩdʋwalɩ zʋlɔ kɛɛ: “Kakɩ yɩ, mɩ ahʋnlɩnɩ dɔ mu kunlu. Mɩtɩ nɣanlɩ kɛɛ minyia ɔnwʋmɔ ɔhʋanɩ kezile be.” Nɩ benyia be mɔɔ bɔfʋlɛ yɩ Steve dɩ ndwomidʋlɛvʋlɔ mɔɔ ɩzʋ̃ abusunwa be mɔɔ bɛdɩ Dwuumaa basɩba nu. Nɩ ɩábɛ kɛɛ ɩfa yɩ nwʋ ɩbɔ ɔzʋ̃mɩnlɛ okuwu bela iluwakɛɛ nɩ ɩnwʋ nabalaba mɔɔ ɩkɔlɩ zʋlɔ wɔ bo nu nɩ. Naasʋ̃ yɩ maamɩ yi owulo mɛda nɩ, ɩhɔ ɩwʋwalɩ Bayɩbʋlʋ dɩyɛzumanlɛ be mɔɔ nɩ Gyehova Dasɩvʋlɔmaa bɛ nɩɩ abiye bɛyɛɛ nɩ nu. Ɩɣa ɩnwʋnlɩ Nyamɩnlɩ yi dima nɩ, ɩhanlɩ yɩ ahʋnlɩnɩ baaba . Ɩhanlɩ kɛɛ: “Nɩ mízi kyɩ̃ kɛɛ Nyamɩnlɩ wɔ dima.” Ɩva ɩzɔlɩ zʋlɔ kɛɛ: “Ɔzɔ mmɩlɩ nɩ yɛ mɩɣa mʋnwʋnlɩ kɛɛ Nyamɩnlɩ wɔ kɛnɩ amba a. Mʋnwʋnlɩ yɩ kɛɛ abiye mɔɔ ɩwɔ kɛnɩ ankasa. Akʋ̃ mɩdɩlɩ nɣanlɩ kɛɛ minyia ɔhɔnwʋ be.”

17. Mɩnla yɛ ezi wʋ kɛnɣa kɛɛ ɔkɔhɔ zʋlɔ kɛyɛ kɛva kɛyɩ Gyehova yi dima ayɛlɛ a? (Kila mfonyini yi sʋ̃.)

¹⁷ Wɔ wʋ dasɩlɛlilɛ egyima yɩ nu nɩ, asʋ̃ ɛma mmenii nwʋ Gyehova yi dima yɩ a? Asʋ̃ ɔbʋwa bɛ ma bɔnwʋ enii kʋ̃ mɔɔ Nyamɩnlɩ dɩ ankasa a? Sɛ ɛyɛ zɔ a, nɩ ɛyɩɩ Nyamɩnlɩ yi dima ayɛlɛ. Kɔ zʋlɔ yɩ Nyamɩnlɩ yi dima nwanzanwanza nɩ ayɛlɛ iluwa mmenii mɔɔ ɔkɔwʋwa bɛ ma bɔkɔnwʋ enii kʋ̃ mɔɔ ɩdɩ nɩ ankasa nɩ. Wɔ ɔzɔ ɔhʋanɩ yɩ zʋ nɩ, ekele mmenii nnwʋanlɩ. Akʋ̃ sʋ̃, nɩ osumazumaa ye Bulombunli Gyisɛsɩ Kɩlayɩsɩ. Mɔɔ ɩtɛla yi munwala nɩ Gyehova, wʋ Zɩ mɔɔ ɩwɔ ɔlɔlɛ nɩ, yɩ anyɩ kele. Ɩɣɩla kɛɛ ‘ɛkɛyɩ yi dima ayɛlɛ daabaa’!—Ndw. 145:2.