1-2. O manan a tinakoan padamaay kitanan cipinang to nafalocoˈan ni Yihofa tiya mapakadit?

 HARATENGEN hena, mikiharan iso a tamdaw pasowalay i tao to milikafay tisowanan a sowal. Onini a sowal cowa ko soˈlinay, kawra pakasoˈlinay ko roma tamdaw. Mangalefay i, onini a mangah mayakayakayto, telocto i, ˈaloman ˈalomanayto ko pakasoˈlinay a tamdaw. Samaan ko piharateng iso hani? Ano misakaretengay kiso to kalalaˈed to tao, misakaretengho to ngangan no niyah, maedeng o mamasomad ko harateng iso, hatiraay han?​​—⁠Taneng 22:⁠1.

² Oniya tinakoan padamaay kitanan cipinang, ano mapalak ko fangcalay ngangan ni Yihofa i, samaanay ko harateng Ningra. O cecay ˈadingo ko tireng a wawa Ningra itiniay i ˈaˈayaw no saka cecay fafahiyan ci Ifa mipaoraf Cingranan, pakasoˈlin sanay ci Ifa. Telocto cingra ato faˈinay malacafayay mitowakang ci Yihofaan, mikitiya o polong a tamdaw mafakecayto no raraw ato patay. (Satapangan 3:​1-6; Loma 5:​12) Pakayniay i piyakayak ni Satan i Itin to mangah ci Yihofaan, mansa oniya hekal matomesay ko adihayay a pades, tada pakarorayay to tamdaw. Mapaoraf ci Yihofa, maˈarawho ko pairaan no mangah a pades i tamdaw, samaanay ko harateng Ningra hani? Maedeng adadaay ko falocoˈ Ningra. Kawra, cowa ka padadotoc a masofaw ko harateng Ningra. Soˈlinay haw i, kamayan Cingra o ‘lipahakay a Kawas.’​​—⁠1 Timoti 1:​11.

3. Kita maemin iraay ko tatodong misamaan ko pidemak?

³ Kita maemin iraay ko tatodong, mihadak to ˈicel mikorac to mapakaditay a fangcalay ngangan ni Yihofa, o pakayraan i, midofdof to limoˈot no Fangcalay Cudad: ‘Ka pakahemek, pakahemeken ko fangcalay ngangan ni Yihofa.’ (ˈOlic 113:⁠1) Pasowal kita to tao to makapahay capeling ni Yihofa ato kasapaan a demak Ningra, o pakahemekayto ci Yihofaan. Mamakahi kiso mihaen to demak han? Dotoc mamilengo kita to tolo a lalangian, oniya lalangian papakalalok kitanan misarocod to falocoˈ misarocod to harateng pakahemek to fangcalay ngangan ni Yihofa.

 PAKAHEMEKEN CI YIHOFA

4. Pakahemek kita ci Yihofaan hano papalipahak Cingranan hani? Tano tinakoan mitadtad. (Nengnengen ko coka.)

⁴ Mipakahemek kita to fangcalay ngangan no kakarayan Wama wa palipahak Cingranan. (ˈOlic 119:108) Sakoniya sowal, o cifadangalay a Kawas malecaday to cowa ka lefot a tamdaw, samanen cangoˈotay ko rihaked, anca sapilifokaw to pihayda, mansa makalim pakahemeken no tamdaw Cingra hokira? Cowa. Nengnengen ko cecay sapatinako. O cecay kaemangay fafahiyan a wawa comikay tayra i kaˈayaw no wama, mitakec to wama a pasowal: “Wamaaw, o satadamaanay a wama kiso toniya hekal!” saan. Maˈaraw konini a wawa mikifalocoˈay patalahkal to olah no niyah, lipahakay ko wama, matemeray ko falocoˈ. Misamaanay hani? Cowa ko pakayniay i kacangoˈot no rihaked ningra, eca ka pilifok to pakahemek no fafahiyan wawa a masomaden, ao pakayniay i kaolah ningra to fafahiyan wawa, maˈaraw ko fafahiyan wawa mafanaˈ patalahkal to olah ato piakoˈid tada lipahakay ko falocoˈ nora wama. Mafanaˈ cingra ira ko mahaenay a capeling no fafahiyan wawa, noikor mamadolo malo lipahakay a tamdaw. Malecaday, o satadamaanay a Wama ita ci Yihofa Kawas matengil ko pipakahemek ita Cingranan i, papakayni toninian a lalangian a lipahaken.

5. Pakahemek kita to fangcalay ngangan no kakarayan Wama, wa ngaˈay pacaˈof to maanan a mangah hani?

⁵ Pakahemek kita to kakarayan Wama ci Yihofaan wa ngaˈay pacaˈof to cecay a mangah ni Satan, onini mangah milingatay kitanan o kahacecay tamdaw. Sowal ni Satan awaay ko tamdaw to mamadimadi paˈading to fangcalay ngangan ni Yihofa. Sanayho cingra pasowal, awaay ko tamdaw to papadotoc madimadi i sapalifet, ano ira ko sakangaˈay no niyah misawad midoko to Kawas i, mamihaen kita to demak sanay. (Yopu 1:​9-​11; 2:⁠4) Kawra o madimadiay a Yopu maharekayto misawacay o misamangahay ci Satan. Mihaenay, mamakahi kiso malecad ci Yopuan madimadi ci Yihofaan han? Kita maemin iraay ko toki talaˈayaw a paˈading to fangcalay ngangan ni Yihofa, padadotoc madimadi, pakahemek ci Yihofaan. (Taneng 27:11) Ngaˈay mihaen to demak, tada o kalikoan no mita.

6. Sasamaan kita mitodong to Hongti ci Tafitian ato Lifi a ngasaw? (Nihimiya 9:⁠5)

⁶ O madimadiay a tamdaw samanen tangongolay ko olah ci Yihofaan, mieminay to falocoˈ pakahemek to fangcalay ngangan Ningra. O sowal no Hongti ci Tafiti: ‘Pakahemeken ako ci Yihofa, eminen ako ko falocoˈ eminen ko harateng pakahemek to fangcalay ngangan Ningra.’ (ˈOlic 103:⁠1) Mafanaˈay ci Tafiti pakahemek to fangcalay ngangan ni Yihofa malecaday o pakahemekay ci Yihofaan, samanen o ngangan ni Yihofa papiharatengay ko tamdaw to masamaanay a Kawas Cingra, maharatengto ko kihcod makapahay capeling ato kasemeran a midemakan Ningra. O pinengneng ni Tafiti o ngangan no kakarayan  Wama o fangcalay, ciharatengayho ‘miemin to falocoˈ miemin to harateng’ pakahemek to fangcalay ngangan no kakarayan Wama. O Lifi a ngasaw mikeriday to tamdaw pakahemek ci Yihofaan, misapoeneray ko falocoˈ nangra a pasowal, ano tano maananto a sasowalen pakahemek to fangcalay ngangan ni Yihofa, caayho ka edeng paihkal to mamalifok ni Yihofa a sapakahemek. (ˈOsien ko Nihimiya 9:⁠5.) Misapoeneray ko waywayan nangra, mikifalocoˈay a pakahemek ci Yihofaan, maedeng o papalipahak Cingranan.

7. Itini mitosilay ato cerid no kaˈorip, sasamaan kita pakahemek ci Yihofaan?

⁷ Anini, sasamaan kita pakahemek ci Yihofaan, palipahak Cingranan hani? Ngangaˈay kita fanekfek malalengo to tao pakayni ci Yihofaan, hanaca itini sasowalen patalahkal to miakoˈiday ato maolahay kita to kakarayan Wama. Ano mitosil i, haharatengen ita sakakaay a patosokan o papadama to tamdaw miingid ci Yihofaan, padama cangranan mahecad kitanan maolah to kanonoˈan a kakarayan Wama. (Yakop 4:⁠8) Mihaenay, mamisaka dademak kita to Fangcalay Cudad padama to tao mafanaˈ ci Yihofaan ato makapahay capeling Ningra, tinakoen olah, masadafdafay, taneng, ˈicel. Roma i, wa ngaˈayho kita itini i nokaˈorip mitodong ci Yihofaan. (Ifiso 5:⁠1) Mihaen ko demak kita, mamahapinang no tao cowa ka lecad kita tonini a tatiihay a hekal, sakafanaˈaw to samanay hano cowa ka hecad kita to romaroma tamdaw. (Matay 5:​14-​16) Mihaen, ano ira ko matatodongay toki ita i, ngangaˈayto pasayra cangranan mitadtad to lalangian, o romaroma soˈliˈlinay ko harateng a tamdaw wa masolotto a miingid to Kawas. Tano mahaenay a pakayraan kita pakahemek ci Yihofaan, o papalipahak to kakarayan Wama.​​—⁠1 Timoti 2:​3, 4.

PAKAHEMEKEN CI YIS

8. Itini pipakahemek to fangcalay ngangan ni Yihofa, ci Yis o sangaˈayay a taˈarawan hano saan ko sowal hani?

⁸ Awaay ko cima tamdaw ato coyoh mikikakaay ci Yisan ko kacipinang to kakarayan Wama. (Matay 11:27) Tangongolay ko olah ni Yis to Wama ningra, talaˈayaway pakahemek to fangcalay ngangan ni Yihofa. (Yohani 14:31) ˈAyaw no mapatay ci Yis a dadaya pasayraay i kakarayan Wama mitolon, itini satolon, masowalay ningra malahciayto no niyah ko masakalimlaan a tayal sanay: ‘Maharekayto kako pakafanaˈ cangranan to ngangan Iso.’ (Yohani 17:26) O manan ko tatodong no sowal ningra hani?

9. Samaanay ci Yis tano sapatinako padama to tamdaw ihkal ko kafanaˈ ci Yihofaan hani?

⁹ Sakakaay pasifanaˈan ni Yis o Yutaya tamdaw, o Yutaya tamdaw mafanaˈayto to ngangan no Kawas o ci Yihofa, mihaenay cowa ko pipasowal aca ni Yis to manan ko ngangan no Kawas, ‘ihkalayho mitadtad’ o masamaanay a Kawas ci Yihofa. (Yohani 1:​17, 18) Tinakoen, o Hipray Maloloday Cudad sanay, o siniˈadaay to tamdaw ci Yihofa, o sidaˈitay to tamdaw a Kawas, tano malafelay a wawa minokayay a sapatinako ci Yis, padama to tamdaw ihkal ko pihapinang to mahaenay a Kawas ci Yihofa. (Kasadakan 34:​5-7) Itini tonini sapatinako, malafelay a wawa ‘mira:ayayho to lomaˈ,’ maˈaraw no wama cingra, tangsolay comikay tayra a mitakec cingranan, mikifalocoˈ a misodod cingra. Mikitini tonini kasemeran, ihkalay mahapinang a sapatinako, mahapinangay ita to tada siniˈadaay, sidaˈitay to tamdaw ci Yihofa. (Luka 15:​11-​32) Soˈlinay a mapadama ni Yis ko tamdaw mafanaˈ to kakarayan Wama.

10. (1) Hano mafanaˈ kita ci Yis cowa ko niyah aca misaka dademakay to ngangan no kakarayan Wama pangangan Cingranan, makalimayho to tao mihaen ko demak? (Marko 5:​19) (Nengnengen ko coka.) (2) Makalimay ci Yis kitanan sasamaan ko pidemak anini hani?

¹⁰ Cowa ko pisaka dademak aca ni Yis to ngangan no kakarayan Wama pangangan Cingranan, makalimayho mihaen ko demak no tao. Itiya o papina ˈaˈideman no pihakelongan miharateng, miˈosi ko tamdaw to fangcalay ngangan no Kawas o pakaditay to Kawas sanay. Kawra ci Yis cowa ka pakayni i mahaenay cowa pisalalangi to Fangcalay Cudad a pinangan, hawad sato milasil to fangcalay ngangan no Wama ningra. Nengnengen ko  cecay tinakoan. Na itiniay ci Yis i kilac no Kirasa tamdaw miadah to cecay maontingay no tatiihay coyoh a tamdaw, maˈaraw no itiraay a tamdaw konini a demak tada matalawan nanay, orato i, micangacangay ci Yisan papiliyas. (Marko 5:​16, 17) ˈAyaw no miliyas ci Yis palimoˈotay toya miadahan ningra a tamdaw pasowal to ˈalomanay mifekaday ko maanan a demak, kawra aka pilasil to midemakay ci Yis to maanan, ao mamilasil to midemakay ci Yihofa to maanan, samanen makalimay ci Yis mafanaˈ ko itiraay a tamdaw to fangcalay ngangan ni Yihofa. (ˈOsien ko Marko 5:​19.) a Anini, makalimay ci Yis kitaanan ngaˈay padama to paro no kakarayan a tamdaw mafanaˈ to ngangan no kakarayan Wama. (Matay 24:14; 28:​19, 20) Ano misaˈicel kita mihaen to demak, o papalipahak to Hongti ita ci Yisan.

11. Pasifanaˈay ci Yis to nisawawaan ningra pakayni i maanan a demakan mitolon? Hano tada kalimlaan konini hani? (Icikil 36:⁠23)

¹¹ Mafanaˈay ci Yis o araaw ni Yihofa o patalahkal to fangcalay ngangan no Niyah, palahdaw to kihcod pakangodoay tonini a ngangan. Mihaenay, palimoˈotay ci Yis to nisawawaan mihaen ko pitolon: ‘Itiniay kakarayan a Wama niyam, nanay mapatalahkal ko ngangan Iso malo fangcalay.’ (Matay 6:⁠9) Mafanaˈay ci Yis, pakaynien masangaˈay maemin, o sakalimlaan a demak konini. (ˈOsien ko Icikil 36:23.) Itini patalahkal to fangcalay ngangan no Kawas, awaay ko cima to mikikakaay ci Yisan ko ka adihay no midemakan. Nikawrira, tiya repeten no ˈada ci Yis i, pakokotay cingranan to maanan a raraw hani? O pakaditay a raraw! Miharateng ci Yis patelas misaka dademak ato pakadit to fangcalay ngangan no kakarayan Wama o satatiihay a raraw, ˈarawhan paketingan cingra to hatiniay a raraw, oninian ko lalangian to ‘kaadadaan no falocoˈ ’ ni Yis i ˈayaw no marepet.​​—⁠Luka 22:​41-​44.

12. Samaanay ci Yis tano awaay ko dangoc a pakayraan patalahkal to fangcalay ngangan no kakarayan Wama?

¹² To sapatalahkalaw to fangcalay ngangan no kakarayan Wama, hayi sanay ci Yis misemsem to masakenaay sapaoraf, pipakangodo ato pisamsam. Itini sapasangaray a tatokian, mafanaˈay cingra midofdofay ko niyah to kakarayan Wama, mansa awaay ko dangoc no falocoˈ ningra. (Hipray 12:⁠2) Mafanaˈay cingra malifaay no niyah a pasangaray, sahtoay mikitiniay ci Satanan. (Luka 22:​2-4; 23:​33, 34) Misahalakaay ci Satan pacieci ci Yisan misawad to madimadi, kawra masongilaˈay a mapadik ci Satan! Ihkalay ci Yis misawacay  to o misaˈfitay ci Satan, misawacayho wa ira ko tamdaw madimadi ci Yihofaan. Soˈlin tahasiˈayaw to masakatalawan a sapalifet, o madimadiay sikawdan ni Yihofa cowa ko mamisawad to madimadi!

13. Sasamaan ko pidemak iso ngaˈay palipahak to Hongti ci Yisan hani?

¹³ Makalimay kiso palipahak to Hongti ci Yisan han? Ano makalimay i, ka padadotoc pakahemek to fangcalay ngangan ni Yihofa, padama to tao mafanaˈ to masakenakenaay makapahay capeling ni Yihofa. Mihaen ko demak iso o mitodongayto ci Yisan. (1 Pitiro 2:​21) Malecad ci Yisan, wa ngaˈay kiso palipahak ci Yihofaan, hanaca misawacay to ˈada Ningra ci Satan o awaay ko ngodo a misaˈfitay!

MILIDONG TO ˈORIP NO TAO

14-15. Pasifanaˈ kita to tao mafanaˈ ci Yihofaan, wa ira ko maanan a ngaˈayay minaroˈan?

¹⁴ Pakahemek kita to fangcalay ngangan ni Yihofa wa ngaˈay milidong to ˈorip no tao. Hano saan ko sowal hani? Anini ˈalomanay a tamdaw no hekal cowa ka pakasoˈlin ci Yihofaan, ‘maapohay ni Satan ko harateng, malecaday o mapohaway’ cangra. (2 Korinto 4:⁠4) Telocto, pakasoˈlinay cangra to mangah ni Satan, tinakoen: Awaay ko Kawas, mira:ayay ko Kawas to tamdaw, cowa ka pikihar to tamdaw, mariˈangay ko Kawas, pasemsemay to mararaway ko demak a tamdaw tahadaˈoc. Milasilay ci Satan tonini a mangah a pakadit ci Yihofaan, caayto ka ciharateng ko tamdaw sapiingidaw Cingranan. Kawra o mitosilay a tayal ita ngaˈay mipadik to mihalakaan ni Satan. Pasifanaˈ kita to tao pakayni to soˈlinay kimad no kakarayan Wama, pakahemek to fangcalay ngangan Ningra. Samaanayto ko teloc aki?

¹⁵ O soˈlinay kimad no Fangcalay Cudad awaay ko tolas no ˈicel. Misaka dademak kita to Fangcalay Cudad pasifanaˈ to tamdaw mafanaˈ ci Yihofaan, ato masakenakenaay makapahay a capeling Ningra, wa irato ko ngaˈayay a minaroˈan. Na masaˈfitay no mangah ni Satan ko ˈalomanay tamdaw, kawra micada to soˈlinay kimad ikor palidlid sanay maˈaraw ko ˈodingar, matongalay ko kafanaˈ to masakenakenaay a makapahay capeling no kakarayan Wama. Maˈaraw nangra awaay ko tolas no ˈicel no kakarayan Wama, mikangodoayto Cingranan. (Isaya 40:26) Mafanaˈ cangra cowa pisakakinih ko kakarayan Wama, masadafdafay ikorto i, misatapangay mitadiˈec Cingranan. (Limoˈot 32:⁠4) Samanen minanam cangra to tangongolay a taneng no kakarayan Wama, cipinangayto to adihayay a demak. (Isaya 55:9; Loma 11:33)  Mananamay nangra o pinangan no Kawas o olah ikor, milifokay to taˈangayay a sahinom. (1 Yohani 4:⁠8) Matongal ko kapiingid nangra ci Yihofaan, matongalay ko pakasoˈlin o ngangaˈay tahadaˈoc maˈorip ko niyah, tahadaˈoc malo wawa no Kawas. Padama kita to tao miingid to kakarayan Wama, o ‘malacafayay matayal’ Cingranan saan ko pinengneng Ningra kitaanan, tada o kalikoan konini!​​—⁠1 Korinto 3:​5, 9.

16. Mafanaˈ to ngangan no Kawas pakayni roma tamdaw iraay ko maanan noka pifiyor? Tadtaden.

¹⁶ Satapang, alatek o ngangan aca no Kawas o ci Yihofa sanay kita pasowal to tamdaw, kawra onini maedengayto ira ko tangongolay a pifiyor to cecay matatodongay ko harateng a tamdaw. Tinakoen, kaemangay a Ayliya b mimingho iraayto ko pihakelongan, kawra onini pihakelongan awaay ko kalaliting to kaˈorip ningra sanay miharateng, o Kawas ningra miraayay cingranan. Kawra misatapang cingra malacafay to Misawacayay Tamdaw ni Yihofa minanam to Fangcalay Cudad ikor, mafalicayto ko waywayan, o widang no niyah ko Kawas sanay cingra minengneng. Mafanaˈ cingra adihayay mihongyakan a Fangcalay Cudad mifalicay to ngangan no Kawas malo Tapang hananay a ngangan, fahkaˈan nanay. Mafanaˈ to ngangan ni Yihofa mifalicay to kaˈorip ningra. Sanay cingra: “O Kawas o sangaˈayay a Widang ako, hanaca iraay ko ngangan Ningra!” Onini iraay ko maanan noka pifiyor cingranan hani? Sanay cingra: “Tada rihadayay ko falocoˈ ako, marenecay, tada malemeday ko niyah saan ko harateng ako.” Iraay ko cecay faˈinayan ci Setifen, o midatokay cingra, naitiniay i no Yutaya a paro no lomaˈ. Samanen maˈaraway ningra ko adihayay pihakelongan midemakay to makaniway a demak, caayto ka ciharateng milingat to kahacecay pihakelongan. Ikor, pakayni kapatay no salawina tada masomaday cingra. Itiya, o kafanaˈan ningra a cecay tamdaw malacafayay to Misawacayay Tamdaw ni Yihofa minanam to Fangcalay Cudad, kinacecayay mitengilay cingra i tatihi to kalalengo nangra. Mafanaˈ cingra to ngangan no Kawas ikor tada matemeray ko falocoˈ. Sanay cingra: “Na cowaho ka fanaˈ kako to iraay ko ngangan no Kawas!” Sanayho ko sowal ningra: “Mahapinangayto ako o soˈliˈlinay ko Kawas, wa ngaˈay kako mafanaˈ Cingranan, ngaˈayho mala widang Ningra.”

17. Hano misetek kiso to falocoˈ padotoc pakahemek to fangcalay ngangan ni Yihofa hani? (Nengnengen ko coka.)

¹⁷ Ano mitosil i, papasowalen iso ko tao to fangcalay ngangan no Kawas o ci Yihofa han? Papadamaen iso cangra mihapinang to masamaanay a Kawas ci Yihofa han? Mihaen ko demak iso o pakahemekay to fangcalay ngangan ni Yihofa. Ka padadotoc mihaen to demak! Pakahemek kiso ci Yihofaan, o ngangaˈay milidong to ˈorip no tao, ngaˈayho mikotod to Hongti ci Yis Kristoan. Sakakaay kalimlaan i, wa ngaˈay kiso palipahak to sidaˈitay a Wama ci Yihofaan. Nanay kita maemin padadotoc ‘pakahemek to fangcalay ngangan ni [Yihofa], tahira i daˈodaˈoc.​​—⁠ˈOlic 145:⁠2.