1, 2. Kuna kʼarinaktï jupat parlasiwayki ukajj Jehová Diosan chuymapwa ustʼayi, uk amuyañatakejj ¿kuna uñachtʼäwis yanaptʼistu?

 AKHAM amuytʼañäni: khitirutï munaskta ukaw jumat jan wal parli. Ukan kʼarïtap jumajj yattawa, ukampis yaqhepajj uka kʼari creyipjjewa, waljaniw ukat parlapjjaraki, taqe cheqanwa yatisjjaraki. ¿Kunjamakis jikjjatasisma? Jaqenakajj sutij qʼañuchapjjani sasaw wal llakisisma, wal chuym ustʼayasirakisma (Prov. 22:1).

² Uka uñachtʼäwejja, mä wawapajj jupat kʼarinak parlkäna, sutip qʼañuchkarakïna ukhajj kunjamsa Jehová Diosajj jikjjatasïna uk amuyañatakiw yanaptʼistaspa. Eva warmin uka kʼari creyitapatwa jupasa Adanas Jehová Dios contra saytʼasipjjäna. Ukatwa taqe jaqenakajj juchararätanjja, jiwaraktanjja (Gén. 3:1-6; Rom. 5:12). Cheqas kuna kʼarinaktï Supayajj Edén jardinan parlkäna ukajja, oraqpachanwa jan walinak utjayawayi, jiwañasa, guerranakasa, tʼaqesiñanakas ukatwa utji. Uka kʼarinakatsa kuna jan walinakatï uka kawsajj utjki ukanakats Jehová Diosajj wali llakitawa. Ukhamäkchisa jupajj janiw wali aynachtʼata jan ukajj chuyma ustʼatäkiti, jan ukasti kunjamtï Bibliajj siskejja, ‘kusisir Diosakïskiwa’ (1 Tim. 1:11).

3. ¿Kunsa jiwasajj lursna?

³ Supayajj Jehová Diosat kʼarinak parlki ukanakan kʼarïtap uñachtʼayañatakiw yanaptʼsna. ¿Kunjamsa uk lursna? “Jehová Diosan sutip jachʼañchapjjam” siski uka mandator istʼasaw uk lursna (Sal. 113:1). ¿Kunjamsa Jehová Diosan sutip jachʼañchsna? Santo sutipat sum parlasaw jachʼañchsna. ¿Diosan sutip jachʼañchañ muntati? Kuna kimsa razonanakas Diosan sutip taqe chuym jachʼañchañatakejj utji uk jichhajj uñjañäni.

 JEHOVÁ DIOSARUW KUSISIYTANJJA

4. Jupar jachʼañchtan ukhajj kunatsa Jehová Diosajj kusisi uk mä uñachtʼäwimp qhanañchtʼam (Foto uñjjattʼarakïta).

⁴ Jehová Diosajj alajjpachankir Awkisawa, sutip jachʼañchañaswa munaraki (Sal. 119:108). Ukampis taqe chʼamani Diosajj janiw pantjasir jaqenakjamäkiti, janiw jupajj sumaki jan ukajj seguro jikjjatasiñ laykukejj jachʼañchayasiñ thaqkiti. Sum amuytʼañatakejj mä jiskʼa imill wawat parltʼañäni, jupajj tatapar jakʼachasisajj qhomantiwa, akham sarakiwa: “¡Papitu, jumjamajj janiw yaqhajj utjkiti!” sasa. Tatapajj wal kusisi, wawapan taqe chuyma jupar munasitapajj chuymaparuw purtʼaraki. ¿Kunatsa ukham jikjjatasi? ¿Sumaki ukat seguro jikjjatasiñ laykukit jiskʼa imill wawapamp jachʼañchatäñ muni? Janiwa. Wawapajj qhawqsa jupar munasi yuspäraraki uk uñjañakwa jupajj muni. Ukhamarus ukham chuymanïñajj jukʼamp kusisitäñatakiw jilsjjani ukhajj wawapar yanaptʼani, uk tatapajj sum yati. Jehová Dios wali suma Awkisampejj ukhamarakiwa, jupar jachʼañchtan ukhajj wal kusisi.

5. ¿Kunsa Jehová Diosar jachʼañchasajj uñachtʼaytanjja?

⁵ Alajjpachankir Awkisar jachʼañchtan ukhajja, kuntï Supayajj sapa mayni jiwasanakat siski ukan kʼarïtap uñachtʼayañatakiw yanaptʼtanjja. Yantʼat uñjasisajj taqeniw Diosat jitheqtapjjani, janiw khitis Diosan sutip arjjatkaniti sasaw Supayajj parli. ‘Diosar jan sirvjjañajj jupanakatak jukʼamp walïchi ukhajja, jupar serviñ jaytjjapjjakispawa’ sasaw Supayajj amuyaraki (Job 1:9-11; 2:4). Ukampis Diosat jan jitheqtir Job chachajj Supayan kʼarïtapwa uñachtʼayäna. ¿Jiwasat kamsasirakispasa? Jehová Diosar jachʼañchtan ukhajja, Supayan jan razonanïtapwa uñachtʼaytanjja. Jiwasatakejj Jehová Diosan sutip arjjatañasa, jupat jan jitheqtasin jupar kusisiyañas mä jachʼa privilegiowa (Prov. 27:11).

6. ¿Kunsa David reyitsa levitanakats yateqsna? (Nehemías 9:5).

⁶ Diosar munasirinakajj taqe chuymaw Diosan sutip jachʼañchañ munapjje. David reyejj akham sänwa: “Nayajj Jehová Diosaruw jachʼañchäjja, taqe chuymajampiw santo sutip jachʼañchäjja” sasa (Sal. 103:1). Davidatakejj Diosan sutip jachʼañchañajj Jehová Dios pachpar jachʼañchañamp sasïnwa. Jehová Diosan sutip istʼtan ukhajja, jupajj kunja suma Diosasa, kunja suma chuymanisa ukwa pienstanjja, musparkañ luratanakapatsa piensaraktanwa. Davidatakejj Awkipan sutipajj santönwa, jachʼañcharakïnwa. Jupajj ‘taqe chuymapampiwa’, mä arunjja taqe jakañ vidapampiw  Diosar jachʼañchañ munäna. Levitanakajj ukhamarakiw Jehová Diosar jachʼañchañ amtapjjäna. Diosan santo sutip kunjamtï wakiski ukham jachʼañchañatakejj janiw arunakajj utjkiti sasaw humilde chuymamp sapjjäna (Nehemías 9:5 liytʼäta). Chuymatpach arstʼat uka jachʼañchäwinak istʼasajj Jehová Diosajj ¡walpun kusispachäna!

7. ¿Kunjamsa predicacionansa sapür luräwinakasans Jehová Diosar jachʼañchsna?

⁷ Jehová Diosat munasiñampiw parlañasa, yuspärañasarakiwa, ukhamatwa jupar jachʼañchsna. Prediktan ukhajja, jaqenakajj Jehová Diosar jakʼachasiñ munapjjaspa, jiwasjam jupar munasipjjaspa ukwa muntanjja (Sant. 4:8). Jehová Diosajj kunja munasirisa, cheqapar uñjirisa, yatiñanisa, chʼamanisa uk Bibliampi jaqenakar parlañajj wal gustistu. Maysa toqetjja, Jehová Diosar jachʼañchañatakisa, kusisiyañatakis jupat yateqasiñatakiw chʼamachasiñasaraki (Efes. 5:1). Ukham lurtan ukhajja, jaqenakajj inas mayninakat sipan mayjätas amuyapjjchini, kunatsa ukhamätan ukats jisktʼasipjjarakchini (Mat. 5:14-16). Sapüru luräwinakasamp phoqkasajj inas kunatsa ukhamätan uka toqet jaqenakar parlsna. Ukatjja suma chuyman jaqenakajj Diosar jakʼachasiñwa munapjjani. Ukhamanak lurasin Jehová Diosar jachʼañchtan ukhajja, jupan chuymap wal kusisiytanjja (1 Tim. 2:3, 4).

JESUSARUW KUSISIYTANJJA

8. Kunjamanakats Jehová Diosan sutip jachʼañchsna uk ¿kunjamsa Jesusajj uñachtʼayawayistu?

⁸ Alajjpachansa aka oraqensa, janiw khitis Jehová Diosarojj Yoqapjamajj uñtʼkiti (Mat. 11:27). Jesusajj Awkipar wal munasi, jupa pachpaw kunjamanakats Jehová Diosan sutip jachʼañchsna uk uñachtʼayawayistu (Juan 14:31). Janïr jiwayapkäna uka arumajja, kunanaktï aka oraqen lurawaykäna ukwa mä qhawqha arunakamp säna, jupajj akham sänwa: “Nayaw sutim jupanakar uñtʼayta” sasa (Juan 17:26). ¿Kunjamsa uk luräna?

9. Jehová Diosajj kunjam chuymanis uk sum uñachtʼayañatakejj ¿kuna uñachtʼäwitsa Jesusajj parläna?

⁹ Jesusajj janiw jaqenakarojj Diosan sutipajj Jehová satawa sasakejj siskänti. Judionakajj uk yatjjapjjänwa. Antisas jupajj kunjam Diosas ukwa jupanakar qhanañchäna (Juan 1:17, 18). Hebreo Arut Qellqatanakanjja, Jehová Diosajj khuyapayasiri, sinttʼasiri ukhamätapwa qhanañchäna (Éx. 34:5-7). Ukampis Jesusajj uka arunakan cheqätapjja, herenciap tukuntir waynat parlasaw uñachtʼayäna. Kunjamsa uka waynan tatapajj ‘jayankkipan’ jupar uñjasajj tʼijüna, qhomantäna, perdonarakïna uk liytʼasajja, Jehová Diosajj kunja khuyapayasirisa sinttʼasirisa ukwa qhan amuytanjja (Luc. 15:11-32). Jehová Diosajj kunjam chuymanisa uk amuyapjjañapatakiw Jesusajj jaqenakar yanaptʼäna.

10. 1) Jesusajj Awkipan sutip aytapunïnwa, ¿kunjamatsa uk yattanjja, ukat mayninakan kun lurapjjañapsa munäna? (Marcos 5:19; dibujo uñjjattʼarakïta). 2) ¿Jesusajj kun lurañassa muni?

¹⁰ Jesusajj yaqha jaqenakajj Awkipan sutip aytapjjaspa ukwa munäna. Amuyatajj Jesusan tiempopanjja, religión pʼeqtʼir yaqhep jaqenakajj Diosan sutip wali sagradot uñjapjjäna, janis aytasiñapäkaspa ukham amuyapjjarakïna. Ukampis Jesusajj janiw uka costumbremp apayaskänti, jupajj Awkipan sutip jachʼañchaskakïnwa, kuna laykutejj janiw uka costumbrejj Qellqatanakankkänti. Mä kutejja, gerasenonakan lugarapanwa Jesusajj demonion mantat mä chachar qolläna. Uk uñjasajj jaqenakajj wal ajjsarayasipjjäna, uka cheqat sarjjañapatakiw Jesusar wal ruwtʼapjjarakïna (Mar. 5:16, 17). Ukampis Jesusajj  Jehová Diosan sutip taqenin yatipjjañapwa munäna. Ukatwa janïr sarjjasajj kuntï Jehová Diosajj jupa layku lurkäna uk jaqenakar yatiyañapatak mayïna, janiw kuntï jupajj lurkäna uk yatiyañap maykänti (Marcos 5:19 liytʼäta). a Jesús Reyisajj ukhamarakiw taqe jaqenakar Jehová Diosan sutip yatiyañas muni (Mat. 24:14; 28:19, 20). Ukham lurasajj juparuw kusisiytanjja.

11. ¿Oracionan kunamp mayipjjañapsa Jesusajj discipulonakapar yatichäna? Ezequiel 36:23 textorjamajj ¿kunatsa ukajj wali importantejja?

¹¹ Jehová Diosan amtapajj akawa: sutip qʼomachaña, mä arunjja sutip qʼañuchki taqe uka kʼarinakat qʼomachaña, Jesusajj uk yatïnwa. Ukatwa discipulonakapar akham orasiñ yatichäna: “Alajjpachankir nanakan Awkija, sutimajj santot uñjatäpan” sasa (Mat. 6:9, nota). Ukat sipans yaqha jukʼamp wakiskirejj janiw utjkaspati, uk Jesusajj sum amuyäna (Ezequiel 36:23 liytʼäta). Aka oraqenjja, janiw khitis Jesusjamajj Jehová Diosan sutip qʼomachawaykiti. Ukampis Jesusar katuntapjjäna ukhajja, enemigonakapajj Dios contras jan wal parlkaspa, mä arunjja Jehová Diosan sutipsa jiskʼachkaspa ukham kʼarintapjjäna. Ukampis Jesusatakejj janiw yaqha ukham jachʼa juchajj utjkaspänti. Janïr katuntapkäna ukhajja, walpun llakisïna, kuna laykutejj Diosan sutip jiskʼachatapatwa juchañchapjjañapäna. Inas ukat janïr katuntapkäna ukhajj “sinti llakit” uñjaschïna (Luc. 22:41-44).

12. Awkipan sutip qʼomachañatakejj ¿kun lurañatakis Jesusajj dispuestokïna?

¹² Awkipan sutip qʼomachañatakejja, Jesusajj jawqʼjata, nuwjata, jiskʼachata, kʼarintat uñjasiñatakis dispuestokïnwa. Jupajj taqe kunanwa Awkipar istʼäna, janirakiw kunat phenqʼasiñapas utjkänti (Heb. 12:2). Ukham sinti jan walin uñjaskäna ukhajj Supayaw jupar jan waltʼayañ munaskäna, Jesusajj uk sum yatirakïna (Luc. 22:2-4; 23:33, 34). Jesusarojj Jehová Diosat jitheqtayañwa Diablojj munäna, ukampis janiw Diosat jitheqtaykänti. ¡Supayan amtapajj qʼalpun aynachtʼäna! Supayan kʼarïtapsa Jehová Diosajj jupat jan jitheqtir servirinakanïtaps Jesusajj qhan uñachtʼayäna, jupanakajj sinti jan walinakan uñjaskasas janiw Diosat jitheqtapkiti.

13. ¿Kunsa Jesucristo Reyisar kusisiyañatakejj lurañasa?

 ¹³ ¿Jesucristo Reyimar kusisiyañ jumajj muntati? Ukhamächi ukhajj Jehová Diosan sutip jachʼañchaskakim, jupajj kunja suma chuymanisa uks yaqhanakar yatichaskakim. Ukhamatwa Jesusan kayup arkatam uñachtʼayäta (1 Ped. 2:21). Jesusjamarakiw Jehová Diosar kusisiyäta, enemigopäki uka Supayan kʼarïtaps uñachtʼayarakïta.

SALVASIPJJAÑAPATAK YANAPTʼAÑÄNI

14, 15. Kunatï Jehová Diosat cheqäki uk jaqenakar yatichtan ukhajj ¿kuna musparkañanakas uñjasi?

¹⁴ Jehová Diosan sutip jachʼañchasajj jaqenakan salvasipjjañapatakiw yanaptʼtanjja sasajj ¿kunatsa sistanjja? Supayajj “jan creyentëpki ukanakan amuyunakap chʼamaktʼayi” (2 Cor. 4:4). Ukatwa walja jaqenakajj Supayan kʼarinakap creyipjje, janis Diosajj utjkaspa, jupajj jiwasanakat wali jayankkaspasa, janis jupar importksna, jan ukajj jan wali jaqenakarojj wiñayatakis tʼaqesiykaspa ukhamwa amuyapjje. Uka kʼarinakajj Jehová Diosan sutipwa qʼañuchi, jan wali Diosäkaspas ukham uñjayaraki, ukhamätapat janirakiw khitis jupar jakʼachasiñ munjjeti. Ukampis prediktan ukhajja, janiw Supayan munañap phoqasiyktanti, kunatï cheqäki ukwa Awkisat yatichtanjja, santo sutipwa jachʼañcharaktanjja. Ukham lurasitapat ¿kunas uñjasiwayi?

¹⁵ Biblian cheqa yatichäwinakapajj wali chʼamaniwa. Jehová Diosajj khitisa, kunjam Diosasa uk jaqenakar yatichtan ukhajja, wali musparkañanakaw uñjasi. Niyakejjay jupanakan amuyunakapajj Supayan kʼari yatichäwinakapamp chʼamaktʼayatächïnjja, jukʼat jukʼatwa amuytatasipjje, kunjamtï jiwasajj uñjktan ukhamwa Jehová Diosar uñj-jjapjjaraki (Is. 40:26). Cheqapar uñjir Diosätap yatisajj segurow jikjjatasipjje (Deut. 32:4). Qhawqha yatiñanisa uk yatisajj wal musparapjje (Is. 55:9; Rom. 11:33). Diosan wali munasirïtap yatiñas jupanakar wal chuymachtʼi (1 Juan 4:8). Jehová Diosar jakʼachasisajj wiñayatakiw jakassna, wawaparakïsnawa sasaw confiyjjapjje. Alajjpachankir Awkipar jakʼachasipjjañapatak jaqenakar yanaptʼañajj ¿wali jachʼa privilegiojjaya? Ukham luratasat Jehová Diosajj jupamp ‘chik trabajiritwa’ uñjistu (1 Cor. 3:5, 9).

16. ¿Diosan sutip yatiñajj kunjamsa maynir yanaptʼaspa? Mä experienciamp uk qhanañchtʼam.

 ¹⁶ Maynimp Diosat parlktan ukhajj inas qalltan Diosan Jehová sutipak yatichstan. Jupatï suma chuymanïchi ukhajja, Diosan sutip yatiñakiw jupan jakäwip cambiaspa. Alía b sat mä tawaqot parltʼañäni, jupajj janis Bibliarjam yatichir mä religionan jilsuwaykchejja, janiw religionapan yatichäwinakapamp conformëkänti, janis Diosajj jupa jakʼankkaspa ukhamwa amuyasirakïna. Ukampis Testigonakamp Bibliat yateqañ qalltäna ukhajj janiw ukham amuyjjänti. Walja Biblianakan Diosan sutip lantejj Tatitu sasak uchasitap yatïna ukhajja, janipuniw creyirjamäkänti. Diosajj Jehová sutinïtap yatisajja, jakäwip qʼal cambiäna, Diosarojj amigoparjamaw uñj-jjarakïna. Wali musparataw jupajj akham säna: “¡Wali suma amigojajj sutinïtaynawa!” sasa. Kullakajj akham sarakiwa: “Jichhajj chuymajan sumakiw jikjjatasta. Diosan sutip yatiñajj mä jachʼa privilegiowa” sasa. Steve sat mä músico chachajj judionakan costumbrenakaparjam sarnaqer mä familianwa jilsüna. Niyakejjay jupajj kʼari chuyman jaqenak taypinkchïnjja, janiw religionat kun yatiñs munkänti. Ukampis mamapajj jiwjjäna uka qhepatjja, mä Testigojj Bibliat maynir yatichkäna ukar sarañapatakiw invitapjjäna, jupajj iyaw sasaw saräna. Diosan sutip yateqañajj chuymaparupuniw purtʼäna. Jupajj akham siwa: “Janiw Diosan sutip yatkayätti” sasa. Ukatsti akham sarakiwa: “Diosan cheqpachapun utjatap ukhapuniw amuyayäta. Diosarojj mä suma amigorjamaw uñj-jjayäta” sasa.

17. ¿Kunatsa jumajj Jehová Diosan sutip jachʼañchaskakiñ munta? (Foto uñjjattʼarakïta).

¹⁷ Predicasktan jan ukajj yatichasktan ukhajj ¿Diosan sutipsa, kunjam Diosasa ukanak jaqenakar yatiytanti? Ukham lurasajj Diosan sutipwa jachʼañchasktanjja. Ukhamajj Jehová Diosajj kunjam chuymanisa uk jaqenakar yatichaskakim, ukhamatwa Diosan santo sutip jachʼañchäta. Ukham lurasajj jaqenakaruw salvasipjjañapatak yanaptʼäta, Jesucristo Reyisat yateqasitamwa uñachtʼayäta, jukʼampis wali munasir Jehová Dios Awkisaruw wal kusisiyäta. Taqeniw salmo qellqerjamajj akham sarakiñäni: “Wiñayans wiñayapatakiw sutim jachʼañchäjja” sasa (Sal. 145:2).