1-2. Songon dia perasaan ni Jahowa tikki didok na so denggan taringot Ibana? Bahen ma contohna.

 TABAYAKKON ma molo adong donganta na paroa-roahon hita. Taboto do dang toho hatana i. Alai adong do halak na porsea tu hatana i. Jala na umparah, dipaboa-boa nasida do gabus i tu halak na asing. Gabe godang ma halak na porsea tu gabus i. Songon dia do perasaanta mamboto on? Pasti lungun do rohatta alana gabe roa ma pandangan ni halak taringot hita.—Poda 22:1.

² Contoh on mangurupi hita mangattusi songon dia perasaan ni Jahowa tikki didok na so denggan taringot Ibana. Adong do sada suru-suruan na paroa-roahon Ibana tu si Hawa. Sibolis do suru-suruan i. Porsea do si Hawa tu gabus i. Akibatna gabe dialo si Adam dohot si Hawa ma Jahowa. Jala ujungna gabe mardosa jala mate ma sude jolma. (1 Mus. 3:​1-6; Rom 5:12) Asing ni i, gabe godang ma masalah di portibi on songon hamatean, porang, dohot sitaonon. Tottu gabe lungun do roha ni Jahowa alani i. Alai dang gabe mandele Jahowa. Gariada toktong do Ibana “marlas ni roha”.—1 Tim. 1:11.

3. Boha do caratta mambuktihon dang toho gabus ni Sibolis taringot Jahowa?

³ Boi do hita mambuktihon dang toho hata ni Sibolis taringot Jahowa. Boha do carana? Bibel mandok, “Puji ma goar ni Jahowa.” (Ps. 113:1) Boi do tapuji goar ni Jahowa tikki tapaboa tu halak na asing akka na denggan na diulahon Ibana.  Olo do hamu mamuji goar ni Jahowa? Di artikel on, tabahas ma tolu na boi mangonjar rohatta lao mamuji goar ni Jahowa sian nasa roha.

LAS DO ROHA NI JAHOWA MOLO TAPUJI GOARNA

4. Boasa las roha ni Jahowa molo tapuji Ibana? Bahen ma contohna. (Ida gambar.)

⁴ Boi do tabahen las roha ni Debata molo tapuji goarna. (Ps. 69:​30, 31) Alai, na songon jolma do Debata na ikkon dipuji asa las rohana? Tottu daong. Boasa boi tadok songon i? Tabayakkon ma contoh on. Adong ma sahalak dakdanak makkaol bapakna jala didok ibana, “Holan bapak do bapak na terbaik di au.” Las do roha ni bapakna ala songon i didok boruna. Boasa? Na ikkon dipuji boruna do ibana asa las rohana? Daong. Alai ala holong do rohana tu boruna i jala las rohana ala dipaboa boruna songon i. Asing ni i, diboto bapakna i do molo dung balga boruna i gabe halak na marlas ni roha ma boruna i, ala parholong boruna i jala diboto mandok mauliate. Suang songon i ma Jahowa. Bapak na terbaik do Ibana. Las do rohana molo tapuji Ibana.

5. Molo tapuji Jahowa, gabus ni Sibolis na dia do na terbukti dang toho?

⁵ Molo tapuji Bapakta Jahowa, boi ma tabuktihon dang toho gabus ni Sibolis taringot hita. Didok Sibolis dang adong jolma na toktong setia mambela goar ni Jahowa, tarlumobi tikki marsitaonon. Didok Sibolis, pasti ditinggalhon jolma do Jahowa, molo didok roha ni nasida dang adong uttungna manomba Jahowa. (Job 1:​9-11; 2:4) Alai toktong do si Job setia tu Debata. Jala dibuktihon ibana do na pargabus Sibolis. Boha molo hamu? Olo do hamu toktong setia tu Debata? Sude do hita boi mamillit naeng mambela Jahowa manang na dang. Molo lomo rohatta mambahen las roha ni Jahowa, toktong ma hita setia tu Ibana. (Poda 27:11) Sada hasangapon do di hita boi mangulahon i.

6. Songon dia do hita maniru Raja Daud dohot halak Lepi? (Nehemia 9:5)

⁶ Holong tu Jahowa do na mangonjar roha ni akka halak lao mamuji goar ni Jahowa sian nasa roha ni nasida. Songon na didok Raja Daud, “Sai toktong ma hupuji Jahowa, sai toktong ma hupuji goarna na badia i sian nasa rohakku.” (Ps. 103:1) Diboto si Daud do molo tapuji goar ni Jahowa, sarupa songon na mamuji Jahowa do hita disi. Molo tabege goar ni Jahowa, gabe boi ma tabayakkon Debata na songon dia do Ibana. Gabe boi ma tapikkirhon akka sifatna, dohot akka naung diulahon Ibana. Lomo do roha ni si Daud pabadiahon jala mamuji goar ni Debata sian nasa rohana.  Gabe sitiruon do tong halak Lepi tikki mamuji Jahowa di jolo ni halak Israel. Diakkui nasida do massai tama do goar ni Jahowa dipuji, jala dang adong hata na pas na didok nasida na boi manggombarhon i. (Jaha Nehemia 9:5.) Takkas ma las do roha ni Jahowa ala serep do roha ni naposona mamuji goarna.

7. Songon dia do hita mamuji Jahowa tikki marbarita dohot di ulaonta siganup ari?

⁷ Boi do tabahen las roha ni Jahowa. Tapaboa ma tu halak na asing taringot Ibana. Sian caratta paboahon i, boi do tarida na massai holong do rohatta tu Jahowa jala taargai Ibana. Tikki marbarita hita, taingot ma tujuanta. Lomo do rohatta mangurupi halak na asing asa jonok tu Jahowa. Jala asa holong roha ni nasida tu Debata dos songon hita. (Jak. 4:8) Las do rohatta patuduhon sian Bibel, Debata na songon dia do Jahowa i. Tapaboa ma akka sifatna, songon holong, adil, bisuk, huaso, dohot na asing. Boi do muse tapuji Jahowa jala tabahen las rohana molo marsitutu hita maniru Ibana di akka ulaonta siganup ari. (Eps. 5:1) Gabe boi ma diparrohahon halak na asing na marimbar do hita sian akka halak di portibi on. Olo do ra sukkun-sukkun roha ni nasida, boasa songon i hita. (Mat. 5:​14-16) Tikki berurusan hita dohot nasida, boi do tapaboa alasanna. Hasilna, gabe lomo ma roha ni halak na serep rohana jonok tu Jahowa. Molo tapuji Jahowa marhite akka cara on, pasti las do rohana.—1 Tim. 2:​3, 4.

LAS DO ROHA NI JESUS MOLO TAPUJI GOAR NI JAHOWA

8. Ise do na gabe sitiruon di hita lao mamuji goar ni Jahowa, jala boasa?

⁸ Sian sude toppaan ni Jahowa na adong di surgo dohot na di tano on, holan Jesus do na takkas mananda Bapakna. (Mat. 11:27) Holong do rohana tu Bapakna, jala ibana ma na gabe sitiruon di hita lao mamuji goar ni Jahowa. (Joh. 14:31) Sian tangiang ni Jesus andorang so mate ibana, tarida do na massai rikkot di ibana ulaon marbarita na uli. Didok ibana do, “Nungnga hupaboa goarmu tu nasida.” (Joh. 17:26) Songon dia do cara ni Jesus paboahon goar ni Bapakna?

9. Tudosan na dia do na dipakke Jesus lao patorakkon taringot Bapakna?

⁹ Jesus dang holan paboahon tu akka halak taringot goar ni Debata. Alana, halak Jahudi na diajari Jesus di tikki i sasittongna nungnga mamboto goar ni Debata. Alai lobi sian i do na diulahon Jesus. Dipatorang ibana do taringot tu Debata. (Joh. 1:​17, 18) Contohna di Akka Bukku Heber dipaboa do, Debata na marasi ni roha do Jahowa i. (2 Mus. 34:​5-7) Alai asa takkas diattusi halak aha lapatanna, dibahen Jesus ma tudosan taringot anak na mago na diampuni bapakna. Di ujung ni tudosan i, dipaboa do na bertobat anak na mago i jala mulak tu bapakna. Disi diida bapakna anakna i sian na dao dope, gabe asi ma roha ni bapakna i. “Marlojong ma ibana, dihaol, jala diumma ma anakna i”. Songon bapak na di tudosan ni Jesus i do Jahowa. Gabe boi ma tabayakkon Debata parasi roha do Ibana. (Luk. 15:​11-32) Takkas ma, diurupi Jesus do akka halak asa boi mamboto Debata na songon dia Jahowa i.

10. (a) Sian dia do taboto na dijou Jesus goar ni Debata jala lomo rohana asa ditiru halak ibana? (Markus 5:19) (Ida gambar.) (b) Aha do na dipangido Jesus sian hita saonari?

¹⁰ Lomo do tong roha ni Jesus asa dijou akka halak goar ni Debata. Alai didok akka pamimpin agama di tikki i, na mangaleai Debata do molo tajou goar ni Debata. Nang pe songon i, dang diihutton Jesus na didok nasida i. Toktong do dipasangap ibana goar ni Bapakna. Contohna, hea do dipamalum ibana  sahalak bawa na disonggopi suru-suruan na jahat na di Gerasa. Mabiar do akka halak di tikki i jala disuru ma Jesus maninggalhon inganan i. Jadi lao ma Jesus sian i. (Mrk. 5:​16, 17) Nang pe songon i, toktong do lomo roha ni Jesus asa diboto akka halak na disi goar ni Jahowa. Jadi disuru ibana do bawa na dipamalum ibana i asa paboahon tu akka halak na disi sude na binahen ni Jahowa. (Jaha Markus 5:19.) Saonari pe lomo do tong roha ni Jesus asa tapaboa goar ni Bapakna tu sude halak di liat portibi on. (Mat. 24:14; 28:​19, 20) Jadi molo taulahon songon i, tabahen do las roha ni Jesus.

11. Aha do na didok Jesus asa ditangiakkon akka siseanna? Jala songon na disurat di Hesekiel 36:​23, boasa on penting?

¹¹ Diboto Jesus do lomo roha ni Jahowa pabadiahon goarna jala mambuktihon dang toho gabus na dipaboa Sibolis taringot Ibana. On ma alasanna boasa disuru Jesus akka siseanna asa martangiang songon on, “Ale Amanami na di banua ginjang, sai dipabadia ma goarmu.” (Mat. 6:9) Diboto Jesus do pabadiahon goar ni Jahowa on do na paling penting. (Jaha Hesekiel 36:23.) Sasittongna dibandingkon toppaan ni Jahowa na asing, Jesus ma na paling jotjot pabadiahon goar ni Jahowa. Alai tikki ditakkup Jesus, ditudu akka musuna do ibana mangaleai goar ni Debata. Tottu lungun hian do roha ni Jesus ala ditudu songon i. I do alana “marsak situtu” do Jesus andorang so ditakkup ibana.—Luk. 22:​41-44.

12. Sitaonon aha do na diadopi Jesus lao pabadiahon goar ni Bapakna?

¹² Lao pabadiahon goar ni Bapakna, rela do Jesus disiksa, dileai, jala didok na so toho taringot ibana. Dang maila ibana nang pe dibahen songon i. Alana diboto ibana do nungnga dioloi ibana sude paretta ni Bapakna. (Heb. 12:2) Asing ni i, diboto ibana do na diuji Sibolis ibana di tikki i. (Luk. 22:​2-4; 23:​33, 34) Harap do roha ni Sibolis dang setia Jesus. Alai dang marhasil Sibolis. Dibuktihon Jesus do na pargabus Sibolis jala na boi do toktong setia naposo ni Debata nang pe marsitaonon.

13. Boha do carana mambahen las roha ni Jesus?

¹³ Lomo do rohamuna mambahen las roha ni Jesus? Molo i do, toktong ma puji goar ni Jahowa jala urupi ma halak na asing marsiajar taringot akka sifatna. Molo diulahon  hamu songon i, na maniru Jesus do hamu disi. (1 Ptr. 2:21) Gabe las ma roha ni Jahowa dibahen hamu. Jala songon Jesus boi ma dibuktihon hamu, pargabus na so ubboto ila do Sibolis i.

PALUAHON NGOLU NI AKKA HALAK DO MOLO TAPUJI GOAR NI JAHOWA

14-15. Aha do hasilna molo tapaboa tu akka halak taringot Jahowa?

¹⁴ Molo tapuji goar ni Jahowa, boi do i paluahon ngolu ni halak. Boasa? Alana nungnga “dipapitung debata ni portibi on” pikkiran ni nasida. (2 Kor. 4:4) Gabe porsea ma akka halak tu gabus ni Sibolis na mandok dang adong Debata, dang boi hita jonok tu Debata, na so parduli do Debata tu akka jolma, kejam do Debata jala disiksa Ibana do salelengna akka na mangulahon na jahat. Tujuan ni Sibolis paboahon gabusna i, asa sega do goar ni Jahowa jala asa dang olo akka halak jonok tu Jahowa. Alai molo marbarita hita, gabe tagagalhon do tujuan ni Sibolis. Alana molo tapaboa tu akka halak hasittongan taringot Debata, na mamuji goar ni Debata do hita disi. Aha ma hasilna?

¹⁵ Balga do pengaruh ni hasittongan na adong di Bibel tu akka halak. Tikki taajari nasida taringot Jahowa jala Debata na songon dia Ibana sasittongna, boi ma taida hasil na luar biasa. Gabe dang boi be dioto-otoi Sibolis nasida jala boi ma diida nasida akka sifat ni Jahowa na denggan. Misalna, gabe diboto nasida ma na massai balga do huaso ni Jahowa. (Jes. 40:26) Gabe pos ma roha ni nasida tu Jahowa, ala Debata na adil do Ibana. (5 Mus. 32:4) Boi do muse nasida marsiajar taringot bisuk ni Jahowa. (Jes. 55:9; Rom 11:33) Jala gabe tarapul ma roha ni nasida dung mamboto, Debata parholong do Jahowa i. (1 Joh. 4:8) Dung jonok nasida tu Jahowa, gabe lam pos ma roha ni nasida tu janji ni Debata taringot hangoluan salelengna. Sada hasangapon do di hita boi mangurupi akka halak asa jonok tu Jahowa. Molo taulahon i, gabe ‘dongan sakarejo ni Jahowa’ do hita.—1 Kor. 3:​5, 9.

16. Boha do pengaruhna tu sasahalak dung mamboto goar ni Debata? Paboa ma contohna.

¹⁶ Olo do di mulana holan goar ni Debata na tapaboa tu akka halak. Alai sasittongna balga do pengaruh ni i tu akka halak na serep  rohana. Contohna adong pengalaman sahalak anak boru na margoar si Aliyah. a Sian mulai dakdanak, dang maragama Kristen ibana. Alai dang pos rohana tu na diajarhon agamana. Jala dihilala ibana dang jonok ibana tu Debata. Alai muba do ngoluna dung marsiajar Bibel ibana dohot Saksi Jahowa. Gabe boi ma dihilala ibana Debata i songon ale-alena. Longang do rohana dung mamboto na dihapus do goar ni Debata di godangan Bibel, jala digatti gabe gelar songon Tuhan. Dung mamboto goar ni Jahowa, gabe muba do ngoluna. Didok ibana, “Adong do hape goar ni Debata jala boi do au gabe ale-alena. Saonari gabe dame ma huhilala. Sada hasangapon do di au ala mamboto goar ni Debata.” Pengalaman na asing, i ma sahalak bawa na margoar si Steve. Sahalak parmusik do ibana, jala halak Jahudi na fanatik. Di pudian ni ari dang olo ibana bergabung tu agama na dia pe. Alana didok rohana, munafik do sudena i. Alai dung mate omakna, olo do ibana manangihon tikki marsiajar Bibel donganna dohot Saksi Jahowa. Hona do tu rohana dung mamboto goar ni Debata. Didok ibana, “Sebelumna dang hea huboto ise goar ni Debata. On pe huboto memang na adong do Debata. Jala boi do au marale-ale dohot Ibana.”

17. Boasa bertekad hamu asa toktong mamuji goar ni Jahowa? (Ida gambar.)

¹⁷ Tikki dohot hamu tu ulaon marbarita dohot mangajari, dipaboa hamu do goar ni Debata tu akka halak? Diurupi hamu do nasida mamboto Debata na songon dia do Jahowa sasittongna? Molo diulahon hamu i, na mamuji goar ni Debata do hamu disi. Sai anggiat ma hamu toktong mamuji goar ni Jahowa na badia. Urupi ma akka halak asa mamboto Debata na songon dia Ibana sasittongna. Molo toktong dipuji hamu goar ni Jahowa, boi ma hamu paluahon ngolu ni halak. Boi ma ditiru hamu Jesus Kristus Rajamuna. Jala na uppetting boi ma dibahen hamu las roha ni Jahowa Bapakmuna. Torus ma ‘puji goar ni Jahowa saleleng ni lelengna’!—Ps. 145:2.