1-2. ?Wanem i save givhan long yumi blong kasemsave filing blong Jehova taem oli spolem nem blong hem?

 TRAEM pijarem samting ya: Wan man we yu kea long hem i talem wan giaman tok long saed blong yu. Yu save se hemia i no tru, be samfala oli bilivim tok ya. Mo samting we i mowas se oli stat blong ripitim giaman tok ya, mo plante man oli bilivim tu. ?Nao bambae yu harem olsem wanem? Sipos yu tingbaot ol man mo gudnem blong yu, i sua se bambae yu harem nogud from giaman tok ya—Prov. 22:1.

² Eksampol ya i save givhan long yumi blong kasemsave filing blong Jehova taem oli spolem nem blong hem. Taem wan long ol spirit pikinini blong hem i toktok long faswan woman ya Iv, hem i talem giaman tok long saed blong Jehova. Mo Iv i bilivim tok ya. Mo hemia i pulum faswan perens blong yumi blong tufala i rebel agensem Jehova. Nao sin mo ded i kasem olgeta famle long wol. (Jen. 3:​1-6; Rom 5:12) Olgeta problem long wol tede, olsem ded, wo, mo fasin safa, oli kamaot from giaman tok ya we Setan i talem long garen blong Iden. ?Yu ting se Jehova i harem nogud from giaman tok ya, mo nogud frut we i kamaot from? I sua se yes. Be yet, Jehova i no kam kros. Hem i gohed blong stap olsem wan “hapi God.”—1 Tim. 1:11.

3. ?Yumi save givhan blong mekem wanem?

³ Yumi save givhan blong pruvum se tok we Setan i talem long saed blong Jehova i giaman, taem yumi obei long komanmen  ya se: “Yufala i presem nem blong Jehova.” (Sam 113:1) Yumi mekem olsem, taem yumi talemaot trutok long saed blong Jehova. Taswe, ?bambae yu yu presem nem blong Jehova? Naoia bambae yumi tokbaot tri impoten samting we i save pulum yumi blong presem nem blong Jehova long fulhat blong yumi.

YUMI MEKEM JEHOVA I GLAD, TAEM YUMI PRESEM NEM BLONG HEM

4. ?From wanem Jehova i glad taem yumi presem hem? Talem wan eksampol. (Mo tu, yu luk pija.)

⁴ Yumi mekem Papa blong yumi long heven i glad, taem yumi presem nem blong hem. (Sam 119:108) ?Be hemia i min se God i olsem ol sinman we oli wantem blong narafala i presem olgeta, from oli nidim blong harem gud? Nogat. Tingbaot eksampol ya. Wan smol gel i ron i go long papa blong hem, i putum han blong hem i goraon long nek blong papa blong hem, mo i talem se: “!Yu yu beswan papa long fulwol!” I sua se papa ya i mas glad tumas. ?Be yu ting se hem i glad from we hem i nidim we smol gel ya i leftemap tingting blong hem? Nogat. Hem i glad from we hem i lavem smol gel blong hem, mo i harem gud taem smol gel ya i soemaot se hem i lavem hem mo i glad long hem. Hem i save se gudfala fasin ya bambae i givhan long smol gel ya, blong i stap glad taem hem i stap gruap. Long sem fasin, Jehova we i Papa blong yumi, i glad taem yumi presem hem.

5. Taem yumi presem Jehova, ?yumi pruvum se wanem tok i giaman?

⁵ Taem yumi presem Papa blong yumi long heven, yumi stap pruvum se narafala tok we Setan i talem long saed blong yumi wanwan, i giaman. Hem i talem se bambae i no gat wan man i gohed blong holemstrong long God taem hem i fesem trabol. Mo hem i talem se yumi evriwan bambae i stop blong wosipim God, sipos yumi ting se hemia bambae i mekem i gud long yumi. (Job 1:​9-11; 2:4) Be gudfala man ya Job i pruvum se Setan i wan man blong giaman. ?Olsem wanem long yu? Yumi wanwan i save jusum blong holemstrong long Jehova mo mekem hem i glad, taem yumi gohed blong wosipim hem nomo. (Prov. 27:11) Yes i wan bigfala ona blong mekem samting ya.

6. ?Olsem wanem yumi save folem eksampol blong King Deved mo ol Livaet? (Nehemaea 9:5)

⁶ Olgeta we oli lavem Jehova, oli wantem presem nem blong hem long fulhat blong olgeta. King Deved i raetem se: “I gud mi presem Jehova. I gud evri samting long mi oli presem tabu nem blong hem.” (Sam 103:1) Deved i kasemsave se taem yumi presem nem blong Jehova, hemia i sem mak olsem we  yumi presem Jehova stret. Nem blong Jehova i joen wetem ol fasin blong hem. Hemia i mekem yumi tingbaot olgeta gudfala fasin blong hem mo ol gudfala wok blong hem. Deved i luk nem blong Jehova olsem wan samting we i tabu mo i wantem presem nem ya. Hem i wantem yusum “evri samting long” bodi blong hem, we hemia fulhat blong hem blong presem nem ya. Mo hemia i sem mak long ol Livaet we oli lidim ol man blong presem Jehova. Oli gat tingting daon taem oli talem se, ol tok blong olgeta i no naf blong presem tabu nem blong Jehova. (Ridim Nehemaea 9:5.) I sua se ol tok we oli talem long fulhat blong olgeta, i mekem Jehova i glad tumas.

7. ?Olsem wanem yumi save presem Jehova long wok blong prij, mo taem yumi wok wetem ol narafala?

⁷ Tede, yumi save mekem Jehova i glad taem yumi tokbaot hem mo soemaot se yumi glad long hem mo lavem hem. Taem yumi prij, yumi mas tingbaot oltaem se mak blong yumi i blong pulum ol man oli kam klosap long Jehova, mo halpem olgeta blong gat sem tingting olsem yumi, hemia blong tingbaot se, Jehova i lavem yumi. (Jem. 4:8) Yumi glad blong soemaot long ol man, samting we Baebol i talem long saed blong Jehova, se hem i wan God we i gat lav, jastis, waes, paoa, mo plante moa gudfala fasin. Mo tu, yumi presem Jehova mo mekem hem i glad, taem yumi traehad blong folem ol fasin blong hem. (Efes. 5:1) Taem yumi mekem olsem, maet ol narafala bambae oli luksave se yumi defren long ol man blong rabis wol ya. (Mat. 5:​14-16) Taem yumi joen wetem olgeta, maet yumi save eksplenem from wanem yumi defren long ol narafala. Long rod ya, yumi save pulum ol man we hat blong olgeta i stret blong oli kam klosap long Jehova. Yes taem yumi presem Jehova olsem, yumi stap mekem hem i glad tumas.—1 Tim. 2:​3, 4.

YUMI MEKEM JISAS I GLAD, TAEM YUMI PRESEM NEM BLONG JEHOVA

8. ?From wanem yumi talem se Jisas i faswan blong presem nem blong Jehova?

⁸ Jisas nomo i save gud Jehova moa i bitim eni narafala laef samting long heven mo long wol. (Mat. 11:27) Jisas i lavem Papa blong hem, mo hem i faswan blong presem nem blong Jehova. (Jon 14:31) Long naet bifo we hem i ded, hem i prea long Papa blong hem mo i tokbaot impoten samting we hem i mekem taem hem i stap prij long wol, hem i se: “Mi mi mekem olgeta oli save nem blong yu.” (Jon 17:26) ?Hem i minim wanem?

9. ?Jisas i yusum wanem parabol blong halpem ol man blong oli kasemsave gud moa long Papa blong hem?

⁹ Jisas i mekem sam moa samting i bitim we hem i jes tijim ol man long nem blong God. Ol man Jiu we Jisas i tijim olgeta, oli save nem blong God finis. Be Jisas “nomo i save eksplenem . . . se Hem i hu.” (Jon 1:​17, 18) Eksampol, Hibru haf blong Baebol i soemaot se Jehova i gat sore mo i kaen. (Eks. 34:​5-7) Jisas i mekem trutok ya i kam klia moa taem hem i tokbaot parabol blong boe we i lusum rod mo papa blong hem. Long stori ya, papa ya i luk boe blong hem we i tanem tingting blong hem, “taem hem i stap longwe yet,” nao hem i resis i go, i hagem hem, mo i fogivim hem long fulhat blong hem. Hemia i mekem yumi luksave se Jehova i gat sore mo i kaen. (Luk 15:​11-32) Yes, Jisas i halpem ol man blong kasem save se Jehova i wanem kaen God.

10. (1) ?Olsem wanem yumi save se Jisas i yusum prapa nem blong Papa blong hem mo i wantem se ol narafala tu oli yusum? (Mak 5:19) (Mo tu, yu luk pija.) (2) ?Jisas i wantem se yumi mekem wanem tede?

¹⁰ ?Olsem wanem? ?Jisas tu i wantem se ol man oli yusum prapa nem blong Papa blong hem? Yes. Sam lida blong skul long taem ya, maet oli talem se nem blong God i tabu tumas, man i no mas yusum. Be Jisas i neva letem  ol tingting ya we i no kamaot long Baebol, i blokem hem blong no ona long nem blong Papa blong hem. Tingbaot taem ya we Jisas i ronemaot dimon long wan man we i stap long rijen blong ol man Gerasa. Ol man oli fraet mo oli askem strong long Jisas blong i aot long rijen ya. (Mak 5:​16, 17) Be Jisas i wantem se ol man oli save nem blong Jehova. Taswe, hem i talem long man ya blong i go talemaot long ol man, samting we Jehova i bin mekem be i no samting we hem i mekem. (Ridim Mak 5:19.) Hemia nao samting we Jisas i wantem se yumi mekem tede, hemia blong mekem ol man long olgeta ples long wol oli save nem blong Papa blong hem. (Mat. 24:14; 28:​19, 20) Taem yumi mekem olsem, yumi mekem King blong yumi Jisas i glad tumas.

11. ?Jisas i tijim ol man blong hem blong oli prea from wanem? Mo folem Esikel 36:​23, ?from wanem hemia i impoten?

¹¹ Jisas i save se stamba tingting blong Jehova, hemia blong mekem nem blong Hem i kam tabu mo tekemaot olgeta giaman tok we Setan i bin talem agensem Hem. Taswe hem i tijim ol man blong hem blong prea se: “Papa blong mifala long heven, plis yu mekem we nem blong yu i tabu.” (Mat. 6:9) Jisas i kasemsave se olgeta kriesen oli joen insaed long impoten bisnes ya. (Ridim Esikel 36:23.) Be Jisas nao i leftemap moa tabu nem blong Jehova i bitim eni narafala man. Nating se i olsem, taem ol enemi oli arestem Jisas, oli talem se hem i stap tok nogud long nem blong Papa blong hem. Jisas i save se i wan bigfala sin taem man i tok nogud long tabu nem blong Jehova. Mo hem i harem nogud from hem i save se bambae oli jajem hem from giaman tok ya mo talem se hem i gilti. Maet hemia nao from wanem hem “i harem nogud tumas” long ol laswan aoa ya bifo we oli arestem hem.—Luk 22:​41-44.

12. ?Wanem bigfala samting we Jisas i mekem blong nem blong Papa blong hem i stap tabu?

¹² Bigfala samting we Jisas i mekem blong nem blong Papa blong hem i stap tabu, hemia blong stanap strong taem ol man oli kilim hem, tok nogud long hem, mo talem ol giaman tok long saed blong hem. Hem i obei long Papa blong hem long evri samting, mo i no gat wan samting we hem i save sem from. (Hib. 12:2) Mo tu, hem i save se Setan nao i stap atakem hem long ol hadtaem ya. (Luk 22:​2-4; 23:​33, 34) Setan i ting se hem i save mekem Jisas i lego Jehova, be hem i no win nating. Jisas i pruvum se Setan i wan man blong  giaman, mo se i gat sam gudfala man we oli stap holemstrong long Jehova, nating se oli fesem ol trabol we i rili had.

13. ?Yu save mekem wanem blong King blong yu i glad?

¹³ ?Yu save mekem wanem blong King blong yu i glad? I gud yu gohed blong presem nem blong Jehova mo halpem ol narafala blong oli save ol gudfala fasin blong hem. Taem yu mekem olsem, yu stap folem eksampol blong Jisas. (1 Pita 2:21) Mo olsem Jisas, yu stap mekem Jehova i glad mo pruvum long enemi blong Hem, Setan, se hem i wan man blong giaman.

YUMI GIVHAN BLONG SEVEM LAEF BLONG OL MAN, TAEM YUMI PRESEM NEM BLONG JEHOVA

14-15. ?Wanem gudfala samting we maet i save kamaot taem yumi tijim ol man blong oli save Jehova?

¹⁴ Taem yumi presem nem blong Jehova, yumi givhan blong sevem laef blong ol man. ?Olsem wanem yumi mekem samting ya? Traem tingbaot. Setan “i stap blaenem tingting blong” ol man we oli no bilif. (2 Kor. 4:4) From samting ya, oli bilivim ol giaman tok blong Setan olsem: I no gat God, God i stap longwe mo i no kea long ol man, God i wan rabis man mo i stap panisim ol man nogud blong olwe. Ol giaman tok ya oli blong spolem gudnem blong Jehova, mo stopem ol man blong oli no kam klosap long Hem. Be taem yumi prij, yumi stap blokem Setan blong i no kasem mak blong hem. Taem yumi talemaot trutok long saed blong Jehova, yumi stap presem tabu nem blong hem. ?Mo wanem i kamaot from?

¹⁵ Yumi luk gudfala samting i kamaot taem yumi tijim ol man long saed blong Jehova. Ol trutok blong Baebol oli gat bigfala paoa mo oli mekem ol man oli kam fri long ol giaman tok blong Setan, mo oli stat blong luk ol gudfala fasin blong Jehova. Mo hemia i mekem oli sapraes long bigfala paoa we God i gat. (Aes. 40:26) Oli lanem blong trastem Jehova from we hem i gat jastis. (Dut. 32:4) Oli lanem tu se hem i gat bigfala waes. (Aes. 55:9; Rom 11:33) Mo oli glad blong lanem se Jehova, hem i lav. (1 Jon 4:8) Taem oli kam klosap moa long Jehova, hop we oli gat blong laef olwe olsem ol pikinini blong God, bambae i kam strong moa. !I wan bigfala ona blong givhan  long ol man blong oli kam klosap long Jehova! Taem yumi mekem olsem, Jehova i luk yumi olsem ol man we oli ‘joen wetem hem blong mekem wok blong hem.’—1 Kor. 3:​5, 9.

16. ?Sam man oli harem olsem wanem taem oli save se God i gat wan nem? Talem sam eksampol.

¹⁶ Fastaem, maet yumi tokbaot nem blong Jehova nomo long ol man. Be hemia i save gat bigfala paoa long ol man we hat blong olgeta i stret. Eksampol, Aaliyah,  a wan yangfala woman we i gruap long wan skul we i no tijim trutok, i no glad long ol samting we hem i lanem mo i harem se hem i no stap klosap long God. Be taem hem i stat blong stadi wetem ol Witnes, tingting blong hem i jenis. Hem i stat blong luk God olsem fren blong hem. Mo hem i sapraes blong save se oli tekemaot nem blong God long plante Baebol, mo oli putum ol taetel olsem Masta. Taem hem i save nem blong Jehova, hemia i jenisim laef blong hem. Hem i talem se: “!Besfren blong mi i gat wan nem!” ?Wanem i kamaot from? Hem i gohed se: “Naoia mi gat pis long hat blong mi mo mi harem gud tumas.” Wan man we nem blong hem Steve, hem i wan man blong plei miusik, mo hem i kamaot long wan famle we oli man Jiu. Hem i no wantem joen long eni relijen from i luk se plante man oli gat tu fes. Be afta we mama blong hem i ded, hem i agri blong sidaon mo lesin long wan Baebol stadi we wan Witnes blong Jehova i mekem. Hem i sapraes tumas blong lanem se God i gat wan nem. Hem i talem se: “Mi neva save se God i gat wan nem. Hemia fastaem we mi kasemsave se God i rili stap, mo mi luk hem olsem wan trufala Man. Naoia mi save se mi faenem wan Fren.”

17. ?From wanem yu gat strong tingting blong gohed blong presem nem blong Jehova? (Mo tu, yu luk pija.)

¹⁷ Taem yu stap prij mo tijim ol man, ?yu yu tokbaot tabu nem ya Jehova long ol man? ?Yu yu halpem olgeta blong oli luksave se God i olsem wanem? Taem yu mekem olsem, yu stap presem nem blong God. I gud yu gohed blong presem tabu nem blong Jehova, hemia taem yu halpem ol man blong oli save God mo ol fasin blong hem. Olsem nao, bambae yu sevem laef blong olgeta. Mo bambae yu folem King blong yu, hemia Kraes Jisas. Mo antap moa, bambae yu mekem Papa blong yu Jehova i glad. !I gud yu “presem nem blong [hem] gogo i no save finis”!—Sam 145:2.