1-2. Vbọ khian ya ima rẹn vbe nọ ye Jehova hẹ, vba gha mu eni ẹnrẹn rhia?

 GIA kha wẹẹ, ọmwa ne u hoẹmwẹ ọnrẹn ta ẹmwẹ nọ ma khẹke vbekpa ruẹ, u rẹnrẹn wẹẹ, ohoghe ẹre ọ mu ba ruẹ sokpan emwa eso na wa yaeyi. Nọ ghi wa khọ sẹ ọre wẹẹ, iran na suẹn gha na iyẹn ohoghe nii khian, emwa nibun na do yaeyi. Vbọ khian gha ye ruẹ hẹ? Adeghẹ u mu ẹmwẹ emwa ọvbehe roro, u na vbe rẹn wẹẹ ohoghe nii gha mu ruẹ eni rhia, ẹ i khian zẹdẹ ya ẹko rhiẹnrhiẹn ruẹ.—Itan 22:1.

² Igiemwi na gha ya ima rẹn vbe nọ ghaa ye Jehova hẹ vba mu eni ẹnrẹn rhia. Ọkpa vbe uwu emọ orhiọn ọghẹe keghi ya ta ohoghe vbekpa e Jehova ma Ivi. Ivi keghi ya ohoghe na yi. Ohoghe na, ẹre ọ ya evbibiẹ ima nokaro sọtẹ daa e Jehova. Ọna ẹre ọ ghi si ẹre ne emwa nagbọn na ru orukhọ kevbe ne iran na wulo. (Gẹn 3:​1-6; Rom 5:12) Ohoghe ne Esu ta vbe ogba ọghe Idẹni ẹre ọ si ọlọghọmwa hia nọ rre agbọn na vbe ẹdẹnẹrẹ, ya sẹ egbe uwu, okuo kevbe usẹ. Ohoghe ne Esu ta kevbe ọlọghọmwa nọ si, da e Jehova ra? Ọ wa da e Jehova. Ọrheyerriọ, ẹ i mu ohu, ẹ i vbe balọ egbe. Uhiẹn, “Osa nọ mwẹ oghọghọ” ẹre Jehova khin.—1Tim 1:11.

3. De uyi nọkhua na mu ye ima egbe?

³ Uyi nọkhua ẹre a mu ye ima egbe ne ẹkpotọ na kie ne ima ya gha rre usun emwa ni kpe eni e Jehova huan, odẹ ne ima ya ru ọnọna ọre ne ima na lele iyi nọ khare wẹẹ: “Wa rho eni e Jehova.” (Psm 113:1) Odẹ ọkpa ne ima ya rho eni nọhuanrẹn ọghe Jehova, ọre ne ima na ta ẹmwẹ ọnrẹn nọ maan ma emwa ọvbehe. Uwẹ gha rho eni e Jehova ra? Gi ima guan kaẹn emwi eha kpataki nọ gha ru iyobọ ne ima ya gha ya ekhọe hia rho eni Osa ne ima ga.

TE IMA YA ẸKO RHIẸNRHIẸN E JEHOVA VBE IMA GHAA RHO ENI ẸNRẸN

4. Vbọzẹ ne urhomwẹ ọghe ima na ya ẹko rhiẹnrhiẹn e Jehova? Ru igiemwi yọ. (Vbe ya ghee efoto.)

⁴ Te ima ya ẹko rhiẹnrhiẹn e Jehova vbe ima ghaa rho eni ẹnrẹn. (Psm 119:108) Te ọna ghi rhie ma wẹẹ, te Osanobua yevbe  emwa nagbọn ni ma gba ni hoo ne emwa gha tian iran rhunmwuda we iran gualọ igiọdu ra? Ẹo. Gia kha wẹẹ, ọmokhuo ọkpa rhie obọ la erhae urhu, ọ na tama rẹn wẹẹ, “Uwẹ ọre erha nọ ghi maan sẹ vbe uhunmwu otagbọn na!” Ẹmwẹ ne ọmọ na tae keghi wa ya ẹko rhiẹnrhiẹn erhae, rhunmwuda, ẹ i ọmwa ẹre ọ tama rẹn nọ tae. Sokpan, te ọna ghi rhie ma wẹẹ okpia na ma rẹn wẹẹ, erha nọ maan ẹre irẹn khin ra, ra deghẹ ovbi ẹre ma na tian rẹn ẹ i khian sẹtin gha ghọghọ? Ẹo. Nọghayayerriọ, ma rẹnrẹn wẹẹ, ẹ i re te ọ gualọ ọmwa nọ khian tian rẹn, sokpan te ọ ghọghọ rhunmwuda ne ovbi ẹre na rhie ẹre ma wẹẹ, irẹn hoẹmwẹ ọnrẹn kevbe wẹẹ, irẹn gbọyẹmwẹ ye emwi ne erha irẹn ru. Erhae rẹnrẹn wẹẹ, uyinmwẹ vbenian gha ru iyobọ ne ovbi ẹre zẹvbe nọ ya waan dee. Emwi vbenian ẹre ọ si ẹre ne ẹko na rhiẹnrhiẹn e Jehova nọ re Erha nọ sẹ re, vbe ima ghaa rhie urhomwẹ nẹẹn.

5. Ma ghaa rho eni e Jehova, de ohoghe ne Esu ta ne ima gbe ukhu ẹre rua?

⁵ Ma ghaa rhie urhomwẹ ne Erha ima nọ rre ẹrinmwi, te ima rhie ẹre ma wẹẹ ohoghe ẹre Esu tae vbekpa dọmwadẹ ima. E Setan khare wẹẹ, ọmwa nagbọn rhọkpa i rrọọ nọ gha sẹtin ya ekhọe hia sinmwi oseghe ne eni e Jehova. Ọ we ima rhọkpa i khian sẹtin rhikhan mu e Jehova vbe ima ghaa werriẹ aro daa edanmwẹ. Ọ we ima gha sẹ e Jehova rae deghẹ ima na gha roro ẹre wẹẹ, ma gha ru vberriọ ẹre agbọn khian na maan ima. (Job 1:​9-11; 2:4) Sokpan, e Job keghi rhikhan mu Osanobua, ọ na rhie ẹre ma wẹẹ, ọmwa ohoghe ẹre Esu khin. Uwẹ gha vbe rhikhan mu e Jehova ra? Ẹkpotọ kie ne dọmwadẹ ima ya rhikhan mu e Jehova, ma gha ru vberriọ te ima rhie ẹre ma wẹẹ, ma sinmwi oseghe ne Jehova, ẹko ghi vbe gha rhiẹnrhiẹn ọnrẹn. (Itan 27:11) Uyi nọkhua ẹre Jehova mu ye ima egbe nọ na kie ẹkpotọ na ne ima.

6. Vbe ima khian ya ya egbe taa Ọba ighẹ e Devid kevbe Ivbi e Livai hẹ? (Nehimaia 9:5)

⁶ Emwa ni hoẹmwẹ Osanobua ẹre ọ ya ekhọe hia rhie urhomwẹ ne eni ẹnrẹn. Ọba ighẹ e Devid khare wẹẹ: “I gha rho e Jehova; Emwi hia ni rre uwu imẹ, wa rho eni ẹnrẹn nọhuanrẹn.” (Psm 103:1) E Devid rẹnrẹn wẹẹ, a ghaa rho eni e Jehova, e Jehova tobọre ẹre a rhie urhomwẹ na. A ghaa guan kaẹn eni e Jehova, emwi nọ demu ọre aro ọmwa nọ khin kevbe emwi ughughan nọ he ru. Te Devid wa gha hoo nọ gha ya aro nọ ghaan ghee eni Osanobua zẹvbe eni nọhuanrẹn, kevbe nọ gha rho eni ẹnrẹn. Te ọ kue gha hoo nọ ya “emwi hia ni rre uwu” irẹn ya ru ọnọna, ọni nọ wẹẹ, nọ ya ekhọe hia gha rhie urhomwẹ ne Jehova. Erriọ Ivbi Livai wa vbe gha ye, ọ gha de ọghe urhomwẹ na rhie ne Jehova, iran ẹre ọ mu asanikaro. Iran keghi mu egbe rriotọ, iran na miẹn kue wẹẹ, ẹmwẹ ọkpa i wa  rrọọ nọ gele sẹ, na gha sẹtin ya rho eni e Jehova. (Tie Nehimaia 9:5.) Vbene ẹmwata, odẹ ne iran ya mu egbe rriotọ kevbe odẹ ne iran ya ya ekhọe hia rho e Jehova wa ya ẹko rhiẹnrhiẹn ọnrẹn.

7. Vbe ima khian ya gha rho eni e Jehova vbe ikporhu kevbe vbe ẹdagbọn ima hẹ?

⁷ Vbe ẹdẹnẹrẹ, ma gha sẹtin ya ẹko rhiẹnrhiẹn e Jehova, deghẹ odẹ ne ima ya tama emwa ọvbehe vbekpa ẹre, na gha rhie ẹre ma wẹẹ, ma hoẹmwẹ ọnrẹn kevbe wẹẹ, ma gbọyẹmwẹ ye emwi hia nọ ru ne ima. Ma ghaa rre ikporhu, ọ khẹke ne ima kọe ye orhiọn wẹẹ, emwi nọ si ẹre ne ima na kporhu ọre ne ima ru iyobọ ne emwa ọvbehe ya do khian ọsie Jehova, kevbe ne iran sẹtin do gha ya aro ne ima ya ghee Jehova ya ghee ẹre. (Jems 4:8) Te ọ wa gbe ima otiti vbe ima ghaa tama emwa ọvbehe vbene Baibol ya gie Jehova hẹ, ọ gi ima rẹn wẹẹ Osa nọ mwẹ ahoẹmwọmwa, nọ bu ohiẹn ata, nọ mwẹ ẹwaẹn, ẹtin kevbe avbe uyinmwẹ esiesi ọvbehe ẹre Jehova khin. Ma ghaa hia ne ima gha ya egbe taa e Jehova, te ima rhie urhomwẹ nẹẹn, ẹko ghi vbe gha rhiẹnrhiẹn ọnrẹn. (Ẹfis 5:1) Te ima vbe rhie ẹre ma wẹẹ, ma lughaẹn ne emwa ni rre agbọn Esu na. Emwa eso sẹtin gha roro ẹre wẹẹ, ‘vbọzẹ ne ima na lughaẹn?’ (Mat 5:​14-16) Zẹvbe ne ima ya gu egbe emwa vbenian ru emwi vbe ẹdẹgbegbe, ma sẹtin rhan otọ re ma iran evbọzẹe ne ima na lughaẹn. Emwa eso ni mwẹ ekhọe ata sẹtin do rhunmwuda ọni gha hoo ne iran sikẹ e Jehova. Ma ghaa rhie urhomwẹ ne Jehova vbe odẹ ne ima guan kaẹn sin, te ima ya ẹko rhiẹnrhiẹn ọnrẹn.—1Tim 2:​3, 4.

TE IMA YA ẸKO RHIẸNRHIẸN JESU VBE IMA GHAA RHO ENI E JEHOVA

8. De vbene Jesu ya mu asanikaro vbọ gha de ọghe na gha rho eni e Jehova?

⁸ Vbe uwu emọ orhiọn hia ni rre ẹrinmwi kevbe emwa ni rre uhunmwu otagbọn na, Jesu ẹre ọ ghi rẹn e Jehova sẹ. (Mat 11:27) Jesu hoẹmwẹ Erhae ẹ i re nekherhe, irẹn ẹre ọ rhie igiemwi nọ ghi maan sẹ yotọ vbọ gha de ọghe na rho eni e Jehova. (Jọn 14:31) Vbe Jesu ghi guan kaẹn emwi nọ ghi ru ekpataki sẹ ne irẹn ru vbe uhunmwu otagbọn na, vbe ẹghẹ nọ na gha na erhunmwu vbe asọn nọ gbe fi ẹdẹ nọ wu, ọ na kha wẹẹ: “I gi iran rẹn eni ruẹ nẹ.” (Jọn 17:26) Vbe ọ ya ọna kha?

9. De vbene Jesu ya loo okha ya rhan otọ re ẹsẹsẹmwẹse aro ọmwa ne Erhae khin?

⁹ Ẹmwata nọ wẹẹ, Jesu gi emwa rẹn wẹẹ, eni Osanobua ọre Jehova, sokpan ẹ i re ọni ọkpa ẹre ọ wa ru. Ivbi e Ju ne Jesu ghaa ma ẹre emwi ka wa rẹn eni Osanobua. Sokpan, Jesu ẹre ọ wa re ọmwa nọ gele “gie aro ọmwa ne Osanobua khin.” (Jọn 1:​17, 18) Vbe igiemwi, abọ ọghe Evbagbẹn Nọhuanrẹn Na Ya E Hibru Gbẹn gi ima rẹn wẹẹ, Osa nọ mwẹ itohan kevbe ẹnina ẹre Jehova khin. (Ẹks 34:​5-7) Okha ne Jesu ta ọghe ọmọ nọ fuẹn ukhu kevbe erhae keghi rhan otọ re sayọ vbene Jehova mwẹ itohan kevbe ẹnina hẹ. Vbe okha nii, ma bẹghe ẹre wẹẹ, erha ọmọ nii bẹghe ovbi ẹre nọ fi werriẹ nẹ vbe “urria gbaan,” ọ na rhulẹ bu ẹre, ọ na muẹn dede, ọ na ya ekhọe hia yabọe. Okha na ya ima gele rẹn vbene Jehova mwẹ itohan kevbe ẹnina hẹ. (Luk 15:​11-32) Te Jesu wa gele gie aro ọmwa ne Erhae khin ma ima.

10. (a) Vbe ima ya rẹn hẹ wẹẹ, Jesu loo eni Erhae kevbe wẹẹ, ọ vbe gha hoo ne emwa gha ru vberriọ? (Mak 5:19) (Vbe ya ghee efoto.) (b) De emwi ne Jesu hoo ne ima gha ru vbe ẹdẹnẹrẹ?

¹⁰ E Jesu vbe gha hoo ne emwa gha loo eni Erhae ra? Ẹn. A sẹtin miẹn wẹẹ, ọkaolotu ugamwẹ eso ni ghaa rrọọ vbe ẹghẹ Jesu ghaa roro ẹre wẹẹ, ọ ma khẹke na gha gbe unu ye eni Osanobua, rhunmwuda eni nọhuanrẹn nọ, sokpan Jesu ma gi ilele vbenian nọ ma gua e Baibol ro da irẹn obọ yi nẹ ghẹ rho eni Erhae. Gi ima guan kaẹn emwi nọ sunu vbe ẹghẹ ne Jesu ya mu okpia ọkpa ne orhiọn dan ghaa kpokpo egbe rran vbe Gẹrasa. Ohan na suẹn gha mu emwa ni  rre evba, iran na we ne Jesu kpa hin ikinkin nii rre, Jesu na gele ru vberriọ. (Mak 5:​16, 17) Ọrheyerriọ, te Jesu ye gha hoo ne emwa ni rre evba rẹn eni e Jehova. Rhunmwuda ọni, ọ na tama okpia nii, ne irẹn mu ẹre egbe rran, nọ tama emwa ọvbehe emwi ne Jehova ru nẹẹn, ọ ma we nọ tama emwa wẹẹ irẹn ne Jesu ẹre ọ ru ẹre. (Tie Mak 5:19.) a Jesu vbe hoo ne ima gi emwa ni rre uhunmwu otagbọn hia rẹn eni Erhae vbe ẹdẹnẹrẹ! (Mat 24:14; 28:​19, 20) Ma ghaa hia vbene ẹtin ima sẹ ne ima ru ọnọna, ẹko ghi gha rhiẹnrhiẹn Jesu ne Ọba mwa.

11. De emwi ne Jesu tama erhuanegbe ẹre ne iran gha na erhunmwu yi, vbọzẹ ne ọna na ru ekpataki? (Ẹzikiẹl 36:23)

¹¹ Jesu rẹnrẹn wẹẹ, emwi ne Jehova gualọ ọre na kpe eni ẹnrẹn huan, rhunmwuda odẹ ughughan ne emwa he ya mu eni ẹnrẹn rhia. Ọni ẹre ọ si ẹre ne Jesu na ma erhuanegbe ẹre ne iran gha na erhunmwu vbenian: “Erha mwa nọ rre ẹrinmwi, gi eni ruẹ gha re na kpe huan.” (Mat 6:9) Jesu rẹnrẹn wẹẹ, ọna ọre ẹmwẹ nọ ghi ru ekpataki sẹ nọ dekaẹn emwa hia. (Tie Ẹzikiẹl 36:23.) A ghaa guan kaẹn ọmwa nọ gele ru emwi hia nọ gha sẹtin ru nọ mieke na kpe eni e Jehova huan, Jesu ọre ọmwa okaro. Ọrheyerriọ, avbe ivbiyokuo na ye do mu Jesu, de orukhọ ne avbe eghian rẹn we ọ ru na? Iran we te Jesu rhoo ro! Nọ ne Jesu, na ru emwi nọ gha sa ọrho ye eni Osanobua ọre orukhọ nọ ghi wegbe sẹ ne ọmwa gha sẹtin ru. Te ọ wa gha kpokpo Jesu vbe orhiọn vba ba ẹre ifiẹzọ na, a na vbe wẹẹ ọ rri abe. Ọ gha kẹ, ọna ẹre ọ si ẹre ne Jesu na gha rre “obalọ” vbe na te miẹn wẹẹ, ivbiyokuo do muẹn.—Luk 22:​41-44.

12. De vbene Jesu ya kpe eni Erhae huan hẹ vbe odẹ nọ ghi maan sẹ?

¹² A gbe Jesu, a tie ihẹn nẹẹn, a na vbe ba ẹre ifiẹzọ, sokpan Jesu keghi zin egbe ena hia, rhunmwuda, ọ hoo nọ kpe eni Erhae huan. Jesu rẹnrẹn wẹẹ emwi hia ne Erha irẹn ta ẹre irẹn ru, rhunmwuda ọni, de emwi ne ekhue khian ghi gha mu irẹn ba? (Hib 12:2) Ọ vbe rẹn wẹẹ, Esu ẹre ọ si ọlọghọmwa hia ne irẹn ghaa werriẹ aro daa. (Luk 22:​2-4; 23:​33, 34) Te Setan wa gha hia vbe odẹ ke odẹ nọ ya Jesu sẹ e Jehova rae; sokpan, ọ ma gba ẹre nẹẹn! Te Jesu wa gele rhie ẹre ma wẹẹ, ọmwa ohoghe ẹre Esu khin, kevbe wẹẹ e Jehova wa mwẹ eguọmwadia nibun ni mwẹ ẹkoata daa ẹre, kevbe ni gha sẹtin rhikhan  muẹn, ọ gha khọnrẹn we iran rre uwu edanmwẹ nọ wegbe!

13. Vbua khian ya ya ẹko rhiẹnrhiẹn Jesu Kristi ne Ọba ruẹ?

¹³ U hoo ne u gha ru emwi nọ ya ẹko rhiẹnrhiẹn Jesu ne Ọba mwa ra? Ye gha rho eni e Jehova, u ghi vbe ru iyobọ ne emwa ọvbehe, ne iran do rẹn aro ọmwa ne Osa ne ima ga gele khin. U ghaa ru vberriọ, te u ya egbe taa Jesu. (1 Pit 2:21) Vbe na ghee Jesu, te ima ya e Jehova ghọghọ, te ima vbe rhie ẹre ma wẹẹ, ọmwa ohoghe ne ekhue i mu ẹre Esu khin!

TE IMA RU IYOBỌ NE EMWA YA MIẸN FAN VBE IMA GHAA RHO ENI E JEHOVA

14-15. De emwi ọyunnuan nọ gha sẹtin sunu vbe ima ghaa ma emwa emwi vbekpa e Jehova?

¹⁴ Te ima ru iyobọ ne emwa ya miẹn fan vbe ima ghaa rho eni e Jehova. Odẹ vbo? E Setan “gue ekhọe” ọghe emwa nẹi ga Osanobua. (2 Kọr 4:4) Rhunmwuda ọni, te iran ghi ya avbe ohoghe ughughan ne Esu ta yi, vbe na ghee nọ khare wẹẹ: Osanobua i rrọọ, Osanobua khian rree ne emwa nagbọn, ẹ i vbe zẹyọ iran re, Osa nọ mwẹ ekhọe atosi ẹre Osanobua khin kevbe wẹẹ, ọ vbe rri emwa dan oya vbe etẹbitẹ. Te avbe ohoghe na mu eni e Jehova rhia, ne emwa ghẹ mieke na gha hoo ne iran sikẹ ọre. Sokpan, te iwinna ikporhu ne ima ru mu iwinna Esu rhia. Ma ghaa ma emwa ẹmwata vbekpa e Jehova, te ima rho eni Osanobua nọhuanrẹn. De vbene ọna ya ru iyobọ ne emwa hẹ?

¹⁵ Ẹmwata ni rre Ẹmwẹ ọghe Osanobua keghi kakabọ mwẹ ẹtin. Ọ mwẹ emwi ọyunnuan nọ wa sunu vbe ima ghaa ma emwa emwi vbekpa e Jehova kevbe aro ọmwa nọ khin. Kherhe kherhe aro ghi do gha gbannọ iran ne Esu gue ẹre ekhọe, iran ghi gele do rẹn aro ọmwa ne Jehova khin. Te ọ wa kpa iran odin vbe iran gha do rẹn wẹẹ, Osa ne olẹtin ẹre Jehova khin. (Aiz 40:26) Iran keghi mu ẹtin yan e Jehova vbe iran gha ghi do rẹn wẹẹ, Osa nọ bu ohiẹn ata ẹre nọ. (Diut 32:4) Iran wa miẹn emwi ruẹ vbe ẹwaẹn nẹi gia gie ne Jehova mwẹ. (Aiz 55:9; Rom 11:33) Ọ wa vbe mu iran orhiọn sotọ vbe iran gha ghi do rẹn wẹẹ, Osanobua tobọre ọre ahoẹmwọmwa. (1 Jọn 4:8) Zẹvbe ne iran ya sikẹ e Jehova, erriọ ilẹkẹtin ne iran mwẹ wẹẹ, iran gha sẹtin gha rrọọ vbe etẹbitẹ khian ya gha wegbe sayọ. Uyi nọkhua ẹre a mu ye ima egbe, ne ẹkpotọ na kie ne ima ya ru iyobọ ne emwa, ne  iran mieke na sikẹ e Jehova! Ma gha ru vberriọ, e Jehova ghi gha ghee ima zẹvbe ‘emwa ni gu irẹn winna.’—1 Kọr 3:​5, 9.

16. De vbe nọ ye emwa eso hẹ, vbe iran gha ghi do rẹn eni Osanobua? Ru igiemwi eso yọ.

¹⁶ Ma gha khian gu ọmwa ruẹ emwi, a sẹtin miẹn wẹẹ, emwi ne ima ka tama rẹn ọre wẹẹ, eni Osanobua ọre Jehova. Ọna ọkpa kẹkan sẹtin wa mu ọmwa nii ekhọe, deghẹ ọ na gha re ọmwa nọ gele hoo nọ gha re ọsie Osanobua. Vbe igiemwi, ọ mwẹ okhuo ọkpa na tie ẹre Aaliyah, b ikeferi ẹre ghaa nọ vbe ọ waan dee. Sokpan ugamwẹ nọ ghaa ye ma gha yẹẹ ọre vberriọ, ekhọe ọre na vbe gha tama rẹn wẹẹ irẹn ma sikẹ Osanobua. Sokpan emwi keghi fi werriẹ vbe Avbe Osẹe Jehova ghi suẹn gha ma rẹn e Baibol. Ọ na ghi suẹn gha ghee Osanobua zẹvbe ọsiọre. Ọ keghi wa kpa ẹre odin vbe ọ ghi rẹn wẹẹ a rhie eni Osanobua hin e Baibol nibun rre, a na ya Enọyaẹnmwa rhie ihe ẹre. Eni Osanobua nọ ghi do rẹn wa gele fi ẹdagbọn ọnrẹn werriẹ. Ọ keghi ya ekhọe hia kha wẹẹ: “Ọse nọ ghi sikẹ mwẹ sẹ mwẹ eni!” Vbọ ghi sunu? Ọ khare wẹẹ: “Te orhiọn mwẹ ghi wa sotọ nian. Egie nọkhua wa nọ mẹ ne I na rẹn eni e Jehova.” Ọ mwẹ okpia ọkpa na tie ẹre Steve, nọ ka gha kpee egiọn kpee emaba (musician) nọ re Ovbi e Ju, te a wa mu emwi gogogo vbe eke nọ na waan. Ọ ma kue deba ugamwẹ rhọkpa, rhunmwuda uyinmwẹ agabagebe ne emwa ghaa yin vbe ugamwẹ eso. Vbọrhirhighayehẹ, vbọ ghi rre asẹ ọkpa nọ ya gha khiẹ, ọ na kue yọ wẹẹ, irẹn gha deba ọmwa na gu ruẹ e Baibol, vbe ẹghẹ ne Avbe Osẹe Jehova na gha gu enene ọmwa ru emwi. Ọ ghi do rẹn eni Osanobua, ọ na wa mu ẹre ekhọe. Ọ khare wẹẹ: “I ma ka rẹn eni Osanobua.” Ọ na vbe rhie tẹ wẹẹ: “Ọna ọre ẹghẹ okaro ne I ghi do ya rẹn wẹẹ ọmwa nọ gele rrọọ, ẹre Jehova khin. I na wa rẹn wẹẹ, I miẹn Ọse ọghe ẹmwata nẹ.”

17. Vbọzẹ ne u na hoo ne u ye gha rho eni e Jehova? (Vbe ya ghee efoto.)

¹⁷ U gi emwa rẹn eni e Jehova, nọ re eni nọhuanrẹn vbe u ghaa kporhu kevbe vbe u ghaa ma emwa emwi ra? U ru iyobọ ne iran ya rẹn aro ọmwa ne Osanobua gele khin ra? U ghaa ru vberriọ te u rho eni Osanobua. Ye gha ru iyobọ ne emwa ya rẹn aro ọmwa ne Jehova gele khin, u ghaa ru vberriọ te u rho eni e Jehova. Odẹ vberriọ, te u miẹn emwa fan. Te u vbe lele igiemwi ne Jesu ne Ọba mwa rhie yotọ. Nọ ghi wa sẹ ehia, te u rhie urhomwẹ ne Jehova, nọ re Erha mwa nọ rre ẹrinmwi. Ye “gha rho [eni ẹnrẹn] ẹdẹ kevbe ẹdẹdẹmwẹdẹ”!—Psm 145:2.