1-2. Uga carata meteh perasan Jahwe sanga gelarNa ipitnah?

 BAYANGKEN teman kompakndu ngataken si la mehuli ras si la tuhu kerna kam. Piga-piga kalak tek kerna si e janah iceritakenna man kalak si deban. Dungna, enterem kalak si tek. Pitnah e ncedai gelarndu janah erban la mehuli perukuren kalak kerna kam. Uga nge perasanndu? Pasti sedih kam.—Kua. 22:1.

² Bage me perasan Jahwe sanga gelarNa ipitnah. Salah sada malekatNa erbual kerna Ia man Hawa, diberu si pertama. Tek Hawa man bual e. Dungna, ia ras perbulangenna mberontak man Jahwe. Akibatna, kerina manusia erdosa janah dungna mate. (Kej. 3:​1-6; Rom. 5:12) Gara-gara bual si ikataken Setan bas Taman Eden e, terjadi me kerina masalah si lit bas doni enda bagi kematen, perang, ras kesusahen. Uga perasan Jahwe? Pasti ceda kel ukur Jahwe perban bual e bage pe akibat arah pitnah e. Tapi, e labo erban Jahwe jadi nukah merawa. Ia tetap “Dibata si ermeriah ukur.”—1 Tim. 1:11.

3. Kai nge hak istimewata?

³ Lit hak istimewata guna mpebadia gelar Jahwe alu matuhi perentah enda: “Pujilah gelar Jahwe.” (Ms. 113:1) E ertina perlu sicakapken kai si mehuli kerna Jahwe. Nggit nge kam ngelakoken si e? Mari sibahas telu alasen si penting si nampati kita muji Dibatata alu bulat ukur.

 MERIAH UKUR JAHWE ADI SIPUJI GELARNA

4. Engkai maka meriah ukur Jahwe adi sipuji Ia? Ban contohna. (Nen ka gambar.)

⁴ Meriah ukur Bapakta si i surga sanga sipuji gelarNa. (Ms. 119:108) Tapi, Dibata labo bagi manusia si la sempurna si perlu ipuji ntah pe ipegegehi. Cuba bayangken sekalak anak diberu si kitik denga kiam ndahi bapakna janah dakepna ia, janah nina, “Kam Bapak si hebatna bas doni enda!” Pasti cirem bapakna e janah meriah ukurna. Engkai? Si e pasti labo perban bapakna e merhat ipuji-puji ntah pe pujin arah anakna ngenca si banci erban meriah ukurna. Meriah ukurna perban keleng ate anakna e ia ras ergaina ia. Itehna maka si e banci nampati anakna jadi kalak si ermeriah ukur. Bage ka pe, Jahwe, Bapakta si mehulina, meriah ukurNa adi sipuji Ia.

5. Adi sipuji Jahwe, kai si banci sibuktiken?

⁵ Sanga sipuji Bapakta si i surga, sibuktiken maka tuduhen Setan kerna kita la tuhu. Ikataken Setan maka la lit manusia si setia mbela gelar Dibata, janah kerina kita pasti sitadingken Dibata sanga iuji. Ikatakenna ka maka kerina kita pasti ngelawan Dibata adi la lit sidat gunana ngelayani Ia. (Jop 1:​9-11; 2:4) Tapi, Jop tetap setia janah ibuktikenna maka Setan perbual. Adi kam uga? Kita sekalak-sekalak banci mbela gelar Bapakta si i surga janah erban meriah ukurNa alu setia ngelayani Ia. (Kua. 27:11) Enda tuhu-tuhu hak istimewa man banta!

6. Uga kita banci ngusih Raja Daud ras kalak Lewi? (Nehemia 9:5)

⁶ Kekelengen man Dibata ngiahken kalak si setia guna muji gelarNa alu bulat ukur. Itulis Raja Daud, “Mbera-mbera kupuji Jahwe, mbera-mbera kupuji gelarNa si badia alu bulat ukur.” (Ms. 103:1) Iteh Daud maka adi ipujina gelar Jahwe, e ertina pujina Jahwe, perban gelar Jahwe lit hubungenna ras sipat-sipatNa si mehuli ras perbahanenNa si luar biasa. Badia iakap Daud gelar Bapakna Jahwe janah nggit ia mujisa. IlakokenNa e “alu bulat ukur.” Bagi Daud, kalak Lewi pe jadi usihen bas muji gelar Jahwe. Meteruk ukur kalak e ngakui maka kata-kata kalak e la pernah bias guna muji gelar Jahwe si badia. (Baca Nehemia 9:5.) Pasti meriah ukur Jahwe megiken pujin si bulat ukur arah kalak si meteruk ukur.

7. Uga kita banci muji Jahwe bas pelayanenta ras kegeluhenta tiap wari?

 ⁷ Salah sada carata erban meriah ukur Jahwe eme alu ncakapken kerna Ia. Arah kata-katata banci teridah maka keleng ateta Ia ras ngata bujur kita man baNa. Sanga bas pelayanen, perlu siinget maka tujun utamata eme nampati kalak rembak ras Bapakta Jahwe si perkeleng janah tuhu-tuhu nandai Ia, bali bagi kita. (Jak. 4:8) Meriah ka ukurta ncidahken man kalak uga Pustaka nuriken kerna Jahwe ras sipat-sipatNa si mehuli. Contohna, kerna kekelengenNa, keadilenNa, kepentarenNa, ras kuasaNa. Banci ka sipuji Jahwe ras siban meriah ukurNa adi siusahaken ngusih Ia. (Ep. 5:1) Sanga silakoken e, beda kita ras kalak si lit bas doni si jahat enda. Banci saja perdiateken kalak kita perban si e janah merhat ia metehsa engkai maka kita bage. (Mat. 5:​14-16) Sanga ngerana kita ras kalak e, banci sijelasken engkai maka kita beda ras kalak si deban. Alu bage, kalak si meteruk ukur nggit nandai Dibatata. Payo, adi sipuji Jahwe alu cara-cara si ndai, siban me meriah ukurNa.—1 Tim. 2:​3, 4.

MERIAH UKUR JESUS SANGA SIPUJI GELAR JAHWE

8. Engkai maka Jesus jadi usihen bas muji gelar Jahwe?

⁸ La soal i surga ras i doni, Jesus ngenca situhu-tuhu nandai Jahwe. (Mat. 11:27) Keleng ate Jesus Bapakna janah ia jadi usihen si mehulina bas muji gelar Jahwe. (Joh. 14:31) Bas totona sope ia mate, ikatakenna, “Enggo kuban tandai kalak e gelarNdu.” (Joh. 17:26) E me si ilakoken Jesus sanga pelayanenna i doni. Uga carana ngelakokenca?

9. Perumpaman kai si ceritaken Jesus gelah banci tandai kalak Bapakna?

⁹ Labo ngenca ituriken Jesus man kalak si deban maka gelar Dibata eme Jahwe. Kalak Jahudi si ajari Jesus enggom tehna gelar Dibata. Tapi ibereken Jesus terbuen penjelasen gelah banci reh bagesna tandai kalak Bapakna. (Joh. 1:​17, 18) Contohna, bas Kitap-Kitap Heber, ituriken maka Jahwe e dem perkuah ate janah mehuli. (Kel. 34:​5-7) Iban Jesus reh jelasna kerna si e alu nceritaken sada perumpaman kerna anak si bene. Sanga anak e robah ras mulih, idah bapakna ia dauh-dauh nari janah kiam ia njumpaisa. Dakep bapakna ia janah tuhu-tuhu ampunina. Arah perumpaman e, jelas siidah maka Jahwe e perkuah janah mehuli. (Luk. 15:​11-32) Isampati Jesus kalak si deban meteh uga kin situhuna Jahwe e.

10. (a) Ja nari siteh maka ipake Jesus gelar Bapakna janah merhat ka ia ilakoken kalak bage? (Markus 5:19) (Nen ka gambar.) (b) Kai ate Jesus silakoken gundari?

¹⁰ Ate Jesus gelah ipake kalak gelar Bapakna. Paksa si e, piga-piga peminpin agama erpengakap maka pantang nggelari gelar Dibata. Tapi perukuren si bage la sesuai ras Kata Dibata. Emaka, si e labo erban Jesus ngadi mpebadia gelar Bapakna. Cuba perdiateken contoh si deban. Sanga ipepalem Jesus sekalak dilaki si irasuki malekat jahat i daerah Gerasa, mbiar kalak janah pindona gelah lawes Jesus je nari. (Mrk. 5:​16, 17) Amin pe bage, ate Jesus gelah itandai kalak si lit i je min gelar Jahwe. Emaka, sope ia lawes, isuruhna dilaki si ipepalemna ndai gelah ngataken kai si enggo ilakoken Jahwe, labo  si enggo lakokenna. (Baca Markus 5:19.) a Gundari pe ate Jesus gelah sipebetehken min gelar Bapakna i belang-belang doni. (Mat. 24:14; 28:​19, 20) Adi silakoken si e, meriah siban ukur Rajata, Jesus.

11. Kai si ajarken Jesus guna itotoken pengikutna, janah engkai maka e penting? (Esekiel 36:23)

¹¹ Teh Jesus maka tujun Jahwe eme mpebadia gelarNa ras mbersihkenca arah kerina tuduhen. E me sebapna iajarken Jesus pengikutna guna ertoto bagenda, “O Bapak kami si i surga, ipebadia min gelarNdu.” (Mat. 6:9) Angkai Jesus maka e me masalah si mbelinna si adapi kerina ciptan. (Baca Esekiel 36:23.) Bas alam semesta enda, bagin Jesus me si mbuena bas mpebadia gelar Jahwe. Dosa si mbelinna iakap Jesus eme la ngergai ntah pe ncedai gelar Bapakna si badia. Tapi sanga Jesus itangkap, ituduh ia ngelakoken si e. E banci saja alasen utama engkai maka “getem kel pusuhna” sanga ia nandangi itangkap. Pasti ceda kel ukurna perban ikataken ersalah erkiteken ngelakoken kejahaten si bage.—Luk. 22:​41-44.

12. Perbahanen si luar biasa kai nge si ilakoken Jesus guna mpebadia gelar Bapakna?

¹² Guna mpebadia gelar Bapakna, megenggeng Jesus sanga isiksa, ihina, ras ipitnah. Tehna maka enggo patuh ia man Bapakna bas kerinana, emaka la perlu ia mela. (Heb. 12:2) Tehna ka maka langsung ia iserang Setan bas masa-masa si susah. (Luk. 22:​2-4; 23:​33, 34) Ate Setan gelah Jesus la setia. Tapi gagal Setan! Ibuktiken Jesus maka Setan e perbual si kejam janah lit nge kalak si setia man Jahwe amin pe mberat kel tentangenna.

13. Uga kam banci erban meriah ukur Rajata?

¹³ Adi meriah atendu banndu ukur Rajata, teruslah puji gelar Jahwe. Sampatilah kalak si deban nandai uga kin situhuna Dibata e. Alu ngelakoken si e, enggo usihndu Jesus. (1 Pet. 2:21) Bagi  Jesus, banndu Jahwe ermeriah ukur alu mbuktiken musuhNa Setan eme perbual si la meteh mela!

BANCI SELAMAT ADI MUJI GELAR JAHWE

14-15. Kai hasilna adi siajari kalak kerna Jahwe?

¹⁴ Sanga sipuji gelar Jahwe, banci siselamatken kalak si deban. Engkai? Cuba ukuri enda: Enggo ipepentang Setan perukuren kalak si la erkiniteken. (2 Kor. 4:4) Akibatna, tek kalak e man bual Setan. Contohna, Dibata e la lit, Dibata e ndauh arah kita janah la diateNa kita, Dibata e kejam, janah siksaNa kalak jahat rasa lalap. Sada ngenca tujunna bual si bage eme ncedai gelar Jahwe ras erban kalak la nggit rembak ras Ia. Tapi adi erberita kita, gagal siban tujun Setan e. Siajarken man kalak kebenaren kerna Bapakta si i surga janah sipuji gelarNa si badia. Kai hasilna?

¹⁵ Mbelin kel kuasa kebenaren si lit bas Kata Dibata. Sanga siajari kalak kerna Jahwe ras sipat-sipatNa, banci siidah hasil si luar biasa. Bali bagi kita, perukuren kalak e lanai ipepentang bual Setan janah banci mulai anggap kalak e Jahwe Bapak si perkeleng. Luar biasa kel akap kalak e meteh gegeh Jahwe si la erbatas. (Jes. 40:26) Mulai kalak e tek man baNa perban keadilenNa si sempurna. (Ul. 32:4) Teh kalak e ka maka pentar kel Jahwe e. (Jes. 55:9; Rom. 11:33) Terapuli kalak e meteh maka Jahwe eme kekelengen. (1 Joh. 4:8) Sanga reh rembakna kalak e ras Jahwe, reh tekna kalak e maka nggeluh pagi kalak e seh rasa lalap jadi anak-anakNa. Payo, mbelin kel hak istimewata nampati kalak rembak ras Bapakta si i surga. Sanga silakoken si e, ianggap Jahwe kita ‘teman erdahinNa.’—1 Kor. 3:​5, 9.

16. Kai pengaruhna man piga-piga kalak sanga tehna gelar Dibata? Ban contohna.

¹⁶ Tangtangna, banci sipebetehken man kalak maka gelar Dibata eme Jahwe. Si e banci kena ku pusuh kalak si bujur ukurna. Contohna, sekalak diberu si  gelarna Aaliyah, b si keluargana labo kalak Kristen. Amin pe lit agamana, la kapna ndeher ia ras Dibata. Tapi perasanna e berubah kenca mulai ia erlajar ras Saksi Jahwe. Banci gejapkenna maka Dibata e temanna. Sengget ia sanga tehna gelar Dibata enggo ihapus arah mbue terjemahen Pustaka janah iganti jadi penggelaren, bagi Tuhan. Mpelajari gelar Jahwe enggo ngubah kegeluhenna. Nina, “Kepeken, Temanku si mehulina lit gelarna!” Hasilna, bagenda nina, “Gundari dame kel pusuhku janah sada kehamaten kel kuakap meteh gelar Jahwe.” Perdiateken ka pengalamen Steve, sekalak pemain musik, si ipebelin bas keluarga si eragama Jahudi. La ia nggit gabung ras agama e perban mbue idahna je kalak si munapik. Tapi kenca mate mamakna, nggit ia erlajar Pustaka ras salah sada Saksi Jahwe. Kena kel ku pusuhna sanga begina maka lit gelar Dibata. Nina, “Lenga pernah kuteh gelar Dibata.” Nina ka, “E me tangtangna kuteh maka tuhu-tuhu lit Dibata janah banci kutandai Ia. Paksa si e, sadar aku maka Dibata banci jadi Temanku.”

17. Engkai maka terus atendu muji gelar Jahwe? (Nen ka gambar.)

¹⁷ Bas pendahin erberita ras ngajar, pebetehkenndu nge gelar Jahwe si badia man kalak si deban? Sampatindu nge kalak e tuhu-tuhu nandai uga kin situhuna Jahwe e? Adi bage banndu, pujindu gelar Dibata. Mbera-mbera terus pujindu gelar Jahwe si badia alu nampati kalak si deban nandai Ia. Alu bage, selamatkenndu kalak si deban. Ikutkenndu ka usihen Rajata, Jesus Kristus. Si pentingna, meriah banndu ukur Jahwe, Bapakta si perkeleng si lit i surga. Mbera-mbera terus ‘sipuji gelar Jahwe seh rasa lalap.’—Ms. 145:2.