1, 2. Ka hénpulu íderagubaliwa gunfurandei ida liña lan lasandiragun Heowá lungua lau iyeeni le ariñawagúbei luagu?

 SAMINA humá ariñaga lan aban gürigia le wéiriti línsiñe hun aban katei wuribati huagu. Subudi humuti liyeeni lan, lau sun lira, gíbetiña afiñerutiña lun iyeeni le ani létima wuribabei, aba lan hagumeserun aburuchaguagüdei iyeeni burí ligía. Ida luba hamuga hasandiragun hungua? Chóuruti nidiheribadün lan hamuga ladüga lawiyedun hiri ani wuribabei hamuga hasandiragun hungua, ma ítara liña? (Ari. 22:1).

² Gayaraati líderaguniwa hénpulu le lun gunfuranda wamani ida liña lan lasandiragun Heowá lungua dan le leyeehabei aban hádangiñe lirahüñü luagu ani aba lawiyeduni liri Heowá. Afiñetu Ewa lun iyeeni ligía ani barǘ lumutiña katei le lun hebedaagun lun Heowá. Ladüga katei le, sun gürigia afigouhatiwa ani lau lásügürün dan aba wóunwegun (Agu. 3:​1-6; Rom. 5:12). Ligíati, iyeeni le laburuchaguagüdübei Satanási lidan fuluri-agei Edén, ligía lébunabei sun turobuli le yaabei ubouagu kéiburi, óunweni, wuribu luma asufuriruni. Chóuruti, wuriba lan lasandiragun Heowá lungua lau sun burí iyeeni le laburuchaguagüdübei Satanási luma le lanügübei lúmagua. Lau sun lira, madügünti katei le lun lareidahan Heowá igarihabu. Lubaragiñe lira, watu Bíbülia lun Heowá: “Bungiu le gúndaabei” (1 Tim. 1:​11, TNM).

3. Ka lubuidun chansi wámabei?

³ Anihein aban lubuidun chansi wamá lun wídehan lun larumadahóun liri Heowá. Ida luba wibihini? Lau gaganbadi wamá lun gumadi le: “Alawaha huméi liri Heowá” (Sal. 113:1). Alawaha wamuti Heowá, dan le wayanuhan buidu luagu houn amu. Busentün san hadügüni? Ariha wamá ǘrüwa katei súdiniti le lunbei líderaguniwa alawahei liri Bungiu tídangiñe sun wanigi.

 GÚNDAAGÜDA WAMUTI HEOWÁ DAN LE WALAWAHANI LIRI

4. Afuranguagüda huméi lau aban hénpulu ka lan uagu gunda lubéi Heowá dan le walawahani (ariha humóun giñe iyawaü).

⁴ Hínsiñeti lun Heowá, Wáguchi le siélubei, lun walawahani liri (Sal. 119:108). Mini lan san le ítara liña lan Bungiu Suntigabafu kei gürigia gafigountiña ha áluahabaña halawahaniña amu lun buidu lan hasandiragun houngua? Uá. Samina humá aba lan tidin aban irahü óuburei túguchi lau ínsiñeni ani aba tariñagun lun: “Huguya úguchili le buídutimabei lidan sun ubóu!”. Ma lugundan úguchili le lau dimurei lánina ínsiñeni le tariñagubei liráü lun. Ka uagu lagundaara luagu le tariñagunbei? Le san lúgubu megei lani úguchili le dimurei le tariñagubei irahü to lun, lun buidu lan lasandiragun lungua? Uá, mítaranti. Hínsiñerügüti lun larihinu lisaani arufuda ínsiñeni lun luma geteingiradi. Lanwoun lira, subudi lumuti líderaguboun lan lubuidun burí igaburi le lúntima gunda tan eibu aweirideina tan. Ítarameme liña Heowá, —Úguchili le buídutimabei— gúndaati dan le walawahani.

5. Ka warufudubei dan le walawahani Heowá?

⁵ Da lumutiwa Satanási sun wagía lidan iyeeni le lariñagubei. Ariñagaali anhein lan óuchawagua aban gürigia úabei lan úaragua lan, midin ligíame luéigiñe lóubadina liri Heowá. Ariñagati giñe, wíchugubei lan wanagan luagun Bungiu ánhawa asagara buiti lídangiñe (Hob. 1:​9-11; 2:4). Lau sun lira, arufudati meha Hobu, wügüri le úaraguabei, marasualugu lan Satanási. Agia wagía? Dan le walawahani Heowá arufuda wamuti giñe marasualugu lan Satanási. Resibitiwa kada aban wádangiñe aban lubuidun chansi lun luéigiñe wamá lóubadina liri Heowá luma lun wagundaaragüdüni lau úaragua wamá lun (Ari. 27:11).

6. Ida luba wáyeihani urúei Dawidi hama lewitagu? (Neemíasi 9:5).

⁶ Ha hínsiñehabubaña lun Bungiu, ínchaha lumutiña katei le lun halawahani liri tídangiñe sun hanigi. Abürühati meha urúei Dawidi: “Nalawahabei Nabureme tau sun nuani; nalawahabei liri Bungiu le sándubei lau sun núgubu” (Sal. 103:1). Gunfuranda lumuti meha urúei Dawidi dan le lan walawahani liri Heowá, ítarameme liña kei walawahañein lan Heowá. Lau wayanuhan luagu lubuidun liri Heowá, wayanuhaña luagu lubuidun ligaburi luma burí katei buídumeraüti le adüga láalibei. Busenti meha Dawidi lun layusurun liri Heowá kei aban iri le sándubei ani lun lalawahani. Ariñagati busén lan ladügüni tídangiñe sun tilulin lanigi, lidan amu dimurei, tau sun luani. Barǘ hamuti meha giñe lewitagu ubaraü lidan lalawahóun liri Heowá. Lau ǘnabuguni gunfuranda hamuti  úati lan dimurei lun lichugún uéiriguni lun liri Heowá le sándubei keisi ladüna (aliiha huméi Neemíasi 9:5). Ma funa lugundan Heowá laganbuniña lewitagu ha íchiga uéiriguni lun tídangiñe sun tilulin-agei hanigi!

7. Ida luba walawahani Heowá dan le wapurichiha luma lidan wadasin le lánina sagü weyu?

⁷ Wagía sun gayaraati walawahani Heowá dan le wayanuhan luagu lau ínsiñeni luma eteingiruni. Dan le wapurichihan, busentiwa lun línsiñedun Heowá houn gürigia kei línsiñedun woun (Sant. 4:8). Hínsiñeti woun lun warufuduni houn gürigia tau Bíbülia lubuidun ligaburi Heowá kéiburi: línsiñehabu, liricha, lichú lau luma lubafu. Ámuya igaburi lun walawahani Heowá luma lun wagundaaragüdünu lanigi, lau wadügüni sun wayaraati lun wáyeihani (Efe. 5:1). Ánhawa adügei ítara, ladügüba lun hálügüdagun gürigia houngua ka lan adügübei lun amu wamá hawéi ha híbiri gürigia (Mat. 5:​14-16). Másiñati lachülürüba lan weyu le ídanbei gayara lan wafuranguagüdüni houn ka lan uagu. Ladügüba katei le, lun busén hamá gürigia ha harumabaña anigi lun hafurendeirun luagu Bungiu. Dan le walawahani Heowá lidan burí igaburi le, gúndaagüda wamutu lanigi (1 Tim. 2:​3, 4).

GÚNDAAGÜDA WAMUTI HESUSU DAN LE WALAWAHANI LIRI HEOWÁ

8. Ka uagu ru lubalin Hesusu hénpulu le buídutimabei lánina lalawahóun liri Heowá?

⁸ Lidan sun ubóu ibidiñeti Úguchili buidu buidu ni ka un kei lun Lisaani (Mat. 11:27). Wéiriti línsiñe Lúguchi Hesusu lun ani ruti aban lubuidun hénpulu woun le lánina lalawahóun liri Heowá (Huan 14:31). Dan meha lafurieidunbei Hesusu lun Lúguchi guñoun lubaragiñe lounwen, ariñagati luagu lani ministeriu: “Subudigüda naali houn kátabu lan” (Huan 17:26). Ida liña ladügüni?

9. Ka hénpulu layusurubei Hesusu lun lafuranguagüdüni buidu ida liña lan Heowá?

⁹ Mámarügü ariñagarügü lumuti Hesusu houn gürigia Heowá lan líribei Bungiu. Subudi hamaali meha huríu katei le. Lubaragiñe lira, afuranguagüda lumuti houn “ida liña lan” Heowá (Huan 1:​17, 18). Kei hénpulu, ariñawagúati lidan Abürüdǘni Ebüréu luagu Heowá, aban lan Bungiu gudemehabuti ani gaguraasunti (Afu. 34:​5-7). Afuranguagüda lumuti Hesusu inarüni le dan le labahüdagubei luagu aban isaani le acharagadubei luma luagu igaburi le larufudubei lúguchi. Afuranguagüdati sügǘ le dan lan le larihinbalin úguchili lisaani le asakürihabei dísegiñe, aba léibaagun lubaroun aba lóuburuni ani aba feruduna lani tídangiñe sun lanigi, arufuda lumuti abahüdahati le furangu ítara liña lan Heowá, buin liña Heowá lau gudemehabu luma gaguraasuni (Luk. 15:​11-32). Ligíati, íderagua lumutiña Hesusu gürigia lun gunfuranda hamani buidu ida liña lan Heowá.

10. a) Ka uagu wasubudirei yusu lani meha Hesusu liri Lúguchi ani busenti lan meha lun hayusuruni amu gürigia? (Márükosu 5:19; ariha huméi giñe dibuhu). b) Ka labusenrubei Hesusu lun wadügüni sun wagía?

¹⁰ Busenti san Hesusu lun hayusuruni amu gürigia liri Lúguchi? Anha. Másiñati afiñe hamá tábutigu relihión ha lídanbaña dan ligía luagu wéiriya lan sagüráu lan liri Bungiu darí lun moun lumuti lan liridún. Gama lumoun, mígirunti meha Hesusu lun lararamuni échuni burí le —le múaranbei luma le tarufudahabei Bíbülia— lun míchugun lani uéiriguni lun liri Lúguchi. Samina wamá luagu sügǘ le ídanbei lasagara Hesusu sífirigu wuribatiña lídangiñe aban wügüri lidan fulasu le gíribei Gerasa. Aba hanufudedagun gürigia saragu darí lun hayumuragun lun Hesusu lun láfuridun lídangiñe hageira (Mar. 5:​16, 17). Busenti meha Hesusu lun hasubudiruni sun gürigia liri Heowá. Ligíati lubaragiñe lidin ñéingiñe, aba lariñagun lun  wügüri ligía lun labahüdaguni houn sun gürigia le ladügübei Heowá luagu, mama le ladügübei Hesusu luagu (aliiha huméi Márükosu 5:19). a Busenti Hesusu, le Warúeite, lun wadügüni ligiaméme, lun warufudahani liri Heowá houn sun gürigia (Mat. 24:14; 28:​19, 20). Dan le wadügüni katei le, gúndaagüda wamuti.

11. Ka lariñagubei Hesusu houn lani disipulugu lun hafurieidun luagu? Ani según Esekiéli 36:​23, ka uagu súdini lubéi katei le?

¹¹ Subudi lumuti Hesusu le lan labusenrubei Heowá lun ladügǘn liri sándume, mini lan le, larumadun liri lídangiñe sun iyeeni le ariñawagúbei luagu. Ligía larufudahabei Hesusu houn lani disipulugu lun hafurieidun ítara: “Wáguchi Bungiu le siélubei, inebewalá biri” (Mat. 6:9). Gunfuranda lumuti Hesusu ua lan amu katei súdinitimabei luéi le lidan sun ubóu (aliiha huméi Esekiéli 36:23). Úati amu luéi Hesusu lidan sun ubóu le adügübalin sun liyaraati lun larumadahani liri Heowá. Lau sun lira, dan le hárügüdünbalin Hesusu lun hadaürüni aba híchugun láganiñu duru luagu, luagu arufudaali lan aban óunwenbu menebenehabuni lun liri Lúguchi. Úati amu figóu wéiritimati lun Hesusu luéi lira. Ani lubaragiñe hárügüdüni, wuribati meha lasandiragun lungua ladüga subudi lani luagu híchugubei lan buga duru ligía luagu ani siadi hameime luagu figóu ligía. Másiñati anihán lan katei le adügübei lúntima “laweiridun ligarigu” lidan dan ligía (Luk. 22:​41-44).

12. Ka ladügübei Hesusu lun larumadagüdüni liri Lúguchi lidan aban igaburi le buídutimabei?

¹² Lun ladügǘn liri Heowá sándume, aranseñu liña meha Hesusu lun lawandun furumiñeguarügü katei, kéiburi, labuleseirún, lanabún luma lichugún duru luagu. Gaganbadi lun Lúguchi lidan sun katei, ani úati ni kata lun gayara lan ladügün lun labusigaridun (Ebü. 12:2). Subudi lumuti giñe Hesusu Satanási lan agayuahabei luagu lidan dan hénrenguti ligía (Luk. 22:​2-4; 23:​33, 34). Busenti yebe Mafia lun múaragun lan Hesusu lun Heowá, gama lumoun; mibihin lumuti! Arufuda lumuti Hesusu luagu marasualugu lan Satanási ani añahein lan lubúeingu Heowá ha úaraguatiña íbini lidan óuchawaguni létima hénrenguti.

13. Ka lunbei wadügüni lun wagundaaragüdüni Hesukrístu le Warúeite?

¹³ Busentün hagundaaragüdüni Hesukrístu le  Hurúeite? Anhein ítara liña lubéi, sigí humá alawahei liri Heowá ani íderagua humañame amu lun harihini kei lubéi. Ítara hafalaruñeinme hénpulu le lígirubei Hesusu (1 Fe. 2:21). Ani ítara kei Hesusu, hagundaaragüdübei Heowá ani harufudubei luagu marasualugu lan Satanási le lágani Heowá.

ÍDEHATIWA ESEFUHA IBAGARI DAN LE WALAWAHANI LIRI HEOWÁ

14, 15. Ka burí katei buiti asuseredubei dan le warufudahani inarüni luagu Heowá houn gürigia?

¹⁴ Ka uéigiñe gayara lubéi wariñagun dan le lan walawahani liri Heowá ídehatiwa lan lidan lesefurún habagari gürigia? Ladüga, daruguaali Satanási “lau harihin luma hasaminan” ha mafiñenbaña (2 Ko. 4:4). Ligía afiñe habéi saragu gürigia luagu iyeeni le lariñagubei ani saminatiña ua lan Bungiu, dise lan wawéi, meberesenti lan wau, furundei lan ani súfurigüda lumutiña lan gürigia salufuritiña lun súnwandan. Adügati sun iyeeni burí le lun lawiyedúniwa liri Heowá, lun wuriba lan layanuhóun luagu luma lun mayarafadun lan ni aban gürigia lun. Gama lumoun, dan le wapurichihan, arufuda waméi inarüni luáguti Wáguchi Heowá, adügatiwa lun madügün lani Satanási le labusenrubei ladügün, ani alawaha wamuti liri Heowá le sándubei. Ka lanügübei katei le?

¹⁵ Wéiriti lubafu inarüni burí le tídangiñeti Bíbülia. Dan le warufudahani houn gürigia katei lan Heowá luma ida liña lan, susereti aban katei le wéiriti lubuidun. Éibume mafiñenhaña lan luagu iyeeni burí le lariñagubei Mafia, le meha adügübei lun marihin hamá, ábame léfegechun hagu ani ábame hagumeserun arihei Wáguchi Heowá lidan aban igaburi le ídanbei warihei. Aba taweiridun hanigi gürigia ha lau hasaminarun luagu óunwenbu lubafu (Isa. 40:26). Adügati liricha le úabei mégeiti luagu lun chouru lan hasandiragun houngua (2 Lur. 32:4). Wéirigüda lumutu hanigi hasubudiruni lueirin lichú lau (Isa. 55:​8, 9; Rom. 11:33). Ani buiti hasandiragun houngua lau hafurendeirun ínsiñeni lan ligía (1 Huan 4:8). Dan le hayarafadun lun Heowá, aba hachoururuni houngua gayara lan hawinwandun lun súnwandan ani ábanhaña hádangiñe lisaanigu. Ma lubuidun chansi le wámabei lun wíderaguniña amu lun hayarafadun lun Wáguchi Bungiu le  siélubei! Lanwoun lira, dan le wadügüni, ariha lumutiwa Heowá kei ídehatiña luma (1 Ko. 3:​5, 9).

16. Ka gayaraabei lanügün lafurendeirún liri Bungiu? Ru humá aban hénpulu.

¹⁶ Dan le wayanuhan luagu furumiñeti wéiyaasu luma aban gürigia luagu Bungiu, másiñati ariñagarügütiwa lan lun Heowá lan líribei Bungiu. Ani le linarün katei, anhein buidu tubéi lanigi gürigia ligía gayaraati ladügün katei burí le lun lasansirun libagari. Kei hénpulu, anuhein aban nibureintu gíritu Alía b to meha agüriaruboun haganagua gürigia ha mámabaña kristiánugu. Gama lumoun, magundantu meha lau luwuyeri afiñeni le arufudahóubei tun, masandiragun tuguya tungua yarafa lun Bungiu. Dan le tagumeserunbei aturiaha hama Gefentiña, aba lasansirun sun katei. Dan le tíchugunbei fe sánsiwa lan liri Bungiu tidan saragu Bíbülia lun híchugun Aburemei, mafiñen tumuti yebe. Sánsiti tibagari dan le tasubudirunbalin liri Bungiu lugundun lúmagiñe dan ligía aba tagumeserun arihei keisi tumada. Lau tueirin anigi, aba tariñagun: “Gíriti besi numada!”. Ariñagayatu: “Darangilu haadina guenlé. Wéiriti nugundan luagu katei le”. Hínsiñeti meha músika lun Steve ani hádangiñeti aban iduheñu huríu ha meha wéiribei tínsiñe hani relihión houn. Máhaali meha tun ni aban relihión lugundun ariha laali meha biangua lan hagibu gürigia ñein. Gama lumoun, dan le lóunwenbei aban liduhe, aba lánharun lun lerederun lidan aban aturiahani tídangiñeti Bíbülia le líchugubei aban gefenti luagu Heowá lun aban gürigia. Chülüti lidoun tilulin-agei lanigi lau lafurendeiruni liri Bungiu. Ariñagati: “Ibidiñeti meha nun ka lan líribei Bungiu”. Ani ariñagayati: “Furumiñe wéiyaasu lidan nibagari, aba narihini Bungiu keisi aban gürigia le inarüniti. Lidan oura ligía, aba níchugun fe darihadina lan aban umadaü”.

17. Ka uagu busén hubéi hasigirun íchiga uéiriguni lun liri Heowá? (Ariha humóun giñe iyawaü).

¹⁷ Dan le wapurichihaña lan o warufudahaña lan, ariñaga wamuti san houn gürigia ka lan líribei Bungiu ani ka lan ligaburibei? Ánhawa adügei ítara, wálawahañein liri Heowá. Ligíati, sigí wamá íderaguaña amu asubudirei katei lan Heowá ani ítara halawahabei iri le sándubei. Lau hadügüni ítara, hesefuruba saragu ibagari, hasigirubei lani Warúeite Hesusu hénpulu ani luéigiñe sun katei hagundaaragüdübei Wáguchi Heowá le hínsiñehabubei. Ítara kei abürühati Sálumu 145:​2, ariñaga wamá súngubei: “Nalawahabei biri lun súnwandan”.