1-2. Nji txani txi hi vhunako kupfisisa ati Jehovha a ti pfisako tona msana ko makuhu a mangi mayelano ni nene ma di hangalasilwe?

 ALAKANYISISA ngu tiya: M’thu awu u mdhundako ngutu a womba-womba wubihi ngu ngawe. Awe wa tiziva ti to eto makuhu, kambe vamwani vathu va kholwa. Tximwani txa hombe txa ku nyenyeza, vathu vonevo va khata ku hangalasa makuhu oneyo se vamwani ni vona vo tala va kholwa. U nga tipfisa kutxani, ngaku vathu vonevo i di va lisima kwako ni ku u txi ninga lisima nduma ya wena ya yinene? Ti hakubasani ti to makuhu oneyo ma di na ku nyenyeza u tshumela u swireka.—Mav. 22:1.

² Txiemo txiya txa hi vhuna kupfisisa ati Jehovha a nga tipfisa tona mbimo yi nduma yakwe ya yinene yi nga nyetiswa. Mmweyo wa vanana vakwe va moya a wombile makuhu mayelano ni nene ka wamsikati wo khata i ku Evha. Evha a khotwe ka makuhu oneyo. Ngu mhaka ya makuhu oneyo vaveleki vathu vo khata va tshuralete Jehovha. Ni ku wuyelo ku ve yi yo, txionho ni lifo si tshapete ka vathu votshe ha mafuni. (Gen. 3:1-6; Var. 5:12) Sotshe sikarato asi hi si wonako ha mafuni nyamsi so nga lifo, tiyimbi ni kuxaniseka, si ho ngu kona ha ka makuhu aya Sathani a nga ma womba-womba jaradhi ka Edheni. Jehovha a tipfisa kutxani a txi wona sotshe sikarato asi makuhu oneyo ma nga si vanga? Ti hakubasani ti to eto ta m’karata ngutu. Hambiketo Jehovha kha nga veka txiviti, ene wa simama e va “Txizimu txa makatekwa mwendo txo tsaka.”—1 Tim. 1:11.

3. Ngu wuhi mkhanjo hi ku na wo?

³ Athu hi ni mkhanjo wo vhuneta kuveka hakubasani ti to Sathani a hembile mayelano ni ditina da Jehovha ni ku hi londisa mkongomiso wuwa wo hehuka: “Dhumisani ditina da Jehovha.” (Mas. 113:1, NM) Athu hi maha toneto ngu kuwomba-womba kwati ngu m’thu wu a emelako ditina donedo do sawuleka. Se  awe u tiemisete kumaha toneto? A hi wone sivangelo siraru sa sinene asi si no hi vhuna kudhumisa ditina da Jehovha ngu mbilu yathu yotshe.

JEHOVHA WA TSAKA NGAKU HI TXI DHUMISA DITINA DAKWE

4. Ngu kutxani Jehovha a txi tsaka mbimo yi hi mningako wudhumo? Ningela txikombiso. (Wona ni mfota.)

⁴ Tate wathu wa nzumani wa tsaka mbimo yi hi dhumisako ditina dakwe. (Mas. 119:108) Ina eto ti lava kuwomba to Txizimu txa mtamo wotshe txi fana ni vathu va kwa mbi pelela, ava va zumbelako ku lava ku ningwa wudhumo ngu konaha ka kutipfa va di ni txilaveko mwendo va sa vhikeleka? Ahim-him. Pimisa ngu txikombiso txiya: Txihoranana txo kari txi abrasara tate wa txona ngu nzila ya lirando txi m’gela tiya: “Awe u tate wamnene ngutu!” Tate wa kona wa tsaka ngutu e tshumela e bonyozela ngu litsako ngu mhaka ya ti mwanana wakwe a mahako. Ngu kutxani? Ina ene o va tate wu a nga mbi vhikeleka a dhependerwako ngu ku ndunduzelwa ngu mwanana wakwe? Ahim-him. Kuhambana ni to, ene wa tiziva ti to i tate wamnene. Ni ku wa tsaka ngutu ngu kuwona mwanana wakwe a txi kombisa lirando ni kubonga. Ene wa tiziva to tifanelo toneto nda lisima ngutu kasiku mwanana wakwe a va m’thu wo tsaka mbimo yi a no kula. Ngu txivangelo atxi txi fanako, Jehovha Tate wathu wa nzumani wa tsaka mbimo yi hi mningako wudhumo.

5. Ngaku hi txi dhumisa ditina da Txizimu, ngu yahi makuhu hi ma vekako hakubasani?

⁵ Mbimo yi hi dhumisako Jehovha, athu hi tshumela hi vhuneta ko veka hakubasani ti to Sathani a hi hembete nathu. Ngu nzila muni? Ene a wombile to kha ngaho a no sikota kusimama a di thembekile ka Jehovha ni kuemela ditina dakwe. Sathani a wombile ti to kha ngaho m’thu wu a no dukwa e gwita e simama a di thembekile. A tshumete a womba ti to hotshethu hi ndi na leka Jehovha ngaku m’thu a txo hi ni nga tximaha txa lisima. (Jobe 1: 9-11; 2:4) Kambe wamwamna wo thembeka Jobe a ti vekile hakubasani ti to Sathani a txo hemba. Se athu ko? Mmweyo ni mmweyo wathu nyamsi a ni lungelo yo emela ditina da Jehovha ni ku mthumela ngu kuthembeka. (Mav. 27:11) I lungelo ya hombe ngutu kumaha toneto.

6. Hi nga etetelisa kutxani Mkoma Dhavhidha ni Valevhi? (Nehemiya 9:5)

⁶ Lirando ngu Jehovha li maha ti to vathu vo thembeka ve lava kudhumisa ditina dakwe. Mkoma Dhavhidha a bhate tiya: “Ni na dhumisa Jehovha, ni na dhumisa ditina da Jehovha do lulama ngu mbilu ya mina yotshe.” (Mas. 103:1, NM) Dhavhidha a ti pfisisile ti to kudhumisa  ditina da Jehovha i ti kudhumisa Jehovha apune. Ditina da Jehovha di pata nduma yakwe, se eto ti hi khumbutisa tifanelo takwe to tshura ni simaha sa sinene asi a nga si maha. Dhavhidha a txi lava kudhumisa ditina da dinene da Tate wakwe ngu ku dona ndo sawuleka. Dhavhidha a txi lava kumaha toneto ngu ‘mbilu yakwe yotshe.’ Ngu ha kufanako, Valevhi va txi thangela ko dhumisa ditina da Jehovha. Vona ngu kutiveka hahatshi va tumete to mapswi awe ma si na wusikoti wo ninga wudhumo awu wu fanelako ditina da Jehovha. (Lera Nehemiya 9:5.) Ti hakubasani ti to kutiveka hahatshi koneko ku tisile litsako ka mbilu ya Jehovha.

7. Hi nga m’dhumisisa kutxani Jehovha hi di kutxhumayelani ni ka mahanyelo athu a ditshiku ni ditshiku?

⁷ Nathu hi nga dhumisa ditina da Jehovha ngu kuwomba-womba ngu ngene ngu txixonipho, lirando ni ngu kukombisa kubonga. Mbimo yi hi ku kutxhumayelani hi nga khumbula ti to txikongomelo txathu txa lisima ngu tshuketisa vathu ka Jehovha ni ku va vhuna ku ve mu wona kota Tate wa lirando. (Jak. 4:8) Kwathu i lungelo ya hombe ku komba vathu amu ka Bhiblia ti to Jehovha Njizimu txa lirando, txa wululami, txa wutxhari, mtamo, ni ku txona txi ni tifanelo timwani ta tinene. Yimwani nzila yo dhumisa ditina da Jehovha ni ku mtsakisa i mbimo yi hi mahako ti hi nga tikotako kasi ku mu etetela. (Vaef. 5:1) Mbimo yi hi mahako toneto, vathu va nga ti tumbula ti to athu hi hambanile ni vamwani vathu. (Mat. 5:14-16) Mbimo yi hi hanyisanako na vo ditshiku ni ditshiku ti nga maha hi va ni mikhanjo yo hi txhamusela ti to ngu kutxani hi txi hambana ni vamwani vathu. Kota wuyelo vathu vamwani va timbilu ta tinene va nga tsakela kugonda mayelano ni Txizimu txathu. Mbimo yi hi dhumisako Jehovha ngu tinzila toneto ene wa tsaka ngutu.—1 Tim. 2:3, 4.

ATHU HI TSAKISA JESU MBIMO YI HI DHUMISAKO DITINA DA JEHOVHA

8. Jesu a ve txikombiso ngu nzila muni ko dhumisa ditina da Jehovha?

⁸ Kha txi ngaho txivangwa nzumani mwendo ha mafuni atxi txi zivako Jehovha kupinda Jesu. (Mat. 11:27) Jesu wa mranda Tate wakwe ni ku ngene txikombiso txo khata txo dhumisa ditina da Jehovha. (Joh. 14:31) Ka mkombelo awu a nga maha ka Tate wakwe ka wusiku wo gwita a si se fa, ene a wombile ngu mapswi o koma mayelano ni mthumo wakwe a txi khene: “Ni va ningile kuziva ditina dako.” (Joh. 17:26) A txi lava kuwomba txani ngu toneto?

9. Ngu txihi txikombiso a txi Jesu a nga txi txhamusela kasi ku e hi vhuna kupfisisa kwati ati Jehovha aku ngu tona?

⁹ Jesu a mahile to engeteleka kupinda kugela vathu to ditina da Txizimu i Jehovha. Vajudha a va Jesu a nga txi bhula na vo, se va txi di ziva ditina da Txizimu. Kambe Jesu a ve wo khata ku “zivisa ati Txizimu txi ku ngu tona.” (Joh. 1:17, 18) Ngu txikombiso, mibhalo ya Txihebheru yi womba ti to Jehovha Txizimu txa wumbilu ni ku pfela. (Eks. 34:5-7) Jesu a ti vekile hakubasani mbimo yi a nga womba-womba ngu txikombiso txa mwanana wo mwalala. Mbimo yi hi gondako mayelano ni tate “a txi wona mwanana wakwe a di kule,” e mu yela e m’bharasara ni ku m’divalela ti txi huma mbiluni, athu ha wu pfisisa kwati wumbilu ni mpfela wusiwana wa Jehovha. (Luka 15:11-32) Jesu a hi mahile hi pfisisa kwati ati Tate wakwe aku ngu tona.

10. a) Hi ti zivisa kutxani ti to Jesu a txi thumisa ditina da Tate wakwe ni ku a txi lava ti to vamwani ve maha toneto? (Marku 5:19, NM) (Wona ni mfota.) b) Ngu tihi ati Jesu a lavako ku hi maha nyamsi?

¹⁰ Ina Jesu nene a txi tilava ti to vamwani ve thumisa ditina da Tate wakwe? Xamulo i ina. Vathangeli vamwani va titxhetxhe va txi kholwa ti to ngwa mbina txixonipho kuwomba ditina da  Txizimu, kambe Jesu kha tumela ti to txihena txonetxo txo mbi seketelwa ka mibhalo txi mtsivela kudhumisa ditina da Tate wakwe. Dikhambi dimwani Jesu a hanyisile wamwamna wu a nga ti ni madhimoni a nga txi hanya ditikoni da Vagherasa. Vathu va to khata kuthava Jesu aha koza ve mkombela ku e khukha ditikoni kwawe. (Marku 5:16, 17) Hambiketo Jesu a txi lava ti to vathu va wukhalo wule ve ziva ditina da Txizimu. Se ene a to gela wamwamna wule ti to e bhulela vathu ati Jehovha a nga ti mmahete i si nga ti ene a nga ti mahile. (Lera Marku 5:19, NM.) a Jesu a nga txi lava ku hi maha ti to ditina da Tate wakwe di ziwa ha mafuni kotshe! (Mat. 24:14; 28:19, 20) Ngaku hi txi maha txienge txathu ka mhaka yiya hi tsakisa Mkoma wathu Jesu Kristu.

11. Jesu a gondisile vagondiswa vakwe ku ve maha mkombelo mayelano ni txani, ni ku ngu kutxani eto i di ta lisima? (Ezekhiyele 36:23)

¹¹ Jesu a txi tiziva ti to txikongomelo txa Jehovha i ti kubasisa ditina dakwe ni ku kaneta ati ti nga ti wombilwe mayelano ni ditina dakwe. I ngu txivangelo txonetxo a nga gondisa valondeteli vakwe kumaha mkombelo va txi: “Tata wathu, u ku nzumani, ditina dako di na sawulwe.” (Mat. 6:9) Jesu a txi ti pfisisa ti to mhaka yiya yi txi gwesa wotshe mtumbuluko. (Lera Ezekhiyele 36:23.) Kha txi ngaho txivangwa tximwani ha mafuni kotshe atxi txi nga tikarata kasi kusawulekisa ditina da Jehovha kupinda ati Jesu a nga mahisa tona. Kambe mbimo yi Jesu a nga ñolwa, valala vakwe va mlumbetile kwa mbi kombisa txixonipho ngu Tate wakwe. Jesu a txi tiziva ti to kwa mbi thumisa kwati mwendo kuwomba-womba kubiha ngu ditina do sawuleka da Tate wakwe i ti txionho txa hombe ngutu a txi m’thu a ndi no txi maha. Kulumbetwa ni kuningwa mnando ngu txionho txo nga etxo ti mu karatile ngutu. Ti nga maha etxo i di txona txivangelo a txi txi nga mmaha e ‘tala ngu kupandiseka’ msananyana ka ku asi se ñolwa.—Luka 22:41-44.

12. Jesu a sawulekisile ditina da Tate wakwe ngu nzila muni?

¹² Kasi kusawulekisa ditina da Tate wakwe, Jesu a wonisanile ni kuxaniswa ngutu, kuruketelwa ni ku lumbetwa makuhu. Ene a txi tiziva ti to ati engisile Tate wakwe ka totshe, ku ti si nga ni txi txi nga mthelako tingana. (Vaheb.  12:2) Ene a txi tiziva kambe ti to Sathani a ti ko m’xasela ngu kukongoma ka timbimo tile to karata. (Luka 22:2-4; 23:33, 34) Sathani atxi lava kumaha totshe ati a nga tikotako kasi ku Jesu a si thembeki, kambe mizamo yakwe yi ve mnyuko wa yimbwa! Jesu a ti vekile hakubasani ti to Sathani m’hembi wa hombe ngutu ni ku Jehovha a ni malanda o thembeka aya ma simamako ma di thembekile hambi ma txi wonisana ni sikarato!

13. U nga maha txani ti to u tsakisa mkoma wako Jesu?

¹³ Ina awe wa ti lava ku tsakisa Mkoma wako Jesu? Simama u dhumisa ditina da Jehovha, u vhuna vamwani ku ve gonda ngu tifanelo to tsakisa ta Txizimu txathu. Ngaku u txi maha toneto u etetela Jesu. (1 Pedro 2:21) Kufana ni Jesu, u maha ti to Jehovha e tsaka u tshumela u veka hakubasani ti to mlala wakwe Sathani, mgodhi wa makuho!

ATHU HA VHUNETA KO HULUKISA VATHU NGAKO HI TXI DHUMISA DITINA DA JEHOVHA

14-15. Ngu tihi to tsakisa ati ti nga humelelako ngaku hi txi gondisa vathu mayelano ni Jehovha?

¹⁴ Mbimo yi hi dhumisako ditina da Jehovha, hi vhuneta ko hulukisa wutomi wa vathu. Hi ti mahisa kutxani toneto? Sathani “a vhate mapimo ya va va si kholwiko.” (2 Vak. 4:4) Vona va kholwa makuhu a Sathani o fana ni yawa: Txizimu kha txi ngaho, txi kule ni nathu ni ku kha txi khatali ngu vathu, Txizimu txi bihile ngutu, txa xanisa vaonhi ngu ha ku si gumiko. Sathani a wombetela otshe makuhu eyo nguku a lava ku nyetisa ditina da Jehovha ni ku vhalela vathu ku va si tshuketi kwakwe. Kambe mbimo yi hi txhumayelako, hi tsivela Sathani kumaha toneto. Ha gondisa vathu mayelano ni Tate wathu, ni ku dhumisa ditina dakwe do sawuleka. Se ngu yihi wuyelo ya toneto?

¹⁵ Mapswi a ditshuri a Dipswi da Txizimu ma ni mtamo ngutu. Ta tsakisa ngutu kugondisa vathu mayelano ni Jehovha ni ti a nga zumbisa tona. Didhamba adi Sathani a nga fenengeta ngu dona maso a vathu dawa, se va khata kuwona tifanelo to tsakisa ta Tate wathu. Vona va xamatiswa ngu mtamo wo mbi gwitelwa wa Jehovha. (Isaya 40:26) Vona va gonda ku mthemba ngu konaha ka wululami wakwe wo pelela. (Dhewut. 32:4) Vona va gonda ngutu ngu wutxhari wakwe wa hombe. (Isaya 55:9; Var. 11:33) Ni ku tshumela ve tsaniswa mbimo yi va gondako  to Jehovha lirando. (1 Joh. 4:8) Mbimo yi va yako ve tshuketa ka Jehovha, themba yawe yo hanya ngu ha ku si gumiko yiya masoni yi va ya ditshuri. I lungelo ya hombe ngutu hi ku nayo yo vhuna vathu ku ve tshuketa ka Tate wathu! Mbimo yi hi mahako toneto Jehovha a hi teka kota “vavhuneteli” vakwe.—1 Vak. 3:5, 9.

16. Vathu va ti pfisa kutxani ngaku va txi gonda ngu ditina da Txizimu? Ningela sikombiso.

¹⁶ Ti nga maha txo khata a txi hi gondisako vathu i di ti to ditina da Txizimu i Jehovha. Eto ti nga gwesa ngutu m’thu wu aku ni mbilu ya yinene. Ngu txikombiso, dijovhem dimwani da txisikati adi di dhanwako ku i Aaliyah b di kulisilwe ka wukhongeli awu wu nga si seketeli tigondo ta wona ka Bhiblia. Dona di si tsaki ngu wukhozeli wawe, ni ku di si tipfi di di hafuhi ni Txizimu. Kambe eto ti txitxile mbimo yi di nga khata kugonda ni Tifakazi ta Jehovha. Dona di khatile kuwona Txizimu kota mngana wa dona. Ni ku di xamate ngutu mbimo yi di nga gonda ti to ditina da Txizimu di ti thavisilwe ka ma Bhiblia a mangi ni ku di ti txitxilwe ngu sithopo so fana ni ku Mkoma. Kugonda ditina da Txizimu ti txitxile wutomi wa dona. Dona di womba tiya: “Mngana wangu wamnene a ni ditina!” Ku ve yihi wuyelo? Dona di womba tiya: “Ani ni ni kurula ka hombe mbiluni kwangu ni ku ni tipfa ni di wa lisima.” Dijaha dimwani di dhanwako ku i Steve di kulisilwe ka wukhongeli wa txijudha. Dona di ti si nga ngadi di lava kumaha txienge txa wukhongeli wonewo nguku di ti woni wukanganyisi wa wungi. Kambe msana ko mame wa dona a di fite di tumete kugonda Bhiblia ni Tifakazi ta Jehovha. Mbimo yi di nga ziva ditina da Jehovha, eto ti di gwesile ngutu. Dona di womba tiya: “Ni si khali ku gonda ngu ditina da Txizimu. Ku ve dikhambi do khata kupfisisa ti to Txizimu nja ditshuri, konku ni txi wona kota m’thu. Ka mbimo yile ni ti pfisisile ti to, ni ti mani mngana wa ditshuri.”

17. Ngu kutxani u txi lava kusimama u dhumisa ditina da Jehovha? (Wona ni mfota.)

¹⁷ Ka mthumo wako wo txhumayela, ina wa gondisa vathu ditina do sawuleka da Jehovha? Ina wa va vhuna ve wona tifanelo ta tinene ta Txizimu txathu? U txi maha toneto, u dhumisa ditina da Txizimu. Simama u dhumisa ditina do sawuleka da Jehovha ngu kuvhuna vathu ku ve mziva kwati nyamne wa ditina donedo. Ngu nzila yoneyo u na va u txi hulukisa wutomi wa vathu. U na va u txi etetela Mkoma Jesu Kristu. Ni ku txitimwi ka totshe u na va u txi tsakisa Tate wathu wa lirando Jehovha. Simama ‘u txi dhumisa ditina da Jehovha ngu ha ku si gumiko’!—Mas. 145:2.