1-2. Unsay makatabang nato nga masabtan kon unsay gibati ni Jehova dihang gidaot ang iyang ngalan?

 IMADYINA ni: Ang tawo nga imong gimahal naay gisulti nga daotan bahin nimo. Nahibalo ka nga dili ni tinuod, pero ang uban mituo ani. Ug makapaguol kay ila ning gisulti sa uban, ug daghan pod ang mituo. Unsa kahay imong bation? Kon gimahal nimo ang mga tawo ug importante para nimo ang imong maayong reputasyon, seguradong masakitan ka sa ilang mga gisulti nga dili tinuod.—Prov. 22:1.

² Kini nga ilustrasyon makatabang nato nga masabtan kon unsay gibati ni Jehova dihang gidaot ang iyang reputasyon. Ang usa sa iyang mga anak sa langit misultig bakak bahin niya ngadto sa unang babaye, si Eva. Mituo si Eva niana, maong mirebelde ang atong unang mga ginikanan kang Jehova. Ingong resulta, ang tanang tawo makasala ug mamatay. (Gen. 3:​1-6; Roma 5:12) Ang tanang problema nga atong nakita sa kalibotan karon—ang kamatayon, gubat, ug pag-antos—maoy resulta sa mga bakak nga gisulti ni Satanas didto sa tanaman sa Eden. Nasakitan ba si Jehova niana nga pagpangdaot sa iyang ngalan ug sa mga resulta niini? Siyempre. Pero si Jehova wala mahimong madumtanon. Gani, nagpabilin siyang “malipayong Diyos.”—1 Tim. 1:11.

3. Unsay atong pribilehiyo?

³ Pribilehiyo nato nga makatabang sa pagbalaan sa ngalan ni Jehova pinaagi sa pagsunod niining simple nga sugo: “Dayega ang ngalan ni Jehova.” (Sal. 113:1) Mahimo nato na pinaagi sa pagsultig maayong mga butang bahin Kaniya nga girepresentahan nianang balaan nga ngalan. Mao ba nay imong buhaton? Hisgotan nato ang tulo ka lig-ong rason nga magpalihok nato nga kinasingkasing  nga dayegon ang ngalan sa atong Diyos.

MAPALIPAY NATO SI JEHOVA DIHANG DAYEGON NATO ANG IYANG NGALAN

4. Nganong malipay si Jehova dihang dayegon nato siya? Iilustrar. (Tan-awa sab ang hulagway.)

⁴ Mapalipay nato ang atong langitnong Amahan dihang dayegon nato ang iyang ngalan. (Sal. 119:108) Pero nagpasabot ba ni nga ang Labing Gamhanang Diyos parehas sa dili hingpit nga mga tawo nga nagkinahanglag pagdayeg aron madugangan ang ilang kompiyansa sa kaugalingon? Wala. Konsideraha ni nga ilustrasyon. Imadyina ang usa ka bata nga midagan, migakos sa iyang papa, ug miingon, “Ikaw ang the best nga papa sa tibuok kalibotan!” Ang papa nalipay ug natandog pa gani sa gibuhat sa iyang anak. Ngano? Tungod ba kay kinahanglan gyod niya ang pagdayeg sa iyang anak? Dili. Nalipay siya kay ang iyang anak nagpakitag gugma ug apresasyon kaniya. Nahibalo siya nga ang maong mga hiyas makatabang sa iyang anak nga magmalipayon samtang nagdako siya. Sa susama, si Jehova, ang kinalabwang Amahan, malipay pod dihang dayegon nato siya.

5. Dihang atong dayegon ang ngalan sa Diyos, unsang akusasyon ni Satanas ang mapamatud-an nato nga bakak?

⁵ Dihang dayegon nato ang atong langitnong Amahan, makatabang ta sa pagpamatuod nga bakak ang akusasyon ni Satanas bahin sa matag usa kanato. Nangangkon si Satanas nga walay tawo nga maunongong modepensa sa ngalan sa Diyos. Miingon siya nga walay tawo nga magmatinumanon sa Diyos kon makaatubang ug pagsulay, ug nga kitang tanan motalikod sa Diyos kon makita nato nga mao nay makahatag natog bentaha. (Job 1:​9-11; 2:4) Pero gipamatud-an sa matinumanong si Job nga bakakon si Satanas. Kana pod bay imong buhaton? Ang matag usa nato naay pribilehiyo nga maunongong depensahan ang ngalan sa atong Amahan ug lipayon siya pinaagi sa matinumanong pag-alagad kaniya. (Prov. 27:11) Dako gyod na nga pribilehiyo!

6. Unsaon nato pagsundog si Haring David ug ang mga Levihanon? (Nehemias 9:5)

⁶ Ang gugma para sa Diyos nagpalihok sa matinumanong mga tawo nga dayegon nga kinasingkasing ang iyang ngalan. Si Haring David misulat: “Dayegon nako si Jehova; dayegon sa akong tibuok nga pagkatawo ang iyang balaang ngalan.” (Sal. 103:1) Nasabtan ni David nga pinaagi sa pagdayeg sa ngalan ni Jehova, madayeg niya si Jehova mismo. Ang ngalan ni Jehova konektado sa iyang reputasyon, busa magpahinumdom ni sa tanan niyang nindot nga mga hiyas ug makapahinganghang mga buhat. Giisip ni David nga balaan ang ngalan sa iyang Amahan ug gusto niya kining dayegon. Gusto niya kanang himoon sa iyang “tibuok nga pagkatawo” —buot pasabot, kinasingkasing. Sa susama, ang mga Levihanon nanguna sa pagdayeg kang Jehova. Mapainubsanon nilang giila nga ang ilang mga pulong dili gyod bug-os makahatag sa pagdayeg nga angay para sa balaang ngalan ni Jehova. (Basaha ang Nehemias 9:5.) Seguradong nakapalipay sa kasingkasing ni Jehova ang ilang mapainubsanon ug kinasingkasing nga pagdayeg.

7. Unsaon nato pagdayeg si Jehova diha sa atong ministeryo ug sa atong adlaw-adlawng pagkinabuhi?

⁷ Karon, mapalipay nato si Jehova pinaagi sa pagsulti sa uban nga proud ug mapasalamaton kaayo ta niya ug nga gimahal nato siya pag-ayo. Dihang naa ta sa ministeryo, hinumdoman nato nga ang atong pangunang tumong mao ang pagkabig sa mga tawo ngadto kang Jehova ug pagtabang kanila nga mahalon pod ang atong mahigugmaong Amahan sama sa atong pagmahal kaniya. (Sant. 4:8) Malipay kaayo ta nga ipakita ngadto sa mga tawo kon unsay giingon sa Bibliya bahin kang Jehova—sa iyang gugma, hustisya, kaalam, gahom, ug ubang nindot nga mga hiyas. Madayeg ug mapalipay pod nato si Jehova pinaagi sa pagpaningkamot nga masundog siya. (Efe. 5:1) Kon ato nang himoon, makita sa uban nga lahi ta sa mga tawo niining daotang kalibotan, ug mainteres tingali sila kon unsa ang rason. (Mat. 5:​14-16) Sa atong adlaw-adlawng kalihokan, basin naa tay kahigayonan nga mapatin-aw kanila kon nganong lahi ta. Ingong resulta, ang sinserong mga tawo mapalihok nga makigsuod sa atong Diyos. Dihang dayegon nato si Jehova niining mga paagiha, mapalipay nato ang iyang kasingkasing.—1 Tim. 2:​3, 4.

MAPALIPAY NATO SI JESUS DIHANG DAYEGON NATO ANG NGALAN NI JEHOVA

8. Sa unsang paagi nanguna si Jesus sa pagdayeg sa ngalan ni Jehova?

⁸ Sa tanang intelihenteng linalang sa langit ug yuta, wala nay laing nakaila pag-ayo sa Amahan gawas sa Anak. (Mat. 11:27) Gimahal ni Jesus ang iyang Amahan, ug siya ang nanguna sa pagdayeg sa ngalan ni Jehova. (Juan 14:31) Sa iyang pag-ampo ngadto sa iyang Amahan sa gabii una siya mamatay, gisumaryo niya ang iyang ministeryo dinhi sa yuta niining paagiha: “Akong gipaila kanila ang imong ngalan.” (Juan 17:26) Unsay iyang gipasabot?

9. Unsang ilustrasyon ang gihatag ni Jesus aron klarong ipakita kon unsang klaseha sa Amahan si Jehova?

⁹ Wala lang basta sultihi ni Jesus ang mga tawo nga Jehova ang ngalan sa Diyos. Ang mga Hudiyo nga gitudloan ni Jesus nahibalo na niana. Hinuon, si Jesus nanguna sa ‘pagpatin-aw Kaniya.’ (Juan 1:​17, 18) Pananglitan, gipakita sa Hebreohanong Kasulatan nga si Jehova maluluy-on ug mabination. (Ex. 34:​5-7) Pero mas gipatin-aw kana ni Jesus pinaagi sa paghatag ug ilustrasyon bahin sa milayas nga anak ug sa iyang amahan. Mabasa nato nga “samtang layo pa” ang mahinulsolong anak, nakita na siya sa iyang amahan. Midagan ang amahan aron sugaton siya, gigakos siya, ug kinasingkasing siyang gipasaylo. Kini nga ilustrasyon klarong nagpakita kon unsa ka maluluy-on ug mabination si Jehova. (Luc. 15:​11-32) Gipakita gyod ni Jesus kon unsang klaseha sa Amahan si Jehova.

10. (a) Nganong nahibalo ta nga gigamit ni Jesus ang personal nga ngalan sa iyang Amahan ug nga gusto niya nga gamiton pod na sa uban? (Marcos 5:19) (Tan-awa sab ang hulagway.) (b) Unsay gusto ni Jesus nga atong himoon karon?

¹⁰ Gusto pod ba ni Jesus nga gamiton sa uban ang personal nga ngalan sa iyang Amahan? Oo. Ang ubang panatiko nga mga lider sa relihiyon niadtong panahona lagmit nagtuo nga sagrado ra kaayo ang ngalan sa Diyos maong dili ni angayng litokon. Pero wala tugoti ni Jesus ang maong dili Kasulatanhong panghunahuna nga mopugong niya sa pagpasidungog sa ngalan sa iyang Amahan. Konsideraha kon unsay nahitabo dihang giayo niya ang tawong gidemonyohan didto sa rehiyon sa mga Gerasanhon. Ang mga  tawo nahadlok kaayo ug gihangyo nila si Jesus nga mobiya, busa wala siya magpabilin nianang lugara. (Mar. 5:​16, 17) Pero gusto ni Jesus nga mailhan sa mga tawo didto ang ngalan ni Jehova. Busa gisugo niya ang tawo nga iyang giayo nga sultihan ang uban, dili kon unsay gihimo ni Jesus para niya, kondili kon unsay gihimo ni Jehova. (Basaha ang Marcos 5:19.) a Kana poy gusto niya karon—nga atong ipaila ang ngalan sa iyang Amahan sa tibuok kalibotan! (Mat. 24:14; 28:​19, 20) Kon ato nang himoon, mapalipay nato ang atong Hari, si Jesus.

11. Unsay gitudlo ni Jesus nga iampo sa iyang mga sumusunod, ug nganong importante kini? (Ezequiel 36:23)

¹¹ Nahibalo si Jesus nga katuyoan ni Jehova nga balaanon ang Iyang ngalan, nga limpiyohan kini sa tanang pasipala. Kanay hinungdan nga gitudloan ni Jesus ang iyang mga sumusunod sa pag-ampo: “Amahan namo nga anaa sa mga langit, balaanon unta ang imong ngalan.” (Mat. 6:9) Nahibalo si Jesus nga kini ang kinadak-ang isyu nga giatubang sa tanang linalang. (Basaha ang Ezequiel 36:23.) Wala nay laing tawo o anghel ang mas dakog nahimo sa pagbalaan sa ngalan ni Jehova kay kang Jesus. Pero dihang gidakop si Jesus, unsay giakusar sa iyang mga kaaway kaniya? Iya kunong gipasipalahan ang Diyos! Seguradong gibati ni Jesus nga ang pagdaot ug pagpasipala sa balaang ngalan sa iyang Amahan mao ang pinakabug-at sa tanang sala. Nasakitan kaayo siya nga akusahan ug hukman siyang sad-an niini nga krimen. Kana tingali ang pangunang rason kon nganong “grabe kaayo ang iyang kasakit” sa mga oras una siya gidakop.—Luc. 22:​41-44.

12. Unsa ang kinadak-ang gihimo ni Jesus aron mabalaan ang ngalan sa iyang Amahan?

¹² Aron mabalaan ang ngalan sa iyang Amahan, gilahutay ni Jesus ang tanang kasakit, insulto, ug akusasyon batok kaniya. Nahibalo siya nga gisunod niya ang iyang Amahan sa tanang butang; wala siyay angayng ikaulaw. (Heb. 12:2) Nahibalo pod siya nga direkta siyang giatake ni Satanas niadtong lisod kaayo nga panahon. (Luc. 22:​2-4; 23:​33, 34) Seguradong naglaom si Satanas nga mabungkag niya ang integridad ni Jesus, pero wala gyod siya molampos! Lig-ong gipamatud-an ni Jesus nga bakakon si Satanas ug nga si Jehova naa gyoy maunongong mga alagad nga magpabiling matinumanon bisan sa pinakalisod nga mga pagsulay!

13. Sa unsang paagi mapalipay nimo ang imong nagamando na nga Hari?

 ¹³ Gusto ba nimong mapalipay ang imong nagamando na nga Hari? Kon mao, padayong dayega ang ngalan ni Jehova pinaagi sa pagtabang sa uban nga mahibaloan kon unsa siyang klaseha sa Diyos. Kon imo nang himoon, gisundog nimo ang ehemplo ni Jesus. (1 Ped. 2:21) Sama kang Jesus, mapalipay nimo ang kasingkasing ni Jehova ug imong mapamatud-an nga ang Iyang kaaway, si Satanas, bakakon gyong dako!

MAKATABANG TA NGA MALUWAS ANG MGA TAWO DIHANG DAYEGON NATO ANG NGALAN NI JEHOVA

14-15. Unsay nindot kaayong mga resulta dihang tudloan nato ang mga tawo bahin kang Jehova?

¹⁴ Dihang dayegon nato ang ngalan ni Jehova, makatabang ta nga maluwas ang mga tawo. Sa unsang paagi? Nahibalo ta nga si Satanas “nagbuta sa hunahuna sa mga dili magtutuo.” (2 Cor. 4:4) Tungod ana, nagtuo sila sa mga bakak ni Satanas sama sa: ang Diyos wala maglungtad, ang Diyos layo ug walay pagpakabana sa mga tawo, ang Diyos pintas ug ginasakit niya ang mga daotan hangtod sa hangtod. Gisulti ni Satanas kini nga mga bakak kay gusto niyang daoton ang ngalan ug reputasyon ni Jehova, aron ang mga tawo dili makigsuod kang Jehova. Pero tungod sa atong buluhatong pagsangyaw, wala magmalamposon ang katuyoan ni Satanas. Gitudloan nato ang mga tawo sa kamatuoran bahin sa atong Amahan ug gidayeg ang balaang ngalan sa atong Diyos. Unsay resulta niana?

¹⁵ Ang mga kamatuoran sa Pulong sa Diyos gamhanan kaayo. Pinaagi sa pagtudlo sa mga tawo bahin kang Jehova ug kon unsa siyang klaseha sa Diyos, makita nato ang nindot kaayong mga resulta. Mapahigawas sila sa mga bakak ni Satanas ug makita nila ang nindot kaayong mga hiyas sa atong Amahan. Mahingangha kaayo sila sa iyang walay kinutobang gahom. (Isa. 40:26) Makakat-on sila sa pagsalig kaniya tungod sa iyang hingpit nga hustisya. (Deut. 32:4) Makabenepisyo sila sa iyang dakong kaalam. (Isa. 55:9; Roma 11:33) Ug mahupayan sila sa pagkahibalo nga siya ang personipikasyon sa gugma. (1 Juan 4:8) Samtang makigsuod sila kang Jehova, ang ilang paglaom nga mabuhi sa walay kataposan ingong iyang mga anak mahimong segurado. Pagkadakong pribilehiyo nga makatabang ta sa mga tawo nga masuod sa  ilang Amahan! Dihang ato nang himoon, isipon ta ni Jehova ingong iyang mga “isigkamagbubuhat.”—1 Cor. 3:​5, 9.

16. Unsay epekto sa uban dihang nahibaloan nila ang ngalan sa Diyos? Paghatag ug mga pananglitan.

¹⁶ Sa sinugdan, puwede una natong tudloan ang mga tawo nga Jehova ang ngalan sa Diyos. Kana pa lang dako nag epekto sa mga tawo nga sinserog kasingkasing. Pananglitan, ang batan-ong babaye nga si Aaliyah b nagdako sa dili Kristohanon nga pamilya. Pero gibati niya nga ang iyang relihiyon wala makapasuod niya sa Diyos. Nausab na dihang nagpa-Bible study siya sa mga Saksi. Nakita niya nga puwede niyang mahimong Higala ang Diyos. Ug nakurat siya dihang nahibaloan niya nga ang ngalan sa Diyos gitangtang diha sa daghang Bibliya ug gipulihan rag mga titulo, sama sa Ginoo. Ang pagkahibalo sa ngalan ni Jehova nakapausab gyod sa iyang kinabuhi. Siya miingon: “Ang akong best Friend naay ngalan!” Unsay resulta? “Malinawon na kaayo ang akong kasingkasing karon. Gibati nako nga dako kaayong pribilehiyo nga mailhan ang Diyos,” siya miingon. Ang musikero nga si Steve nagdako sa debotado kaayo nga Hudiyong pamilya. Wala siya moapil sa bisan unsang relihiyon kay daghan siyag nakitang pagkasalingkapaw. Pero dihang naguol kaayo siya sa pagkamatay sa iyang mama, misugot siya nga moapil sa Bible study nga ginahimo sa usa sa mga Saksi ni Jehova. Natandog kaayo siya dihang nahibaloan niya ang ngalan sa Diyos. Siya miingon: “Karon pa gyod ko nakabalo sa ngalan sa Diyos.” Siya midugang: “Sa unang higayon, nasabtan nako nga tinuod gyod ang Diyos! Tinuod siya nga Persona. Niadtong higayona mismo, nakaingon ko nga nakakita kog Higala.”

17. Nganong determinado ka nga padayong dayegon ang ngalan ni Jehova? (Tan-awa sab ang hulagway.)

¹⁷ Sa imong pagsangyaw ug pagpanudlo, imo bang ginasulti sa uban ang sagradong ngalan ni Jehova? Ginatabangan ba nimo silang makita kon unsa siyang klaseha sa Diyos? Pinaagi ana, imong gidayeg ang ngalan sa Diyos. Hinaot padayon nimong dayegon ang balaang ngalan ni Jehova pinaagi sa pagtabang sa mga tawo nga mahibaloan ang iyang nindot kaayong personalidad. Nianang paagiha, makatabang ka nga maluwas ang uban. Mapakita pod nimo nga nagpasakop ka sa pagpanguna sa imong Hari, si Kristo Jesus. Ug labaw sa tanan, mapalipay nimo ang imong mahigugmaong Amahan, si Jehova. Hinaot nga ‘dayegon nimo ang iyang ngalan hangtod sa kahangtoran’!—Sal. 145:2.