1-2. Ni enki ekiri kubasa kutukwasa kushoborocerwa oku Yehova ari kwehurira izina ryeye ryajumwa?

 TECEREZA omuntu owu ori kufaho yakugambaho ekintu kibi. Iwe nomanya ku kiri ekishuba; konka abantu bamwe bakikiriza. Ekiri kushasha, na bo batandika kujanjaza eco kishuba kandi n’abandi bantu bingi bakikiriza. Nobasa kwehurira ota? Wafa aha bi abantu bakugambaho n’aha ku bashisha izina ryawe rirungi, nibibasa kutuma wakizaho kushasha munonga.—Emi 22:1.

² Eco cokureberaho, nikibasa kutukwasa kwehuriza oku Yehova yeyehurire obu izina ryeye ryajumirwe. Omwe omuri ba marayika beye, akamubeherera aha mukazi w’okubanza ari we Eva. Eva akikiriza eco kishuba. Eco kishuba kikatuma abazire bitu b’okubanza bagomera Yehova. Eco kikatuma abantu bona bahinduka abasisi kandi bahikwaho n’orufu. (Kut 3:1-6; Rom 5:12) Ebizibu byona ebi turi kubona omu nsi, harimu orufu, entaro, n’okubonabona, bikabaho ahabw’ekishuba eki sitane yatandikisize omu musiri gwa Edeni. Mbehi Yehova nashasha ahabw’eco kishuba n’ahabw’ebizibu ebyarugiremu? Yego mazima. Konka Yehova tararengeserize kugira ekiniga kandi tarabikire enzika. Mazima, akagumizamu kuba ‘Ruhanga oyine okushemererwa.’—1 Tim 1:11.

3. Ni guha mugisha ogu twine?

³ Twine omugisha g’okwekwatanisa omu kweza izina rya Yehova, turi korobera ekiragiro ekiri kugira ngu: ‘Muhimbise izina rya Yehova.’ (Zab 113:1) Nituhimbisa izina rya Yehova twagambira abandi amazima agari kumukwataho. Mbehi n’iwe nohimbisa izina rya Yehova? Twaza kushwijuma enshonga ishatu nkuru, ezirije kutukwasa kuhimbisa izina rya Yehova n’omutima gwitu gona.

 NITUSHEMEZA YEHOVA TWAHIMBISA IZINA RYEYE

4. Ahabw’enki Yehova ari kushemererwa twahimbisa izina ryeye? Gamba ecokureberaho. (Nambwenu reba ekishushani.)

⁴ Nitushemeza Tata witu w’omu iguru twahimbisa izina ryeye. (Zab 119:108) Mbehi eco nikimanyisa ku Ruhanga Wobushoborozi bwona, ari nk’abantu abatahikirire abari kuba nibenda kuhimbisibwa kugira ngu bibagaruremu amani? Ingaha mazima. Reba ecokureberaho. Akana k’akahara kafumbata ishe, rero kamugambira ngu: “N’iwe Tata ori kukira abandi bona omu nsi yona!” Ishe yamwenya kandi yashemererwa munonga. Ahabw’enki? Mbehi nitubasa kugamba ku ogo muzire yaba ari kwetenga kugarurwamu amani n’okuhimbisibwa na muhara weye? Ingaha mazima. Ahobwe ni oku ari kushemererwa muhara weye yamwereka ku ari kumukunda kandi ku ari kumusima. Namanya ku eyo mitwarize erije kutuma ogo muhara yakura ari omuntu murungi kandi oyine okushemererwa. Omu buryo nk’obwe, Yehova, Tata Rukirabona, nashemererwa twamuhimbisa.

5. Ni kiha kishuba eki turi kuba twahakanisa twahimbisa Yehova?

⁵ Ku turi kuhimbisa Tata w’omu iguru, nituba turi kwekwatanisa omu kwereka ku ekishuba eki Sitane yagambire aha bantu kitahikire. Sitane akagamba ku hatine omuntu ori kubasa kurwanirira izina rya Yehova omu bwesigwa. Akagamba ku hatine omuntu n’omwe ori kubasa kugumizamu kurwanirira izina rya Ruhanga yagezibwa. Nambwenu akagamba ku twena turi kubasa kureka kukorera Yehova, yaba ari byo ebirije kutushemeza. (Yob 1:9-11; 2:4) Konka Yobu owabire ari omwesigwa, akereka ku Sitane ari omunyabishuba. Mbehi n’iwe noyija kugumizamu kuba omwesigwa ahari Yehova? Buri omwe omuri itwe nabasa kurwanirira izina rya Tata kandi atuma yashemererwa ari kugumizamu kuba omwesigwa. (Emi 27:11) Mazima ni omugisha kukikora tusyo.

6. Ni bata oku turi kubasa kutoreza Omugabe Dawudi n’abalevi? (Nehemiya 9:5)

⁶ Rukundo eyi abantu binire Ruhanga, ni yo eri kutuma bahimbisa izina ryeye n’amagara geye gona. Omugabe Dawudi akahandika ati: ‘Singiza Yehova, iwe magara gange! Na byona ebiri omuri inye bisingize izina ryeye eriri kwera.’ (Zab 103:1) Dawudi akaba ari kumanya ge ku okuhimbisa izina rya Yehova kiri kumanyisa okuhimbisa Yehova. Izina rya Yehova niritwariramu ekitinisa ceye, obwe rero niritwijusa emitwarize yeye mirungi n’ebintu ebiri kutangaza ebi yakozire. Dawudi akaba ari kureba ku izina ry’Ishe w’omu iguru riri eriri kwera kandi akaba narihimbisa. Akaba  nayenda kukikora ‘omuri byona ebi yabire ayine’ ni okugamba okukikora n’omutima gweye gona. Ni co kimwe, Abalevi na bo bakaba nibaba ab’okubanza omu kuhimbisa Yehova. Bakecureza bagamba ku ebigambo byabo byabire bitari kubasa kwereka omu bwijwire oku izina rya Yehova rishemerire kuhimbisibwa. (Shoma omuri Nehemiya 9:5.) Hatariho okubanganisa, okwecureza nk’oko okurugire aha mutima n’okuhimbisa, kukatuma Yehova yashemererwa.

7. Ni bata oku turi kubasa kuhimbisa Yehova omu murimo g’okuburira n’omu mbera zitu za burijo?

⁷ Omuri obu bwire, nitubasa kuhimbisa Yehova birabire omu kumugambaho ge, kumusima n’okumukunda. Twaba turi omu murimo g’okuburira, entego yitu eshemerire kuba ey’okukwasa abandi kuba banywani ba Yehova kandi tubakwasa kureba Tata w’omu iguru nk’oku turi kumureba. (Yak 4:8) Nikishemeza kwereka abantu oku Bibuli eri kushoborora Yehova, ekereka rukundo yeye, oburinganiza bweye, obwenge bweye, amani geye n’endijo mitwarize yeye. Nambwenu, nituhimbisa Yehova kandi tumusima turi kukora cona eki turi kubasa kugira ngu tumutoreze. (Efe 5:1) Eco twakikora, abantu nibija kugumizamu kwetegereza entanisa eri ahagati yitu n’abantu babi abari omuri eyi nsi. (Mat 5:14-16) Twaba twine ebi turi kukorana na bo nitwija kutunga oburyo bw’okubashobororera enshonga turi kubikora tusyo. Eco nikija kutuma abantu abine emitima mirungi bahika hihi ya Ruhanga witu. Twahimbisa Yehova omuri obwo buryo nikija kushemeza omutima gweye.—1 Tim 2:3, 4.

KU TURI KUSHEMEZA YESU NITUBA TURI KUHIMBISA IZINA RYA YEHOVA

8. Ni bata oku Yesu yabire ow’okubanza omu kuhimbisa izina rya Yehova?

⁸ Omu byahangirwe byona ebyine obwenge by’omu iguru n’omu nsi, tihine n’omwe ori kumanya Tata w’omu iguru kukira omwana weye Yesu. (Mat 11:27) Yesu nakunda Ishe kandi ni we owabire ow’okubanza omu kuhimbisa izina rya Yehova. (Yoh 14:31) Omu shara eyi yagambire Ishe omu kiro ecabandirize okufa kweye, akagamba omu bugufi omurimo ogu yakozire ari kugira ati: ‘Nkabamanyisa izina ryawe.’ (Yoh 17:26) Ni enki eki yabire ari kwenda kumanyisa?

9. Ni kiha cokureberaho eki Yesu yakoresize ekiri kushoborora Ishe omu buryo obuhikire?

⁹ Yesu akakora byingi ebirengire aha kugambira abantu ku izina rya Ruhanga ari Yehova. Abayudaya b’omu bwire bwa Yesu bakaba bari kutecereza ku babire bari kumanya izina rya Ruhanga. Konka Yesu ni we owabire ow’okubanza ‘omu kuribamanyisa.’ (Yoh 1:17, 18) Ecokureberaho: Ebyahandikirwe by’Oruheburayo nibyereka ku Yehova ayine esaasi nyingi n’embabazi nyingi. (Kur 34:5-7) Yesu akereka ku ebyo biri amazima ari kukoresa ecokureberaho c’omwana w’ekirara n’ishe. Twashoma oku ishe w’ogo mwana owabire oyehanire yayizire kumuhobera no kumwakira obu yabire acari hare yeye, kandi akamusasira abyihire aha mutima, nibitwereka ge oku Yehova ayine esaasi n’embabazi. (Luk 15:11-32) Mazima, Yesu akereka oku Ishe ari omu buryo obuhikire.

10. (a) Ni enki ekiri kutuhanmiza ku Yesu yakoresize izina ry’Ishe kandi ku yabire ari kwenda ngu n’abandi barikorese? (Nambwenu reba ekishushani.) (Mar 5:19) (b) Ni enki eki Yesu ari kwenda ngu tukore omuri obu bwire?

¹⁰ Mbehi Yesu akaba ari kwenda ngu n’abandi bakorese izina ry’Ishe? Yego mazima. Ababembezi bamwe b’omuri obwo bwire nibabasa kuba babire bari kutecereza ku okukoresa izina rya Ruhanga biri kwereka ku tutari kumuha ekitinisa, konka Yesu tarikirize ngu eyo migenzo etari omu Byahandikirwe emuzibire kukoresa izina ry’Ishe. Tecereza obu yakirize omushija  owabire ayine ba dayimoni omu tawuni ya Geresene. Abantu bakatina munonga, bashaba Yesu kuruga omuri ako kacweka; obwe rero akaba atashemerire kuhaguma. (Mar 5:16, 17) Konka nabwo, Yesu akaba ari kwenda ngu izina rya Yehova rimanywe n’omuri ako kacweka. Obwe rero akaragira ogo mushija owu yabire yamara kukiza kutagambira abantu ebi Yesu yamukorera, ahobwe akabagambira ebi Yehova yamukorera. (Shoma omuri Mariko 5:19.) a Eco ni co eki Yesu ari kwenda n’omuri obu bwire, nayenda ngu izina ry’Ishe rimanywe omu nsi yona! (Mat 24:14; 28:19, 20) Eco twakikora nikishemeza omugabe witu Yesu.

11. Ni enki eki Yesu yayegesize abakurasi beye kushaba, kandi shi ahabw’enki kiri ec’omugasho? (Ezekiyeli 36:23)

¹¹ Yesu akaba namanya ku ekigenderwa ca Yehova, ari okweza izina ryeye, akaryihaho ebijumo byona. Eyo ni yo nshonga Omwegesa mukuru yayegesize abakurasi beye ngu bashabe ngu: ‘Tata w’omu iguru, izina ryawe ryezibwe.’ (Mat 6:9) Yesu akaba namanya ku okuhimbisa izina rya Yehova ari co kintu c’omugasho aha byahangirwe byona. (Shoma omuri Ezekiyeli 36:23.) Omu byahangirwe byona ebyine obwenge eby’omu iguru n’omu nsi, tihine owayerize izina rya Yehova kukira Yesu. Konka, obu abangi ba Yesu bamukwasire, bakamutaho orubanja, bamubeherera ku ari kujuma Ishe. Mazima eco kikaba kiri ekishuba! Yesu akaba ari kumanya ku okukoresa izina ry’Ishe omu buryo obutahikire cabire kiri ekibi c’amani. Kikamushasha munonga, kuhurira bari kumucwera orubanja, rw’oku yakozire ekibi nk’eco. Eyo nebasa kuba ari yo nshonga nkuru eyatumire Yesu yashasha munonga omu mashaha agu yabire ari hihi kufa.—Luk 22:41-44.

12. Ni bata oku Yesu yayerize izina ry’Ishe omu buryo oburi kubasika bwona?

¹² Kugira ngu Yesu ayeze izina ry’Ishe, akehanganira ebibi byingi ebyamuhikireho nk’okubonabona, okujumwa, n’ebishuba. Akaba ari kumanya ku yayorobire Ishe omu bintu byona. Eyo ni yo nshonga eyatumire atayitwa enshoni. (Heb 12:2) Nambwenu akaba ari kumanya ku Sitane yabire ari kumugeza ebigezo ebigumire omuri obwo bwire obugumire. (Luk 22:2-4; 23:33, 34) Sitane akaba ari kumanya ku yabire arije kutuma Yesu  atagumizamu kuba omwesigwa. Konka, tihine eki yahikireho! Yesu akereka ku Sitane ari omubihi kandi yayereka ku Yehova ayine abahereza b’abesigwa, abari kugumizamu kurinda obwesigwa bwabo n’obu bakuba bari omu bigezo bigumire!

13. Ni bata oku ori kubasa kushemeza Omugabe wawe ori kutegeka?

¹³ Mbehi noyenda kushemeza Omugabe wawe? Gumizamu kuhimbisa izina rya Yehova kandi okwase abandi kumanya emitwarize mirungi ya Ruhanga. Eco wakikora noyija kuba ori kutoreza Yehova. (1 Pet 2:21) Kimwe na Yesu, noyija kutuma Yehova yashemererwa kandi oyereke ku Sitane ari omunyabishuba!

TWAHIMBISA IZINA RYA YEHOVA NITUKWASA ABANDI KUKIZA AMAGARA GABO

14-15. Ni biha bintu ebiri kutanganza ebi turi kubasa kuhikaho twayegesa abantu ebiri kukwata ahari Yehova?

¹⁴ Twahimbisa izina rya Yehova nitukwasa abandi kukiza amagara gabo. Bata shi? Sitane ‘akahumya emitima y’abatari kwikiriza.’ (2 Kor 4:4) Eco nikituma bayikiriza ebishuba bya Sitane nk’ebi ebiri kugira ngu: Ruhanga tabagaho, Ruhanga ari hare yitu kandi tari kufa aha bantu, Ruhanga ni omugome kandi nabonabonesa abari kukora ebibi ebiro byona. Sitane nagamba ebyo bishuba byona, ahakuba ari kwenda kushisha izina rya Ruhanga rirungi n’okuzibira abantu kuba banywani ba Ruhanga. Konka ku turi kukora omurimo g’okubirira, nituzibira Sitane kuhika aha ntego yeye. Nitwegesa abantu amazima agari kukwata ahari Tata kandi tuhimbisa izina ryeye eriri kwera. Ni enki ekiri kurugamu?

¹⁵ Amazima g’omu Kigambo ca Ruhanga gine amani mingi. Ku turi kwegesa abantu ebiri kukwata ahari Yehova kandi tukabashobororera owu ari we, nitwerebera ebirungi ebiri kurugamu. Abantu nibareka kugendera omu bishuba bya Sitane, kandi batandika kwerebera oku Tata w’omu iguru ari kubakunda nk’oku n’itwe turi kubireba. Nibamanya ku ayine amani agatine obugarukiro. (Isa 40:26) Nibamwesiga ahakuba ayine oburinganiza. (Bir 32:4) Nibamanya ebintu byingi ebiri kukwata aha bwenge bweye bwingi. (Isa 55:9; Rom 11:33) Kandi nikibahumuriza kumanya ku Yehova ari Ruhanga oyine rukundo. (1 Yoh 4:8) Ku bari kugumizamu kumuhika hihi, amasiko agu bine g’okuba abana beye ebiro  byona nigahama. Mazima twine omugisha gw’amani g’okukwasa abantu kuba banywani ba Ruhanga! Eco ku turi kukikora Yehova natureba ‘nk’abakozi abari kukorana na we.’—1 Kor 3:5, 9.

16. Ni bata oku abamwe bagasirwe n’okumanya izina rya Ruhanga? Gamba ecokureberaho.

¹⁶ Aha murundi g’okubanza, nitubasa kwegesa abantu ku izina rya Ruhanga ari Yehova. Eco nikibasa kutuma abantu abine emitima mirungi bahinduka. Ecokureberaho: Omuhara ori kwetwa Aaliyah b akakurira omu ka etari kwikiriza Yesu. Konka akaba nahurira atamazirwe n’ebi edini ryeye ryabire riri kwegesa kandi ahurira atari munywani wa Ruhanga. Ebyo bikahinduka obu yatandikire kwega Bibuli n’Abahamya. Akatandika kureba Ruhanga nka munywani weye. Kikamutangaza kumanya ku izina rya Ruhanga baryihire omuri za Bibuli nyingi bakarisimbuza amazina g’ekitinisa nka Mukama. Okumanya izina rya Yehova kikahindura amagara geye. Akatangara ati: “Munywani wange ori kukira abandi bona, ayine izina!” Ni enki ecarugiremo? Akagamba ati: “Hati nyine obusinge bwingi omu mutima. Hati nimpurira nyine ekitinisa.” Omushija ori kwetwa Steve owabire ari omunyamuziki akakukira omu dini ry’Abayudaya. Aketanisa n’eryo dini ahabw’okuba ryabire ryine ebishuba byingi. Konka nyina ku yamazire kufa, akikiriza kwekwatanisa n’omuntu owabire ari kwegesibwa Bibuli n’Omuhamya wa Yehova. Akagamba ati: Nkesimira munonga kumanya izina rya Ruhanga. Akongeraho ati: “Aha murundi g’okubanza nkashoborocerwa ku Ruhanga ari owa buzima, kandi natandika kumureba nk’omuntu oriho. Obwo bwire nkamanya ku yaba munywani wange.”

17. Ahabw’enki wamarira kugumizamu kuhimbisa izina rya Yehova? (Nambwenu reba ekishushani.)

¹⁷ Mbehi waba ori omu murimo g’okubirira n’okwegesa nogambira abantu izina rya Yehova eriri kwera? Mbehi nobakwasa kureba ku Ruhanga ari owa buzima. Wakikora basoya, noba ori kuhimbisa izina rya Ruhanga. Nimureke tugumizemu kuhimbisa izina rya Ruhanga eriri kwera, turi kukwasa abantu kumanya Mukama w’eryo zina owu ari we. Eco twakikora nitwija kurokora amagara gitu n’ag’abandi. Nitwija kukuratira omwebembezi witu ari we Yesu Kristo. Kandi ekiri kukira byona nitwija kuhimbisa Tata ori kutukunda, ari we Yehova. Nimureke ‘tuhimbise izina ryeye ebiro byona’!—Zab 145:2.