1-2. A min thangchiat a sinak kong he aa tlaiin Jehovah nih zeitindah a intuar ti hngalhthiam awkah zeinihdah a kan bawmh khawh?

 MAH hi na mitthlam ah cuanter hmanh: Na dawtmi pakhat nih na kong he aa tlaiin a ṭhatlonak lei in a chim. Mah cu lihbia a si ti na hngalh ko nain mi cheukhat nih cun an zumh. Mah nakin a poi deuhmi cu mah mi hna nih an chim chin lengmang caah a dang mi tampi zong nih an zumh ve. Mah tikah zeitindah na um? Min chiat a duh lomi le midang zong hlenmi si hna hlah seh ti a duhmi na si ahcun mah lihbia ruang ah na ngaih a chia ko lai.—Ptb. 22:1.

² Mah tahchunhnak nih a min thangchiat a si lioah Jehovah cu zeitindah a um lai ti kha hngalhthiam awkah a kan bawmh. A vancungmi pakhat nih a hmasa bik minu Evi sinah a kong he aa tlaiin lihbia a chim. Evi nih mah lihbia kha a zumh. Mah lihbia ruang ah Adam le Evi nih Jehovah kha an ralchanh. Cucaah kan dihlak in sualnak le thihnak sal kan hung si. (Gen. 3:1-6; Rom 5:12) Thihnak, raltuknak le sifah harnak ti bantuk vawleicung ah kan hmuhmi buaibainak vialte cu Satan nih Eden dum ah a chim hmasa bikmi lihbia ruang ah a si. Cu bantuk lihbia ruang ah a chuakmi harnak ruang ah Jehovah cu a lung a fak maw? A fak tuk lai ti cu a fiang ko. Asinain Jehovah cu thinhung le lungfah in a um lo. Mah can ah Pathian cu ‘aa lawmmi’ Pathian a si peng.—1 Tim. 1:11, NWT.

3. Zei tinvo sung dah kan ngeih?

³ Jehovah min thangchiat a sinak tawnghtham awkah bawmh khawhnak tinvo sung kan ngei. Mah cu “BAWIPA [Jehovah] min cu thangṭhat u” timi nawlbia kan zulhnak thawng in a si. (Salm 113:1) A kong he aa tlaimi biatak kan chimnak  thawng in Jehovah min kha kan thangṭhat khawh. Nangtah cutin thangṭhat na duh maw? Lungthin tak tein Pathian min thangṭhat awkah a kan bawm khomi a kong pathum kha i ruah hna u sih.

A Min Kan Thangṭhat Tikah Jehovah Lung Kan Lawmhter

4. Kan thangṭhat tikah Jehovah cu zeicah aa lawmh? Tahchunhnak pe. (Hmanthlak zong zoh.)

⁴ A min kan thangṭhat tikah vancung kan Pa cu aa lawm. (Salm 119:108) Asinain mah cu an fak tikah thazaang a ngei i aa lungsimi mitling lo minung bantuk a si tinak a si maw? A si lo. Mah tahchunhnak hi ruathmanh. Ngakchianu pakhat cu a pa sinah a tli, a kuh i “vawleicung pa vialte lak ah a ṭha bik na si” tiah a ti. A pa cu a ni i aa nuam tuk. Zeicah? A fanu sinin thapeknak le thangṭhatnak a herh caah a si maw? A si lo. A fanu nih a dawt i a cung ah aa lawmhnak a langhter caah aa nuamhmi a si. Dawt le lawmh a hmangmi a si caah a upat tik zong ah lawmh a hmangmi a si lai ti kha a hngalh. A lianngan bikmi kan Pa Jehovah aa nuamhmi zong cu bantuk a ruang hna ruang ah a si.

5. Jehovah min kan thangṭhat tikah zei a hmaan lomi lihbia dah kan langhter khawh?

⁵ Vancung kan Pa kan thangṭhat tikah pakhat cio kan kong he aa tlaiin Satan nih sual a kan puhmi a dang lihbia pakhat langhter awkah kan bawmhmi a si. Ahohmanh nih Pathian min an kilveng lai lo tiah Satan nih a ti. Hneksaknak an ton ahcun ahohmanh Pathian cung ah zumhfek tein a um zungzalmi an um lai lo tiah a ti. Anmah ṭhatnak ca a si ahcun Pathian kha an ralchanh ko lai tiah sual a kan puh. (Job 1:9-11; 2:4) Asinain zumhfekmi Job nih Satan cu mi lihchim a si kha a langhter. Nangtah zeitin? Kan dihlak in a cung ah zumhfek tein kan umnak thawng in kan Pa min kilven awk le a lunglawmhter awkah tinvo sung kan ngei. (Ptb. 27:11) Mah cu tinvo sung taktak a si.

6. Siangpahrang David le Levi mi hna kha zeitindah kan i zohchunh khawh hna? (Nehemiah 9:5)

⁶ Jehovah a dawmi hna nih a min kha an lungthin dihlak in an thangṭhat. Siangpahrang David nih hitin a ti: “Maw ka nunnak, BAWIPA cu thangṭhat tuah! Ka sining vialte, a min thiang cu thangṭhat tuah u!” (Salm 103:1) David nih Jehovah min thangṭhat cu Jehovah kan thangṭhatmi a si ti kha a hngalh. Jehovah timi min kan theih tikah zei bantuk Pathian dah a si, zei sining dah a ngeih i zei khuaruahhar thil hna dah a tuah ti kha kan hun ruah. David nih a Pa min kha a thiangmi in a hmuh i thangṭhat a duh. A “sining vialte” le a  lungthin dihlak in thangṭhat a duh. Cu bantuk in Levi mi hna zong nih Jehovah kha an thangṭhat. Jehovah min thiang kha aa tlakmi ning in an kaa in tling tein kan thangṭhat kho lai lo ti kha toidor tein an cohlan. (Nehemiah 9:5 rel.) Cu bantuk toidornak le lungthin tak tein Jehovah an thangṭhatmi nih Jehovah lung a lawmhter lai ti cu a fiang ko.

7. Phungchimnak le nifatin kan nunnak ah Jehovah kha zeitindah kan thangṭhat khawh?

⁷ Tuchan zong ah Jehovah kan dawtnak le a cung ah kan i lawmhnak kong kan chimnak thawng in Jehovah kha kan thangṭhat khawh. Phung kan chim tikah kan hmuitinh cu mi nih Jehovah he an i naih nakhnga le dawtnak a ngeimi kan Pa kong he aa tlaiin kanmah bantuk in an ruah ve nakhnga bawmh kha a si. (Jeim 4:8) Cucaah Jehovah dawtnak, dinnak, ṭhawnnak le a dang a ṭha tukmi a sining hna Baibal ah zeitindah a langhter ti kha mi sinah lungtho tein kan hmuhsak hna. Kan si khawh chung in amah kan i zohchunhnak thawng in Jehovah kha kan thangṭhat i a lung kan lawmhter. (Efe. 5:1) Cutin kan tuah ahcun mi nih hi vawlei ṭha lo i mi pawl he kan i thleidan kha an hmuh lai i a ruang kha hngalh an hun duh lai. (Matt. 5:14-16) Cun kan i pehtlaihmi hna sinah cutin kan tuahnak a ruang kha kan chimh khawh hna. A phichuak cu lungthin ṭha a ngeimi hna kha Pathian sinah a hnuh hna lai. Mah lam hna in kan thangṭhat tikah Jehovah cu aa lawm.—1 Tim. 2:3, 4.

Jehovah Min Kan Thangṭhat Tikah Jesuh Lung Kan Lawmhter

8. Jehovah min thangṭhatnak ah Jesuh cu zeicah zohchunhawk ṭha bik a si?

⁸ Vancung le vawleicung ah Jesuh tluk in Jehovah kong a hngalmi ahohmanh an um lo. (Matt. 11:27) Jesuh nih a Pa kha a dawt i Jehovah min thangṭhatnak ah zohchunhawk ṭha a chiah. (Johan 14:31) A thih lai zan i a Pa sin thla a cam lioah a tuahmi a biapi tukmi kong kha a langhter. Hitin a ti: “Nangmah [min] kong cu annih kha ka hngalhter hna.” (Johan 17:26) Zeidah a chim duhmi a si?

9. Jesuh nih a Pa kong fiang tein langhter awkah zei bianabia dah a hman?

⁹ Jesuh nih Pathian min cu Jehovah a si ti lawng kha a chim lo. Jesuh nih a cawnpiakmi Judah mi pawl nih Pathian min kha an rak theih cang. Asinain Jesuh nih “Pathian [kong] cu mi kha a hngalhter” hna. (Johan 1:17, 18) Tahchunhnak ah, Hebru Baibal ah Jehovah cu zaangfahnak le zawnruahnak a ngeimi a si tiah a ti. (Ex. 34:5-7) Mah cu a hmaan ti kha Jesuh nih fapa tlau le a pa kong bianabia hmang in fiang tein a langhter. Aa ngaichihmi a fapa a rak kir ṭhanmi kha a pa nih ‘lamhlatpi in a hmuh’ tikah a va tli, a kuh i lungtak tein a ngaihthiam timi kong kan rel tikah Jehovah cu zaangfahnak le zawnruahnak a ngeimi a si ti kha fiang tein kan hngalhthiam khawh. (Luka 15:11-32) Jesuh nih a Pa cu zei bantuk Pathian dah a si taktak ti kha a langhter.

10. (a) Jesuh nih a Pa min kha a hman i midang zong nih hmang ve hna seh ti a duh kha zeitindah kan hngalh khawh? (Marka 5:19) (Hmanthlak zong zoh.) (b) Tuchan ah tah Jesuh nih zeidah tuah hna seh ti a kan duh?

¹⁰ Jesuh nih midang nih a Pa min kha hmang hna seh ti a duh maw? A duh tuk. Judah biaknaklei hruaitu cheukhat nih Pathian min chim cu upatnak ngeih lo a si tiah an rak ruah. Asinain Jesuh nih cu bantuk phunglam ruang ah a Pa min kha thangṭhat loin a um lo. Geresin ram i khuavang a ngeimi pa a damter lio kong kha ruathmanh. Mi nih an ṭih tuk caah Jesuh kha mah hmun in chuah awkah an nawl i Jesuh cu a chuak. (Mar. 5:16, 17) Asinain Jesuh nih mah hmun ah a ummi hna kha  Jehovah min hngalhter a duh hna. Cucaah mah mipa kha midang sinah a damter ning kong he aa tlaiin Jesuh tuahmi ti si loin Jehovah tuahmi a si tiah chim awkah a fial. (Marka 5:19 rel.) a Tuchan zong ah Jesuh nih a Pa min kha vawleicung ah a ummi mi kip sinah hngalhter hna seh ti a kan duh. (Matt. 24:14; 28:19, 20) Cutin kan tuah tikah kan Siangpahrang Jesuh lung kha kan lawmhter.

11. Jesuh nih a zultu pawl kha zeitindah thlacam awkah a cawnpiak hna, mah cu zeicah a biapit? (Ezekiel 36:23)

¹¹ Jehovah tinhnak cu a min thangchiat a sinak kong fianter awk le a kong he aa tlaimi lihbia vialte langhter awk a si ti kha Jesuh nih a hngalh. Cucaah kan Bawipa nih hitin thlacam awkah a cawnpiak hna: “Vancung khua i a um kan Pa, Na min thiang cu upat si ko seh.” (Matt. 6:9) Jesuh nih mah cu sermi thil vialte he aa pehtlaimi a biapimi kongkau a si ti kha a hngalhthiam. (Ezekiel 36:23 rel.) Van le vawleicung ah Jesuh tluk in Jehovah min thianter awkah aa zuammi ahohmanh an um lo. Asinain tlaih a si lioah a ral pawl nih zei sual dah an puh? Pathian thang a chiattu in sual an puh. Jesuh nih a Pa min thiang zei a rel lomi le a thangchiatu in sual an puhmi cu a ṭha lo bikmi sualnak in a hmuh. Cucaah cutin sual puh a si caah a lung a rawk tuk ko lai. Mah cu an tlaih hlan caan cheukhat chung a bik in “lungthin fak ngaingai in” a umnak a ruang a si.—Luka 22:41-44.

12. Jesuh nih a Pa min chiatter a sinak kha zeitindah a ṭha bikmi lam in a langhter?

¹² A Pa min thianter awkah Jesuh cu hremnak, nihsawhnak le thangchiatnak hna a tong. Asinain zei thil paoh ah a Pa nawlngaih cu ningzah awk a si lo ti kha a hngalh. (Heb. 12:2) A har bik lio caan ah Satan nih direct in a ka doh ti zong kha a hngalh. (Luka 22:2-4; 23:33, 34) Satan nih Jesuh zumhfehnak kha ka hrawh khawh lai tiah aa ruahchan nain a rak hrawk kho lo. Satan cu a ṭha lo tukmi mi lihchim a si ti le Jehovah nih a har bikmi hneksaknak an ton hmanh ah zumhfek tein a ummi salle a ngeih hna ti kha Jesuh nih a langhter.

13. Na Siangpahrang lung kha zeitindah na lawmhter khawh?

¹³ Na Siangpahrang kha a lung lawmhter na  duh maw? Jehovah min kha thangṭhat peng law Pathian i a ṭha tukmi a sining kong kha midang sinah chim hna. Cutin na tuah tikah Jesuh keneh na zulhmi a si. (1 Pet. 2:21) Jesuh bantuk in Jehovah lung kha lawmhter law a ral Satan cu mi lihchim a si ti kha langhter.

Jehovah Min Kan Thangṭhat Tikah Midang Khamhnak An Hmu

14-15. Jehovah kong kan chim tikah zei khuaruahhar thil dah kan hmuh khawh?

¹⁴ Jehovah min kan thangṭhat tikah midang nih khamhnak an hmuh nakhnga kan bawmhmi hna a si. Zeicah? Satan nih zumlotu pawl “an lungthin cu mui lak ah a chiah peng hna caah a si.” (2 Kor. 4:4) Cucaah Satan chimmi mah lihbia hna hi an hun zumh: Pathian a um lo, Pathian cu kanmah he aa hlatpi ah a um, minung kha zei ah a rel hna lo, a puarhrang tuk i miṭhalo pawl kha zungzal in a hrem hna. Mah lihbia hna i aa tinhnak cu Jehovah min chiater awk le mi nih amah kha an naih ti nakhnga lo caah a si. Asinain phung kan chim tikah Satan kha a hmuitinh a tlin nakhnga lo kan khammi a si. Kan Pa kong biatak kha midang sinah kan chim i a thiangmi a min kha kan thangṭhat. A phichuak cu zeidah a si?

¹⁵ Baibal biatak cu a ṭhawng tuk. Mi sinah Jehovah kong le zei bantuk Pathian dah a si taktak timi kong kan chimnak thawng in a ṭha tukmi khuaruahhar thil cheukhat kha kan hun hmuh. Satan ruang ah an lungthin a muimi hna cu khua an hun hmu i kan dawtmi kan Pa kha kanmah bantuk in an hun hmuh ve. Pathian i ri a ngei lomi a ṭhawnnak kha an hmuh tikah an khuaruah a har tuk. (Isa. 40:26) Pathian a dinnak kha an hun zumh. (Deut. 32:4) A fimnak in thil tampi an cawn. (Isa. 55:9; Rom 11:33) Pathian cu dawtnak a si ti an hngalh caah hnemhnak an hmu. (1 Johan 4:8) Jehovah he an i naih deuhdeuh tikah Pathian fale in zungzal nunnak kan hmu lai timi an ruahchanhnak cu a hung fek deuhdeuh ve. Vancung kan Pa he an i naih khawh nakhnga mi pawl bawmh cu tinvo sung taktak a si. Cutin kan tuah tikah Jehovah nih “hmunkhat ah rian a ṭuanṭimi” a hawile in a kan hmuh.—1 Kor. 3:5, 9.

16. Pathian min an theih tikah mi cheukhat cu zeitindah an i thlen? Tahchunhnak pe.

 ¹⁶ A hramthawk ahcun mi kha Pathian min cu Jehovah a si timi kong lawng kan cawnpiak khawh men hna lai. Asinain mah nih lungthin ṭha a ngeimi hna kha an lung a suk khawh hna. Tahchunhnak ah, Aaliyah b timi mino nu cu Khrihfa a si lomi chungkhar in a ṭhangmi a si. Asinain an biaknak ah aa lungsi lo i Pathian he kan i naih ti zong in a ruat lo. Jehovah Tehte Hna he Baibal a cawn hnu ah mah a ruahnak cu aa thleng. Pathian kha a Hawi in a hun hmuh. Baibal ah Pathian min an hlohmi le Pathian min zawn ah Bawipa ti bantuk upatnak min tampi an thlenmi a hmuh tikah a khuaruah a har. Jehovah timi min a theihmi nih a nunnak a thlenter. Khuaruahhar ngaiin hitin a ti: “Ka Hawi ṭha bik cu min a ngei.” A phichuak cu zeidah a si? Hitin a ti: “Atu cu ka lung a dai tuk cang. Mah cu tinvo sung taktak a si tiah ka ruah.” Steve timi pa cu hlanlio Judah hnulei sining in a ṭhangmi music lei ah a thiam tukmi pakhat a si. Titer a hmangmi tam tuk a hmuh hna caah zei bantuk biaknak chungtel si hmanh kha a duh ti lo. Asinain ngaihchiat awk ngai a simi thil a ton hnu ah Jehovah Tehte pakhat nih Baibal cawnpiaknak a tuahmi hna ah a ṭhu ve. Pathian min a theihmi nih a lung a suk tuk. Mah tikah hitin a ti: “Pahtian cu min a ngei ti kha ka thei bal lo. Pathian cu a um taktak ti kha a voikhatnak ka theihmi a si. Mi pakhat in ka hun hmuh i hawikom pakhat kaa hmuh tiah ka ruah.”

17. Jehovah min thangṭhat peng awkah zeicah bia na khiah? (Hmanthlak zong zoh.)

¹⁷ Phungchimnak le cawnpiaknak rian ah naa tel tikah mi pawl kha Jehovah min thiang kong na chim hna maw? Kan Pathian cu zei bantuk Pathian dah a si taktak ti hngalh awkah na bawm hna maw? Cutin na tuahnak thawng in Pathian min kha thangṭhat. Jehovah cu zei bantuk Pathian dah a si ti hngalh awkah midang kan bawmh hnanak thawng in a min thiang kha thangṭhat peng hna u sih. Cuticun mi nunnak kha na khamh khawh hna lai. Na Siangpahrang Jesuh Khrih hnu na zulhmi zong a si lai. Mah leng ah na dawtmi na Pa Jehovah lung zong na lawmhter lai. Cun ‘A min kha zungzal in na thangṭhat khawh lai.’—Salm 145:2, NWT.