1-2. Kwa ki kapab ed nou konpran lafason ki Zeova i santi konsernan son repitasyon ki’n ganny sali?

 IMAZIN sa: En dimoun ki ou kontan i dir en move keksoz lo ou. Ou konnen ki sa ki in dir lo ou i pa vre me serten dimoun i krwar sa ki i’n dir. Pli pir ankor, zot konmans repet sa ki sa dimoun in dir e lezot i krwar. Ki mannyer ou ti pou santi? Si ou kontan lezot e ou kontan pour annan en bon repitasyon, sa mansonz pou bles ou santiman.—Prov. 22:1.

² Sa legzanp i kapab ed nou konpran ki mannyer Zeova ti santi ler son repitasyon ti ganny sali. Enn son bann lanz ti dir en mansonz lo li avek sa premye madanm, Ev e Ev ti krwar sa mansonz. Sa mansonz ti fer Adan ek Ev rebel kont Zeova. Sa in fer ki bann imen i fer pese e zot mor. (Zen. 3:1-6; Rom. 5:12) Tou bann problenm ki egziste dan lemonn ozordi, parey lanmor, lager ek soufrans, i egziste akoz bann mansonz ki Satan in dir dan zarden Edenn. Eski Zeova i sagren akoz sa mansonz ek tou bann problenm ki sa mansonz in anmennen? Zeova i sagren me i pa ankoler. Anfet, Zeova pou toultan “sa Bondye ere.”—1 Tim. 1:11.

3. Ki privilez nou annan?

³ Nou annan sa privilez pour ede montre ki Satan in koz manti lo Zeova. Nou fer sa par obei sa lord ki dir: “Loue non Zeova.” (Ps. 113:1) Nou fer sa ler nou koz avek lezot lo sa Enn ki annan sa non sen. Eski ou pou loue non Zeova? Annou vwar trwa rezon enportan ki kapab motiv nou pour loue non nou Bondye avek tou nou leker.

 LER NOU LOUE NON ZEOVA, NOU FER ZEOVA PLEZIR

4. Akoz Zeova i kontan ler nou loue li? Donn en legzanp. (Vwar portre.)

⁴ Nou fer plezir nou Papa ki dan lesyel ler nou loue son non. (Ps. 119:108) Me eski sa i vedir ki sa Bondye tou pwisan i parey bann imen enparfe ki oule ki lezot i loue zot parski zot bezwen lankourazman? Non. Annou vwar en legzanp. En pti fiy i tay kot son papa, i may son papa e i dir: “Ou sa pli bon dadi dan lemonn!” Sa papa i sourir e i vreman kontan sa ki son fiy in dir. Akoz? Eski i akoz i bezwen sa lankourazman e i bezwen ki son fiy i felisit li? Non. O kontrer sa papa i kontan parski i kontan son fiy e i kontan ki son fiy pe demontre lanmour ek lapresyasyon. I konnen ki sa bann kalite pou ed son fiy vin en dimoun ki zwaye anmezir i grandi. Pareyman, Zeova i sa pli bon Papa e i kontan ler nou loue li..

5. Ler nou loue non Zeova, ki mansonz Satan nou montre ki i pa vre?

⁵ Ler nou loue nou Papa ki dan lesyel, nou ede montre ki en lot mansonz ki Satan in dir konsernan nou, pa vre. Satan i dir ki i napa en imen ki pou fidelman defann non Bondye. I dir ki napa en imen ki pou reste fidel avek Bondye ler zot ganny teste. I dir ki nou tou nou pou aret servi Bondye si nou krwar ki sa pou pli bon pour nou. (Zob 1:9-11; 2:4) Me Zob ti reste fidel avek Bondye e i ti montre ki Satan i en manter. Me ou, eski ou pou reste fidel avek Bondye? Sakenn parmi nou i annan sa privilez pour defann non nou Papa e pour fer li plezir par servi li fidelman. (Prov. 27:11) I vreman en loner pour fer sa.

6. Ki mannyer nou kapab swiv legzanp Lerwa David ek bann Levit? (Neemya 9:5)

⁶ Bann ki kontan Zeova i anvi loue son non avek tou zot leker. Lerwa David ti ekri: “Mon anvi loue Zeova, mon anvi loue son non sen avek tou mon leker.” (Ps. 103:1) David ti konpran ki ler nou pe loue non Zeova, nou pe loue Zeova li menm. Non Zeova i enkli son repitasyon. Sa i fer nou mazin son bann zoli kalite ek bann keksoz merveye ki in fer. David ti servi non son Papa dan en fason pour montre ki sa non i sen e i ti loue non son Papa. I ti anvi fer sa ‘avek tou son leker.’ Pareyman, bann Levit ti annan sa responsabilite pour ankouraz nasyon Izrael pour loue Zeova. Avek limilite, zot ti admet ki zot bann parol pa ti  pou zanmen kapab loue non Zeova parey i merite. (Lir Neemya 9:5.) Nou kapab asire ki ler zot ti annan limilite e zot ti loue Zeova avek tou zot leker, sa ti fer Zeova plezir.

7. Ki mannyer nou kapab loue Zeova dan sa travay predikasyon e dan nou lavi toulezour?

⁷ Ozordi, nou kapab fer Zeova plezir par koz lo li dan en fason ki montre ki kantite nou rekonesan anver li e ki kantite nou kontan li. Ler nou dan predikasyon, nou gard antet ki nou lobzektif prensipal i pour ed dimoun vin pli pros avek Zeova e pour ed zot vwar nou Papa ki kontan nou parey nou vwar li. (Zak 4:8) Nou kontan pour montre dimoun lafason ki Labib i dekri Zeova. Labib i koz konsernan son lanmour, lazistis, lasazes, pwisans ek son bann lezot zoli kalite. Nou osi loue Zeova e fer li plezir ler nou fer nou mye pour swiv son legzanp. (Efe. 5:1) Ler nou fer sa, lezot dimoun i kapab remarke ki nou diferan avek dimoun dan sa move lemonn e zot kapab demande akoz nou diferan. (Mat. 5:14-16) Anmezir nou enterakte avek sa bann dimoun, petet nou kapab eksplik zot kwa ki fer nou diferan. Sa i fer ki bann dimoun ki annan leker senser i anvi vin pli pros avek nou Bondye. Ler nou loue Zeova dan sa bann fason, sa i fer li kontan.—1 Tim. 2:3, 4.

LER NOU LOUE NON ZEOVA, NOU FER ZEZI PLEZIR

8. Akoz Zezi i sa pli bon legzanp konsernan loue non Zeova?

⁸ Napa personn dan lesyel e lo later ki konn Zeova pli byen ki Zezi. (Mat. 11:27) Zezi i kontan son Papa e in donn nou legzanp lo ki mannyer pour loue non Zeova. (Zan 14:31) Dan en lapriyer ki Zezi ti fer avek son Papa sa zour swar avan i mor, i ti koz lo sa ki ti’n akonpli pandan son minister lo later. I ti dir: “Mon’n fer zot konn ou non.” (Zan 17:26) Ki mannyer Zezi ti fer sa?

9. Ki legzanp Zezi ti servi pour fer nou konn son Papa pli byen?

⁹ Zezi pa ti zis dir dimoun ki non Bondye i Zeova. Bann Zwif ki Zezi ti ansennyen ti deza konn non Bondye. Me Zezi i “sa enn ki’n fer nou konn [Zeova].” (Zan 1:17, 18) Par egzanp, Lekritir Ebre i montre ki Zeova i annan pitye ek konpasyon. (Egz. 34:5-7) Zezi ti fer nou konpran sa laverite pli byen ler i ti donn sa legzanp konsernan garson perdi ek son papa. Ler nou lir konsernan sa papa ki ler i vwar son garson ki’n repantir pe vini “ankor en bon pti zistans dan semen,” i tay kot li, may li, anbras li e pardonn li, sa i fer nou konpran pli byen lafason ki Zeova i pran pitye e demontre konpasyon. (Lik 15:11-32) Zezi ti fer lezot konn sa ki son Papa i vreman ete.

10. (a) Ki mannyer nou konnen ki Zezi ti servi non son Papa e ki i ti anvi ki lezot i fer parey? (Mark 5:19) (Vwar portre.) (b) Ki Zezi i anvi nou fer ozordi?

¹⁰ Eski Zezi ti anvi ki lezot i servi non son Papa? I kapab ki serten sef relizye sa letan ti krwar ki i en mank respe pour mansyonn non Bondye. Me Zezi pa ti les sa bann tradisyon ki pa baze lo Labib anpes li onor non son Papa. Annou vwar sa resi konsernan ler Zezi ti tir demon dan en zonm dan rezyon Zerazenyen. Sa ti fer bann dimoun per e zot ti sipliy Zezi pour li ale. Alor Zezi ti kit sa rezyon. (Mark 5:16, 17) Kantmenm sa, Zezi ti anvi ki dimoun dan sa rezyon i konn non Zeova. Alor Zezi ti dir sa zonm ki in geri  al dir dimoun sa ki Zeova in fer pour li e non pa sa ki li Zezi in fer. (Lir Mark 5:19.) a Zezi i anvi ki nou fer tou dimoun dan lemonn antye konn non son Papa. (Mat. 24:14; 28:19, 20) Ler nou fer sa, nou fer nou Lerwa Zezi plezir.

11. Lo kwa ki Zezi ti ansenny son bann disip pour priye e akoz ki sa i enportan? (Ezekyel 36:23)

¹¹ Zezi ti konnen ki i lavolonte Zeova pour sanktifye Son non setadir, pour montre ki tou bann mansonz ki’n ganny dir lo Zeova pa vre. I pour sa rezon ki nou Met ti ansenny son bann disip pour priye e dir: “Nou Papa ki dan lesyel, ki ou non i ganny sanktifye.” (Mat. 6:9) Zezi ti konpran ki sa keksoz pli enportan ki bann lanz ek bann imen i merit fer, i pour sanktifye non Zeova. (Lir Ezekyel 36:23.) Napa okenn lanz oubyen imen ki’n deza sanktifye non Zeova dan sa fason ki Zezi in fer li. Ler Zezi ti ganny arete, son bann lennmi ti akiz li konmkwa in mank respe pour son Papa. Byensir Zezi ti santi ki pour sali non son Papa ki sen ti sa pese pli grav. I ti fatig Zezi en kantite ki i ti pe ganny kondannen pour sa krim. I kapab ki i sanmenm sa rezon ki Zezi ti “telman angwase” avan i ti ganny arete.—Lik 22:41-44.

12. Ki mannyer Zezi ti sanktifye non son Papa?

¹² Pour Zezi kapab sanktifye non son Papa, i ti andir tou sort kalite soufrans, lensilt ek fo lakizasyon. I ti konnen ki i’n obei son Papa dan tou keksoz e ki i ti napa nanryen pour li onte. (Ebr. 12:2) I ti osi konnen ki pandan sa bann moman difisil, Satan ti pe atak li direkteman. (Lik 22:2-4; 23:33, 34) Satan ti krwar ki i ti pou kapab fer Zezi aret fidel avek Zeova me i pa ti reisi. Zezi ti montre klerman ki Satan i en manter e ki Zeova i annan bann serviter ki reste fidel anver li menm ler zot pas dan bann sityasyon vreman difisil.

13. Ki mannyer ou kapab fer ou Lerwa ki pe dirize dan lesyel plezir?

¹³ Eski ou anvi fer ou Lerwa ki pe dirize dan lesyel plezir? Kontinyen loue non Zeova par ed lezot pour aprann  konsernan bann kalite merveye ki Bondye i annan. Ler ou fer sa, ou pe swiv legzanp Zezi. (1 Pyer 2:21) Parey Zezi, ou pe fer Zeova kontan e ou pe montre ki Son lennmi Satan i en manter.

LER NOU LOUE NON ZEOVA, NOU EDE POUR SOV LAVI LEZOT

14-15. Ki bann keksoz merveye ki kapab arive ler nou ansenny dimoun konsernan Zeova?

¹⁴ Ler nou loue non Zeova, nou ede pour sov lavi lezot. Ki mannyer nou fer sa? Parey nou konnen, Satan “in avegle lespri sa bann dimoun ki pa krwar dan Bondye.” (2 Kor. 4:4) Sa i fer ki zot in krwar dan mansonz Satan. Par egzanp, dimoun i krwar ki Bondye pa egziste, ki Bondye i lwen avek nou e i pa enterese avek bann imen, ki Bondye i kriyel e i fer bann dimoun ki fer sa ki mal soufer pour touzour. Satan in dir tou sa bann mansonz parski i anvi sali non Zeova pour ki dimoun pa anvi vin pros avek Bondye. Me ler nou anons sa bon nouvel, nou anpes Satan kontinyen fer sa. Nou ansenny dimoun laverite konsernan nou Papa e dan sa fason nou pe loue non sen nou Bondye. Ki rezilta sa i anmennen?

¹⁵ Bann laverite ki dan Parol Bondye i vreman pwisan. Ler nou ansenny dimoun konsernan Zeova ek bann zoli kalite ki i annan, nou ganny sa loportinite pour vwar en keksoz merveye. Dimoun i aret ganny anbete par bann mansonz Satan e zot konmans vwar bann zoli kalite ki nou Papa i annan. Zot enpresyonnen avek son gran pwisans. (Iza. 40:26) Zot aprann pour annan konfyans dan Bondye parski i en ziz parfe. (Det. 32:4) Zot aprann en kantite avek son gran lasazes. (Iza. 55:9; Rom. 11:33) Zot ganny rekonforte ler zot aprann ki Zeova i lanmour. (1 Zan 4:8) Anmezir ki zot vin pli pros avek Zeova, zot lespwar pour viv pour touzour konman son bann zanfan i vin pli for. I en loner pour nou ed dimoun vin pros avek zot Papa. Ler nou fer sa, Zeova i konsider nou konman bann ki “travay ansanm avek [li].”—1 Kor. 3:5, 9. 

16. Ler en dimoun i konn non Bondye, ki lefe sa i fer lo li? Donn bann legzanp.

 ¹⁶ Petet o konmansman nou ansenny dimoun ki non Bondye i Zeova. Sa i kapab ed en dimoun ki annan leker senser pour sanz son lavi. Par egzanp, en fiy ki apel Aaliyah b ti grandi dan en larelizyon ki pa Kretyen. Me i pa ti satisfe avek son larelizyon e i pa ti santi li pros avek Bondye. Me apre ki i ti konmans etidye Labib avek Temwen Zeova, sa ti sanze. I ti konmans vwar Bondye konman son Zanmi. I ti etonnen ler i ti aprann ki non Bondye in ganny tire dan en kantite Labib e ganny ranplase par bann tit parey Senyer. Ler i ti konn non Bondye, sa ti sanz son lavi. I ti dir: “Mon bon Zanmi i annan en non!” Ki rezilta sa ti anmennen? I dir: “Aprezan mon annan lape lespri. Mon santi ki i en gran loner pour mwan konn non Bondye.” En zonm ki apel Steve ti en mizisyen ki’n grandi dan en larelizyon Zwif ki vreman strik. I pa ti anvi form parti en larelizyon parski i ti’n vwar ki bann larelizyon i ipokrit. Me apre ki son manman ti mor, i ti asiste en letid Labib ki en Temwen Zeova ti pe fer. Ler i ti aprann konsernan non Bondye, sa ti tous li en kantite. I dir: “Mon pa ti zanmen konn non Bondye. Sa ti sa premye fwa ki mon ti konpran ki i annan en Bondye. Mon ti konpran ki Bondye i annan bann zoli kalite. Mon ti konnen ki mon ti’n trouv en Zanmi.”

17. Akoz ou determinen pour kontinyen loue non Zeova? (Vwar portre.)

¹⁷ Ler ou fer predikasyon, eski ou fer lezot konn non Zeova ki sakre? Eski ou fer zot konn bann kalite ki Bondye i annan? Ler ou fer sa, ou loue non Bondye. Kontinyen loue non Zeova par ed dimoun pour konn son bann zoli kalite. Dan sa fason, ou pou sov zot lavi. Ou pou swiv legzanp ou Lerwa Zezi Kri. Pli enportan ankor, ou pou fer ou Papa plezir. Kontinyen ‘loue non Zeova pour touzour e touzour’!—Ps. 145:2.