1, 2. ¿Kʼãrẽba kʼarebaseabʉ dayirãba biʼia ũrĩta Jeowa sãwũã sentibʉta iyi ʉ̃rʉ imitia bedʼeabʉdade?

 KRĨCHARA naʉ̃ta: Ẽbẽra aba bʉa mejãcha kãgabʉba bʉ ʉ̃rʉ imitia bedʼeabʉ akʉza bʉa kʼawuabʉ iya jarabʉra sewidata, mawũãsidu ʉ̃kʉrʉ ẽbẽrarãba ĩjãpanʉ maʉ̃ ʉ̃rʉ, adewara iyabaʉ bedʼeata awuru ẽbẽrarãba awurura jara ũrĩbipanʉ akʉza maʉ̃rabida ĩjãnañi maʉ̃ bedʼeara, ¿maʉ̃nera bʉra sãwũã senti? Bʉa ẽbẽrarã ʉ̃rʉ krĩchabʉbʉrʉ akʉza bʉ trʉ̃ sãwũã bia erbai ʉ̃rʉ, bʉ ʉ̃rʉ sewidata jarabʉdadera bʉra sopʉa sentiyi, ¿bʉmabida? (Prov. 22:1).

² Maʉ̃ba biʼia kʼawuabibʉ dayirãʼa, Jeowa sãwũã sentisita iyi ʉ̃rʉ imitia bedʼeasidade. Iyi angeleranebema abaʉba iyi ʉ̃rʉ sewidata jarasi Evaʼa, Evaba ĩjãsi maʉ̃ra, maʉ̃ba ãyara oda ẽ basi Jeowaba jarabʉra, adewara maʉ̃neba zesi kayiruata akʉza ẽbẽrarã beibarita (Gén. 3:​1-6; Rom. 5:12). Jõma bedʼea zromara idi ewade dayirãba ũdubʉra, beita, yõra akʉza zʉbʉriara zebʉ Diaruba ẽjũã biade sewida jaradadeba, maʉ̃ kʼarea akʉza iyi ʉ̃rʉ sewida jaradapeada kʼarea, ¿sopʉabʉka Jeowara? Mawũã. Mawũãsidu iyira so kayiruabʉ ẽ, mia kĩrʉbʉ ẽ, awuarabʉrʉ iyira sobiabʉ (1 Tim. 1:11).

3. ¿Sãwũã kʼarebaseapanʉ Jeowa trʉ̃ ʉ̃rʉ ibia bedʼeaita?

³ Dayirãbida kʼarebaseapanʉ ũdubita Diaruba Jeowa ʉ̃rʉ jaradara sewidata, maʉ̃ra oseapanʉ nama jarabʉ bedʼeata opanʉne: «Ibia bedʼeaidua Jeowa trʉ̃ ʉ̃rʉ» (Sal. 113:1). Jeowa ʉ̃rʉ ibia bedʼeapanʉ wuabemara iyi ʉ̃rʉ wãrĩnuta jara ũrĩbipanʉne, ¿bʉara oika maʉ̃ra? Akʉdaya  bedʼea ũbea dayirã kʼarebabʉta Jeowa trʉ ʉ̃rʉ soiduba ibia bedʼeaita.

JEOWATA SOBIABIPANɄ IYI TRɄ̃ Ʉ̃RɄ IBIA BEDʼEABɄDE

4. ¿Kʼãrẽa dayirã Jeowa ʉ̃rʉ ibia bedʼeabʉrʉdera sobiabʉ iyira? (Yizata jara ũrĩbira akʉza akʉra potota).

⁴ Jeowara sobiabʉ dayirãba iyi trʉ̃ ʉ̃rʉ ibia bedʼeabʉdade (Sal. 119:108). Daizezera ẽbẽra kayirua omia kĩrãkʼabʉ ẽ. Ẽbẽrarãbara ãyi ʉ̃rʉ ibia bedʼeamarẽã kãgabʉ mawũã bia sentita. Maʉ̃ ʉ̃rʉ biʼia ũrĩta krĩchadaya naʉ̃ta, wũãwũã zake abaʉba yi zezeta bʉra kʼãrãpe naʉ̃ta jarabʉ: «Naʉ̃ drʉadera bʉtrʉ abapai zeze bia». Yi zezera maʉ̃ kʼarea sobiabʉ, ¿naʉ̃ba ũdubibʉka yi zezebara nesidata yi kauba so zarea diamarẽã akʉza iyi ʉ̃rʉ ibia bedʼeamarẽã? Mawũã ẽ, awuarabʉrʉ iya maʉ̃ra obʉ yi kauta kãga baera akʉza maʉ̃ba iyaʼa biga diabʉ baera. Iyara kʼawuabʉ yi kaura mawũãra sobia warita ẽbẽra bia baera akʉza biga dia kʼawuabʉ baera. Maʉ̃ kĩrãkʼa dayirãta Jeowa ʉ̃rʉ ibia bedʼeabʉrʉdera Jeowara sobiabʉ.

5. ¿Dayirã Jeowa ʉ̃rʉ ibia bedʼeabʉrʉdera kʼãrẽta ũdubipanʉ?

⁵ Dayirã Jeowa trʉ̃ ʉ̃rʉ ibia bedʼeabʉrʉdera ũdubipanʉ Diaruaʼa iya dayirã aba abaka ʉ̃rʉ kʼãrẽ jaradara sewidata. Diaruba jarabʉ mia abaʉ ẽbẽrata Daizeze trʉ̃are ba ẽ baita akʉza mia abaʉta kʼẽrẽpa babe ẽãta, adewara iya jarabʉ dayirãba bedʼea zroma ũdubʉrʉdera idubʉita Daizeze odebʉta (Job 1:​9-11; 2:4). Jobʼba ũdubisi Diarura sewa nebʉrʉ omiata, ¿bʉara abarika oika? Dayirãnebema aba abakaʉba jidaseabʉ Jeowa trʉ ʉ̃rʉ ibia bedʼeabita akʉza iyiare kʼẽrẽpabʉdeba iyita sobiabita (Prov. 27:11). Naʉ̃ra jipade yibia dayirãita.

6. ¿Sãwũã oseapanʉ Davidʼde kĩrãkʼa akʉza lebitarane kĩrãkʼa? (Nehemías 9:5).

⁶ Jeowa kãgapanʉrabara soiduba ibia bedʼeakĩrãpanʉ Jeowa ʉ̃rʉ. Davidba bʉsi: «Mʉ̃ta Jeowa ʉ̃rʉ ibia bedʼeabira; mʉ̃ kakua jõmaʉ̃ba Jeowa trʉ̃ ʉ̃rʉ ibia bedʼeayi» (Sal. 103:1). Davidbara kʼawuabasi Jeowa trʉ̃ ʉ̃rʉ ibia bedʼeaira iyababʉta Jeowa ʉ̃rʉ ibia bedʼeaiʉ̃mera. Dayirãba Jeowa trʉ̃ ʉ̃rʉ krĩchabʉrʉdera krĩchapanʉ iyi ẽbẽra bia ʉ̃rʉ akʉza iya nekʼãrẽ parãna ʉ̃rʉ. Davidbara Daizeze trʉ̃ra neneẽã babikĩrãbasi akʉza maʉ̃ ʉ̃rʉ ibia bedʼeakĩrãbasi, iyara maʉ̃ra soiduba okĩrãbasi. Lebitarabida  Jeowa trʉ̃ ʉ̃rʉ ibia bedʼeabisida, ãyara edabʉta ũdubisida jarasidade Jeowa trʉ̃ kʼãrẽaba yibiara majarauda ẽãta (akʉra Nehemías 9:5). Ãya Jeowa trʉ̃ ʉ̃rʉ mawũã ibia bedʼeadara soiduba osida baera, Jeowa sota sobiabisida.

7. ¿Sãwũã Jeowa ʉ̃rʉ ibia bedʼeabiseapanʉ ewariza akʉza dayirã Daizeze Bedʼea jaradia wãbʉrʉde?

⁷ Idi ewade dayirãbara Jeowara sobiabipanʉ. Dayirã bedʼeabʉrʉde jara ũrĩbibʉrʉde iyaʼa biga diabʉta, iyi kãgata akʉza iyi ẽbẽra biata. Dayirãba ẽbẽrarãra jaradia wãbʉrʉdera kʼarebaibara ãyira Jeowa kʼawa bamarẽã akʉza Jeowata akʉdamarẽã dayirãba akʉbʉ kĩrãkʼa, dayirã Zeze kĩrãkʼa (Sant. 4:8). Dayirãbara ẽbẽrarã jara ũrĩbikĩrã Daizeze Bedʼeaba kʼãrẽta jarabʉta Jeowa ʉ̃rʉ, ãyaʼa ũdubipanʉ iyi kãgata, iya nekʼãrẽ aripe obʉta, iyi buru biata, iyi zareata akʉza nekʼãrẽ awuru nebiara iya erbʉta. Dayirãbara Jeowa ʉ̃rʉ ibia bedʼeabibʉ zarea opanʉne iya kãgabʉ kĩrãkʼa oita (Efes. 5:1). Dayirãba mawũã obʉdadera ũdubidayi dayirãra awuarapanʉta ẽbẽra kayiruara naʉ̃ drʉadebʉira, maʉ̃ kʼarea ãya widiseabʉ, ¿kʼãrẽa mawũãpanʉ? (Mat. 5:​14-16). Dayirã ãyibawara ewariza bedʼeabʉde ãyaʼa jara ũrĩbiseapanʉ kʼãrẽa mawũãpanʉta dayirãra. Maũba ẽbẽrarãbida Daizezeta ũdukʼawuakĩrãnañi. Dayirãba Jeowa ʉ̃rʉ ibia bedʼeabʉrʉdera iyi sota sobiabibʉ (1 Tim. 2:​3, 4).

JEOWA TRɄ̃ Ʉ̃RɄ IBIA BEDʼEABɄRɄDERA JESUTA SOBIABIPANɄ

8. ¿Kʼãrẽa Jesura yiza bia ũdubita sãwũã Jeowa trʉ̃ ʉ̃rʉ ibia bedʼeabita?

⁸ Jeowaba parãnanebemara Jesubʉrʉ audre bia ũdukʼawuabʉ yi Zezeta (Mat. 11:27). Jesubara kãga yi Zezera akʉza iyiareba ibia bedʼeasi yi Zeze trʉ̃ ʉ̃rʉ (Juan 14:31). Jesu diamasi iyi bei nãã yi Zezeʼa yiwidʼiside jara ũrĩbisi iyira kʼãrẽa zesita nama egoroeda: «Mʉ̃a ũdukʼawuabisi bʉ trʉ̃ra» (Juan 17:26). ¿Sãwũã osi iya maʉ̃ra?

9. ¿Jesuba sãwũã zokʼasi nebʉra aba mawũã bia jara ũrĩbita yi Zeze sãwũãbʉta?

⁹ Jesubara bari jaradia ẽ basi saʉ̃ta Daizeze trʉ̃ta, judioraba naʉ̃ ʉ̃rʉra kʼawuabasi baera, awuarabʉrʉ «iyara kʼawuabisia sãwũãbʉta» Daizezera (Juan 1:​17, 18). Bari jaraita, Escrituras Hebreasde ũdubibʉ Jeowabara so borekea akʉbʉta akʉza so zʉbʉria akʉbʉta (Éx. 34:​5-7). Jesuba naʉ̃ ʉ̃rʉ biʼia jara ũrĩbisi nebʉraside kʉ̃ra plata gastada ʉ̃rʉ akʉza yi zeze ʉ̃rʉ. Dayirãba naʉ̃ nebʉra lebʉrʉde ũdupanʉ zezeba yi warra jẽda uruta jĩgaʉba ũdubʉrʉdera, orra kʼãrãpe soiduba kĩrãduabʉ yi warraba kʼãrẽ kayirua odade. Naʉ̃ba biʼia ũdubibʉ Jeowaba dayirã sãwũã so zʉbʉriata akʉza so borekeata ũdubibʉta (Luc. 15:​11-32). Jesubara ũdubisi yi Zeze wãrĩnu sãwũãbʉta

10. (1) ¿Sãwũã kʼawuapanʉ Jesuba yi zeze trʉ̃ta zokʼasita akʉza kãgabasita wuabemarabida iyide kĩrãkʼa odamarẽã? (Marcos 5:19 akʉza akʉra potota). (2) ¿Idi ewade dayirãba kʼãrẽta omarẽã kãgabʉ Jesubara?

¹⁰ Jesuba kãgabasi wuabema ẽbẽrarãbida Daizeze trʉ̃ta zokʼadamarẽã. Ʉ̃kʉrʉ nokʼora religionebemarabara krĩchapanasi Daizeze trʉ̃ zokʼaira kayiruata. Mamina ẽbẽrarãba ãyi krĩchadeba zebʉ jarabʉ kʼarea, Jesubara idubʉ ẽ basi Daizeze trʉ̃ ʉ̃rʉ ibia bedʼeabʉra. Krĩchadaya jari ewade Jesuba yumakẽrã Gerazadebemaba angel kayirua erbada ãĩ  bʉeside, maʉ̃ kʼarea mejãcha perasida akʉza Jesuʼa jarada ʉ̃rʉ jarasida wamarẽã maʉ̃ drʉadeba (Mar. 5:​16, 17). Mamina Jesubara kãgabasi ẽbẽrarã maʉ̃ drʉadebemaba Jeowa trʉ̃ta ũdukʼawuadamarẽã, maʉ̃ kʼarea maʉ̃ yumakẽrã iya bebida jarasi ẽbẽrarã jara ũrĩbimarẽã Jeowaba kʼãrẽta osita iyi bari (akʉra Marcos 5:19). a Iya kãgabʉ idi ewade dayirãbida naʉ̃ drʉa jõmaʉ̃mae ũdukʼawuabidamarẽã iyi Zeze trʉ̃ta (Mat. 24:14; 28:​19, 20). Dayirãba maʉ̃ obʉrʉdera sobiabipanʉ dayirã Nokʼo Jesuta.

11. ¿Kʼãrẽ ʉ̃rʉ yiwidʼimarẽã jarasi Jesubara iyi kʼaidubemarãra akʉza naʉ̃ra kʼãrẽa yibia? (Ezequiel 36:23).

¹¹ Jesubara kʼawuabasi Jeowabara iyi trʉ̃ra neneẽã babikĩrãbʉta, maʉ̃ kʼarea Jesuba iyi kʼaidubemara kʼãwũã yiwidʼimarẽã jarasi: «Zeze ʉ̃tʉbema, bʉ trʉ̃ra neneẽã baide bʉa» (Mat. 6:9). Jesubara kʼawuabasi nekʼãrẽ naʉ̃ drʉadebʉbara maʉ̃ta oibarabasita (akʉra Ezequiel 36:23). Jesubara nekʼãrẽ mejãcha osi yi Zeze trʉ̃ ʉ̃rʉ ibia bedʼeabita wuabemaraneira. Jesu iyi nejʉraraba jidasidadera jarasida Jesubara wawia ũdubi ẽãta Daizezeʼa. Jesura mejãcha krĩcha zroma obasi, iyi juezma edebʉdade jaradai kʼarea iyara wãrĩnu wawia ũdubi ẽãta Daizeze ʉ̃rʉ. Jesura maʉ̃ kʼarea krĩcha zroma obasibaibara iyi jidadai nããra (Luc. 22:​41-44).

12. ¿Jesubara yi Zeze trʉ̃ra sãwũã neneẽã babisi?

¹² Jesuba yi Zeze trʉ neneẽã babita, zʉbʉriade berabarisi akʉza iyi ʉ̃rʉ mitia bedʼeapanʉta awuantasi, iyara kʼawuabasi yi Zeze bedʼeata ũrĩbarata ewari jõmaʉ̃nẽ, maʉ̃ kʼarea pera ẽ basi (Heb. 12:2). Akʉza kʼawuabasi Diarubara jʉrʉnʉmʉta iyi sãwũã baebita (Luc. 22:​2-4; 23:​33, 34). Diarubara kãgabasi Jesuta kʼẽrẽpa ba ẽ marẽã, mamina maʉ̃ra obe ẽ basi. Maʉ̃neba Jesuba ũdubisi Diarura sewa nebʉrʉ omiata akʉza Daizeze odepanʉrabara Daizezeba zokʼabʉra oseabʉta ãya bedʼea zroma ũdupanʉmina.

13. ¿Bʉa sãwũã sobiabiseabʉ bʉ Nokʼo Jesura?

¹³ ¿Bʉara sobiabikĩrãbʉka bʉ Nokʼo  Jesura? Mawũãbʉrʉ ibia bedʼeara Jeowa trʉ̃ ʉ̃rʉ, kʼarebara wuabemaraba kʼawuadamarẽã Daizeze wãrĩnu sãwũãbʉta. Bʉa mawũã obʉbʉrʉ Jesude kĩrãkʼa obʉ (1 Ped. 2:21). Jesude kĩrãkʼa bʉara Jeowata sobiabibʉ akʉza ũdubibʉ Diarura sewa nebʉrʉ omiata.

JEOWA Ʉ̃RɄ IBIA BEDʼEABɄDEBA KʼAREBAPANɄ ẼBẼRARÃTA ẼDRɄMARẼÃ

14, 15. ¿Kʼãrẽ nebiata berabariseabʉ Jeowa ʉ̃rʉ jaradiapanʉne ẽbẽrarã?

¹⁴ Jeowa trʉ̃ ʉ̃rʉ ibia bedʼeabʉrʉdera ẽbẽrarãta kʼarebapanʉ, ¿sãwũã? Diaruba naʉ̃ drʉadebemara jõma sewa jʉrenʉmʉ (2 Cor. 4:4). Maʉ̃ kʼarea ẽbẽrarãbara ĩjãpanʉ naʉ̃ra sewa nebʉrʉ ʉ̃rʉ. Bari jaraita, krĩchapanʉ Daizezebara dayirã krĩcha ẽãta, neẽãta, jĩgabʉta akʉza zʉbʉria obarita ẽbẽra kayiruarata. ¿Kʼãrẽa zokʼabʉ naʉ̃ sewidara? Zokʼabʉ ẽbẽrarãba ũdukʼawuada ẽ marẽã Daizezeta, jĩgapanamarẽã Daizezedeba akʉza Jeowa trʉ̃ ʉ̃rʉ imitia bedʼeadamarẽã, mamina dayirãba Daizeze bedʼea ʉ̃rʉ jaradiabʉba kʼarebabʉ ẽbẽrarãta. Diaruba oẽ marẽã iya okĩrãbʉta dayirãbara ẽbẽrarã jaradiapanʉ mawũã Jeowa trʉ̃ ʉ̃rʉ ibia bedʼeadamarẽã, ¿maʉ̃neba kʼãrẽta ũdupanʉ?

¹⁵ Wãrĩnu Daizeze Bedʼearadebemara jipade yibia. Dayirãba Jeowa ʉ̃rʉ jaradiabʉrʉde iyi wãrĩnu sãwũãchu ʉ̃rʉ, maʉ̃ra jipa yibia. Ẽbẽrarãba Daizeze ʉ̃rʉ nãã aña krĩchabadara wua mawũã krĩcha ẽ bayi, awuarabʉrʉ biʼia kʼawuayi wãrĩnu Daizeze sãwũãbʉ ʉ̃rʉ, iya kʼãrẽ nebia erbʉ ʉ̃rʉ, ãyira kĩrãmigadayi Daizezeba zarea mejãcha erbʉ kʼarea (Is. 40:26). Ĩjãnañi iya jõma aripe obʉta (Deut. 32:4). Nemejãcha kʼawuadai baera Daizeze krĩcha biadeba (Is. 55:9; Rom. 11:33). Aduʼa sentiyi kʼawuai baera Daizezera kãga yibarita (1 Juan 4:8). Jeowa ʉ̃rʉ audre ũdukʼawua wãne, ãyitara ewari jõmaʉ̃nẽ bʼaira jipade wãrĩnuara babʉ. Kʼãrẽ kĩrãkʼa yibia dayirãitara kʼarebaita ẽbẽrarã audre Jeowa kʼawa bamarẽã, mawũã opanʉbʉrʉ dayirãsida  Jeowaʉ̃me ãba trajabʉ kĩrãkʼabayi (1 Cor. 3:​5, 9).

16. ¿Sãwũã sentipanʉ ʉ̃kʉrʉ ẽbẽrarã Daizeze trʉ̃ ʉ̃rʉ kʼawuabʉrʉde? Yizata jara ũrĩbira.

¹⁶ Nããrãra dayirãbara jaradia jʉ̃drʉseabʉ Daizeze trʉ̃ra Jeowata. Maʉ̃ba, yi wãrĩnu kʼawuakĩrãbʉ bebʉra jipa kĩrã awuara babiseabʉ ewari jõmaʉ̃nẽ. Bari jaraita, Aaliyahta b iyira dapʉẽsida religion Daizeze Bedʼea ʉ̃rʉ wãrĩnu jaradiada ẽãne. Iyira maʉ̃ religionera sobia ba ẽ basi akʉza Daizeze kʼawabʉ ẽ kĩrãkʼabasi, iyi mawũã krĩchabadara taʉsi Jeowa ʉ̃rʉ Kʼawuabipanʉrãbawara Daizeze Bedʼea kʼawua jʉ̃drʉside, maʉ̃ba iya sentisi Daizeze kʼawabidata. Iyira kĩrãmigasi kʼawuaside mejãcha Daizeze Bedʼeadeba Daizeze trʉ̃ ãĩ bʉesidata akʉza maʉ̃ trʉ̃ barira bʉesidata Señorta. Daizeze trʉ kʼawuaira jipa yibiabasi iyitara. Iya jarabʉ iyi neũdukʼawua biara trʉ̃ barabʉta, ¿kʼãrẽ nebiata ũdusi iya maʉ̃neba? Iya jarabʉ: «Naʉ̃ra mʉ̃itara jipade yibia akʉza atiara mʉ̃ra aduʼabʉ». Steve mebẽrãra religion judiadebasi, mamina iyira ãĩ wãsi iyi religionebara mejãcha ũdusi baera sewidata, mamina yi papa beida kʼarea mejãcha krĩcha obaside ĩjãsi Jeowa ʉ̃rʉ Kʼawuabipanʉrãba iyaʼa Daizeze Bedʼeata jaradiamarẽã, iya Daizeze trʉ̃ saʉ̃ta kʼawuaside iyira mejãcha sobiasi. Iya jarabʉ: «Mʉ̃ara Daizeze trʉ̃ ʉ̃rʉra jipa kʼawua ẽ basi, kʼawuasi wãrĩnu Daizezera chuta, maʉ̃neba ʉ̃ta iyira mʉ̃ neũdukʼawuara».

17. ¿Bʉara kʼãrẽa Daizeze trʉ̃ ʉ̃rʉ ibia bedʼeakĩrãbʉ? (Akʉra potota).

¹⁷ ¿Daizeze Bedʼea jaradiabʉrʉde Daizeze trʉ̃ ʉ̃rʉra jaradiabʉka ẽbẽrarã? ¿Ãyaʼa jaradiabʉka wãrĩnu Daizeze sãwũãbʉ ʉ̃rʉ? Mawũã ora ibia bedʼeayi Jeowa trʉ ʉ̃rʉ. Jeowa trʉ̃ ʉ̃rʉ bia bedʼeabara ẽbẽrarã jaradiabʉrʉde, ãya kʼawuadamarẽã iyita kʼaita, mawũã ibia bedʼeadamarẽã iyi ʉ̃rʉ. Mawũã ẽbẽrarãta ẽdrʉbidayi akʉza Jesuba oda kĩrãkʼa odayi, adewara Jeowata sobiabidayi. Naʉ̃ salmistade kĩrãkʼa jõmaʉ̃ba jaraibara: «Bʉ trʉ̃ ʉ̃rʉ ibia bedʼeabayi ewari jõmaʉ̃nẽ» (Sal. 145:2).