1-2. Boŋ na baŋ soŋ te ka te baŋ lɛ na aŋ da waa ko Jehoova saŋa na Setaana naŋ da ŋma zirii kyaaroo na?

 HOOŊ leɛteɛre a yɛlɛ ŋa nyɛ: Te de ka neɛ kaŋa ho naŋ nɔŋ o yɛlɛ yelee yelkaŋa naŋ ba soma a kyaare bo. Ho baŋɛɛŋ ka zirii la; kyɛ ka noba mine sagedi ka yelmeŋɛ la. Kyɛ a yɛlɛ ŋa faa zie la ka, ba meŋ gba piili yelee a yɛlɛ korɔ noba yaga baŋ meŋ wa sage a yɛlɛ di. Wala aŋ na erɛ bo? Ka hooŋ e neɛ naŋ teɛrɛ noba yɛlɛŋ yaga zaa ka ho yosoŋ meŋ yɛlɛ fɛre bo, a zirii ŋa na vɛmeŋ ka ho poɔ sãã yaga zaa.​—Yeng. 22:1.

² A yelmannaa ŋa soŋ teŋ teŋ baŋ lɛ aŋ da waa ko Jehoova saŋa na baŋ da sãã o yosoŋ na. O malekere na kaŋa da ŋma la zirii kyaaroo a ko Hawaa. Oŋ meŋ da sage a zirii ŋa di. A lɛ zirii ŋa la da bɛnle Adama neŋ Hawaa baŋ zagre Jehoova noɔre. Ka lɛ vɛŋ ka nensaaleba zaa wa taa kũũ ane yelfaare ba eŋɛŋ. (Mun. 3:1-6; Uro. 5:12) A zirii na Setaana naŋ da ŋma a Eedin gaadin poɔŋ na la vɛŋ ka nensaaleba tuoro a yelkpeɛne ŋa zaa zenɛ, a mine la kũũ, zɔɔre, ane dɔgɛɛ. A dɔgroŋ ŋa zaa aŋ pɔgerɔ nensaaleba na maŋ vɛmeŋ ka Jehoova poɔ sãã bee? Nɔkpeɛne zaa kyebe ka a maŋ vɛmeŋ ka o poɔ sãã. Kyɛ a ba maŋ vɛŋ ka Jehoova suuri iri te gaali oŋ boɔrɔ ka o e yelkaŋa a yaa sane. A Baabole gba yeleeŋ ka o eɛ “popeɛloŋ Naaŋmen.”​—1 Tim. 1:11.

3. Bo poɔsori la teŋ taa?

³ Te na baŋ soŋeŋ a vɛŋ ka noba baŋ ka yɛlɛ na Setaana naŋ yelkyaare Jehoova na eɛ zirii ka teneeŋ wa tuuro a bege ŋa: “Pugiro Jehoova yuori na.” (Yiem. 113:1) Te maŋ pugiree Jehoova yosoŋ na ka teneeŋ wa wulo noba yelmenne na zaa naŋ bebe kyaaroo na. Ho na pugee Jehoova yuori na bee? Te nyɛ yɛlɛ ata mine naŋ na baŋ eŋ te faŋa ka te pugiro Naaŋmen yuori Jehoova ane te poɔ zaa.

 JEHOOVA POƆ MAŊ PƐLEŊ KA TENEEŊ WA PUGIRO O YUORI NA

4. Ananso la wala ka Jehoova poɔ maŋ pɛle ka teneeŋ wa pugiruu? Tere yelmannaa kaŋa. (Kaa a foto meŋ.)

⁴ Te Saa naŋ be sazuŋ poɔ maŋ pɛleŋ ka teneeŋ wa pugiro o yuori na. (Yiem. 119:108) Kyɛ lɛ wuleeŋ ka a kpeɛ̃o zaa daana Naaŋmen waa ŋa nensaaleba naŋ ba pɛgeyi, a maŋ boɔrɔ ka ba taaba pugiro ba ka lɛ na vɛŋ ka ba nyɛ faŋa emmo na bee? Ai. Te nyɛ a yelmannaa ŋa. Hooŋ teɛre nyɛ bipɔgelee kaŋa naŋ zo te kori o saa a yelka, “Hooŋ la saa naŋ soma gaŋ saa mine zaa naŋ be a donɛɛ poɔŋ!” Ka a saa poɔ zaa pɛle ane yɛlɛ na o bipɔgelee naŋ yi o poɔ zaa a e na. Ananso la wala ka o poɔ pɛle? Te na baŋ yelka o naŋ boɔrɔ puubu yaga zaa ane faŋa emmo yi o bie na zieŋ vɛŋ ka o poɔ pɛle bee? Ai. Kyɛ te na baŋ yelka o naŋ nɔŋ o bie na yaga zaa la vɛŋ ka o poɔ pɛle neŋ a bie meŋ naŋ wulo nɔmmo ane nimipa koroo. O baŋɛɛŋ ka o bie na baaŋ a wa e neɛ naŋ taa popeɛloŋ bonso o taa la nɔmmo ane nimipa. Lɛ meŋ la ka Jehoova naŋ e Bi-saa naŋ soma gaŋ bi-saa zaa poɔ maŋ pɛle ka teneeŋ wa pugiruu.

5. Bo yɛlɛ la teŋ maŋ wuli ka a eɛ zirii ka teneeŋ wa pugiro Jehoova?

⁵ Ka teneeŋ wa pugiro te Saa naŋ be sazuŋ, a maŋ soŋeŋ teŋ wuli ka yɛlɛ na Setaana naŋ yelkyaare te kaŋa la kaŋa zaa na eɛ zirii. Setaana yeleeŋ ka nensaalaa zaa daŋ koŋ sage yi yelmennoŋ poɔŋ a pɛge Jehoova yuori. Ka nensaalaa zaa kyebe a na baŋ moɔ̃ nimiri a dire yelmennoŋ korɔ Jehoova ka o naŋ wa tuoro yelkpeɛne. O la yeleeŋ ka te kaŋa zaa na barɛɛ Naaŋmen puoruu ka teneeŋ wa nyɛ ka lɛŋ na soŋ te. (Joob 1:9-11; 2:4) Kyɛ Gyoob da di la yelmennoŋ ko Jehoova a da wuli ka zirii ka Setaana ŋma. Ho meŋ na moɔ̃ la niŋe a dire yelmennoŋ korɔ Jehoova bee? Te zaa taa la apoɔsori ka te vɛŋ ka te Saa na yuori pɛgeyi, a puoruu yelmennoŋ poɔŋ meŋ ka lɛ vɛŋ ka o poɔ pɛle. (Yeng. 27:11) A sereŋ eɛ apoɔsori naŋ e kpoŋ yaga zaa te naŋ nyɛ.

6. Wala teŋ na baŋ e tɔgle Naa Deevid ane a Liivai noba? (Niihemaiya 9:5)

⁶ Noba naŋ nɔŋ Jehoova na maŋ yi la ba poɔ zaa a pugiro o yuori na. Naa Deevid da sɛgɛɛŋ ka: “Pɛge Jehoova, oo N sukyiri. Bonzaa naŋ be N eŋɛŋ, pɛge o yo-forifori na.” (Yiem. 103:1) Deevid da baŋɛɛŋ ka ka onaŋ pugiro Jehoova yuori na, Jehoova meŋɛ la oŋ pugiro. Ka teneeŋ wa woŋ Jehoova yuori te maŋ teɛrɛ neɛ na meŋɛ naŋ la Jehoova, ane gyog-sonne na zaa o naŋ taa ane yelseɛlɛ na zaa o naŋ e na. Deevid da maŋ erɛɛ yɛlɛ naŋ na vɛŋ ka o Saa na yuori pɛgeyi a kyɛ pugiro o meŋ. O da maŋ boɔrɔŋ ka o e lɛ neŋ  “bonzaa naŋ be [o] eŋɛŋ” lɛ wuleeŋ ka ane o poɔ zaa. Lɛ meŋ ka Liivai noba da maŋ deɛrɛ weɛ Jehoova yuori puubu eŋɛŋ. Ba da yi la yelmennoŋ poɔŋ a sage ka yelbie zaa kyebe baŋ na baŋ yel a de pugi Jehoova yo-forifori na ka aseŋ. (Kanne Niihemaiya 9:5.) Nɔkpeɛne zaa kyebe ka lɛ ŋa baŋ da maŋ yi yelmennoŋ ane sigrimennoŋ poɔŋ a pugiro Jehoova na da maŋ vɛŋeŋ ka o poɔ zaa pɛle.

7. Wala teŋ na baŋ e pugi Jehoova a naaŋ moɔloo poɔŋ ane te bebiri zaa zemmo poɔŋ?

⁷ Zenɛ ŋa meŋ, Jehoova poɔ maŋ pɛleŋ ka yɛlɛ te naŋ maŋ yele kyaaroo naŋ wa wuli ka te nɔmooŋ a kyɛ taa nimipa koo meŋ. Ka teneeŋ wa gaa a naaŋ moɔloo, yɛlɛ naŋ maŋ e nimimzeɛ ko te la ka te soŋ noba ka ba tage peɛle Jehoova a kyɛ taa teɛroŋ na te naŋ taa kyaaroo na. (Gyi. 4:8) A maŋ e teŋ popeɛloŋ ka te wuli noba yɛlɛ a Baabole naŋ yelkyaare Jehoova, o nɔmmo, dantorii, yɛŋ, kpeɛ̃o, ane o gyog-sonne na zaa o naŋ taa na. Ka teneeŋ wa mɔɔrɔ te mɔɔbo zaa ka te pugiro Jehoova, a maŋ de la puubu koroo a kyɛ vɛŋ ka o poɔ meŋ pɛle. (Efe. 5:1) Ka teneeŋ wa erɛ lɛ, te maŋ e la te yoŋ a donfaa ŋa poɔŋ. Lɛ meŋ maŋ vɛmeŋ ka noba nyɛ ka te neŋ noba naŋ be a donfaa ŋa poɔŋ yel-eree ba yitaa kyɛ ba ba maŋ baŋ ananso. (Mat. 5:14-16) Ka te neŋ baŋ wa lanna yɛlɛ, te na baŋ wuli baŋ ka ba baŋ ananso naŋ vɛŋ teŋ maŋ e te yoŋ. Lɛ maŋ vɛŋeŋ ka sukyiri sonne deme meŋ wa puoro te Naaŋmen na. Ka teneeŋ wa pugiro Jehoova ana sori ŋaŋ, a maŋ vɛmeŋ ka o poɔ pɛle yaga zaa.​—1 Tim. 2:3, 4.

YEZU POƆ MAŊ PƐLEŊ KA TENEEŊ WA PUGIRO JEHOOVA YUORI

8. Sobuo ka Yezu e ewuli soŋ yaga zaa a ko te a kyaare Jehoova yuori puubu?

⁸ Neɛzaa ba kye sazuŋ bee a donɛɛ ŋa zuŋ a baŋ Jehoova gaŋ Yezu. (Mat. 11:27) Yezu nɔŋ la o Saa, a maŋ deɛrɛ weɛ Jehoova yuori puubu eŋɛŋ. (Gyn. 14:31) Zie naŋ na nyaaŋ ka ba ko Yezu na, o da yelee yelnimizeɛ na oŋ da e a donɛɛ zuŋ kyɛ o naaŋ moɔloo toma na poɔŋ. O da yeleeŋ ka: “N vɛŋɛɛŋ baŋ baŋ ho yuori na.” (Gyn. 17:26) Wala oŋ da boɔrɔ ka o wuli?

9. Sobuo ka Yezu de yelmannaa kaŋa a wuli Jehoova yɛlɛ soŋ zaa aŋ soŋ te teŋ bamoo soŋ?

⁹ Yezu da ba maŋ yele korɔ noba ka Naaŋmen yuori la Jehoova yoŋ. Gyuumine na Yezu naŋ da maŋ wulo ba na da baŋɛɛ Naaŋmen yuori. Yezu da maŋ deɛ weɛ a “wuli lɛ a Saa naŋ waa.” (Gyn. 1:17, 18) Aŋa mannoo poɔŋ, a Hiburu Sɛgre wuleeŋ ka Jehoova eɛ nembazo ane nyonono soba. (Yiib. 34:5-7) Yezu da vɛŋɛɛŋ ka ana yelmeŋɛ ŋa pɛle saŋa na oŋ manne a yelmannaa naŋ kyaare a bi weɛŋaa ane o saa na. Ka teneeŋ wa kanne a sɛgre ŋa a nyɛ lɛ a bi-saa ŋa naŋ da nyɛ o bie naŋ e kaŋdabaŋkalɛ a te “be tɔɔre zaa waana,” oŋ zo te pɔge o, a koruu, a yi o poɔ zaa a vɛŋ koo na, a maŋ soŋ teŋ teŋ baŋ peɛlaaŋ ka Jehoova eɛ nembazo ane nyonono soba. (Luk. 15:11-32) Yezu da soŋɛɛ noba baŋ wa baŋ neɛ na meŋɛ naŋ la Jehoova.

10. (a) Wala teŋ e baŋ ka Yezu da maŋ deɛ o Saa yuori meŋɛmeŋɛ tonɔ neŋ toma a kyɛ boɔrɔ ka o taaba mine meŋ erɛ lɛ? (Marko 5:19) (Kaa a foto meŋ.) (b) Boŋ ka Yezu boɔrɔ ka te erɛ zenɛ ŋa?

¹⁰ Yezu da maŋ boɔrɔŋ ka noba mine meŋ de o Saa yuori na tonɔ neŋ toma. Ŋmenpuore wedeɛreba mine da sagedieŋ ka Naaŋmen yuori eɛ forifori te gaali azuŋ a ba seŋ ka te boɔlɔ a yuori. Kyɛ Yezu yɛŋ da ba tere sori ka a teɛroŋ ŋa naŋ ba yi a Baabole poɔŋ na vɛŋ ka o koŋ de emmo naŋ seŋ neŋ korɔ o Saa yuori na. Hooŋ leɛ nyɛ saŋa na oŋ da digi sefaare yi dɔɔ kaŋa eŋɛŋ Gerasene gbandige na poɔŋ. Dabeɛ̃ da kpɛ la a noba baŋ yelko Yezu ka o yi be gaa kyɛ bare ba, azuŋ o da yi  la ana zie naŋ a gaa. (Mak. 5:16, 17) Kyɛ Yezu da naŋ boɔrɔŋ ka noba baŋ Jehoova yuori ana zie naŋ. Azuŋ o da yelko la a dɔɔ ka o yele korɔ noba bon na Jehoova naŋ e kyɛ bon na Yezu naŋ e naane. (Kanne Marko 5:19.) a Lɛ ka Yezu boɔrɔ ka te erɛ zenɛ ŋa meŋ, ka te vɛŋ ka noba baŋ o Saa yuori a donɛɛ lombori zaa! (Mat. 24:14; 28:19, 20) Ka teneeŋ erɛ lɛ, te Naa Yezu poɔ na pɛleŋ.

11. Bo ka Yezu da wuli o potuuribo na ka ba maŋ puoro sɔrɔ, ka ananso la wala aŋ e yelnimizeɛ? (Iziikiel 36:23)

¹¹ Yezu da baŋɛɛŋ ka Jehoova boɔbo la ka O yuori pɛgeyi, ka noba meŋ baŋ zirii na zaa ba naŋ ŋma kyaaroo na. Lɛŋ vɛŋ ka Yezu da wuli o potuuribo ka ba maŋ puore ka: “Te Saa naŋ be sazuŋ, vɛŋ ka ho yuori pɛgeyi.” (Mat. 6:9) Yezu da baŋɛɛŋ ka a yɛlɛ ŋa eɛ yeltegroŋ naŋ kyaare bonvore zaa. (Kanne Iziikiel 36:23.) Neɛzaa kye sazuŋ bee a donɛɛ ŋa zuŋ a pɛge Jehoova yuori na gaŋ Yezu. Kyɛ, saŋa na baŋ da wa nyɔge Yezu na, bo yelfaa la baŋ da yelka o toŋɛɛŋ? Ba da yelka o to la Naaŋmen zoma! Kyɛ Yezu da nyɛɛŋ ka oŋ na to Naaŋmen zoma na eɛ yelfaa naŋ gaŋ yelfaa zaa. A da kyɛrɛɛ o sukyiri yaga zaa baŋ da di o sɛrɛɛ a yelka o eɛ a lɛ yelfaa ŋa na. Aminekaŋaŋ anaŋ da vɛŋ oŋ da dire “dɔgɛɛ” yaga zaa saŋa na aŋ da kyɛre fẽẽ ka o kpi na.​—Luk. 22:41-44.

12. Bo yɛlɛ la ka Yezu da e a pɛge o Saa yuori na yaga zaa?

¹² Yezu naŋ da boɔrɔ ka o pɛge o Saa yuori na zuŋ, o da arɛɛ dɔgɛɛ, zoma, ane zirii na zaa baŋ da ŋma dɔgloo na noɔreŋ. O da baŋɛɛŋ ka o kyɛlle woŋee o Saa yɛlɛ yelzaa poɔŋ; azuŋ o da ba zoro vi zaa. (Hib. 12:2) O da baŋɛɛŋ meŋ ka Setaana la da zɔɔrɔ neŋ o a lɛ wagre kpeɛne na saŋa. (Luk. 22:2-4; 23:33, 34) Setaana boɔbo zaa da la ka o vɛŋ ka Yezu bare o yelmennoŋ na oŋ taa ko Jehoova na; kyɛ o da mɔɔ faaŋɛɛŋ! Yezu da wuleeŋ aŋ pɛle ka Setaana eɛ ziri-ŋmaara naŋ gaŋ ziri-ŋmaara zaa. A lɛ wuli meŋ ka Jehoova taa la yelmeŋɛ puorebiiri naŋ maŋ nyɔge ba sagediibu taa kpeɛŋaa ka ba naŋ gbaŋ wa tuoro yelkpeɛne naŋ e kpeɛŋaa yaga zaa!

13. Wala hoŋ na baŋ e pɛle ho Naa naŋ dire naaloŋ na poɔ?

¹³ Ho boɔrɔŋ ka ho pɛle ho Naa naŋ dire naaloŋ pampana na poɔ bee? Moɔ̃ niŋe a  pugiro Jehoova yuori na, a sonnɔ noba ka ba baŋ gyog-sonne na zaa te Naaŋmen na naŋ taa. Ka hooŋ wa erɛ lɛ, lɛ wuleeŋ ka ho tɔglɛɛ Yezu. (1 Pit. 2:21) Aŋa lɛ Yezu naŋ da e na, ho na vɛŋeŋ ka Jehoova poɔ pɛle, a kyɛ wulo meŋ ka O dɔndɔma Setaana eɛ ziri-ŋmaara naŋ ba zoro vi!

TE MAŊ FAA LA NOBA NYƆVOƐ KA TENEEŊ WA PUGIRO JEHOOVA YUORI NA

14-15. Bo nɔmãã yɛlɛ mine la na baŋ e ka teneeŋ wa wulo noba Jehoova yɛlɛ?

¹⁴ Ka teneeŋ wa pugiro Jehoova yuori na, te maŋ faa la noba nyɔvoɛ. Sobuoŋ? Setaana “ligi [la] noba naŋ ba sage de a yɛlɛ teɛroŋ.” (2 Kor. 4:4) Lɛ vɛŋɛɛŋ baŋ wa sage a zirii ŋa taaba Setaana naŋ ŋma na di ka: Naaŋmen ba kyebe, Naaŋmen neŋ nensaaleba eɛ tɔɔre yaga zaa, o ba taa nensaaleba yɛlɛŋ meŋ, Naaŋmen taa la nimikuonii a maŋ dɔgrɔ noba a gɛrɛ wagre naŋ ba taa baaraa. A zirii ŋa zaa dɛgrɛɛ Jehoova yo-soŋ na, ka lɛ maŋ vɛŋ ka noba ba boɔrɔ ka ba tage peɛloo. Kyɛ ka teneeŋ wa tonɔ a naaŋ moɔloo toma, a maŋ sãã la poteɛre faa na Setaana naŋ taa na. Te maŋ wulee noba yelmeŋɛ naŋ bebe a kyaare te Saa na, a pugiro te Naaŋmen yo-forifori na. Ka boŋ maŋ yi a poɔŋ wa?

¹⁵ Yelmenne naŋ be Naaŋmen Yelbiri na poɔŋ taa la kpeɛ̃o yaga zaa. Ka teneeŋ wa wulo noba Jehoova yɛlɛ, a wuli ba gyog-sonne na zaa o naŋ taa na, te maŋ nyɛɛ yelkaŋa naŋ e nɔmãã yaga zaa. Noba maŋ nyɛɛ zirii na zaa Setaana naŋ ŋma kyaare Jehoova na, a kyɛ piili nyɛrɛ gyog-sonne na zaa O naŋ taa na. Ba nɔɛ zaaŋ maŋ mãã ane lɛ onaŋ taa kpeɛ̃o seŋ na. (Aiz. 40:26) Lɛ na onaŋ taa dantorii yaga zaa na meŋ maŋ vɛŋeŋ baŋ wa sage o di. (Dut. 32:4) Ba maŋ zannɛɛ yɛlɛ yaga zaa meŋ yi yɛŋ na onaŋ taa na poɔŋ. (Aiz. 55:9; Uro. 11:33) A maŋ dii la ba sukyie yaga zaa ka ba naŋ wa baŋ ka o eɛ nɔmmo. (1 Gyn. 4:8) Ka ba naŋ wa tagra peɛlɛ Jehoova ba na wa taa la teɛretɔ ka ba na zeŋ la a donɛɛ ŋa zuŋ a gɛrɛ wagre naŋ ba taa baaraa. A eɛ apoɔsori naŋ e kpoŋ yaga zaa ko te ka te soŋ noba ka ba tage peɛle ba Saa Jehoova! Ka teneeŋ wa erɛ lɛ, Jehoova maŋ nyɛ teŋ ka te eɛ o “tontoŋtaaba.”​—1 Kor. 3:5, 9.

16. Wala aŋ maŋ tɔ noba mine sukyiri seŋ ka ba naŋ wa zanne Naaŋmen yuori na? Tere yelmannaa kaŋa.

 ¹⁶ A piilee saŋa na aminekaŋaŋ te maŋ wulee noba ka Naaŋmen yuori la Jehoova. A yɛlɛ ŋa yoŋ na baŋ leɛrɛɛ sukyiri soŋ soba zemmo. Aŋa mannoo poɔŋ, ba da ba guoli pɔgelee kaŋa yuori naŋ di Aaliyah b aŋa Kristabie. Kyɛ o poɔ da ba pɛle neŋ puoruu na poɔŋ oŋ da be na, o da nyɛɛŋ meŋ ka o ba peɛle Naaŋmen. Kyɛ leɛroo da waɛŋ saŋa na oŋ da piili ka o neŋ Jehoova Sieree Deme zanna a Baabole na. O da piili nyɛrɛɛ Naaŋmen ka o eɛ o Zɔmeŋɛ. A da e oŋ nɔmãã saŋa na oŋ wa zanne baŋ ka ba iree Naaŋmen yuori yi Baabole yaga poɔŋ kyɛ de o yodɔglɔ aŋa Daana leɛre neŋ o voɔreŋ. Oŋ da wa zanne Naaŋmen yuori na da leɛrɛɛ o zemmo zaa. O yeleeŋ ka: “O Zɔmeŋɛ meŋɛ taa la yuori!” Boŋ da yi a poɔŋ wa? O yelka: “N taa la sukyiri maaroŋ yaga zaa. A eɛ emmo yaga zaa a ko ma.” Steve e la yieloŋ yiele baŋ guoluu a Gyuumine puoruu poɔŋ. O da tage la o meŋɛ yi puoruu yaga eŋɛŋ, bonso o da nyɛɛŋ ka ba eɛ bampuori-kombampoɔ noba. Kyɛ o nɔŋna kaŋa da kpieŋ ka a yɛlɛ da dɔnnɔ o yaga zaa, a lɛ saŋa na, o da sagɛɛŋ ka o de o meŋɛ poɔ Baabole zannoo kaŋa Jehoova Sieree Deme neŋ neɛ kaŋa naŋ da erɛ poɔŋ. A da tɔ la o sukyiri yaga zaa saŋa na oŋ da wa zanne Naaŋmen yuori na. O yeleeŋ ka: “N daŋ ba woŋ Naaŋmen yuori zaa.” O da lɛ yeleeŋ ka: “N dɛndɛŋ saŋa la ŋa maŋ wa zanne baŋ ka Naaŋmen bebeŋ meŋɛmeŋɛ! N nyɛɛŋ ka O eɛ neɛ naŋ bebe meŋɛmeŋɛ. O wa leɛ la N Zɔmeŋɛ.”

17. Ananso la wala hoŋ maaleŋ e siri yaga zaa ka ho pugiro Jehoova yuori na? (Kaa a foto meŋ.)

¹⁷ A naaŋ moɔloo poɔŋ, ka lɛ ho maŋ wulee noba Jehoova yo-forifori na bee? Ka lɛ ho maŋ soŋ baŋ baŋ zanne Naaŋmen gyog-sonne na o naŋ taa na bee? Ka hooŋ wa erɛ lɛ, ho maŋ pugiree Naaŋmen yuori na. Moɔ̃ nimiri pugiro Jehoova yo-forifori na a yi hoŋ na maŋ sonnɔ noba ka ba baŋ Neɛ na meŋɛ naŋ la Jehoova. Ka hooŋ wa erɛ lɛ ho na toɔ̃ faa la noba mine nyɔvoɛ. Lɛ na wuliŋ ka ho tuuree ho Naa Yezu Krista sowuli. Kyɛ agaŋaazaa ho Saa Jehoova meŋ poɔ na pɛle neŋ boŋ. Moɔ̃ niŋe “a maŋ [pugiro o] yuori wagre zaa a gɛrɛ wagre naŋ ba taa baaraa”!—Yiem. 145:2.