1-2. Sai yeepi u fu fusutan fa Yehofa be fii di Saatan lei gi en?

 PAKISEI a sani ya: Meke u taki wan sama dii lobi lei gii. I sabi taki a lei a lei gii, ma toku son sama e biibi en. San moo ogii a taki den e paati a lei go doo. Boiti dati, moo sama e biibi den. Fai be o fii? We, efi ya wan sama di e booko yu ede anga taawan, neen sama lei gii, aw hati i. Bika i sabi taki a lei den e lei gii.​—Odo 22:1.

² A toli ya e yeepi u fu fusutan fa Yehofa be e fii di sama poli a nen fi en. Wan fu den engel di a meke taigi a fosi uman Efa omen sani fi en di a ná tuu. Efa biibi a lei ya. Fu di Adan anga Efa biibi a lei fu a engel ya, meke den daai baka gi Yehofa. Na a sani ya meke wi abi sondu. Neen meke we dede tu (Gen. 3:1-6; Rom. 5:12). A fu di Saatan lei aini a dyali fu Eden meke sani enke oloku, pina, anga dede e miti u nownow. A sani ya na hati Yehofa noh? Eeye, a musu hati en. Toku Yehofa nai tan pakisei a lei di Saatan lei gi en. Beibel e kai en ‘a koloku Gadu’.​—1 Tim. 1:11.

3. Sowtu gaandi wi abi?

³ Ala wi abi a gaandi fu soi taki Saatan a lei a lei gi Yehofa. We du a sani ya te we holi a weiti fi en di e taki: ‘Gafa a nen fu Yehofa’ (Ps. 113:1). We gafa Yehofa te we taigi taawan den bun sani di ai du giw. Ye gafa a nen fu Yehofa? Meke u luku dii sani di o yeepi u fu gafa a nen fi en anga u hii ati.

 WE MEKE YEHOFA PIISII TE WE GAFA A NEN FI EN

4. Saide we gafa Yehofa? (Luku a fowtow tu.)

⁴ We meke Yehofa piisii te we gafa en (Ps. 119:108). Ma a sani ya á wani taki Yehofa de enke libisama di e wani taawan gafa den fu den fii bun. Pakisei a sani ya. Wan pikin meisyo e lon go baasa en dda, da ai taigi en taki: ‘A yu na a moo bun dda fu hii goontapu.’ Ná pikin poolo a dda poolo di a taigi en a sani ya. Saide i si enke a dda be e poolo di a meisyo fi en gafa en? I si enke a fu di a be e fii booko-saka meke a be e poolo? Nono. Ai poolo, bika a lobi a meisyo fi en. Ai piisii tu fu di a meisyo fi en soi en taki a lobi en. Boiti dati, a sabi taki di a meisyo fi en o bigi aw go e piisii, bika a lobi sama. Ai teke sani fu bigi. A letiso u dda Yehofa e piisii tu te we gafa en.

5. Te we Gafa a nen fu Gadu, da fa we soi taki den sani di Saatan taki a ná tuu?

⁵ Te we gafa a nen fu u Dda a hemel, da we soi taki a lei di Saatan taki fu u a ná tuu. Saatan taki nawan sama o opo taki gi a nen fu Yehofa. A taki te tesi e miti u wo gwe fika Yehofa tu. Boiti dati, a taki ala wi o daai baka gi Gadu efu u si enke wo fende wini te u du a sani ya (Yopu 1:9-11; 2:4). Ma Yopu be soi kiin taki Saatan a wan leiman, bika aa be gwe fika Yehofa di tesi be miti en. Fa a de anga yu? Ala wi abi a okasi fu kiin a nen fu u Dda. We meke a piisii te we dini en anga u hii ati (Odo 27:11). A wan moin gaandi wi abi fu du a sani ya.

6. Faw sa waka a Kownu David anga den Leifisama baka? (Nehemiya 9:5)

⁶ Den sama di lobi Yehofa e gafa a nen fi en anga den hii ati. Kownu David be taki: ‘Meke mi Gafa Yehofa. Meke ala sani aini mi gafa a santa nen fi en’ (Ps. 103:1). David be sabi taki te we gafa a nen fu Yehofa, da neenseefi we gafa. Te we yee a nen fu Yehofa, da we pakisei sama neen, den manii di a abi, anga den sani di ai du. David be e lesipeki a nen fi en Dda. A be wani gafa a nen fi en tu. Neen meke a be taki: ‘Meke ala sani aini mi gafa a santa nen fi en.’ A sani ya e soi taki David be wani gafa Yehofa anga en hii ati. A so den Leifisama be e gafa a nen fu Yehofa tu. Den be taki den naabi wowtu sai fu gafa a santa nen fu  Yehofa. (Leisi Nehemiya 9:5.) Ná pikin piisii Yehofa be e piisii te den be e gafa en.

7. Faw sa gafa a nen fu Yehofa te we du a peleikiwooko anga te we du den sani di u gwenti du ala dei?

⁷ Aini a ten ya, we meke Yehofa piisii te we leli taawan sani fi en. Te we taki anga den, we soi taki ai bigi giw taki wi anga en a mati. We soi tu taki u lobi en tuutuu. Te u de aini a peleikiwooko, a maiki fu u a fu yeepi sama fu toon Yehofa mati. U wani den lobi Yehofa enke faw lobi en (Yak. 4:8). We fii bun te we leli sama taki Yehofa a wan Gadu di lobi sama, ai du sani a wan letifasi, a koni, a taanga tu. Beibel e taki fu omen taa manii di Yehofa abi ete. Wan taa fasi fa we gafa a nen fu Yehofa a te we meke moiti fu waka neen baka (Efe. 5:1). Efu we du a sani ya, sama o si taki wi anga den sama fu a goontapu a ná aseefi. Kande den o akisi denseefi saide u de taa fasi (Mat. 5:14-16). Te u miti den sama ya, we abi a okasi fu soi den saide u de taa fasi. A sani ya sa meke a sama wani kon sabi moo sani fu a Gadu fu u. Te we gafa Yehofa a den fasi ya, ná pikin piisii ai piisii.​—1 Tim. 2:3, 4.

YESESI E PIISII TE WE GAFA A NEN FU YEHOFA

8. Saide a Yesesi na a moo bun sama di u sa waka neen baka te u mu gafa a nen fu Yehofa?

⁸ Fu ala den sama di Yehofa meke a hemel anga goontapu, a Yesesi na a sama di moo sabi en (Mat. 11:27). Yesesi lobi en Dda, neen meke ai gafa a nen fu Yehofa (Yoh. 14:31). A neti fosi a dede di a be e begi en Dda, a be taki san na a moo pelensipali sani fu saide a be kon a goontapu. A be taki: ‘Mi meke den kon sabi i nen’ (Yoh. 17:26). Fa a du a sani ya?

9. Sowtu ageisitoli Yesesi be gi fu soi fa Yehofa de tuutuu?

⁹ Boiti taki Yesesi be e soi sama taki Gadu nen a Yehofa, a be e leli den omen taa sani tu. Den Dyu di a be e leli be sabi a nen fu Gadu kaba. A Yesesi na a moo bun sama di be sa ‘leli den sani fu Gadu’ (Yoh. 1:17, 18). Den Hebrewbuku fu Beibel e soi taki Yehofa a wan Gadu di abi tyali-ati anga switifasi (Ek. 34:5-7). Yesesi be gi a toli fu a lasi manpikin fu soi taki a sani ya a tuu. A toli e soi taki di a dda si en boi ‘opo uku e kon’, a lon go miti en, a baasa en, neen a gi en paadon anga en hii ati. A toli ya e soi taki Yehofa a wan Gadu di abi tyali-ati anga switifasi (Luk. 15:11-32). Yesesi be e yeepi sama fu fusutan fa Yehofa de tuutuu.

10. (a) Faw du sabi taki Yesesi be e kai en Dda nen? Faw du sabi taki a be wani taa sama kai a nen fi en Dda? (Malikisi. 5:19) (Luku a fowtow tu.) (b) San Yesesi wani u du aini a ten ya?

¹⁰ Yesesi be wani taa sama kai a nen fi en Dda? Eeye. Son kelikifesiman na a ten fu Yesesi be e si enke i naabi lesipeki gi Gadu efi ye kai en nen. Ma Yesesi á be meke a gwenti ya tapu en fu gafa a nen fi en Dda. Wan leisi a be puu wan ogii yeye a wan man tapu na a pisi kondee fu den Gerasasama. Den sama ya be bigin feele, neen meke den be begi Yesesi efu a be sa komoto na a pisi kondee fu den. A so Yesesi komoto ape (Malik. 5:16, 17). Ma toku Yesesi be wani den sama ape sabi a nen fi en Dda.  Neen meke a be taigi a man di a be puu a ogii yeye neen tapu fu taigi a foluku taki a ná neen be meke a betee, ma a Yehofa be yeepi en. (Leisi Malikisi 5:19.) a Na aseefi sani ya Yesesi wani u du aini a ten ya tu. A wani u meke ala sama a hii goontapu sabi a nen fi en Dda (Mat. 24:14; 28:19, 20). Efu we du a sani ya, we meke Yesesi piisii.

11. Fa Yesesi be leli den bakaman fi en fu begi? Saide a sani ya pelensipali? (Eseikiyeli 36:23)

¹¹ Yesesi be sabi taki Yehofa wani santa a nen fi en. A wani u du a sani ya fu ala sama sabi taki den sani di den taki fi en a ná tuu. Neen meke a Masaa fu u Yesesi be leli den bakaman fi en fu begi taki: ‘U Dda di de a hemel, i nen mu santa’ (Mat. 6:9). Yesesi be sabi taki a santa di a nen fu Yehofa mu santa pelensipali gi ala den sama di e dini en. (Leisi Eseikiyeli 36:23.) Nawan engel efuso libisama du sani moo Yesesi fu santa a nen fu Yehofa. Toku di den kisi Yesesi, den feyanti fi en taki a kosi Gadu. Yesesi be sabi taki te wan sama e wisiwasi a nen fu Gadu, na a moo gaan sondu di wan sama sa du de ape. Neen meke ná pikin hati a be hati en di sama taki a be kosi Gadu. Kande na a sani ya meke sani ‘be e moo’ en fosi den kisi en.​—Luk. 22:41-44.

12. Fa Yesesi be e santa a nen fi en Dda?

¹² A omen sani sama be du anga Yesesi. Den be e kosi en, den be e pina en, den be e lei gi en tu. Winsi fa ala den sani ya be e miti en toku a holidoo, bika a be wani santa a nen fi en Dda. A be sabi taki a be e aliki en Dda ala yuu neen meke aa be abi fu booko en ede anga nawan sani (Heb. 12:2). A be sabi tu taki a Saatan be e meke tesi miti en (Luk. 22:2-4; 23:33, 34). Saatan be wani Yesesi daai baka gi Yehofa, ma noiti a be poi du a sani de. Yesesi soi kiin taki Saatan a wan ogii-ati leiman. A soi tu taki a omen sama de di e dini Yehofa anga den hii ati winsi fa tesi e miti den.

13. Faw sa meke a Kownu fu u piisii?

 ¹³ I wani a Kownu fu u di de a hemel piisii? Efii wani Yesesi piisii, dai mu e gafa a nen fu Yehofa ala yuu. I mu e yeepi taawan fu kon sabi den manii fu Yehofa tu. Efi ye du den sani ya, da we soi taki we waka a Yesesi baka (1 Peit. 2:21). Leti enke Yesesi ye meke Yehofa piisii. Ye soi tu taki Saatan a wan ogii-ati leiman.

WE KIBII SAMA LIBI TE WE GAFA A NEN FU YEHOFA

14-15. San a wantu moin sani di e pasa te we yeepi taawan fu kon sabi Yehofa?

¹⁴ We kibii sama libi te we gafa a nen fu Yehofa. Saide u taki so? Bika Saatan ‘beendi a fusutan fu den sama di nai biibi’ (2 Kor. 4:4). A sani ya meke den e biibi den lei di ai paati taki: Gadu á de, Gadu de faawe, a nai booko en ede anga libisama, Gadu abi ogii-ati, ai sitaafu den ogii sama fu teego. Saatan taki ala den lei ya fu di a wani poli a nen fu Yehofa. Aa wani sama kon koosube neen. Ma te we peleiki we tapu Saatan fu du san a abi a pakisei. We leli sama a waaleiti, we gafa a nen fu a Gadu fu u. San na a bakapisi?

¹⁵ Den sani di sikiifi aini a Wowtu fu Gadu e giw kaakiti. Te we yeepi taawan fu kon sabi Yehofa anga den manii di a abi, wan moin sani e pasa. Den sama di be e biibi den lei fu Saatan nai biibi den moo. Den e kon sabi taki Yehofa a wan Gadu di abi bun manii. Te den sama ya kon fusutan a kaakiti di Yehofa abi, den e lesipeki en (Yes. 40:26). Den e leli fu fitoow Yehofa, bika ai du sani a wan letifasi (Deit. 32:4). Den e leli omen sani fu a koni fi en tu (Yes. 55:9; Rom. 11:33). Boiti dati, den e kon sabi taki Yehofa a wan Gadu di lobi sama (1 Yoh. 4:8). Te den anga Yehofa toon mati, a howpu fu den fu libi fu teego a goontapu e kon moo taanga. A wan gaan gaandi wi abi fu yeepi sama fu den anga Yehofa toon mati. Efu we du a sani ya, da Yehofa o si wi enke sama ‘di e  wooko makandaa anga’ en.​—1 Kor. 3:5, 9.

16. Sowtu wini son sama fende di den kon sabi a nen fu Gadu?

¹⁶ Wan fu den fosi sani di we leli sama a taki Gadu nen a Yehofa. A sani ya sa kengi a libi fu wan sama di wani libi a wan letifasi. Wan yonkuu-uman den e kai Aaliyah b be kiya a wan keliki di á be e wooko anga a Beibel. Aa be e fii enke en anga Gadu a mati. Ma sani kengi di a bigin sutudeli Beibel anga den Yehofa Kotoigi. A be bigin si Gadu enke en mati. A be foondoo di a leli taki sama puu a nen fu Gadu aini omen Beibel neen den poti a wowtu Masaa. Di a kon sabi taki Gadu nen a Yehofa a sani ya kengi en hii libi. A taki: ‘A mati fu mi abi wan nen. Mi e fii bun nownow. Ai bigi gi mi taki mi sabi Gadu nen.’ Steve a wan pokuman di kiya aini wan Dyu biibi. Aa be e holibaka gi a keliki fi en moo, bika den be e du omen sani di á bun. Ma baka di en mma dede, a be sidon e aliki di wan Yehofa Kotoigi be e sutudeli anga wan mati fi en. Di a kon sabi a nen fu Gadu, a sani ya doo en ati te. A taki: ‘Noiti mi be sabi taki Gadu abi wan nen. A sani ya meke mi kon fusutan taki Gadu a wan tuutuu sama. Mi be sabi taki mi fende wan bun Mati.’

17. Saide i de kabakaba fu gafa a nen fu Yehofa ala yuu? (Luku a fowtow tu.)

¹⁷ Ye leli sama a nen fu Yehofa te ye peleiki? Ye yeepi den fu kon sabi fa Gadu de tuutuu? Efi ye du den sani ya, da ye gafa a nen fu Yehofa. Tan meke moiti fu gafa a nen fi en. Yeepi taa sama fu kon sabi fa Yehofa de tuutuu. Efi ye du den sani ya yo kibii sama libi. Ye soi tu taki ye waka na a Kownu fu u, Yesesi Kelestesi baka. Boiti dati, ye meke i Dda Yehofa piisii. ‘Gafa en nen ala yuu, eeye, fu teego.’​—Ps. 145:2.