1-2. Mbrɛ Jehovah si tse nka wɔ ne dzin a wɔasɛɛ no ho no, ebɛn mfatoho na obotum aboa hɛn ma yaatse ase?

 FA NO dɛ obi a epɛ n’asɛm aka asɛm bɔn bi afa wo ho. Inyim paa dɛ asɛm a ɔkae no nnyɛ nokwar, naaso binom agye edzi dɛ ɔyɛ nokwar. Dza ɔma asɛm no yɛ yaw mpo nye dɛ, ɔhyɛɛ ase kaa ho asɛm kyerɛɛ nkorɔfo ma nyimpa pii so bɛgyee dzii. Sɛ ɔba no dɛm a, ebɛtse nka dɛn? Sɛ edwen ebusuabɔ a enye afofor wɔ no ho, na dzin pa a ewɔ no so ho hia wo a, atorsɛm a ɔaka afa wo ho no bɛma edzi yaw paa.—Mbɛ. 22:1.

² Dɛm mfatoho yi botum aboa hɛn ma yeehu mbrɛ Jehovah sii tsee nka aber a wɔsɛɛ ne dzin no. Jehovah n’abɔfoe no mu kor kaa asɛm bi a ɔnnyɛ nokwar faa Jehovah ho kyerɛɛ Eve. Eve so gyee dɛm atorsɛm no dzii. Atorsɛm a ɔtse dɛm no maa hɛn awofo a wodzi kan no tseew Jehovah no do etua. Osian dza wɔyɛe ntsi, bɔn nye owu tserɛwee kaa nyimpa nyina. (Gen. 3:​1-6; Rom. 5:12) Akɔhwi a Satan dzii wɔ Eden ture mu hɔ no na wɔakɛfa ɔhaw ahorow a yehu wɔ wiadze yi mu no aba. Bi nye owu, akodzi nye amandzehu. Ehwɛ a, Jehovah dzi yaw wɔ atorsɛm a wɔkae faa ne dzin ho nye ɔhaw a woefi mu aba no ho anaa? Ekyingye biara nnyi ho dɛ odzi yaw. Naaso, Jehovah no bo mmfuwii. Nokwasɛm nye dɛ, Bible no mpo ka no ho asɛm dɛ ɔyɛ ‘enyigye Nyankopɔn.’—1 Tim. 1:11.

3. Ebɛn hokwan na yɛwɔ?

³ Yɛwɔ hokwan dɛ yɛbɔboa ma Jehovah ne dzin ho aatsew. Sɛ yebotum ayɛ dɛm a, ɔsɛ dɛ yetsie ahyɛdze a ɔno nye dɛ: ‘Hom nyi Jehovah ne dzin ayɛw’ no. (Ndw. 113:1) Sɛ yɛka ndzɛmba papa a Jehovah yɛ no ho asɛm kyerɛ nkorɔfo a, ɔkyerɛ dɛ yeriyi ne dzin krɔnkrɔn no ayɛw. Ibeyi Jehovah ne dzin no ayɛw anaa? Hom mma yɛnhwɛ ndzɛmba etsitsir ebiasa bi a obotum ekenyan hɛn ma yeefi hɛn akoma nyina mu eyi hɛn Nyankopɔn ne dzin no ayɛw.

 SƐ YEYI JEHOVAH NE DZIN AYƐW A, ƆMA N’ENYI GYE

4. Ebɛnadze ntsi na sɛ yeyi Jehovah ayɛw a ɔma n’enyi gye? Fa mfatoho kyerɛkyerɛ mu. (Hwɛ mfonyin no so.)

⁴ Sɛ yeyi hɛn sor Egya no ne dzin ayɛw a, ɔma n’enyi gye. (Ndw. 119:108) Naaso, ɔno kyerɛ dɛ adze nyina do tumfo Nyankopɔn no tse dɛ nyimpa a wɔpɛ dɛ afofor kamfo hɔn mbrɛ ɔbɛyɛ a wobohu dɛ hɔn so wɔbɔ hɔnho mbɔdzen no? Oho. Ɔwodze ma yɛnyɛ dɛm mfatoho yi. Fa no dɛ basiaba bi dze mbirika ekotu atar ne papa na ɔaka akyerɛ no dɛ, “Dada, mepɛ w’asɛm sen obiara!” Dza abofra no yɛe no bɛma papa no n’enyi agye na ɔbɛka n’akoma so. Ebɛnadze ntsi a? Aso ɔsɛ dɛ yenya adwen dɛ papa no pɛ dɛ ne ba no kamfo no ama oehu dɛ ɔbɔ noho mbɔdzen dɛ egya ntsi na n’enyi gyee no? Oho, ɔnntse dɛm koraa. Mbom no, n’enyi gyee osiandɛ ɔdɔ ne ba no, na ohu dɛ ne ba no so dɔ no na n’enyi sɔ dza ɔyɛ ma no no. Papa no nyim dɛ suban pa a ɔtse dɛm a abofra no wɔ no bɛma abofra no n’enyi agye aber a orinyin no. Dɛmara so na ɔtse wɔ Jehovah n’afamu. Dɛ Egya a ɔsen biara no, sɛ yeyi no ayɛw a, ɔma n’enyi gye.

5. Sɛ yeyi Nyankopɔn ne dzin no ayɛw a, ebɛn asɛm na yɛma ɔda edzi dɛ ɔnnyɛ nokwar?

⁵ Sɛ yeyi hɛn sor Egya no ayɛw a, yɛma ɔda edzi dɛ asɛm bi a Satan kae a ɔfa hɛn mu biara ho no nnyɛ nokwar. Satan aka dɛ nyimpa biara nnyi hɔ a obefi nokwardzi mu atsew Nyankopɔn ne dzin ho. Dza ɔrepɛ akyerɛ nye dɛ, nyimpa biara nnyi hɔ a sɛ ohyia nsɔhwɛ a, obedzi Nyankopɔn nokwar. Ɔse, sɛ yerihyia nsɔhwɛ na yenya adwen dɛ Nyankopɔn no som a yebegyaa no bɛma hɛnho atɔ hɛn a, yebegyaa. (Job 1:​9-11; 2:4) Naaso Job kɔr do dzii Jehovah nokwar, na dza ɔyɛe no maa ɔdaa edzi dɛ Satan yɛ ɔtorfo. Woara so ɛ, ebɔkɔ do edzi Nyankopɔn nokwar anaa? Hɛn mu biara wɔ hokwan dɛ ɔtsew hɛn sor Egya no ne dzin ho na ɔma n’enyi gye. Sɛ yɛyɛ dɛm a, ɔkyerɛ dɛ yɛdze nokwardzi rosom no. (Mbɛ. 27:11) Na ɔyɛ hokwan kɛse paa dɛ yɛbɛyɛ dɛm.

6. Yebesi dɛn esuasua Ɔhen David nye Levifo no? (Nehemiah 9:5)

⁶ Ɔdɔ a nokwar asomfo wɔ ma Nyankopɔn no na okenyan hɔn ma wofi hɔn akoma nyina mu yi ne dzin no ayɛw. Ɔhen David kaa dɛ: ‘Me kra hyira Jehovah, na dza ɔwɔ mo mu nyinara nhyira ne dzin krɔnkrɔn no.’ (Ndw. 103:1) Nna David nyim dɛ sɛ oyi Jehovah ne dzin no ayɛw a, nna oriyi Jehovah nankasa ayɛw. Sɛ yɛtse Jehovah ne dzin a, dza ɔba hɛn adwen mu nye nyia dɛm dzin no da no do, na iyi ma yɛdwendwen no su ahorow a ɔyɛ fɛw nye n’anwanwa ndwuma ho. Nna David bu n’Egya ne dzin no dɛ ɔyɛ krɔnkrɔn. Afei so, nna ɔpɛ dɛ oyi dzin no ayɛw. Nna ɔpɛ dɛ ɔdze ‘dza ɔwɔ no mu nyinara,’ kyerɛ dɛ, ofi n’akoma nyinara mu yi Jehovah ne dzin no ayɛw. Levifo no so, wodzii ɔmamfo no enyim  ma woyii Jehovah ayɛw. Wofi ahobrɛadze mu gyee too mu dɛ ayɛyi a wɔdze ma Jehovah ne dzin krɔnkrɔn no, onndu ayɛyi a ɔsɛ fata Jehovah ne dzin no ho beebiara. (Kenkan Nehemiah 9:5.) Ekyingye biara nnyi ho dɛ, ahobrɛadze a wɔdaa no edzi nye hɔn akoma nyinara mu a wofii yii Jehovah ne dzin no ayɛw no maa n’enyi gyee.

7. Yebesi dɛn eyi Jehovah ayɛw ber a yɛreyɛ asɛnka edwuma no nye afei hɛn da biara da asetsena mu?

⁷ Ndɛ so, sɛ yɛka Jehovah ho asɛm kyerɛ nkorɔfo ma wohu dɛ yɛdɔ no paa na hɛn enyi sɔ dza ɔyɛ ma hɛn no a, yɛbɛma n’enyi agye. Sɛ yɛreyɛ asɛnka edwuma no a, ɔsɛ dɛ yɛma ɔtsena hɛn adwen mu dɛ hɛn botae paa nye dɛ yɛbɔboa nkorɔfo ma wɔaabɛn Jehovah, na yɛaboa hɔn ma woeehu dɛ hɛn Egya no wɔ ɔdɔ dɛ mbrɛ hɛn so yenyim no. (Jas. 4:8) Hɛn enyi gye ho paa dɛ yɛbɛma nkorɔfo ehu mbrɛ Bible no si ka Jehovah ho asɛm no. Ɔma yehu dɛ Jehovah yɛ ɔdɔ, obu atsɛntsenenee, onyim nyansa, ɔwɔ tum na ɔsan so wɔ suban afofor a ɔyɛ fɛw. Afei so, sɛ yɛbɔ mbɔdzen dɛ yebosuasua Jehovah a, ɔkyerɛ dɛ yeriyi ayɛw, na ɔno ma n’enyi gye. (Eph. 5:1) Sɛ yɛyɛ dɛm a, ɔma yɛyɛ soronko fi hɔn a wɔnnsom Jehovah no ho. Bi a nkorɔfo bohu dɛ yɛda nsew, na wɔbɛpɛ dɛ wohu siantsir a yɛda nsew no. (Matt. 5:​14-16) Hɛn da biara da asetsena mu no, sɛ yehyia hɔn a wɔtse dɛm a, yebotum akyerɛkyerɛ hɔn ma woeehu siantsir a yɛda nsew no. Iyi bɛma hɔn a wɔwɔ akoma pa no abɔsom Jehovah hɛn Nyankopɔn no. Sɛ yɛfa akwan a ɔtsetse dɛm do yi Jehovah ayɛw a, ɔbɛma n’enyi agye.—1 Tim. 2:​3, 4.

SƐ YEYI JEHOVAH NE DZIN NO AYƐW A, ƆMA JESUS N’ENYI GYE

8. Ebɛn kwan do na Jesus edzi akotsen wɔ Jehovah ne dzin a yeriyi no ayɛw no mu?

⁸ Abɔfo na nyimpa nyina, obiara nnyi hɔ a onyim Egya no yie sen Ɔba no. (Matt. 11:27) Jesus dɔ n’Egya paa, na ɔno na odzi akotsen wɔ Jehovah ne dzin a yeriyi no ayɛw no mu. (John 14:31) Anafua a adze rebɛkye ma Jesus eewu no, ɔbɔɔ n’Egya mpaa na ɔkaa adze tsitsir a ɔbaa asaase yi do bɛyɛɛ no ho asɛm dɛ: “Miyii wo dzin kyerɛɛ hɔn.” (John 17:26) Asɛm a Jesus kae no, nna ɔrepɛ akyerɛ dɛn?

9. Ebɛn mfatoho na Jesus yɛe dze kyerɛkyerɛɛ mbrɛ n’Egya si tse ankasa no mu ma no mu daa hɔ?

⁹ Jesus maa nkorɔfo hun Nyankopɔn ne dzin Jehovah no, naaso nnyɛ iyi nkotsee na ɔyɛe. Nna Jewfo no nyim Nyankopɔn ne dzin no dada. Naaso Jesus nye obi a ‘ɔmaa wohun mbrɛ Egya no tse ankasa.’ (John 1:​17, 18) Dɛ nhwɛdo no, Hebrew Kyerɛwnsɛm no ma yehu dɛ Jehovah wɔ ehumbɔbɔr nye ayamuhyehye. (Ex. 34:​5-7) Jesus maa dɛm nokwasɛm a ɔfa Jehovah ho yi mu daa hɔ aber a ɔmaa mfatoho a ɔfa ɔbadzesɛɛfo nye n’egya ho no. Dɛm mfatoho no mu no, aber a egya no hun ne ba no dɛ ɔnam “ekyirkyir no,” otuu mbirika kɛyɛɛ no etuu na ofii n’akoma mu dze no bɔn nyina kyɛɛ no. Dɛm mfatoho yi boa hɛn ma yehu paa dɛ Jehovah wɔ ehumbɔbɔr nye ayamuhyehye. (Luke 15:​11-32) Nokwasɛm nye dɛ, Jesus boaa nkorɔfo ma wohun mbrɛ n’Egya tse ankasa.

10. (a) Ebɛnadze na ɔma yehu dɛ Jesus dze n’Egya ne dzin dzii dwuma, na ɔpɛ dɛ afofor so yɛ dɛmara? (Mark 5:19) (Hwɛ mfonyin no so.) (b) Ndɛ, ebɛnadze na Jesus pɛ dɛ yɛyɛ?

¹⁰ Nna Jesus san so pɛ dɛ nkorɔfo dze n’Egya ne dzin no dzi dwuma anaa? Nyew, nna ɔpɛ paa. Nna nyamesom mpanyimfo a wɔwɔ hɔ dɛm aber no mu binom kyerɛkyerɛ dɛ, Nyankopɔn ne dzin no yɛ krɔnkrɔn dodo ntsi ɔnnsɛ dɛ wɔbɔ. Naaso Jesus amma kwan ma atsetsesɛm a ɔtse dɛm a onngyina Bible do no ennsiw no kwan dɛ ɔbɛhyɛ n’Egya ne dzin no enyimnyam. Ɔwodze ma yɛnhwɛ dza Jesus yɛe aber a ɔsaa ɔbarimba bi a nna esunsum fi rehaw no wɔ Gerasafo hɔn asaase do no yarba no. Nkorɔfo a nna wɔwɔ hɔ no suroi, dɛm ntsi wɔserɛɛ Jesus dɛ omfi hɔn apaamu hɔ nkɔ. Na Jesus so fii hɔ kɔree.  (Mark 5:​16, 17) Naaso nna Jesus pɛ dɛ hɔn a wɔwɔ hɔ no hu Jehovah ne dzin. Ntsi ɔkaa kyerɛɛ ɔbarimba a ɔsaa no yarba no dɛ ɔnkɛka dza Jehovah ayɛ ama no no nkyerɛ nkorɔfo na nnyɛ dza ɔno Jesus ayɛ no. (Kenkan Mark 5:19.) a Ndɛ so, dɛmara na ɔpɛ dɛ hɛn so yɛyɛ. Ɔpɛ dɛ yɛma nkorɔfo hu n’Egya ne dzin no wɔ wiadze nyina! (Matt. 24:14; 28:​19, 20) Sɛ yɛyɛ dɛm a, yɛma hɛn Hen Jesus n’enyi gye.

11. Ebɛnadze na Jesus kaa kyerɛɛ n’ekyirdzifo no dɛ wɔmbɔ ho mpaa, na ebɛnadze ntsi na iyi ho hia? (Ezekiel 36:23)

¹¹ Nna Jesus nyim dɛ Jehovah no botae nye dɛ ɔbɛtsew ne dzin no ho na ɔama ada edzi dɛ nsɛm a wɔaka afa no ho no nnyɛ nokwar. Dɛm ntsi na hɛn Wura Jesus kyerɛɛ n’ekyirdzifo dɛ wɔmbɔ mpaa dɛ: “Hɛn Egya a ewɔ sor, wo dzin ho ntsew.” (Matt. 6:9) Nna Jesus nyim dɛ iyi nye asɛnhia a ɔda abɔdze nyina hɔn enyim. (Kenkan Ezekiel 36:23.) Sɛ yɛhwɛ abɔfo nye nyimpa a wɔwɔ amansan yi mu a, Jesus nye obi a ɔayɛ ndzɛmba pii dze atsew Jehovah ne dzin no ho sen obiara. Naaso aber a wɔkyeer Jesus no, n’atamfo bɔɔ no sombo dɛ ɔyɛ mbusubɔfo osiandɛ ommbu Nyankopɔn! Ɔda edzi dɛ Jesus tsee nka dɛ bɔn a ɔkyɛn bɔn biara a obi bɛyɛ nye dɛ ɔbɛsɛɛ n’Egya ne dzin krɔnkrɔn no. Ntsi nna ɔyɛ no yaw paa dɛ wɔdze sombo a ɔtse dɛm bɔbɔ no na woebu no fɔ. Ɔbɛyɛ dɛ iyi ntsi na aber a wɔaka kakra ma wɔaakyer Jesus no, noho yeraaw no paa no.—Luke 22:​41-44.

12. Kwan a ɔkyɛn biara a Jesus faa do tseew n’Egya ne dzin ho nye dɛn?

¹² Mbrɛ ɔbɛyɛ a Jesus bɛtsew n’Egya ne dzin ho ntsi, omiaa n’enyi gyinaa ayakayakadze a wɔdze yɛɛ no, ahorba a wɔhyehyɛɛ no nye atorsɛm a wɔkaa faa no ho no nyina ano. Nna onyim dɛ oetsie n’Egya wɔ adze nyina mu, ntsi ɔmmfa ho enyiwudze a wɔdze yɛɛ no nyina ekyir no, n’enyi annto. (Heb. 12:2) Afei so, nna onyim dɛ Satan nankasa na ɔdze ɔhaw a ɔtse dɛm reba no do wɔ mber a no mu yɛ dzen ma no no mu. (Luke 22:​2-4; 23:​33, 34) Nna dza Satan pɛ ara nye dɛ ɔbɛma Jesus egyaa dɛ obedzi Jehovah nokwar. Dza Jesus yɛe no maa Satan n’enyi too pɔtɔɔ. Ɔmaa ɔdaa edzi pefee dɛ Satan yɛ ɔtorfo a no ho yɛ hu. Afei so, ɔmaa ɔdaa edzi dɛ Jehovah wɔ nokwar asomfo a sɛ wohyia ɔhaw a no mu yɛ dzen dɛ dɛn ara mpo a, wɔbɔkɔ do edzi no nokwar!

13. Ebɛnadze na ibotum ayɛ ama wo Hen Jesus n’enyi agye?

 ¹³ Epɛ dɛ ema Jesus a ɔyɛ hɛn Hen no n’enyi gye anaa? Sɛ dɛm a, nna ɔno kɔ do yi Jehovah ne dzin no ayɛw na boa afofor ma wonhu mbrɛ hɛn Nyankopɔn no si tse ankasa. Sɛ eyɛ dɛm a, ɔkyerɛ dɛ iridzi Jesus n’anamɔn kyir. (1 Pet. 2:21) Dɛ mbrɛ Jesus yɛe no, ɔwo so ebɛma Jehovah n’enyi agye na ama wɔada edzi dɛ ne tamfo Satan yɛ ɔtorfo dabrabanyi!

SƐ YEYI JEHOVAH NE DZIN NO AYƐW A, YƐBOA MA NKORƆFO NYA NKWA

14-15. Sɛ yɛka Jehovah ho asɛm kyerɛ nkorɔfo a, ebɛn adze a ɔyɛ nwanwa na obotum esi?

¹⁴ Sɛ yeyi Jehovah ne dzin no ayɛw a, yɛboa ma nkorɔfo nya nkwa. Ebɛnadze ntsi na yɛreka dɛm? Siantsir nye dɛ, Satan ‘efura hɔn a wɔnngye nndzi no adwen enyi.’ (2 Cor. 4:4) Osian iyi ntsi, nyimpa a wɔtse dɛm no abɛgye atorsɛm a Satan keka no ato mu. Bi nye dɛ: Nyankopɔn nnyi hɔ, Nyankopɔn nye hɛn ntamu war papa, ɔnndwen nyimpa ho, ne tsirmu yɛ dzen na ɔyɛ ndzebɔnyɛfo ayakayakadze afebɔɔ. Siantsir a Satan keka atorsɛm a ɔtsetse dɛm ara nye dɛ ɔpɛ dɛ ɔsɛɛ dzin pa a Jehovah wɔ no. Afei so, ɔmmpɛ dɛ nkorɔfo bɔtwe abɛn Nyankopɔn na wɔasom no. Naaso asɛnka edwuma a yɛyɛ no mma dza Satan pɛ no mmba mu. Yɛka Nyankopɔn ho nokwasɛm kyerɛ nkorɔfo na yeyi ne dzin krɔnkrɔn no ayɛw. Ebɛnadze na ofi dza yɛyɛ no mu ba?

¹⁵ Bible mu nokwar no, tum wɔ mu paa. Sɛ yɛkyerɛkyerɛ nkorɔfo Jehovah ho adze na yɛboa hɔn ma wohu mbrɛ osi tse ankasa a, dza osi no yɛ nwanwa dɛ! Yehu dɛ hɔn a Satan dze n’atorsɛm efura hɔn enyiwa no, afei dze woruhu adze nkakrankakra. Iyi ma wobohu hɛn Egya a ɔwɔ ɔdɔ no dɛ mbrɛ hɛn so yehu no no. Sɛ wobohu no tum a onnyi ano no a, ɔyɛ hɔn nwanwa paa. (Isa. 40:26) Sɛ wohu dɛ Nyankopɔn bu atsɛntsenenee a, ɔma hɔn akoma tɔ hɔn yamu. (Deut. 32:4) Afei so, wosua ndzɛmba pii fi ne nyansa a no mu dɔ no mu. (Isa. 55:9; Rom. 11:33) Nkyii so, sɛ wobohu dɛ Nyankopɔn yɛ ɔdɔ a, ɔno kyekye hɔn werɛ. (1 John 4:8) Na aber a wɔrotwe abɛn Jehovah no, nna enyidado a wɔwɔ dɛ wɔbɛtsena ase daa dɛ ne mba no so reyɛ kɛse. Ɔyɛ hokwan kɛse paa na yeenya dɛ yɛbɔboa nkorɔfo ma wɔaatwe abɛn hɔn Egya! Sɛ yɛyɛ dɛm a, Jehovah bohu hɛn dɛ yɛyɛ ‘n’edwumaboafo.’—1 Cor. 3:​5, 9.

16. Sɛ nyimpa binom bohu Nyankopɔn ne dzin a, ɔma wɔtse nka dɛn? Ma ho nhwɛdo.

 ¹⁶ Sɛ yɛhyɛ ase nye obi bɔ Bible mu nkɔmbɔ a, bi a dza yɛbɛyɛ ara nye dɛ yɛbɛma oehu dɛ Nyankopɔn ne dzin nye Jehovah. Nyankopɔn ne dzin a yɛbɛma obi a ɔwɔ akoma pa ehu no botum aka n’akoma paa. Dɛ nhwɛdo no, Aaliyah b yɛ akataasia bi a wɔtsetsee wɔ ebusua a wɔnnyɛ Christianfo mu. Ɔsom a ɔwɔ mu no, nna ɔnenam mu ara. Afei so, nna ɔtse nka dɛ ɔnye Nyankopɔn nnyi ebusuabɔ biara. Naaso aber a ɔhyɛɛ ase dɛ ɔnye Adasefo no rusua adze no, biribiara sesae. Afei dze obohun Nyankopɔn dɛ ne Nyɛnko. Na aber a obohun dɛ woeyi Nyankopɔn ne dzin efi Bible nkyerɛase ahorow pii mu na wɔdze abɔdzin bi tse dɛ Ewuradze ahyɛ ananmu no, ɔyɛɛ no nwanwa paa. Jehovah ne dzin a obohunii no sesaa n’asetsena koraa. Ɔkaa dɛ: “Me Nyɛnko berɛbo no wɔ dzin!” Ebɛnadze na ofii mu bae? Ɔkaa dɛ: “Seseiara dze m’akoma atɔ me yamu. Metse nka dɛ ɔyɛ hokwan kɛse paa na menya.” Steve so yɛ ɔbarimba bi a ofi Jewfo ebusua mu a nna ɔtow ndwom. Nna ɔmmpɛ dɛ ɔdze noho kɔbɔ ɔsom biara, osiandɛ nna ohu dɛ wɔyɛ nyaatwem. Aber a oridzi awerɛhow wɔ ne maame no wu ho no, ohun dɛ Ɔdasefo bi nye obi rusua adze na ɔkɛtsenaa mu bi. Obohun Nyankopɔn ne dzin no, ɔkaa n’akoma paa. Ɔkaa dɛ: “Nna minnyim da dɛ saana Nyankopɔn wɔ dzin.” Ɔdze kaa ho dɛ: “Dɛm da no na mubohun dɛ Nyankopɔn wɔ hɔ ankasa! Na muhun dɛ ɔyɛ Obi a mubotum abɛn no. Dɛm da no na muhun dɛ menya Nyɛnko.”

17. Ebɛnadze ntsi na esi wo bo dɛ ebɔkɔ do eyi Jehovah ne dzin no ayɛw? (Hwɛ mfonyin no so.)

¹⁷ Sɛ ereyɛ asɛnka na ɔkyerɛkyerɛ edwuma no a, ɔyɛ a, eka Jehovah ne dzin krɔnkrɔn no ho asɛm kyerɛ nkorɔfo anaa? Eboa hɔn ma wohu mbrɛ Nyankopɔn si tse ankasa? Sɛ eyɛ dɛm a, ɔkyerɛ dɛ iriyi Nyankopɔn ne dzin no ayɛw. Kɔ do boa nkorɔfo ma wonhu Nyia ne dzin dze Jehovah no fa kyerɛ dɛ iriyi ne dzin krɔnkrɔn no ayɛw. Dɛm no, ebɔboa nkorɔfo ma woeenya nkwa. Afei so, ɔbɛkyerɛ dɛ iridzi wo Hen Christ Jesus n’ekyir. Na dza ɔkyɛn ne nyina no, ebɛma wo sor Egya Jehovah a ɔdɔ wo no n’enyi agye. Ɔmbra dɛ ‘ibeyi ne dzin no ayɛw daa daa daa!’—Ndw. 145:2.