1-2. Gbaa nɔkwɛmɔnɔ ko ni tsɔɔ bɔ ni Yehowa nuɔ he ehãa yɛ egbɛ́i ni afite lɛ he.

 ŊƆƆ lɛ akɛ, mɔ ko ni osumɔɔ esane waa ewie nɔ ko ni ehiii kwraa yɛ ohe. Ole akɛ nɔ ni ewie lɛ bɛ mli, shi mɛi komɛi ehe amɛye. Nɔ ni ehiii fe fɛɛ lɛ, mɛi ni ehe amɛye lɛ efeee diŋŋ, shi moŋ lɛ, amɛmiigba mɛi krokomɛi, ni no ehã mɛi pii ebahe amale lɛ amɛye. Te obaanu he ohã tɛŋŋ? Kɛ́ osumɔɔ mɛi asane ni osumɔɔɔ ni mɔ ko fiteɔ ogbɛ́i kpakpa lɛ, nɔ ni mɔ lɛ efee lɛ baagba onaa waa, aloo jeee nakai?—Abɛi 22:1.

² Nɔkwɛmɔnɔ nɛɛ hãa wɔnaa bɔ ni Yehowa nu he ehã be ni awo egbɛ́i lɛ he muji lɛ. Ebɔfoi lɛ ateŋ mɔ kome gba ehe amale etsɔɔ Hawa, ni ji klɛŋklɛŋ yoo lɛ. Hawa he amale lɛ eye, ni no hã ekɛ ewu fɛɛ tse Yehowa hiɛ atua. Atuatsemɔ nɛɛ hewɔ ni adesai fɛɛ feɔ esha ni amɛgboiɔ lɛ. (1 Mo. 3:​1-6; Rom. 5:12) Naagbai fɛɛ ni wɔkɛkpeɔ yɛ je lɛ mli ŋmɛnɛ, tamɔ gbele, tai, kɛ piŋmɔi lɛ fɛɛ jɛ malemɔ ni Satan bɔi malemɔ yɛ Eden abɔɔ lɛ mli lɛ. Ani edɔɔ Yehowa waa akɛ aafite egbɛ́i lɛ ni eetɔ adesai nɛkɛ? Hɛɛ, edɔɔ lɛ waa. Fɛɛ sɛɛ lɛ, Yehowa shwako ehe akɛ ebɔ adesai, ni emiishɛɛ hu etako. Yɛ anɔkwale mli lɛ, ekã he eji “miishɛɛ Nyɔŋmɔ lɛ.”—1 Tim. 1:11.

3. Mɛɛ hegbɛ wɔná?

³ Wɔná hegbɛ lɛ akɛ wɔbaaye wɔbua koni atse Yehowa gbɛ́i  lɛ he. Wɔbaanyɛ wɔfee nakai kɛ́ wɔye famɔ ni nyiɛ sɛɛ nɛɛ nɔ: “Nyɛjiea Yehowa gbɛ́i lɛ yi.” (Lala 113:1) Wɔjieɔ Yehowa gbɛ́i lɛ yi kɛ́ wɔwie Yehowa gbɛ́i lɛ he ekpakpa wɔtsɔɔ mɛi. Ani obaasumɔ ni ofee nakai? Nyɛhãa wɔkwɛa nibii etɛ komɛi ni he hiaa waa ni baatsirɛ wɔ ni wɔjɛ wɔtsui mli wɔjie Yehowa gbɛ́i lɛ yi.

YEHOWA NÁA MIISHƐƐ KƐ́ WƆJIE EGBƐ́I LƐ YI

4. Mɛni hewɔ Yehowa mii shɛɔ ehe kɛ́ wɔjie eyi lɛ? Okɛ nɔkwɛmɔnɔ ko atsɔɔ mli. (Kwɛmɔ mfoniri lɛ hu.)

⁴ Kɛ́ wɔjie wɔ-Tsɛ ni yɔɔ ŋwɛi lɛ gbɛ́i lɛ yi lɛ, enáa miishɛɛ. (Lala 119:108) Ani no tsɔɔ akɛ Nyɔŋmɔ Ofe lɛ tamɔ adesai ni yeee emuu ni sumɔɔ ni ajie amɛyi koni no awo amɛ hewalɛ? Dabi. Hã wɔkɛ nɔkwɛmɔnɔ nɛɛ atsɔɔ mli. Ŋɔɔ lɛ akɛ, gbekɛ yoo fioo ko jo foi kɛtee epapa ŋɔɔ ni efua lɛ ni ekɛɛ lɛ akɛ, ‘Dada, misumɔɔ osane waa. Mɔ ko bɛ ni tamɔ bo.’ Te papa lɛ baanu he ehã tɛŋŋ? Ebi lɛ wiemɔi lɛ baata etsui mli ni emii baashɛ ehe waa. Mɛni hewɔ? Ani papa lɛ nijiaŋ eje wui ni eemɛ ni ebi lɛ akɛɛ lɛ nɔ ko tamɔ nɛkɛ koni no awo lɛ hewalɛ? Dabi. Nɔ hewɔ ni enáa miishɛɛ ji akɛ, esumɔɔ ebi lɛ ni enaa hu akɛ ebi lɛ hu sumɔɔ esane, ni ehiɛ sɔɔ nibii ni efeɔ ehãa lɛ lɛ. Tsɛ lɛ le akɛ kɛ́ ebi lɛ kɛ sui nɛɛ da lɛ, ebi lɛ baaná miishɛɛ waa. Nɔ ko nɛkɛ nɔŋŋ hewɔ Yehowa, wɔ-Tsɛ ni fe fɛɛ lɛ, mii shɛɔ ehe kɛ́ wɔjie eyi lɛ.

5. Kɛ́ wɔjie Yehowa yi lɛ, mɛni Satan ewie ni wɔhãa anaa akɛ eji amale?

⁵ Kɛ́ wɔjie wɔ-Tsɛ ni yɔɔ ŋwɛi lɛ yi lɛ, ehãa anaa akɛ nɔ kroko ni Satan wie yɛ wɔteŋ mɔ fɛɛ mɔ he lɛ ji amale. Satan kɛɛ adesa ko bɛ ni baaya nɔ eye Yehowa anɔkwa kɛji ekɛ shihilɛ ni mli wa kpe. Ekɛɛ wɔbaakpa Yehowa sɔɔmɔ kɛ́ wɔnu he akɛ no baahã wɔhe ajɔ wɔ. (Hiob 1:​9-11; 2:4) Shi Hiob ye Yehowa anɔkwa ni ehã ana akɛ Satan ji amalelɔ. Ani bo hu obaaye Yehowa anɔkwa? Wɔteŋ mɔ fɛɛ mɔ baanyɛ akpɛ eyiŋ akɛ ebaafã Yehowa gbɛ́i lɛ he ni eya nɔ eye lɛ anɔkwa koni Yehowa aná miishɛɛ. (Abɛi 27:11) Enɛ ji hegbɛ kpele diɛŋtsɛ!

6. Mɛɛ gbɛ nɔ wɔbaanyɛ wɔkase Maŋtsɛ David kɛ Levibii lɛ? (Nehemia 9:5)

⁶ Mɛi ni sumɔɔ Nyɔŋmɔ lɛ jɛɔ amɛtsui mli amɛjieɔ egbɛ́i lɛ yi. Maŋtsɛ David wie akɛ: “Hã majie Yehowa yi; nɔ fɛɛ nɔ ni yɔɔ mimli lɛ ajie egbɛ́i krɔŋkrɔŋ lɛ yi.” (Lala 103:1) David le akɛ, kɛ́ wɔjie Yehowa gbɛ́i lɛ yi lɛ, belɛ Yehowa diɛŋtsɛ yi wɔjieɔ lɛ. Kɛ́ atsĩ Yehowa gbɛ́i tã lɛ, bɔ ni wɔle lɛ wɔhã, esui ni nɔ bɛ, kɛ nibii kpakpai ni efee ehã wɔ lɛ fɛɛ baa wɔjwɛŋmɔ mli. David kɛɛ ebaajie Yehowa gbɛ́i lɛ yi ni ehã efee krɔŋkrɔŋ. Ekɛɛ ebaafee nakai kɛ ‘nɔ fɛɛ nɔ ni yɔɔ emli,’ ni tsɔɔ akɛ, ebaafee  nakai kɛ etsui muu fɛɛ. Nakai nɔŋŋ Levibii lɛ hu jie Yehowa yi ni amɛwo maŋbii lɛ hu hewalɛ ni amɛfee nakai. Amɛjɛ heshibaa mli amɛwie akɛ, Yehowa gbɛ́i krɔŋkrɔŋ lɛ nɔ kwɔ kwraa fe wiemɔi fɛɛ ni amɛbaanyɛ amɛkɛjie egbɛ́i lɛ yi. (Kanemɔ Nehemia 9:5.) Ekã shi faŋŋ akɛ, bɔ ni amɛba amɛhe shi ni amɛjɛ amɛtsui mli amɛjie Yehowa gbɛ́i lɛ yi lɛ, hã Yehowa ná miishɛɛ waa.

7. Mɛɛ gbɛ nɔ wɔbaanyɛ wɔjie Yehowa yi be ni wɔnyiɛ shiɛmɔ nɔ kɛ be ni wɔkɛ mɛi sharaa daa gbi?

⁷ Ŋmɛnɛ lɛ, kɛ́ wɔwie nibii ni hãa anaa akɛ wɔsumɔɔ Yehowa waa ni wɔhiɛ sɔɔ nibii fɛɛ ni efee ehã wɔ lɛ, enáa miishɛɛ. Kɛ́ wɔtee shiɛmɔ lɛ, oti ni wɔkɛmaa wɔhiɛ ji, ni wɔbaaye wɔbua mɛi ni amɛbale Yehowa ni amɛ hu amɛna lɛ akɛ eji amɛ-Tsɛ, ni esumɔɔ amɛ. (Yak. 4:8) Enɛ hewɔ lɛ, wɔsumɔɔ akɛ wɔjɛ Biblia lɛ mli wɔhã mɛi ale akɛ Yehowa yɛ suɔmɔ, eyeɔ jalɛsane, ehiɛ kã shi, eyɛ hewalɛ, ni eyɛ sui kpakpai krokomɛi hu. Agbɛnɛ hu, wɔjieɔ Yehowa yi ni wɔhãa enáa miishɛɛ kɛ́ wɔbɔ mɔdɛŋ wɔkase lɛ. (Efe. 5:1) Kɛ́ wɔkase Yehowa lɛ, no hãa esoroɔ wɔ kwraa yɛ mɛi ni yɔɔ je lɛ mli lɛ ahe. Ni kɛ́ mɛi na akɛ esoro wɔ lɛ, ekolɛ amɛhiɛ baafee amɛ yaa ni amɛbaasumɔ ni amɛle nɔ hewɔ. (Mat. 5:​14-16) Be ni wɔkɛ amɛsharaa lɛ, ekolɛ wɔbaaná hegbɛ wɔgbala nɔ hewɔ ni esoro wɔ lɛ mli wɔtsɔɔ amɛ. Kɛ́ wɔfee nakai lɛ, no baahã mɛi ni hiɛ tsui kpakpa lɛ ashwe akɛ amɛle wɔ-Nyɔŋmɔ lɛ. Kɛ́ wɔtsɔ gbɛi nɛɛ anɔ wɔjie Yehowa yi lɛ, no baahã etsui anyɔ emli waa.—1 Tim. 2:​3, 4.

YESU NÁA MIISHƐƐ KƐ́ WƆJIE YEHOWA GBƐ́I LƐ YI

8. Mɛni hewɔ wɔbaanyɛ wɔkɛɛ akɛ, Yesu ji mɔ ni ejie Yehowa gbɛ́i lɛ yi fe mɔ fɛɛ mɔ?

⁸ Mɔ ko mɔ ko bɛ ŋwɛi kɛ shikpɔŋ lɛ nɔ ni le Yehowa jogbaŋŋ fe e-Bi Yesu Kristo. (Mat. 11:27) Yesu sumɔɔ e-Tsɛ, Yehowa waa. Lɛ ji mɔ ni ejie Yehowa gbɛ́i lɛ yi fe mɔ fɛɛ mɔ, ni esa akɛ wɔkase lɛ. (Yoh. 14:31) Gbi gbɛkɛ ni enɔ jetsɛremɔ lɛ abaagbe Yesu lɛ, nɔ ko ni ewie yɛ sɔlemɔ mli lɛ hãa wɔnaa nɔ ni ekɛ esɔɔmɔ nitsumɔ lɛ ni etsu yɛ shikpɔŋ nɛɛ nɔ lɛ fɛɛ tsu. Ewie akɛ: ‘Mihã ale ogbɛ́i lɛ.’ (Yoh. 17:26) Te efee enɛ ehã tɛŋŋ?

9. Mɛɛ nɔkwɛmɔnɔ Yesu gba kɛtsɔɔ bɔ ni e-Tsɛ lɛ ji faŋŋ?

⁹ Jeee Nyɔŋmɔ gbɛ́i Yehowa lɛ pɛ Yesu tsɔɔ mɛi. No mli lɛ, Yudafoi ni Yesu tsɔɔ amɛ nii lɛ le Nyɔŋmɔ gbɛ́i lɛ momo. Shi Yesu ji mɔ ni tsɔɔ amɛ mɔ tuuntu ni Yehowa ji. (Yoh. 1:​17, 18) Akɛ nɔkwɛmɔnɔ lɛ, Hebri Ŋmalɛ lɛ hãa wɔnaa akɛ, Yehowa lɛ, mɔbɔnalɔ kɛ musuŋtsɔlɔ ji lɛ. (2 Mo. 34:​5-7) Yesu fee enɛ faŋŋ be ni egba nɔkwɛmɔnɔ ko ni kɔɔ bi ni laaje lɛ kɛ etsɛ lɛ he lɛ. Kɛ́ wɔkane nɔkwɛmɔnɔ nɛɛ ni wɔna bɔ ni tsɛ lɛ hiŋmɛi gba ebinuu ni etsake etsui lɛ nɔ ‘be ni enyiɛ shɔŋŋ kɛmiiba,’ bɔ ni esha foi koni ekɛ lɛ ayakpe, bɔ ni efua lɛ atuu, kɛ bɔ ni ejɛ esuɔmɔ mli ekɛ ehe eshai lɛ ke lɛ lɛ, no hãa wɔnaa akɛ, Yehowa naa mɔbɔ ni emusuŋ tsɔɔ lɛ. (Luka 15:​11-32) Yesu hã ana bɔ ni e-Tsɛ lɛ yɔɔ diɛŋtsɛ.

10. (a) Te wɔfeɔ tɛŋŋ wɔleɔ akɛ be ni Yesu yɔɔ shikpɔŋ lɛ nɔ lɛ, ekɛ e-Tsɛ lɛ gbɛ́i tsu nii, ni eesumɔ ni mɛi krokomɛi hu kɛtsu nii? (Marko 5:19) (Kwɛmɔ mfoniri lɛ hu.) (b) Ŋmɛnɛ lɛ, mɛni Yesu miisumɔ ni wɔfee?

¹⁰ Ani Yesu miisumɔ ni mɛi krokomɛi kɛ Yehowa gbɛ́i lɛ atsu nii? Hɛɛ. Eeenyɛ efee akɛ, jamɔŋ hiɛnyiɛlɔi komɛi ni hi shi yɛ Yesu beiaŋ lɛ yasusu akɛ esaaa ni atsɛɔ Nyɔŋmɔ gbɛ́i lɛ ejaakɛ eyɛ krɔŋkrɔŋ tsɔ. Shi Yesu hãaa susumɔ nɛɛ ni damɔɔɔ ŋmalɛ nɔ lɛ atsi lɛ gbɛ ni ekajie e-Tsɛ lɛ gbɛ́i lɛ yi. Akɛ nɔkwɛmɔnɔ lɛ, be ko lɛ, Yesu fã daimonio yɛ nuu ko mli yɛ Gerasabii akpokpaa lɛ nɔ. Mɛi ni yɔɔ kpokpaa lɛ nɔ lɛ she gbeyei ni amɛkpa lɛ fai ni eshi jɛmɛ. No hewɔ lɛ eshi nakai kpokpaa lɛ nɔ. (Mar. 5:​16, 17) Shi Yesu miisumɔ ni mɛi  ale Yehowa gbɛ́i lɛ yɛ nakai kpokpaa lɛ nɔ. No hewɔ lɛ, ekɛɛ nuu lɛ ni efamɔ daimonioi lɛ yɛ emli lɛ akɛ, eya ni eyagba mɛi nɔ ni Yehowa efee ehã lɛ, jeee nɔ ni lɛ Yesu lɛ efee ehã lɛ. (Kanemɔ Marko 5:19.) a Ŋmɛnɛ lɛ, Yesu miisumɔ ni wɔ hu wɔhã ale e-Tsɛ lɛ gbɛ́i yɛ je lɛŋ he fɛɛ he. (Mat. 24:14; 28:​19, 20) Kɛ́ wɔhã mɛi le Yehowa gbɛ́i lɛ, Yesu, wɔ-Maŋtsɛ lɛ náa miishɛɛ.

11. Mɛni Yesu tsɔɔ esɛɛnyiɛlɔi lɛ ni amɛsɔle yɛ he? Ni mɛni hewɔ enɛ he hiaa lɛ? (Ezekiel 36:23)

¹¹ Yehowa eto eyiŋ akɛ ebaatse egbɛ́i lɛ he, ni tsɔɔ akɛ, ebaahã ana faŋŋ akɛ nibii gbohii fɛɛ ni awie yɛ ehe lɛ ji amale. Yesu le enɛ, no hewɔ ni etsɔɔ esɛɛnyiɛlɔi lɛ ni amɛsɔle akɛ: “Wɔ-Tsɛ ni yɔɔ ŋwɛi, ogbɛ́i lɛ he atse.” (Mat. 6:9) Yesu le akɛ, enɛ ji sane ni he hiaa fe fɛɛ ni kã ŋwɛibɔfoi kɛ adesai ahiɛ. (Kanemɔ Ezekiel 36:23.) Mɔ ko mɔ ko bɛ ŋwɛi loo shikpɔŋ lɛ nɔ ni etse Yehowa gbɛ́i lɛ he fe Yesu. Fɛɛ sɛɛ lɛ, be ni amɔ Yesu lɛ, ani ole nɔ ni ehenyɛlɔi lɛ folɔ enaa akɛ efee? Amɛfolɔ enaa akɛ ewie nibii ni tsɔɔ akɛ ebuuu Nyɔŋmɔ kwraa. Yesu le akɛ, esha ko bɛ ni yɔɔ hiɛdɔɔ fe ni mɔ ko baawo Yehowa gbɛ́i krɔŋkrɔŋ lɛ he muji ni ewie nibii ni tsɔɔ akɛ ebuuu lɛ kwraa. Edɔ lɛ waa akɛ abaafolɔ enaa ni abu lɛ fɔ akɛ efee esha ni tamɔ nɛkɛ. Eeenyɛ efee akɛ, enɛ ji yiŋtoo titri hewɔ ni Yesu ‘he jara lɛ waa’ be ni eshwɛ fioo ni abaamɔ lɛ lɛ.—Luka 22:​41-44.

12. Mɛni ji nɔ ni fe fɛɛ ni Yesu fee kɛtse e-Tsɛ lɛ gbɛ́i he?

¹² Apiŋ Yesu, ajɛ lɛ, ni afolɔ enaa. Fɛɛ sɛɛ lɛ, etee nɔ efi shi koni enyɛ etse e-Tsɛ lɛ gbɛ́i lɛ he. Yesu le akɛ esa akɛ ebo e-Tsɛ lɛ toi yɛ nibii fɛɛ mli. No hewɔ lɛ, efeee lɛ hiɛgbele akɛ ebaatsɔ nibii nɛɛ amli. (Heb. 12:2) Agbɛnɛ hu, ele akɛ Satan ji mɔ ni hɔ shihilɛi ni mli wawai fɛɛ ni etsɔ mli yɛ nakai be lɛ mli lɛ sɛɛ. (Luka 22:​2-4; 23:​33, 34) Satan yasusu akɛ ebaanyɛ ehã Yesu atɔ̃ Yehowa nɔ. Shi ehiɛ gbo kpɔtɔɔ ejaakɛ eyayeee omanye. Yesu hã ana faŋŋ akɛ, Satan ji amalelɔ, ni akɛ Yehowa yɛ tsuji anɔkwafoi ni baaye lɛ anɔkwa kɛji amɛkɛkai ni mli wawai po kpe!

13. Mɛni kɛ́ wɔfee lɛ, wɔ-Maŋtsɛ lɛ baaná miishɛɛ?

¹³ Ani oosumɔ ni ohã Yesu, ni ji wɔ-Maŋtsɛ lɛ aná miishɛɛ? Belɛ, yaa nɔ ojie Yehowa yi ni  oye obua mɛi koni amɛle lɛ jogbaŋŋ. Kɛ́ ofee nakai lɛ, belɛ ookase Yesu. (1 Pet. 2:21) Tamɔ Yesu fee lɛ, bo hu ohã Yehowa mii eshɛ ehe, ni oohã aana faŋŋ akɛ ehenyɛlɔ Satan ji amalelɔ!

WƆYEƆ WƆBUAA MƐI KONI AMƐNÁ WALA KƐ́ WƆJIE YEHOWA GBƐ́I LƐ YI

14-15. Kɛ́ wɔtsɔɔ mɛi Yehowa he nii lɛ, mɛɛ nibii kpakpai baanyɛ ajɛ mli kɛba?

¹⁴ Kɛ́ wɔjie Yehowa gbɛ́i lɛ yi lɛ, wɔwaa mɛi koni amɛná wala. Yɛ mɛɛ gbɛ nɔ? Satan “eshwila mɛi ni heee yeee lɛ ajwɛŋmɔi.” (2 Kor. 4:4) Enɛ hewɔ lɛ, amɛhe amalei tamɔ nɔ ni nyiɛ sɛɛ nɛɛ amɛye: Nyɔŋmɔ ko bɛ, Nyɔŋmɔ leee nɔ ni yaa nɔ yɛ adesai ashihilɛ mli ni esusuuu amɛhe, ni Nyɔŋmɔ yitsoŋ wa ni epiŋɔ efɔŋfeelɔi kɛyaa naanɔ. Satan gbɛɔ amalei nɛɛ eshwaa koni ekɛfite Yehowa gbɛ́i lɛ ni mɛi akabɛŋkɛ lɛ. Shi kɛ́ wɔshiɛ lɛ, wɔhãa Satan yiŋtoi lɛ feɔ efolo, ejaakɛ wɔtsɔɔ mɛi Yehowa he anɔkwalei lɛ ni wɔjieɔ egbɛ́i krɔŋkrɔŋ lɛ yi. Mɛni jɛɔ enɛ mli kɛbaa?

¹⁵ Nyɔŋmɔ Wiemɔ lɛ yɛ hewalɛ waa. No hewɔ lɛ, kɛ́ wɔtsɔɔ mɛi Yehowa he nii ni wɔye wɔbua amɛ ni amɛbale lɛ jogbaŋŋ lɛ, nibii kpakpai pii jɛɔ mli kɛbaa. Fiofio lɛ, amɛheee Satan amalei lɛ amɛyeee dɔŋŋ, ni amɛbanaa Yehowa sui kpakpai lɛ. Amɛbanaa akɛ, Yehowa yɛ hewalɛ waa ni no hãa amɛnaa kpɛɔ amɛhe. (Yes. 40:26) Amɛnaa hu akɛ, Yehowa yeɔ jalɛ sane be fɛɛ be, ni no hãa amɛkɛ amɛhiɛ fɔ̃ɔ enɔ. (5 Mo. 32:4) Agbɛnɛ hu, amɛkaseɔ nibii pii yɛ edɛŋ ejaakɛ ehiɛ kã shi waa. (Yes. 55:9; Rom. 11:33) Ni kɛ́ amɛbale akɛ Nyɔŋmɔ lɛ, suɔmɔ ji lɛ lɛ, eshɛjeɔ amɛmii waa. (1 Yoh. 4:8) Be ni naanyobɔɔ ni yɔɔ amɛ kɛ Yehowa teŋ lɛ mli waa lɛ, amɛnáa hiɛnɔkamɔ ni mli wa akɛ amɛbaatsɔmɔ Nyɔŋmɔ bii ni amɛbaahi shi kɛya naanɔ. Eji hegbɛ kpele ni wɔná akɛ, wɔbaaye wɔbua mɛi koni amɛbɛŋkɛ amɛ-Tsɛ, Yehowa. Kɛ́ wɔye wɔbua mɛi yɛ nɛkɛ gbɛ nɔ lɛ, Yehowa baana wɔ akɛ ‘enanemɛi nitsulɔi.’—1 Kor. 3:​5, 9.

16. Te mɛi komɛi nuɔ he amɛhãa tɛŋŋ kɛ́ atsɔɔ amɛ Nyɔŋmɔ gbɛ́i lɛ? Gbaa enɛ he niiashikpamɔi komɛi.

¹⁶ Kɛ́ wɔkɛ mɔ ko bɔi nikasemɔ lɛ, ekolɛ nɔ klɛŋklɛŋ ni wɔbaatsɔɔ lɛ ji, Nyɔŋmɔ gbɛ́i Yehowa lɛ. Kɛ́ mɔ lɛ hiɛ tsui kpakpa lɛ, enɛ po  kɛkɛ ni wɔbaatsɔɔ lɛ lɛ baanyɛ atsake eshihilɛ kwraa. Akɛ nɔkwɛmɔnɔ lɛ, oblayoo ko ni atsɛɔ lɛ Aaliyah b lɛ kɛ efɔlɔi yɛ jamɔ ko ni heee Biblia lɛ eyeee lɛ mli. Shi enyaaa jamɔ mli ni eyɔɔ lɛ he, ni enuuu he akɛ wekukpaa ko yɛ lɛ kɛ Nyɔŋmɔ teŋ. Shi be ni Odasefoi kɛ lɛ bɔi nikasemɔ lɛ, bɔ ni enaa Nyɔŋmɔ ehãa lɛ tsake. Fiofio lɛ, ebana Nyɔŋmɔ akɛ e-Naanyo. Be ni ená ele akɛ ajie Nyɔŋmɔ gbɛ́i lɛ yɛ Bibliai pii amli ni akɛ gbɛnaa gbɛ́i tamɔ Nuŋtsɔ eye najiaŋ lɛ, enaa kpɛ ehe waa. Yehowa gbɛ́i ni ekase lɛ tsake eshihilɛ kwraa. Ewie akɛ: “Eei, mi-Naanyo ni misumɔɔ esane waa lɛ yɛ gbɛ́i.” Te no hã Aaliyah nu he ehã tɛŋŋ? Ewie akɛ: “Bianɛ lɛ, mitsui enyɔ mimli waa. Eji hegbɛ kpele ni miná akɛ mibale Yehowa.” Naa oblanyo ko ni foɔ lala ni atsɛɔ lɛ Steve lɛ hu niiashikpamɔ. Ejɛ weku ko ni yɔɔ Yuda jamɔ lɛ mli, ni amɛkɛ amɛjamɔ lɛ shwɛɛɛ kwraa. Shi be ni eyɔse akɛ jamɔi lɛ feɔ osato lɛ, ekpɛ eyiŋ akɛ ekɛ ehe dɔmɔŋ jamɔ kuu ko kwraa. Shi be ni emami gbo lɛ, gbi ko be ni akɛ mɔ ko miikase nii lɛ, eyafata he. Be ni ená ele Nyɔŋmɔ gbɛ́i lɛ, eta etsuiŋ waa. Ewie akɛ: “Atsɔko mi Nyɔŋmɔ gbɛ́i lɛ da.” Ekɛfata he akɛ: “No ji klɛŋklɛŋ be ni mina akɛ Nyɔŋmɔ yɛ lɛɛlɛŋ. Nakai gbi lɛ, mina akɛ miná Naanyo.”

17. Mɛni hewɔ otswa ofai shi akɛ obaaya nɔ ojie Yehowa gbɛ́i lɛ yi? (Kwɛmɔ mfoniri lɛ hu.)

¹⁷ Kɛ́ otee shiɛmɔ loo okɛ mɛi miikase Biblia lɛ, ani otsɔɔ mɛi Nyɔŋmɔ gbɛ́i krɔŋkrɔŋ, ni ji Yehowa lɛ? Ani oyeɔ obuaa amɛ koni amɛbale Nyɔŋmɔ jogbaŋŋ? Kɛ́ ofeɔ nakai lɛ, belɛ oojie Nyɔŋmɔ gbɛ́i lɛ yi. Yaa nɔ ojie Yehowa gbɛ́i krɔŋkrɔŋ lɛ yi, ni oya nɔ oye obua mɛi koni amɛbale lɛ jogbaŋŋ. Kɛ́ ofee nakai lɛ, obaahere mɛi ayiwala. Ebaatsɔɔ hu akɛ, onyiɛ Kristo Yesu, wɔ-Maŋtsɛ lɛ sɛɛ. Nɔ ni fe fɛɛ lɛ, obaahã Yehowa, wɔ-Tsɛ ni yɔɔ ŋwɛi ni sumɔɔ wɔ lɛ aná miishɛɛ. No hewɔ lɛ, tswaa ofai shi akɛ, ‘obaajie egbɛ́i lɛ yi kɛya naanɔi anaanɔ’!—Lala 145:2.