1-2. Kisa ki pouvé idé nou konprann sa Jéova ka rousanti parapòrta manti yé ka di asou li ?

 IMAJINÉ sa sitiasyon-an : Roun moun to kontan bokou ka di roun vyé bagaj asou to. A roun manti, mé i gen sa ki ka krè l’. Pi mal ankò, yé k’alé répété sa. Finalman, roun patché moun ka koumansé krè sa manti-a. Kisa to ka rousanti atò ? Si to répitasyon ké sa ròt-ya ka pansé di to enpòrtan pou to, sa manti-a ka fè to lapenn bokou, pa vré ? (Prov. 22:1).

² Sa èkzanp-a ka idé nou konprann sa Jéova rousanti lò yé sali so répitasyon. Roun di so pitit èspirityèl di Èv, prémyé madanm-an, roun manti asou li. É Èv krè l’. Akoz di sa manti-a, nou prémyé papa ké nou prémyé manman tounen yé do bay Jéova. É akoz di sa, péché-a ké lanmò-a antré « annan monn-an » (Rom. 5:12 ; Gen. 3:1-6). Tout problèm nou ka jwenn jòdla (lanmò, lagèr, soufrans) ka èkzisté paské Satan manti annan jarden Édèn-an. Mé ès Jéova gen lapenn akoz di sa manti-a ké tout déga sa mennen ? Asiré pa pitèt. Pourtan, i pa yèg, é i pa ka tchenbé pyès moun asou so tchò akoz di sa. I pito ka rété « Bondjé ki éré-a » (1 Tim. 1:11).

3. Ki bèl lònò nou gen ?

³ Nou pouvé montré ki Satan manti asou Jéova lò nou ka obéyi sa koumannman-an ki tou senp : « Louwé non Jéova-a » (Ps. 113:1). Nou ka fè sa lò nou ka di bon bagaj asou moun-an ki ka poté sa non-an ki sen. Ès to anvi fè l’ ? Annou wè trwa rézon ki ké bay nou ankò plis anvi louwé non nou Bondjé ké tout nou tchò.

 NOU KA FÈ JÉOVA PLÉZI

4. Poukisa Jéova kontan lò nou ka louwé l’ ? Bay roun èkzanp (gadé zimaj-a osi).

⁴ Lò nou ka louwé non nou Papa ki annan syèl-a, nou ka fè l’ plézi (Ps. 119:108). Ès sa lé di ki Bondjé ki tou-pwisan-an, kou roun moun ki pa parfè ki lé ròt-ya louwé li paské i bézwen yé ankourajé l’ ? Non. Annou pran roun èkzanp. Roun tifi ka kroké so papa é ka di li : « I pa gen pyès papa ki pi fò pasé to ! » Sa ka fè papa-a plézi, é sa ka touché l’. Si i kontan, a pa paské i bézwen so tifi ankourajé l’ épi poté li anlè. A pito paské i kontan wè so tifi montré li so lanmou ké so rékonésans. Anplis di sa, papa-a savé ki lò i ké gran, so tifi ké éré paské i gen sa bèl kalité-ya. A menm bagaj-a pou nou. Lò nou ka louwé Jéova, Papa-a ki pi gran pasé pyès ròt papa, nou ka fè l’ plézi.

5. Lò nou ka louwé non Bondjé-a, nou ka montré ki roun bagaj Satan di, pa vré. Kilès ?

⁵ Lò nou ka louwé nou Papa ki annan syèl-a, nou ka baré Satan ké manti i di asou nou chak. I ka di ki pyès moun pa ké défann non Jéova-a ké fidélité. Dapré li, nou pyès pa fidèl é nou tout nou ké viré nou do bay Jéova si nou ka pansé ki sa pi bon pou nou (Job 1:9-11 ; 2:4). Mé Jòb rété fidèl é i byen montré ki Satan ka manti. É to menm, ès to ké rété fidèl ké Jéova ? Nou chak nou gen posibilité adoré l’ ké fidélité pou défann so non épi fè so tchò kontan (Prov. 27:11). A roun lònò pou nou !

6. Kouman nou pouvé imité rwa David ké Lévit-ya ? (Néhémie 9:5).

⁶ Sèrvitèr Bondjé-ya lé louwé so non ké tout yé tchò paské yé kontan sa non-an. Men sa rwa David ékri : « Mo lé louwé Jéova ; a pou mo louwé so non ki sen ké tou mo nanm » (Ps. 103:1). David té ka konprann ki lò i té ka louwé non Jéova-a, a Jéova li menm i té ka louwé. Kou non Jéova-a ka maché ansanm ké so répitasyon, lò nou ka sonjé sa non-an, nou ka sonjé tout bèl kalité nou Bondjé gen ké tout bèl bagaj i ka fè. David té lé wè non so Papa kou roun non ki sen épi louwé l’. I té lé fè l’ ké « tout so nanm », sa lé di ké tout so tchò. A sa plizyèr Lévit fè. A ké imilité yé rékonnèt ki menm si yé té ka louwé Jéova, sa pa té ké janmen asé pou bay so non ki sen, lònò i mérité-a (li Néhémie 9:5). Nou pouvé sir ki lò yé té ka louwé Jéova ké imilité, sa té ka fè l’ plézi.

7. Kouman nou pouvé louwé Jéova lò nou ka préché épi annan nou lavi touléjou ?

 ⁷ Jòdla, nou pouvé fè Jéova plézi lò nou ka palé di li roun fason ki ka montré ki nou gen rékonésans é ki nou kontan l’ bokou. Lò nou ka préché, annou pa bliyé ki sa nou lé, a fè moun-yan vini òbò Jéova, idé yé rousanti sa nou menm nou ka rousanti pou nou Papa ki annan syèl-a (Jacq. 4:8). A pa ti kontan nou kontan ansényé moun-yan sa Labib ka di asou Jéova, parèkzanp asou so lanmou, so jistis, so sajès, so pwisans ké ròt bèl kalité i gen. Anplis di sa, nou ka louwé Jéova é nou ka fè l’ plézi lò nou ka fè tousa nou pouvé pou nou imité l’ (Éph. 5:1). Annan sa monn-an ki mové, moun-yan ka wè kouman nou ka fè é sa ka fè roun ran annan yé doumandé yé kò poukisa nou diféran (Mat. 5:14-16). Lò nou ka kontré ké sa moun-yan, nou gen lokazyon èspliké yé poukisa nou konsa. Sa-ya ki sensèr anvi vini òbò Jéova. Lò nou ka louwé nou Bondjé konsa, sa ka fè so tchò kontan bokou (1 Tim. 2:3, 4).

NOU KA FÈ JÉZI PLÉZI

8. Poukisa Jézi, a pi bon èkzanp i ganyen annan zafè louwé non Jéova-a ?

⁸ I pa gen pyès moun, ni annan syèl-a, ni asou latè-a ki konnèt Papa-a pi byen pasé Pitit-a (Mat. 11:27). Jézi kontan so Papa é a pi bon èkzanp i ganyen annan zafè louwé non Jéova-a (Jean 14:31). Lò i priyè so Papa lannwit anvan i mouri-a, i palé di sa ki té pi enpòrtan annan so ministèr asou latè-a. I di : « Mo fè yé konnèt to non » (Jean 17:26). Kisa i té lé di ?

9. Ki èkzanp Jézi pran pou byen èspliké ‘ki kalité moun Papa-a sa’ ?

⁹ Jézi fè moun-yan savé ki non Bondjé-a, a Jéova, mé a pa sa rounso i fè. Anfèt, Jwif-ya té ja konnèt non Bondjé-a. Mé Labib ka di ki ‘a [Jézi] ki èspliké ki kalité moun [Papa-a] sa’ (Jean 1:17, 18). Parèkzanp, Ékritir ébrayik-ya té ja ka di ki Jéova gen mizérikòrd ké konpasyon (Ex. 34:5-7). Mé gras a èkzanp papa-a ké pitit ki té pédi-a, Jézi fè sa vérité-a vin pi klè ankò. Annan sa èkzanp-a, Jézi ka palé di roun papa ki ka wè so pitit ki répanti é ki, ‘menm si i lwen toujou’, ka kouri jwenn li, ka kroké l’, é ka pardonnen l’ ké tout so tchò. Lò nou ka li sa istwè-a, nou ka byen konprann ki Jéova gen mizérikòrd ké konpasyon (Luc 15:11-32). Wi, Jézi idé ròt-ya konprann ki kalité moun Papa-a sa vréman.

10. a) Kouman nou savé ki Jézi té ka sèrvi non so Papa é ki i té lé ki ròt moun sèrvi sa non-an osi ? (Marc 5:19 ; gadé zimaj-a osi). b) Kisa Jézi lé nou fè jòdla ?

¹⁰ Ès Jézi té lé ròt moun sèrvi non so Papa ? Wi. Annan so lépòk, roun ran chèf rélijyé té ka pansé ki lò yé té ka di non Bondjé yé té ka dérèspèkté l’. Mé Jézi pa janmen lésé sa tradisyon-an ki pa té k’alé ké Ékritir-ya, anpéché l’ onoré non so Papa. Roun jou, annan réjyon Jérazényen-an, i géri roun mouché ki té gen démon asou l’. Kou yé té pè, roun ran moun annan sa koté-a sipliyé Jézi, yé di l’ chapé (Marc 5:16, 17). Magré sa, Jézi té lé moun sa koté-a konnèt non Jéova-a. A pou sa, lò i voyé mouché i té géri-a di sa ki té rivé l’, i pa di li rakonté sa Jézi té fè, mé sa Jéova té fè  (li Marc 5:19 a). Jòdla, a menm bagaj Jézi lé : i lé nou fè tout moun asou tout latè-a konnèt non so Papa ! (Mat. 24:14 ; 28:19, 20). Lò nou ka fè sa, nou ka fè Jézi, nou Rwa, plézi.

11. Ki lapriyè Jézi anprann so disip, é poukisa sa enpòrtan nou fè sa lapriyè-a ? (Ézéchiel 36:23).

¹¹ Jézi té savé ki Jéova lé sanktifyé so non, sa lé di lavé l’ di tout mové bagaj yé di asou l’. A pou sa, nou Mèt anprann nou sa lapriyè-a : « Nou Papa ki annan syèl-a, a pou to non sanktifyé » (Mat. 6:9). Jézi té savé ki zafè sanktifikasyon non so Papa, a sa ki pi enpòrtan-an (li Ézéchiel 36:23). I pa gen pyès moun, ni annan syèl-a, ni asou latè-a ki fè plis bagaj pasé Jézi pou sanktifyé non Jéova-a. Pourtan, lò yé arété l’, kisa so lèlmi di i té fè ? Yé di ki i té dérèspèkté non Bondjé ! Nou pouvé sir ki pou li, roun moun pa pouvé fè roun péché pi grav pasé jouré ouben manti asou non so Papa ki sen. Lò i té ka sonjé ki yé té ké akizé l’ di fè roun bagaj konsa épi yé té ké arété l’, sa té ka boulvèrsé l’. A dèt pou sa i té « tèlman angwasé » roun ti moso tan anvan yé arété l’ (Luc 22:41-44).

12. Kisa Jézi fè pou sanktifyé non so Papa ?

¹² Pou sanktifyé non so Papa, Jézi soufri bokou, i asèpté yé jouré l’ é yé manti asou l’. I té sir ki i té obéyi so Papa annan tout bagaj ; i pa té bézwen ronté (Héb. 12:2). I té savé osi ki a té Satan ki té ka ataké l’ dirèktéman annan sa moman-an ki té rèd (Luc 22:2-4 ; 23:33, 34). Djab-a té ka chaché roun mwayen pou anpéché Jézi rété fidèl. Mé magré tousa i fè, i pa rivé ! Jézi byen montré ki Satan, a roun moun méchan ki ka manti, é ki Jéova gen moun ki ka adoré l’ é ki byen désidé rété fidèl menm anba pi mové éprèv i pouvé gen !

13. Kouman to pouvé fè to Rwa plézi ?

¹³ Ès to anvi fè to Rwa plézi ? Si to lé fè l’, kontinyé fè tout moun konnèt ki kalité moun to Bondjé sa pou louwé non Jéova-a, konsa to ké imité Jézi  (1 Pierre 2:21). Kou li, to ké fè tchò Jéova kontan é to ké montré ki to lèlmi Satan, a roun moun ki ka manti san i pa menm ronté !

NOU KA IDÉ MOUN SOVÉ YÉ LAVI

14-15. Ki bagaj pouvé rivé lò nou ka fè roun moun konnèt ki kalité moun Jéova sa vréman ?

¹⁴ Lò, nou ka louwé non Jéova-a, nou ka idé moun sové yé lavi. Kouman nou ka fè sa ? Pa bliyé ki Satan ka ‘bloublou entélijans sa-ya ki pa ka krè’ (2 Cor. 4:4). A konsa, roun patché moun ka koumansé krè sa manti-ya ki ka vini di Satan. Parèkzanp : Bondjé pa ka èkzisté, Bondjé lwen é i pa mélé ké nou, Bondjé mové é i ka fè sa-ya ki ka fè mové bagaj soufri pou tout-tan. Satan ka di sa kalité manti-ya pou sali non ké répitasyon Jéova-a é pou anpéché moun-yan anvi vini òbò li. Mé lò nou ka préché, nou ka anpéché Satan fè sa. Nou ka louwé non nou Papa ki sen lò nou ka anprann moun-yan lavérité asou li. Kisa sa ka bay ?

¹⁵ Vérité-ya ki annan Paròl Bondjé-a fò menm. Lò nou ka idé moun-yan anprann kimoun Jéova sa vréman, nou ka wè roun bagaj ka fèt ki bèl toubonnman. Satan pa ka rivé anpéché sa moun-yan wè lavérité-a ankò, donk yé ka koumansé wè nou Papa kou nou ka wè l’. So pwisans ki pa gen limit ka fè yé rété èstébékwé (Is. 40:26). Yé ka vin sir ki so jistis parfè (Deut. 32:4). Yé ka anprann roun patché bagaj gras a so sajès ki gran toubonnman (Is. 55:9 ; Rom. 11:33). É sa ka konsolé yé lò yé ka anprann ki i sa lanmou (1 Jean 4:8). Pi yé ka vin pròch di li, pi yé gen èspwar divini so pitit é viv pou tout-tan. A pa ti bèl lònò nou gen. Nou pouvé idé yé vin pròch di yé Papa ! Lò nou ka fè sa, Jéova ka wè nou kou dé moun ki ka « travay ansanm » ké li (1 Cor. 3:5, 9).

16. Lò roun ran moun ka anprann ki Bondjé gen roun non, kisa sa ka fè yé ? Bay plizyèr èkzanp.

¹⁶ O koumansman, pitèt sèl bagaj nou ka di moun-yan, a ki non Bondjé, a Jéova. Pourtan, sa sèl bagaj-a pouvé chanjé  lavi roun moun ki sensèr. Annou pran èkzanp Aaliyah b, roun jenn madanm ki lévé annan roun fanmi ki pa krétyen. I pa té ka trapé sa i té bézwen annan so rélijyon é i pa té ka santi ki i té pròch di Bondjé. Mé, i étidyé Labib ké Témwen Jéova-ya, é tout bagaj chanjé. I koumansé wè Jéova kou so Zanmi. Anplis di sa, i rété èstébékwé lò i anprann ki yé té tiré non Bondjé annan roun patché Labib é ki yé té ranplasé l’ ké roun patché tit kou « Sényèr ». Lò i anprann non Jéova-a, so lavi chanjé nèt. Men sa i di : « Mo pi bon Zanmi gen roun non ! » Lò Aaliyah anprann sa, kisa sa fè li ? I ka di : « Aprézan, mo gen lapè annan mo tchò. A pa ti lònò Bondjé ka fè mo. » Steve té ka fè lanmizik é i lévé annan roun fanmi jwif. Lò i wè kouman moun ki té annan rélijyon-yan té ipokrit, i pa té lé tandé palé di rélijyon ankò. Mé lò so manman mouri, i asèpté rété kouté pannan rounòt moun té ka étidyé Labib ké roun Témwen Jéova. A konsa i anprann non Bondjé é sa touché l’ bokou. I ka di : « Mo pa té janmen tandé palé di non Bondjé. A té prémyé fwa mo té ka konprann ki Bondjé té ka èkzisté vréman ! Aprézan, mo té ka wè l’ kou roun moun ki té ka èkzisté vré. A konsa mo konprann ki mo té trapé roun zanmi. »

17. Poukisa to byen désidé louwé non Jéova-a ? (gadé zimaj-a osi).

¹⁷ Lò to ka préché é to ka ansényé, ès to ka fè moun-yan konnèt non Jéova-a ki sakré ? Ès to ka idé yé wè nou Bondjé kou i fika vréman ? A roun fason di louwé non Jéova-a. Donk, kontinyé fè moun-yan konnèt Moun-an ki ka poté sa non-an ki sen, konsa, to ké louwé sa non-an. Konsa, to ké idé roun patché moun sové yé lavi é to ké swiv èkzanp nou Rwa, Jézi Kris. Mé pi enpòrtan-an, to ké fè to Papa ki kontan to, Jéova, plézi. Atò, a pou to byen désidé ‘louwé so non pou tout-tan’ ! (Ps. 145:2).