1-2. Tera ae e kona ni buokira n ota n ana namakin Iehova ngke e uaraoaki arana?

 IANGOA aei: E taekina te bwai ae aki raoiroi ibukim te aomata ae ko tatangiria. Ko ataia ae e kewe te bae taekinna, ma iai tabeman aika kakoauaa. Ma ae kakaiaki riki, a a kaokioka te kewe anne ao a bati aika kakoauaa naba. E na tera am namakin? Ngkana ko tabe ma aomata ao taekam ae raoiroi, ane ko na rawawata n te uarao anne, tiaki ngaia?—TaeRab. 22:1.

² E kona ni buokira te bwai ae riki anne n ota n ana namakin Iehova ngke e kabuakakaaki. E taekina te kewe ibukina, natina temanna ae te anera nakon te moan aine ae Ewa. E kakoauaa te kewe aei neiei. A kairaki ara moani karo n te kewe anne bwa a na karitei nakon Iehova. Ibukin anne, a a ituaki n te bure ao te mate aomata. (KBwaai 3:1-6; IRom 5:12) Kangaanga ni kabane aika ti nori n te aonnaba aei n aron te mate, te buaka, ao te rawawata, a bane n riki ibukin ana kewe Tatan are e moan taekinna n te onnaroka are i Eten. E maraki Iehova n te uarao anne ao ni baika riki mai iai? Eng. Ma e aki nanokawaki ke n un Iehova. Ni kaitaraan anne, e teimatoa n riki bwa “te Atua ae kukukurei.”—1Tim. 1:11.

3. Tera ae ti kakabwaiaaki iai?

³ Ti kakabwaiaaki ngkai ti kona ni buoka katabuan aran Iehova ngkana ti ongeaba n te tua ae bebete aei: “Karaoiroa aran Iehova.” (TaiAre. 113:1) Ti karaoa aei ngkana ti tataekina ae raoiroi ibukin Teuare arana ae tabu anne. Ko na karaoiroa aran Iehova? Ti na rinanoi ngkai baika tenua aika a na buokira ni kairira bwa ti na karaoiroa aran Atuara ma nanora ni kabane.

 TI KAKUKUREIA IEHOVA NGKANA TI KARAOIROA ARANA

4. Bukin tera ngkai e kukurei Iehova ngkana ti karaoiroia? Taekina te kaikonaki. (Nora naba te taamnei.)

⁴ Ti kakukureia Tamara are i karawa ngkana ti karaoiroa arana. (TaiAre. 119:108) Ma nanona ngkanne bwa titeboo te Atua ae moan te mwaaka ma aomata aika aki kororaoi aika a tangiria ni karaoiroaki ibukina bwa a namakinna ae a aki tau? Tiaki ngaia anne. Iangoa te kaikonaki aei. E biri te teei ae te aine nakon tamana ao n rabwatia ao e taku, “Tamau boni ngkoe te kabanea n raoiroi n te aonnaba!” E kukurei te karo aei ao n rotaki n te bae e karaoia natina. Bukin tera? Ti riai n iangoia bwa te mwaane ngaia ae namakinna bwa e aki tau ao e tangira kamoamoaana mairoun natina? Ti aki. Ni kaitaraan anne, ti ataia ae e bon tau n riki bwa te karo ngaia ao e kukurei n nora natina ni kaotiota te tangira ao te kakaitau. E ataia ae aeka n aroaro akanne, a na karekea te kukurei riki nakon natina ngkana e a ikawai. N aron naba anne, Iehova bon te Tama ae akea n ai arona ao e kukurei ngkana ti karaoiroia.

5. Tera te kewe ae ti kona ni buoka kaotaraeana ngkana ti karaoiroa aran te Atua?

⁵ Ngkana ti karaoiroa Tamara are i karawa, ti a kaotaraea iai te kewe ae ti irekereke naba iai n tatabemanira nako. E taekinna Tatan bwa akea te aomata ae e na kakaonimaki ni koaua n tei ibukin aran te Atua. E taekinna bwa akea i buakora ae kona ni kateimatoa etin arona. E taekinna bwa ti bane ni kona ni kaitaraa te Atua ngkana iai kabwaiara ae e na reke iai. (Iobi 1:9-11; 2:4) Ma te mwaane ae kakaonimaki are Iobi, e kaotaraea raoi ae bon te tia kewe Tatan. Tera arom ngkoe? Ti karekea tibwangara n tatabemanira nako ae ti na kakaonimaki ni koaua n tei ibukin aran Tamara, ao ni kakukureia n arora ni beku irouna ma etin arora. (TaeRab. 27:11) Bon te kakabwaia ni koaua karaoan anne.

6. Ti na kangaa ni kakairi iroun te Uea are Tawita ao tibun Rewi? (Neemia 9:5)

⁶ A kairaki aomata aika kakaonimaki n tangiran te Atua bwa a na karaoiroa arana ma nanoia ni kabane. E korea ae kangai te Uea are Tawita: “I bia karaoiroa Iehova, ao a bia bane bwain nanou ni karaoiroa arana ae tabu.” (TaiAre. 103:1) E ota Tawita ae karaoiroan aran Iehova e nanona karaoiroan Iehova. E irekereke aran Iehova ma taekana, ngaia are ti iangoi aroarona aika tamaroa ni kabane ao ana mwakuri aika kamimi. E tangiria Tawita n iangoa aran Tamana bwa e tabu ao ni karaoiroia. E kani karaoa anne ma  ‘bwain nanona ni kabane’ ae taekan nanona ae tabwanin raoi. N aron anne, a biririmoa ni karaoiroa Iehova tibun Rewi. A nanorinano ni kaotia n aia taeka bwa a aki kona ni karaoiroa raoi aran Iehova ae tabu n aron ae bon tau ibukina. (Wareka Neemia 9:5.) Akea te nanououa bwa e boni kakimwareireia nanon Iehova te aeka ni karaoiroi anne, ma te nanorinano ao ae nako man te nano.

7. Ti na kangaa ni karaoiroa Iehova n ara mwakuri ni minita, ao ni maiura ni katoabong?

⁷ Ni boong aikai ti kona ni kakukureia Iehova ngkana ti tataekina taekana ma te akoi, te kakaitau, ao te tangira. N ara mwakuri ni minita, ti kakauringnga ae tiara ae kakawaki boni katikaia aomata nakon Iehova bwa a aonga n namakina ae ti namakinna ibukin Tamara ae tatangira. (Iak. 4:8) Ti rangi ni kukurei ni kaotia nakoia aomata te bae kabwarabwaraaki n te Baibara ibukin Iehova, ae kaotaki iai ana tangira, ana kaetitaeka ae riai, wanawanana, mwaakana, ao aroarona riki aika anainano. Ti karaoiroa naba Iehova ao ni kakukureia n arora ni kabanea ara konaa ni katotongnga. (IEbe. 5:1) Ni karaoan anne, ti a tei n okoro iai n te aonnaba ae buakaka aei. A kona n noria aomata ae ti kaokoro ao ni kona n iangoia bwa bukin tera. (Mat. 5:14-16) Ngkai ti boo ma ngaiia ni katoabong, ti kona ni kabwarabwaraa bukina ngkai e okoro arora. Ibukin anne, a a kani kaania Atuara aomata aika raoiroi nanoia. Ngkana ti karaoiroa Iehova n aaro aikai, ti a kakimwareireia iai nanona.—1Tim. 2:3, 4.

TI KAKUKUREIA IESU NGKANA TI KARAOIROA ARAN IEHOVA

8. E kangaa Iesu ni moani katea te katoto ni karaoiroan aran Iehova?

⁸ Akea ae e ataa riki te Tama nakon te Nati i buakoia anerani karawa ao aomata n te aonnaba. (Mat. 11:27) E tangira Tamana Iesu, ao boni ngaia ae moani katea te katoto ni karaoiroan aran Iehova. (Ioa. 14:31) N ana tataro nakon Tamana n te tairiki are imwaini matena, ao e taekina ana mwakuri ni minita n te aonnaba n te aro ae kimototo ni kangai: “I a tia ni kaota aram nakoia.” (Ioa. 17:26) Tera ae e nanonna?

9. E kangaa Iesu ni kamanena te kaikonaki ni kabwarabwaraa iai taekan Tamana n te aro ae mataata raoi?

⁹ E bati riki ae karaoia Iesu nakon tii kaotan aran te Atua ae Iehova nakoia aomata. A a kaman ataa aran te Atua I-Iutaia ake e reireinia Iesu. Ma bon Iesu ae moani “[kabwarabwaraa] taekan Teuaei.” (Ioa. 1:17, 18) N te katoto, e kaotaki n te Koroboki ae Tabu n te Taetae n Ebera bwa e nanoanga Iehova ao e atataiaomata. (TeOti. 34:5-7) E kamataataa raoi te koaua anne Iesu ngke e taekina te kaikonaki ae taekan te nati ae bua ao tamana. Ngkana ti wareka taekan te karo anne ngke e nora natina are raira nanona “ngke e a ria,” ao ni biri nakoina, n rabwatia, ao ni kabwaraa raoi ana bure mai nanona, ti a ota raoi iai n ana nanoanga Iehova ao ana atataiaomata. (Ruka 15:11-32) E kaota Iesu anuan raoi Tamana.

10. (a) Ti kangaa n ataia ae e kamanena aran Tamana Iesu ao e tangiriia aomata bwa a na karaoa naba anne? (Mareko 5:19) (Nora naba te taamnei.) (b) Tera ae e tangiria Iesu bwa ti na karaoia ni boong aikai?

¹⁰ E tangiriia naba aomata Iesu bwa a na kamanena aran Tamana? Eng. Iai tabeman mataniwin Aaro n taai akekei aika a iangoia bwa e rangi n tabu aran te Atua ao e aki riai n atoatongaki, ma e aki kariaia Iesu katei aika aki aanaki man te Baibara akanne bwa e na tukia mani karinean aran Tamana. Iangoa te tai are e kamarurunga iai te mwaane ae taniaki n te taimonio n aia aono I-Kerata. A rangi ni maaku aomata ao a butiia Iesu bwa e na nako,  ngaia are e aikoa tiku n te aono anne. (Mareko 5:16, 17) Ma e bon tangiria naba Iesu bwa e na ataaki aran Iehova n te tabo anne. Ngaia are e mwiokoa te mwaane are e kamarurungnga bwa e na tuangia aomata, tiaki taekan te bwai are karaoia Iesu, ma taekan te bwai are karaoia Iehova. (Wareka Mareko 5:19.) a Anne naba te bwai ae e tangiria ni boong aikai, ae ti na tataekina aran Tamana ni katobibia te aonnaba! (Mat. 24:14; 28:19, 20) Ngkana ti karaoa anne, ti a kakukureia iai ara Uea ae Iesu.

11. Tera ae e reireinia taan rimwina Iesu bwa a na tataroia, ao bukin tera bwa e kakawaki anne? (Etekiera 36:23)

¹¹ E ataia Iesu ae ana kantaninga Iehova boni katabuan Arana ao kaitiakana mani kabarekaana. Anne bukina ngke e reireinia taan rimwina ara Toka bwa a na tataro ni kangai: “Tamara are i karawa, e bia katabuaki aram.” (Mat. 6:9) E ota Iesu ae aio te bwai ae rangi ni kakawaki ae a kaaitara ma ngaia taiani karikibwai ni kabane. (Wareka Etekiera 36:23.) Akea i buakon te karikibwai n te iuniweeti aei irarikin Iesu ae karaoa ae bati riki ni katabuan aran Iehova. Ma ngke e katikaki Iesu, tera ana bure are a bukinna iai taani kairiribai nakoina? E taetae ni bakannatua! E kakoauaa Iesu ae kamatauningaan ao uaraoan aran Tamana bon te bure ae te kabanea ni kakaiaki. E rangi n rawawata ngkai e bukinaki n te aeka ni bure anne. Tao e bae n aio bukina raoi ngke “e korakai n rawawata” Iesu imwaini katikana.—Ruka 22:41-44.

12. E kangaa Iesu ni katabua aran Tamana n te aro ae rianako?

¹² E nanomwaaka Iesu i aani kammarakana, kabuakakaana, ao uaraoana, ibukini katabuan aran Tamana. E ataia ae e a tia n ongeaba iroun Tamana ni bwaai ni kabane, ao akea te bwai ae e na maamaa iai. (Ebera 12:2) E ataia naba ae bon Tatan ae kakaitaraa n te tai ane kangaanga anne. (Ruka 22:2-4; 23:33, 34) E kantaningaia Tatan bwa e na urua etin aron Iesu, ma e bon aki tokanikai Tatan! E kaotia raoi Iesu ae bon te tia kewe Tatan ao bon iai ana toro Iehova aika kakaonimaki ni koaua aika kateimatoa etin aroia, e ngae naba ngkana a boo ma kataaki aika kakaiaki!

13. Ko na kangaa ni kakukureia am Uea ae e a tautaeka ngkai?

 ¹³ Ko kani kakukureia am Uea ae e a tautaeka ngkai? Teimatoa ni karaoiroa aran Iehova, ni buokiia tabemwaang bwa a na ataa raoi Atuara. Karaoan anne, ko a toua iai mwini mwanekan Iesu. (1Bet. 2:21) N aron Iesu, ko a kakimwareireia iai Iehova ao ni kaotaraea te tia kakaitaraa ae Tatan bwa te tia kewe!

TI BUOKA KAMAIUAIA AOMATA NGKANA TI KARAOIROA ARAN IEHOVA

14-15. Baikara baika tamaroa aika kona n riki ngkana ti reireinia aomata taekan Iehova?

¹⁴ Ngkana ti karaoiroa aran Iehova, ti buoka iai kamaiuaia aomata. N te aro raa? E “kamataki nanoia” Tatan “te koraki ake a aki onimaki.” (2Kor. 4:4) Ibukin anne, a a kakoauai ana kewe Tatan n aron aikai: Akea te Atua, e raroa te Atua mairoura ao e aki tabeakinia aomata, e iowawa te Atua ao e kammarakiia taani kakaraoi kairua n aki toki. Keewe aikai a tii karekea kabuakakaan ke kabarekaan aran Iehova ma taekana, bwa a aonga aomata n aki kani kaania. Ma ngkana ti uarongorongo, ti a tuka iai Tatan mani kakororaoan tiana. Ti reireinia aomata te koaua ibukin Tamara, ni karaoiroa aran Atuara ae tabu. Tera mwina?

¹⁵ A rangi ni mwaaka koaua aika n Ana Taeka te Atua. Man reireinaia aomata taekan Iehova ao aroarona ni koaua, ti a nori iai baika tamaroa. A aikoa kamatakiaki aomata n ana kewe Tatan ao a a moanna n nori aroaron Tamara aika raraoi n aron ae ti nori. A miroaroa ni mwaakana ae akea tiana. (Ita. 40:26) A karauaki nanoia n ana kaetitaeka ae riai ao ae kororaoi. (TuaKau. 32:4) A bati baike a reiakin ni wanawanana ae bati. (Ita. 55:9; IRom 11:33) Ao a kabebeteaki n reiakinan ae bon te tangira ngaia. (1Ioa. 4:8) Ngkai a tabe ni kaania Iehova, e a nene riki aia kantaninga ibukin te maiu n aki toki ngkai natina ngaiia. Ai rianakora tibwangara ae buokaia aomata bwa a na kaania Tamaia! Ngkana ti karaoa anne, e na iangoira Iehova bwa “[raona] ni mwakuri ngaira.”—1Kor. 3:5, 9.

16. Tera aron rotakia tabeman ngke a ataa aran te Atua? Taekini katoto.

¹⁶ N te moantai, ti kona n tii reireinia aomata ae Iehova bon aran te Atua. E kona n rangi  n rotaki n anne te aomata ae raoiroi nanona. N te katoto, e ikawairake te aine ae Aaliyah b n te utu ae tiaki Kristian kaaina. E aki rau nanona n ana Aro ao e aki kaaniaki ma te Atua. Ma e bitaki anne imwini moanakin ana reirei ma taani Kakoaua. E a moanna n iangoa te Atua bwa Raoraona. Ao e rangi ni mimi ngke e a ataia ae kanakoaki aran te Atua mani Baibara aika bati ao n oneaki mwina n nakoa n aron te Uea. E a bitaki maiun neiei man ataakin aran Iehova. E takarua n taku: “Iai aran Raoraou ae I rangi ni tatangiria!” Tera mwina? E taku neiei: “E a rangi n rau nanou ngkai. I namakinna ae I rangi ni kakabwaiaaki.” Te tia katangitang te mwaane ae Steve ae roko man te utu n I-Iutaia aika a rangi n tuamatoa. E aki kani kaaina te Aro teuana ibukina bwa e a tia n nora te mwakuri ni mwamwanaa te aba ae korakora. Ma imwini maten tinana, ao e a kukurei n ira te reirei n te Baibara iroun temanna Ana Tia Kakoaua Iehova. E rangi n anaaki nanona n ataakin aran te Atua. E taku teuaei: “I tuai man ataa aran te Atua mai mwaina.” E reitia n taku: “I a tibwa ota ngkai bwa bon iai te Atua. I iangoia bwa te Aomata ni koaua. I a ataia man te tai anne ae e a reke Raoraou.”

17. Bukin tera ngkai ko motinnanoia bwa ko na teimatoa ni karaoiroa aran Iehova? (Nora naba te taamnei.)

¹⁷ Ko tataekina te ara ae tabu ae Iehova nakoia aomata n am mwakuri n uarongorongo ao n angareirei? Ko buokiia ni kinaa bwa te aekakira raoi Atuara? Karaoan anne ko karaoiroa iai aran te Atua. Ko bia teimatoa ni karaoiroa aran Iehova ae tabu n arom ni buokiia aomata bwa a na kinaa raoi Teuare arana anne. N te aro anne, ko na kamaiuia iai aomata. Ko na kakairi iroun am Uea ae Iesu Kristo. Ao ae kakawaki riki, ko na kakukureia Tamam ae tatangira ae Iehova. Ko bia “karaoiroa [arana] n aki totoki”!—TaiAre. 145:2.