1-2. Éé ní ea é nveè bá nèi kọ é dã́ ból ló bé ea ólò tọá ló Jìhóvà naa tṍó e bà kyọ a bée é?

 DÒÒMÀ dẽe ló kọọ̀: Nen eo ólò vùlè kpọ́ ni kyáá bel ló. Ò nyímà kọ níà kyáá bel; sõò sìgà gbò zigà naa vó. Ní ea palàge dú pọ́lọ́ dú kọọ̀ bà kọ́ nágé zaali naa ní e gã́bug nen zigà. Àé tọ́a ní ló naa vàẹ? Be ò ólò bùlà nú ea kil ló gbò nen vaá gbĩ́ gè ié lé bée, nyíé ni náa é ẹ́ẹ, sè níì vó nì?​—Pró. 22:1.

² Nakà nu dòòmà báí é nveè bá nèi kọ é dã́ ból ló bé ea beè tọá ló Jìhóvà naa tṍó e bà kyọ a bée. Ene kà a nyómá tóm beè kpọ́ẹ kyáá bel ló nè Íìv, vaá Íìv beè zìgà. Kyáá belí beè naa kọọ̀ Ádàm nè Íìv á lọ̀l togó kèbá Jìhóvà. Níí beè naa kọọ̀ ú nè náàkyọ̀ á tùlà dénè nen. (Jén. 3:​1-6; Róm̀ 5:12) Dénè tã̀àgã̀ e gé mon deè nieí​—dì belí ú, bé gím, nè gbò pọ́lọ́ nu ea gé nááá​—aa ló kyáá bel e Sétàn beè kpọ́ gbẹá mm̀ gònò Ídèna. É kọọ̀ kyáá belí nè gbò nú ea silà aa m kyẽ́ Jìhóvà? Ẽei. Sõò, nyíè Jìhóvà náa biila, vaá náa tú súng gbẹá gbàà. Kàsĩ́, Kpá Káí kólíé “Bàrì ẹ́ẹ́ nyíe.”​—1 Tím. 1:​11, NW.

3. Mókà nèà deè ní e íè e?

³ Beele é láá naa kọ gbò nen á nyimá kọọ̀ Sétàn dú neǹ kyáá bel tení dú ló gè gbàntṍ ló log ea kọ́ọ̀: “Leelai béè Jìhóvà.” (Ps. 113:1) È ólò lèèlà béè Jìhóvà tṍó e kọ́ọ̀ gbò lé nu ea kilíé ló nè dõona gbò. É kọọ̀ olo é náa gé vó? Naanii èé ló sọ́l boo taà kà nú ea é nveè bá nèi kọ é tú dénè bẹẹ nyíe lèèmà béè Bàrì.

 NYÍÈ JÌHÓVÀ ÓLÒ ẸẸ TṌÓ E LEELÀ A BÉE

4. Éé ní ea náa vaá nyíè Jìhóvà ólò ẹẹ tṍó e leelàẹ̀ ẹ́? Nè nu dòòle ló. (Ẹ̀b nàgé fòtó.)

⁴ Nyíè bẹẹ Tẹ̀ ea di káála ólò ẹẹ tṍó e leelà a bée. (Ps. 119:108) É kọ níí tõó dọ̀ kọọ̀ Bàrì ea bọọ lọ̀l vaá à lee ólò bugi togó belí gbò nen e bà náa gbõoma, e bà ólò gbĩ́ kọ bàá leelàẹ̀ va tṍó e bà íe bíi ló sìà kpóó ló? Ẽ́èe. Bugi togó boo nakà nu dòòle lóí. Ene kà ńkem̀ nvín pábia ea palàge vùlè a tẹ̀ téélá pììlàẹ bá ló vaá kọọ̀, “Olo ní eo dúù kà lé tẹ̀ ea dì lọ̀l vaá à lee é!” Nyíè a tẹ̀ é ẹ́ẹ, kàsĩ́, bé ea lábví láb naa é palàge tọaẹ́ ló. Ló éé? É kọ à íe bíi ló sìà kpóó ló vaá à gbĩ́ kọọ̀ a nvín á leelàẹ̀ ẹ? Ẽ́èe. Tãa vó, è agàlà boo kọọ̀ à íe agẹló vaá nyíée ẹ́ẹ tṍó ea mon kọọ̀ a nvín zógè kọ à vulèèe vaá õàe zaa. À nyímá kọọ̀ íb gbò kpãaí é náa kọ a nvín á kilsĩ́ gè ié ẹ́ẹ́-ẹẹ̀ nyíe tṍó ea é dú kànen. Mm̀ tẽ̀ènè sĩ́deèá, nyíè Jìhóvà, ea dú bẹẹ Tẹ̀ ea bọọ lọ̀l vaá à lee ólò ẹẹ tṍó e leelàẹ.

5. Mókà kyáá bel ní eé láá tẹlẹ bàlà kẽ tení dú ló gè lèèlà béè Bàrì e?

⁵ Tṍó e leelà bẹẹ Tẹ̀ ea di káála, è náà kọọ̀ gbò nen á nyimá kọọ̀ bel e Sétàn beè ló kilma ló beele dú kyáá. Sétàn beè kọọ̀ tọ́ọ̀ nen náa é láá bọ́ló dẹ̀lẹ̀ nyíé boo vaá kpènà béè Bàrì. A beè kọọ̀ tọ́ọ̀ bẹ̀ì née é láá bọ́ló dẹ̀lẹ̀ nyíé boo tṍó e ẹ̀bmà élaí sĩ́. A beè kọọ̀ dénè bẹ̀ì é aa ló gè fã̀ Bàrì be è nyímá kọọ̀ ge naa vó é léeí ló. (Jóòb 1:​9-11; 2:4) Sõò Jóòb beè bọ́ló dẹ̀lẹ̀ nyíé boo nè Bàrì vaá zogè kọọ̀ Sétàn kpọ́ kyáá bel. Vaá oloà? Buù bẹ̀ì é láá zogè kọ è bọ́ọ̀ló dẹ̀lẹ̀ nyíé boo nè bẹẹ Tẹ̀ tení dú ló gè lóe bel boo vaá naa kọọ̀ nyíée á ẹẹ. (Pró. 27:11) Àé dú kà lé be è náa vó.

6. Mósĩ́ deè ní eé láá nó Méné Dévìd nè pá gãà Lívaì e? (Nìhèmáíà 9:5)

⁶ Gbò e bà vulè Jìhóvà ólò lèèlà a bée lọl mm̀ dénè ba nyíé. Méné Dévìd beè emí kọọ̀: “M̀ é leelà béè Jìhóvà; dénè nu ea dìḿ m á lèèlà a bée ea di káí.” (Ps. 103:1) Dévìd beè dã́ ból ló kọọ̀ ge lèèlà béè Jìhóvà tõó dọ̀ ge lèèlà ẹlẹ́ Jìhóvà. Béè Jìhóvà bãàa mm̀ íb nen ea dú, vaá à ólò naa kọ é kẽ̀èa boo dénè a lé kpãa nè gbò a tóm dũ̀ùnè. A beè leemá Dévìd gè lèèlà béè a Tẹ̀ vaá tú sẹlẹ́ káí. A beè gbĩ́ gè naa níí lọa mm̀ dénè a nyíe àbèè ge tú “dénè nu” ea dìé m naamá vó. Mm̀ tẽ̀ènè sĩ́deèá, pá Lívaì beè tú gè lèèlà Jìhóvà gyààma sĩ́. Ba beè kìlmà kpá ló kẽ vaá kọọ̀ bel ea aalìè vá gã́ náa é láá tùlà dẽè bé ea bọ́ló kọ bàá lèèlà béè Jìhóvà ea di káíá naa. (Bugi Nìhèmáíà 9:5.) Mm̀  kà-kà, nyíè Jìhóvà beè ẹẹ ló nakà lèèlàí, boo béè kọ à aà vá nyíe vaá ba beè naa vó mm̀ kìlmà kpá ló kẽ.

7. Mósĩ́ deè ní eé láá lèèlà Jìhóvà tṍó e gé kọ́ kpẹ̀a nè bé e tõò dùm naa buù dee é?

⁷ Deè nieí, èé láá lèèlà béè Jìhóvà tení dú ló gè ló bel ea kilíé ló mm̀ ẹ́ẹ́-ẹẹ̀ nyíe, zààvà, nè vulè. Tṍó e gé kọ́ kpẹ̀a, nú eé sẹẹa bùlà á dú gè nvèè bá nè gbò nen kọ bàá tõo bã ló Jìhóvà nè ge naa kọ bàá nyimá kọọ̀ à dú bẹẹ Tẹ̀ ea ié vulè. (Jém̀z 4:8) Nyíéi ólò ẹẹ gè naa kọọ̀ gbò nen á nyímá nú e Kpá Káí kọ́ kilma ló Jìhóvà, vaá naa kọ bàá nyimá kọ à dú Bàrì lé bèèla, vaá ié vule, nyìmànù, kpóó, nè dõona kà gbò lé kpãa. È ólò lèèlà nàgé Jìhòvà vaá naa nú ea léémáe tṍó e piigà bé e bẹẹ kpóó sim tùlà naa gè nóe. (Ẹ́fẹ. 5:1) Tṍó e náà vó, è tõò kele mm̀ nakà pọ́lọ́ bàlà booí. Gbò nen é mon kọọ̀ bẹẹ dùm dú kele vaá níí é láá bọọ vá ló. (Máát. 5:​14-16) Buù dee e gé zọ́va naaá nu, èé láá baatẽ́ nèva nú ea náa vaá bẹẹ dùm à dú kele. Níí é náa kọọ̀ gbò e bà íe lé bùlà á tõo bã ló bẹẹ Bàrì. Tṍó e leelà Jìhóvà naa vó, è náà kọọ̀ nyíée á ẹẹ.​—1 Tím. 2:​3, 4.

NYÍÈ JÍÍZỌ̀S ÓLÒ ẸẸ TṌÓ E LEELÀ BÉÈ JÌHÓVÀ

8. Mósĩ́ deè ní e Jíízọ̀s beè gyasĩ́ mm̀ ge lèèlà béè Bàrì e?

⁸ Zẹ̀ẹ̀ dénè nú e Bàrì beè dèm ea di káála nè boo kunukẽ̀í, tọ́ọ̀ nen náa nyímá ló Jìhóvà èlmà a Sã́áná, ea dú Jíízọ̀s. (Máát. 11:27) Jíízọ̀s vulè a Tẹ̀, vaá ẹlẹ ní ea ólò gyasĩ́ mm̀ ge lèèlà béè Jìhóvà ẹ. (Jọ́ọ̀n 14:31) Mm̀ tã̀àgã ló ea beè tãagã má a Tẹ̀ bílá deè deé ea zilà besĩ́ bà kálá fẹ́ẹá, a beè kọ́ nú ea kil ló gbò tóm ea beè sì gbẹá boo kunukẽ̀í. A beè kọ́ nèe kọọ̀: “Nda a náa kọ bàá nyimá o bée.” (Jọ́ọ̀n 17:​26, NW.) Éé ní e níí tõó dọ̀ẹ?

9. Mókà nu dòòle ló ní e Jíízọ̀s beè bààmà tẽ́ nú ea kil ló a Tẹ̀ mm̀ sĩ́deè e nen é láá palàge dã́ ból ló é?

⁹ Jíízọ̀s beè naa èlmà áá gè kọ́ nè gbò nen kọọ̀ béè Bàrì kọlà Jìhóvà. Pá Júù e Jíízọ̀s géè noomà nuá beè nyimá béè Bàrì. Sõò, Jíízọ̀s ní ea beè gyasĩ́ mm̀ ge ‘kọ́ nú ea kilíé ló tẹlẹ bàlà kẽ nè gbò nen ẽ́.’ (Jọ́ọ̀n 1:​17, 18) Dì belí nu dòòmà bá, gbò dọ̀ Kpá Káí e ba beè emí mm̀ dém bel Híbrù tẹ́lẹ bàlà kẽ kọọ̀ Jìhóvà dú Bàrì ea ólò ié sàn nyíe nè tóè sàn. (Ẹ́xọ. 34:​5-7) Jíízòs beè naa kọọ̀ nakà kà-kà belí á palàge dọà bàlà kẽ tṍó ea géè nè nu dòòle ló ea kil ló nvín pèè gyọ́á nè a tẹ̀. Mm̀ nòòtẽ́á, tṍó e tẹ̀a mon a nvín ea beè ọgáá ea “di dí kpã́á ea gé dú,” a beè gbóó teelà gé bũ̀ùnàe, pììlàẹ bá ló, vaá ia ló nèe. Níí zógè bé e Jìhóvà íe sàn nyíè nè tóè sàn naa. (Lúùk 15:​11-32) Jíízọ̀s beè nvèè bá nè gbò nen kọ bà nyimá ló íb nen e Jìhóvà dú.

10. (a) Éé ní ea náa vaá è nyimá kọọ̀ Jíízọ̀s beè olòó kolí béè a Tẹ̀ vaá gbĩ́ kọọ̀ dõona gbò á naa nagé vó é? (Máàk 5:19) (Ẹ̀b nàgé fòtó.) (b) Éé ní e Jíízọ̀s gbĩ́ kọọ̀ beele é naa ẽ́?

¹⁰ É kọọ̀ Jíízọ̀s beè gbĩ́ kọọ̀ dõona gbò á kolí béè a Tẹ̀? Ẽei. Sìgà gbò tẹ̀sĩ́ bõ̀ònaló fã̀ e ba beè di mm̀ a deeá beè tuumá kọọ̀ béè Bàrì palàge di káí vaá náa bọ́ló kọọ̀ gbò nen á kolí, sõò Jíízọ̀s náa beè sọ̀tọ́ deè kọọ̀ gbò nòòmànù e á gé mm̀ Kpá Káí á kpegìèe lọl ló ge nvèè ka ló béè Bàrì. Bugi togó boo nú ea beè naaá tṍó ea beè bó ene kà gbálà e zọ beè di m gbẹá bálásĩ́ pá Gérasà. Pọ̀ beè sií va naa ní e ba beè bàn Jíízọ̀s kọ á àà, vaá a beè gbóó aa kĩá. (Máàk 5:​16, 17) Sõò, Jíízọ̀s beè gbĩ́ kọọ̀ gbò e bà di kĩá á nyimá béè Jìhóvà.  Vóà naa, a beè kọ́ nè gbálà ea beè bòa kọ á kọ́ nú e Jìhóvà ni náa nè pá a gbò, níì nú e ẹlẹ náànìè nì. (Bugi Máàk 5:19.) a Níà nú ea gbĩ́ kọ á naaá nágé deè nieí é​—á gbĩ́ kọ beele é naa kọọ̀ dénè nen ea di bàlà booí á nyimá béè a Tẹ̀! (Máát. 24:14; 28:​19, 20) Tṍó e náà kọọ̀ gbò nen á nyimá béè Jìhóvà, è náà kọọ̀ nyíè bẹẹ Méné Jíízọ̀s á ẹẹ.

11. Éé ní e Jíízọ̀s beè noomà pá a gbò nyòòne nvée kọ bàá tã̀àgã ló Bàrì kilma ló é, vaá éé ní ea náa à dú bíi é? (Èzíkiẹ̀l 36:23)

¹¹ Jíízọ̀s beè nyimá kọọ̀ tóm̀ bùlà Jìhóvà dú gè naa kọọ̀ a bée á di káí, vaá di pọ́ì aa bá kọ̀láá kà kọ́ọ̀ kyọ̀. Níà nú ea beè naa vaá bẹẹ Neǹ Dòbá beè noomài kọ é tãagã ló Bàrì kọọ̀: “Bẹẹ Tẹ̀ eo di káála: Ka á di ló o bée ea di káí” é. (Máát. 6:9) Jíízọ̀s beè dã́ ból ló kọọ̀ nakà belí ní ea palàge bọọ lọ̀l vaá à lee é, vaá à tọ́á ló dénè nú ea di dùm. (Bugi Èzíkiẹ̀l 36:23.) Tọ́ọ̀ nen ea di boo kunukẽ̀í gáà laa naa kọọ̀ béè Jìhóvà á di káí èlmà Jíízọ̀s. Sõò, tṍó e ba beè sii Jíízọ̀s, éé ní e pá a gbò ọ́b beè kọ́ uué boo é? Ba beè kọ à on Bàrì! Jíízọ̀s beè palàge nyimá kọọ̀ ge kọ́ kyọ̀ àbèè ge tenmà dém ló béè a Tẹ̀ ea di káí, ní ea dú kà agẹbá pọ́lọ́ ea bọọ lọ̀l vaá à lee é. Nyíée beè palàge bììlà tṍó e bà gbáẹ bel vaá tenmá kọ bàá fẹ́ẹ boo béè nakà pọ́lọ́í. Àé láá dú kọọ̀ níà nú ea beè naa kọọ̀ Jíízọ̀s á di mm̀ ‘gbele kpóó ló tã̀àgã̀ bùlà’ besĩ́ bà kálá siíe é.​—Lúùk 22:​41-44.

12. Mósĩ́ deè ní e Jíízọ̀s beè tú béè a Tẹ̀ sẹlẹ́ káí mm̀ sĩ́deè ea bọọ lọ̀l vaá à lee é?

¹² Kọbé béè a Tẹ̀ dí káí, Jíízọ̀s beè ĩ̀ìmà kọ̀láá kà bom, nvèèà lẹ́, nè kyáá bel e ba beè kpọ́ẹ́ ló. À nyímá kọọ̀ a beè gbanìè tṍ ló a Tẹ̀ mm̀ kọ̀láá sĩ́deè; vóà naa, náa beè dú bíi kọ á siiá kẹ́ẹ. (Híb. 12:2) A beè nyimá nágé kọọ̀ Sétàn ní ea géè beèe é. (Lúùk 22:​2-4; 23:​33, 34) Sétàn beè gbĩ́ gè naa kọọ̀ Jíízọ̀s á gá bọ ná ló dẹ̀lẹ̀ nyíé boo; sõò a nòònù náa beè ié togó! Jíízọ̀s beè tẹlẹ bàlà kẽ kọọ̀ Sétàn dú kà neǹ kyáá bel vaá zogè kọọ̀ Jìhóvà íe gbò gyóòlo e bà bọ́ló dẹ̀lẹ̀ nyíé boo, e bàé  kilsĩ́ gè bọ́ló dẹ̀lẹ̀ nyíé boo bã̀àna tṍó e bà di kèbá kà tàlàvà dìtõ̀ò!

13. Éé ní eo é láá naa kọbé nyíè o Méné ea gé bẹl ẹ́ẹ ẹ́?

¹³ É kọ ò gbĩ́ gè naa kọọ̀ nyíè o Méné ea gé bẹl á ẹẹ? Beè vó, kilsĩ́ gè lèèlà béè Jìhóvà vaá ò nveè bá nè dõona gbò kọ bàá nyimá ló íb nen e bẹẹ Bàrì dú. Be ò náa vó, ò gé nó Jíízọ̀s. (1 Pít. 2:21) Ò gé náa kọọ̀ nyíè Jìhóvà á ẹẹ vaá tẹlẹ bàlà kẽ kọọ̀ a neǹ ọ́b ea dú Sétàn dú neǹ kyáá bel belí bé e Jíízọ̀s beè tẹlẹ bàlà kẽ naaá!

È ÓLÒ DÙÙLÀ DÙM GBÒ NEN TṌÓ E LEELÀ BÉÈ JÌHÓVÀ

14-15. Mókà lé nu ní ea ólò sìlà aa m tṍó e nóòmà gbò nen nu ea kil ló Jìhóvà ẹ?

¹⁴ Kọ̀láá tṍó e leelà béè Jìhóvà, e gé sí tóm ea é duulà dùm gbò nen. Mósĩ́ deè e? Mm̀ kà-kà, Sétàn a ‘gímè dẽè’ gã́bug nen. (2 Kọ́r. 4:4) Níí a náa kọ bàá zìgà kyáá bel ea aa gã́ Sétàn, dì belí kyáá bel ea kọ́ọ̀: Bàrì á gé, Bàrì di kpã́á ààí ló vaá náa ólò ẹ̀b nú ea kil ló gbò nen, Bàrì dú neǹ agẹ nyíe vaá àé kpá sã́ ló gbò pọ́lọ́ dọ̀ọ̀mà dè-dè. Bùlà ea di nvéè kyáá belí dú gè kyọ̀ béè Jìhóvà kọbé gbò nen náa íe na tàn ge tõo bã̀é ló. Sõò bẹẹ tóm ólò naa kọọ̀ tóm̀ bùlà Sétàn ágá ié togó. È ólò noomà kà-kà bel ea kil ló bẹẹ Tẹ̀ vaá lèèlà béè bẹẹ Bàrì ea di káí. Éé ní ea ólò sìlà aa m ẽ́?

¹⁵ Kà-kà bel ea di mm̀ Moǹ Bel Bàrì palàge ié kpóó. Tṍó e nóòmà gbò nen nú ea kil ló Jìhóvà vaá naa kọ bàá nyimá ló íb nen ea dú, lé nu ólò sìlà aa m.Kyáá nòòmànù Sétàn ólò bààlà àà vá boo dẽe vaá bà ólò gbóó dààmà togó gè nyimá ló gbò lé kpãa e bẹẹ Tẹ̀ íe. Bé ea íe kpóó naa ólò bọọ vá ló. (Àìz. 40:26) Boo béè kọ à dú neǹ lé bèèla, bà ólò dẹlẹ́ẹ nyíé boo. (Dìt. 32:4) A nyìmànù ea bọọ ólò naa kọ bàá nyimá nu. (Àìz. 55:9; Róm̀ 11:33) Lóó va ólò dĩ̀ìnà tṍó e bà nyimá kọọ̀ Bàrì du vulà. (1 Jọ́ọ̀n 4:8) Bé e bà gé tõo bã ló Jìhóvà naa, níà bé e ba ból dẽesĩ́ gè tõó dùm dọ̀ọ̀mà dè-dè dì belí gbò nvín Bàrì ólò kpáá agaló naa ẽ́. Nyíéi palàge ẹẹ kọọ̀ è íè nèà deè ge nvèè bá nè gbò nen kọ bàá tõo bã ló ba Tẹ̀! Tṍó e náà vó,  Jìhóvà ólò ẹ̀bvii naamá gbò e gé zọ́ẹ ‘siá tóm.’​—1 Kọ́r. 3:​5, 9.

16. À ólò tõó ló sìgà gbò naa vàẹ tṍó e bà nyímá béè Bàrì e? Nè nu dòòmà bá.

¹⁶ Túá tṍó e ínà ló gbò nen, è ólò noomà va kọọ̀ béè Bàrì kọlà Jìhóvà. Níá é láá tọá ló nen ea íe tàn ge fã̀ Bàrì. Dì belí nu dòòmà bá, à íe ene kà nvín pá nyáá e a bée kọlà Aaliyah b e ba beè bumáe mm̀ tọ e bà náa ólò nyoone nvéè Kráìst. Sõò, ba bõ̀ònaló fã̀ náa beè leemáe vaá náa beè tõo bã ló Bàrì. Náa beè meà nà naa vó tṍó ea daamà togó gè zọ̀ Gbò Neǹ Ditõ̀ò Jìhóvà noá Kpá Káí. A beè gbóó dààmà togó gè ẹ̀b Bàrì naamá a kóò. Vaá a beè bọọẹ́ ló tṍó ea nó kọọ̀ gbò nen tú béè Bàrì lọl mm̀ gã́bug Kpá Káí vaá tú a sò bée ea kọlà Dõò nyaamá ló. A dùm beè nyaaá tṍó ea nyímá kọọ̀ Jìhóvà íe bée. À kọ́ọ̀: “Ńdáà lé kóò íe bée!” Éé beè sìlà aa m ẽ́? À kọ́ọ̀: “Kátogóí, lóóm kpáá dĩ̀ìnà vaá nyíém ẹ́ẹ.” À íe ene kà gbálà ea ólò ọlí sọ́l ea bée kọlà Steve, ea dú Júù. Náa beè olòó gbaaá ló tọ́ọ̀ kà bõ̀ònaló fã̀ boo béè dùm bààsĩ́ ea dìvá m. Sõò tṍó ea kà ú, a íe dee ea beè ĩìtẽ́ ló nen e Gbò Neǹ Ditõ̀ò Jìhóvà géè noomà Kpá Káí. A beè palàge tọáẹ́ ló tṍó ea nyímá kọọ̀ Bàrì íe bée. À kọ́ọ̀: “Nda gáà beè nyima kọọ̀ Bàrì íe bée.” À kpáá kọ́ọ̀: “Níì túá tṍó e nda gé nyímá kọọ̀ Bàrì íe bée é! M beè gbóó nyimáe ló. M beè gbóó nyimá kọọ̀ m íe kóò.”

17. Éé ní ea náa vaá ò beeláfùl ge kilsĩ́ gè lèèlà béè Jìhóvà ẹ? (Ẹ̀b nàgé fòtó.)

¹⁷ Tṍó eo gé kọ́ kpẹ̀a, é kọ ò ólò kọ́ nú ea kil ló béè Bàrì ea di káíá nè gbò nen? É kọ ò ólò nvèè bá nèva kọ bàá nyimá ló íb nen e Bàrì dú? Be ò náa vó, ò leelà béè Bàrì. Kilsĩ́ gè lèèlà béè Bàrì ea di káíá tení dú ló gè nvèè bá nè gbò nen kọ bàá nyimá ló íb nen ea dú. Be ò náa vó, òé duulà dùm gã́bug nen. Ò gé tõó boo tùle ea aa bá bẹẹ Méné Kráìst Jíízọ̀s. Vaá ní ea bọọ lọ̀l vaá à lee, ò gé náa kọọ̀ nyíè o Tẹ̀ Jìhóvà á ẹẹ. Vóà naa, kilsĩ́ gè “[lèèlà a] bée dọ̀ọ̀mà dè-dè”!​—Ps. 145:2.