1-2. Jehovachem nanv piddʼddear kelem tednam taka koxem bhoglem tem ami koxim somzonk xoktat?

 TUMI khub mog kortat to konn tori, tumche vixim dusreank naka zalʼlem kitem tori sangta mhunn chintat. Ti ek fott mhunn tumi zannant. Tori astana, thoddim zannam tem sot mhunn mantat. Ani hache poros vaitt mhunnttlear tim vochon herank tem sangtat, ani tim-ui tem sot mhunn mantat. Oxem zata tednam tumkam koxem bhogtolem? Tumchem borem nanv, ani lok tumche vixim kitem chintʼtat hachi tumkam porva asa zalear, tumkam hea vixim ekdom vaitt distolem nhoi!—Mho. 22:1.

² Hea udharonnantlean Jehovachem nanv piddʼddear kelem tednam, taka koxem bhoglem tem ami somzonk xoktat. Tannech rochlolea eka dutan, tache vixim Evek fott sangli. Ani tinnem tem sot mhunn manlem. Tea pasot, Adanv ani Eve Jehovachea add gelim. Ani haka lagon, ak’khea munxakullacher patok ani moronn ailem. (Ut. 3:1-6; Rom. 5:12) Ani aiz prithumer ghoddtta tem soglem vaittponn, zoxem moronn, zhuzam ani dukh-tras, Soitanan Eden bagent sangonk suru kelʼlea fottink lagon zata. Tor aplem nanv piddʼddear kelem, ani taka lagon zo kitem porinnam zata tem polloun Jehovak ekdom dukh bhogta mhunn kainch dubhav na. Punn to rag gheun bosonk na vo bejar zaun ravonk na. Karonn Bible sangta ki to ek ‘khuxal Dev.’—1 Tim. 1:11.

3. Amkam koslo sueog asa?

³ Soitanan Jehova vixim fott sanglea mhunn dakhounk amkam ek vhodd sueog asa. Hem ami koxem korunk zata? Hi adnea pallun: “Sorvesporachea nanvachi stuti korat!” (St. 113:1) Tor ami dusreank Jehova vixim sot sangtat tednam ami tachea nanvachi stuti vo vakhannʼnni kortat. Tumi oxem kortolim kai? Hea lekhant ami tin mhotvachim karonnam polloitolim, jea vorvim kallzantlean  Jehovachea nanvachi vakhannʼnni korunk fuddem soronk amkam modot zatoli.

AMI JEHOVAK KHUXAL KORTAT

4. Ami Jehovak vakhannttat tednam to kiteak khuxal zata? Ek udharonn diat. (Chitr pasun polloiat.)

⁴ Ami amchea sorginchea Bapachem nanv vakhannttat tednam to khub khuxal zata. (St. 119:108) Punn hacho orth, to munxam bhaxen dusreamnim apli vhoddvik korunk lagon axeun ravla oxem nhoi. Kiteak? Hea udharonna vixim chintat. Ek lhan cheddum dhanvon ieun, aplea bapaik veng marun oxem sangta: “Tum hea sonvsarantlo sogleam-von best daddy!” Tachim utram aikon bapaik ekdom borem dista, ani to khub khuxal zata. Punn hacho orth aplea dhuven apli vhoddvik korunk lagon to bapui axeun ravla oxem nhoi. Khorem mhunnttlear to tacho mog korta dekhun, tem taka kitlem upkari asa ani tacho kitlo mog korta hem taka sangta tednam, to khub khuxal zata. Toxench, aplea dhuvek aslolea hea borea gunnank lagon, vhoddlem zalea uprant tem khuxal ravonk pavtolem mhunn to zannam. Tor osleach sarkea karonnank lagon, amcho sogleam-von vorto Bapui Jehovachi ami vakhannʼnni kortat tednam to khub khuxal zata.

5. Ami Jehovachi vakhannʼnni kortat tednam Soitanacho khoincho arop fott mhunn ami dakhoun ditat?

⁵ Ami amchea sorginchea Bapachi vakhannʼnni kortat tednam, Soitanan amcherui ghatlolo arop fott mhunn ami dakhoun ditat. Karonn porikxechea vellar konnuch munis Jehovak visvaxi ravcho na mhunn Soitanan amcher arop ghatla. Toxench, ami Devachea nanva vixim sot kollounk xokonant, ani amchea faideak lagon Devachi seva korop soddun ditolim mhunn tannem sanglam. (Job 1:9-11; 2:4) Punn Joban visvaxi ravon Soitan ek fottkiro mhunn dakhoun dilem. Amchea vixim kitem? Jehova vixim sot sangon ani visvaxiponnan tachi seva korit ravon taka khuxal korunk ami vinchun kaddunk zata. (Mho. 27:11) Ho amkam aslolo kitlo vhoddlo man nhoi!

6. Ami Raza David ani Levitanchi dekh koxi gheunk zata? (Nehemias 9:5)

⁶ Jehovachim visvaxi sevokam tacho khub mog kortat dekhun tim kallzantlean tachem nanv vakhannunk sodhtat. Raza David pasun oxench korunk sodhtalo dekhun, tannem oxem boroilem: “Otmea mhojea, Sorvesporachi vakhannʼnni kor! sogllea monan, kallzan ani sokten Tachea Povitr Nanvachi vakhannʼnni kor!” (St. 103:1) Jehovachem nanv vakhannop mhunnttlear, Jehovak vakhannop mhunn David zannam aslo. Jehovachea nanva vixim chintʼtana, taka kosle gunn asat ani tannem kel’lim vhoddlim-vhoddlim ojapachim kamam amchea monant ietat. Tea pasot David, Jehovachem nanv povitr korunk ani tem vakhannunk sodhtalo. Ani to hem “sogllea monan, kallzan ani  sokten” korunk sodhtalo. Tache bhaxen Levitamnim pasun Jehovachem nanv vakhannunk fuddakar ghetlo. Ani tannim Jehovachi kitli-i vakhannʼnni kelear pasun, te purnn toren tachea povitr nanvak favo ti vakhannʼnni diunk pavchenant mhunn tannim khaltikaien vollkhon ghetlem. (Nehemias 9:5 vachat.) Tor hea toren, Jehovache sevok purnn kallzan ani khaltikaien tachem nanv vakhannttale tednam, tankam khub khuxalkai mellttali mhunn kainch dubhav na.

7. Porgottnni kortana ani amchea dispottʼttea jivitant ami Jehovachi vakhannʼnni koxi korunk zata?

⁷ Ami Jehovak kitlim upkari asat ani tacho kitlo mog kortat tem dison ieta tea toren ami dusream lagim ulounk zata. Porgottnni kortana, ami lokank Jehovak lagim soronk modot korunk sodhtat. (Jak. 4:8) Zoso Jehova amcho mogall Bap zaun asa, teach bhaxen tankam dislolem amkam zai. Tea pasot, Bible-antlean Jehovachea gunnam vixim, zoxem tacho mog, neai, zannvai ani xokte vixim sangonk amkam khub khuxalkai bhogta. Toxench ami Jehovachi dekh ghetat tednam pasun, ami tachi vakhannʼnni kortat ani taka khuxal kortat. (Ef. 5:1) Ani ami oxem kortat tednam sonvsarantlea noxttea lokam poros ami vegllim asat mhunn lokank dison ietolem ani tachem karonn tim zannam zaunk sodhtolim. (Mt. 5:14-16) Tor dispottʼttea jivitant ami tanchea lagim uloitana tachem karonn ami tankam somzaunk zata. Hea vorvim khalti kallzachim, Jehovak lagim sortolim. Tor hea vattamnim ami Jehovachi vakhannʼnni kortat tednam ami tachem kalliz khuxal kortat.—1 Tim. 2:3, 4.

AMI JEZUK KHUXAL KORTAT

8. Jehovachem nanv vakhannche vixim Jezun sogleam-von borem udharonn koxem dovorlam?

⁸ Jezuk soddun, sorgar vo prithumer aslolo anik konnuch Jehovak itle bore toren vollkhona. (Mt. 11:27) Jezu Jehovacho khub mog korta, ani Jehovachem nanv vakhannche vixim tannem sogleam-von borem udharonn dovorlam. (Ju. 14:31) Tea pasot morchea adlea rati tachea Bapa lagim magnnem kortana, tannem hea prithumer kelʼlea sogleam-von mhotvachea kama vixim oxem mhunnttlem: “Hanvem tankam tujem nanv kolloilam.” (Ju. 17:26) Tor Jezuchea hea utrancho orth kitem aslo?

9. Jehova vixim bore toren somzaunk Jezun kosli vopar sangli?

⁹ Jezun lokank fokot Devachem nanv Jehova itlench sangonk na. Karonn jea Judevam lagim to uloilo tim Devachem nanv zannam aslim. Punn Jezun tankam ‘Jehova vixim somzailem.’ (Ju. 1:17, 18) Udharonnak, Hebrev Bhaxent Boroilʼlea Pustokamnim Jehova doiall-movall mhunn sanglam. (Sutt. 34:5-7) Ani hem anik bore toren somzaunk, Jezun sanddlolea putachi ani tachea bapaichi vopar sangli. Tea voparint, to put “poisuch astana” tacho bapui taka mellonk dhanvon voita, taka veng marta ani taka kallzantlean bhogxita. Hantuntlean Jehova kitlo doiall-movall mhunn amkam anik bore toren somzonk modot zata. (Luk. 15:11-32) Tor Jehova khoreponnim koslo Bapui asa tem somzonk Jezun dusreank modot keli.

10. (a) Jezun aplea Bapachem nanv uzar kelem ani dusreamnim toxem kelʼlem taka zai aslem mhunn ami koxim zannant? (Marku 5:19) (Chitr pasun polloiat.) (b) Aiz ami kitem kel’lem Jezuk zai?

¹⁰ Itlench nhoi, dusreamnim aplea Bapachem nanv uzar kel’lem Jezuk zai aslem. Tachea tempa voile thodde dhormik fuddari chintʼtale ki Devachem nanv khub povitr asa, ani ami tem uzar korchem nhoi. Punn Jezun toslem chintop apnnaunk na. Ani tannem aplea Bapachea nanvak favo to man dilo. Hem ami koxim zannant? Tannem Gerazenachea vattarant noxtte dut boslolo eka munxak boro kelo tednam thoinche lok bhiele, ani to vattar soddun voch mhunn Jezu lagim vinoti korunk lagle. Tor Jezuk thoim ravonk mellonk na. (Mk. 5:16, 17) Tori astana, aplea Bapachem nanv dusreank kollʼllolem taka zai aslem dekhun tannem tea munxak apnnem  nhoi, punn Jehovan tache pasot kitem kelam tem dusreank sangonk lailem. (Marku 5:19 vachat.) a Aiz ami pasun oxench kel’lem Jezuk zai. Mhunnche, ami sonvsarbhor Jehovachem nanv porgottlolem taka zai. (Mt. 24:14; 28:19, 20) Ani ami oxem kortat tednam amcho Raza Jezu khub khuxal zata.

11. Jezun aplea xisank kitea pasot magonk xikoilem, ani oxem korop kiteak gorjechem? (Ezekiel 36:23)

¹¹ Aplem nanv povitr korop ani tacher ghatlolo arop fott mhunn dakhoun divop, Jehovacho udʼdhex zaun asa mhunn Jezu zannam aslo. Ani heach pasot Jezun tachea xisank oxem magnnem korunk xikoilem: “Amchea Bapa sorginchea, tujem nanv povitr zaum.” (Mt. 6:9) Ho sogleam-von mhotvacho vixoi zaun aslo mhunn Jezu zannam aslo. (Ezekiel 36:23 vachat.) Tor Jehovachem nanv povitr korunk tannem jitlem kelem, titlem anik konnench korunk na. Tori astana Jezuk dhorlo tednam, tannem tachea Bapacho opman kela mhunn tachea dusmanamnim tacher arop ghatlo. Tor hea vellar Jezuk kitli khont bhogli astoli tem ami chintunk zata. Karonn hem sogleam-von vhoddlem patok aslem mhunn Jezu zannam aslo. Ani heach pasot taka dhorun vhorcho vell lagim pavlo tednam, tachem “mon itlem dukhi” zaunk hem mukhel karonn zaun aslem mhunn ami mhunnonk zata.—Luk. 22:41-44.

12. Ekdom kotthin poristhitint pasun Jezun aplea Bapachem nanv koxem povitr kelem?

¹² Tor aplea Bapachem nanv povitr korunk Jezun sogle toreche tollmolle, boglanttam ani opmanachim utram soslim. Punn hea vixim taka loz dispa sarkem kainch naslem. (Heb. 12:2) Karonn tannem sodanch aplea Bapachi adnea pallʼlli, ani tannem kainch vaitt korunk na mhunn to zannam aslo. Toxench tea ekdom kotthin vellar, Soitan taka tras korta mhunn to zannam aslo. (Luk. 22:2-4; 23:33, 34) Ani Jezu atam aplem visvaxiponn soddun ditolo oxem Soitanan chintlem. Punn toxem kainch zaunk na. Tor Soitan vhoddlo fottkiro, ani ekdom kotthin poristhitint pasun ek munis Jehovak visvaxi ravonk xokta mhunn Jezun dakhoun dilem.

13. Amchea Raza Jezuk khuxal korunk ami kitem korum-ia?

¹³ Tor amchea Raza Jezuk ami khuxal korunk sodhtat zalear, ami Jehovachem nanv vakhannit ravom-ia, ani tachea sobit gunnam vixim zannam zaunk dusreank modot korum-ia. Oxem ami kortat tednam ami Jezuchi dekh ghetat  mhunn dakhoitolim. (1 Ped. 2:21) Toxench, Jezu bhaxen ami Jehovachem kalliz khuxal korunk pavtolim, ani tacho dusman Soitan loz naslolo ani fottkiro mhunn dakhoun diunk pavtolim.

AMI DUSREANCHO JIV SALVAR KORUNK PAVTAT

14-15. Ami lokank Jehova vixim xikoitat tednam koslo boro porinnam zaunk xokta?

¹⁴ Ami Jehovachem nanv vakhannttat tednam, ami dusreancho jiv salvar korunk pavtat. Koso? Soitanan ‘bhavarth nasloleanchim monam kuddʼddim keleant.’ (2 Kor. 4:4) Taka lagon tannem posrailʼleo fotti, zoxem Dev mhunnttlear nanch, Dev amchea thaun ekdom pois asa, taka munxakullachem kainch poddon vochonk na, to khub krur ani to vaitt kortoleank sasnak tollmollaita, heo fotti tim sot mhunn mantat. Tor Soitan heo fotti kiteak posraita? Karonn to Jehovachem nanv piddʼddear korunk sodhta, ani lok Devak lagim sorlolim taka naka. Punn ami porgottʼttat tednam, ami Soitanak haroitat. Karonn ami amchea Bapa vixim sot kolloitat. Hea toren ami tachem povitr nanv vakhannttat. Hacho porinnam kitem zala?

¹⁵ Devachem Utor ekdom bolixtt zaun asa. Tor tem uzar korun ami lokank Jehova vixim kolloitat, ani taka kosle gunn asat tem tankam sangtat tednam, porinnam ekdom boro zata. Karonn oxem kel’lean hea lokanche dolle eka orthan ukte zatat ani amchea mogall Bapak kitle sobit gunn asat tem tim zannam zaunk pavtat. Zoxem taka bhorpur xokti asa mhunn zannam zaun tim ojap zatat. (Iz. 40:26) To nit korpi Dev mhunn tankam kolltta tednam tim tacher visvas dovrunk xiktat. (D.S. 32:4) Toxench taka khub zannvai asa mhunn zannam zaun ti khuxal zatat. (Iz. 55:9; Rom. 11:33) Ani Dev mhunnttlear moguch mhunn tankam kollon ieta tednam tankam bhuzvonn melltta. (1 Ju. 4:8) Hea toren tim sovkas-sovkas korun Jehovak lagim sortat toxim, sasnak tachim bhurgim mhunn jieuncho tancho bhorvonso ghott zata. Khorench, lokank amchea Bapak lagim soronk modot korunk amkam ek vhoddlo sueog asa. Ani ami tankam modot kortat tednam Jehova amkam ‘aplea sangata kam korpi’ mhunn lekhta.—1 Kor. 3:5, 9.

16. Devachem nanv zannam zalʼlean thoddeanchem jivit koxem bodolʼlem? Udharonnam diat.

¹⁶ Survatek ghoddie ami lokank, Devachem nanv Jehova itlench xikounk puro. Punn itlench  zannam zaun pasun, khaltea kallzachea lokanchem jivit bodlonk xokta. Hea vixim amkam Aaliyah b nanvachea eka tornnattea bailecho onnbhov asa. Ti Kristanv dhormantli nasli. Tichea dhormant ti khuxal nasli, ani apunn Devak lagim na oxem tika distalem. Punn ti Jehovachea Sakxeam sangata Bible xikonk lagli tednam, tichem akʼkhem jivit bodol’lem. Karonn Dev aplo ek Ixtt mhunn ti pollounk xokli. Toxench, zaitea Bible-amnim Devachea nanva bodlek, Somi oslim her utram uzar keleant mhunn zannam zaun ti ojap zali. Tor Jehovachem nanv zannam zalea uprant tinnem khuxalkaien oxem mhunnttlem: “Mhojea sogleam-von borea Ixttak ek nanv asa! Hem zannam zavop ek vhodd besanv oxem mhaka bhogta, ani atam mhaka monachi xanti mellʼllea.” Oxench Steve-a sangata pasun ghoddlem. To ek songitkar ani oslea famili thaun aslo, jim Judev dhorm khub bariksannen pallttalim. Punn to khoincheach dhormacho bhag zaunk sodhinaslo. Karonn tannem dhormamnim zaitem dhongiponn polloilʼlem. Punn tachi mummy melea uprant, Jehovachim Sakxi konnacho tori Bible obheas ghetalim tednam, to-ui thoim bosonk toiar zalo. Tea vellar Devachem nanv zannam zaun taka khub borem dislem. To sangta: “Devak ek nanv asa mhunn mhaka kednanch khobor nasli. Tor tachem nanv zannam zalea uprant, to khoreponnim asa mhunn hanv somzonk xoklom, ani mhaka ek Ixtt mellʼllo.”

17. Jehovachea nanvachi vakhannʼnni korunk tumi kiteak nichov kela? (Chitr pasun polloiat.)

¹⁷ Tumi porgottnnechem ani xikoupachem kam kortat tednam, Devachem povitr nanv lokank kolloitat kai? Taka kosle gunn asat tem zannam zaunk tumi tankam modot kortat kai? Tumi oxem kortat zalear tumi Devachea nanvachi vakhannʼnni kortat. Tor Devak kosle gunn asat tem lokank zannam zaunk modot korun, tachea povitr nanvachi vakhannʼnni korit ravat. Oxem kelʼlean tumi lokancho jiv salvar korunk pavtolim, ani amcho Raza Jezu Kristachi dekh gheunk pavtolim. Ani sogleam-von mhotvachem mhunnttlear, amcho mogall Bap Jehovachem kalliz tumi khuxal korunk pavtolim. Tor ‘thambonastana Jehovachea nanvachi stuti vo vakhannʼnni korit ravat!’—St. 145:2.