1-2. Bichi byakarhurhabala kumenya okuntu Yehova anachiyunva okubilolere obubeshi banaderha eju yage?

 RHURHOLE omufano: Omuntu ozigiire anakuderha kubi. Omenyere oku buli bubeshi, aliko bantu baguma babuyemerere. Echokugayisa bwenene, banarhondera kububwira abandi nabo banabuyemera. Gurhe wakachiyunva? Akaba onalaga oku bantu n’oku renge lyawe linja, okukuderha kubi kwa karhuma wachiyunva kubi. Arhali ntyo?—Mez. 22:1.

² Ogola mufano gwakarhurhabala rhumenye okuntu Yehova anachiyunva amango erenge lyage lyamazingiswa. Muguma mu bamalaika bage amubeshera oku mukazi w’oburhanzi, Eva. Eva naye av’ayemera obola bubeshi. Eju y’obola bubeshi Adamu na Eva baba bigamba embere za Yehova. Byaja byaba gurhe? Abantu boshi baba banya-byaha banashokola olufu. (Mwa. 3:1-6; Ro. 5:12) Ebibazo byoshi biliho zene oku gulu, nk’olufu, evita n’amalibuliko, biliho eju y’obubeshi Shetani aderhaga omu bustani ye Edeni. Ka Yehova anayunva ababere eju y’obola bubeshi n’ebibazo byoshi bwalerhere? Nechi. Aliko, Yehova arhali mukali arhanabika mujinya. Ahali h’okubantyo, anayorha ali “Mungu w’obusime.”—1 Ti. 1:11.

3. Lukengo luhe rhuherhe?

³ Rhwakarhabala omu kuyerekana oku Shetani abeshere Yehova. Rhunajira ntyo omu kukenga elila rhegeko: “Musingize ezino lya Yehova.” (Zb. 113:1) Rhunasingiza ezino lya Yehova, amango rhuli rhwabwira abandi obukweri oku bimulolere. Wasingiza ezino lya Yevova si? Lekaga rhuganire ku mpanvu 3 zʼakamaro zakarhurhabala rhusingize ezino lya Mungu n’omurhima gwerhu goshi.

RHUNASIMISA YEHOVA AMANGO RHWAMASINGIZA EZINO LYAGE

4. Bulagurhe okusingiza kwerhu kunasimisa Yehova? Fasiriya. (Olole n’efoto.)

⁴ Rhunasimisa Darha w’embigu amango rhwamasingiza ezino lyage. (Zb. 119:108) Rhulonzeze kuderha oku Mungu ogala  byoshi ali kuguma n’abantu barhashinganene, banalonza abandi babasingize yi babaheba omurhima si? Nanga. Rhuganire k’ogula mufano: Waza oku kanyere kadorho kali kalibirha kw’eshe kanamuhobera n’oku mubwira ntya: “We muzere mwinja omu gulu lyoshi!” Eshe anasheka, anayunva na busime bunene. Bulagurhe? Rhwakaderha si okw’ali muzere onachisuzagura olonzeze asingizwe n’omwana wage? Rhurhakaderha ntyo bulala azigire omwali anagwerhe obusime bulala omwali amuyerekere okw’amuzigire anagwerhe eshukrani. Amenyere okw’engeso zili nk’ezola zili omu byakalerhera omwana wage obusime okw’anali agenderera kukula. Konako, Yehova oli Darha mukulu kuboshi, anayunva asimire amamgo rhwamamusingiza.

5. Amango rhwamasingiza Yehova, bubeshi buhe rhunaba eyi rhwamaheba embuga?

⁵ Amango rhwamasingiza Darha w’embingu, rhwanarhabala kuyerekana oku buli chintu choshi Shetani akaderha ku buli muguma werhu, buli bubeshi. Shetani anaderha oku nta muntu wakaderhera ezino lya Mungu oku bwimana. Oku nta muntu wakayorha mwimana ku Mungu amango amageregezwa. Kandi oku rhweshi nka rhwamabona echintu chakarhulerhera enyungu rhwakaleka kukolera Mungu. (Yob. 1:9-11; 2:4) Aliko Yobu aligenderere kukolera Mungu oku bwimana anayerekana oku Shetani ali mubeshi. Nawe wagenderera kubera mwimana ku Mungu si? Buli muguma werhu akachishoga kuderhera Darha w’embingu n’okumulerhera obusime omu kugenderera kumukolera oku bwimana. (Mez. 27:11) Kweri luli lukengo okujira ntyo.

6. Gurhe rhwakayiganya omufano g’Omwami Daudi n’ogw’Abalawi? (Nehemia 9:5)

⁶ Balala bazigiire Mungu banalonza kusingiza ezino lyage n’omurhima gwabo goshi. Mwami Daudi ayandikire ntya: “Leka nsingize Yehova; leka buli chintu choshi chili omu mubiri gwani chisingize ezino lyage lichesibwa.” (Zb. 103:1) Daudi alimenyere ok’okusingiza ezino lya Yehova kuli kusingiza Yehova yewe yenyine. Amango rhwamayunva ezino lya Yehova, rhwanawaza ali muntu wanyabachi, rhwanawaza oku bilolere engeso zage zoshi zinja bwenene, n’oku bintu byoshi binja bwenene alemere. Daudi alilonzeze kukolera ezino ly’Eshe nka lichesibwa n’oku lisingiza. Alilonzeze kukolesa “byoshi bili omu mubiri gwage” k’okuderha omurhima gwage goshi. Intyo kon’oko, Abalawi nabo baliyerekene olwiganyo lwinja omu kusingiza Yehova. Baliyemerere okubwirhohye oku barhaherhe ebinwa bikwanene omu kusingiza Yehova okw’akwanene koshi. (Osome Nehemia 9:5.) Buzira ngangane,  ebinwa bili nk’ebyola by’obwirhohye binarhengere okumurhima binasimisa omurhima gwa Yehova.

7. Gurhe rhwakasingisa Yehova omu kasi kerhu k’amahubiri n’omu kalamo kerhu ka buli lusiku?

⁷ Zene, rhwakasimisa Yehova omu kuderha oku bimulorere omu njira eyerekene eshukrani, na kangana gurhe rhumuzigire. Amango rhuli omu kasi k’amahubiri, rhubarhubikire omu bwenge ok’omuhigo gwerhu gukulu kuli kurhabala abandi bayegere Yehova, n’okubarhabala babone Darha muzigirwa kuguma n’oku rhunamubona. (Yak. 4:8) Rhugwerhe busime bunene bwenene b’okuyereka abantu ebye Biblia ederhere oku bilolere Yehova, obuzigire bwage, ehaki, obwengehe, emisi n’ezindi ngeso zage zinja. Kandi rhunasingiza Yehova n’okumusimisa omu kujira okwerhu koshi yirhumuyiganya. (Efe. 5:1) Amango rhwamajira ntyo, abandi bakabona oku rhurhali kuguma n’abantu ba mu linola gulu libi. (Mt. 5:14-16) Amango rhuli rhwaganira nabo, rhwakabayereka bulagurhe rhurhaba kuguma n’abo. Omu njira eli nk’eyola, rhwanaba eyi rhuli rhwasingiza ezino lya Yehova. Echola chinarhuma abantu b’emirhima minja bayegera Mungu werhu. Amango rhwamasingiza Yehova omu njira eli nk’eyola, rhwanasimisa omurhima gwage.—1 Ti. 2:3, 4.

RHUNASIMISA YESU AMANGO RHWAMASINGIZA EZINO LYA YEHOVA

8. Bulagurhe Yesu guli mufano gwinja bwenene omu kusingiza ezino lya Yehova?

⁸ Intaye n’omuguma omu mbingu changwa oku gulu oyinji Yehova bwinja kulusha Yesu. (Mt. 11:27) Yesu aba azigire Eshe anahanire olwiganyo lwinja omu kusingiza ezino lya Yehova. (Yoh. 14:31) Omu sala abwiraga Eshe ebudufu embere afe, aliderhere echintu ch’akamaro akolere omu kasi kage k’amahubiri hanola oku gulu. Aliderhe ntya: “Nabamenyeseze ezino lwawe.” (Yoh. 17:26) Gurhe Yesu alijirire ntyo?

9. Gurhe Yesu alikoleseze omufano omu kufasiriya oku bilolere Eshe omu njira eyunvikene bwinja?

⁹ Yesu alikolere binene kulusha okubwira abantu okw’ezino lya Mungu ye Yehova. Abayahudi Yesu aliri ayigiriza babaga bamenyere ezino lya Mungu. Aliko, Yesu alikolere n’obushiru “omu . . . kubafasiriya oku bimulolere.” (Yoh. 1:17, 18) Omufano, Amandiko m’Echiebraniya mayerekene oku Yehova ali Mungu w’akababaro n’obubabale bunene. (Kut. 34:5-7) Yesu alirhabere y’obola bukweri buyunvikana bwinja bwenene kulusha echindi chihe, amango aliri aganira oku mufano g’omwana w’echirara n’eshe. Amango rhwamasoma okuntu eshe alijirire amango abona omugala amahungama chiro “akaba okw’alichiri hale naye,” alibirha yibabuganana, amuhobera, anamubabalira n’omurhima goshi, rhwanabona bwinja bwinja gurhe akababaro n’obubabale bwa Yehova biba. (Lu. 15:11-32) Yesu alirhabere abandi babone Yehova aba muntu wanyabachi kweri kweri.

10. a) Bulagurhe rhumenyere oku Yesu alikoleseze ezino ly’Eshe omu kulonza abandi nabo bajire ntyo? (Marko 5:19) (Olole n’efoto.) b) Bichi Yesu alonzeze rhujirage zene?

¹⁰ Yesu naye alilonzeze abantu bakolese ezino ly’Eshe si? Nechi. Nkabaga bakulu baguma b’amadini balichizerere ok’okuderha ezino lya Mungu kuli kubula obukenge, aliko Yesu yewe arhayemeraga emigenzo eli nk’eyola erhali omu mandiko yamubuza kuhereza ezino ly’Eshe olukengo. Waza oku mango afumyaga omulume waliherhe abazimu omu eneo ya Bagerasene. Abantu bayubaha n’okurhebereza Yesu arhenge mw’eyola eneo, naho ava agenda. (Mk. 5:16, 17) Aliko, Yesu alilonzeze ezino lya Yehova limenyikane mw’eyola eneo. Bobola abwira oyola mulume afumyaga,  okw’arhabwiraga abantu ebi Yesu ajiraga s’ababwire ebi Yehova ajirire. (Osome Marko 5:19.) a Yesu alonzeze nerhu rhujire okola kon’oko omu kumenyesa ezino ly’Eshe omu gulu lyoshi! (Mt. 24:14; 28:19, 20) Amango rhwamajira echerhu chigabi rhwanasimisa Omwami werhu, Yesu.

11. Gurhe Yesu aliyigirize abanafunzi bage bagendage basalira, na bulagurhe kuli kw’akamaro? (Ezekieli 36:23)

¹¹ Yesu alimenyere ok’obulonza bwa Yehova kuli kuchesa ezino lyage n’okulikula kw’ebisobe byoshi. Echola ch’echarhumaga Mwalimu werhu ayigiriza abanafunzi bage bagende basalira ntya: “Darha oli omu mbingu, ezino lyawe lichesibwe.” (Mt. 6:9) Yesu alimenyere okw’echola ch’echibazo chʼakamaro bwenene chilolere ebilemwa byoshi. (Osome Ezekieli 36:23.) Nta chilemwa n’echiguma chigwerhe obwenge omu mbingu changwa oku gulu chachigerere kuchesa ezino lya Yehova kuguma na Yesu. Aliko, amango abanzi ba Yesu bamufarha, balimubeshere oku chaha chihe akolere? Okw’adukangire Eshe! Yesu alimenyere bwinja bwinja ok’okudukanga Yehova changwa okuheba echisobe oku zino lichesibwa ly’Eshe, chaliri chaha chikomere bwenene. Byali muchubukire bwenene okubona bamubeshera n’okumuchira olubanja kw’amola maligo. Nkabaga eyola y’empanvu nkulu yarhumaga Yesu achiyunva “ababere loshi” amango baliri hofi kumufarha.—Lu. 22:41-44.

12. Gurhe Yesu alicheseze ezino ly’Eshe omu njira nkulu bwenene?

¹² Y’achesa ezino ly’Eshe, Yesu alilembeere amango baliri bamushurha, bamudukanga, n’okulembera buli bubeshi boshi. Alimenyere oku bulala akengere Eshe omu bintu byoshi, ntacho akayunvira eshoni. (Ebr. 12:2) Kandi alimenyere oku Shetani yew’aliri amurhera mw’ebyola bisanzi bikomere. (Lu. 22:2-4; 23:33, 34) Shetani alichizerere kw’avuna obushwekerezi bwa Yesu, aliko ntacho n’echiguma aligerereko! Yesu aliyerekene bwinja bwinja oku Shetani ali mubeshi mubi, n’oku Yehova agwerhe abakozi bemana, bakagenderera kumukolera oku bwimana chiro n’amango bali omu bibazo bikomere!

13. Gurhe wakajira y’osimisa Omwami wawe oli warhegeka?

¹³ Olonzeze kusimisa Omwami wawe oli  warhegeka si? Ogenderere kusingiza ezino lya Yehova, n’okurhabala abandi kuyiga engeso zinja zoshi za Mungu werhu. Amango wamajira ntyo, wanaba eyi wamayiganya Yesu. (1 Pe. 2:21) Kuguma na Yesu, waba eyi wamasimisa Yehova n’okuyerekana ok’omwanzi wage Shetani ali mubeshi mubi!

RHUNARHABALA KUCHUNGULA AKALAMO AMANGO RHWAMASINGIZA EZINO LYA YEHOVA

14-15. Bintu bihe bisimisize bwenene byakarhengerera amango rhwamayigiriza abantu oku bilolere Yehova?

¹⁴ Amango rhwamasingiza ezino lya Yehova, rhunarhabala kuchungula akalamo. Nka gurhe rhunajira ntyo? Nechi, Shetani “ahumizye obwenge bwabarhali bemezi.” (2 Ko. 4:4) N’okuntu byajire byaba, barhondere kuyemera obubeshi bwa Shetani buli nk’obula: Mungu arhabaho, Mungu aba hale nerhu, arhalaga oku bantu, Mungu aba munizi, nj’ayosa abantu omu muliro esiku n’amango. Shetani anaderha obola bubeshi boshi bulala abalonzeze kuhesa ezino linja lya Yehova echisobe, n’okubuza abantu baleke kuba hofi na Yehova. Aliko amango rhuli omu kasi k’okuhubiri, rhwanaba eyi rhuli rhwabuza Shetani kuhikira omuhigo gwage. Rhunayigiriza abantu obukweri oku bilolere Darha, n’okusingiza ezino lichesibwa lya Mungu werhu. Byanaja byalerha nyungu zihe?

¹⁵ Obukweri b’omu Chinwa cha Mungu bujira misi minene bwenene. Omu kuyigiriza abantu oku bilolere Yehova n’okuntu aba, kweri rhunabona echintu chinja bwenene. Abantu barhachigenderera kubera mpumi changwa kugenderera kurhebekwa na Shetani, kandi bakola bakarhondera kubona engeso zinja za Darha werhu. Banagwarha obuba eyibayunva emisi ya Mungu erhagwerhe mipaka. (Isa. 40:26) Yibayiga kumulangalira eju y’ehaki yage eshinganene. (Kum. 32:4) Yibayiga bwenene oku bilolere obwengehe bwage bunene. (Isa. 55:9; Ro. 11:33) Kandi banayunva barhulirizwe eyi bamenya oku Mungu buba buzigire. (1 Yo. 4:8) Naho eyi baba bamayegera Yehova, obulangalire bwabo b’okulama esiku n’amango nka bana ba Mungu bwanakomera bwenene. Luli lukengo lunene rhugwerhe l’okurhabala abantu bayegere Darha! Amango rhwamajira ntyo, Yehova anarhubona oku rhuli “bakozi haguma naye.”—1 Ko. 3:5, 9.

16. Gurhe bantu baguma banachiyunva bahumirwe oku murhima amango bamayunva ezino lya Mungu? Lerha emifano.

 ¹⁶ Okuburhanzi, nkabaga rhwakayigiriza abantu konyine kw’ezino lya Mungu ye Yehova. Nkabaga echola chonyine chakahindamula akalamo k’omuntu ogwerhe omurhima guli tayari. Omufano, munyere muguma oyirikirwe Aaliyah b akuliraga omu mulala gurhali gw’Abahamirizi. Aliko arhaliri atosheka n’enyigirizo z’edini lyage, arhanaliri achiyunva ali hofi na Mungu. Ebyola byoshi byalihindamukire amango arhondera kuyiga n’Abahamirizi ba Yehova. Arhondera kubona Mungu nka mwira wage. Kandi alisomerwe amango ayunva okw’ezino lya Mungu lyakulirwe omu Biblia zinene n’okuhebaho ezino ly’echeo, nka Waliha. Okumenya ezino lya Yehova kwalihindamwire akalamo kage. Aderhere ntya: “Kumbe Mwira wani mwinja ajira ezino!” Gurhe byalijire byaba? Aderhere ntya: “Zene ngwerhe murhula gunene omu murhima. Inandi nachiyunva nkegerwe bwenene.” Mulume muguma oyirikirwe Steve wakuliraga omu micho y’Echiyahudi agendaga akula emiziki. Amango abona obulyalya bw’edini alirimo av’alileka. Aliko, amango nyina amala kufa, ayemera efunzo lye Biblia haguma n’Abahamirizi ba Yehova. Byalimuhumire okumurhima bwenene amango amenya ezino lya Mungu. Aderhere ntya: “Nabaga eyi ntaza kuyiga habanakatyu oku bilolere ezino lya Mungu.” Ayongerere ntya: “Obola b’obwaliri b’oburhanzi narhegera oku Mungu abaho! Narhondera kumubona nka Muntu. Narhegera oku namapata Omwira.”

17. Bulagurhe ohigirire kugenderera kusingiza ezino lya Yehova? (Olole n’efoto.)

¹⁷ Omu kasi kawe k’amahubiri n’okuyigiriza, onaganira n’abandi bantu oku bilolere ezino lya Yehova si? Onabarhabala babone okuntu Mungu werhu aba si? Amango wamajira ntyo, wanaba ey’oli wasingiza ezino lya Mungu. Rhujage rhwagenderera kusingiza ezino lichesibwa lya Yehova omu kurhabala abantu, bamenye ali Muntu wanyabachi. Omu kujira ntyo, wachungula akalamo. Waba eyi wamakulikira obwerekezi b’Omwami wawe, Yesu Kristu. N’echakamaro bwenene, wasimisa Yisho muzigirwa, Yehova. Rhujage rhwahigirira “kusingiza ezino [lyage] esiku n’amango”!—Zb. 145:2.